ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါမ့ၤ ၂–၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ၡမူၤအ့လး ၂၇–၂၉
“စီၤဒၤဝံး အတၢ်ကူၣ်သ့ဘၣ်ဃး တၢ်ဒုးတၢ်ယၤ”
it-1 ၄၁
စီၤအၤကံၣ်
ဖဲစီၤဒၤဝံး ဃ့ၢ်ပူၤဖျဲးအသးလၢ စီၤပၤစီလူး အစုပူၤအခါ အဝဲလဲၤဃ့ၢ်အိၣ်ခူသူၣ်လၢ စီၤပၤအၤကံၣ်အအိၣ်ခံဘျီလီၤ. အဆိကတၢၢ်တဘျီ ဖဲစီၤပၤဆိကမိၣ်အီၤလၢ အမ့ၢ်ဝဲဒုၣ်ဒါအခါ အဝဲမၤပျုၢ်အသးအဃိ စီၤပၤဆိကမိၣ်လၢ အဝဲမ့ၢ်ပှၤအပျုၢ် ဒီးပျၢ်လီၤကွံာ်အီၤလီၤ. (၁ မူၤ. ၂၁:၁၀-၁၅; စံး. ၃၄:အိးထီၣ်; ၅၆:အိးထီၣ်) ခံဘျီတဘျီ ဖဲစီၤဒၤဝံး ဒီးအပှၤ ၆၀၀ ဒီးအဟံၣ်ဖိဃီဖိတဖၣ် လဲၤတုၤဝဲအခါ စီၤပၤအၤကံၣ် ဒုးအိၣ်အီၤလၢ ဝ့ၢ်စံကလးအပူၤလီၤ. ဖဲအဝဲအိၣ်ဝဲဖဲန့ၣ် တနံၣ်ဒီးလွံၢ်လါအတီၢ်ပူၤ စီၤပၤအၤကံၣ် ဆိကမိၣ်ဝဲလၢ အဝဲလဲၤဒုးနၢၤဝဲ ယူဒၤအဝ့ၢ်တဖၣ်. ဘၣ်ဆၣ် နီၢ်နီၢ်န့ၣ် စီၤဒၤဝံးလဲၤဒုးနၢၤဝဲ ပှၤကၡူၢ်ဖိ, ပှၤက့စ့ၢ်ဖိ ဒီးပှၤဧမၤလ့းဖိတဖၣ်လီၤ. (၁ မူၤ. ၂၇:၁-၁၂) စီၤဒၤဝံး ပာ်မၤအသးသနာ်က့ စီၤပၤအၤကံၣ် နာ်န့ၢ်အီၤအဃိ ဖဲပှၤဖလ့ၡသးအပဒိၣ်တဖၣ် ကလဲၤဒုးဝဲ စီၤပၤစီလူးအခါ စီၤပၤအၤကံၣ် အဲၣ်ဒိးလဲၤကိး စီၤဒၤဝံးလၢ ကဒီသဒၢအီၤအဂီၢ် သနာ်က့ “ပှၤဖလ့ၡသးဖိ အပဒိၣ်တဖၣ်” တတူၢ်လိာ်ဝဲဘၣ်အဃိ ပှၤက့ၤဆှၢက့ၤ စီၤဒၤဝံးလၢ ဝ့ၢ်စံကလးလီၤ. (၁ မူၤ. ၂၈:၂; ၂၉:၁-၁၁) ဖဲစီၤဒၤဝံး ကဲထီၣ်စီၤပၤအခါ အဝဲလဲၤဒုးဝဲ ဝ့ၢ်ကၤသး ဘၣ်ဆၣ် အဝဲတမၤသံဝဲ စီၤပၤအၤကံၣ်ဘၣ်. စီၤပၤအၤကံၣ်န့ၣ် အိၣ်မူဝဲတုၤလၢ စီၤၡလိၤမိၤ ပၢတၢ်အဆၢကတီၢ်လီၤ.—၁ စီၤပၤ. ၂:၃၉-၄၁; see GATH.
ပိာ်ခွါသးစၢ်သ့ၣ်ဧၢ, နဒိးန့ၢ်အါထီၣ် ပှၤဂၤအတၢ်နာ်န့ၢ်နၤ ကသ့ဒ်လဲၣ်
၈ ဆိကမိၣ်ကွၢ် တၢ်ကီတၢ်ခဲအဂၤတခါလၢ စီၤဒၤဝံး ဘၣ်လဲၤခီဖျိဝဲန့ၣ်တက့ၢ်. ဖဲစီၤဒၤဝံးဘၣ်တၢ်ဒိးဖှူအီၤလၢ စီၤပၤဝံၤအလီၢ်ခံ အဝဲဘၣ်အိၣ်ခိးဝဲလၢ အကကဲထီၣ်ဘၣ် ယူၤဒၤအစီၤပၤလီၤ. (၁ ၡမူၤအ့လး ၁၆:၁၃; ၂ ၡမူၤအ့လး ၂:၃, ၄) ဖဲန့ၣ်အဆၢကတီၢ် တၢ်မနုၤမၤစၢၤအီၤလၢ အကအိၣ်ခိးတၢ်လၢ တၢ်ဝံသးစူၤအပူၤလဲၣ်. စီၤဒၤဝံးတဆိကမိၣ်ဝဲတၢ်လၢ ကမၤလီၤစၢ်အသးသ့ၣ်တဖၣ်ဘၣ်. လၢတၢ်န့ၣ်အလီၢ် စီၤဒၤဝံးသးစၢၢ်ဆၢဝဲ တၢ်လၢအမၤဝဲသ့တဖၣ်လီၤ. အဒိ, ဖဲစီၤဒၤဝံးအိၣ်လၢ ပှၤဖလ့ၤၡသးဖိတၢ်လီၢ်အခါ အဝဲအိၣ်ဒီး တၢ်ခွဲးတၢ်ယာ်တဖၣ်လၢ ကဒုးဆၢက့ၤဝဲ ပှၤအံၣ်စရ့လးဖိ အဒုၣ်အဒါတဖၣ်လီၤ. ခီဖျိလၢ အဝဲမၤဝဲဒ်န့ၣ်အဃိ အဒီသဒၢဝဲ ယူဒၤအတၢ်လီၢ်တၢ်ကျဲလီၤ.—၁ ၡမူၤအ့လး ၂၇:၁-၁၂.
it-2 ၂၄၅ ¶၆
တၢ်လံၣ်တၢ်လီ
လံာ်စီဆှံ တြီဝဲတၢ်လံၣ်တၢ်လီလၢ အမၤဘၣ်ဒိ ပှၤဂၤလီၤ. ဘၣ်ဆၣ် အခီပညီတမ့ၢ်လၢ ပကဘၣ်တဲ တၢ်ဂ့ၢ်တၢ်ကျိၤအမ့ၢ်အတီလၢ ပှၤလၢတကြၢးသ့ၣ်ညါဝဲတဖၣ်န့ၣ်ဘၣ်. ယ့ၣ်ၡူးတဲဝဲလၢ “တဘၣ်ဟ့ၣ်လီၤ တၢ်လၢအစီဆှံ လၢထွံၣ်တဖၣ် အအိၣ်တဂ့ၤ. ဒီးနပလဲတဖၣ်န့ၣ် တဘၣ်တၢၤလီၤလၢ ထိးတဖၣ် အမဲာ်ညါတဂ့ၤ, မ့ၢ်လၢ အဝဲသ့ၣ် ကယီၢ်တံၢ်ဝဲ ဒီးကဃၣ်အသးလၢသုအိၣ် ဒီးကအ့ၣ်သုလီၤ.” (မး. ၇:၆) ယ့ၣ်ၡူးတစံးဆၢက့ၤဝဲ တၢ်သံကွၢ်တနီၤ အတၢ်စံးဆၢ လၢလၢပှဲၤပှဲၤအဃိ အဝဲပူၤဖျဲးလၢ တၢ်ဘၣ်ယိၣ်လီၤ. (မး. ၁၅:၁-၆; ၂၁:၂၃-၂၇; ယိၤ. ၇:၃-၁၀) စီၤအၤဘြၤဟၣ်, စီၤအံၤစဲး, နီၢ်ရၤဃး ဒီးဝံအလံၤၡါန့ၣ် ဆှၢကမၣ်ဝဲ မ့တမ့ၢ် တတဲဖျါထီၣ် တၢ်မ့ၢ်တၢ်တီလၢ ပှၤလၢတဘူၣ်ထီၣ်ဘါထီၣ် ယဟိဝၤယွၤ တဖၣ်စ့ၢ်ကီးဘၣ်.—၁ မိၤ. ၁၂:၁၀-၁၉; အဆၢဒိၣ် ၂၀; ၂၆:၁-၁၀; ၡူ. ၂:၁-၆; ယၤ. ၂:၂၅; ၂ စီၤပၤ. ၆:၁၁-၂၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၁၀ ၁/၁ ၂၀ ¶၅–၆
ပှၤသံတဖၣ် မၤစၢၤပှၤသ့ဧါ
ဆိကမိၣ်ကွၢ် လံာ်စီဆှံ ပာ်ဖျါဝဲလၢ ဖဲပှၤတဂၤသံဝဲအခါ “က့ၤက့ၤဝဲဆူအဟီၣ်ခိၣ် ဒီးအတၢ်ကူၣ်တၢ်ဖး ဟးဂူာ်ဟးဂီၤ” ဝဲလီၤ. (စံးထီၣ်ပတြၢၤ ၁၄၆:၄) စီၤစီလူး ဒီးစီၤၡမူၤအ့လးန့ၣ် သ့ၣ်ညါဝဲလၢ ကစၢ်ယွၤတြီဝဲလၢ ပှၤတဘၣ်မၤဘၣ်ဃးပှၤသးဒီး ပှၤလၢအဆဲးကျိးဒီး တၢ်ဝံတၢ်နါတဖၣ်န့ၣ်ဘၣ်. လၢအပူၤကွံာ်န့ၣ် စီၤစီလူးအနီၢ်ကစၢ်ဒၣ်ဝဲ တီခိၣ်ရိၤမဲဝဲ ဒီးနီဟးထီၣ်ကွံာ်ဝဲ ပှၤလၢအမၤတၢ်ဝံတၢ်နါ အတၢ်ဖံးတၢ်မၤတဖၣ်လၢ ထံကီၢ်အပူၤလီၤ.—၃ မိၤၡ့ ၁၉:၃၁.
ဆိကမိၣ်ကွၢ် တၢ်ဂ့ၢ်အံၤတက့ၢ်. စီၤၡမူၤအ့လး လၢအမ့ၢ် ပှၤလၢအိၣ်ဒီး တၢ်သးတီတဂၤ အဝဲမ့ၢ်အိၣ်မူဒ် ပှၤနီၢ်သးဖိတဂၤအသိးန့ၣ် မ့ၢ်ကမၤကမၣ် ကစၢ်ယွၤအတၢ်မၤလိာ် ဒီးကပာ်ဖှိၣ်မၤသကိးတၢ်ဒီး ပှၤလၢအဆဲးကျိးဒီးတၢ်ဝံတၢ်နါ လၢကလဲၤထံၣ်လိာ်အသးဒီး စီၤစီလူးအဂီၢ်န့ၣ်ဧါ. ယဟိဝၤယွၤန့ၣ် တတဲတၢ်ဒီး စီၤစီလူးလၢၤဘၣ်. ပှၤလၢအမၤတၢ်ဝံတၢ်နါအတၢ်ဖံးတၢ်မၤန့ၣ် မ့ၢ်ကမၢဆူၣ်ဝဲ သ့တၢ်လၢာ်ကစၢ်လၢ ကဆဲးကျိးဒီး စီၤစီလူး ခီဖျိသူဝဲ စီၤၡမူၤအ့လးလၢ အသံတ့ၢ်တဂၤန့ၣ် ကန့ၢ်ဧါ. တန့ၢ်ဘၣ်. အဃိ “စီၤၡမူၤအ့လး” တဂၤအံၤ တမ့ၢ်ကစၢ်ယွၤအဝံလၢ အိၣ်ဒီးတၢ်သးတီတဂၤန့ၣ် လ့ၤတက့ၤဘၣ်. အဝဲန့ၣ်မ့ၢ်ဝဲ တၢ်ဝံတၢ်နါတဂၤလၢ အပာ်မၣ်အသးဒ် စီၤၡမူၤအ့လးလၢ အသံတ့ၢ်တဂၤအသိးလီၤ.
လါမ့ၤ ၉–၁၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ၡမူၤအ့လး ၃၀–၃၁
“မၤဆူၣ်ထီၣ်နသး ခီဖျိယဟိဝၤယွၤ”
တၢး၀၆ ၈/၁ ၂၈ ¶၁၂
ပျံၤယဟိဝၤယွၤ ဒီးအိၣ်ဒီးတၢ်သးခု
၁၂ စီၤဒၤဝံး အတၢ်ပျံၤ ယဟိဝၤယွၤန့ၣ် မၤစၢၤအီၤလၢ အသုတမၤကမၣ်ဘၣ်တၢ်တဂ့ၤအဂီၢ်. တကးဒံးဘၣ် ဖဲတၢ်ကီတၢ်ခဲအတီၢ်ပူၤ မၤစၢၤအီၤလၢ အဝဲကဆၢတဲာ်တၢ် ဒီးမၤတၢ်လၢ တၢ်ကူၣ်သ့အပူၤ. ဖဲစီၤဒၤဝံး ဒီးအပှၤတဖၣ် ဃ့ၢ်ပူၤဖျဲးအသးလၢ စီၤစီလူးအစုပူၤအခါ ဘၣ်လဲၤအိၣ်ဝဲဖဲ စံကလးလၢ ပှၤဖလ့ၡသးဖိအကီၢ်ပူၤ တနံၣ်ဒီးလွံၢ်လါလီၤ. (၁ ၡမူၤအ့လး ၂၇:၅-၇) ဖဲအဝဲသ့ၣ်တအိၣ်အခါ ပှၤဧမၤလ့းဖိတဖၣ် ဟဲဒုးအဝဲသ့ၣ်အဝ့ၢ် ဒွဲၣ်အူကွံာ်ဝဲ ဒီးက့ၤကိးအဝဲသ့ၣ်အဖိအမါ ဒီးအဆၣ်ဖိကီၢ်ဖိတဖၣ်လီၤ. ဖဲစီၤဒၤဝံး ဒီးအပှၤတဖၣ် ဟဲက့ၤတုၤ ဒီးထံၣ်ဝဲတၢ်မၤအသးအံၤအခါ အဝဲသ့ၣ်ဟီၣ်ဝဲယၢၤဝဲ ဒီးအသးဘၣ်ဒိဒိၣ်မးအဃိ တဲဝဲစီၤဒၤဝံးလၢ ကကွံာ်အီၤလၢလၢၢ်လီၤ. ဖဲန့ၣ်အဆၢကတီၢ် စီၤဒၤဝံးအသးဘၣ်ဒိ သနာ်က့ အဝဲအသးတဟးဂီၤဘၣ်. (ကတိၤဒိ ၂၄:၁၀) အဝဲပျံၤ ယဟိဝၤယွၤ ဒီး “ပာ်ဆူၣ်အသးလၢ ယွၤအပူၤ” လီၤ. ခီဖျိလၢ ကစၢ်ယွၤအတၢ်မၤစၢၤအဃိ လၢခံအဝဲသ့ၣ် လဲၤလူၤချုးဝဲ ပှၤဧမၤလ့းဖိတဖၣ် ဒီးဟဲက့ၤစိာ်က့ၤဝဲ အဖိအမါ ဒီးအဆၣ်ဖိကီၢ်ဖိတဖၣ်လီၤ.—၁ ၡမူၤအ့လး ၃၀:၁-၂၀.
တၢး၁၂ ၄/၁၅ ၃၀ ¶၁၄
ယဟိဝၤယွၤ ဒီသဒၢပှၤလၢ တၢ်အုၣ်က့ၤခီၣ်က့ၤအဂီၢ်
၁၄ စီၤဒၤဝံးန့ၣ် ထံၣ်ဘၣ်ဒီးတၢ်သူၣ်ကိၢ်သးဂီၤအါမးလၢ အတၢ်အိၣ်မူအပူၤလီၤ. (၁ ၡမူၤအ့လး ၃၀:၃-၆) လံာ်စီဆှံပာ်ဖျါထီၣ်ဝဲလၢ ယဟိဝၤယွၤ သ့ၣ်ညါစီၤဒၤဝံး အတၢ်တူၢ်ဘၣ်တဖၣ်လီၤ. (ဖး စံးထီၣ်ပတြၢၤ ၃၄:၁၈; ၅၆:၈) ကစၢ်ယွၤသ့ၣ်ညါစ့ၢ်ကီး ပတၢ်တူၢ်ဘၣ်တဖၣ်ဂ့ၤဂ့ၤ. ဖဲပ ‘သူၣ်ကၢ်သးလီၤ’ မ့တမ့ၢ် “ပသးဟးဂီၤအခါ” အဝဲအိၣ်ဘူးဒီးပှၤ. ပသ့ၣ်ညါထီၣ်ဘၣ် ဒ်အံၤအဃိ ကဲထီၣ်တၢ်မၤမုာ်ထီၣ်က့ၤပှၤ ဒ်စီၤဒၤဝံးအသိးလီၤ. စီၤဒၤဝံးသးဝံၣ်ဝဲလၢ “ယကသူၣ်ဖှံသးညီ, ဒီးသူၣ်ခုသးခုလၢ နတၢ်သးကညီၤအပူၤ, နကွၢ်လီၤယတၢ်နးတၢ်ဖှီၣ်, နသ့ၣ်ညါယသးလၢ အဘၣ်ကိၢ်ဘၣ်ဂီၤအပူၤ” လီၤ. (စံး. ၃၁:၇) ဘၣ်ဆၣ် တမ့ၢ်ထဲလၢ ယဟိဝၤယွၤ သ့ၣ်ညါဝဲ ပတၢ်ကိၢ်တၢ်ဂီၤတဖၣ်ဘၣ်. ဒ်သိးပကအိၣ်ဒီး တၢ်တူၢ်န့ၢ်ခီၣ်ကဲအဂီၢ် အဝဲမၤမုာ်ထီၣ်က့ၤပှၤ ဒီးဟ့ၣ်ဂံၢ်ဟ့ၣ်ဘါပှၤလီၤ. ကျဲတဘိလၢ အဝဲမၤမုာ်ထီၣ်က့ၤပှၤန့ၣ် မ့ၢ်ဝဲခရံာ်ဖိ တၢ်အိၣ်ဖှိၣ်ရိဖှိၣ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၅ ၃/၁၅ ၂၄ ¶၈
လံာ်စီဆှံ အတၢ်ပာ်ဖျါလၢ လံာ် ၁ ၡမူၤအ့လးအဂီၢ်
၃၀:၂၃, ၂၄. တၢ်ဆၢတဲာ်လၢ ဘၣ်တၢ်သန့ၤထီၣ်အီၤလၢ ၄ မိၤၡ့ ၃၁:၂၇ အပူၤန့ၣ် ပာ်ဖျါထီၣ်ဝဲလၢ ယဟိဝၤယွၤ ပာ်လုၢ်ပာ်ပှ့ၤ ပှၤလၢအဆီၣ်ထွဲမၤစၢၤတၢ်လၢ တၢ်အိၣ်ဖှိၣ်အပူၤ ကိးဂၤဒဲးလီၤ. အဃိ ပမ့ၢ်မၤတၢ်မနုၤဂ့ၤဂ့ၤ မ်ပ ‘မၤအီၤလၢ သူၣ်ဒီဖျၢၣ်သးဒီဖျၢၣ် ဒ်ပမၤလၢ ယဟိဝၤယွၤ အဂီၢ်အသိး ဒီးတမ့ၢ်လၢ ပှၤဟီၣ်ခိၣ်ဖိအဂီၢ် အသိးဘၣ်န့ၣ်တက့ၢ်.’—ကလီးစဲ ၃:၂၃.
လါမ့ၤ ၁၆–၂၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ၡမူၤအ့လး ၁–၃
“ထါဟီၣ်တၢ် လၢအမ့ၢ်ချံၣ်န့ၣ် ပမၤလိန့ၢ်ဘၣ် တၢ်မနုၤလဲၣ်”
တၢး၀၀ ၆/၁၅ ၁၃ ¶၉
ပာ်ကဲပှၤလၢ အိၣ်ဒီးတၢ်န့ၢ်စိန့ၢ်ကမီၤ
၉ စီၤဒၤဝံးန့ၣ် ပှၤမၤအီၤတတီတလိၤ သနာ်က့ အသးဟးဂီၤဧါ. အဝဲကိးပသူထီၣ်လၢ ယဟိဝၤယွၤ အအိၣ်လၢ “ပှၤမၤအၢတၢ်ဃုယသးလီၤ.” (စံးထီၣ်ပတြၢၤ ၅၄:၃) အဝဲတဲဖျါထီၣ် အတၢ်တူၢ်ဘၣ်လၢ ယဟိဝၤယွၤအအိၣ်လၢ “မၤပူၤမၤဖျဲးယၤလၢ ယဒုၣ်ယဒါတက့ၢ်. . . . ပှၤအဂံၢ်ဆူၣ်အဘါဆူၣ်တဖၣ် အိၣ်ဖှိၣ်ထီဒါယၤလီၤ. တမ့ၢ်ဘၣ်လၢ ယတၢ်ကမၣ်အဃိဘၣ်, တမ့ၢ်ဘၣ်လၢ ယတၢ်ဒဲးဘးအဃိဘၣ်, ယွၤဧၢ. ယတၢ်အၢတအိၣ်ဘၣ်ဒီး, ဃ့ၢ်ဝဲဒီး ကတဲာ်ကတီၤအသးလီၤ. ဖုသံနီၣ်ထီၣ်, ဒီးဟဲသဂၢၢ်ယၤ, ဒီးကွၢ်တၢ်တက့ၢ်.” (စံးထီၣ်ပတြၢၤ ၅၉:၁-၄) နၤစ့ၢ်ကီး မ့ၢ်နတူၢ်ဘၣ်လၢ နတမၤတၢ်ကမၣ် သနာ်က့ ပှၤလၢအိၣ်ဒီး တၢ်န့ၢ်စိန့ၢ်ကမီၤတဂၤ ဃုနတၢ်ကမၣ်ဧါ. စီၤဒၤဝံးန့ၣ် ပာ်ကဲစီၤစီလူးထီဘိလီၤ. ဖဲစီၤစီလူး သံအခါ အဝဲတသူၣ်ခုသးခုဝဲဘၣ်. လၢတၢ်န့ၣ်အလီၢ် အဝဲကွဲးဝဲထါဟီၣ်တယုၢ်လၢ “စီၤစီလူးဒီးစီၤယိနၤသၣ်, မ့ၢ်ပှၤလၢတၢ်အဲၣ်အီၤ, ဒီးပှၤကွၢ်အီၤမုာ်လၢအမူဒံး, . . . ဃ့ၢ်တၢ်ချ့န့ၢ်လံာ်ဧိၤတြၤဧိၤတက့ၢ်, အဂံၢ်အဘါဆူၣ်န့ၢ် ခ့ယုၢ်တက့ၢ်လီၤ. အံၣ်စရ့လးအဖိမုၣ်သ့ၣ်ဧၢ, ဟီၣ်လၢစီၤစီလူးအဃိ” တက့ၢ်. (၂ ၡမူၤအ့လး ၁:၂၃, ၂၄) စီၤစီလူး မၤအီၤတတီတလိၤ သနာ်က့ စီၤဒၤဝံး ပာ်လီၤဒိဂ့ၤတဲာ်ဘၣ်လၢ အပာ်ဖျါထီၣ် တၢ်ယူးယီၣ်ပာ်ကဲ ပှၤလၢယဟိဝၤယွၤ ဒိးဖှူအီၤလီၤ.
တၢး၁၂ ၄/၁၅ ၁၀ ¶၈
တၢ်သးတတီန့ၣ် မ့ၢ်ဝဲမုၢ်နံၤခံကတၢၢ် အတၢ်ပနီၣ်လၢ အအၢအသီတခါ
၈ လၢလံာ်စီဆှံအပူၤန့ၣ် ပှၤလၢအိၣ်ဒီးတၢ်သးတီတဖၣ် အဒိအတဲာ်အိၣ်ဝဲအါမး. ပကဆိကမိၣ်ကွၢ် ပှၤခံဂၤအဒိအတဲာ် ဒီးပမၤလိန့ၢ်ဘၣ် တၢ်မနုၤလၢ အဝဲသ့ၣ်အအိၣ်လဲၣ်. အဆိကတၢၢ် ပကဆိကမိၣ်ကွၢ် ပှၤတဂၤလၢအတီဒီး စီၤဒၤဝံးအဂ့ၢ်. စီၤယိနၤသၣ်န့ၣ် မ့ၢ်ဝဲစီၤစီလူးအဖိခွါ အဒိၣ်ကတၢၢ်အဃိ အဝဲအိၣ်ဒီးတၢ်မုၢ်လၢ်လၢ ကကဲထီၣ်ဘၣ် အံၣ်စရ့လးအစီၤပၤ. ဘၣ်ဆၣ် ယဟိဝၤယွၤ ဃုထၢထီၣ်ဝဲ စီၤဒၤဝံးလၢ အံၣ်စရ့လးအစီၤပၤလီၤ. စီၤယိနၤသၣ် ပာ်ကဲဝဲ ကစၢ်ယွၤ အတၢ်ဆၢတဲာ်. အဝဲတသးက့ၣ် စီၤဒၤဝံး ဒီးတထံၣ်ဝဲဒ် ပှၤလၢအပြၢလိာ်အသးဒီးအီၤဘၣ်. လၢတၢ်န့ၣ်အလီၢ် “စီၤယိနၤသၣ်အသးစဲဘူးဒီး စီၤဒၤဝံးအသး” ဒီးအဝဲအၢၣ်လီၤ စီၤဒၤဝံးလၢ ကတီဒီးအီၤလီၤ. စီၤယိနၤသၣ် ပာ်ဖျါထီၣ်လၢ အတူၢ်လိာ်ဝဲ စီၤဒၤဝံး ခီဖျိ ဟ့ၣ်လီၤဝဲ အကူအသိး, အနး, အချံၣ် ဒီးအယီၢ်တကိးလီၤ. (၁ မူၤ. ၁၈:၁-၄) တသ့ဖဲအသ့ စီၤယိနၤသၣ် မၤစၢၤစီၤဒၤဝံးလီၤ. တၢ်ဘၣ်ယိၣ်အိၣ်လၢ အသးသမူအဂီၢ် သနာ်က့ အဝဲဒီသဒၢဝဲ စီၤဒၤဝံး. လၢတၢ်သးတီအပူၤ စီၤယိနၤသၣ် တဲဝဲ စီၤဒၤဝံးလၢ “နကကဲထီၣ် စီၤပၤလၢအံၣ်စရ့လးအဖီခိၣ်, ဒီးယကကဲထီၣ်ပှၤခံဂၤဒီးနၤ” လီၤ. (၁ မူၤ. ၂၀:၃၀-၃၄; ၂၃:၁၆, ၁၇) အဃိဖဲစီၤယိနၤသၣ်သံအခါ စီၤဒၤဝံးပာ်ဖျါထီၣ် အတၢ်သူၣ်အုးသးအုး ဒီးအတၢ်အဲၣ် ခီဖျိတၢ်သးဝံၣ်တယုၢ်န့ၣ် တလီၤကမၢကမၣ်ဘၣ်.—၂ မူၤ. ၁:၁၇, ၂၆.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၃၆၉ ¶၂
ဒီပုၢ်ဝဲၢ်
ပှၤလၢအပာ်ဖှိၣ်မၤသကိးတၢ်လၢ တၢ်ဂ့ၢ်တခါ မ့တမ့ၢ် တၢ်တိာ်ပာ် တခါအဂီၢ်န့ၣ် ကိးလိာ်အသးလၢ “ဒီပုၢ်ဝဲၢ်” လီၤ. အဒိ, စိၢ်အစီၤပၤဃံရၣ် ကိးဝဲစီၤပၤၡလိၤမိၤလၢ ဒီပုၢ်ဝဲၢ်န့ၣ် တမ့ၢ်ထဲလၢ အဝဲသ့ၣ် အလီၢ်အလၤလီၤဂာ်လိာ်အသးဘၣ်. ဘၣ်သ့ၣ်သ့ၣ် အဝဲသ့ၣ်ပာ်ဖှိၣ်မၤသကိးတၢ်န့ၣ် မ့ၢ်ဒ်သိး ကဒိးန့ၢ်ဘၣ် သ့ၣ် ဒီးတၢ်ပီးတၢ်လီအဂၤတဖၣ်လၢ တၢ်လုၢ်ဟံၣ်အဂီၢ်လီၤ. (၁ စီၤပၤ. ၉:၁၃; ၅:၁-၁၂) စီၤဒၤဝံး ကွဲးဝဲလၢ “ဒီပုၢ်ဝဲၢ်အိၣ်ဝဲဆိးဝဲလၢ အသးတဖျၢၣ်ဃီအံၤ, ဂ့ၤဆံးဒိၣ်လဲၣ်, ဒီးမုာ်ဆံးဒိၣ်လဲၣ် ဆံးဒိၣ်လဲၣ်န့ၣ် ကွၢ်ကွၢ်တက့ၢ်.” တၢ်ကတိၤအံၤ တအဲၣ်ဒိးတဲဝဲထဲလၢ အဘူးအတံၢ်တဖၣ် အိၣ်ဃူလိာ်ဖိးလိာ်အသးန့ၣ်ဘၣ်. (စံး. ၁၃၃:၁) စီၤဒၤဝံး ကိးဝဲစီၤယိနၤသၣ်လၢ ဒီပုၢ်ဝဲၢ်န့ၣ် တမ့ၢ်လၢအဝဲသ့ၣ် မ့ၢ်ဒီပုၢ်ဝဲၢ်တံၢ်နီၢ်အဃိဘၣ်. မ့ၢ်လၢအဝဲသ့ၣ်အဲၣ်လိာ်အသး ဒီးအသးအိၣ်လိာ်သးအဃိလီၤ. (၂ မူၤ. ၁:၂၆) ပှၤလၢအတၢ်ပာ်သူၣ်ပာ်သး တဂ့ၤဘၣ်တဖၣ်စ့ၢ်ကီး အဝဲသ့ၣ် ကိးလိာ်အသးလၢ ဒီပုၢ်ဝဲၢ်လီၤ.—ကတိၤ. ၁၈:၉.
လါမ့ၤ ၂၃–၂၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ၡမူၤအ့လး ၄–၆
“ဘၣ်ယိၣ်လၢ နကမၤဘၣ်ဒိဘၣ် ယဟိဝၤယွၤအသး”
တၢး၀၅ ၅/၁၅ ၁၇ ¶၈
လံာ်စီဆှံ အတၢ်ပာ်ဖျါလၢ လံာ် ၂ ၡမူၤအ့လး
၆:၁–၇. စီၤဒၤဝံး အိၣ်ဒီးတၢ်သူၣ်ဘျၢသးဘျၢ သနာ်က့ အဝဲဂုာ်ကျဲးစၢးစိာ်ဆှၢဝဲ တလါစီဆှံလၢ လ့ၣ်န့ၣ် မ့ၢ်ဝဲအမၤကမၣ် ယွၤအတၢ်သိၣ်တၢ်သီ ဒီးကဲထီၣ် တၢ်ကလီကလီလီၤ. (၂ မိၤၡ့ ၂၅:၁၃, ၁၄; ၄ မိၤၡ့ ၄:၁၅, ၁၉; ၇:၇-၉) စီၤဧူးစၤ ဖီၣ်ဝဲတလါစီဆှံန့ၣ် ပာ်ဖျါထီၣ်ဝဲလၢ ပမ့ၢ်အိၣ်ဒီးတၢ်သူၣ်ဘျၢသးဘျၢ သနာ်က့ ပကဘၣ်မၤထွဲဒံး ယဟိဝၤယွၤအတၢ်သိၣ်တၢ်သီ ဒီးအဝဲတဆီတလဲန့ၢ်ပှၤ အတၢ်သိၣ်တၢ်သီဘၣ်.
တၢး၀၅ ၂/၁ ၂၇ ¶၂၀
ယဟိဝၤယွၤန့ၣ် မၤတၢ်အဘၣ်ထီဘိ
၂၀ ပာ်သူၣ်ပာ်သးလၢ စီၤဧူးစၤန့ၣ် ကြၢးသ့ၣ်ညါဝဲ တၢ်မၤလိာ်ဂ့ၤဂ့ၤလီၤ. တလါစီဆှံန့ၣ် မ့ၢ်တၢ်ပနီၣ်လၢ ယဟိဝၤယွၤအိၣ်ဝဲ. တၢ်မၤလိာ်အိၣ်လၢ ပှၤလၢကစၢ်ယွၤ တဟ့ၣ်အခွဲးလၢ ကဖီၣ်ဝဲ တလါစီဆှံတဖၣ်န့ၣ် ဖီၣ်ဝဲတန့ၢ်ဘၣ် ဒီးတၢ်ဟ့ၣ်ပလီၢ်အိၣ်လၢ ပှၤလၢတဒိကနၣ် တၢ်မၤလိာ်တဖၣ်န့ၣ် ကဘၣ်တၢ်မၤသံအီၤလီၤ. (၄ မိၤၡ့ ၄:၁၈-၂၀; ၇:၈၉) အဃိ တၢ်စိာ်ဆှၢတလါစီဆှံန့ၣ် မ့ၢ်တၢ်မၤလၢ ပှၤကဘၣ်မၤအီၤ လီၤတံၢ်လီၤဆဲးလီၤ. စီၤဧူးစၤန့ၣ် “တမ့ၢ်ပှၤလုၢ်တၢ်ဒိၣ်တဂၤ” သနာ်က့ မ့ၢ်ပှၤလ့ၤဝံဖိတဂၤအဃိ ကြၢးသ့ၣ်ညါဝဲ တၢ်မၤလိာ်အံၤ ဂ့ၤဂ့ၤလီၤ. တကးဒံးဘၣ် လၢပူၤကွံာ်နံၣ်တဖၣ်န့ၣ် ပှၤလဲၤစိာ်ဆှၢပာ် တလါစီဆှံလၢ အပၢ်အဟံၣ်လီၤ. (၁ ၡမူၤအ့လး ၆:၂၀–၇:၁) တချုးလၢ စီၤဒၤဝံး သုးဝဲတလါစီဆှံဒံးဘၣ်န့ၣ် တလါစီဆှံအံၤအိၣ်ပာ်လၢ စီၤဧူးစၤ အပၢ်အဟံၣ်အနံၣ် ၇၀ လံအဃိ အဝဲသ့ၣ်ကသ့ၣ်ညါပာ်ဝဲ တၢ်မၤလိာ်တဖၣ်လၢ ဘၣ်ဃးဒီးတလါစီဆှံလီၤ.
တၢး၀၅ ၂/၁ ၂၇ ¶၂၁
ယဟိဝၤယွၤန့ၣ် မၤတၢ်အဘၣ်ထီဘိ
၂၁ ဒ်ပပာ်ဖျါတ့ၢ်လၢညါအသိး ယဟိဝၤယွၤ ထံၣ်တၢ်အိၣ်လၢ ပသးပူၤလီၤ. လံာ်စီဆှံ ပာ်ဖျါထီၣ်ဝဲလၢ စီၤဧူးစၤ အတၢ်ကမၣ် “တၢ်မၤလၢတအိၣ်ဒီးတၢ်ပာ်ကဲ” အဃိ ပသ့ၣ်ညါဘၣ်လၢ ယဟိဝၤယွၤ ကထံၣ်ဝဲ အဝဲအတၢ်ပာ်သူၣ်ပာ်သးလၢ ကွၢ်လီၤထဲအနီၢ်ကစၢ်အဂီၢ်လီၤ. ဘၣ်ဃးဒီးတၢ်ဂ့ၢ်အံၤန့ၣ် လံာ်စီဆှံ တပာ်ဖျါထီၣ်ဝဲ လီၤတံၢ်လီၤဆဲးဘၣ်. ဘၣ်သ့ၣ်သ့ၣ် စီၤဧူးစၤန့ၣ် ကအိၣ်ဒီးတၢ်ပာ်ထီၣ်ထီသးဒီး ကအဲၣ်ဒိးမၤတၢ်လၢ တကြၢးမၤဝဲန့ၣ်ဧါ. (ကတိၤဒိ ၁၁:၂) တလါစီဆှံလၢ အဝဲသ့ၣ်အဟံၣ်ဖိဃီဖိ အံးထွဲကွၢ်ထွဲတ့ၢ်ဝဲန့ၣ် ဆှၢဘၣ်ဝဲလၢ ပှၤကမျၢၢ်အမဲာ်ညါအဃိ မ့ၢ်အတၢ်ပာ်ထီၣ်ထီသး ဟဲအိၣ်ထီၣ်ဧါ. (ကတိၤဒိ ၈:၁၃) စီၤဧူးစၤန့ၣ် အတၢ်နာ်စှၤလီၤဝဲ တုၤဒၣ်လဲာ် အဝဲဆိကမိၣ်ဝဲလၢ ယဟိဝၤယွၤန့ၣ် အစုဖုၣ်တုၤလၢကဃၣ်ဝဲ တလါစီဆှံလၢ အမ့ၢ်တၢ်ပနီၣ်လၢ ယဟိဝၤယွၤအိၣ်ဝဲန့ၣ်ဧါ. ဒ်လဲၣ်ဂ့ၤဒ်လဲၣ်ဂ့ၤ ပနာ်သ့သပှၢ်ကတၢၢ်လၢ ယဟိဝၤယွၤ မၤတၢ်လၢအဘၣ်လီၤ. ဖျါလၢယဟိဝၤယွၤ ထံၣ်နုာ်ဝဲတၢ်တမံၤမံၤလၢ စီၤဧူးစၤအသးပူၤအဃိ စံၣ်ညီၣ်အီၤလၢ အဆိအချ့လီၤ.—ကတိၤဒိ ၂၁:၂.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၉၆ ၄/၁ ၂၉ ¶၁
ပာ်ထီၣ်နတၢ်ဝံတၢ်ယိးလၢ ယဟိဝၤယွၤ အလိၤထီဘိ
ဒ်အမ့ၢ်စီၤပၤတဂၤအသိး စီၤဒၤဝံးန့ၣ် အမူဒါအိၣ်စ့ၢ်ကီးလၢ တၢ်ဂ့ၢ်အံၤအဖီခိၣ်လီၤ. အဝဲအတၢ်မၤန့ၣ် ပာ်ဖျါထီၣ်ဝဲလၢ ပှၤလၢအအိၣ်ဒီးတၢ်ရ့လိာ်သးလၢအဂ့ၤဒီး ယဟိဝၤယွၤ တဖၣ်ဒၣ်လဲာ် ဖဲထံၣ်ဘၣ်ဒီး တၢ်ကီတၢ်ခဲအခါ တဘျီတခီၣ် မၤဘၣ်တၢ်လၢအတကြၢးတဘၣ်သ့လီၤ. အခီၣ်ထံးခါန့ၣ် အဝဲအသးဒိၣ်ထီၣ်တၢ် ဘၣ်ဆၣ်လၢခံ အဝဲပျံၤထီၣ်တၢ်လီၤ. (၂ ၡမူၤအ့လး ၆:၈, ၉) အတၢ်နာ်န့ၢ် ယဟိဝၤယွၤန့ၣ် ဘၣ်တၢ်မၤကွၢ်အီၤ ဒိၣ်ဒိၣ်မုာ်မုာ်လီၤ. ဖဲန့ၣ်အဆၢကတီၢ် အဝဲတပာ်ထီၣ် အတၢ်ဝံတၢ်ယိးလၢ ယဟိဝၤယွၤအလိၤဘၣ် ဒီးတမၤထွဲဝဲ ယွၤအတၢ်သိၣ်တၢ်သီတဖၣ်စ့ၢ်ကီးဘၣ်. တဘျီတခီၣ် တၢ်အိၣ်သးဒ်သိးအံၤ ကဲထီၣ်အသးဒီးပှၤသ့ဧါ. ဖဲပထံၣ်ဘၣ် တၢ်ကီတၢ်ခဲ ခီဖျိလၢ ပတမၤထွဲ ယဟိဝၤယွၤ အတၢ်ဟံးစုနဲၣ်ကျဲတဖၣ်အခါ မ့ၢ်ပပာ်တၢ်ကမၣ်လၢ ယဟိဝၤယွၤ အလိၣ်ဧါ.—ကတိၤဒိ ၁၉:၃.
တၢး၀၅ ၁၀/၁ ၂၃–၂၄ ¶၁၄–၁၅
“ပျံၤကစၢ်ယွၤ ဒီးဟ့ၣ်အီၤတၢ်လၤကပီၤတက့ၢ်”
၁၄ ဖဲပအိၣ်ခိးယွၤအမုၢ်နံၤ အဆၢကတီၢ် ပမုၢ်လၢ်တၢ်မနုၤသ့လဲၣ်. လံာ်လီၣ်ဖျါ ပာ်ဖျါထီၣ်ဝဲ ကစၢ်ယွၤ အတၢ်တိာ်ပာ် ဟဲလၢပှဲၤထီၣ် တဆီဘၣ်တဆီအဂ့ၢ်. ပကအိၣ်ကတဲာ်ကတီၤပသးအဂီၢ် အရ့ဒိၣ်လၢ ပကဘၣ် မၤထွဲဒ်န့ၣ်အသိးလီၤ. ဝံအတၢ်စံးပာ် ပာ်ဖျါဝဲ တၢ်မၤအသးတဖၣ်လၢ ပကထံၣ်ဘၣ်ဖဲ “ကစၢ်အမုၢ်နံၤ” လၢအစးထီၣ်အသးလၢ ၁၉၁၄ ဖဲခရံာ်ကဲထီၣ်စီၤပၤအခါလီၤ. (လီၣ်ဖျါ ၁:၁၀) လံာ်လီၣ်ဖျါ ဒုးသးစၢၢ်ဆၢပှၤ မူခိၣ်ကလူးတဂၤလၢ အဒိးန့ၢ်ဘၣ်မူဒါလၢ ကစံၣ်တဲၤတဲလီၤ “တၢ်သးခုကစီၣ်အထူအယိာ်.” အဝဲကိးထီၣ်ဝဲလၢ အကလုၢ်ဖးဒိၣ်လၢ “ပျံၤကစၢ်ယွၤ ဒီးဟ့ၣ်အီၤတၢ်လၤကပီၤတက့ၢ်, မ့ၢ်လၢ အဝဲကစံၣ်ညီၣ်တၢ် အနၣ်ရံၣ် ဟဲတုၤလံအဃိလီၤ.” (လီၣ်. ၁၄:၆, ၇) တၢ်စံၣ်ညီၣ်တၢ် “အနၣ်ရံၣ်” န့ၣ်ဖုၣ်ဝဲ ဒီးပၣ်ဃုာ်စ့ၢ်ကီးဒီး တၢ်ဟ့ၣ်ပလီၢ်ဒီး တၢ်စံၣ်ညီၣ်လီၤ. ခဲအံၤ ပအိၣ်မူဘၣ်လၢ ဆၢကတီၢ်အဝဲန့ၣ်လီၤ.
၁၅ ပဘၣ်တၢ်ဟ့ၣ်ဂံၢ်ဟ့ၣ်ဘါပှၤလၢ တချုးလၢ တၢ်စံၣ်ညီၣ်တၢ်အနၣ်ရံၣ်တုၤဒံးဘၣ် ဆၢကတီၢ်ခဲအံၤ ပကဘၣ် “ပျံၤကစၢ်ယွၤ ဒီးဟ့ၣ်အီၤတၢ်လၤကပီၤ” လီၤ. တၢ်ပျံၤယွၤန့ၣ် မ့ၢ်မနုၤလဲၣ်. ပမ့ၢ်ပျံၤကစၢ်ယွၤန့ၣ် ပကဟးဆှဲး တၢ်အၢတၢ်သီတဖၣ်. (ကတိၤ. ၈:၁၃) ပမ့ၢ်မၤလၤကပီၤကစၢ်ယွၤန့ၣ်ပကဒိကနၣ် အကလုၢ်လၢ တၢ်ယူးယီၣ်ပာ်ကဲအပူၤ. ပတၢ်မၤတအါတလၢတုၤလၢ ပဖးလံာ်စီဆှံ တချုးဘၣ်န့ၣ်ဘၣ်. ကစၢ်ယွၤအတၢ်ဟံးစုနဲၣ်ကျဲလၢ ပကဘၣ်ထီၣ်တၢ်အိၣ်ဖှိၣ်န့ၣ် ပတပာ်အီၤ ဒ်တၢ်လၢအရ့တဒိၣ်ဘၣ်န့ၣ်ဘၣ်. (ဧ့ၤ. ၁၀:၂၄, ၂၅) ပပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ပစံၣ်တဲၤတဲလီၤဘၣ် ယွၤအဘီမုၢ်တၢ်သးခုကစီၣ်အဂ့ၢ် ဒီးပစံၣ်တဲၤတဲလီၤလၢ တၢ်သူၣ်ဆူၣ်သးဆူၣ်အပူၤ. ပသန့ၤပသးလၢ ယဟိဝၤယွၤလၢပသးဒီဖျၢၣ် ဒီးကိးဆၢကိးကတီၢ်ဒဲး. (စံး. ၆၂:၈) ပတူၢ်လိာ် ယဟိဝၤယွၤဒ်အမ့ၢ် မူဟီၣ်ကယၢတၢ်ပၢကစၢ် ဒီးပမၤလၤကပီၤအီၤ ဒ်အမ့ၢ်ပတၢ်ပၢကစၢ် ခီဖျိပဒိကနၣ်အကလုၢ်လၢ တၢ်သူၣ်အိၣ်သးအိၣ်အပူၤ. နပျံၤကစၢ်ယွၤနီၢ်နီၢ် ဒီးနမၤလၤကပီၤအီၤလၢ ကျဲဒ်န့ၣ်တဖၣ်ဧါ.
လါမ့ၤ ၃၀–လါယူၤ ၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ၡမူၤအ့လး ၇–၈
“ယဟိဝၤယွၤ မၤတၢ်အၢၣ်လီၤအီလီၤဒီး စီၤဒၤဝံး”
တၢး၁၀ ၄/၁ ၂၀ ¶၃
“နဘီနမုၢ် ကအိၣ်ဂၢၢ်ဆိးကျၢၤ”
ယဟိဝၤယွၤ ဘၣ်သူၣ်ဘၣ်သးဝဲ စီၤဒၤဝံး အတၢ်ပာ်သူၣ်ပာ်သးဒိၣ်မးလီၤ. အဃိ ယဟိဝၤယွၤ မၤတၢ်အၢၣ်လီၤအီလီၤဒီး စီၤဒၤဝံးလၢ စီၤပၤလၢကပၢတၢ် လီၤထူလီၤယိာ်တဂၤန့ၣ် ကဟဲအိၣ်ထီၣ်လၢ စီၤဒၤဝံး အစၢၤအဝဲသွဲၣ်လီၤ. ယဟိဝၤယွၤ မၤဝဲဒ်အံၤန့ၣ် မ့ၢ်ဒ်သိး ကမၤလၢပှဲၤထီၣ် ဝံအတၢ်စံးပာ် ဒီးဆိၣ်ဂ့ၤစီၤဒၤဝံးလၢ အတၢ်သူၣ်ဆူၣ်သးဆူၣ်အဃိလီၤ. ဘၣ်ဃးဒီး တၢ်အၢၣ်လီၤအံၤန့ၣ် ဝံနၤသၣ် တဲဘၣ်စီၤဒၤဝံးလၢ “နဟံၣ်ဒီးနဘီနမုၢ်ကအိၣ်ဂၢၢ်ဆိးကျၢၤ လီၤစိၤလီၤထီလၢနမဲာ်ညါ, ဒီးနလီၢ်ပစိာ် ကအိၣ်လီၤစိၤလီၤထီလီၤ.” (အဆၢဖိ ၁၆) ပှၤလၢအန့ၢ်သါဘၣ်တၢ်လၢ ကမၤဂၢၢ်ကျၢၤ တၢ်အၢၣ်လီၤအံၤထီဘိ ဒီးကပၢတၢ်လီၤထူလီၤယိာ်တဂၤန့ၣ် ကမ့ၢ်မတၤလဲၣ်.—စံးထီၣ်ပတြၢၤ ၈၉:၂၀, ၂၉, ၃၄-၃၆.
တၢး၁၀ ၄/၁ ၂၀ ¶၄
“နဘီနမုၢ် ကအိၣ်ဂၢၢ်ဆိးကျၢၤ”
ပှၤနစၤရ့းဖိ ယ့ၣ်ၡူးန့ၣ် ဟဲလီၤစၢၤလီၤသွဲၣ်လၢ စီၤဒၤဝံးလီၤ. ဖဲမူခိၣ်ကလူးတဂၤ ဟဲတဲဖျါထီၣ်ဝဲ ဘၣ်ဃးဒီး ယ့ၣ်ၡူးကဟဲအိၣ်ဖျဲၣ်ထီၣ် အဂ့ၢ်အခါ အဝဲတဲဝဲဒ်အံၤ “ယဟိဝၤယွၤ ကဟ့ၣ်လီၤအီၤလၢ အပၢ်စီၤဒၤဝံး အလီၢ်ပစိာ်လီၤ. ဒ်စီၤပၤတဂၤအသိး အဝဲကပၢ စီၤယၤကိာ်အဟံၣ် လီၤထူလီၤယိာ် ဒီးအဘီအမုၢ်န့ၣ် အကတၢၢ်တအိၣ်ဘၣ်.” (လူၤကၣ် ၁:၃၂, ၃၃) တၢ်အၢၣ်လီၤအီလီၤလၢ ကစၢ်ယွၤမၤဝဲဒီး စီၤဒၤဝံးန့ၣ် ဟဲလၢပှဲၤထီၣ်လၢ ယ့ၣ်ၡူးလီၤ. အဃိ ယ့ၣ်ၡူးပၢဘၣ်တၢ်န့ၣ် တမ့ၢ်လၢ ပှၤကညီအတၢ်ဃုထၢဘၣ်. မ့ၢ်ဝဲကစၢ်ယွၤ အတၢ်ဃုထၢ ဒီးခီဖျိလၢ တၢ်အၢၣ်လီၤတခါအံၤအဃိ အဝဲဒိးန့ၢ်ဘၣ် တၢ်ခွဲးတၢ်ယာ်လၢ ကပၢဘၣ်တၢ်လီၤထူလီၤယိာ်လီၤ. ပကဘၣ်သ့ၣ်နီၣ်ထီၣ်လၢ ကစၢ်ယွၤ အတၢ်အၢၣ်လီၤတဖၣ်န့ၣ် ဟဲလၢပှဲၤထီၣ်ဝဲထီဘိလီၤ.—ယၡါယၤ ၅၅:၁၀, ၁၁.
နာ်ယွၤအဘီအမုၢ် လၢလၢပှဲၤပှဲၤ
၁၄ ခဲအံၤပကတဲသကိး တၢ်အၢၣ်လီၤအီၤလီၤလၢ ကစၢ်ယွၤမၤဝဲဒီး စီၤဒၤဝံးလီၤ. (ဖး ၂ ၡမူၤအ့လး ၇:၁၂, ၁၆) ဖဲစီၤဒၤဝံး ပၢတၢ်လၢ ဝ့ၢ်ယရူၤၡလ့ၣ်အခါ ယဟိဝၤယွၤမၤဝဲ တၢ်အၢၣ်လီၤအီလီၤအံၤဒီးအီၤ ဒီးအၢၣ်လီၤအီၤလၢ မ့းၡံအၤအဘီအမုၢ်န့ၣ် ကဟဲလီၤစၢၤလီၤသွဲၣ်အီၤလီၤ. (လူၤကၣ် ၁:၃၀-၃၃) ခီဖျိလၢ တၢ်အၢၣ်လီၤအီလီၤတခါအံၤအဃိ စီၤဒၤဝံးအစၢၤအသွဲၣ်တဂၤ ကအိၣ်ဒီး “တၢ်ခွဲးတၢ်ယာ်” လၢကပၢဘၣ်တၢ်လၢ မ့းၡံအၤ အဘီအမုၢ်လီၤ. (ဃ့း. ၂၁:၂၅-၂၇, NWT) စီၤဒၤဝံး အတၢ်ပၢန့ၣ် ကအိၣ်ဂၢၢ်ဆိးကျၢၤ လီၤထူလီၤယိာ် ခီဖျိ ယ့ၣ်ၡူးအတၢ်ပၢလီၤ. စီၤဒၤဝံး “အချံအသၣ် ကအိၣ်လီၤထူလီၤယိာ် ဒီးအလီၢ်ပစိာ်ဒ်မုၢ်အသိး” လီၤ. (စံး. ၈၉:၃၄-၃၇) မ့းၡံအၤအဘီအမုၢ်န့ၣ် ကပၢတၢ်တီတီလိၤလိၤထီဘိ ဒီးဘီမုၢ်အတၢ်ဆိၣ်ဂ့ၤတဖၣ်န့ၣ် ကအိၣ်လီၤထူလီၤယိာ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၂၀၆ ¶၂
မုၢ်နံၤခံကတၢၢ်
စီၤဘံးလၣ် အတၢ်စံးပာ်. တချုးလၢပှၤအံၣ်စရ့လးဖိသ့ၣ်တဖၣ် နုာ်လီၤလၢ ကီၢ်တၢ်စံးပာ်အပူၤဒံးဘၣ်န့ၣ် ဝံဘံးလၣ် တဲဘၣ်မိၤအးအစီၤပၤလၢ “ယကဘိးဘၣ်သ့ၣ်ညါနၤလၢ တၢ်လၢပှၤဂီၢ်မုၢ်အံၤ ကမၤနပှၤဂီၢ်မုၢ်လၢမုၢ်နံၤအခံကတၢၢ်တဖၣ်န့ၣ်လီၤ. . . . ဆၣ်တဖျၢၣ် ကထီၣ်ဘၣ်လၢ ယၤကိာ်အပူၤ, ဒီးစီၤပၤအနီၣ်ထိးတဘိ ကထီၣ်လၢ အံၣ်စရ့လး ဒီးကတီၢ်ဘၣ် မိၤအးအသနၢၣ်တဖၣ်, ဒီးမၤဟးဂီၤ ကယဲၢ်ပှၤတၢထီၣ်တၢလီၤဖိ” လီၤ. (၄ မိၤ. ၂၄:၁၄-၁၇) ဝံအတၢ်စံးပာ်လၢပှဲၤထီၣ် အဆိကတၢၢ်တဘျီန့ၣ် မ့ၢ်ဝဲဖဲ “ဆၣ်တဖျၢၣ်” လၢအမ့ၢ် စီၤဒၤဝံး လၢအမၤနၢၤဝဲ ပှၤမိၤအးဖိတဖၣ်လီၤ. (၂ မူၤ. ၈:၂) ဖဲဝံအတၢ်စံးပာ်အံၤ ဟဲလၢပှဲၤထီၣ်အဆၢကတီၢ် “မုၢ်နံၤအခံကတၢၢ်” န့ၣ် ဖျါလၢအဲၣ်ဒိးတဲဝဲ ဖဲစီၤဒၤဝံး ကဲထီၣ်စီၤပၤအခါလီၤ. စီၤဒၤဝံးန့ၣ် ဘၣ်တၢ်ဒိလီၤအီၤ ဒ်အမ့ၢ် မ့းၡံအၤစီၤပၤယ့ၣ်ၡူးအဃိ ဝံအတၢ်စံးပာ်အံၤ ဘၣ်ထွဲလိာ်အသးဒီး တၢ်ဆၢကတီၢ်လၢ ယ့ၣ်ၡူးကမၤနၢၤဝဲ အဒုၣ်အဒါတဖၣ်လီၤ.—ၡါ. ၉:၇; စံး. ၂:၈, ၉.
လါယူၤ ၆–၁၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ၡမူၤအ့လး ၉–၁၀
“စီၤဒၤဝံး ပာ်ဖျါထီၣ် တၢ်အဲၣ်လၢအတီ”
တၢး၀၆ ၆/၁၅ ၁၄ ¶၆
နဃုထံၣ်န့ၢ်တၢ်သူၣ်ခုသးခုသ့
စီၤဒၤဝံးကွဲးဝဲလၢ “ပှၤလၢအမၤပှၤဖှီၣ်ဖိယာ်ဖိ ဒီးတၢ်ကူၣ်သ့န့ၣ် ဘၣ်ဆိၣ်ဂ့ၤဝဲလီၤ. လၢတၢ်အၢတၢ်သီအမုၢ်နံၤန့ၣ် ယွၤကမၤပူၤမၤဖျဲးအီၤလီၤ. ယွၤကအံးထီၣ်ကွၢ်လီၤအီၤ, ဒီးဒုးမူဒံးအီၤလီၤ. ကဘၣ်တၢ်ဆိၣ်ဂ့ၤအီၤလၢ ထံဧိၤကီၢ်ဧိၤအပူၤ” လီၤ. (စံးထီၣ်ပတြၢၤ ၄၁:၁, ၂) စီၤဒၤဝံး ပာ်ဖျါထီၣ် တၢ်သးကညီၤလၢ အတံၤသကိး စီၤယိနၤသၣ် အဖိခွါ စီၤမဖံဘိၤၡ့း လၢအခီၣ်ဟးဂီၤတဂၤအဖီခိၣ်န့ၣ် ပာ်ဖျါထီၣ်ဝဲ တၢ်အဒိအတဲာ်လၢ ပှၤကဘၣ်ပာ်ဖျါထီၣ် တၢ်သူၣ်ကညီၤသးကညီၤလၢ ပှၤဖှီၣ်ဖိယာ်ဖိတဖၣ်အဖီခိၣ်လီၤ.—၂ ၡမူၤအ့လး ၉:၁-၁၃.
တၢး၀၅ ၅/၁၅ ၁၇ ¶၁၂
လံာ်စီဆှံအတၢ်ပာ်ဖျါလၢ လံာ် ၂ ၡမူၤအ့လး အဂီၢ်
၉:၁, ၆, ၇. စီၤဒၤဝံး တီဒီးအတၢ်အၢၣ်လီၤ. ပဝဲစ့ၢ်ကီး ပကဘၣ်တီဒီး ပတၢ်အၢၣ်လီၤ.
တၢး၀၂ ၂/၁၅ ၁၄ ¶၁၀
အဝဲသ့ၣ်လဲၤခီဖျိဝဲ တၢ်ဆှုၣ်တၢ်မဲလၢ အဖံးအညၣ်ကျါ
၁၀ မ့ၢ်လၢ စီၤပၤဒၤဝံး အဲၣ်ဝဲ စီၤယိနၤသၣ်ဒိၣ်မးအဃိ စှၤနံၣ်ဝံၤအလီၢ်ခံ အဝဲပာ်ဖျါထီၣ် တၢ်သးကညီၤလၢ စီၤယိနၤသၣ်အဖိခွါ စီၤမဖံဘိၤၡ့း အဖီခိၣ်လီၤ. စီၤစီလူး အတၢ်စုလီၢ်ခီၣ်ခိၣ်တဖၣ်န့ၣ် စီၤဒၤဝံး ဟ့ၣ်က့ၤဝဲ စီၤမဖံဘိၤၡ့း ဒီးဟ့ၣ်လီၤဝဲ စီၤစံဘၤမူဒါလၢ ကကွၢ်ထွဲဝဲ ဟီၣ်ခိၣ်လီၢ်တဖၣ်န့ၣ်လီၤ. စီၤဒၤဝံး တဲဘၣ်စီၤမဖံဘိၤၡ့းလၢန “ကအီၣ်ကိၣ်လၢ ယစီၢ်နီၤခိၣ်တထံၣ်ဃီလီၤ.” (၂ ၡမူၤအ့လး ၉:၆-၁၀) စီၤဒၤဝံး ပာ်ဖျါထီၣ် တၢ်သးကညီၤလၢ စီၤမဖံဘိၤၡ့းလၢ အခီၣ်တဂ့ၤဘၣ်တဂၤအံၤအဖီခိၣ်န့ၣ် ကမၤမုာ်ထီၣ်က့ၤအီၤ ဒီးကကဲထီၣ်တၢ်မၤစၢၤလၢအဂီၢ် သပှၢ်တၢၢ်လီၤ. မ့ၢ်တၢ်မၤလိလၢ အဂ့ၤဒိၣ်မး. ပဝဲစ့ၢ်ကီး ပကြၢးပာ်ဖျါထီၣ် တၢ်သးကညီၤလၢ ပှၤလၢတၢ်ဆှုၣ်တၢ်မဲအိၣ်လၢ အဖံးအညၣ်ကျါတဖၣ် အဖီခိၣ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၂၆၆
ခၣ်ဆူၣ်
လၢပျၢၤပှၤမုၢ်ထီၣ်ဖိ ပိာ်ခွါတဖၣ် ဃုာ်ဒီးပှၤအံၣ်စရ့လးပိာ်ခွါတဖၣ်န့ၣ် ပာ်ထီအခၣ်ဆူၣ် ဒ်အမ့ၢ် ပိာ်ခွါအလၤကပီၤအသိးလီၤ. ကစၢ်ယွၤ အတၢ်မၤလိာ်အိၣ်လၢ ပှၤအံၣ်စရ့လးဖိတဖၣ် တဘၣ်လူၤအခၣ်ဆူၣ်ဘၣ်. (၃ မိၤ. ၁၉:၂၇; ၂၁:၅) ပှၤလူၤပှၤခၣ်ဆူၣ်န့ၣ် မ့ၢ်ဝဲတၢ်ဘူၣ်တၢ်ဘါလၢအကမၣ်တနီၤ အလုၢ်အလၢ်လီၤ.
လါယူၤ ၁၃–၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ၡမူၤအ့လး ၁၁–၁၂
“တဘၣ်ပျဲ တၢ်မိၣ်န့ၢ်သးလီလၢ အတကြၢးတဘၣ်တဖၣ် ဒိၣ်စိလၢနဖီခိၣ်တဂ့ၤ”
နထူၣ်ဖျဲးထီၣ်လၢ မုၣ်ကီၤလံၢ်အပျံၤသကွီၤသ့
၁၀ ခီဖျိလၢ တၢ်သူၣ်လီသးကွံအဃိ စီၤပၤဒၤဝံးသးပ့ၤနီၣ်ကွံာ်တၢ်လၢ ယဟိဝၤယွၤဟ့ၣ်လီၤအီၤတဖၣ်လီၤ. ယဟိဝၤယွၤဟ့ၣ်လီၤအီၤ တၢ်ထူးတၢ်တီၤ, တၢ်လီၢ်တၢ်လၤ ဒီးအမၤနၢၤဝဲ အဒုၣ်အဒါ အဘျီအါမးလီၤ. စီၤဒၤဝံးသ့ၣ်ညါဝဲလၢ ကစၢ်ယွၤဟ့ၣ်အီၤ တၢ်ဟ့ၣ်သ့ၣ်တဖၣ်အံၤ “အါန့ၢ်ပဂံၢ်သ့” လီၤ. (စံးထီၣ်ပတြၢၤ ၄၀:၅) ဘၣ်ဆၣ် လၢခံစီၤဒၤဝံး အတၢ်သူၣ်လီသးကွံအိၣ်ထီၣ် ဒီးအလီကီတၢ်အါန့ၢ်ဒံး တၢ်လၢယဟိဝၤယွၤ ဟ့ၣ်လီၤအီၤလီၤ. စီၤဒၤဝံးအမါအိၣ်အါဂၤလံ သနာ်က့ အဝဲလီကီဒံးပှၤဂၤအမါလီၤ. ပိာ်မုၣ်န့ၣ်အမံၤလၢ နီၢ်ဘၤသၡ့ဘၤ ဒီးအဝၤန့ၣ် မ့ၢ်ဝဲပှၤဃ့ၤသးဖိ စီၤအူၤရံယၤလီၤ. ခီဖျိလၢစီၤဒၤဝံးအဲၣ်လီၤ အနီၢ်ကစၢ်သးအဃိ အမံဃုာ်ဒီး နီၢ်ဘၤသၡ့ဘၤဒီး နီၢ်ဘၤသၡ့ဘၤဒၢထီၣ်ဝဲလီၤ. စီၤဒၤဝံးမၤကမၣ်မုၣ်ကမၣ်ခွါ တကးဒံးဘၣ် အဝဲရဲၣ်ကျဲၤဝဲလၢ ပှၤကမၤသံစီၤအူၤရံယၤလီၤ. (၂ ၡမူၤအ့လး ၁၁:၂-၁၅) မ့ၢ်စီၤဒၤဝံးဆိကမိၣ်ဝဲ တၢ်မနုၤလဲၣ်. မ့ၢ်အဆိကမိၣ်ဝဲလၢ ယဟိဝၤယွၤတထံၣ် တၢ်လၢအမၤဝဲဘၣ်ဟီဧါ. စီၤဒၤဝံးမၤယဟိဝၤယွၤ အတၢ်မၤလၢ တၢ်သးတီအပူၤအနံၣ်အါမး သနာ်က့ အဝဲကဲထီၣ်ပှၤလၢ အသူၣ်လီသးကွံတၢ်ဒီး မၤဘၣ်တၢ်ကမၣ်အဃိ အထံၣ်ဘၣ်တၢ်ကီတၢ်ခဲတဖၣ်လီၤ. လၢခံစီၤဒၤဝံးအၢၣ်လီၤအတၢ်ကမၣ်ဒီး ပီၢ်ယၢ်လီၤက့ၤအသးလီၤ. ဒီးအဝဲသးခုဒိၣ်မးလၢ ယဟိဝၤယွၤပျၢ်ကွံာ် အတၢ်ကမၣ်လီၤ.—၂ ၡမူၤအ့လး ၁၂:၇-၁၃.
ဒိကနၣ် ယဟိဝၤယွၤအကလုၢ် လၢတၢ်သးခုအပူၤ
၁၅ ယဟိဝၤယွၤ ဃုထၢထီၣ် စီၤဒၤဝံး ဒ်ဟံၣ်ခိၣ်တဂၤလၢ အဟံၣ်ဖိဃီဖိအပူၤ တကးဘၣ် ဃုထၢထီၣ်စ့ၢ်ကီးအီၤလၢ ပှၤအံၣ်စရ့လးဖိ ဒီတကလုာ်ညါ အခိၣ်လီၤ. စီၤဒၤဝံး မ့ၢ်စီၤပၤတဂၤအဃိ အဝဲအိၣ်ဒီး တၢ်စိတၢ်ကမီၤ အါမးလီၤ. တဘျီတခီၣ် အဝဲသူကမၣ် အတၢ်စိတၢ်ကမီၤ ဒီးမၤတၢ်ကမၣ်ဖးဒိၣ်တဖၣ်လီၤ. (၂ ၡမူၤအ့လး ၁၁:၁၄, ၁၅) ဘၣ်ဆၣ် အဝဲပာ်ဖျါထီၣ်ဝဲလၢ အဒိကနၣ် ယဟိဝၤယွၤအကလုၢ် ခီဖျိတူၢ်လိာ်ဝဲ တၢ်သိၣ်က့ၤသီက့ၤလီၤ. ဒီးအဝဲ ဃ့ဘါထုကဖၣ် ဒီးတဲဖျါထီၣ် အတၢ်တူၢ်ဘၣ်လၢ ယဟိဝၤယွၤအအိၣ်လီၤ. တသ့ဖဲအသ့ အဝဲဂုာ်ကျဲးစၢး မၤထွဲယဟိဝၤယွၤ အတၢ်ဟ့ၣ်ကူၣ်လီၤ. (စံးထီၣ်ပတြၢၤ ၅၁:၁-၄) ဒီးအဝဲဆီၣ်လီၤအသး တုၤဒၣ်လဲာ် တူၢ်လိာ်တၢ်ဟ့ၣ်ကူၣ်လၢ ပှၤပိာ်ခွါတဖၣ်အအိၣ် တကးဒံးဘၣ် လၢပှၤပိာ်မုၣ်အအိၣ်စ့ၢ်ကီးလီၤ. (၁ ၡမူၤအ့လး ၁၉:၁၁, ၁၂; ၂၅:၃၂, ၃၃) စီၤဒၤဝံး ဟံးန့ၢ်တၢ်မၤလိလၢ အတၢ်ကမၣ် ဒီးအဝဲပာ် ယဟိဝၤယွၤ အတၢ်မၤလၢ တၢ်အရ့ဒိၣ်ကတၢၢ် လၢအတၢ်အိၣ်မူအပူၤလီၤ.
ဒ်သိးနသးလၢ အသ့ၣ်ညါဒၣ်တၢ် ကမၤတၢ်ဂ့ၤဂ့ၤအဂီၢ် ပျဲယွၤအတၢ်သိၣ်တၢ်သီ ဒီးအတၢ်ဟံးစုနဲၣ်ကျဲ သိၣ်လိနၤတက့ၢ်
၇ ဒ်သိးပကသ့ၣ်ညါ တၢ်အဘၣ်ဒီးတၢ်အကမၣ်အဂီၢ် တလိၣ်လၢပကဘၣ်မၤကမၣ် ယွၤအတၢ်သိၣ်တၢ်သီ ဒီးတူၢ်ဘၣ်တၢ်ကီတၢ်ခဲတဖၣ်ဘၣ်. ပဟံးန့ၢ်တၢ်မၤလိလၢ ပှၤလၢအမၤကမၣ်တၢ်လၢ အပူၤကွံာ်တဖၣ် အဒိအတဲာ်သ့ဝဲလီၤ. တၢ်အဒိအတဲာ်တဖၣ်အံၤ ပထံၣ်ဘၣ်အီၤလၢ လံာ်စီဆှံအပူၤလီၤ. ကတိၤဒိ ၁:၅ တဲဝဲလၢ “မ်ပှၤကူၣ်တၢ်သ့ကနၣ်တက့ၢ်. ဒီးအမၤလိတၢ်ကအါထီၣ်” လီၤ. တၢ်သိၣ်လိသ့ၣ်တဖၣ်အံၤ ဟဲလၢယွၤအအိၣ် ဒီးမ့ၢ်စ့ၢ်ကီးတၢ်သိၣ်လိလၢ အဂ့ၤကတၢၢ်လီၤ. အဒိ ဆိကမိၣ်ကွၢ် စီၤပၤဒၤဝံးန့ၣ် တဒိကနၣ်ယွၤအကလုၢ် ဒီးမၤကမၣ်မုၣ်ကမၣ်ခွါ ဒီးနီၢ်ဘၤသၡ့ဘၤအဃိ ထံၣ်ဘၣ်ဝဲတၢ်ကီတၢ်ခဲအါမးလီၤ. (၂ ၡမူၤအ့လး ၁၂:၇-၁၄) ဖဲနဖးတၢ်ဂ့ၢ်တဖၣ်အံၤအခါ သံကွၢ်လီၤနသးလၢ ‘ဒ်သိးစီၤဒၤဝံး တထံၣ်ဘၣ် တၢ်ကီတၢ်ခဲတဖၣ်အံၤအဂီၢ် အဝဲမၤတၢ်မနုၤသ့လဲၣ်. ယမ့ၢ်ထံၣ်ဘၣ် တၢ်အိၣ်သးဒ်သိးသိးဒီး စီၤဒၤဝံးန့ၣ် ယကမၤဒ်လဲၣ်. မ့ၢ်ယကမၤကမၣ်မုၣ်ကမၣ်ခွါ ဒ်သိးဒီးစီၤဒၤဝံးဧါ မ့တမ့ၢ် ယကဟးဆှဲး တၢ်မၤကမၣ်မုၣ်ကမၣ်ခွါ ဒ်သိးဒီးစီၤယိၤသးဧါ.’ (၁ မိၤၡ့ ၃၉:၁၁-၁၅) ပမ့ၢ်ဆိကမိၣ်ထံ တၢ်ကီတၢ်ခဲလၢ အကဟဲကဲထီၣ်အသး ခီဖျိလၢပမၤဘၣ် တၢ်ကမၣ်အဃိန့ၣ် ပက “သးဟ့တၢ်အၢ” ဒံးယံာ်ဒံးအါထီၣ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၅၉၀ ¶၁
စီၤဒၤဝံး
ယဟိဝၤယွၤ ထံၣ်ဝဲ ဒီးပာ်ဖျါထီၣ်ဝဲ တၢ်လၢအထံၣ်ဝဲတဖၣ်ခဲလၢာ်လီၤ. စီၤဒၤဝံး ဒီးနီၢ်ဘၤသၡ့ဘၤ အတၢ်ဂ့ၢ်န့ၣ် စံၣ်ညီၣ်ကွီၢ်လၢ အမၤထွဲစီၤမိၤၡ့ အတၢ်မၤလိာ်တဖၣ် မ့ၢ်ဖီၣ်ဝဲန့ၣ် စီၤဒၤဝံး, နီၢ်ဘၤသၡ့ဘၤ ဒီးဖိသၣ်လၢ အမိၢ်အဒၢလီၢ်ပူၤ ပှၤသၢဂၤလၢာ်အံၤ ကဘၣ်တၢ်မၤသံအီၤလီၤ. (၅ မိၤ. ၅:၁၈; ၂၂:၂၂) ဘၣ်ဆၣ် တၢ်ဂ့ၢ်အံၤ ယဟိဝၤယွၤ ဖီၣ်ဝဲလၢ အနီၢ်ကစၢ် ဒီးအဝဲပာ်ဖျါထီၣ် တၢ်သးကညီၤလၢ စီၤဒၤဝံးအဖီခိၣ် ခီဖျိလၢ ဘီမုၢ်တၢ်အၢၣ်လီၤအီလီၤအဃိလီၤ. (၂ မူၤ. ၇:၁၁-၁၆) စီၤဒၤဝံးစ့ၢ်ကီး ပာ်ဖျါထီၣ် တၢ်သးကညီၤလၢ ပှၤဂၤအဖီခိၣ် (၁ မူၤ. ၂၄:၄-၇; ထိၣ်သတြီၤဒီး ယၤ. ၂:၁၃) ဒီးကစၢ်ယွၤသ့ၣ်ညါဝဲ ပှၤလၢအမၤကမၣ်တၢ်တဖၣ် အတၢ်ပီၢ်ယၢ်လီၤက့ၤသးလီၤ. (စံး. ၅၁:၁-၄) ဘၣ်ဆၣ်အဝဲသ့ၣ် တပူၤဖျဲးလၢ တၢ်စံၣ်ညီၣ်ခဲလၢာ်ဘၣ်. ခီဖျိလၢ ဝံနၤသၣ်န့ၣ် ယဟိဝၤယွၤ တဲဘၣ် စီၤဒၤဝံးလၢ “ယကဒုးဂဲၤဆၢထၢၣ် တၢ်အၢထီဒါနၤလၢ နဟံၣ်ဒၣ်နဲအပူၤ” လီၤ.—၂ မူၤ. ၁၂:၁-၁၂.
လါယူၤ ၂၀–၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ၡမူၤအ့လး ၁၃–၁၄
“စီၤအၤမနိၣ် အတၢ်အဲၣ်လီၤထဲအသးန့ၣ် ဒုးအိၣ်ထီၣ်တၢ်သူၣ်အုးသးအုး”
it-1 ၃၂
စီၤအးဘၡါလိၣ်
တၢ်မၤသံစီၤအၤမနိၣ်. စီၤအးဘၡါလိၣ် အပုၢ်ပိာ်မုၣ် နီၢ်တၤမၢ်န့ၣ် ဒိၣ်တၢ်ဂ့ၤအဃိ အဒီပုၢ်ဝဲၢ်ခိၣ်ချၢ စီၤအၤမနိၣ် ကွၢ်ဂ့ၤအီၤလီၤ. စီၤအၤမနိၣ် ပာ်မၤအသးလၢအဆိးက့ ဒီးမၢလီၤဝဲ နီၢ်တၤမၢ်လၢ ကဖီတၢ်အီၣ်လၢအဂီၢ် ဒီးလၢခံအဝဲမၤတရီတပါဝဲလီၤ. စီၤအၤမနိၣ်အတၢ်အဲၣ်လၢအိၣ်ဒီး တၢ်သးကတၢန့ၣ် ဆီတလဲက့ၤအသးဆူ တၢ်သူၣ်ဟ့သးဟ့ ဒီးလၢခံအဝဲနီဟးကွံာ်ဝဲ နီၢ်တၤမၢ်ဆူ ကျဲဖီခိၣ်လီၤ. ဖဲနီၢ်တၤမၢ် ဟးထီၣ် ဒီးဖှီဝဲအဆ့ကံၣ်ဃ့လၢ ပှၤမုၣ်လိၤဘိတဖၣ်ကၤဝဲ ဒီးပဲထီၣ်အခိၣ်လၢ ဖၣ်ကမူၣ်အခါ စီၤအးဘၡါလိၣ် ထံၣ်အီၤလီၤ. စီၤအးဘၡါလိၣ် တယးဝဲဘၣ်တဘျီဃီလၢ ကမ့ၢ်စီၤအၤမနိၣ် အတၢ်မၤလီၤ. ဖျါလၢအဝဲ သ့ၣ်ညါပာ်ဝဲလၢ အဒီပုၢ်ဝဲၢ်ခိၣ်ချၢန့ၣ် အိၣ်ဒီးတၢ်သးကတၢလီၤ. စီၤအးဘၡါလိၣ် တဲဘၣ်အပုၢ်ပိာ်မုၣ်လၢ တဘၣ်တဲဘၣ် ပှၤနီတဂၤလၢတၢ်ဂ့ၢ်အံၤတဂ့ၤ ဒီးက့ၤကိးဝဲဆူ အဟံၣ်လီၤ.—၂ မူၤ. ၁၃:၁-၂၀.
အိၣ်ဒီးတၢ်ကီၤသူၣ်ကီၤသးတက့ၢ်
၁၁ လံာ်စီဆှံပာ်ဖျါထီၣ်စ့ၢ်ကီးဝဲ တၢ်အဒိလၢဘၣ်ဃးဒီး ပှၤလၢတဂ့ၢ်လိာ်ကွံာ် တၢ်မၤကမၣ်မုၣ်ကမၣ်ခွါတဖၣ်အဂ့ၢ် စ့ၢ်ကီးလီၤ. ပတၢ်ကီၤသူၣ်ကီၤသး မ့ၢ်တအိၣ်ဘၣ်န့ၣ် ပကထံၣ်ဘၣ် တၢ်ကီတၢ်ခဲ. နမ့ၢ်ထံၣ်ဘၣ် တၢ်လ့ပစီဒ် ဒီပုၢ်ဝဲၢ်မုၣ်ခ့(မ်) အသိးန့ၣ် ဆိကမိၣ်ထီၣ် ပှၤသးစၢ်လၢတအိၣ်ဒီး တၢ်ကူၣ်သ့ လၢလံာ်ကတိၤဒိ အဆၢဒိၣ် ၇ ပာ်ဖျါထီၣ်ဝဲန့ၣ်တက့ၢ်. တကးဒံးဘၣ် ဆိကမိၣ်ကွၢ်စ့ၢ်ကီး တၢ်ကဲထီၣ်အသးဒီး စီၤအၤမနိၣ် ခီဖျိလၢအမၤကမၣ်တၢ်အဃိန့ၣ်တက့ၢ်. (၂ ၡမူၤအ့လး ၁၃:၁, ၂, ၁၀-၁၅, ၂၈-၃၂) ဒ်သိး ဖိသ့ၣ်တဖၣ် ကအိၣ်ဒီးတၢ်ကူၣ်သ့ ဒီးတၢ်ကီၤသူၣ်ကီၤသးအဂီၢ် မိၢ်ပၢ်တဖၣ် ဖဲသုမၤဟံၣ်ဖိဃီဖိ တၢ်မၤလိလံာ်စီဆှံအခါ တဲသကိးတၢ်ဂ့ၢ်လၢ အဘၣ်ဃးဒီး တၢ်အဒိအတဲာ်လၢ အအိၣ်လၢလံာ်စီဆှံအပူၤတက့ၢ်.
it-1 ၃၃ ¶၁
စီၤအးဘၡါလိၣ်
ခံနံၣ်ဝံၤအလီၢ်ခံ ဖဲပှၤတံာ်သိဆူၣ်အမူးပွဲဘၣ်အဆၢကတီၢ် စီၤအးဘၡါလိၣ် ရဲၣ်ကျဲၤဝဲလၢ ကမၤဝဲမူးပွဲလၢ ဘဧၤလးဃါစိၢ် လၢအအိၣ်လၢမုၢ်ထီၣ်ကလံၤစိး ဒီးယံၤဒီးယရူၤၡလ့ၣ် ၁၄ မံးလၣ်လီၤ. အဝဲကွဲမုာ်ဝဲ စီၤပၤဖိခွါတဖၣ် ဒီးစီၤပၤဒၤဝံးလီၤ. ဖဲအပၢ်တဲဘၣ်အီၤလၢ အလဲၤဝဲတသ့ဘၣ်အခါ စီၤအးဘၡါလိၣ်န့ၣ် မၢဆူၣ်အပၢ်လၢ ကမၢလီၤဝဲ အဖိခွါဝဲၢ်ကိ စီၤအၤမနိၣ် လဲၤလၢအလီၢ်လီၤ. (ကတိၤ. ၁၀:၁၈) အဝဲဟ့ၣ်လီၤပာ်စၢၤ အခ့အပှၤတဖၣ်တၢ်ကလုၢ်လၢ မူးပွဲအဆၢကတီၢ် ဖဲစီၤအၤမနိၣ် “အသးမုာ်ဝဲလၢ စပံးထံ” အခါ အဝဲသ့ၣ်ကမၤသံကွံာ် စီၤအၤမနိၣ်လီၤ. ဖဲစီၤပၤအဖိခွါတဖၣ် က့ၤဃ့ၢ်ဝဲလၢ ဝ့ၢ်ယရူၤၡလ့ၣ်အခါ စီၤအးဘၡါလိၣ်န့ၣ် လဲၤဃ့ၢ်ဝဲလၢ ကီၢ်ကၡူၢ်လၢအမ့ၢ် အဖုပှၤစူၤရံဖိ အိၣ်တၢ်လီၢ်လၢ ပီၣ်လဲၣ်ကၤလံၤလါ မုၢ်ထီၣ်တခီလီၤ. (၂ မူၤ. ၁၃:၂၃-၃၈) ဒ်ဝံနၤသၣ် တဲဆိပာ်ဝဲလၢ “နးန့ၣ်တဟးဖးဘၣ်လၢ နဟံၣ်” ဘၣ်အသိး စီၤဒၤဝံး အဟံၣ်ဖိဃီဖိထံၣ်ဘၣ်ဝဲလံ. ဒီးစီၤဒၤဝံး ဆဲးထံၣ်ဘၣ်ဝဲ တၢ်သ့ၣ်တဖၣ်အံၤလၢ အသးသမူဒီတစိၤလီၤ.—၂ မူၤ. ၁၂:၁၀.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
g04 ၁၂/၂၂ ၈–၉
တၢ်ဃံတၢ်လၤလၢ အလုၢ်ဒိၣ်ပှ့ၤဒိၣ်ကတၢၢ်
ပကဆိကမိၣ်ကွၢ် စီၤဒၤဝံးအဖိခွါ စီၤအးဘၡါလိၣ်အဂ့ၢ်. အဝဲမ့ၢ်ပှၤတဂၤလၢ အဒိၣ်တၢ်ဂ့ၤဒိၣ်မး သနာ်က့ လၢခံအဝဲကဲထီၣ် ပှၤအၢပှၤသီတဂၤလီၤ. ဘၣ်ဃးဒီးအီၤန့ၣ် လံာ်စီဆှံတဲဝဲလၢ “လၢအံၣ်စရ့လးအကျါန့ၣ် ပှၤဒိးတၢ်စံးထီၣ်ပတြၢၤလၢ အဃံအလၤအဃိ ဒ်စီၤအးဘၡါလိၣ်အသိးန့ၣ် တအိၣ်ဘၣ်နီတဂၤဘၣ်. လၢအခီၣ်ညါသးပၢၢ်လၢအခိၣ်ဒီ, အမဲၣ်တအိၣ်ဘၣ်နီတမံၤဘၣ်.” (၂ ၡမူၤအ့လး ၁၄:၂၅) ဘၣ်ဆၣ် စီၤအးဘၡါလိၣ်န့ၣ် ပာ်ထီၣ်ထီအသး, ထီဒါအပၢ် ဒီးဂုၢ်န့ၢ်ဝဲ အပၢ်အလီၢ်ပစိာ်လီၤ. ဒီးအဝဲလဲၤမံဃုာ်ဒီး အပၢ်အသံၣ်မါတဖၣ်လီၤ. အဃိ ကစၢ်ယွၤအသးထီၣ်အီၤ ဒီးလၢခံ အဝဲဘၣ်သံဝဲဆှုၣ်မဲာ်ကဲၤမဲာ်လီၤ.—၂ ၡမူၤအ့လး ၁၅:၁၀-၁၄; ၁၆:၁၃-၂၂; ၁၇:၁၄; ၁၈:၉, ၁၅.
နဘၣ်သူၣ်ဘၣ်သး စီၤအးဘၡါလိၣ်ဧါ. တမ့ၢ်လၢနကဘၣ်သူၣ်ဘၣ်သးအီၤဘၣ်. အဝဲမ့ၢ်ပှၤတဂၤလၢ အလီၤသးဘၣ်အၢဒိၣ်မး. အနီၢ်ခိတၢ်ဃံတၢ်လၤန့ၣ် မၤလီၤမၢ်ကွံာ် အဝဲအတၢ်ပာ်ထီၣ်ထီသး ဒီးတၢ်သးတတီ တသ့ဘၣ်. ဒီးတဒီသဒၢအီၤလၢ တၢ်ဟးဂီၤစ့ၢ်ကီးဘၣ်. လံာ်စီဆှံပာ်ဖျါထီၣ်ဝဲ ပှၤလၢအဒိအတဲာ်ဂ့ၤတဖၣ် အဂ့ၢ်အါမးလီၤ. ဘၣ်ဆၣ် ဘၣ်ဃးဒီးအဝဲသ့ၣ် အနီၢ်ခိက့ၢ်ဂီၤတၢ်ဃံတၢ်လၤအဂ့ၢ်န့ၣ် တပာ်ဖျါထီၣ်ဝဲဘၣ်. အဃိ မ့ၢ်တၢ်အုၣ်သးလၢ တၢ်ပာ်သူၣ်ပာ်သးလၢအဂ့ၤန့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ်ဒိၣ်မးလီၤ.
လါယူၤ ၂၇–လါယူၤလံ ၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ၡမူၤအ့လး ၁၅–၁၇
“စီၤအးဘၡါလိၣ် ပာ်ထီၣ်ထီအသးအဃိ ပူထီၣ်ထီဒါတၢ်”
it-1 ၈၆၀
ပှၤဃ့ၢ်လၢတၢ်မဲာ်ညါဖိ
ပှၤဃ့ၢ်လၢ စီၤပၤအလ့ၣ်ကဟၣ်အမဲာ်ညါတဖၣ် လၢအဘိးဘၣ်သ့ၣ်ညါဝဲလၢ စီၤပၤဟဲလံန့ၣ် မ့ၢ်ဝဲပှၤမုၢ်ထီၣ်ဖိတဖၣ် အလုၢ်အလၢ်တခါလီၤ. (၁ မူၤ. ၈:၁၁) စီၤအးဘၡါလိၣ် ဒီးစီၤအဒိနံၤယၤ ပာ်ဝဲပှၤကဃ့ၢ်လၢ လ့ၣ်ကဟၣ်အမဲာ်ညါ အဂၤ ၅၀ န့ၣ် ပာ်ဖျါထီၣ်ဝဲလၢ အဝဲသ့ၣ်ကြၢးကဲထီၣ်စီၤပၤလီၤ.—၂ မူၤ. ၁၅:၁; ၁ စီၤပၤ. ၁:၅; see RUNNERS.
တၢး၁၂ ၇/၁၅ ၁၃ ¶၅
မၤယွၤလၢ အဟ့ၣ်ပှၤတၢ်သဘျ့တဂၤအတၢ်မၤ
၅ လံာ်စီဆှံ ပာ်ဖျါထီၣ်ဝဲ ပှၤလၢအတၢ်ပာ်သူၣ်ပာ်သးလၢအတဂ့ၤ ဒိၣ်စိလၢပှၤဂၤအဖီခိၣ်အဂ့ၢ် အိၣ်အါမးလီၤ. လၢအဝဲသ့ၣ်အကျါတဂၤန့ၣ် မ့ၢ်ဝဲစီၤဒၤဝံးအဖိခွါ စီၤအးဘၡါလိၣ်. အဝဲမ့ၢ်ပှၤလၢ အဒိၣ်တၢ်ဂ့ၤဒိၣ်မး. ဒ်မုၣ်ကီၤလံၢ်အသိး အဝဲပျဲဝဲလၢ အတၢ်ပာ်သူၣ်ပာ်သးလၢအတဂ့ၤ ကဒိၣ်စိလၢအသးပူၤလီၤ. အဝဲတအိၣ်ဒီး တၢ်ခွဲးတၢ်ယာ်လၢ ကကဲထီၣ်ဘၣ် စီၤပၤသနာ်က့ ဂုာ်ဟံးန့ၢ်အပၢ်အလီၢ်. စီၤအးဘၡါလိၣ်န့ၣ် ဒ်သိးကဒိးန့ၢ်ဘၣ် စီၤပၤအလီၢ်အလၤအဂီၢ် ပာ်မၤအသးဒ်သိး အသူၣ်အိၣ်သးအိၣ် ပှၤအံၣ်စရ့လးဖိတဖၣ် ဒီးမၤဝဲဒ်သိး စီၤပၤန့ၣ် တသူၣ်အိၣ်သးအိၣ် အထံဖိကီၢ်ဖိတဖၣ်ဘၣ်. ဒ်မုၣ်ကီၤလံၢ် တဲလံၣ်တဲလီၤတၢ်လၢ ဧ့ၤဒ့ၣ်တၤသၣ်လီၢ်အပူၤအသိး စီၤအးဘၡါလိၣ်စ့ၢ်ကီး ပာ်မၤအသးဒ် ပှၤအဂ့ၤအဝါအသိး ဒီးတဲဟးဂီၤ အပၢ်အဂ့ၢ်လီၤ.—၂ ၡမူၤ. ၁၅:၁-၅.
it-1 ၁၀၈၃–၁၀၈၄
ဃ့ဘြိၣ်
ပူၤကွံာ်စှၤနံၣ်ဝံၤအလီၢ်ခံ စီၤဒၤဝံးအဖိခွါ စီၤအးဘၡါလိၣ်န့ၣ် ဟဲက့ၤလၢ ဝ့ၢ်ဃ့ဘြိၣ် ဒီးစးထီၣ်ဂုၢ်န့ၢ်ဝဲ အပၢ်အလီၢ်သနာ်က့ တကဲထီၣ်လိၣ်ထီၣ်ဘၣ်. (၂ မူၤ. ၁၅:၇-၁၀) လီၤဂာ်လၢ ဝ့ၢ်ဃ့ဘြိၣ်န့ၣ် မ့ၢ်ဝဲပှၤယူဒၤဖိအဝ့ၢ်လၢအရ့ဒိၣ်တဝ့ၢ် ဒီးမ့ၢ်စ့ၢ်ကီး စီၤအးဘၡါလိၣ် အိၣ်ဖျဲၣ်ထီၣ်တၢ်လီၢ်လီၤ. အဃိ အဝဲဃုထၢဝဲလၢ ကကဲစီၤပၤလၢ ဝ့ၢ်အံၤအပူၤ. လၢခံစီၤဒၤဝံးအလံၤခွါ စီၤပၤရဃၤဘၣ်န့ၣ် သူၣ်ထီၣ်က့ၤဝဲ ဝ့ၢ်ဃ့ဘြိၣ်အံၤလီၤ. (၂ ကွဲး. ၁၁:၅-၁၀) ပှၤဘၤဘူၤလိၣ်ဖိတဖၣ် မၤဟးဂီၤကွံာ်ဝဲ ကီၢ်ယူဒၤဝံၤ က့ၤဖီၣ်ဝဲပှၤယူဒၤဖိတဖၣ် ဒီးလၢခံဖဲပှၤယူဒၤဖိတဖၣ် ထူၣ်ဖျဲးထီၣ် ဒီးဟဲက့ၤကဒါက့ၤအခါ အဝဲသ့ၣ်အိၣ်ဝဲဖဲ ဝ့ၢ်ဃ့ဘြိၣ် (ကံးရယးအၢ်ဘၤ) လီၤ.—ဃ့. ၁၁:၂၅.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
မ့ၢ်နသ့ၣ်ညါတၢ်ဂ့ၢ် လီၤတံၢ်လီၤဆဲးဧါ
၁၁ ပဝဲသ့ၣ်တဖၣ်စ့ၢ်ကီး တဘျီတခီၣ် ခီဖျိလၢပှၤတဲပဂ့ၢ်ပကျိၤလၢ တမ့ၢ်တတီအဃိ ကမၤဘၣ်ဒိပှၤလီၤ. ဆိကမိၣ်ကွၢ် တၢ်ကဲထီၣ်အသးဒီး စီၤမဖံဘိၤၡ့းန့ၣ်တက့ၢ်. စီၤပၤဒၤဝံးဟ့ၣ်လီၤဝဲ စီၤမဖံဘိၤၡ့း တၢ်လီၢ်တၢ်ကျဲခဲလၢာ်လၢ အဘၣ်ဃးဒီးအဖုစီၤစီလူးန့ၣ်လီၤ. (၂ ၡမူၤအ့လး ၉:၆, ၇) ဘၣ်ဆၣ်လၢခံ စီၤပၤဒၤဝံးနၢ်ဟူဝဲ စီၤမဖံဘိၤၡ့းအဂ့ၢ်လၢ အတမ့ၢ်တတီဘၣ်န့ၣ်လီၤ. တၢ်ဂ့ၢ်လၢ အဝဲနၢ်ဟူဝဲတဖၣ် မ့ၢ်ဧါတမ့ၢ်ဧါန့ၣ် အဝဲတဃုသ့ၣ်ညါဝဲ လီၤတံၢ်လီၤဆဲးဘၣ် ဒီးအဝဲဟံးန့ၢ်ကွံာ် စီၤမဖံဘိၤၡ့း အတၢ်လီၢ်တၢ်ကျဲခဲလၢာ်လီၤ. (၂ ၡမူၤအ့လး ၁၆:၁-၄) ဘၣ်ဆၣ်လၢခံ စီၤဒၤဝံးတဲတၢ်ဒီး စီၤမဖံဘိၤၡ့း ဝံၤအလီၢ်ခံ အဝဲသ့ၣ်ညါဘၣ်ဝဲလၢ တၢ်လၢအဝဲမၤဝဲတဖၣ်န့ၣ် ကမၣ်ဝဲလီၤ. လၢတၢ်န့ၣ်အဃိ အဝဲက့ၤဟ့ၣ်က့ၤ စီၤမဖံဘိၤၡ့း အတၢ်လီၢ်တၢ်ကျဲတနီၤလီၤ. (၂ ၡမူၤအ့လး ၁၉:၂၄-၂၉) စီၤဒၤဝံးမ့ၢ် တဆၢတဲာ်တၢ်ချ့ချ့ ဒီးမ့ၢ်ဟံးန့ၢ်တၢ်ဆၢကတီၢ်လၢ ကဃုသ့ၣ်ညါ တၢ်ဂ့ၢ်တၢ်ကျိၤလီၤတံၢ်လီၤဆဲးန့ၣ် တမ့ၢ်လၢ စီၤမဖံဘိၤၡ့း ကတူၢ်ဘၣ် တၢ်တတီတလိၤဘၣ်.
တၢး၀၉ ၅/၁၅ ၂၇–၂၈
ကွၢ်လိမၤဒိး စီၤအံတဲၤ အတၢ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤတၢ်မၤအပူၤ
စီၤအံတဲၤန့ၣ် ဖျါလၢအမ့ၢ်ပှၤဖလ့ၡသးဖိလၢ အိၣ်လၢဝ့ၢ်ကၤသးလီၤ. ဝ့ၢ်ကၤသး မ့ၢ်ဝ့ၢ်လၢ ပှၤအံၣ်စရ့လးဖိ အဒုၣ်အဒါတဖၣ်လၢအမ့ၢ် စီၤကၤလယး ဒီးပှၤလၢအလီၤပျံၤလီၤဖုးအဂၤတဖၣ် အိၣ်ဝဲလီၤ. စီၤအံၤတဲၤလၢ အအိၣ်ဒီးတၢ်လဲၤခီဖျိလၢ တၢ်ဒုးတၢ်ယၤတဂၤအံၤအဂ့ၢ်န့ၣ် ဘၣ်တၢ်ပာ်ဖျါထီၣ်အီၤလၢ လံာ်စီဆှံပူၤ အဆိကတၢၢ် ဖဲစီၤအးဘၡါလိၣ် ပူထီၣ်ထီဒါဝဲ စီၤပၤဒၤဝံးအခါလီၤ. ဖဲန့ၣ်အခါ စီၤအံတဲၤဒီး အပှၤ ၆၀၀ န့ၣ်အိၣ်ဝဲဖဲ ဝ့ၢ်ယရူၤၡလ့ၣ်အကပိာ်ကပၤလီၤ.
စီၤအံတဲၤဒီး အပှၤတဖၣ် အတၢ်အိၣ်သးန့ၣ် ဒုးသ့ၣ်နီၣ်ထီၣ်က့ၤ စီၤဒၤဝံးလၢ တၢ်ဆၢကတီၢ် ဖဲအဝဲဒီး အပှၤ ၆၀၀ ဘၣ်လဲၤအိၣ်ကဒုလၢ ပှၤဖလ့ၡသးဖိအတၢ်လီၢ် လၢကၤသးအစီၤပၤ အၤကံၣ်အဟီၣ်ကဝီၤလီၤ. (၁ မူၤ. ၂၇:၂, ၃) ဖဲစီၤအးဘၡါလိၣ် ထီဒါဝဲ စီၤပၤဒၤဝံးအဆၢကတီၢ် စီၤအံတဲၤဒီး အပှၤတဖၣ် ကမၤဝဲဒ်လဲၣ်. ကပိာ်ထွဲ စီၤအးၡါလိၣ်အခံဧါ, ကအိၣ်ဘၢၣ်စၢၤဧါ, မ့တမ့ၢ် ကလဲၤပာ်ဖှိၣ်ထီၣ်အသးဒီး စီၤဒၤဝံးဒီး အပှၤတဖၣ်န့ၣ်ဧါ.
ထံၣ်တမှံကွၢ် ဖဲစီၤဒၤဝံး ဘၣ်ဃ့ၢ်ဟးထီၣ်ကွံာ်ဝဲလၢ ဝ့ၢ်ယရူၤၡလ့ၣ်အခါ လဲၤအိၣ်ပတုာ်ဝဲ ဖဲတၢ်လီၢ် ဘ့ၤမၢၤဟၢ် လၢအခီပညီမ့ၢ် ‘ဟံၣ်လၢအိၣ်ယံၤ’ တက့ၢ်. ဟံၣ်အံၤမ့ၢ်ဟံၣ်လၢခံကတၢၢ်တဖျၢၣ်လၢ ဝ့ၢ်ယရူၤၡလ့ၣ် ဒီးအိၣ်ဝဲဖဲ ကျဲလၢပှၤလဲၤဆူ ကစၢၢ်သ့ၣ်စၤယံး ဒီးတချုးပှၤခီဂာ် ကံဒြိၣ်တၢ်တြီၤဒံးဘၣ်လီၤ. (၂ မူၤ. ၁၅:၁၇) ဖဲန့ၣ်အဝဲကွၢ်ဝဲ အသုးဖိလၢ အလဲၤတၢ်ဒီးအီၤတဖၣ်လီၤ. အဝဲထံၣ်ဝဲလၢ ပှၤလဲၤတၢ်ဒီးအီၤအကျါန့ၣ် ပၣ်ဃုာ်ဒီး ပှၤအံၣ်စရ့လးဖိလၢ အသးတီတဖၣ် တကးဒံးဘၣ် ပှၤကရံသးဖိ, ပှၤဖ့ၤလ့းဖိ ဒီး စီၤအံတဲၤလၢအမ့ၢ် ပှၤကံးတံးဖိဒီး အပှၤသုးဖိ ၆၀၀ လီၤ.—၂ မူၤ. ၁၅:၁၈.
လၢတၢ်သူၣ်အိၣ်သးအိၣ်အပူၤ စီၤဒၤဝံး တဲဘၣ် စီၤအံတဲၤလၢ “နလဲၤစ့ၢ်ကီးဒီးပှၤ မ့ၢ်အဘၣ်မနုၤလဲၣ်. က့ၤဆူနလီၢ်ဒီးအိၣ်ဒီးစီၤပၤ [ဖျါလၢအဲၣ်ဒိးတဲဝဲ စီၤအးဘၡါလိၣ်] တက့ၢ်. အဂ့ၢ်ဒ်အံၤ, နမ့ၢ်ပှၤတခီဘီမုၢ်ဖိ, ဒီးပှၤဘၣ်တၢ်ဟီထီၣ်ကွံာ်လၢနလီၢ်လီၤ. နဟဲမဟါန့ၣ်, ယကမၢနဟးဝ့ၤဝီၤတၢ်ဒီး ပှၤမဆါတနံၤအံၤဧါ. ယကလဲၤတၢ်ဖဲယလဲၤတၢ်လီၤ. က့ၤက့ၤနဲ, ဒီးက့ၤစိာ်နဒီပုၢ်ဝဲၢ်န့ၣ်တက့ၢ်. မ်တၢ်ဘျုးတၢ်ဖှိၣ်, ဒီးတၢ်မ့ၢ်တၢ်တီအိၣ်ဒီးနၤတက့ၢ်.”—၂ မူၤ. ၁၅:၁၉, ၂၀.
ဖဲန့ၣ်စီၤအံတဲၤ ပာ်ဖျါထီၣ်အတၢ်သးတီဒီး တဲဝဲလၢ “ယွၤမူဝဲ, ဒီးယကစၢ်မူဝဲ, ဖဲဒၣ်အလီၢ်လၢယကစၢ်စီၤပၤအိၣ်ဝဲလၢ တၢ်သံအပူၤမ့ၢ်ဂ့ၤ, တၢ်မူအပူၤမ့ၢ်ဂ့ၤ, နခ့နပှၤကအိၣ်ဖဲန့ၣ်စ့ၢ်ကီးလီၤ.” (၂ မူၤ. ၁၅:၂၁) တၢ်ကတိၤအံၤ ကဒုးသ့ၣ်နီၣ်ထီၣ်က့ၤ စီၤဒၤဝံးလၢ အဖံဖးဒိၣ် နီၢ်ရူၤသး အတၢ်ကတိၤတဖၣ်လီၤ. (ရူၤ. ၁:၁၆, ၁၇) စီၤဒၤဝံး ဘၣ်သူၣ်ဘၣ်သးဝဲ စီၤအံတဲၤအတၢ်ကတိၤ ဒီးတဲအီၤလၢ “ခီဂာ်” ကံဒြိၣ်တၢ်တြီၤတက့ၢ်. “ဒီးပှၤကံးတံးဖိ စီၤအံတဲၤလဲၤခီဂာ်တၢ်, ဒီးအပှၤကညီခဲလၢာ်, ဒီးဖိဒံဖိသၣ်လၢအအိၣ်ဒီးအီၤလီၤ.”—၂ မူၤ. ၁၅:၂၂.
ရိမ့ၤ ၁၅:၄ ပာ်ဖျါဝဲလၢ “တၢ်ကွဲးအသးလၢ အပူၤကွံာ်တဖၣ်ခဲလၢာ်န့ၣ် ဘၣ်တၢ်ကွဲးအီၤလၢ တၢ်ကသိၣ်လိပှၤအဂီၢ်လီၤ.” အဃိ ပကြၢးသံကွၢ်လီၤပသးလၢ ပမၤလိန့ၢ် တၢ်မနုၤလၢ စီၤအံတဲၤ အဒိအတဲာ်လဲၣ်. တၢ်မနုၤ ထိၣ်ဟူးထိၣ်ဂဲၤထီၣ်အီၤလၢ အဝဲကတီဒီး စီၤဒၤဝံးအဂီၢ်လဲၣ်. စီၤအံတဲၤ မ့ၢ်ပှၤတခီဘီမုၢ်ဖိ ဒီးမ့ၢ်ပှၤလၢအဘၣ် တၢ်နီဟးထီၣ်ကွံာ်အီၤလၢ ကီၢ်ဖလ့ၡးသးသနာ်က့ အဝဲနာ်ဝဲလၢ ယဟိဝၤယွၤမ့ၢ် ယွၤလၢအမူဝဲ ဒီးတူၢ်လိာ်ဝဲ စီၤဒၤဝံး ဒ်ပှၤလၢယဟိဝၤယွၤဒိးဖှူအီၤတဂၤအသိးလီၤ. စီၤအံတဲၤန့ၣ် ကွၢ်ကပာ်ကွံာ်ဝဲ တၢ်သူၣ်ဟ့သးဟ့လၢ ပှၤအံၣ်စရ့လးဖိ ဒီးပှၤဖလ့ၡသးဖိ အဘၢၣ်စၢၤလီၤ. စီၤအံတဲၤ တထံၣ်စီၤဒၤဝံး ဒ်အဒုၣ်အဒါလၢ အမၤသံ ပှၤဖလ့ၡသးဖိ စီၤကၤလယး ဒီးအထံဖိကီၢ်ဖိ အဂၤတဖၣ်ဘၣ်. (၁ မူၤ. ၁၈:၆, ၇) စီၤအံတဲၤထံၣ်ဝဲ စီၤဒၤဝံး ဒ်ပှၤတဂၤလၢ အအဲၣ်ယဟိဝၤယွၤ ဒီးအိၣ်ဒီး တၢ်ဂ့ၤတၢ်ဝါလီၤဆီတဖၣ်လီၤ. စီၤဒၤဝံးစ့ၢ်ကီး ယူးယီၣ်ပာ်ကဲ စီၤအံတဲၤလီၤ. အဃိ ဖဲစီၤဒၤဝံးဒုးတၢ်ဒီး စီၤအးဘၡါလိၣ်အသုး လၢခံကတၢၢ်တဘျီအခါ အဝဲပာ်လီၤဝဲအသုးဖိ သၢပူတပူလၢ “စီၤအံတဲၤအစုပူၤ” လီၤ.—၂ မူၤ. ၁၈:၂
ပဝဲစ့ၢ်ကီး ပကြၢးဂုာ်ကျဲးစၢး ဃုပှၤဂၤအတၢ်ဂ့ၤတၢ်ဝါ ဒီးကွၢ်ကပာ်ကွံာ် တၢ်သူၣ်ဟ့သးဟ့ ဒီးတၢ်ထံၣ်ဆံးပှၤဂၤ ခီဖျိလုၢ်လၢ်, တၢ်ဆဲးတၢ်လၤ ဒီးကလုာ်ဒူၣ်လီၤဆီလိၤသးအဃိ. စီၤဒၤဝံး ဒီးစီၤအံတဲၤ အတၢ်ရ့လိာ်သးန့ၣ် ပာ်ဖျါထီၣ်ဝဲလၢ ဖဲပသ့ၣ်ညါထီၣ် ယဟိဝၤယွၤ ဒီးအဲၣ်အီၤအခါ ပလဲၤခီဖျိ တၢ်အဒူၣ်အဆၢတဖၣ်န့ၢ်ဝဲလီၤ.
ဖဲပဆိကမိၣ်ထံ စီၤအံတဲၤ အဒိအတဲာ်အခါ ပကြၢးသံကွၢ်လီၤပသးလၢ ‘မ့ၢ်ယပာ်ဖျါထီၣ် တၢ်သးတီလၢယ့ၣ်ၡူး လၢအမ့ၢ် ပှၤလၢအဒိၣ်န့ၢ်ဒံး စီၤဒၤဝံး အဖီခိၣ်ကသ့ဒ်လဲၣ်. မ့ၢ်ယပာ်ဖျါထီၣ် တၢ်သးတီ ခီဖျိ ယစံၣ်တဲၤတဲလီၤ ဘီမုၢ်တၢ်သးခုကစီၣ် ဒီးလဲၤဒုးကဲထီၣ် ပှၤဂၤလၢ ခရံာ်အပျဲၢ်အဘီၣ် လၢတၢ်သူၣ်ဆူၣ်သးဆူၣ်အပူၤဧါ.’ (မး. ၂၄:၁၄; ၂၈:၁၉, ၂၀) ယကဆဲးပာ်ဖျါထီၣ် ယတၢ်သးတီတုၤထဲလဲၣ်.
ဖဲဟံၣ်ခိၣ်တဖၣ် ဆိကမိၣ်ထံ စီၤအံတဲၤအဒိအတဲာ် လၢဘၣ်ဃးဒီး တၢ်သးတီအခါ အဘျုးအိၣ်လၢ အဝဲသ့ၣ်အဂီၢ်စ့ၢ်ကီး. စီၤအံတဲၤ အတၢ်သးတီဒီး စီၤဒၤဝံး ဒီးအတၢ်ဆၢတဲာ်လၢ ကလဲၤဒီးစီၤဒၤဝံးန့ၣ် အဘျုးအိၣ်လၢ အပှၤတဖၣ်အဖီခိၣ်လီၤ. ဒ်န့ၣ်အသိး ဟံၣ်ခိၣ်လၢအဆီၣ်ထွဲဝဲ တၢ်ဘူၣ်ထီၣ်ဘါထီၣ် အမ့ၢ်အတီတဖၣ် အတၢ်ဆၢတဲာ်န့ၣ် အဘျုးအိၣ်လၢ အဟံၣ်ဖိဃီဖိတဖၣ်အဂီၢ်ဒီး ဘၣ်သ့ၣ်သ့ၣ် ကကဲထီၣ်တၢ်ကီတၢ်ခဲ တစိၢ်တလီၢ်လၢ အဟံၣ်ဖိဃီဖိတဖၣ်အဂီၢ်စ့ၢ်ကီး. ဘၣ်ဆၣ် ပနာ်သ့သပှၢ်တၢၢ်လၢ ယဟိဝၤယွၤ ‘ကတီဒီးပှၤလၢအတီဒီးအီၤ’ လီၤ.—စံး. ၁၈:၂၅, ခ့ခါစှီၤကျိာ်
စီၤဒၤဝံး ဒီးစီၤအးဘၡါလိၣ် ဒုးတၢ်ဝံၤအလီၢ်ခံ လံာ်စီဆှံ တပာ်ဖျါအါထီၣ်ဝဲ စီၤအံတဲၤ အဂ့ၢ်လၢၤဘၣ်. လံာ်စီဆှံ ပာ်ဖျါထီၣ်ဝဲ စီၤအံတဲၤအဂ့ၢ်ထဲတစဲး ဘၣ်ဆၣ် ပထံၣ်ဘၣ် စီၤအံတဲၤ အတၢ်သ့ၣ်ညါ ဒီးအတၢ်ပာ်သူၣ်ပာ်သး လၢစီၤဒၤဝံးအဖီခိၣ် ဖဲစီၤဒၤဝံး ထံၣ်ဘၣ်တၢ်ကီတၢ်ခဲ အဆၢကတီၢ်န့ၣ် ထုးန့ၢ်ပသးလီၤ. လံာ်စီဆှံ ပာ်ဖျါထီၣ်ဝဲ စီၤအံတဲၤအဂ့ၢ်န့ၣ် ပာ်ဖျါဝဲလၢ ယဟိဝၤယွၤ ပာ်သူၣ်ပာ်သး ဒီးဆိၣ်ဂ့ၤဝဲ ပှၤလၢအသးတီတဖၣ်လီၤ.—ဧ့ၤ ၆:၁၀.