ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါယနူၤအါရံၤ ၄-၁၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၃ မိၤၡ့ ၁၈-၁၉
“အိၣ်ဒီးတၢ်သကဲာ်ပဝးလၢ အကဆှီ”
ဒီသဒၢလီၤနသးလၢ မုၣ်ကီၤလံၢ် အပျံၤသကွီၤ
ယဟိဝၤယွၤ ပာ်ဖျါထီၣ်ဝဲ ပှၤတခီဘီမုၢ်ဖိ ဖဲန့ၣ်တဖၣ် အတၢ်သကဲာ်ပဝးလၢ အလီၤရၢၢ်တဖၣ် ဒီးအဝဲတဲဘၣ် ပှၤအံၣ်စရ့လးဖိတဖၣ်လၢ “မၤဒ်ပှၤကနၤဧၣ်ဖိ လၢယဒုးလဲၤနုာ်သု ဆူအကီၢ်အပူၤ အသိးန့ၣ်တဂ့ၤ. . . အဝဲသ့ၣ်အတၢ်မၤတဖၣ်အံၤ မၤဘၣ်အၢထံကီၢ်လီၤ. လၢတၢ်န့ၣ်အဃိ ယွၤစံၣ်ညီၣ်ထံကီၢ်” လီၤ. ပှၤကနၤဧၣ်ဖိတဖၣ် အတၢ်အိၣ်မူန့ၣ် လီၤသးဘၣ်အၢဒီး လီၤရၢၢ်ဒိၣ်မးအဃိ ယွၤလၢအစီအဆှံတဂၤအံၤ ထံၣ်အဝဲသ့ၣ် အထံအကီၢ်ဒ် ထံကီၢ်လၢ အလီၤသးဘၣ်အၢလီၤ.—၃ မိၤၡ့ ၁၈:၃, ၂၅, ခ့ခါစှီၤကျိာ်.
ယဟိဝၤယွၤပၢဆှၢဝဲ အပှၤဂီၢ်မုၢ်
၁၃ ပှၤတီခိၣ်ရိၤမဲတၢ်လၢ ထံကီၢ်အဂၤတဖၣ် အတၢ်သ့ၣ်ညါနၢ်ပၢၢ် တအိၣ်လၢလၢပှဲၤပှဲၤဘၣ်. အဒိ ပှၤကနၤဧၣ်ဖိဒီး အပှၤတီခိၣ်ရိၤမဲတၢ်တဖၣ်န့ၣ် မၤတၢ်အၢတၢ်သီ ဒ်သိးဒီးတၢ်မၤကမၣ်မုၣ်ကမၣ်ခွါ ဒီးအဘူးအတံၢ်, ပိာ်မုၣ်ကဒဲကဒဲပိာ်ခွါကဒဲကဒဲ မံဃုာ်လိာ်သး, တၢ်မံဃုာ်ဒီးဆၣ်ဖိကီၢ်ဖိ, တၢ်လုၢ်ထီၣ်ဖိဒံဖိသၣ် ဒီးတၢ်ဘါတၢ်ဂီၤတၢ်ဖှီၣ်န့ၣ်လီၤ. (၃ မိၤၡ့ ၁၈:၆, ၂၁-၂၅) ဒ်န့ၣ်အသိး ပှၤဘၤဘူၤလိၣ်ဖိ ဒီးပှၤအဲၤကူပတူးဖိတဖၣ် အခိၣ်အနၢ်စ့ၢ်ကီး တသ့ၣ်ညါတၢ်သိၣ်တၢ်သီလၢ အဘၣ်ဃးဒီး တၢ်ကဆှဲကဆှီ ဒ်ယွၤအပှၤဂီၢ်မုၢ်တဖၣ်အသိးဘၣ်. (၄ မိၤၡ့ ၁၉:၁၃) ဘၣ်ဆၣ် ပှၤအံၣ်စရ့လးဖိတဖၣ်န့ၣ် သ့ၣ်ညါဝဲလၢအခိၣ်အနၢ်လၢ အိၣ်ဒီးတၢ်သးတီတဖၣ် ဂုာ်ကျဲးစၢးဟ့ၣ်ဂံၢ်ဟ့ၣ်ဘါ အဝဲသ့ၣ်ဒ်သိး ကအိၣ်ဒီးတၢ်ဘူၣ်တၢ်ဘါလၢအကဆှီ, နီၢ်ခိတၢ်ကဆှဲကဆှီ ဒီးကဘၣ်ဟးဆှဲးဝဲ တၢ်မၤကမၣ်မုၣ်ကမၣ်ခွါစ့ၢ်ကီးလီၤ. လၢတၢ်ဂ့ၢ်အံၤအဃိ အဝဲသ့ၣ်သ့ၣ်ညါဘၣ်လၢ ယဟိဝၤယွၤန့ၣ် ပၢဆှၢဝဲအပှၤဂီၢ်မုၢ်န့ၣ်လီၤ.
ဘၣ်ဃးဒီးတၢ်မၤအသးလၢ အလီၤသးအုး တဖၣ်န့ၣ် ကစၢ်ယွၤကမၤဝဲဒ်လဲၣ်
ပှၤလၢအဆဲးမၤတၢ်အၢတၢ်သီ, ပှၤလၢအခိၣ်ကိၤဒီး တဆီတလဲအသးတဖၣ်န့ၣ် တၢ်ကမၤအသးဒီးအဝဲသ့ၣ်ဒ်လဲၣ်. ဆိကမိၣ်ကွၢ် တၢ်အၢၣ်လီၤအီလီၤတခါအံၤတက့ၢ်. “အဂ့ၢ်ဒ်အံၤ, ပှၤအတီအလိၤကအိၣ်ကဆိးလၢ ထံဧိၤကီၢ်ဧိၤအပူၤ, ဒီးပှၤလၢပှၤပှဲၤကအိၣ်ဒၣ်တၢ်လၢအပူၤလီၤ. မ့မ့ၢ်ပှၤတတီတလိၤဘၣ်န့ၣ် ကဘၣ်တၢ်ဒီၣ်တဲာ်ကွံာ်လၢကီၢ်ပူၤ, ဒီးပှၤမၤကမၣ်တၢ်ဖိန့ၣ် ကဘၣ်တၢ်ထဲးကွံာ်အီၤလၢအပူၤလီၤ.” (ကတိၤဒိ ၂:၂၁, ၂၂) ပှၤအၢပှၤသီတဖၣ် ဒိၣ်စိဒိၣ်ကမီၤတသ့လၢၤဘၣ်. ဟီၣ်ခိၣ်လၢအပှဲၤဒီးတၢ်မုာ်တၢ်ခုၣ်အပူၤန့ၣ် ပှၤလၢအိၣ်ဒီးတၢ်ဒိကနၣ်တဖၣ် ကပူၤဖျဲးထီၣ်ဝဲ ကယီကယီလၢ တၢ်တလၢတပှဲၤလၢ အန့ၢ်သါဘၣ်ဝဲတဖၣ်လီၤ.—ရိမ့ၤ ၆:၁၇, ၁၈;၈:၂၁..
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၆/၁၅ ၂၂ ¶၁၁
“ယအဲၣ်ဒိးနတၢ်သိၣ်တၢ်သီန့ၣ် ဆံးဒိၣ်လဲၣ်”
၁၁ စီၤမိၤၡ့ အတၢ်မၤလိာ်အပူၤ ဘၣ်ဃးဒီးတၢ်ထၢဘူစဲၤန့ၣ် ပာ်ဖျါထီၣ်ဝဲလၢ ယဟိဝၤယွၤ ကဟုကယာ်ဝဲ အပှၤဂီၢ်မုၢ်လီၤ. ယဟိဝၤယွၤ မၤလိာ် ပှၤအံၣ်စရ့လးဖိလၢ အမၤစံာ်တဂၤန့ၣ်လၢ ဖဲအဝဲသ့ၣ် ပာ်ဖှိၣ်က့ၤ တၤသူတၤသၣ် အဆၢကတီၢ် တၤသူတၤသၣ်လၢ အလီၤတဲာ်တဖၣ်န့ၣ် အဝဲသ့ၣ် ကဘၣ်ပျဲဝဲလၢ ပှၤဖှီၣ်ဖိယာ်ဖိတဖၣ် ကဟဲထၢဝဲအဂီၢ်လီၤ. ပှၤထူစံာ်ဖိတဖၣ်န့ၣ် ဖဲအကူးတၢ်အဆၢကတီၢ် တဘၣ်ကူးဝဲတုၤလၢ အစံာ်အနၢၣ်ထံးဘၣ်. ဒီးဖဲအဝဲသ့ၣ်ဒဲးဝဲ စပံးသၣ်ဒီး သ့ၣ်စၤယံးအသၣ် အဆၢကတီၢ် တၤသၣ်လၢအလီၤတဲာ်တဖၣ်န့ၣ် တဘၣ်ထၢဖှိၣ်က့ၤဝဲဘၣ်. လၢတၢ်တပလီၢ်သူၣ်ပလီၢ်သးပူၤ ဘုကဒိၣ်မ့ၢ်အိၣ်တ့ၢ်လၢ စံာ်ပျီပူၤန့ၣ် အဝဲသ့ၣ် တဘၣ်ထၢက့ၤဝဲဘၣ်. တၢ်အံၤမ့ၢ်ဝဲ တၢ်ရဲၣ်တၢ်ကျဲၤလၢ အိၣ်ဒီးတၢ်အဲၣ်တၢ်ကွံ လၢပှၤဖှီၣ်ဖိယာ်ဖိ, ပှၤတခီဘီမုၢ်ဖိ, ပှၤဖိၣ်ဃဲဒီး မုၣ်ကမဲတဖၣ်အဂီၢ်လီၤ. တၢ်ထၢဘုစဲၤန့ၣ် တမ့ၢ်တၢ်မၤလၢ အဘီၣ်အညီသနာ်က့ အဝဲသ့ၣ် မ့ၢ်မၤဝဲဒ်န့ၣ်န့ၣ် တလိၣ်လၢ ကဘၣ်ဟးဃ့အီၣ်တၢ်လၢၤဘၣ်.—၃ မိၤၡ့ ၁၉:၉, ၁၀; ၅ မိၤၡ့ ၂၄:၁၉-၂၂; စံးထီၣ်ပတြၢၤ ၃၇:၂၅.
လါယနူၤအါရံၤ ၁၁-၁၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၃ မိၤၡ့ ၂၀-၂၁
“ယဟိဝၤယွၤ ပာ်လီၤဆီအပှၤဂီၢ်မုၢ်”
တၢး၀၄ ၁၀/၁၅ ၁၁ ¶၁၂
ပၤရဒံစူး—လၢနဂီၢ်
၁၂ တၢ်လၢပတကြၢး ကွၢ်ကပာ်ကွံာ်အီၤဘၣ်န့ၣ် အိၣ်တခါဒံး, ကစၢ်ယွၤတဲဘၣ် ပှၤအံၣ်စရ့လးဖိတဖၣ်လၢ “ဒီးသုဘၣ်တိၢ်န့ၢ်ကယဲၢ်တၢ်မၤလိာ်လၢ ယမၤလိာ်သုလၢမုၢ်မဆါတနံၤအံၤ, ဒ်သိးသုဂံၢ်သုဘါကဆူၣ်ထီၣ်, ဒီးသုကလဲၤနုာ်မၤန့ၢ်ကီၢ်ဖဲ သုလဲၤနုာ်ဒ်သိးသုကမၤန့ၢ်အီၤ” လီၤ. (၅ မိၤၡ့ ၁၁:၈) ၃ မိၤၡ့ ၂၀:၂၂, ၂၄ ပာ်ဖျါထီၣ်ဝဲ ဘၣ်ဃးဒီး ကီၢ်အံၤအဂ့ၢ်ဒ်အံၤ “ဒီးသုဘၣ်တိၢ်န့ၢ်ယလုၢ်ယလၢ်ခဲလၢာ်, ဒီးယတၢ်စံၣ်ညီၣ်ခဲလၢာ်, ဒီးမၤအီၤ, ဒ်သိးကီၢ်လၢယဒုးလဲၤနုာ်သုဆူအပူၤလၢ သုကအိၣ်ကဆိးဖဲန့ၣ် အသုတဘှိးထီၣ်ကွံာ်သုတဂ့ၤလီၤ. ဒီးယစံးတ့ၢ်သုလၢသုကန့ၢ်ဘၣ်သါအကီၢ်န့ၣ်, ဒီးယကဟ့ၣ်လီၤအီၤဒ်သိးသုကဟံးန့ၢ်အီၤ, ကီၢ်လၢအယွၤဝဲဒီးတၢ်နုၢ်ထံ, ဒီးကနဲစီန့ၣ်လီၤ. ယဲဒၣ်အံၤယမ့ၢ်ယွၤသုကစၢ်လၢ အမၤလီၤဖးသုဒီးပှၤကလုာ်တဖၣ်လီၤ.” ဘၣ်ဆၣ် အဝဲသ့ၣ်ကဒိးန့ၢ်ဘၣ် ကီၢ်တၢ်စံးပာ်အဂီၢ် သန့ၤထီၣ်အသးလၢ အဝဲသ့ၣ်အတၢ်ရ့လိာ်သးဒီး ယဟိဝၤယွၤလီၤ. ပှၤအံၣ်စရ့လးဖိတဖၣ် တဒိကနၣ် ကစၢ်ယွၤ အကလုၢ်ဘၣ်အဃိ ကစၢ်ယွၤ ဟ့ၣ်အခွဲးလၢ ပှၤဘၤဘူၤလိၣ်ဖိတဖၣ် ကမၤနၢၤအီၤ ဒီးကနီဟးထီၣ်ကွံာ် အဝဲသ့ၣ်လၢ အတၢ်လီၢ်တၢ်ကျဲန့ၣ်လီၤ.
it-1 ၁၁၉၉
တၢ်န့ၢ်သါ
ဖဲပှၤတဂၤသံအခါ အဝဲအတၢ်စုလီၢ်ခီၣ်ခိၣ်တဖၣ်န့ၣ် ပှၤလၢအကြၢးဒိးန့ၢ်ဘၣ် အတၢ်န့ၢ်သါတဂၤ ဒိးန့ၢ်ဘၣ်ဝဲလီၤ. ဖိလံၤတဖၣ်န့ၣ် န့ၢ်သါဘၣ်ဝဲ မိၢ်ပၢ်ဖံဖုတဖၣ် အတၢ်စုလီၢ်ခီၣ်ခိၣ်လီၤ. ဖဲအံၤန့ၣ် သူဝဲဧ့ၤဘြံၤ အတၢ်ကတိၤ နၣ်ခၠဲၣ် (na·chal)ʹ (noun, na·chalahʹ) လီၤ. တၢ်ကတိၤအံၤ ဘၣ်ထွဲလိာ်အသးဒီး တၢ်ဒိးန့ၢ်ဘၣ် တၢ်န့ၢ်သါတဆီဘၣ်တဆီ မ့တမ့ၢ် တၢ်ဟ့ၣ်လီၤ မ့တမ့ၢ် တၢ်တူၢ်လိာ် မိၢ်ပၢ်ဖံဖုတဖၣ် အတၢ်စုလီၢ်ခီၣ်ခိၣ်လီၤ. (၄ မိၤ. ၂၆:၅၅; ဃ့း. ၄၆:၁၈) ပှၤမ့ၢ်ဟ့ၣ်လီၤ တၢ်န့ၢ်သါလၢ တမ့ၢ်အဒူၣ်ဖိထၢဖိအကျါဘၣ်န့ၣ် အါတက့ၢ်ပှၤသူ တၢ်ကတိၤလၢအမ့ၢ် ယၢ်ရဲး (ya·rashʹ) လီၤ. (၁ မိၤ. ၁၅:၃; ၃ မိၤ. ၂၀:၂၄) တၢ်ကတိၤအံၤ ဘၣ်ထွဲလိာ်အသးဒီး တၢ်ဒုးတၢ်ယၤ လၢအခီပညီမ့ၢ် “နီဟးထီၣ်” စ့ၢ်ကီးလီၤ. (၅ မိၤ. ၂:၁၂; ၃၁:၃) ကြံးစ် အတၢ်ကတိၤ ကဲာ်ရိာ် (kleʹros) လၢအဘၣ်ထွဲလိာ်အသးဒီး တၢ်န့ၢ်သါန့ၣ် အခီပညီ အခီၣ်ထံးခီၣ်ဘိမ့ၢ်ဝဲ “ဖီၣ်တၢ်ဖး,” လၢခံအခီပညီ ကဲထီၣ်က့ၤလၢ “နီၤလီၤ” ဒီးလၢခံကတၢၢ် ကဲထီၣ်က့ၤဝဲ “ပှၤဒိးန့ၢ်ဘၣ်တၢ်န့ၢ်သါ” လီၤ.—မး. ၂၇:၃၅; မၤတၢ်. ၁:၁၇; ၂၆:၁၈.
it-1 ၃၁၇ ¶၂
ထိၣ်တဖၣ်
ထံလုၣ်ဘၢတၢ်ဝံၤ အလီၢ်ခံ စီၤနိအၤ ဟံးန့ၢ်ဝဲ “ကယဲၢ်ဆၣ်ဖိကီၢ်ဖိအကဆှီ, ဒီးကယဲၢ်ထိၣ်ဖိလံၣ်ဖိအကဆှီ” တနီၤဒီးလုၢ်ထီၣ်တၢ်လီၤ. (၁ မိၤ. ၈:၁၈-၂၀) တၢ်န့ၣ်ဝံၤအလီၢ်ခံ တၢ်လၢပှၤအီၣ်အီၤသ့အကျါန့ၣ် ပၣ်ဃုာ်စ့ၢ်ကီးဒီး ထိၣ်ဖိလံာ်ဖိတဖၣ်လီၤ. ဘၣ်ဆၣ် အဝဲသ့ၣ်တဘၣ် အီၣ်ဝဲအသွံၣ်ဘၣ်. (၁ မိၤ. ၉:၁-၄; ထိၣ်သတြီၤဒီး ၃ မိၤ. ၇:၂၆; ၁၇:၁၃) အဃိ ထိၣ်ဖိလံာ်ဖိလၢ အကဆှီတဖၣ်န့ၣ် မ့ၢ်ဝဲ ထိၣ်ဖိလံာ်ဖိလၢ ကစၢ်ယွၤတူၢ်လိာ်လၢ ပှၤကဟ့ၣ်လုၢ်ထီၣ်တၢ်အဂီၢ်န့ၣ်လီၤ. ဘၣ်ဃးဒီး ထိၣ်လၢပှၤအီၣ်အီၤသ့န့ၣ် ထိၣ်ဖဲလဲၣ်တကလုာ် မ့ၢ်ထိၣ်လၢအ “တကဆှီဘၣ်” လဲၣ်န့ၣ် လံာ်စီဆှံ တပာ်ဖျါဝဲဘၣ်. ဘၣ်တၢ်ပာ်ဖျါအီၤ စးထီၣ်ဖဲ စီၤမိၤၡ့ အတၢ်သိၣ်တၢ်သီ အိၣ်ထီၣ်အခါလီၤ. (၃ မိၤ. ၁၁:၁၃-၁၉, ၄၆, ၄၇; ၂၀:၂၅; ၅ မိၤ. ၁၄:၁၁-၂၀) ဘၣ်ဃးဒီး တၢ်ဂ့ၢ်လၢ ဘၣ်မနုၤအဃိ တၢ်ပာ်ပနီၣ်ထိၣ်တနီၤလၢအ “တကဆှီဘၣ်” လဲၣ်န့ၣ် လံာ်စီဆှံတပာ်ဖျါဝဲဘၣ်. အါတက့ၢ်န့ၣ် မ့ၢ်ဝဲထိၣ်ဖိလံာ်ဖိလၢ အအီၣ်တၢ်ဘၣ်အၢဘၣ်သီ သနာ်က့ တမ့ၢ်ခဲလၢာ်စ့ၢ်ကီးဘၣ်. ဖဲတၢ်အၢၣ်လီၤအီၤလီၤအသီ အိၣ်ထီၣ်ဝံၤအလီၢ်ခံ တၢ်သ့ၣ်တဖၣ်အံၤ လီၤမၢ်ကွံာ်ဝဲလီၤ. ပသ့ၣ်ညါဘၣ် ခီဖျိလၢ စီၤပ့းတရူး အတၢ်ထံၣ်လၢညါခီအပူၤန့ၣ်လီၤ.—မၤတၢ်. ၁၀:၉-၁၅.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၅၆၃
တၢ်ဂဲာ်လီၤသး
ကစၢ်ယွၤ အတၢ်မၤလိာ်တြီဝဲလၢ ပှၤတဘၣ်ဂဲာ်လီၤ ပှၤဖံးပှၤညၣ်လၢ ပှၤလၢအသံတဖၣ်အဃိဘၣ်. (၃ မိၤ. ၁၉:၂၈; ၂၁:၅; ၅ မိၤ. ၁၄:၁) မ့ၢ်လၢပှၤအံၣ်စရ့လးဖိတဖၣ် မ့ၢ်ပှၤကလုာ်လၢ အကဆှီလၢ ယဟိဝၤယွၤအဂီၢ် ဒီးယဟိဝၤယွၤ ပာ်လုၢ်ပာ်ပှ့ၤအဝဲသ့ၣ်အဃိလီၤ. (၅ မိၤ. ၁၄:၂) အဃိ ပှၤအံၣ်စရ့လးဖိတဖၣ်န့ၣ် တဘၣ်မၤဝဲ လုၢ်လၢ်လၢ ပှၤလၢအဘူၣ်ထီၣ်ဘါထီၣ် တၢ်ဂီၤတၢ်ဖှီၣ်တဖၣ် မၤဝဲန့ၣ်ဘၣ်. အဝဲသ့ၣ်မ့ၢ်ပှၤတကလုာ်လၢ အသ့ၣ်ညါဝဲ ပှၤသံသ့ၣ်တဖၣ် အတၢ်အိၣ်သးဂ့ၤဂ့ၤ ဒီးအိၣ်ဒီးတၢ်မုၢ်လၢ်လၢ ပှၤသံသ့ၣ်တဖၣ် ကဂဲၤဆၢထၢၣ်သမူထီၣ်က့ၤအဃိ ဖဲပှၤသံအခါ အဝဲသ့ၣ်တကြၢးပာ်ဖျါထီၣ် တၢ်သူၣ်အုးသးအုး ခီဖျိလၢ အဂဲာ်လီၤအဖံးအညၣ်ဘၣ်. (ဒၤ. ၁၂:၁၃; ဧ့ၤ. ၁၁:၁၉) တၢ်မၤလိာ်လၢ အတြီဝဲ တၢ်ဂဲၤလီၤဖံးညၣ်န့ၣ် ဒုးသ့ၣ်ညါ ပှၤအံၣ်စရ့လးဖိတဖၣ်လၢ အဝဲသ့ၣ် ကဘၣ်ပာ်လုၢ်ပာ်ပှ့ၤဝဲ အနီၢ်ခိလၢ ကစၢ်ယွၤတ့လီၤန့ၢ်အီၤလီၤ.
လါယနူၤအါရံၤ ၁၈-၂၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၃ မိၤၡ့ ၂၂-၂၃
“တၢ်မၤမူးပွဲတဖၣ်န့ၣ် အခီပညီအိၣ်လၢ ပဂီၢ်ဒ်လဲၣ်”
it-1 ၈၂၆-၈၂၇
ဘူၣ်ကိၣ်တအိၣ်ဘၣ်ဒီး ကိၣ်မံၣ်
ဘူၣ်ကိၣ်တအိၣ်ဘၣ်ဒီး ကိၣ်မံၣ်အဆိကတၢၢ်တသီန့ၣ် မ့ၢ်ဝဲတၢ်အိၣ်ဖှိၣ်စီဆှံ ဒီးမ့ၢ်စ့ၢ်ကီး မုၢ်အိၣ်ဘှံးနံၤလီၤ. ခံသီတသီ လါနံစၣ် ၁၆ သီ ဖဲပှၤကူးဘုမုယီၤအဆၢကတီၢ် ပှၤကဘၣ်ဟဲစိာ် ဘုကဒိၣ်လၢအဆိကတၢၢ်တဖၣ် ဆူပှၤလုၢ်တၢ်ဒိၣ်အအိၣ်လီၤ. တချုးလၢ ဘူၣ်ပွဲအံၤဘၣ်ဒံးဘၣ်န့ၣ် ပှၤတဘၣ်အီၣ်ကိၣ်လၢ ဘၣ်တၢ်မၤအီၤလၢဘုသီ ဒီးဘုလၢ ပှၤဝဲာ်ဃ့အီၤတဖၣ်န့ၣ်ဘၣ်. ပှၤလုၢ်တၢ်အဒိၣ်တဖၣ် ဟ့ၣ်လုၢ်ထီၣ်ဝဲ တၤသၣ်ဆိလၢ ယဟိဝၤယွၤအအိၣ် ခီဖျိ ဝံၢ်ဝၢ်ဝဲဘုကဒိၣ်လၢ ယဟိဝၤယွၤ အမဲာ်ညါလီၤ. ဘၣ်ဟ့ၣ်လုၢ်ထီၣ်ဝဲ သိဖိလၢအအိၣ်တနံၣ် လၢအလၢအပှဲၤတဒု ဒ်တၢ်လုၢ်မ့ၣ်အူအသိး ဒီးကိၣ်ကမူၣ်လၢဃါဃုာ်ဒီးသိ ဒီးတၢ်လုၢ်အီန့ၣ်လီၤ. (၃ မိၤ. ၂၃:၆-၁၄) တၢ်မၤလိာ်တအိၣ်လၢ ပှၤကဘၣ်ဟ့ၣ်လုၢ်ထီၣ် ဘုစဲၤ မ့တမ့ၢ် ကိၣ်ကမူၣ် သနာ်က့ လၢခံပှၤလုၢ်တၢ်ဒိၣ်တဖၣ် မၤဝဲဒၣ်လီၤ. ဒ်တၢ်ရဲၣ်တၢ်ကျဲၤအိၣ်လၢ ပှၤတဖု မ့တမ့ၢ် ပှၤဒီတကလုာ် ဟ့ၣ်လုၢ်ထီၣ်ဝဲ တၤသၣ်ဆိအသိး ဖဲဘူၣ်ပွဲအံၤအကတီၢ် ဟံၣ်ဖိဃီဖိ ဒီတဒူၣ် မ့တမ့ၢ် ပှၤတဂၤစုာ်စုာ်န့ၣ် ပာ်ဖျါထီၣ်ဝဲ အတၢ်စံးဘျုးစံးဖှိၣ် ခီဖျိလၢဟ့ၣ်လုၢ်ထီၣ်ဝဲ တၤသၣ်ဆိလၢ အဟးထီၣ်လၢအဝဲသ့ၣ် အစံာ်ပျီပူၤလီၤ.—၂ မိၤ. ၂၃:၁၉; ၅ မိၤ. ၂၆:၁, ၂.
တၢ်တိာ်ပာ်. ဖဲန့ၣ်အဆၢကတီၢ် အဝဲသ့ၣ်အီၣ်ဝဲ ဘူၣ်ကိၣ်တအိၣ်ဘၣ်ဒီး ကိၣ်မံၣ်န့ၣ် မ့ၢ်ဒၣ်အမၤထွဲဝဲ ယဟိဝၤယွၤ အတၢ်ဟံးစုနဲၣ်ကျဲလၢ အဟ့ၣ်လီၤဝဲ စီၤမိၤၡ့ဒ် ၂ မိၤၡ့ ၁၂:၁၄-၂၀ ပာ်ဖျါထီၣ်ဝဲအသိးလီၤ. ဖဲအဆၢဖိ ၁၉ န့ၣ် တၢ်ဟံးစုနဲၣ်ကျဲအိၣ်ဝဲလၢ “နွံနံၤအတီၢ်ပူၤကိၣ်မံၣ်န့ၣ် တဘၣ်အိၣ်လၢသုဟံၣ်ပူၤဘၣ်.” ၅ မိၤၡ့ ၁၆:၃ န့ၣ် ကိၣ်တအိၣ်ဘၣ်ဒီး ကိၣ်မံၣ်အံၤ ဘၣ်တၢ်ကိးစ့ၢ်ကီးအီၤလၢ “ကိၣ်ဘၣ်ဃးဒီးတၢ်နးတၢ်ဖှီၣ်” လီၤ. (ပှၤကဖၢနုာ် ကိၣ်မံၣ်လၢ ကိၣ်ကမူၣ်အကျါဒီး မၤပွးထီၣ်အီၤအဂီၢ် တၢ်ဆၢကတီၢ်တအိၣ်ဘၣ် [၂ မိၤ. ၁၂:၃၄]) ကိးနံၣ်ဒဲးန့ၣ် ကိၣ်သ့ၣ်တဖၣ်အံၤ ဒုးသ့ၣ်နီၣ်ထီၣ်ပှၤအံၣ်စရ့လးဖိတဖၣ်လၢ အဝဲသ့ၣ်ဘၣ်ဟးထီၣ် ကရီကဒးလၢ ကီၢ်အဲၤကူပတူးအပူၤလီၤ. အဃိ ဒုးသ့ၣ်နီၣ်ထီၣ် ပှၤအံၣ်စရ့လးဖိတဖၣ်လၢ အဝဲသ့ၣ်ထူၣ်ဖျဲးထီၣ်လၢ တၢ်နးတၢ်ဖှီၣ် ဒီးလၢဘၣ်ကဲကုၢ်အလီၢ်န့ၣ်လီၤ. ယဟိဝၤယွၤ တဲဝဲလၢ “ဒ်သိးနကသ့ၣ်နီၣ်ထီၣ်က့ၤမုၢ်တနံၤလၢ နဟးထီၣ်ကွံာ်လၢကီၢ်အဲၤကူပတူးအပူၤ တစိၤဒၣ်နၤကိးမုၢ်နံၤမုၢ်နၤဒဲးလီၤ.” ပှၤအံၣ်စရ့လးဖိတဖၣ် မၤဝဲမူးပွဲအံၤန့ၣ် ပာ်ဖျါထီၣ်ဝဲလၢ အဝဲသ့ၣ်သ့ၣ်ညါဝဲလၢ အိၣ်ဒီးတၢ်သဘျ့ဒ် ပှၤတကလုာ်အသိး ဒီးသ့ၣ်ညါဝဲလၢ ယဟိဝၤယွၤမ့ၢ် တၢ်အုၣ်က့ၤခီၣ်က့ၤကစၢ်န့ၣ်လီၤ. မူးပွဲလၢဘၣ်တၢ်မၤအီၤသၢခါအကျါ မူးပွဲအံၤ ဘၣ်တၢ်မၤအီၤ အဆိကတၢၢ်န့ၣ် မ့ၢ်တၢ်လၢအကြၢးဝဲဘၣ်ဝဲလီၤ.—၅ မိၤ. ၁၆:၁၆.
it-2 ၅၉၈ ¶၂
ဘူၣ်ယဲၢ်ဆံအနံၤ
တၢ်ဟ့ၣ်လုၢ်ထီၣ် ဘုမုယီၤတၤသၣ်ဆိ ဒီးတၢ်ဟ့ၣ်လုၢ်ထီၣ် ဘုကၠူၣ်တၤသၣ်ဆိန့ၣ် လီၤဆီလိာ်အသးလီၤ. ဘုကၠူၣ်ကမူၣ် ဆံဆဲၣ်ပူခံပူ (၄.၄. လံးထၢၣ်) န့ၣ်ပှၤဘၣ်ဖၢနုာ်ကိၣ်မံၣ် ဒီးဘၢကိၣ်ခံလိၣ်န့ၣ်လီၤ. ‘ပှၤကဘၣ်ဟဲစိာ်ကိၣ်ခံလိၣ်လၢပှၤဟံၣ်’ အဃိ မ့ၢ်ဝဲကိၣ်လၢပှၤမၤအီၤလၢ ပှၤဟံၣ်ကိးနံၤဒဲးန့ၣ်လီၤ. တဘၣ်တၢ်ပာ်ဖျါထီၣ်အီၤ ဒ်တၢ်ပာ်စီဆှံအဂီၢ်ဘၣ်. (၃ မိၤ. ၂၃:၁၇) ကိၣ်အံၤဘၣ်တၢ်လုၢ်ထီၣ်အီၤ ဃုာ်ဒီးတၢ်လုၢ်မ့ၣ်အူ, တၢ်လုၢ်တၢ်ဒဲးဘၣ် ဒီးသိဖါဖိခံဒုလၢ တၢ်လုၢ်မၤဃူမၤဖိးတၢ်အဂီၢ်န့ၣ်လီၤ. ကိၣ်အံၤဒီးသိဖိတဖၣ်န့ၣ် ပှၤလုၢ်တၢ်ဒိၣ်တဖၣ် ဝံၢ်ဝၢ်ဝဲလၢ ယဟိဝၤယွၤအမဲာ်ညါလီၤ. ပှၤလုၢ်တၢ်ဒိၣ်ပာ်ထီၣ်ဝဲကိၣ်အံၤ ဒီးသိညၣ်လၢအစုလိၤဝံၤ ဝံၢ်ဝၢ်ဝဲ ဒီးတၢ်န့ၣ်အခီပညီမ့ၢ်ဝဲ ဟ့ၣ်လုၢ်ထီၣ်ဝဲ ယဟိဝၤယွၤလီၤ. ပှၤလုၢ်တၢ်ဒိၣ်တဖၣ် ဟ့ၣ်လုၢ်ထီၣ်ဝဲ ကိၣ်ဒီးသိဝံၤအလီၢ်ခံ အဝဲသ့ၣ်ဘၣ်ဟံးန့ၢ်ဝဲ တၢ်သ့ၣ်တဖၣ်န့ၣ်လီၤ. ဒီးဘၣ်အီၣ်ဝဲဒ် တၢ်လုၢ်မၤဃူမၤဖိးတၢ်အသိးလီၤ.—၃ မိၤ. ၂၃:၁၈-၂၀.
နလဲၤထီၣ်လဲၤထီ ဒ်ယဟိဝၤယွၤ အတၢ်ကရၢကရိ လဲၤထီၣ်လဲၤထီအသိးဧါ
၁၁ ယဟိဝၤယွၤ အတၢ်ကရၢကရိ ဟ့ၣ်ဂံၢ်ဟ့ၣ်ဘါပှၤလၢ ပကမၤထွဲ တၢ်မၢဖိပီလူး အတၢ်ဟ့ၣ်ကူၣ်လီၤ. “မ်ပကွၢ်လိာ်ပသးတဂၤဒီးတဂၤ, ဒ်သိးပကသဆၣ်ထီၣ်လိာ်ပခံဆူ တၢ်အဲၣ်တၢ်ကွံ, ဒီးတၢ်မၤဂ့ၤတၢ်န့ၣ်တက့ၢ်. ဟးဆှဲးပတၢ်အိၣ်ဖှိၣ်ရိဖှိၣ်, ဒ်ပှၤတနီၤနီၤ အလုၢ်အလၢ်အသိးန့ၣ်တဂ့ၤ, ပသဆၣ်ထီၣ်လိာ်ပခံဒီး, ပထံၣ်အမုၢ်တနံၤဒံးဘူးထီၣ်ဒီး, မ်ပသဆၣ်ထီၣ်လိာ်ပခံဒံးအါထီၣ်တက့ၢ်.” (ဧ့ၤ. ၁၀:၂၄, ၂၅) လၢပျၢၤပှၤအံၣ်စရ့လးဖိတဖၣ်န့ၣ် မၤဝဲဘူၣ်တဖၣ် ဒီးတၢ်အိၣ်ဖှိၣ်ရိဖှိၣ်အဂၤတဖၣ် ဒ်သိးကဘူၣ်ထီၣ်ဘါထီၣ် ယဟိဝၤယွၤ ဒီးဒိးန့ၢ်ဘၣ်အတၢ်ဟံးစုနဲၣ်ကျဲအဂီၢ်လီၤ. လၢစီၤနဃ့မယၤ အစိၤန့ၣ် ဖဲအဝဲသ့ၣ်မၤဝဲ ဘူၣ်ဒဲအခါ မ့ၢ်တၢ်ဆၢကတီၢ်လၢ အလီၤသူၣ်ခုသးခုဒိၣ်မးလီၤ. (၂ မိၤ. ၂၃:၁၅, ၁၆; ဃ့ ၈:၉-၁၈) ဆၢကတီၢ်ခဲအံၤစ့ၢ်ကီး ပအိၣ်ဒီးတၢ်အိၣ်ဖှိၣ်လၢ ဘၣ်တၢ်မၤအီၤ ကိးနွံဒဲး, ကဝီၤတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ်န့ၣ်လီၤ. ပကြၢးထီၣ်တၢ်အိၣ်ဖှိၣ်တဖၣ်အံၤလီၤ. မ့ၢ်လၢတၢ်အိၣ်ဖှိၣ်တဖၣ်အံၤ မၤဂၢၢ်ကျၢၤထီၣ် ပတၢ်ရ့လိာ်သးဒီး ယဟိဝၤယွၤ ဒီးဟ့ၣ်ပှၤတၢ်သူၣ်ခုသးခုအဃိလီၤ.—တံတူး ၂:၂.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ပၢၤဃာ် နတၢ်သးတီ
၃ ကစၢ်ယွၤ အခ့အပှၤတဖၣ် ပာ်ဖျါထီၣ်တၢ်သးတီကသ့ဒ်လဲၣ်. ပပာ်ဖျါထီၣ်တၢ်သးတီ သ့ခီဖျိ ပအဲၣ်ယဟိဝၤယွၤလၢ ပသးဒီဖျၢၣ်, ပအဲၣ်အီၤလၢ တၢ်အဲၣ်လၢ အဟးဂီၤတသ့ဘၣ် ဒီးပမၤအတၢ်ဘၣ်သး ထီဘိန့ၣ်လီၤ. ပကဆိကမိၣ်ကွၢ် တၢ်ကတိၤလၢအမ့ၢ် တၢ်သးတီန့ၣ် လၢလံာ်စီဆှံအပူၤ ပှၤသူဝဲဒ်လဲၣ်န့ၣ်လီၤ. လၢလံာ်စီဆှံအပူၤ တၢ်ကတိၤလၢအမ့ၢ် “တၢ်သးတီ” န့ၣ် လၢဧ့ၤဘြံၤကျိာ်န့ၣ် အခီပညီမ့ၢ်စ့ၢ်ကီးဝဲလၢ လၢာ်လၢာ်ဆ့ဆ့ မ့တမ့ၢ် လၢလၢပှဲၤပှဲၤလီၤ. အဒိ စီၤမိၤၡ့အတၢ်သိၣ်တၢ်သီတဲဝဲလၢ ပှၤအံၣ်စရ့လးဖိတဖၣ်န့ၣ် ကဘၣ်ဟ့ၣ်လုၢ်ထီၣ် ယဟိဝၤယွၤလၢ ဆၣ်ဖိကီၢ်ဖိလၢ အလၢအပှဲၤလီၤ. (၃ မိၤၡ့ ၂၂:၂၁, ၂၂) အဝဲသ့ၣ် တဘၣ်လုၢ်ထီၣ်ဝဲ ဆၣ်ဖိကီၢ်ဖိလၢ အခီၣ်, အနၢ် ဒီးအမဲာ်ချံဟးဂီၤ ဒီးအအိၣ်တဆူၣ်ဘၣ်တဖၣ်န့ၣ်ဘၣ်. အဝဲသ့ၣ် ကဘၣ်ဟ့ၣ်လုၢ်ထီၣ် ယဟိဝၤယွၤလၢ ဆၣ်ဖိကီၢ်ဖိလၢ အလၢအပှဲၤန့ၣ် မ့ၢ်တၢ်လၢ အရ့ဒိၣ်ဒိၣ်မးလီၤ. (မၤလကံ ၁:၆-၉) ဘၣ်မနုၤအဃိ ယဟိဝၤယွၤ သးစၢၢ်ဆၢဝဲ တၢ်လၢတၢ်ပှဲၤလဲၣ်န့ၣ် ပနၢ်ပၢၢ်သ့လီၤ. ဖဲပပှ့ၤတၢ်တမံၤမံၤ ဒ်သိးဒီးတၤသူတၤသၣ်, လံာ် မ့တမ့ၢ် တၢ်ဖိတၢ်လံၤတမံၤမံၤအခါ ပတအဲၣ်ဒိးပှ့ၤ တၤသူတၤသၣ်လၢအအုၣ်, လံာ်လၢအကဘျံးပၤ တလၢပှဲၤ မ့တမ့ၢ် တၢ်ဖိတၢ်လံၤလၢ အဟးဂီၤတမံၤမံၤန့ၣ်ဘၣ်. ပအဲၣ်ဒိးပှ့ၤတၢ်လၢ အအိၣ်လၢလၢပှဲၤပှဲၤဒီး အဂ့ၤခဲလၢာ်လီၤ. ဒ်န့ၣ်အသိး ယဟိဝၤယွၤစ့ၢ်ကီး အဲၣ်ဒိးဝဲလၢ ပတၢ်အဲၣ်အီၤဒီး ပတၢ်သးတီဒီးအီၤန့ၣ် ကဘၣ်မ့ၢ်တၢ်လၢ အလၢအပှဲၤ ဒီးလၢာ်လၢာ်ဆ့ဆ့လီၤ.
လါယနူၤအါရံၤ ၂၅-၃၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၃ မိၤၡ့ ၂၄-၂၅
“ယူဘလံၣ်အနံၣ် ဒီးခါဆူညါတၢ်ထူၣ်ဖျဲး”
it-1 ၈၇၁
တၢ်သဘျ့
ကစၢ်ယွၤလၢ အဟ့ၣ်တၢ်သဘျ့. ယဟိဝၤ မ့ၢ်ယွၤလၢအဟ့ၣ်တၢ်သဘျ့လီၤ. အဝဲမၤပူၤဖျဲးထီၣ် ပှၤအံၣ်စရ့လးဖိတဖၣ်လၢ ကုၢ်အလီၢ်လၢကီၢ်အဲၤကူပတူးအပူၤလီၤ. အဝဲတဲဝဲလၢ ပှၤအံၣ်စရ့လးဖိတဖၣ် မ့ၢ်ဒိကနၣ်အတၢ်မၤလိာ်န့ၣ် ကဒိးန့ၢ်ဘၣ် တၢ်သဘျ့လီၤ. (၅ မိၤ. ၁၅:၄, ၅) စီၤဒၤဝံး တဲဝဲလၢပှၤ “ကဘီၣ်ထီၣ်ညီထီၣ်” လၢဝ့ၢ်ယရူၤၡလ့ၣ်အပူၤလီၤ. (စံး. ၁၂၂:၆, ၇) ဘၣ်ဆၣ် တၢ်မၤလိာ်ပာ်ဖျါထီၣ်ဝဲလၢ ပှၤတဂၤန့ၣ် ဖှီၣ်လီၤယာ်လီၤအဃိ ကလုၢ်အီၣ်လုၢ်အီ အနီၢ်ကစၢ် ဒီးအဟံၣ်ဖိဃီဖိအဂီၢ် ကဘၣ်ဆါလီၤအီၣ်အသးဒ် ကုၢ်အသိးလီၤ. တၢ်မၤလိာ်အိၣ်ဝဲလၢ နွံနံၣ်မ့ၢ်ပှဲၤထီၣ်န့ၣ် ပှၤဧ့ၤဘြံၤဖိ ကုၢ်တဂၤအံၤ ကဘၣ်ထူၣ်ဖျဲးထီၣ်ဝဲလီၤ. (၂ မိၤ. ၂၁:၂) ယူဘလံၣ်အနံၣ် (အနံၣ်ယဲၢ် ၅၀ မ့ၢ်ပှဲၤထီၣ် ကိးနံၣ်ဒဲး) န့ၣ်ပှၤဘၣ်ဘိးဘၣ်သ့ၣ်ညါလၢ ပှၤထံဖိကီၢ်ဖိခဲလၢာ် ဒိးန့ၢ်ဘၣ်တၢ်သဘျ့လီၤ. ပှၤဧ့ၤဘြံၤဖိကုၢ်တဖၣ် ဒိးန့ၢ်ဘၣ်တၢ်သဘျ့ဒီး က့ၤဆူအလီၢ်အကျဲဒၣ်ဝဲသ့လီၤ.—၃ မိၤ. ၂၅:၁၀-၁၉.
it-1 ၁၂၀၀ ¶၂
တၢ်န့ၢ်သါ
ဟီၣ်ခိၣ်လီၢ်န့ၣ် မ့ၢ်ဝဲဖိလံၤတဖၣ် အတၢ်န့ၢ်သါအဃိ ပှၤတဘၣ်ဆါအီၤအဝံၤဘၣ်. ပှၤမ့ၢ်ဆါဟီၣ်ခိၣ်လီၢ်န့ၣ် ယူဘလံၣ်တၢ်သဘျ့အနံၣ် ကတုၤလိၣ်ပှဲၤနံၣ်လဲၣ် ဒီးဖဲနံၣ်သ့ၣ်တဖၣ်န့ၣ် အတီၢ်ပူၤ တၤသူတၤသၣ် ကန့ၢ်ဝဲထဲလဲၣ်, ကဒိးသန့ၤထီၣ်အသးလၢ တၢ်သ့ၣ်တဖၣ်န့ၣ်အဖီခိၣ် ဒီးပှၤကဘၣ်ကိးအပှ့ၤလီၤ. တချုးတုၤလၢ ယူဘလံၣ်အနံၣ် ဒံးဘၣ်ပှၤလၢအက့ၤပှ့ၤ အဟီၣ်ခိၣ်လီၢ်တန့ၢ်တဖၣ် မ့ၢ်တုၤလၢ ယူဘလံၣ်အနံၣ်န့ၣ် အဝဲသ့ၣ်ကဒိးန့ၢ်ဘၣ်က့ၤဝဲ အဟီၣ်ခိၣ်လီၢ်လီၤ. (၃ မိၤ. ၂၅:၁၃, ၁၅, ၂၃, ၂၄) တၢ်ဘျၢအံၤဘၣ်ထွဲလိာ်အသးဒီး ဟံၣ်လၢအအိၣ်လၢ တၢ်လီၢ်လၢဝ့ၢ်ခိၣ်ဒူတအိၣ်တဖၣ်စ့ၢ်ကီးလီၤ. ဟံၣ်လၢအအိၣ်လၢတၢ်လီၢ်လၢ ဝ့ၢ်ခိၣ်ဒူတအိၣ်တဖၣ်န့ၣ် ဘၣ်တၢ်ပာ်ပနီၣ်အီၤဒ် စံာ်ပျီအသိးလီၤ. ပှၤလၢအဆါအဟံၣ်လၢ အအိၣ်လၢဝ့ၢ်ခိၣ်ဒူအပူၤတဖၣ်န့ၣ် လၢတနံၣ်အတီၢ်ပူၤ အဝဲသ့ၣ် အိၣ်ဒီးတၢ်ခွဲးတၢ်ယာ်လၢ ကက့ၤပှ့ၤက့ၤဝဲလီၤ. လၢတနံၣ်အတီၢ်ပူၤ အဝဲသ့ၣ် ပှ့ၤက့ၤဝဲမ့ၢ်တန့ၢ်ဘၣ်န့ၣ် ကကဲထီၣ်ပှၤလၢအပှ့ၤတၢ်တဂၤ အတၢ်လီၤ. မ့မ့ၢ်ဟံၣ်လၢပှၤလ့ၤဝံဖိ အဝ့ၢ်တဖၣ်အပူၤန့ၣ် ပှ့ၤက့ၤဝဲကိးဆၢကိးကတီၢ်ဒဲးသ့လီၤ. မ့ၢ်လၢအဝဲသ့ၣ် တဒိးန့ၢ်ဘၣ် ဟီၣ်ခိၣ်လၢ တၢ်န့ၢ်သါအဂီၢ်အဃိလီၤ.—၃ မိၤ. ၂၅:၂၉-၃၄.
it-2 ၁၂၂-၁၂၃
ယူဘလံၣ် တၢ်သဘျ့အနံၣ်
ဖဲပှၤအံၣ်စရ့လးဖိတဖၣ် ဒိကနၣ်ဝဲ တၢ်မၤလိာ်ဘၣ်ဃးဒီး ယူဘလံၣ်အခါ လၢအဝဲသ့ၣ် အထံအကီၢ်ပူၤ ပှၤကဲဒိၣ် ဒီးပှၤဖှီၣ်ဖိယာ်ဖိ အတၢ်အိၣ်မူအပတီၢ်ဖုၣ်ထီလိာ်အသး ဒ်ပထံၣ်ဘၣ်လၢ မုၢ်မဆါတနံၤအံၤ ထံကီၢ်အါဘ့ၣ်အပူၤအသိးတအိၣ်ဘၣ်. အဝဲသ့ၣ် အထံကီၢ်လဲၤထီၣ်လဲၤထီ ခီဖျိလၢ ပှၤတဂၤစုာ်စုာ်ဒိးန့ၢ်ဘၣ်အဘျုးအဃိလီၤ. ပှၤဖှီၣ်ပှၤယာ် နးနးကလဲာ် ဒီးခီဖျိလၢ တၢ်ဖံးအီၣ်မၤအီၣ် တလဲၤအသးလၢ အဂ့ၢ်အဝီအဃိ ပှၤတၢ်အိၣ်မူဟးဂီၤဝဲန့ၣ် တအိၣ်နီတဂၤဘၣ်. ပှၤခဲလၢာ်သူအတၢ်သ့တၢ်ဘၣ်လၢ ကကဲဘျုးလၢထံကီၢ်အဂီၢ်သ့လီၤ. ခီဖျိလၢ ယဟိဝၤယွၤအတၢ်ဆိၣ်ဂ့ၤအဃိ ဟီၣ်ခိၣ်ဟ့ၣ်ထီၣ်တၤသူတၤသၣ် ဒီးဖဲပှၤအံၣ်စရ့လးဖိသ့ၣ်တဖၣ် ဒိကနၣ်ဝဲ တၢ်ကူၣ်ဘၣ်ကူၣ်သ့လၢ ကစၢ်ယွၤကတဲာ်ကတီၤန့ၢ် အဝဲသ့ၣ်အခါ အဝဲသ့ၣ်အိၣ်ဒီး တၢ်ပၢတၢ်ပြးလၢအဂ့ၤ ဒီးအထံကီၢ်စ့ၢ်ကီးကလဲၤထီၣ်လဲၤထီလီၤ. ခီဖျိလၢ ကစၢ်ယွၤ အတၢ်ဟံးစုနဲၣ်ကျဲအဃိ တၢ်ကဲထီၣ်အသးဒ်န့ၣ်သ့ဝဲလီၤ.—ၡါ. ၃၃:၂၂.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၉ ၉/၁ ၂၂ ¶၄
ဖဲနသးဘၣ်ဒိအခါ
ပှၤအံၣ်စရ့လးဖိတဂၤ မ့ၢ်မၤစုမၤခီၣ်ဘၣ်ဝဲ အပှၤကလုာ်ကဂၤ ဒီးမ့ၢ်မၤဟးဂီၤဘၣ်ဝဲ အမဲာ်ချံန့ၣ် ဒ်တၢ်သိၣ်တၢ်သီအိၣ်ဝဲအသိး အဝဲကဘၣ်တၢ်စံၣ်ညီၣ်လီၤ. ဘၣ်ဆၣ် ပှၤလၢအဘၣ်ဒိတဂၤအံၤ မၤကၣ်က့ၤဝဲ ပှၤလၢအမၤဆါအီၤ မ့တမ့ၢ် အဟံၣ်ဖိဃီဖိ တဂၤဂၤ ဖဲအသးဒၣ်ဝဲန့ၣ်တသ့ဘၣ်. တၢ်သိၣ်တၢ်သီအိၣ်ဝဲလၢ အဝဲကဘၣ်လဲၤပာ်ဖျါထီၣ် အတၢ်ဂ့ၢ်တၢ်ကျိၤလၢ ပှၤလၢအိၣ်ဒီးတၢ်စိတၢ်ကမီၤ ဒ်သိးဒီးစံၣ်ညီၣ်ကွီၢ်တဖၣ်အအိၣ် လၢကစံၣ်ညီၣ်န့ၢ်အီၤအဂီၢ်လီၤ. မ့ၢ်ဖျါလၢပှၤတဂၤအံၤ မၤဆူၣ်မၤစိးတၢ် မ့တမ့ၢ် မၤအၢမၤသီတၢ်လၢ အသးဒၣ်ဝဲန့ၣ် ဒ်သိးပှၤသုတမၤကၣ်က့ၤအီၤတဂ့ၤအဂီၢ် အဝဲကဘၣ်တၢ်စံၣ်ညီၣ် ဒ်တၢ်လၢအမၤတ့ၢ်ဝဲအသိးလီၤ.
လါဖ့ၤဘြူၤအါရံၤ ၁-၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၃ မိၤၡ့ ၂၆-၂၇
“ပဒိးန့ၢ်ဘၣ် ယဟိဝၤယွၤ အတၢ်ဆိၣ်ဂ့ၤကသ့ဒ်လဲၣ်”
တၢး၀၈ ၄/၁၅ ၄ ¶၈
ဂ့ၢ်လိာ်ကွံာ် ‘တၢ်လုၢ်ဒိၣ်ပှ့ၤဒိၣ်လၢ တဂိာ်တသီၣ်’ တဖၣ်
၈ “တၢ်ထူးတၢ်တီၤ”န့ၣ် ကဲထီၣ်ကစၢ်ယွၤ သ့လၢကျဲဒ်လဲၣ်. အဒိဆိကမိၣ်ကွၢ် လၢၢ်တဖျၢၣ်လၢ အိၣ်လၢပှၤအံၣ်စရ့လး အစံာ်ပျီပူၤန့ၣ်တက့ၢ်. လၢၢ်တဖျၢၣ်အံၤ ပှၤသူအီၤလၢ ပှၤသူၣ်ထီၣ်ဟံၣ် မ့တမ့ၢ် ပှၤကဘှီထီၣ်ဝ့ၢ်ခိၣ်ဒူအဂီၢ်သ့လီၤ. ဘၣ်ဆၣ် “ပှၤမ့ၢ်ပာ်ဆၢထၢၣ် တၢ်ထူၣ်အိၣ်ဒီးတၢ်ဂီၤ” မ့တမ့ၢ် “တၢ်ဂီၤစိးပျၤအသး” လၢပှၤကဘူၣ်ထီၣ်ဘါထီၣ်အီၤအဂီၢ်န့ၣ် ကကဲထီၣ်တၢ်လီၤဃံၢ်အလီၢ်လၢ ယဟိဝၤယွၤ အပှၤဂီၢ်မုၢ်အဂီၢ်လီၤ. (၃ မိၤ. ၂၆:၁) ဒ်န့ၣ်အသိး ကျိၣ်စ့န့ၣ် ပသူအီၤသ့လၢ အလီၢ်ဒၣ်ဝဲလီၤ. ဒ်သိးပကအိၣ်မူအဂီၢ် ပလိၣ်ဘၣ်ကျိၣ်စ့ ဒီးပသူအီၤလၢ ယဟိဝၤယွၤ အတၢ်မၤအဂီၢ်သ့စ့ၢ်ကီးလီၤ. (စံၣ်. ၇:၁၂; လူၤ. ၁၆:၉) ဘၣ်ဆၣ် ပမ့ၢ်ပာ်ဆိတၢ်ဃုကျိၣ်ဃုစ့လၢ တၢ်မၤယွၤအတၢ်မၤအမဲာ်ညါန့ၣ် ကျိၣ်စ့ကဲထီၣ် ပကစၢ်ယွၤ သ့ဝဲလီၤ. (ဖး ၁ တံၤမသ့း ၆:၉, ၁၀ တက့ၢ်) ပှၤဟီၣ်ခိၣ်ဖိအါတက့ၢ်အဂီၢ်န့ၣ် တၢ်ဃုကျိၣ်ဃုစ့ မ့ၢ်တၢ်လၢအရ့ဒိၣ်ကတၢၢ် အဃိ ဘၣ်ဃးဒီးတၢ်ဂ့ၢ်အံၤန့ၣ် ပကဘၣ်ဂုာ်ကျဲးစၢး အိၣ်ဒီးတၢ်ထံၣ်လၢအကြၢးအဘၣ်လီၤ.—၁ တံၤ. ၆:၁၇-၁၉.
it-1 ၂၂၃ ¶၃
ယူးယီၣ်
ယဟိဝၤယွၤ သူဝဲစီၤမိၤၡ့ ဒီးအဝဲဆဲးကျိးလိာ်အသးဒီးအီၤအဃိ စီၤမိၤၡ့ ဒုးနဲၣ်ဖျါထီၣ်ဝဲ တၢ်စိတၢ်ကမီၤလၢ ယွၤအပှၤဂီၢ်မုၢ်တဖၣ်အမဲာ်ညါသ့လီၤ. (၅ မိၤ. ၃၄:၁၀, ၁၂; ၂ မိၤ. ၁၉:၉) ပှၤလၢအိၣ်ဒီးတၢ်နာ်တဖၣ်န့ၣ် ယူးယီၣ်ပာ်ကဲဝဲ စီၤမိၤၡ့ အတၢ်န့ၢ်စိန့ၢ်ကမီၤလီၤ. အဝဲသ့ၣ်ညါဝဲလၢ ကစၢ်ယွၤတဲတၢ် ခီဖျိလၢစီၤမိၤၡ့လီၤ. ပှၤအံၣ်စရ့လးဖိတဖၣ် ယူးယီၣ်ပာ်ကဲဝဲ ယဟိဝၤယွၤ အတၢ်လီၢ်စီဆှံစ့ၢ်ကီးလီၤ. (၃ မိၤ. ၁၉:၃၀; ၂၆:၂) အခီပညီန့ၣ် အဝဲသ့ၣ်ယူးယီၣ်ပာ်ကဲဝဲ ယဟိဝၤယွၤ အတၢ်လီၢ်စီဆှံ ခီဖျိဘူၣ်ထီၣ်ဘါထီၣ်တၢ် ဒ်ယဟိဝၤယွၤ ဟံးစုနဲၣ်ကျဲဝဲအသိး ဒီးမၤထွဲဝဲ ဒ်အတၢ်မၤလိာ်အသိးလီၤ.
တၢး၉၁ ၃/၁ ၁၇ ¶၁၀
ပျဲ “တၢ်သူၣ်မံသးမုာ် လၢအဟဲလၢယွၤအအိၣ်” ပၢၤနသး
၁၀ ယဟိဝၤယွၤ တဲဘၣ်အဝဲသ့ၣ်လၢ “သုမ့ၢ်လဲၤတၢ်လၢ ယလုၢ်ယလၢ်အပူၤ, ဒီးတိၢ်န့ၢ်ယတၢ်မၤလိာ်, ဒီးမၤအီၤဒီး, ယကဟ့ၣ်လီၤသုလၢတၢ်စူၤလၢ အဆၢအကတီၢ်ဒၣ်ဝဲ, ဒီးဟီၣ်ခိၣ်ကဟ့ၣ်အတၢ်အါထီၣ်ဒီး သ့ၣ်လၢပှၢ်လၢ်ကျါန့ၣ်အတၤသၣ်, ဒီးယကပာ်လီၤတၢ်ဃူတၢ်ဖိးလၢ ထံဧိၤကီၢ်ဧိၤအပူၤ, ဒီးသုကမံလီၤ, ဒီးပှၤတမၤပျံၤမၤဖုးသုနီတဂၤဘၣ်, ဒီးယကဒုးဟးထီၣ်ကွံာ် ဆၣ်ဖိကီၢ်ဖိအအၢလၢသုကီၢ်ပူၤ, ဒီးနးဧိၤဘီဧိၤတလဲၤခီဂာ်ဘၣ်သုကီၢ်ဘၣ်. ဒီးယကလဲၤတၢ်လၢသုကျါ, ဒီးယကမ့ၢ်သုကစၢ်, ဒီးသုမ့ၢ်ယပှၤဂီၢ်မုၢ်လီၤ.” (၃ မိၤ. ၂၆:၃, ၄, ၆, ၁၂) ပှၤအံၣ်စရ့လးဖိတဖၣ် အိၣ်ဒီးတၢ်သူၣ်မံသးမုာ် မ့ၢ်လၢအဝဲသ့ၣ်န့ၣ် အိၣ်ဘၣ်ဘံၣ်ဘံၣ်ဘၢဘၢ ဒီးအိၣ်ဒီးတၢ်ထူးတၢ်တီၤ တကးဒံးဘၣ် အိၣ်ဒီးတၢ်ရ့လိာ်သးဒီး ယဟိဝၤယွၤ ဘူးဘူးတံၢ်တံၢ်အဃိလီၤ. ဘၣ်ဆၣ် ဒ်သိးအဝဲသ့ၣ် ကအိၣ်ဘၣ်ဝဲဒ်န့ၣ်အဂီၢ် ကဘၣ်မၤထွဲဝဲ ယဟိဝၤယွၤ အတၢ်မၤလိာ်လီၤ.—စံးထီၣ်ပတြၢၤ ၁၁၉:၁၆၅.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၆၁၇
တၢ်သံသတြိာ်
တၢ်ဆါသံသတြိာ် ဟဲအိၣ်ထီၣ်ခီဖျိ ပှၤတဒိကနၣ် ကစၢ်ယွၤအတၢ်မၤလိာ်အဃိလီၤ. ကစၢ်ယွၤ ဟ့ၣ်ပလီၢ်ပှၤအံၣ်စရ့လးဖိတဖၣ်လၢ အဝဲသ့ၣ်မ့ၢ်တဒိကနၣ် အတၢ်မၤလိာ်န့ၣ် ကမၢလီၤဝဲ တၢ်သံသတြိာ်လီၤ. (၃ မိၤ. ၂၆:၁၄-၁၆, ၂၃-၂၅; ၅ မိၤ. ၂၈:၁၅, ၂၁, ၂၂) လၢလံာ်စီဆှံအပူၤ တၢ်အိၣ်ဆူၣ်အိၣ်ချ့လၢ နီၢ်ခိ ဒီးနီၢ်သးန့ၣ် ဘၣ်တၢ်ပာ်ဖျါထီၣ်အီၤ ဘၣ်ထွဲလိာ်အသးဒီး ကစၢ်ယွၤအတၢ်ဆိၣ်ဂ့ၤလီၤ. (၅ မိၤ. ၇:၁၂, ၁၅; စံး. ၁၀၃:၁-၃; ကတိၤ. ၃:၁, ၂, ၇, ၈; ၄:၂၁, ၂၂; လီၣ်. ၂၁:၁-၄) မ့မ့ၢ်တၢ်ဆူးတၢ်ဆါန့ၣ် ဘၣ်တၢ်ပာ်ဖျါထီၣ်အီၤ ဘၣ်ဃးဒီး တၢ်ဒဲးဘး ဒီးတၢ်တလၢတပှဲၤလီၤ. (၂ မိၤ. ၁၅:၂၆; ၅ မိၤ. ၂၈:၅၈-၆၁; ၡါ. ၅၃:၄, ၅; မး. ၉:၂-၆, ၁၂; ယိၤ. ၅:၁၄) ဘၣ်ဆၣ် လၢတၢ်အိၣ်သးတနီၤန့ၣ် ယဟိဝၤယွၤ စံၣ်ညီၣ်ဝဲပှၤလၢ တၢ်ဆါအၢ ဒ်သိးဒီး နီၢ်မံးရယၣ်, စီၤဧူးစံယါ ဒီးစီၤက့ၤဃစံ တဖၣ်န့ၣ်လီၤ. (၄ မိၤ. ၁၂:၁၀; ၂ ကွဲး. ၂၆:၁၆-၂၁; ၂ စီၤပၤ. ၅:၂၅-၂၇) ဘၣ်ဆၣ် တၢ်ဆူးတၢ်ဆါ ဒီးတၢ်ဆါသံသတြိာ် အါတက့ၢ်န့ၣ် ကဲထီၣ်အသးခီဖျိလၢ န့ဆၢၣ်အဃိလီၤ. ဒီးကဲထီၣ်အသးသ့စ့ၢ်ကီးလၢ ပှၤတဂၤစုာ်စုာ် မ့တမ့ၢ် ပှၤကလုာ်တဖၣ်အတၢ်ဒဲးဘးအဃိလီၤ. ဒ်ပှၤဖှံတၢ်အသိးပှၤဘၣ်ကူးဝဲလီၤ. မ့ၢ်လၢပှၤအိၣ်မူတဂ့ၤတဘၣ်အဃိ ပှၤနီၢ်ခိတူၢ်ဘၣ် တၢ်ဆူးတၢ်ဆါလီၤ. (ကလၤ. ၆:၇, ၈) ဘၣ်ဃးဒီး ပှၤမၤကမၣ်မုၣ်ကမၣ်ခွါတဖၣ်န့ၣ် တၢ်မၢဖိပီလူး တဲဝဲဒ်အံၤ “ကစၢ်ယွၤဟ့ၣ် အဝဲသ့ၣ်အခွဲးလၢ ကမၤဝဲဒ် အတၢ်သူၣ်လီသးကွံလၢ အတကဆှီဘၣ်တဖၣ် လၢအမၤဟးဂီၤ အဝဲသ့ၣ်အနီၢ်ခိ အသူးသ့ၣ်လၤကပီၤလီၤ. . . . ဘၣ်ဆၣ် တၢ်စံၣ်ညီၣ်လၢ အဝဲသ့ၣ် ကြၢးဒိးန့ၢ်ဘၣ်ဝဲလၢ အတၢ်ကမၣ်အံၤအဃိန့ၣ် အဝဲသ့ၣ် ကဒိးန့ၢ်ဘၣ်ဝဲ လၢလၢပှဲၤပှဲၤလီၤ.”—ရိ. ၁:၂၄-၂၇.
လါဖ့ၤဘြူၤအါရံၤ ၈-၁၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၁-၂
“ယဟိဝၤယွၤ ကရၢကရိထီၣ်ဝဲ အပှၤဂီၢ်မုၢ်တဖၣ်”
တၢး၉၄ ၁၂/၁ ၉ ¶၄
လၢပတၢ်အိၣ်မူအပူၤ ပာ်တၢ်ဘူၣ်ထီၣ်ဘါထီၣ် ယဟိဝၤယွၤ လၢအလီၢ်ဘၣ်ဘၣ်
၄ ဖဲပှၤအံၣ်စရ့လးဖိတဖၣ် သူၣ်လီၤအဒဲလၢ ပှၢ်မုၢ်ကနၢပူၤအခါ နမ့ၢ်အိၣ်ကွၢ်စိလီၤလၢ တၢ်ဖီခိၣ်န့ၣ် နကထံၣ်တၢ်မနုၤတဖၣ်လဲၣ်. ဒဲကဝီၤ မုၢ်ထီၣ်, မုၢ်နုာ်, ကလံၤထံး ဒီးကလံၤစိးန့ၣ် ပှၤအံၣ်စရ့လးဖိတဖၣ် ဆီလီၤအသး သၢဒူၣ်တဖုလီၤ. ပှၤသူၣ်ထီၣ်ဒဲတဖၣ်လၢ ပှၤသၢကကွဲၢ်ကအိၣ်ဝဲအဂီၢ် သနာ်က့ နကထံၣ်ဘၣ်လၢ ဒဲတဖၣ်ဘၣ်တၢ်သူၣ်ထီၣ်အီၤလၢ အလီၢ်ဘၣ်ဘၣ် တဂ့ၢ်ဘၣ်တဂ့ၢ်လီၤ. နမ့ၢ်ကွၢ်လၢအဘူးန့ၣ် တၢ်လီၢ်လၢအဘူးဒီး ဒဲကဝီၤအခၢၣ်သးန့ၣ် နကထံၣ်ဘၣ် ကရူၢ်အဂၤတကရူၢ်စ့ၢ်ကီးလီၤ. ဒဲတကရူၢ်အံၤန့ၣ် မ့ၢ်ဝဲပှၤလ့ၤဝံဖိဒီး အဟံၣ်ဖိဃီဖိတဖၣ် အိၣ်ဝဲအလီၢ်လီၤ. မ့မ့ၢ်လၢဒဲကဝီၤအခၢၣ်သး တီတီန့ၣ် အိၣ်ဒီးတၢ်သူၣ်ထီၣ်လီၤဆီတခါလၢ ဘၣ်တၢ်ကဝီၤဃာ်အီၤလၢ တၢ်ကံးညာ်န့ၣ်လီၤ. တၢ်သူၣ်ထီၣ်အံၤမ့ၢ်ဝဲ “တၢ်အိၣ်ဖှိၣ်အဒဲ” မ့တမ့ၢ် ဒဲစီဆှံလၢ ပှၤအံၣ်စရ့လးဖိလၢ “အသးကူၣ်တၢ်သ့” ဘှီထီၣ်ဝဲ ဒ်ယဟိဝၤယွၤ အတၢ်ရဲၣ်တၢ်ကျဲၤအသိးလီၤ.—၄ မိၤၡ့ ၁:၅၂, ၅၃; ၂:၃, ၁၀, ၁၇, ၁၈, ၂၅; ၂ မိၤၡ့ ၃၅:၁၀.
it-1 ၃၉၇ ¶၄
ဒဲကဝီၤ
ပှၤအံၣ်စရ့လးဖိအဒဲကဝီၤန့ၣ် ဖးလဲၢ်ဖးထီလီၤ. ဘၣ်ဃးဒီးပှၤနီၣ်ဂံၢ်န့ၣ် ထဲဒၣ်ပှၤပိာ်ခွါလၢ အကဲသုးသ့န့ၣ် အိၣ်ဝဲ ၆၀၃,၅၅၀ ဒီးပှၤလ့ၤဝံဖိ အိၣ်ဝဲ ၂၂,၀၀၀ လီၤ. ပိာ်မုၣ်, ဖိသၣ်, ပှၤသးပှၢ် ဒီးပှၤလၢနီၢ်ခိက့ၢ်ဂီၤတဂ့ၤတဖၣ် တပၣ်ဒံးဘၣ်. ပမ့ၢ်ပာ်ဖှိၣ်ပှၤနီၣ်ဂံၢ်တဖၣ်အံၤ ဃုာ်ဒီး“ပှၤဂီၢ်မုၢ်အဂၤ ဂီၢ်မုၢ်ဂီၢ်ပၤ” န့ၣ် အနီၣ်ဂံၢ်ခဲလၢာ် ကအိၣ်ဝဲ ၃,၀၀၀,၀၀၀ မ့တမ့ၢ် အါန့ၢ်အန့ၣ်လီၤ. (၂ မိၤ. ၁၂:၃၈, ၄၄, ခ့ခါစှီၤကျိာ်; ၄ မိၤ. ၃:၂၁-၃၄, ၃၉) ပှၤဂီၢ်မုၢ်အိၣ်အါဝဲ ထဲထဲအံၤအဃိ အဝဲသ့ၣ်သူၣ်ဒဲအလီၢ်စ့ၢ်ကီး ကအိၣ်ဖးလဲၢ်ဖးထီလီၤ. ဖဲအဝဲသ့ၣ်သူၣ်လီၤအဒဲလၢ ဝ့ၢ်ယရံၤဃိ အဝၢ်ဘးခီ မိၤအးအတၢ်ပၢၤခိၣ်အခါ လံာ်စီဆှံပာ်ဖျါဝဲလၢ အဝဲသ့ၣ်သူၣ်လီၤအဒဲလၢ “ဘ့းဘၤယၡံမိး ပၢၢ်လၢ အဘ့းလၡံးထံၣ်” လီၤ.—၄ မိၤ. ၃၃:၄၉.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၇၆၄
တၢ်ဂံၢ်
ဖဲပှၤထၢထံဖိကီၢ်ဖိ အနီၣ်ဂံၢ်စရီအခါ အါတက့ၢ်ပှၤဂံၢ်လၢ ကလုာ်ဒူၣ်, ဟံၣ်ဖိဃီဖိအဒူၣ်, အမံၤဒီးအတၢ်ဟဲလီၤစၢၤလီၤသွဲၣ် အိၣ်ဝဲအသိးလီၤ. လံာ်စီဆှံပာ်ဖျါထီၣ်ဝဲ တၢ်ထၢကလုာ်ဒူၣ်အနီၣ်ဂံၢ်န့ၣ် အိၣ်ဒီးတၢ်တိာ်ပာ် အကလုာ်ကလုာ်လီၤ. မ့ၢ်ဝဲလၢ ပှၤကထၢတၢ်ခိတၢ်သွဲ, တၢ်ကဲသုး, (ဘၣ်ဃးဒီးပှၤလ့ၤဝံဖိတဖၣ်) ကဘၣ်မၤမူဒါလၢ တၢ်လီၢ်စီဆှံအဂီၢ်တဖၣ်လီၤ.
လါဖ့ၤဘြူၤအါရံၤ ၁၅-၂၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၃-၄
“ပှၤလ့ၤဝံဖိတဖၣ် အတၢ်ဖံးတၢ်မၤ”
it-2 ၆၈၃ ¶၃
ပှၤလုၢ်တၢ်ဒိၣ်
စီၤမိၤၡ့အတၢ်သိၣ်တၢ်သီအဖီလာ်. ဖဲပှၤအံၣ်စရ့လးဖိတဖၣ် ကဲကုၢ်လၢကီၢ်အဲၤကူပတူးအခါ ယဟိဝၤယွၤ မၤသံဝဲ ပှၤအဲၤကူပတူးဖိ အဖိဝဲၢ်ကိတဖၣ် ဖဲတၢ်နးတၢ်ဖှီၣ်အခါတဆံပှဲၤထီၣ်အခါ သနာ်က့ ပှၤအံၣ်စရ့လးဖိ အဖိဝဲၢ်ကိတဖၣ်န့ၣ် ယဟိဝၤယွၤ ပာ်ဃာ်ဝဲလၢအဂီၢ်လီၤ. (၂ မိၤ. ၁၂:၂၉; ၄ မိၤ. ၃:၁၃) ဖိဝဲၢ်ကိတဖၣ်န့ၣ် ကဲထီၣ်ဝဲယဟိဝၤယွၤအတၢ် ဒီးကဘၣ်တၢ်သူအီၤလၢ ကမၤယဟိဝၤယွၤ အတၢ်မၤလီၤလီၤဆီဆီအဂီၢ်လီၤ. ကစၢ်ယွၤအိၣ်ဒီးတၢ်ခွဲးတၢ်ယာ်လၢ ကပာ်ထီၣ်ဝဲဖိဝဲၢ်ကိတဖၣ်အံၤလၢ ပှၤလုၢ်တၢ်ဒိၣ် ဒီးကဟ့ၣ်အီၤမူဒါလၢ ကကွၢ်ထွဲဝဲ ဒဲစီဆှံအဂီၢ်လီၤ. ဘၣ်ဆၣ်မူဒါအံၤ ဘၣ်တၢ်ဟ့ၣ်လီၤ ပှၤလ့ၤဝံဖိတဖၣ်န့ၣ် မ့ၢ်တၢ်လၢ အကြၢးဝဲဘၣ်ဝဲလီၤ. လၢတၢ်န့ၣ်အဃိ ပှၤအံၣ်စရ့လးဖိ ၁၂ ဒူၣ်အဖိဝဲၢ်ကိန့ၣ် ဘၣ်တၢ်ခီလဲအီၤဒီး ပှၤလ့ၤဝံဖိတဖၣ်န့ၣ်လီၤ. ဖဲပှၤထၢစရီအခါ ပှၤအံၣ်စရ့လးဖိအဖိဝဲၢ်ကိလၢ အသးအိၣ်တလါတဖၣ်အနီၣ်ဂံၢ်န့ၣ် အါန့ၢ်ပှၤလ့ၤဝံဖိတဖၣ် အနီၣ်ဂံၢ် ၂၇၃ ဂၤန့ၣ်လီၤ. ပှၤကပှ့ၤက့ၤပှၤ ၂၇၃ ဂၤအံၤအဂီၢ် တဂၤန့ၣ်ပှၤဘၣ်ဟ့ၣ် ယဲၢ်ၡက့လး (၁၁ ဒီလၣ်) လီၤ. စ့သ့ၣ်တဖၣ်အံၤ ပှၤဘၣ်ဟ့ၣ်လီၤလၢ စီၤအၤဟရိၣ်ဒီး အဖိသ့ၣ်တဖၣ်န့ၣ်လီၤ. (၄ မိၤ. ၃:၁၁-၁၆, ၄၀-၅၁) တချုးလၢ ပှၤမၤဒ်အံၤဒံးဘၣ်န့ၣ် ယဟိဝၤယွၤ ဃုထၢဝဲပှၤလ့ၤဝံဖိ စီၤအၤဟရိၣ် အဒူၣ်ဖိထၢဖိလၢ ကကဲဝဲ ပှၤလုၢ်တၢ်အဒိၣ်လၢ ပှၤအံၣ်စရ့လးဖိတဖၣ်အဂီၢ်လီၤ.—၄ မိၤ. ၁:၁; ၃:၆-၁၀.
it-2 ၂၄၁
ပှၤလ့ၤဝံဖိတဖၣ်
မူဒါတဖၣ်. ပှၤလ့ၤဝံဖိတဖၣ်န့ၣ် ဟဲလီၤစၢၤလီၤသွဲၣ်လၢ စီၤလ့ၤဝံအဖိခွါတဖၣ်လၢအမ့ၢ် စီၤက့ရၡိၣ်, စီၤကဃး ဒီးစီၤမရၤရံၤန့ၣ်လီၤ. (၁ မိၤ. ၄၆:၁၁; ၁ ကွဲး. ၆:၁, ၁၆) ဖဲပှၢ်မုၢ်ကနၢအပူၤန့ၣ် အဝဲသ့ၣ် အဒူၣ်ဖိထၢဖိတဒူၣ်စုာ်စုာ် ဘၣ်အိၣ်ဘူးဒီး ဒဲစီဆှံလီၤ. စီၤအၤဟရိၣ် အဒူၣ်ဖိထၢဖိလၢ အဟဲလီၤစၢၤလီၤသွဲၣ်လၢ စီၤကဃးန့ၣ် ဘၣ်သူၣ်လီၤအဒဲလၢ ဒဲစီဆှံ အမုၢ်ထီၣ်တခီလီၤ. စီၤကဃးအဒူၣ်ဖိထၢဖိလၢ အဂၤတဖၣ်န့ၣ် ဘၣ်အိၣ်လၢ ကလံၤထံးတခီလီၤ. စီၤက့ရၡိၣ်အဒူၣ်ဖိထၢဖိတဖၣ် သူၣ်အဒဲလၢ မုၢ်နုာ်တခီ ဒီး ပှၤမရၤရံၤဖိတဖၣ် သူၣ်အဒဲလၢ ကလံၤစိးတခီလီၤ. (၄ မိၤ. ၃:၂၃, ၂၉, ၃၅, ၃၈) ပှၤလ့ၤဝံဖိတဖၣ်န့ၣ်ဘၣ်မၤဝဲ တၢ်ဘ့ၣ်လီၤထီထီၣ် ဒဲစီဆှံ ဒီးဘၣ်စိာ်ဝဲ ဒဲစီဆှံ အတၢ်ပီးတၢ်လီတဖၣ်လီၤ. မ့ၢ်တုၤလၢ ပှၤကဘၣ်သုးလီၢ်သုးကျဲန့ၣ် စီၤအၤဟရိၣ် ဒီးအဖိခွါတဖၣ် ကဘၣ်ဘ့ၣ်လီၤဝဲ ယၣ်ဘျးသဒၢလၢ အအိၣ်လၢ တၢ်အလီၢ်စီဆှံ ဒီးတၢ်အလီၢ်စီဆှံကတၢၢ်အဘၢၣ်စၢၤ ဒီးကဘၣ်မၤဘၢဝဲ တၢ်အၢၣ်လီၤအီလီၤအတလါ, တၢ်လုၢ်လီၢ် ဒီးတၢ်ပီးတၢ်လီအစီဆှံအဂၤသ့ၣ်တဖၣ်န့ၣ်လီၤ. ပှၤကဃးဖိတဖၣ် ဘၣ်စိာ်ဝဲ တၢ်ပီးတၢ်လီတဖၣ်အံၤလီၤ. ပှၤက့ရၡိၣ်ဖိတဖၣ်န့ၣ် ဘၣ်စိာ်ဝဲ ဒဲစီဆှံ အနီၣ်ကျၢၢ်ဘၢတၢ်လၢတၢ်အိပူၤ, အနီၣ်ကျၢၢ်ဘၢတၢ်လၢတၢ်ချၢ, ကျဲစၢၤအယၣ်ဘျးသဒၢ, ယၣ်ဘျးသဒၢလၢ အအိၣ်ဝးတရံး ဒဲစီဆှံဒီး တၢ်လုၢ်လီၢ်, ယၣ်ဘျးသဒၢလၢ ဂၢၤအကျဲစၢၤအဂီၢ်န့ၣ်လီၤ. ပှၤမရၤရံၤဖိတဖၣ်န့ၣ် ဘၣ်စိာ်ဝဲ အနီၣ်ဘိ, အထူၣ်, အခီၣ်, ဒီးအတၢ်ဖိတၢ်လံၤခဲလၢာ် ဒီးကယဲၢ်တၢ်ဘၣ်ဃးဒီးတၢ်မၤ ဒီးတၢ်ဂၢၤဝးတရံးအထူၣ်, အခီၣ်, အတၢ်ကမိာ်ခံ ဒီးအပျံၤတဖၣ်လီၤ.—၄ မိၤ. ၁:၅၀, ၅၁; ၃:၂၅, ၂၆, ၃၀, ၃၁, ၃၆, ၃၇; ၄:၄-၃၃; ၇:၅-၉.
it-2 ၂၄၁
ပှၤလ့ၤဝံဖိတဖၣ်
လၢစီၤမိၤၡ့အစိၤ ဖဲပှၤသုးလီၢ်သုးကျဲအခါ ပှၤလ့ၤဝံဖိတဖၣ်န့ၣ် ဘၣ်စိာ်ဝဲဒဲစီဆှံအတၢ်ပီးတၢ်လီအဃိ ပှၤသးမ့ၢ်အိၣ် ၃၀ မးပှၤကဘၣ်စးထီၣ်မၤ မူဒါအံၤလီၤ. (၄ မိၤ. ၄:၄၆-၄၉) မူဒါတနီၤန့ၣ် ပှၤစးထီၣ်မၤအီၤဖဲ ပှၤသးအိၣ် ၂၅ နံၣ်လီၤ. ဘၣ်ဆၣ် တမ့ၢ်တၢ်မၤလၢ ပှၤဘၣ်သူပှၤဂံၢ်ပှၤဘါ ဒ်သိးဒီး ပှၤဘၣ်စိာ်ထီၣ်စိာ်လီၤ ဒဲစီဆှံန့ၣ်ဘၣ်. (၄ မိၤ. ၈:၂၄) တုၤလီၤလၢ စီၤဒၤဝံးအစိၤန့ၣ် ပှၤသးမ့ၢ်အိၣ် ၂၀ ပှၤဘၣ်စးထီၣ်မၤမူဒါတဖၣ်အံၤလီၤ. မ့ၢ်လၢတလိၣ်လၢ ပှၤကဘၣ်စိာ်ထီၣ်စိာ်လီၤ ဒဲစီဆှံ (ဒဲစီဆှံအလီၢ် ပှၤသူၣ်ထီၣ်က့ၤတၢ်လုၢ်ဟံၣ်) လၢၤဘၣ်အဃိလီၤ. ပှၤသး ၅၀ မ့ၢ်ဘျဲၣ်န့ၣ် ပှၤဘၣ်အိၣ်ဘှံးလၢ တၢ်မၤလီၤ. (၄ မိၤ. ၈:၂၅, ၂၆; ၁ ကွဲး. ၂၃:၂၄-၂၆) ပှၤလ့ၤဝံဖိတဖၣ်န့ၣ် ကဘၣ်သ့ၣ်ညါဝဲ တၢ်မၤလိာ် လီၤတံၢ်လီၤဆဲးလီၤ. အဝဲသ့ၣ်န့ၣ် ဘၣ်ဖးဒီးသိၣ်လိဝဲ တၢ်သိၣ်တၢ်သီလၢ ပှၤကမျၢၢ်တဖၣ်အမဲာ်ညါအဃိလီၤ.—၁ ကွဲး. ၁၅:၂၇; ၂ ကွဲး. ၅:၁၂; ၁၇:၇-၉; ဃ့. ၈:၇-၉.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၈/၁ ၂၃ ¶၁၃
အိၣ်ဒီးတၢ်ကူၣ်သ့—ပျံၤယွၤ
၁၃ စီၤဒၤဝံးန့ၣ် ဖဲအထံၣ်တၢ်ကီတၢ်ခဲအခါ ခီဖျိလၢယဟိဝၤယွၤ မၤစၢၤအီၤအဃိ အဝဲအတၢ်ပျံၤယွၤ ဒီးအတၢ်နာ်န့ၢ်ယွၤ ဒိၣ်ထီၣ်ဝဲလီၤ. (စံးထီၣ်ပတြၢၤ ၃၁:၂၂-၂၄) ဘၣ်ဆၣ်လၢတၢ်ဂ့ၢ်လီၤဆီသၢမံၤအပူၤန့ၣ် ခီဖျိလၢအဝဲအတၢ်ပျံၤယွၤ စှၤလီၤဝဲအဃိ တၢ်မၤအသးလၢ အလီၤသူၣ်အုးသးအုးတဖၣ် ကဲထီၣ်ဝဲလီၤ. တၢ်မၤအသးအဆိကတၢၢ်တခါန့ၣ် တၢ်မၤလိာ်အိၣ်လၢ ပှၤလ့ၤဝံဖိတဖၣ် ကဘၣ်ယိးဝဲ တလါစီဆှံသနာ်က့ ဖဲအဝဲမၢ ပှၤဟဲက့ၤစိာ် တလါစီဆှံလၢ ဝ့ၢ်ယရူၤၡလ့ၣ်အခါ မၢဝဲပှၤကဟဲက့ၤတီၣ်လၢလ့ၣ်လီၤ. ဖဲတလါလီၤတခံၣ်အခါ ပှၤနီလ့ၣ် စီၤဧူးစၤန့ၣ် လၢတၢ်တပာ်ကဲအပူၤ လဲၤဖီၣ်ဝဲတလါအဃိ ဘၣ်သံဝဲတဘျီဃီလီၤ. စီၤဧူးစၤန့ၣ် မၤဘၣ်တၢ်ကမၣ်ဖးဒိၣ် သနာ်က့ နီၢ်နီၢ်မ့ၢ်လၢ စီၤဒၤဝံး တဒိကနၣ် တၢ်မၤလိာ်ဘၣ်အဃိ တၢ်မၤအသးလၢ အလီၤသူၣ်အုးသးအုး ကဲထီၣ်ဝဲလီၤ.—၂ ၡမူၤအ့လး ၆:၂-၉; ၄ မိၤၡ့ ၄:၁၅; ၇:၉.
လါဖ့ၤဘြူၤအါရံၤ ၂၂-၂၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤ ၅-၆
“နကွၢ်လိမၤဒိး ပှၤနစၤရံဖိကသ့ဒ်လဲၣ်”
it-2 ၄၇၇
ပှၤနစၤရံဖိ
ပှၤလၢအမၤ တၢ်အၢၣ်လီၤအီၤလီၤလၢ ကကဲပှၤနစၤရံဖိန့ၣ် ကဘၣ်ဟးဆှဲးဝဲ တၢ်အရ့ဒိၣ်သၢမံၤလီၤ. (၁) ကဘၣ်ဟးဆှဲးဝဲ စပံးထံဒီးသံးလီၤ. ကဘၣ်ဟးဆှဲး စပံးထံကိးကလုာ်ဒဲး တကးဒံးဘၣ် စပံးသၣ် အသံကစဲာ်မ့ၢ်ဂ့ၤ အဃ့မ့ၢ်ဂ့ၤ တဘၣ်အီၣ်ဝဲဘၣ်. စပံးသၣ် အသံကစဲာ်အထံ ဒီးစပံးသၣ်အစုၣ်ဆံၣ်အထံစ့ၢ်ကီး တဘၣ်အီဝဲဘၣ်. (၂) ပှၤနစၤရံဖိတဖၣ်န့ၣ် တဘၣ်တံာ်အခိၣ်သူဘၣ်. (၃) တဘၣ်လဲၤဝဲလၢ ပှၤသံစိာ်အကပၤဘၣ်. မ့မ့ၢ် အမိၢ်အပၢ်အဒီပုၢ်ဝဲၢ်ဒၣ်လဲာ် တဘၣ်လဲၤဖီၣ်ဘူးဝဲဘၣ်.—၄ မိၤ. ၆:၁-၇.
တၢ်အၢၣ်လီၤအီလီၤ လီၤဆီ. ‘ပှၤနစၤရံဖိလၢ ကစၢ်ယွၤအဂီၢ် [ဟ့ၣ်လုၢ်ထီၣ်အသး, မၤလီၤဖးအသး] န့ၣ် တမ့ၢ်တၢ်အၢၣ်လီၤအီလီ လီၤဆီလၢ အဝဲကမၤဂ့ၤအသးလၢ ပှၤမဲာ်ညါဒ်သိး ပှၤကပတြၢၤအီၤအဂီၢ်န့ၣ်ဘၣ်. လၢတၢ်န့ၣ်အလီၢ် “ကယဲၢ်မုၢ်နံၤမုၢ်နၤလၢ အလီၤဖးန့ၣ်ကကဲထီၣ် တၢ်စီဆှံလၢယွၤအဂီၢ်လီၤ.”—၄ မိၤ. ၆:၂, ၈; ထိၣ်သတြီၤဒီး ၁ မိၤ. ၄၉:၂၆.
အဃိတၢ်ဘျၢလၢပှၤနစၤရံဖိတဖၣ် ဘၣ်မၤထွဲဝဲန့ၣ် အရ့ဒိၣ် ဒီးအခီပညီအိၣ် လီၤဆီလၢ တၢ်ဘူၣ်ထီၣ်ဘါထီၣ် ယဟိဝၤယွၤအဂီၢ်လီၤ. ပှၤလုၢ်တၢ်ဒိၣ်အခိၣ်န့ၣ် အိၣ်ဒီးမူဒါလၢအစီဆှံအဃိ တဘၣ်လဲၤဝဲလၢ ပှၤသံစိာ်အကပၤဘၣ်, ဒ်န့ၣ်အသိး ပှၤနစၤရံဖိတဖၣ်စ့ၢ်ကီး တဘၣ်လဲၤဝဲဘၣ်. မ့မ့ၢ်အဘူးအတံၢ်ဒၣ်လဲာ် တဘၣ်လဲၤဝဲဘၣ်. ပှၤလုၢ်တၢ်ဒိၣ်အခိၣ် ဒီးပှၤလုၢ်တၢ်ဒိၣ်အဂၤတဖၣ်န့ၣ် ဘၣ်မၤမူဒါလၢ အရ့ဒိၣ်အဃိ ဖဲအဝဲသ့ၣ်မၤမူဒါစီဆှံလၢ ယဟိဝၤယွၤအမဲာ်ညါအခါ တဘၣ်အီစပံးထံ ဒီးသံးတဖၣ်ဘၣ်.—၃ မိၤ. ၁၀:၈-၁၁; ၂၁:၁၀, ၁၁.
တကးဒံးဘၣ် ဖဲအဝဲကဲ ပှၤနစၤရံဖိ (ဧ့ၤဘြံၤ, na·zirʹ) ဒီတကတီၢ်န့ၣ် “ဒီလူၤတၢ်တဘၣ်ဘၣ်အခိၣ်လိၤဘၣ်.” တၢ်ပနီၣ်အံၤ ဒုးသ့ၣ်ညါပှၤဂၤလၢ အဝဲမၤဝဲ နစၤရံအတၢ်အၢၣ်လီၤအီလီၤစီဆှံန့ၣ်လီၤ. (၄ မိၤ. ၆:၅) တၢ်အိၣ်ဘှံးအနံၣ်စီဆှံ, ယူဘလံၣ်အနံၣ် အတီၢ်ပူၤ ဘၣ်ဃးဒီး စပံးမုၢ်လၢ ပှၤတကျီအဒ့တဖၣ်န့ၣ် ပှၤသူဝဲ ဧ့ၤဘြံၤအတၢ်ကတိၤ na·zirʹ အံၤလီၤ. (၃ မိၤ. ၂၅:၅, ၁၁) ထူစီဘ့ၣ်ဘၣ်လၢ ပှၤလုၢ်တၢ်ဒိၣ်အခိၣ် ဘၣ်စၢထီၣ်ဝဲလၢ အခိၣ်တိသၣ်န့ၣ် အိၣ်ဒီးတၢ်ကတိၤလၢ “တၢ်စီဆှံလၢယွၤလီၤ.” ထူစီဘ့ၣ်ဘၣ်အံၤ ဘၣ်တၢ်ကိးအီၤလၢ တၢ်ပနီၣ်လၢအမ့ၢ် “တၢ်ဟ့ၣ်လုၢ်ထီၣ်လၢ အစီဆှံ [ဧ့ၤဘြံၤ, neʹzer, အဟဲအိၣ်ထီၣ်လၢ na·zirʹ] လီၤ.” (၂ မိၤ. ၃၉:၃၀, ၃၁) တကးဒံးဘၣ် အံၣ်စရ့လးအစီၤပၤလၢ ဘၣ်တၢ်ဒိးဖှူအီၤတဖၣ် အခိၣ်သလုးန့ၣ် ပှၤကိးလၢ neʹzer. (၂ မူၤ. ၁:၁၀; ၂ စီၤ. ၁၁:၁၂) တၢ်မၢဖိတဖၣ် တဲဝဲလၢ လၢခရံာ်ဖိတၢ်အိၣ်ဖှိၣ်အပူၤ ပိာ်မုၣ်တဖၣ်အခိၣ်သူလၢအထီန့ၣ် ဘၣ်တၢ်ဟ့ၣ်အီၤဒ်တၢ်ဖၢၣ်ခိၣ်အသိးလီၤ. တၢ်ပနီၣ်အံၤ မ့ၢ်တၢ်ဟ့ၣ်ပလီၢ်လၢ ပိာ်မုၣ်တဖၣ်န့ၣ် တဒ်သိးဒီး ပိာ်ခွါတဖၣ်ဘၣ်. အဝဲသ့ၣ်ကဘၣ်သ့ၣ်နီၣ်ထီၣ်ဝဲလၢ ကစၢ်ယွၤအတၢ်ရဲၣ်တၢ်ကျဲၤအပူၤန့ၣ် အဝဲသ့ၣ်မ့ၢ်ပှၤတဖၣ်လၢ ကဘၣ်ဒိးပၢအသးန့ၣ်လီၤ. ပှၤနစၤရံဖိန့ၣ် တဘၣ်တံာ်အခိၣ်ဆူၣ်ဘၣ်, ဘၣ်ဟးဆှဲး စပံးထံ ဒီးကဘၣ်အိၣ်စီဆှံဝဲလီၤ. အဝဲသ့ၣ်မၤဝဲဒ်အံၤန့ၣ် ပာ်ဖျါထီၣ်ဝဲလၢ အဝဲသ့ၣ် ညိကွံာ်အသး ဒီးကဘၣ်မၤထွဲဝဲဒ် ယဟိဝၤယွၤ အတၢ်ဘၣ်သးအသိးန့ၣ်လီၤ.—၁ ကရံၣ်. ၁၁:၂-၁၆.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၅ ၁/၁၅ ၃၀ ¶၂
ပှၤဖးလံာ်ဖိတဖၣ် အတၢ်သံကွၢ်
ဘၣ်ဆၣ် စီၤၡံၣ်ၡိၣ် မ့ၢ်ပှၤနစၤရံဖိ သနာ်က့ အဝဲလီၤဆီဒီးပှၤဂၤလီၤ. တချုးလၢ စီၤၡံၣ်ၡိၣ် အိၣ်ဖျဲၣ်ထီၣ်ဒံးဘၣ်န့ၣ် ယဟိဝၤယွၤ အမူခိၣ်ကလူး ဟဲတဲဘၣ်အမိၢ်လၢ “ကွၢ်ကွၢ်, နကဒၢထီၣ်, ဒီးနကဆံးစၢ်န့ၢ်နဖိပိာ်ခွါ, ဒီးဒီလူၤတဘၣ်ဘၣ် အခိၣ်ဘၣ်. အဂ့ၢ်ဒ်အံၤ, လၢအမိၢ်အဒၢလီၢ်လံၤလံၤန့ၣ်, ဖိသၣ်န့ၣ်ကကဲထီၣ် ပှၤနစၤရံဖိလၢ ယွၤအဂီၢ်လီၤ. ဒီးကမၤပူၤမၤဖျဲးသီ အံၣ်စရ့လးလၢ ပှၤဖလ့ၡသးဖိအစုပူၤလီၤ.” (စံၣ်ညီၣ်ကွီၢ် ၁၃:၅) စီၤၡံၣ်ၡိၣ် တမၤတၢ်အၢၣ်လီၤအီလီၤလၢ ကကဲဝဲ ပှၤနစၤရံဖိဘၣ်. အဝဲကဲထီၣ်ဝဲ ပှၤနစၤရံဖိ ခီဖျိ ကစၢ်ယွၤ ဃုထၢထီၣ်အီၤ ဒီးကဲဝဲပှၤနစၤရံဖိ တစိၤသးလီၤ. တၢ်သိၣ်တၢ်သီလၢ ပှၤတဘၣ်ထိးပှၤသံအစိၣ်ဘၣ်န့ၣ် တမ့ၢ်လၢအကဘၣ်ဃးဒီးအီၤဘၣ်. မ့ၢ်ဘၣ်ဃးဒီးအီၤန့ၣ် လၢတၢ်တပာ်သူၣ်ပာ်သးအပူၤ အဝဲမ့ၢ်ထိးဘၣ် ပှၤသံအစိၣ်န့ၣ် တမ့ၢ်လၢကဲထီၣ်က့ၤ ပှၤနစၤရံဖိတစိၤသး ကသ့ဘၣ်. အဃိ ပသ့ၣ်ညါဘၣ်လၢ ပှၤလၢအကဲ ပှၤနစၤရံဖိတစိၤသး ဒီးပှၤလၢအကဲ ပှၤနစၤရံဖိလၢ အသးဒၣ်ဝဲတဖၣ်န့ၣ် လီၤဆီလိာ်အသးလီၤ.