ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ တၢ်ဂ့ၢ်ဘျးစဲ
လါယနူၤအါရံၤ ၂-၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ စီၤပၤ ၂၂-၂၃
“ဘၣ်မနုၤအဃိ ပဘၣ်ဆီၣ်လီၤပသးလဲၣ်”
တၢး၀၀ ၉/၁၅ ၂၉-၃၀
စီၤယိၤၡံယၤ အိၣ်ဒီးတၢ်ဆီၣ်လီၤသးအဃိ ယဟိဝၤယွၤ ဘၣ်သူၣ်ဘၣ်သးအီၤ
စးထီၣ်လၢ ဂီၤခီန့ၣ် ပှၤက့ၤဘှီဂ့ၤထီၣ်က့ၤ တၢ်လုၢ်ဟံၣ် လၢတၢ်သးဆူၣ်အပူၤ. ပှၤမၤတၢ်ဖိတဖၣ်န့ၣ် ဘှီဂ့ၤထီၣ်က့ၤ တၢ်လုၢ်ဟံၣ်လၢ စီၤယိၤၡံယၤ အမိၢ်ပၢ်ဖံဖုလၢပျၢၤတဖၣ် မၤဟးဂီၤဝဲအဃိ စီၤယိၤၡံယၤ ကစံးဘျုးဘၣ် ယဟိဝၤယွၤဒိၣ်မး. ဖဲပှၤဘှီဂ့ၤထီၣ် တၢ်လုၢ်ဟံၣ်အခါ စီၤၡၤဖၣ် ဟဲစိာ်န့ၢ် စီၤယိၤၡံယၤလံာ်ထူတဘ့ၣ်. ဒီးအတဲဝဲလၢ ပှၤလုၢ်တၢ်ဒိၣ် စီၤဃံးလကံယၤ ထံၣ်န့ၢ်ဝဲ “ယဟိဝၤယွၤအလံာ် တၢ်သိၣ်တၢ်သီတဘ့ၣ်လၢ အဟ့ၣ်လီၤဝဲ ခီဖျိလၢ စီၤမိၤၡ့လီၤ.” (၂ ကွဲးနီၣ်တၢ် ၃၄:၁၂-၁၈) အဝဲသ့ၣ် ထံၣ်န့ၢ်ဝဲ စီၤမိၤၡ့ အတၢ်သိၣ်တၢ်သီအလံာ် လၢအခီၣ်ထံးတဘ့ၣ်.
စီၤယိၤၡံယၤ အဲၣ်ဒိးသ့ၣ်ညါဝဲ တၢ်ကတိၤလၢအအိၣ်လၢ လံာ်ထူအပူၤဒိၣ်မး. အဃိ ဖဲစီၤၡၤဖၣ် ဖးပၠးအီၤအခါ အဝဲဆိကမိၣ်ထံဝဲ ဘၣ်ဃးဒီး တၢ်မၤလိာ်တဖၣ်န့ၣ် ဘၣ်ထွဲဒီးအီၤ ဒီးပှၤဂီၢ်မုၢ်တဖၣ် ဒ်လဲၣ်. လံာ်ထူတဘ့ၣ်အံၤ ပာ်ဖျါထီၣ်ဝဲ ဘၣ်ဃးဒီး တၢ်ဘူၣ်ထီၣ်ဘါထီၣ် အမ့ၢ်အတီအဂ့ၢ်. ဒီးအပာ်ဖျါထီၣ်ဝဲလၢ ပှၤဂီၢ်မုၢ်တဖၣ် မ့ၢ်ဘူၣ်ထီၣ်ဘါထီၣ် တၢ်ဘူၣ်တၢ်ဘါလၢအကမၣ်န့ၣ် အကထံၣ်ဘၣ် တၢ်နးတၢ်ဖှီၣ် ဒီးပှၤကက့ၤဖီၣ်အဝဲသ့ၣ်. ဘၣ်ဃးဒီး တၢ်ဂ့ၢ်တခါအံၤန့ၣ် စီၤယိၤၡံယၤ ဘၣ်သးဝဲဒိၣ်မး. ဒီးဖဲစီၤယိၤၡံယၤ သ့ၣ်ညါထီၣ်ဝဲလၢ ပှၤတမၤထွဲ ကစၢ်ယွၤအတၢ်မၤလိာ် လၢလၢပှဲၤပှဲၤဘၣ်အခါ အဝဲဖှီအဆ့ကၤ ဒီးတဲဝဲ စီၤဃံးလကံယၤ, စီၤၡၤဖၣ် ဒီးပှၤအဂၤတဖၣ်လၢ “မ့ၢ်လၢ ပမိၢ်ပၢ်ဖံဖု လၢပျၢၤတဖၣ် တဒိကနၣ် တၢ်ကွဲးအသးလၢ လံာ်တဘ့ၣ်အံၤအပူၤဘၣ် ဒီးတမၤထွဲတၢ်လၢ အဘၣ်တၢ်ကွဲးအီၤလၢ ပကြၢးမၤအီၤတဖၣ်အံၤဘၣ် အဃိ ယဟိဝၤယွၤ သးပှံၢ်ထီၣ်ပှၤဒိၣ်မးလံ. ဘၣ်ဃးဒီး တၢ်ကွဲးအသးလၢ လံာ်လၢ ပှၤထံၣ်န့ၢ်အီၤ တဘ့ၣ်အံၤအပူၤန့ၣ် လဲၤသံကွၢ်တၢ်လၢ ယဟိဝၤယွၤအအိၣ်.”—၂ စီၤပၤ ၂၂:၁၁-၁၃; ၂ ကွဲးနီၣ်တၢ် ၃၄:၁၉-၂၁.
တၢး၀၀ ၉/၁၅ ၃၀ ¶၂
စီၤယိၤၡံယၤ အိၣ်ဒီးတၢ်ဆီၣ်လီၤသးအဃိ ယဟိဝၤယွၤ ဘၣ်သူၣ်ဘၣ်သးအီၤ
ပှၤလၢစီၤယိၤၡံယၤဆှၢလီၤဝဲတဖၣ်န့ၣ် လဲၤဝဲလၢ ဝံမုၣ်နီၢ်ဃူးလဒါအအိၣ် လၢဝ့ၢ်ယရူၤၡလ့ၣ်. ဒီးအဝဲသ့ၣ် ဟဲက့ၤတဲဘၣ်ဝဲ စီၤယိၤၡံယၤလၢ ဝံမုၣ်နီၢ်ဃူးလဒါ အတၢ်ကတိၤ လၢယဟိဝၤယွၤ တဲဘၣ်အီၤ. ယဟိဝၤယွၤတဲဝဲလၢ တၢ်နးတၢ်ဖှီၣ်လၢ အအိၣ်လၢ လံာ်ထူတဘ့ၣ်န့ၣ်အပူၤန့ၣ် ကလီၤဘၣ်ဝဲ ပှၤဂီၢ်မုၢ် လၢအတအိၣ်ဒီး တၢ်သးတီဘၣ် အဖီခိၣ်. ဘၣ်ဆၣ် မ့မ့ၢ် စီၤယိၤၡံယၤန့ၣ် အိၣ်ဒီးတၢ်ဆီၣ်လီၤသးအဃိ အတထံၣ်ဘၣ်ဝဲ တၢ်နးတၢ်ဖှီၣ်တဖၣ်န့ၣ်ဘၣ်. အဃိ အဝဲသံ ဒီးပှၤခူၣ်လီၤအီၤမုာ်မုာ် မ့ၢ်ဝံၤအလီၢ်ခံမၣ် တၢ်နးတၢ်ဖှီၣ်တဖၣ်အံၤ ကဘၣ်ဝဲ.—၂ စီၤပၤ ၂၂:၁၄-၂၀; ၂ ကွဲးနီၣ်တၢ် ၃၄:၂၂-၂၈.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၁ ၄/၁၅ ၂၆ ¶၃-၄
နမ့ၢ်ဒိၣ်ထီၣ်ဘၣ် ဒ်လဲၣ်ဂ့ၤဒ်လဲၣ်ဂ့ၤ နအိၣ်ဒီးတၢ်သးခုနီၢ်ကီၢ်လၢ ကစၢ်ယွၤအတၢ်မၤအပူၤသ့
ဖဲစီၤယိၤၡံယၤ အနီၢ်ဆံးခါန့ၣ် အထံၣ်ဘၣ်ဒီး တၢ်အိၣ်သးလၢ အတဂ့ၤဘၣ်. ဘၣ်ဆၣ် အဝဲမၤတၢ်လၢအဘၣ် လၢယဟိဝၤယွၤ အမဲာ်ညါ. အဃိ အတၢ်ပၢန့ၣ် ကဲထီၣ်လိၣ်ထီၣ်ဝဲ. လံာ်စီဆှံတဲဝဲလၢ “စီၤပၤလၢ အအိၣ်မူဝဲလၢ စီၤယိၤၡံယၤအမဲာ်ညါမ့ၢ်ဂ့ၤ အလီၢ်ခံမ့ၢ်ဂ့ၤ လၢအဟဲက့ၤကဒါက့ၤ လၢယဟိဝၤယွၤအအိၣ် လၢအသးဒီဖျၢၣ် ဒီးမၤအတၢ်ဘၣ်သး လၢအတၢ်အိၣ်မူ ကိးသနၢၣ်ဒဲးအပူၤ ဒီးလၢအဂံၢ်အဘါခဲလၢာ် ဒီးမၤထွဲဝဲ စီၤမိၤၡ့အတၢ်သိၣ်တၢ်သီ ခဲလၢာ် ဒ်စီၤယိၤၡံယၤအသိးန့ၣ် တအိၣ်နီတဂၤဘၣ်.”—၂ စီၤပၤ ၂၃:၁၉-၂၅.
ပှၤလၢအထံၣ်ဘၣ်ဒီး တၢ်ကီတၢ်ခဲ ဖဲအနီၢ်ဆံးခါတဖၣ်န့ၣ် စီၤယိၤၡံယၤ အဒိအတဲာ် ကကဲထီၣ် တၢ်ဂံၢ်တၢ်ဘါ လၢအဝဲသ့ၣ်အဂီၢ်ဒိၣ်မး. လၢစီၤယိၤၡံယၤ အအိၣ်န့ၣ် ပမၤလိန့ၢ် တၢ်မနုၤလဲၣ်. ဒ်သိး စီၤယိၤၡံယၤ ကဆဲးမၤတၢ်လၢအဘၣ် ထီဘိအဂီၢ် တၢ်မနုၤမၤစၢၤအီၤလဲၣ်.
လါယနူၤအါရံၤ ၉-၁၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ စီၤပၤ ၂၄-၂၅
“အိၣ်ကတဲာ်ကတီၤသး ဒီးစီၣ်မဲာ်စီၣ်နါထီဘိ”
တၢး၀၁ ၂/၁၅ ၁၂ ¶၂
ယဟိဝၤယွၤ အတၢ်စံၣ်ညီၣ်အမုၢ်နံၤ ဘူးထီၣ်လံ
၂ ဝံစဖါနယၤ အတၢ်စံးပာ်န့ၣ် မၤစၢၤ စီၤယိၤၡံယၤလၢ အသးကဆူၣ်ထီၣ်လၢ ကမၤလီၤမၢ်ကွံာ် တၢ်ဘူၣ်တၢ်ဘါ လၢအကမၣ် လၢယူဒၤအပူၤ. လၢညါစီၤယိၤၡံယၤအဖု စီၤပၤမနၤၡ့ၤန့ၣ် “လူလီၤ . . . ပှၤလၢအတၢ်ကမၣ်တအိၣ်ဘၣ်တဖၣ် အသွံၣ် တုၤလၢ အအိၣ်ပှဲၤလၢ ဝ့ၢ်ယရူၤၡလ့ၣ်ပူၤ.” (၂ စီၤပၤ ၂၄:၃, ၄; ၂ ကွဲးနီၣ်တၢ် ၃၄:၃) စီၤပၤယိၤၡံယၤ မၤဟးဂီၤကွံာ် တၢ်ဘူၣ်တၢ်ဘါ လၢအကမၣ်. ဘၣ်ဆၣ် အဝဲမၤလီၤမၢ်ကွံာ် တၢ်အၢတၢ်သီ လၢပှၤဂီၢ်မုၢ်အကျါ ဒီးတၢ်ဒဲးဘးလၢ အဖုမၤတ့ၢ်ဝဲတဖၣ် တန့ၢ်ခဲလၢာ်ဘၣ်. အဃိ ယဟိဝၤယွၤ ကဘၣ်စံၣ်ညီၣ်တၢ်လီၤ.
တၢး၀၇ ၃/၁၅ ၁၁ ¶၁၀
လံာ်စီဆှံ အတၢ်ပာ်ဖျါလၢ လံာ်ယံးရမံယၤအဂီၢ်
ဖဲ ချ.ခ.န ၆၀၇ န့ၣ်စီၤစံးဒကံယၤ ပၢတၢ်န့ၢ်ဝဲ ၁၁ နံၣ်. ဒီးဖဲန့ၣ်အခါ ဘၤဘူၤလိၣ်အစီၤပၤ နဘူၤကးန့စၢ် ကဝီၤဃာ်ဝဲ ဝ့ၢ်ယရူၤၡလ့ၣ်န့ၢ်ဝဲ ၁၈ လါလံ. ဒီးဖဲစီၤပၤနဘူၤကးန့စၢ် ပၢတၢ်န့ၢ်ဝဲ ၁၉ နံၣ်တနံၣ်, လါယဲၢ်လါတလါ လါထီၣ် နွံသီတသီန့ၣ် ပှၤခိးတၢ်ဖိအခိၣ် စီၤနဘူစၢ်ရဒၣ် ‘ဟဲတုၤလၢ’ ဝ့ၢ်ယရူၤၡလ့ၣ်. (၂ စီၤပၤ ၂၅:၈) ဘၣ်သ့ၣ်သ့ၣ် စီၤနဘူစၢ်ရဒၣ် ကအိၣ်လၢအဒဲ လၢအဆီလီၤဝဲလၢ ဝ့ၢ်ယရူၤၡလ့ၣ် အချၢ ဒီးကဃုသ့ၣ်ညါ တၢ်အိၣ်သး ဒီးရဲၣ်လီၤကျဲၤလီၤတၢ်လၢ အကဘၣ်မၤဝဲဝ့ၢ်ဒ်လဲၣ်. ဒီးသၢသီဝံၤအလီၢ်ခံ, ဖဲလါထီၣ်အသီတဆံန့ၣ် အဝဲနုာ်လီၤလၢ ဝ့ၢ်ယရူၤၡလ့ၣ်အပူၤ ဒီးဒွဲၣ်အူထီၣ်ကွံာ်ဝ့ၢ်.—ယံးရမံယၤ ၅၂:၁၂, ၁၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၅ ၈/၁ ၁၂ ¶၁
လံာ်စီဆှံ အတၢ်ပာ်ဖျါလၢလံာ် ၂ စီၤပၤအဂီၢ်
၂၄:၃, ၄. ခီဖျိလၢ စီၤမနၤၡ့ၤ အတၢ်ကမၣ်အဃိ “ယဟိဝၤယွၤ တသးအိၣ်ပျၢ်” ယူဒၤအ “တၢ်ကမၣ်လၢၤဘၣ်.” ကစၢ်ယွၤန့ၣ် အပာ်လုၢ်ပာ်ပှ့ၤ ပှၤလၢအတၢ်ကမၣ် တအိၣ်ဘၣ်တဖၣ်အသွံၣ်. အဃိ ပနာ်သ့သပှၢ်ကတၢၢ်လၢ ယဟိဝၤယွၤ ကဟ့ၣ်ကၣ်က့ၤ ပှၤလၢအမၤသံ ပှၤလၢအတၢ်ကမၣ်တအိၣ်ဘၣ်တဖၣ်.—စံးထီၣ်ပတြၢၤ ၃၇:၉-၁၁; ၁၄၅:၂၀.
လါယနူၤအါရံၤ ၁၆-၂၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ကွဲးနီၣ်တၢ် ၁-၃
“တၢ်ဂ့ၢ်တဖၣ်လၢအအိၣ်လၢ လံာ်စီဆှံပူၤန့ၣ် အကဲတၢ်တဲမုာ်နၢ်ဧါ မ့တမ့ၢ် တၢ်ဂ့ၢ်နီၢ်ကီၢ်ဧါ”
တၢး၀၉ ၉/၁ ၁၄ ¶၁
နီၢ်အံၣ်အု ဒီးစီၤအၤဒၣ်န့ၣ် အအိၣ်မူတ့ၢ်အနီၢ်ကီၢ်ဧါ
ဆိကမိၣ်ကွၢ် ပှၤယူဒၤဖိ မိၢ်ပၢ်ဖံဖုလၢပျၢၤတဖၣ် အတၢ်ဟဲလီၤစၢၤလီၤသွဲၣ်အဂ့ၢ်လၢ လံာ်စီဆှံ ပာ်ဖျါထီၣ်ဝဲဖဲ ၁ ကွဲးနီၣ်တၢ် အဆၢဒိၣ် ၁ တုၤလၢ ၉ ဒီးလူၤကၣ် အဆၢဒိၣ် ၃ အပူၤ. ဖဲန့ၣ်န့ၣ် ပာ်ဖျါထီၣ်ဝဲ တၢ်ဟဲလီၤစၢၤလီၤသွဲၣ် ၄၈ စိၤ ဒီး ၇၅ စိၤလီၤတံၢ်လီၤဆဲး. လံာ်လူၤကၣ် ပာ်ဖျါထီၣ်ဝဲ ယ့ၣ်ၡူး အတၢ်ဟဲလီၤစၢၤလီၤသွဲၣ် ဒီးမ့မ့ၢ် လံာ် ၁ ကွဲးနီၣ်တၢ်န့ၣ် ပာ်ဖျါထီၣ်ဝဲ အံၣ်စရ့လး အစီၤပၤ ဒီးပှၤလုၢ်တၢ်ဒိၣ် အတၢ်ဟဲလီၤစၢၤလီၤသွဲၣ်. လံာ်ခံဘ့ၣ်လၢာ်အံၤန့ၣ် ပာ်ဖျါထီၣ်ဝဲ စီၤၡလိၤမိၤ, စီၤဒၤဝံး, စီၤယၤကိာ်, စီၤအံၤစဲး စီၤအၤဘြၤဟၣ်, စီၤနိအၤ ဒီးစီၤအၤဒၣ်အမံၤ. ပှၤလၢအမံၤအိၣ်လၢ လံာ်ခံဘ့ၣ်လၢာ်အံၤ အပူၤန့ၣ် အအိၣ်မူတ့ၢ်နီၢ်ကီၢ်. ဒီးစီၤအၤဒၣ်န့ၣ် အမံၤအိၣ်လၢ လံာ်ခံဘ့ၣ်လၢာ်အံၤ အပူၤအဃိ ပသ့ၣ်ညါဘၣ်လၢ အအိၣ်မူတ့ၢ် နီၢ်ကီၢ်.
တၢး၀၈ ၆/၁ ၃ ¶၄
စီၤနိအၤ ကဲပှၤလၢ အအိၣ်မူတ့ၢ်နီၢ်ကီၢ်တဂၤ
တၢ်ကွဲးဖျါထီၣ် တၢ်ဟဲလီၤစၢၤလီၤသွဲၣ်အဂ့ၢ်ခံခါ လၢလံာ်စီဆှံပူၤန့ၣ် ပာ်ဖျါထီၣ်ဝဲလၢ စီၤနိအၤ ကဲပှၤလၢအအိၣ်မူတ့ၢ်နီၢ်ကီၢ်တဂၤ. (၁ ကွဲးနီၣ်တၢ် ၁:၄; လူၤကၣ် ၃:၃၆) စီၤဧ့စြၤ ဒီးစီၤလူၤကၣ် လၢအကွဲးဝဲ တၢ်ဟဲလီၤစၢၤလီၤသွဲၣ်အဂ့ၢ် ခံခါအံၤန့ၣ် အဝဲသ့ၣ် ကဲပှၤလၢ အဃုသ့ၣ်ညါတၢ် လီၤတံၢ်လီၤဆဲး. ဒီးစီၤလူၤကၣ်န့ၣ် ပာ်ဖျါထီၣ်ဝဲလၢ ယ့ၣ်ၡူးန့ၣ် ဟဲလီၤစၢၤလၢ စီၤနိအၤ.
တၢး၀၉ ၉/၁ ၁၄-၁၅
နီၢ်အံၣ်အု ဒီးစီၤအၤဒၣ်န့ၣ် အအိၣ်မူတ့ၢ်အနီၢ်ကီၢ်ဧါ
ဆိကမိၣ်ကွၢ် ဘၣ်ဃးဒီး ပှၤလၢအလဲၤထီၣ် သရိာ်တဖၣ်န့ၣ် အဝဲသ့ၣ် ဘၣ်သးဝဲ တၢ်ပှ့ၤက့ၤအဂ့ၢ်. ပှၤသိၣ်လိအဝဲသ့ၣ်လၢ တၢ်ပှ့ၤက့ၤန့ၣ် အကဲဝဲ ယ့ၣ်ၡူးဟ့ၣ်လီၤကွံာ် အသးသမူ လၢအလၢအပှဲၤ ဒ်သိးဒီးကပှ့ၤက့ၤပှၤဟီၣ်ခိၣ်ဖိလၢ တၢ်ဒဲးဘးအဂီၢ်. ဒ်ပသ့ၣ်ညါအသိး တၢ်ပှ့ၤက့ၤန့ၣ် အကဲဝဲ တၢ်ဟ့ၣ်လီၤတၢ်အပှ့ၤ လၢအပှဲၤသိးဒီး တၢ်လၢအလီၤမၢ်ကွံာ်တခါ ဒ်သိး ပှၤကပှ့ၤက့ၤအီၤအဂီၢ်. အဃိ လံာ်စီဆှံတဲဝဲလၢ ယ့ၣ်ၡူး “ဟ့ၣ်လီၤအသး ဒ်တၢ်ပှ့ၤက့ၤအသိး.” (၁ တံၤမသ့း ၂:၆) ပကဆိကမိၣ်ဘၣ်လၢ ဘၣ်မနုၤအဃိ ယ့ၣ်ၡူးပှ့ၤက့ၤပှၤလဲၣ်. လံာ်စီဆှံတဲဝဲလၢ “ဒ်ပှၤခဲလၢာ် သံလၢစီၤအၤဒၣ် အဃိအသိး ပှၤခဲလၢာ် ကဘၣ် တၢ်မၤသမူထီၣ်က့ၤအီၤလၢ ခရံာ်အဃိလီၤ.” (၁ ကရံၣ်သူး ၁၅:၂၂) ယ့ၣ်ၡူးဟ့ၣ်လီၤကွံာ် အသးသမူ လၢအလၢအပှဲၤ ဒ်သိးကပှ့ၤက့ၤဝဲ ပှၤဟီၣ်ခိၣ်ဖိ လၢအဒိကနၣ်တၢ်တဖၣ်. အဃိ ပှၤဟီၣ်ခိၣ်ဖိလၢ အဒိကနၣ်တၢ်တဖၣ်အံၤ ကန့ၢ်ဘၣ်က့ၤ သးသမူ လၢအလၢအပှဲၤ လၢစီၤအၤဒၣ်မၤလီၤမၢ်ဝဲ ဖဲအမၤတၢ်ဒဲးဘး လၢဧ့ၤဒ့ၣ်တၤသၣ်လီၢ်အခါ. (ရိမ့ၤ ၅:၁၂) အဃိ စီၤအၤဒၣ် မ့ၢ်တအိၣ်နီၢ်ကီၢ်ဘၣ်န့ၣ် ယ့ၣ်ၡူးအတၢ်ပှ့ၤက့ၤန့ၣ် အခီပညီတအိၣ်နီတမံၤဘၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၉၁၁ ¶၃-၄
တၢ်ဟဲလီၤစၢၤလီၤသွဲၣ်
တၢ်ဟဲလီၤစၢၤလီၤသွဲၣ်အမံၤ. ဒ်သိးပှၤကသ့ၣ်ညါ တၢ်ဂ့ၢ်လၢအပူၤကွံာ် လီၤတံၢ်လီၤဆဲး တခါခါအဂီၢ် တဘျီတခီၣ်န့ၣ် ပှၤကွဲးဖျါထီၣ်ဝဲ ပှၤပိာ်မုၣ်တဖၣ်အမံၤ လၢတၢ်ဟဲလီၤစၢၤလီၤသွဲၣ် အစရီပူၤ. ၁ မိၤၡ့ ၁၁:၂၉, ၃၀ ကွဲးဖျါထီၣ်ဝဲ နီၢ်စၤရဲ (နီၢ်စၤရါ) အမံၤန့ၣ် မ့ၢ်ဒ်သိး အကပာ်ဖျါထီၣ်န့ၢ်ဝဲ တၢ်အုၣ်အသးလၢ တၢ်အၢၣ်လီၤအချံအသၣ်လၢ ကစၢ်ယွၤတဲပာ်စၢၤ စီၤအၤဘြၤဟၣ်န့ၣ် ကဟဲအိၣ်ထီၣ်လၢ နီၢ်စၤရါ, အတဟဲအိၣ်ထီၣ်လၢ စီၤအၤဘြၤဟၣ် အမါလၢအဂၤအအိၣ်ဘၣ်. ပှၤကွဲးဖျါထီၣ် နီၢ်မံးလကၤ အမံၤလၢ တၢ်လီၤစၢၤလီၤသွဲၣ် အစရီပူၤန့ၣ် မ့ၢ်ဒ်သိး ပှၤကသ့ၣ်ညါလၢ အကဲနီၢ်ရံးဘကၤအဖံ ဒီးအမ့ၢ်စီၤအၤဘြၤဟၣ် အဘူးအတံၢ်. ဒီးစီၤအံၤစဲးန့ၣ် အဟံးန့ၢ် နီၢ်ရံးဘကၤ အဃိ ပသ့ၣ်ညါဘၣ်လၢ အဟံးန့ၢ်အမါလၢ စီၤအၤဘြၤဟၣ် အဘူးအတံၢ်အကျါ, တမ့ၢ်လၢ ကလုာ်ဂၤဘၣ်. (၁ မိၤၡ့ ၂၂:၂၀-၂၃; ၂၄:၂-၄) ဖဲ ၁ မိၤၡ့ ၂၅:၁ န့ၣ် ပာ်ဖျါထီၣ်ဝဲလၢ စီၤအၤဘြၤဟၣ် ဟံးန့ၢ်အမါလၢ နီၢ်ကတူရၤ. တၢ်ကွဲးနီၣ်တခါအံၤ ပာ်ဖျါထီၣ်ဝဲလၢ ဖဲနီၢ်စၤရါသံဝံၤအလီၢ်ခံန့ၣ် စီၤအၤဘြၤဟၣ် ဟံးန့ၢ်အမါလၢ အသီတဂၤ ဒီးဖဲစီၤအံၤစဲး အိၣ်ဖျဲၣ်ထီၣ်ဝံၤအလီၢ်ခံ အါန့ၢ်ဒံး အနံၣ် ၄၀ န့ၣ် စီၤအၤဘြၤဟၣ် အဖိအိၣ်န့ၢ်ဒံး. (ရိမ့ၤ ၄:၁၉; ၁ မိၤၡ့ ၂၄:၆၇; ၂၅:၂၀) ဒီးတၢ်ကွဲးနီၣ်အံၤန့ၣ် အပာ်ဖျါထီၣ်န့ၢ်ပှၤလၢ ပှၤမံးဒယၣ်ဖိ ဒီးပှၤဧ့ရ့းဖိတဖၣ်န့ၣ် အဘၣ်ဃးလိာ်သးဒီး ပှၤအံၣ်စရ့လးဖိဒ်လဲၣ်.
နီၢ်လ့ၤအၤ, နီၢ်ရၤဃး ဒီးစီၤယၤကိာ် အသံၣ်မါ လၢအဂၤတဖၣ် ဒီးအဝဲသ့ၣ်အဖိခွါတဖၣ် အမံၤန့ၣ် ပှၤကွဲးနီၣ်ဃာ်ဝဲ. (၁ မိၤၡ့ ၃၅:၂၁-၂၆) တၢ်ကွဲးနီၣ်အံၤန့ၣ် မၤစၢၤပှၤလၢ ပကနၢ်ပၢၢ်ထီၣ်လၢ ဘၣ်မနုၤအဃိ ယဟိဝၤယွၤ ရ့ဒီးအဖိခွါတဖၣ် ဒ်အံၤဒ်န့ၣ်လဲၣ်. ဒီးတဘျီတခီၣ် ပိာ်မုၣ်တနီၤန့ၣ် အဝဲသ့ၣ် ကန့ၢ်ဘၣ်ဝဲ တၢ်န့ၢ်သါအဃိ ပှၤဘၣ်ကွဲးနီၣ် အဝဲသ့ၣ်အမံၤလၢ တၢ်ဟဲလီၤစၢၤလီၤသွဲၣ် အစရီပူၤ. (၄ မိၤ ၂၆:၃၃) နီၢ်တၤမၢ်, နီၢ်ရၤဃး ဒီးနီၢ်ရူၤသးန့ၣ် ယ့ၣ်ၡူးလၢအကဲမ့းၡံအၤန့ၣ် ဟဲလီၤစၢၤလၢ အဝဲသ့ၣ်အအိၣ်. အဃိ အဝဲသ့ၣ် အမံၤအိၣ်လၢ တၢ်ဟဲလီၤစၢၤလီၤသွဲၣ် အစရီပူၤန့ၣ် ကြၢးဝဲဘၣ်ဝဲဒိၣ်မး. (၁ မိၤ ၃၈; ရူၤ ၁:၃-၅; ၄:၁၃-၁၅; မး ၁:၁-၅) ဖဲ ၁ ကွဲးနီၣ်တၢ် ၂:၃၅, ၄၈, ၄၉; ၃:၁-၃, ၅ အပူၤန့ၣ် ပှၤကွဲးနီၣ်ဃာ် ပှၤပိာ်မုၣ်အဂၤတဖၣ်အမံၤ လၢတၢ်ဟဲလီၤစၢၤလီၤသွဲၣ် အစရီပူၤစ့ၢ်ကီး.
လါယနူၤအါရံၤ ၂၃-၂၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ကွဲးနီၣ်တၢ် ၄-၆
“ယတၢ်ထုကဖၣ်န့ၣ် ပာ်ဖျါထီၣ်လၢ ယပာ်ဆိ တၢ်မနုၤလဲၣ်”
တၢး၁၀ ၁၀/၁ ၂၃ ¶၃-၇
“ပှၤလၢအဒိကနၣ် တၢ်ထုကဖၣ်”
စီၤယၤဘ့းန့ၣ် အကဲပှၤလၢ အဃ့ထုကဖၣ်တၢ်ထီဘိ. ဖဲအစးထီၣ် ဃ့ထုကဖၣ်အခါ အဃ့ဝဲ ကစၢ်ယွၤအတၢ်ဆိၣ်ဂ့ၤ. အဝဲဃ့ဝဲတၢ်သၢမံၤ, တၢ်လၢအဃ့ဝဲန့ၣ် ပာ်ဖျါထီၣ်ဝဲလၢ အနာ်ကစၢ်ယွၤလၢ အသးဒီဖျၢၣ်.
အဆိကတၢၢ်န့ၣ် စီၤယၤဘ့း ဃ့ကစၢ်ယွၤလၢ “မၤလဲၢ်ထီၣ် ယဟီၣ်ကဝီၤ.” (အဆၢဖိ ၁၀) စီၤယၤဘ့းန့ၣ် အကဲပှၤလၢ အလီၤပာ်ကဲ ဒီးအတအဲၣ်ဒိးဂုာ်န့ၢ် ပှၤဂၤအတၢ်လီၢ်ဘၣ်. အဃိ အဃ့ထုကဖၣ်ဒ်အံၤန့ၣ် တမ့ၢ်လၢအဝဲအဲၣ်ဒိးလီကီ တၢ်လီၢ်တၢ်ကျဲအဃိဘၣ်, ကမ့ၢ်လၢ အအဲၣ်ဒိးမၤစၢၤပှၤဂၤအဃိလီၤ. လီၤဂာ်လၢ အဃ့ဝဲလၢ အဟီၣ်ကဝီၤန့ၣ် တၢ်မုာ်တၢ်ခုၣ်ကအါထီၣ်အဂီၢ်. တၢ်မုာ်တၢ်ခုၣ်မ့ၢ်အါထီၣ်န့ၣ် အမၤစၢၤပှၤအါဂၤလၢ ကဘူၣ်ထီၣ်ဘါထီၣ် ယွၤလၢအမ့ၢ်အတီ ကသ့အါထီၣ်.
ခံခါတခါန့ၣ် စီၤယၤဘ့း ဃ့ကစၢ်ယွၤလၢ ကစၢ်ယွၤ အစုကမၤစၢၤအီၤ. ကစၢ်ယွၤအစုန့ၣ် အဲၣ်ဒိးတဲဝဲ ကစၢ်ယွၤအစိကမီၤလၢ အသူဝဲလၢ ကမၤစၢၤပှၤလၢ အဘူၣ်ထီၣ်ဘါထီၣ်အီၤတဖၣ်. (၁ ကွဲးနီၣ်တၢ် ၂၉:၁၂) စီၤယၤဘ့း သ့ၣ်ညါဝဲလၢ ကစၢ်ယွၤန့ၣ် အစုတဖုၣ်တလၢ လၢကမၤစၢၤပှၤလၢ အနာ်န့ၢ်အီၤတဖၣ်ဘၣ်. အဃိ အဝဲဃ့တၢ်မၤစၢၤလၢ ကစၢ်ယွၤအအိၣ်.—ယၡါယၤ ၅၉:၁.
သၢခါတခါန့ၣ် စီၤယၤဘ့း ဃ့ထုကဖၣ်လၢ ယဟိဝၤယွၤအအိၣ် ဒီးတဲဝဲလၢ “ဒ်သိး တၢ်နးတၢ်ဖှီၣ် သုတဟဲဘၣ်ယၤ တဂ့ၤအဂီၢ် ဒီသဒၢယၤတက့ၢ်.” စီၤယၤဘ့း ဃ့ဝဲလၢ ‘တၢ်နးတၢ်ဖှီၣ် သုတဟဲဘၣ်အီၤ တဂ့ၤအဂီၢ်” န့ၣ် တမ့ၢ်အဃ့ဝဲလၢ အကပူၤဖျဲးဒီး တၢ်နးတၢ်ဖှီၣ်အဂီၢ်ဘၣ်. မ့ၢ်ဝဲ အဃ့ကစၢ်ယွၤလၢ ဖဲအထံၣ်ဘၣ်ဒီး တၢ်နးတၢ်ဖှီၣ်အခါ ကစၢ်ယွၤကမၤစၢၤအီၤ ဒ်သိးအလဲၤခီဖျိတၢ်ကန့ၢ်အဂီၢ်.
စီၤယၤဘ့း အတၢ်ထုကဖၣ်န့ၣ် ပာ်ဖျါထီၣ်ဝဲလၢ အဝဲအဲၣ်ဒိးဆီၣ်ထွဲ တၢ်ဘူၣ်တၢ်ဘါလၢအမ့ၢ်အတီ. ဒီးအဝဲနာ်န့ၢ် ပှၤလၢအဒိကနၣ် တၢ်ထုကဖၣ်တဂၤန့ၣ်. ကစၢ်ယွၤဒိကနၣ် အတၢ်ထုကဖၣ်ဧါ. လံာ်စီဆှံ ပာ်ဖျါထီၣ်ဝဲလၢ “ကစၢ်ယွၤ မၤဝဲဒ်အဝဲဃ့ဝဲအသိး.”
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၅ ၁၀/၁ ၉ ¶၇
လံာ်စီဆှံ အတၢ်ပာ်ဖျါလၢလံာ် ၁ ကွဲးနီၣ်တၢ်အဂီၢ်
၅:၁၀, ၁၈-၂၂. ဖဲစီၤစီလူး ပၢတၢ်အခါ ပှၤအံၣ်စရ့လးဖိလၢ အအိၣ်လၢ ထံကျိယၢ်ဒ့ၣ် မုၢ်ထီၣ်တဖၣ်န့ၣ် လဲၤဒုးတၢ်ဒီး မၤနၢၤဝဲပှၤဟၤကၢ်ဖိ လၢအနီၣ်ဂံၢ် အါန့ၢ်ဒံးအဝဲသ့ၣ်တဝာ်. ပှၤပိာ်ခွါလၢ အအိၣ်ဒီးတၢ်သးဒူတဖၣ်အံၤ နာ်န့ၢ် ယဟိဝၤယွၤ ဒီးဃ့ယဟိဝၤယွၤတၢ်မၤစၢၤအဃိ ယဟိဝၤယွၤမၤစၢၤအီၤ. ပဝဲစ့ၢ်ကီး ဖဲပမၤ ယဟိဝၤယွၤ အတၢ်မၤအခါ ပမ့ၢ်ထံၣ်ဘၣ်ဒီး တၢ်ထီဒုၣ်ထီဒါန့ၣ် ပကဘၣ်နာ်န့ၢ် ယဟိဝၤယွၤ လၢပသးဒီဖျၢၣ်.—အ့းဖ့းစူး ၆:၁၀-၁၇.
လါယနူၤအါရံၤ ၃၀–လါဖ့ၤဘြူၤအါရံၤ ၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ကွဲးနီၣ်တၢ် ၇-၉
“လၢယဟိဝၤယွၤ အတၢ်မၤစၢၤအဃိ ပမၤလၢပှဲၤပမူဒါလၢအကီအခဲ ကန့ၢ်ဝဲ”
တၢး၀၅ ၁၀/၁ ၉ ¶၈
လံာ်စီဆှံ အတၢ်ပာ်ဖျါလၢလံာ် ၁ ကွဲးနီၣ်တၢ်
၉:၂၆, ၂၇. ပှၤလ့ၤဝံဖိ လၢအကဲ ပှၤခိးတြဲၤဖိတဖၣ်န့ၣ် အဝဲသ့ၣ်အိၣ်ဒီး မူဒါဖးဒိၣ်ညါ. အဝဲသ့ၣ်န့ၣ် ဘၣ်ဖီၣ်ဃာ်ဝဲ သီးခွဲးလၢ တၢ်လုၢ်ဟံၣ် အတၢ်လီၢ်စီဆှံတဖၣ် အကျဲနုာ်လီၤအဂီၢ်. အဝဲသ့ၣ်ပာ်ဖျါထီၣ်ဝဲလၢ အကဲပှၤလၢ ပှၤနာ်န့ၢ်အီၤသ့ ခီဖျိ အဝဲသ့ၣ်အိးထီၣ်ဝဲတြဲၤတဖၣ် ကိးနံၤဒဲး. ပဝဲစ့ၢ်ကီး ပအိၣ်ဒီးမူဒါဖးဒိၣ် လၢပကဘၣ် လဲၤလၢ ပှၤလၢအအိၣ်လၢ ပလီၢ်ကဝီၤတဖၣ်အအိၣ် ဒီးမၤစၢၤအဝဲသ့ၣ် ဒ်သိးအဝဲသ့ၣ် ကဘူၣ်ထီၣ်ဘါထီၣ် ယဟိဝၤယွၤ. ဒ်ပှၤလ့ၤဝံဖိလၢ အကဲပှၤခိးတြဲၤဖိတဖၣ်အသိး ပကြၢးပာ်ဖျါထီၣ်လၢ ပကဲပှၤလၢ ပှၤနာ်န့ၢ်အီၤသ့.
တၢး၁၁ ၉/၁၅ ၃၂ ¶၇
ပမ့ၢ်ထံၣ်ဘၣ်ဒီး တၢ်ကီတၢ်ခဲန့ၣ် ပမၤဒ် စီၤဖံၤနဃၣ် ကသ့ဒ်လဲၣ်
လၢပျၢၤ အံၣ်စရ့လးအစိၤန့ၣ် စီၤဖံၤနဃၣ် အိၣ်ဒီးမူဒါဖးဒိၣ်တခါ ဘၣ်ဆၣ် အဝဲအိၣ်ဒီး တၢ်သးဒူ, တၢ်ကူၣ်သ့ ဒီးအသန့ၤသးလၢ ကစၢ်ယွၤ. အဃိ အမၤလၢပှဲၤအမူဒါန့ၢ်ဂ့ၤဂ့ၤ. စီၤဖံၤနဃၣ်န့ၣ် အသးဆူၣ်လၢ ကမၤစၢၤ ကစၢ်ယွၤအပှၤဂီၢ်မုၢ်လၢ အဝဲသ့ၣ် ကဒိးန့ၢ်ဘၣ်ယဟိဝၤယွၤ အတၢ်ဘၣ်သး. ဒီးလၢခံ ပူၤကွံာ်အနံၣ် ၁,၀၀၀ န့ၣ် သးစီဆှံ ထိၣ်ဟူးထိၣ်ဂဲၤထီၣ် စီၤဧ့စြၤအသးလၢ ကကွဲးဝဲလၢ “ပှၤလၢအကဲအဝဲသ့ၣ်အခိၣ် လၢညါန့ၣ်မ့ၢ်ဝဲ စီၤအလၤဧစၢ် အဖိခွါ စီၤဖံၤနဃၣ်လီၤ. ဒီးယဟိဝၤယွၤ အိၣ်ဒီးအီၤလီၤ.” (၁ ကွဲးနီၣ်တၢ် ၉:၂၀) ပှၤလၢအတီခိၣ်ရိၤမဲ ကစၢ်ယွၤအပှၤဂီၢ်မုၢ် ဒီးခရံာ်ဖိလၢ အဘူၣ်ထီၣ်ဘါထီၣ် ယဟိဝၤယွၤန့ၣ် အဝဲသ့ၣ် ကဘၣ်မၤဝဲဒ်သိးဒီး စီၤဖံၤနဃၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၁၀ ၁၂/၁၅ ၂၁ ¶၆
သးဝံၣ်စံးထီၣ်ပတြၢၤ ယဟိဝၤယွၤ
၆ ယဟိဝၤယွၤ မၢအဝံတဖၣ် တဲဘၣ်အပှၤဂီၢ်မုၢ်လၢ အဝဲသ့ၣ် ကသးဝံၣ် စံးထီၣ်ပတြၢၤအီၤလၢ တၢ်သးဝံၣ်. ပှၤလုၢ်တၢ်ဒိၣ် အစၢၤအသွဲၣ်လၢ အဘၣ်သးဝံၣ်တၢ်တဖၣ်န့ၣ် ဒ်သိးအဝဲသ့ၣ် ကကွဲးတၢ်သးဝံၣ် ဒီးကသးဝံၣ်လိထီၣ်သးအဂီၢ် အဝဲသ့ၣ် လိၣ်ဘၣ်တၢ်ဆၢကတီၢ်အဃိ အဝဲသ့ၣ်တလိၣ်မၤ တၢ်မၤလၢ ပှၤလ့ၤဝံဖိအဂၤတဖၣ် မၤဝဲဘၣ်.—၁ ကွဲးနီၣ်တၢ် ၉:၃၃.
မၤစၢၤနပှၤမၤလိလံာ်စီဆှံဖိ လၢကမၤထွဲဝဲ တၢ်လၢအမၤလိဘၣ်ဝဲတဖၣ်
၃ တချုးလၢပှၤမၤလိလံာ်စီဆှံဖိ ဒိးဘျၢထံဒံးဘၣ်န့ၣ် အဝဲကဘၣ်မၤထွဲ တၢ်လၢအမၤလိဘၣ်ဝဲလၢ လံာ်စီဆှံအပူၤတဖၣ်လီၤ. (ဖး မးသဲ ၂၈:၁၉, ၂၀ တက့ၢ်.) ဖဲပှၤမၤလိလံာ်စီဆှံဖိ မၤထွဲတၢ်လၢအမၤလိဘၣ်ဝဲအခါ အဝဲကဲထီၣ် “ပှၤကူၣ်တၢ်သ့” ဒ်ယ့ၣ်ၡူးဟ့ၣ်တၢ်အဒိ ဘၣ်ဃးဒီး ပှၤသူၣ်ထီၣ်အဟံၣ်လၢ လၢၢ်ခိၣ်အဂ့ၢ်လီၤ. (မးသဲ ၇:၂၄, ၂၅; လူၤကၣ် ၆:၄၇, ၄၈) ပမၤစၢၤပှၤမၤလိလံာ်စီဆှံဖိလၢ ကမၤထွဲတၢ်လၢအမၤလိဘၣ်ဝဲတဖၣ် ကသ့ဒ်လဲၣ်. ပကတဲသကိး တၢ်ဟ့ၣ်ကူၣ်သၢခါလီၤ.
၄ မၤစၢၤပှၤမၤလိလံာ်စီဆှံဖိ လၢကပာ်လီၤဖီတၢၣ်တဖၣ်တက့ၢ်. ဘၣ်မနုၤအဃိ နကြၢးမၤဒ်န့ၣ်လဲၣ်. ဆိကမိၣ်ကွၢ် တၢ်အဒိအံၤတက့ၢ်. နမ့ၢ်ဘၣ်လဲၤနီကါလၢ တၢ်လီၢ်အယံၤန့ၣ် ဘၣ်သ့ၣ်သ့ၣ် နကအိၣ်ပတုာ်လၢ တၢ်လီၢ်လၢအဃံလၤ တတီၤတီၤလီၤ. အဃိ တၢ်လီၢ်လၢ နကလဲၤအီၤန့ၣ် နကဆိမိၣ်ဘၣ်လၢ အအိၣ်တယံၤလၢၤဘၣ်. ဒ်န့ၣ်အသိး ဖဲပှၤမၤလိလံာ်စီဆှံဖိတဂၤ ပာ်လီၤဖီတၢၣ်ဒီးမၤလၢပှဲၤအဖီတၢၣ်လၢ တၢ်ဆၢကတီၢ်ဖုၣ်ကိာ်ဖိန့ၣ် ဘၣ်သ့ၣ်သ့ၣ် အဝဲကဆိကမိၣ်ထံ ဖီတၢၣ်လၢ ကဒိးဘျၢထံအဂီၢ်လီၤ. သူတၢ်လွံၢ်နၢၣ် လၢအမ့ၢ် “ဖီတၢၣ်” လၢအအိၣ်လၢလံာ် အိၣ်မူလီၤထူလီၤယိာ် ပှဲၤဒီးတၢ်သးခု အပူၤ ဒ်သိးနကမၤစၢၤ ပှၤမၤလိလံာ်စီဆှံဖိလၢ ကပာ်လီၤဖီတၢၣ်တက့ၢ်. ဖဲတၢ်မၤလိ တခါဘၣ်တခါ အကတၢၢ်န့ၣ် တဲသကိး ဖီတၢၣ်တဖၣ်လၢ နပှၤမၤလိလံာ်စီဆှံဖိ ပာ်လီၤဝဲန့ၣ် အဝဲသ့ၣ်ကမၤထွဲဝဲ ဒ်လဲၣ်န့ၣ်တက့ၢ်. နမ့ၢ်အဲၣ်ဒိးလၢ နပှၤမၤလိလံာ်စီဆှံဖိ ကမၤထွဲဖီတၢၣ် လၢအဂၤတဖၣ်အခါ နကွဲးလီၤလၢ တၢ်လီၢ်လီၤဟိလၢအမ့ၢ်ဝဲ “အဂၤ” အပူၤန့ၣ်သ့ဝဲလီၤ. ဖီတၢၣ်တဖၣ်လၢ နပှၤမၤလိလံာ်စီဆှံဖိပာ်လီၤဝဲ ဒ်သိးကမၤလၢပှဲၤဝဲလၢ တၢ်ဆၢကတီၢ်ဖုၣ်ကိာ်ဖိမ့ၢ်ဂ့ၤ ဒီးကမၤလၢပှဲၤဝဲလၢ တၢ်ဆၢကတီၢ်ဖးယံာ်မ့ၢ်ဂ့ၤန့ၣ် တဲသကိးဒီးအီၤ ထီဘိတက့ၢ်.
လါဖ့ၤဘြူၤအါရံၤ ၆-၁၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ကွဲးနီၣ်တၢ် ၁၀-၁၂
“ဂုာ်ကျဲးစၢး ဒ်သိးနကသးအိၣ်မၤအါထီၣ် ကစၢ်ယွၤ အတၢ်ဘၣ်သး”
တၢး၁၂ ၁၁/၁၅ ၆ ¶၁၂-၁၃
“သိၣ်လိယၤဒ်သိး ယကမၤနတၢ်ဘၣ်သး”
၁၂ စီၤဒၤဝံးန့ၣ် အပာ်ဒိၣ်ပာ်ကဲဝဲ တၢ်ဟံးစုနဲၣ်ကျဲလၢ အဒိးသန့ၤထီၣ်အသးလၢ စီၤမိၤၡ့ အတၢ်သိၣ်တၢ်သီ ဒီးအဝဲ အဲၣ်ဒိးမၤထွဲဝဲ. အဃိ အကဲဝဲ ပှၤအဒိအတဲာ်ဂ့ၤလၢပဂီၢ်. ဘၣ်တဘျီ စီၤဒၤဝံးတဲဝဲလၢ အအဲၣ်ဒိး “အီဘၣ်ထံလၢ ကမါလၢအအိၣ်လၢ ဝ့ၢ်ဘ့ၤသလ့ဃ့ၣ်.” ဖဲန့ၣ်အခါ စီၤဒၤဝံးအပှၤသၢဂၤန့ၣ် လဲၤနုာ်လီၤန့ၢ်ဆူၣ်လၢ ဝ့ၢ်လၢပှၤဖလ့ၡသးဖိ အိၣ်ဝဲအပူၤ ဒီးဟဲက့ၤစိာ်ဝဲထံ. သနာ်က့ “စီၤဒၤဝံးတအီဝဲဘၣ်. ဒီးအဝဲလူလီၤကွံာ်ဝဲ” လၢယဟိဝၤယွၤ အမဲာ်ညါ. ဘၣ်မနုၤအဃိ စီၤဒၤဝံးတအီ ထံဝဲန့ၣ်ဘၣ်လဲၣ်န့ၣ် အတဲဝဲလၢ “မ့ၢ်ယကြၢးအီ ပှၤပိာ်ခွါ လၢအလဲၤဒုးအိၣ်ထီၣ် တၢ်ဘၣ်ယိၣ်အလီၢ်လၢ အသးသမူအဂီၢ်တဖၣ်အံၤ အသွံၣ်ဧါ. အဝဲသ့ၣ် ဟဲက့ၤစိာ်ထံအံၤန့ၣ် တၢ်လီၤဘၣ်ယိၣ်အလီၢ်အိၣ်လၢ အသးသမူအဂီၢ်အဃိ ယမ့ၢ်အီန့ၣ် လ့ၤတက့ၤ ယကစၢ်ယွၤ တဘၣ်သးဘၣ်.”—၁ ကွဲးနီၣ်တၢ် ၁၁:၁၅-၁၉.
၁၃ စီၤဒၤဝံး သ့ၣ်ညါဝဲလၢ လၢစီၤမိၤၡ့ အတၢ်သိၣ်တၢ်သီအပူၤန့ၣ် ယဟိဝၤယွၤ တဲဝဲလၢ ပှၤတဘၣ်အီၣ် တၢ်သွံၣ်ဘၣ် ဒီးပှၤကဘၣ်လူလီၤဝဲလၢ ဟီၣ်ခိၣ်လိၤ. ဒီးအဝဲနၢ်ပၢၢ်စ့ၢ်ကီးဝဲလၢ ဘၣ်မနုၤအဃိ ပှၤဘၣ်မၤဝဲဒ်န့ၣ်လဲၣ်. စီၤဒၤဝံး သ့ၣ်ညါဝဲလၢ “တၢ်ကိးမံၤဒဲးလၢ အမူဝဲန့ၣ် အသးသမူအိၣ်လၢ အသွံၣ်ပူၤလီၤ.” ဘၣ်ဆၣ် တၢ်တခါအံၤ အကဲထံလီၤ. ဘၣ်မနုၤအဃိ စီၤဒၤဝံး တအီဝဲဘၣ်လဲၣ်. မ့ၢ်လၢ အဝဲနၢ်ပၢၢ် တၢ်သိၣ်တၢ်သီ လီၤတံၢ်လီၤဆဲး ဒီးအပာ်လုၢ်ပာ်ပှ့ၤဝဲအဃိ စီၤဒၤဝံးထံၣ်ဝဲလၢ ထံတခါန့ၣ် အလုၢ်အပှ့ၤဒိၣ်ထဲသိးဒီး အပှၤသၢဂၤန့ၣ်အသွံၣ် ဒီးလူလီၤဝဲလၢ ဟီၣ်ခိၣ်လီၤ.—၃ မိၤၡ့ ၁၇:၁၁; ၅ မိၤၡ့ ၁၂:၂၃, ၂၄.
ဒ်သိး နသးလၢအသ့ၣ်ညါဒၣ်တၢ် ကမၤတၢ်ဂ့ၤဂ့ၤအဂီၢ် ပျဲယွၤအတၢ်သိၣ်တၢ်သီ ဒီးအတၢ်ဟံးစုနဲၣ်ကျဲ သိၣ်လိနၤတက့ၢ်
၅ ပမ့ၢ်အဲၣ်ဒိးလၢ ယွၤအတၢ်သိၣ်တၢ်သီ ကမၤစၢၤပှၤန့ၣ် ထဲဒၣ်ပဖးဒီးသ့ၣ်ညါ ယွၤအတၢ်သိၣ်တၢ်သီန့ၣ် တလၢပှဲၤဒံးဘၣ်. ပကဘၣ်အဲၣ်ယွၤအတၢ်သိၣ်တၢ်သီ ဒီးပာ်ကဲအီၤလီၤ. လံာ်စီဆှံတဲဝဲလၢပကဘၣ် “သးဟ့တၢ်အၢ, ဒီးအဲၣ်တၢ်ဂ့ၤ” လီၤ. (ဧၤမိၣ် ၅:၁၅) ဘၣ်ဆၣ် ပမၤအီၤကသ့ဒ်လဲၣ်. ပကဘၣ်မၤလိပသး ဒ်သိးပကအိၣ်ဒီးတၢ်ထံၣ် ဒ်ယဟိဝၤယွၤအသိးလီၤ. ဆိကမိၣ်ကွၢ် တၢ်ဂ့ၢ်တခါအံၤတက့ၢ်. အဒိ နမံတန့ၢ်ဘၣ် ဒီးကသံၣ်သရၣ်တဲနၤလၢ နကဘၣ်အီၣ်တၢ်အီၣ်လၢ အန့ၢ်ဂံၢ်န့ၢ်ဘါ, မၤနီၢ်ခိတၢ်ဟူးတၢ်ဂဲၤ ဒီးဆီတလဲ နတၢ်အိၣ်မူလီၤ. မ့ၢ်လၢနမၤထွဲ အတၢ်ဟံးစုနဲၣ်ကျဲအဃိ နမံန့ၢ်က့ၤလံလီၤ. မ့မ့ၢ်ဒ်န့ၣ်န့ၣ် ကသံၣ်သရၣ် အတၢ်ဟံးစုနဲၣ်ကျဲတဖၣ်န့ၣ် နကထံၣ်အီၤဒ်လဲၣ်.
၆ ဒ်န့ၣ်အသိး ပတၢ်ဘၣ်တ့ကစၢ်ဟ့ၣ်လီၤပှၤ တၢ်သိၣ်တၢ်သီတဖၣ်လၢ အကဒီသဒၢပှၤ ဒ်သိးပသုတမၤဘၣ် တၢ်ကမၣ်ဒီးထံၣ်ဘၣ် တၢ်ကီတၢ်ခဲတဂ့ၤအဂီၢ် ဒီးဒ်သိးပတၢ်အိၣ်မူ ကလဲၤထီၣ်လဲၤထီအဂီၢ်လီၤ. အဒိ လံာ်စီဆှံတဲဝဲလၢ ပတဘၣ်လံၣ်တၢ်လီတၢ်, ဟုၣ်တၢ်, မၤကမၣ်မုၣ်ကမၣ်ခွါ, မၤဆူၣ်မၤစိးတၢ် ဒီးပတဘၣ်မၤဘၣ်ဃးပသးဒီး တၢ်ဝံတၢ်နါ အတၢ်ဖံးတၢ်မၤတဖၣ်န့ၣ်ဘၣ်. (ဖး ကတိၤဒိ ၆:၁၆-၁၉ တက့ၢ်; လီၣ်ဖျါ ၂၁:၈) ပမ့ၢ်ဒိကနၣ် ယဟိဝၤယွၤအကလုၢ်န့ၣ် ပကဒိးန့ၢ်ဘၣ် တၢ်အဘျုးအဖှိၣ်အါမးလီၤ. လၢတၢ်န့ၣ်အဃိ ပတၢ်အဲၣ်ယွၤ ဒီးအတၢ်သိၣ်တၢ်သီ ကအါထီၣ်စ့ၢ်ကီးလီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၁၀၅၈ ¶၅-၆
သး မၤကစၢ်ယွၤ အတၢ်မၤလၢ “သးဒီဖျၢၣ်.” ပှၤသးဖျၢၣ်န့ၣ် အမ့ၢ်အိၣ်ဝဲ ဒီတဖျၢၣ် လၢလၢပှဲၤပှဲၤမၣ် အကမၤတၢ်ဂ့ၤဂ့ၤ. ဘၣ်ဆၣ် မ့မ့ၢ် ပသးလၢအမ့ၢ်ဝဲ ပတၢ်ဆိကမိၣ်န့ၣ် အဒံဝ့ၤဒံဝီၤသ့. စီၤဒၤဝံး ဃ့ထုကဖၣ်လၢ “ဒုးအိၣ်ဃူအိၣ်ဖိးယသးဒီတဖျၢၣ်လၢ ယကပျံၤနမံၤအဂီၢ်တက့ၢ်.” အဃိ ပသ့ၣ်ညါဘၣ်လၢ ပှၤမ့ၢ်တအဲၣ်ကစၢ်ယွၤ ဒီးပျံၤကစၢ်ယွၤ နီၢ်ကီၢ်ဘၣ်န့ၣ် ပှၤသးဒံဝ့ၤဒံဝီၤသ့. (စံး ၈၆:၁၁) ပှၤဒ်န့ၣ်တဖၣ်န့ၣ် အကဲဝဲ ပှၤလၢအ ‘သးတတီဒီးယွၤလၢ အသးဒီဖျၢၣ်ဘၣ်’ ဒီးအဝဲသ့ၣ် ကဲဝဲပှၤလၢအကလၢၤလၢ နီၢ်သးတခီ (စံး ၁၁၉:၁၁၃; လီၣ် ၃:၁၆) အဝဲသ့ၣ်န့ၣ် “အသး အိၣ်ခံဖျၢၣ်” အဲၣ်ဒိးတဲဝဲ အဝဲသ့ၣ် မၤကစၢ်ခံဂၤ အတၢ်မၤ မ့တမ့ၢ်ဘၣ်န့ၣ် အဝဲသ့ၣ်အသးအိၣ်တမံၤ ဒီးတဲတၢ်လၢအဂၤတမံၤ. (၁ ကွဲး ၁၂:၃၃; စံး ၁၂:၂, တၢ်ဂ့ၢ်အဘျဲၣ်) ပှၤလၢအသးအိၣ်ခံဖျၢၣ်န့ၣ် ယ့ၣ်ၡူးပာ်ဒ့ၣ်ပာ်ကမၣ် အဝဲသ့ၣ်ဆူၣ်ဆူၣ်.—မး ၁၅:၇, ၈.
ပှၤလၢအအဲၣ်ဒိးမၤကစၢ်ယွၤ အတၢ်ဘၣ်သးတဖၣ်န့ၣ် တဘၣ်မ့ၢ်ပှၤလၢ အသးအိၣ်ခံဖျၢၣ်ဘၣ်, ကဘၣ်မ့ၢ်ပှၤလၢ အတီဒီးယွၤလၢအသးဒီဖျၢၣ် ဒီးကဘၣ်မ့ၢ်ပှၤလၢ အမၤကစၢ်ယွၤ အတၢ်မၤလၢအသးဒီဖျၢၣ်. (၁ ကွဲး ၂၈:၉) အဃိ ထီဘိန့ၣ် ပကဘၣ်သ့ၣ်နီၣ်ထီၣ်လၢ ပသးန့ၣ်အဲၣ်ဒိးမၤနါစိၤတၢ် ဒီးအဲၣ်ဒိးမၤတၢ်အၢ. (ယံး ၁၇:၉, ၁၀; ၁ မိၤ ၈:၂၁) ဒ်သိးပဆဲးဘူၣ်ထီၣ်ဘါထီၣ် ကစၢ်ယွၤလၢ ပသးဒီဖျၢၣ် ကသ့အဂီၢ် ပကဘၣ်ဃ့ဘါထုကဖၣ်လၢ ပသးဒီဖျၢၣ်, (စံး ၁၁၉:၁၄၅; သး ၃:၄၁), မၤလိကစၢ်ယွၤ အကလုၢ်ကထါထီဘိ (ဧ့ ၇:၁၀; ကတိၤ ၁၅:၂၈), စံၣ်တဲၤတဲလီၤတၢ်လၢ တၢ်သးဆူၣ်အပူၤ (ထိၣ်သတြီၤဒီး ယံး ၂၀:၉) ဒီးရ့ဒီး ပှၤလၢအမၤ ယဟိဝၤယွၤ အတၢ်မၤလၢ သးဒီဖျၢၣ်တဖၣ်.—ထိၣ်သတြီၤဒီး ၂ စီၤပၤ ၁၀:၁၅, ၁၆.
လါဖ့ၤဘြူၤအါရံၤ ၁၃-၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ကွဲးနီၣ်တၢ် ၁၃-၁၆
“ပမ့ၢ်မၤထွဲ တၢ်ဟံးစုနဲၣ်ကျဲန့ၣ် ပမၤတၢ် ကကဲထီၣ်လိၣ်ထီၣ်”
တၢး၀၃ ၅/၁ ၁၀-၁၁
မ့ၢ်န “ဃုယဟိဝၤယွၤဧါ”
၁၂ ဖဲပှၤဟဲက့ၤဆှၢက့ၤ တၢ်အၢၣ်လီၤအီလီၤအတလါလၢ အံၣ်စရ့ ဒီးအအိၣ်ဝဲလၢ ဝ့ၢ်ကံးရယးယဧၤရံၣ် အနံၣ်အါမးဝံၤအလီၢ်ခံ စီၤပၤဒၤဝံး အဲၣ်ဒိးဟဲက့ၤပာ်ဝဲလၢ ဝ့ၢ်ယရူၤၡလ့ၣ်. အဝဲတဲသကိးတၢ်ဒီး ပှၤဂီၢ်မုၢ်အခိၣ်အနၢ် ဒီးအဝဲတဲဝဲလၢ ‘သုမ့ၢ်ဘၣ်သူၣ်ဘၣ်သး ဒီးပကစၢ် ယဟိဝၤယွၤ မ့ၢ်တူၢ်လိာ်ဝဲ’ န့ၣ်ပကဟဲက့ၤပာ် တၢ်အၢၣ်လီၤအီလီၤအတလါလၢ ဝ့ၢ်ယရူၤၡလ့ၣ်. ဘၣ်ဆၣ် ဘၣ်ဃးဒီး တၢ်ဂ့ၢ်အံၤန့ၣ် အဝဲတဃုသ့ၣ်ညါ ယဟိဝၤယွၤ အတၢ်ဟံးစုနဲၣ်ကျဲ လီၤတံၢ်လီၤဆဲးဘၣ်. နီၢ်ကီၢ်န့ၣ် ကစၢ်ယွၤဟံးစုနဲၣ်ကျဲပာ်စၢၤဝဲ လီၤတံၢ်လီၤဆဲးလၢ တၢ်အၢၣ်လီၤအီလီၤ အတလါန့ၣ် ပှၤလ့ၤဝံဖိလၢ အဟဲလီၤစၢၤလၢ ပှၤကဃးဖိတဖၣ်န့ၣ် ကဘၣ်ယိးဝဲ. အဃိ စီၤဒၤဝံး မ့ၢ်ဃုသ့ၣ်ညါဝဲ လီၤတံၢ်လီၤဆဲးန့ၣ် တမ့ၢ်လၢ အဝဲကမၢ ပှၤတီၣ် တၢ်အၢၣ်လီၤအီလီၤ အတလါလၢလ့ၣ်ပူၤဘၣ်. ညီနုၢ်န့ၣ် စီၤဒၤဝံး ဃုသ့ၣ်ညါဝဲယဟိဝၤယွၤ အတၢ်ဟံးစုနဲၣ်ကျဲ. ဘၣ်ဆၣ် တၢ်တဘျီအံၤ အဃုသ့ၣ်ညါတၢ်န့ၣ် အကျိၤအကျဲတဘၣ်ဘၣ်. အဃိ တၢ်ကီတၢ်ခဲအိၣ်ထီၣ်. လၢခံစီၤဒၤဝံးတဲဝဲလၢ “မ့ၢ်လၢပတဃုသ့ၣ်ညါ ယွၤအတၢ်ဟံးစုနဲၣ်ကျဲဘၣ် . . . အဃိ ပကစၢ် ယဟိဝၤယွၤ အတၢ်သးဒိၣ် ဖျိးထီၣ်လၢ ပလိၤလီၤ.”—၁ ကွဲးနီၣ်တၢ် ၁၃:၁-၃; ၁၅:၁၁-၁၃; ၄ မိၤၡ့ ၄:၄-၆, ၁၅; ၇:၁-၉.
တၢး၀၃ ၅/၁ ၁၁ ¶၁၃
မ့ၢ်န “ဃုယဟိဝၤယွၤဧါ”
၁၃ လၢခံ ပှၤလုၢ်တၢ်ဒိၣ်တဖၣ် လဲၤယိးန့ၢ်ဝဲ တၢ်အၢၣ်လီၤအီလီၤအတလါလၢ စီၤဧိၤဘ့းအ့ဒိၣ်အဟံၣ် ဒီးဟဲက့ၤယိးဝဲလၢ ဝ့ၢ်ယရူၤၡလ့ၣ်. ဖဲန့ၣ်အခါ ပှၤသးဝံၣ်ဝဲ တၢ်သးဝံၣ်တယုၢ်လၢ စီၤဒၤဝံးကွဲးဝဲ. လၢစီၤဒၤဝံး အတၢ်သးဝံၣ်အကျါန့ၣ် ပၣ်ဃုာ်ဒီး တၢ်ဒုးသ့ၣ်နီၣ်ထီၣ်လၢ အတဲဝဲလၢ “ဃုယဟိဝၤယွၤ ဒီးအတၢ်ဂံၢ်တၢ်ဘါ, ကွၢ်တၢ်လၢအအိၣ် တထံၣ်ဃီတက့ၢ်. ယွၤအတၢ်မၤ လီၤလိၢ်လီၤလး လၢအမၤတ့ၢ်ဝဲတဖၣ်, အတၢ်လီၤလးတဖၣ် ဒီးအတၢ်မၤလိာ်တဖၣ်လၢ အမၤလိာ်ဝဲန့ၣ် သုကဘၣ်နီၣ်ဘၣ်အီၤ”—၁ ကွဲးနီၣ်တၢ် ၁၆:၁၁, ၁၂.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၁၄ ၁/၁၅ ၁၀ ¶၁၄
ဘူၣ်ထီၣ်ဘါထီၣ် ယဟိဝၤယွၤ လၢအကဲစီၤပၤ အထူအယိာ်
၁၄ စီၤဒၤဝံး ဟဲက့ၤပာ် တၢ်အၢၣ်လီၤအီလီၤ အတလါစီဆှံလၢ ဝ့ၢ်ယရူၤၡလ့ၣ်အပူၤ. ဖဲန့ၣ်အခါ မ့ၢ်ဝဲ တၢ်ဆၢကတီၢ်လၢ အလီၤသးခု. ပှၤလ့ၤဝံဖိတဖၣ် သးဝံၣ်ဝဲ တၢ်စံးထီၣ်ပတြၢၤ အထါသးဝံၣ်တယုၢ်. ဖဲ ၁ ကွဲးနီၣ်တၢ် ၁၆:၃၁ န့ၣ်အပာ်ဖျါထီၣ်ဝဲ တၢ်သးဝံၣ်တယုၢ်န့ၣ် အလံာ်မဲာ်ဖျၢၣ်တနီၤလၢ အလီၤထုးန့ၢ်သူၣ်ထုးန့ၢ်သး. ဖဲန့ၣ်အတဲဝဲလၢ “လၢပှၤကလုာ်တဖၣ် အကျါန့ၣ် တဲဖျါထီၣ်လၢ ‘ယဟိဝၤယွၤ ကဲထီၣ် စီၤပၤလံ’ န့ၣ်တက့ၢ်. ပကဆိကမိၣ်ဘၣ်လၢ ယဟိဝၤယွၤန့ၣ် အကဲစီၤပၤအထူအယိာ်လံ. ဘၣ်မနုၤအဃိ အတဲဝဲလၢ ကစၢ်ယွၤကဲထီၣ်စီၤပၤလံလဲၣ်. ဖဲယဟိဝၤယွၤ ပာ်ဖျါထီၣ်လၢ အပၢတၢ် ဒီးဖဲအဟ့ၣ်လီၤပှၤတဂၤဂၤ မူဒါလၢ ကမၤတၢ်လၢအခၢၣ်စး မ့တမ့ၢ် ကမၤတၢ်တမံၤမံၤအခါ လီၤဂာ်ဒ် ယဟိဝၤယွၤ ကဲထီၣ်စီၤပၤ. တၢ်ဂ့ၢ်လၢ ဘၣ်ဃးဒီး ယဟိဝၤယွၤ ကဲထီၣ်စီၤပၤတခါအံၤန့ၣ် အရ့ဒိၣ်ဒိၣ်မး. တချုးလၢ စီၤဒၤဝံးသံဒံးဘၣ်န့ၣ် ယဟိဝၤယွၤ အၢၣ်လီၤအီၤလၢ အတၢ်ပၢန့ၣ် ကအိၣ်ဝဲထီဘိ. ယဟိဝၤယွၤတဲဝဲလၢ “ယကပာ်ထီၣ် နချံနသၣ် လၢအမ့ၢ် နဖိခွါတဂၤ ဒီးယကဒုးအိၣ်ဂၢၢ်ဆိးကျၢၤ အဘီမုၢ်.” (၂ ၡမူၤ ၇:၁၂, ၁၃) လၢခံအပူၤကွံာ် အနံၣ်တကထိဘျဲၣ်မၣ် စီၤဒၤဝံးအချံအသၣ်တဂၤအံၤဟဲအိၣ်ဖျါထီၣ်. ဒီးချံသၣ်တဂၤအံၤ အကဲမတဂၤလဲၣ်. ဒီးအကဲထီၣ်စီၤပၤလၢ ဆၢကတီၢ်ဖဲလဲၣ်.
တၢ်အဲၣ်လၢ ခရံာ်ပာ်ဖျါထီၣ်ဝဲန့ၣ် မ့ၢ်တၢ်လၢ အထိၣ်ဟူးထိၣ်ဂဲၤထီၣ်ပှၤ
၇ တၢ်မၢဖိပီလူးစံးဝဲလၢ– “ခရံာ်အတၢ်အဲၣ်တၢ်ကွံထိၣ်ဂဲၤပှၤ” လီၤ. လၢတၢ်န့ၣ်အဃိ တၢတမံၤန့ၣ် ခရံာ်အတၢ်အဲၣ် ကြၢးထိၣ်ဟူးထိၣ်ဂဲၤထီၣ်ပှၤလၢ ပကအိၣ်မူ ဒ်သိးပကမၤလၤကပီၤ ယ့ၣ်ၡူးအဂီၢ်လီၤ. (ဖး ၂ ကရံၣ်သူး ၅:၁၄, ၁၅ တက့ၢ်.) စီၤပီလူး သ့ၣ်ညါဝဲလၢ ပမ့ၢ်တူၢ်လိာ် ယ့ၣ်ၡူးအတၢ်အဲၣ်လၢ အဒိၣ်အမုၢ်န့ၣ် တၢ်အဝဲအံၤကထိၣ်ဟူးထိၣ်ဂဲၤထီၣ်ပှၤလၢ ပကအဲၣ်ယ့ၣ်ၡူး ဒီးမၤလၤကပီၤအီၤန့ၣ်လီၤ. ဖဲပနၢ်ပၢၢ်ထီၣ် တၢ်လၢယဟိဝၤယွၤ မၤန့ၢ်ပှၤအခါ ကစၢ်အတၢ်အဲၣ် ထိၣ်ဟူးထိၣ်ဂဲၤထီၣ်ပှၤလၢ ပကအိၣ်မူဒ်ယ့ၣ်ၡူးအသိးန့ၣ်လီၤ. ပမၤကသ့ဒ်လဲၣ်.
၈ တၢ်အဲၣ်ယဟိဝၤယွၤန့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကကွၢ်လိမၤဒိးယ့ၣ်ၡူး အဒိအတဲာ်လၢ အဂ့ၤကတၢၢ်လီၤ. (၁ ပ့းတရူး ၂:၂၁; ၁ ယိၤဟၣ် ၂:၆) ဖဲပဒိကနၣ် ယွၤဒီးကစၢ်ခရံာ် အကလုၢ်အခါ မ့ၢ်ပပာ်ဖျါထီၣ်လၢ ပအဲၣ်အဝဲသ့ၣ်န့ၣ်လီၤ. ယ့ၣ်ၡူးစံးဝဲလၢ– “ပှၤလၢအအိၣ်ဒီး ယတၢ်မၤလိာ်ဒီးတိၢ်န့ၢ်ဝဲန့ၣ်, အဝဲဒၣ်မ့ၢ်ပှၤလၢ အအဲၣ်ယၤလီၤ. ဒီးပှၤလၢအအဲၣ်ယၤန့ၣ်, ယပၢ်ကအဲၣ်အီၤ, ဒီးယဲဒၣ်အံၤ, ယကအဲၣ်အီၤ, ဒီးယကဒုးနဲၣ်ယသးလၢအီၤလီၤ.”—ယိၤဟၣ် ၁၄:၂၁; ၁ ယိၤဟၣ် ၅:၃.
၉ ဖဲတၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအဆၢကတီၢ် ပကြၢးဆိကမိၣ်ထံက့ၤလၢ ပသူပတၢ်အိၣ်မူဒ်လဲၣ်အဂ့ၢ်န့ၣ်လီၤ. နကြၢးသံကွၢ်လီၤက့ၤနသးဒ်အံၤ– ‘ခဲအံၤယကွၢ်လိမၤဒိး ယ့ၣ်ၡူးလၢကျဲဒ်လဲၣ်. တၢ်လၢယကဘၣ် မၤဂ့ၤထီၣ်အီၤန့ၣ်အိၣ်ဝဲဧါ.’ မ့ၢ်လၢ ပှၤအါဂၤအဲၣ်ဒိးဝဲလၢ ပကအိၣ်မူဒ်အဝဲသ့ၣ်အသိးအဃိ အရ့ဒိၣ်လၢ ပကသံကွၢ်လီၤပသးလၢ တၢ်သံကွၢ်တဖၣ်အံၤလီၤ. (ရိမ့ၤ ၁၂:၂) ပမ့ၢ်တပလီၢ်ပသးန့ၣ် တၢ်ဆီၣ်သနံးကဘၣ်ပှၤ ဒ်သိးပကကွၢ်လိ ပှၤကူၣ်ဘၣ်ကူၣ်သ့တဖၣ်, ပှၤမံၤဟူသၣ်ဖျါတဖၣ် ဒီးပှၤလိာ်ကွဲဖိ လၢအမံၤဒိၣ်တဖၣ်န့ၣ်လီၤ. (ကလီးစဲ ၂:၈; ၁ ယိၤဟၣ် ၂:၁၅-၁၇) ပတြီဆၢတၢ်ဆီၣ်သနံးအံၤကသ့ဒ်လဲၣ်.
၁၀ ဖဲတၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံ အဆၢကတီၢ်န့ၣ် ပကြၢးသမံသမိးလီၤက့ၤ ပတၢ်ကူတၢ်ကၤ, တၢ်ဂီၤမူလၢပကွၢ်အီၤ ဒီးတၢ်သးဝံၣ်လၢ ပဒိကနၣ်အီၤန့ၣ်လီၤ. တကးဒံးဘၣ် ပကြၢးဆိကမိၣ်က့ၤ တၢ်အိၣ်လၢပခီၣ်ဖၠူထၢၣ်အပူၤ, ပလီတဲစိအပူၤ ဒီးထဲးဘလဲးအပူၤန့ၣ်လီၤ. သံကွၢ်လီၤနသးလၢ– ‘ယ့ၣ်ၡူးမ့ၢ်အိၣ်ဘၣ်ဖုးလၢပကျါ ဒီးထံၣ်ဘၣ်ဝဲ တၢ်ကူတၢ်ကၤလၢယကၤန့ၣ် မ့ၢ်ယကမဲာ်ဆှးဧါ.’ (ဖး ၁ တံၤမသ့း ၂:၉, ၁၀ တက့ၢ်.) ‘မ့ၢ်ယတၢ်ကူတၢ်သိးန့ၣ် ပာ်ဖျါထီၣ်ဝဲလၢ ယမ့ၢ်ယ့ၣ်ၡူးအပျဲၢ်အဘီၣ်န့ၣ်ဧါ. မ့ၢ်ယ့ၣ်ၡူးကဘၣ်သးဝဲ တၢ်ဂီၤမူလၢ ယကွၢ်န့ၣ်ဧါ. မ့ၢ်အဝဲကအဲၣ်ဒိးဒိကနၣ် တၢ်သးဝံၣ်လၢ ယဒိကနၣ်အီၤဧါ. ယ့ၣ်ၡူးမ့ၢ်ဃ့ကွၢ် ယလီတဲစိ မ့တမ့ၢ် ထဲးဘလဲးန့ၣ် မ့ၢ်ယကမဲာ်ဆှးလၢ တၢ်လၢအဝဲထံၣ်ဘၣ်ဝဲတဖၣ်န့ၣ်ဧါ. ယ့ၣ်ၡူးမ့ၢ်သံကွၢ်ယၤလၢ ဘၣ်မနုၤအဃိ နလိာ်ကွဲ ဝံၣ်ဒံၢ်အိၣ်က့မ် (video games) တဖၣ်အံၤမုာ်လဲၣ်န့ၣ် မ့ၢ်ယစံးဆၢက့ၤအီၤကကီဧါ. တၢ်လၢအတကြၢးတဘၣ်လၢ ခရံာ်ဖိအဂီၢ်န့ၣ် အပှ့ၤမ့ၢ်ဒိၣ်ထဲလဲၣ်ဂ့ၤ ထဲလဲၣ်ဂ့ၤ ပတၢ်အဲၣ်ယဟိဝၤယွၤထိၣ်ဂဲၤထီၣ်ပှၤ လၢပကတၢၤကွံာ် တၢ်သ့ၣ်တဖၣ်အံၤလီၤ. (မၤတၢ် ၁၉:၁၉, ၂၀) ဖဲပဟ့ၣ်လုၢ်ထီၣ်ပသးဆူ ယဟိဝၤယွၤအအိၣ်အခါ ပအၢၣ်လီၤလၢ ပကသူပတၢ်အိၣ်မူ လၢပကမၤလၤကပီၤခရံာ်အဂီၢ်လီၤ. လၢတၢ်န့ၣ်အဃိ တၢ်လၢကမၤတံာ်တာ်ပှၤလၢ ပကကွၢ်လိမၤဒိး ယ့ၣ်ၡူးအဂီၢ်န့ၣ် ပကြၢးစူးကွံာ်အီၤလီၤ.—မးသဲ ၅:၂၉, ၃၀; ဖံလံးပံၤ ၄:၈.
လါဖ့ၤဘြူၤအါရံၤ ၂၀-၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ကွဲးနီၣ်တၢ် ၁၇-၁၉
“ဆဲးအိၣ်ဒီးတၢ်သးခု ဖဲနသးဟးဂီၤအခါ”
တၢး၀၆ ၇/၁၅ ၁၉ ¶၁
သးစၢၢ်ဆၢ တၢ်အဂ့ၤလၢ ပဒိးန့ၢ်ဘၣ်အီၤ လၢယဟိဝၤယွၤ အတၢ်ကရၢကရိအပူၤ
လၢလံာ်စီဆှံလၢ ဧ့ၤဘြံၤကျိာ်တကတြူၢ်အပူၤန့ၣ် စီၤဒၤဝံးအဂ့ၢ်အိၣ်အါမး. အဝဲကဲပှၤကွၢ်သိ, ပှၤဒ့တၢ်သ့, ဝံ, စီၤပၤ ဒီးအနာ်န့ၢ်ယဟိဝၤယွၤ. စီၤဒၤဝံးန့ၣ် အအဲၣ်ယဟိဝၤယွၤဒိၣ်မး အဃိအဝဲအဲၣ်ဒိး တ့ထီၣ် တၢ်လုၢ်ဟံၣ်တဖျၢၣ် လၢယဟိဝၤယွၤအဂီၢ်. တၢ်လုၢ်ဟံၣ်တဖျၢၣ်န့ၣ် ကကဲထီၣ်တၢ်ဘူၣ်ထီၣ်ဘါထီၣ် အမ့ၢ်အတီအလီၢ် လၢကီၢ်အံၣ်စရ့လးအပူၤ. စီၤဒၤဝံးသ့ၣ်ညါဝဲလၢ တၢ်ရဲၣ်တၢ်ကျဲၤလၢ အဘၣ်ဃးဒီး တၢ်လုၢ်ဟံၣ်န့ၣ် ကမၤစၢၤ ယဟိဝၤယွၤအပှၤဂီၢ်မုၢ်လၢ အဝဲသ့ၣ်ကအိၣ်ဒီး တၢ်သးခု ဒီးကန့ၢ်ဘၣ် ကစၢ်ယွၤတၢ်ဆိၣ်ဂ့ၤ. အဃိအဝဲသးဝံၣ်ဝဲလၢ “ပှၤလၢန [ယဟိဝၤ] ဃုထၢအီၤ ဒီးကွဲမုာ်အီၤလၢ ကဟဲဘူးဒီးနၤ ဒ်သိးကအိၣ်လၢ နဟံၣ်အတၢ်ပျီတဖၣ်အပူၤန့ၣ် ကသးခုဝဲလီၤ. ပကသးမံဒီး တၢ်အဂ့ၤလၢ ပဒိးန့ၢ်ဘၣ်လၢနဟံၣ် လၢအမ့ၢ် နတၢ်လုၢ်ဟံၣ်စီဆှံအပူၤန့ၣ်လီၤ.”—စံးထီၣ်ပတြၢၤ ၆၅:၄.
သးခုလၢနမၤဘၣ် ယဟိဝၤယွၤအတၢ်မၤတက့ၢ်
၁၁ ဒ်န့ၣ်အသိး ဖဲပမၤကစၢ်ယွၤအတၢ်မၤ လၢအဂ့ၤကတၢၢ် ဒီးသူတၢ်လၢအအိၣ်ဒီးပှၤ လၢယဟိဝၤယွၤ အတၢ်မၤအဂီၢ်အခါ ပကသးခုအါထီၣ်ဝဲလီၤ. “ဟ့ၣ်တၢ်ဆၢကတီၢ် လၢာ်လၢာ်ဆ့ဆ့” လၢတၢ်စံၣ်တဲၤတဲလီၤတၢ်မၤအပူၤ ဒီးလၢတၢ်အိၣ်ဖှိၣ်အဂီၢ်တက့ၢ်. (မၤတၢ် ၁၈:၅; ဧ့ၤဘြံၤ ၁၀:၂၄, ၂၅) ကတဲာ်ကတီၤပာ်စၢၤသးဂ့ၤဂ့ၤလၢ နကဟ့ၣ်ထီၣ်တၢ်စံးဆၢလၢ အကဲထီၣ်တၢ်ဂံၢ်တၢ်ဘါလၢ ဒီပုၢ်ဝဲၢ်မုၣ်ခွါအဂီၢ်တက့ၢ်. နမ့ၢ်ဒိးန့ၢ်ဘၣ်မူဒါလၢ နွံဖးဖီတၢ်အိၣ်ဖှိၣ်အဂီၢ်န့ၣ် ထံၣ်အီၤလၢအမ့ၢ် တၢ်ခွဲးတၢ်ယာ် လၢနဂီၢ်တက့ၢ်. ပှၤမ့ၢ်မၢ နမၤစၢၤတၢ်တခါခါလၢ တၢ်အိၣ်ဖှိၣ်အပူၤန့ၣ် ကဲထီၣ်ပှၤလၢ ပှၤနာ်န့ၢ်ဝဲသ့ ဒီးပာ်ကဲတၢ်ဆၢကတီၢ်တက့ၢ်. မူဒါလၢ နဒိးန့ၢ်ဘၣ်အီၤန့ၣ် တဘၣ်ဆိကမိၣ်လၢ အရ့တဒိၣ်ဘၣ်န့ၣ်တဂ့ၤ. ဂုာ်ကျဲးစၢး မၤတၢ်ဆူၣ်ဆူၣ် ဒ်သိးနတၢ်သ့တၢ်ဘၣ် ကအါထီၣ်တက့ၢ်. (ကတိၤဒိ ၂၂:၂၉) နမၤတၢ်မ့ၢ်ဆူၣ်လၢ ယဟိဝၤယွၤအဂီၢ်န့ၣ် နတၢ်ရ့လိာ်သးဒီးအီၤ ကဂ့ၤဒိၣ်ထီၣ် ဒီးနကသးခုလီၤ. (ကလၤတံ ၆:၄) ဒီးဖဲပှၤဂၤဒိးန့ၢ်မူဒါလၢ နအဲၣ်ဒိးမၤအခါဒၣ်လဲာ် နကသးခုဃုာ်ဒီးအဝဲသ့ၣ်လီၤ.—ရိမ့ၤ ၁၂:၁၅; ကလၤတံ ၅:၂၆.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၂၀.၀၂ ၁၂, တၢ်လွံၢ်နၢၣ်
ပအဲၣ်ပပၢ်ယဟိဝၤယွၤ ဒိၣ်မး
မ့ၢ်ကစၢ်ယွၤ ပာ်သူၣ်ပာ်သးယၤဧါ
‘ပှၤဟီၣ်ခိၣ်ဖိတဖၣ် အိၣ်လၢအကကွဲၢ်တဖၣ်အဃိ မ့ၢ်ယဟိဝၤယွၤ ကပာ်သူၣ်ပာ်သးယၤဧါ.’ မ့ၢ်နသံကွၢ်ဘၣ် တၢ်သံကွၢ်အံၤ တဘျီဘျီဧါ. လၢဟီၣ်ခိၣ်ချၢန့ၣ် ပှၤလၢအသးဂ့ၤ လၢအသံကွၢ်ဝဲ ဒ်အံၤန့ၣ် အိၣ်အါမးလီၤ. စီၤပၤဒၤဝံး ကွဲးဝဲလၢ “ယွၤဧၢ, ပှၤကညီလၢ နပာ်သ့ၣ်ညါနသးလၢအီၤ, ဒီးပှၤကညီဖိလၢ နကဆိကမိၣ် လၢအဂ့ၢ်န့ၣ် မ့ၢ်မနုၤလဲၣ်.” (စံးထီၣ်ပတြၢၤ ၁၄၄:၃) စီၤဒၤဝံး နာ်ဝဲလၢ ယဟိဝၤယွၤ သ့ၣ်ညါအီၤ ဂ့ၤဂ့ၤလီၤ. (၁ ကွဲးနီၣ်တၢ် ၁၇:၁၆-၁၈) ယဟိဝၤယွၤ သူဝဲအကလုၢ်ကထါ ဒီးအတၢ်ကရၢကရိ ဒီးဒုးသ့ၣ်ညါနၤလၢ အဝဲပာ်သူၣ်ပာ်သးဝဲ တၢ်အဲၣ်လၢ နပာ်ဖျါထီၣ် လၢအဖီခိၣ်န့ၣ်လီၤ. ဆိကမိၣ်ကွၢ် လံာ်စီဆှံ အတၢ်ကတိၤတနီၤ လၢအကဒုးနာ်န့ၢ်ပှၤလၢ တၢ်ဂ့ၢ်အံၤတက့ၢ်.
• တချုးလၢ နအိၣ်ဖျဲၣ်ထီၣ်လံၤလံၤန့ၣ် ယဟိဝၤယွၤ ပာ်သူၣ်ပာ်သးနၤလီၤ.—စံးထီၣ်ပတြၢၤ ၁၃၉:၁၆.
• ယဟိဝၤယွၤသ့ၣ်ညါ နတၢ်ဆိကမိၣ် ဒီးနတၢ်တူၢ်ဘၣ်တဖၣ်လီၤ.—၁ ကွဲးနီၣ်တၢ် ၂၈:၉.
• ယဟိဝၤယွၤ ဒိကနၣ် ပဝဲတဂၤစုာ်စုာ် အတၢ်ထုကဖၣ်လီၤ.—စံးထီၣ်ပတြၢၤ ၆၅:၂.
• တၢ်လၢနမၤတဖၣ်န့ၣ် မၤဘၣ်ဒိ မ့တမ့ၢ် မၤသးခု ယဟိဝၤယွၤအသးသ့လီၤ.—ကတိၤဒိ ၂၇:၁၁.
• ယဟိဝၤယွၤ အနီၢ်ကစၢ်ဒၣ်ဝဲ မိၤနၤဆူအအိၣ်လီၤ.—ယိၤဟၣ် ၆:၄၄.
• ယဟိဝၤယွၤ သ့ၣ်ညါနၤဂ့ၤဂ့ၤ တုၤဒၣ်လဲာ် နမ့ၢ်သံန့ၣ် အဝဲမၤဂဲၤဆၢထၢၣ် သမူထီၣ်က့ၤနၤသ့လီၤ. အဝဲကတ့လီၤက့ၤ နနီၢ်ခိ ဒီးနတၢ်ဆိကမိၣ်တဖၣ် ဒ်အလီၢ်လီၢ်လီၤ. အဃိ နကအိၣ်ဒီး တၢ်သ့ၣ်ညါ ဒီးတၢ်ပာ်သူၣ်ပာ်သး ဒ်အလီၢ်လီၢ်အသိးလီၤ.—ယိၤဟၣ် ၁၁:၂၁-၂၆, ၃၉-၄၄; မၤတၢ် ၂၄:၁၅.
လါဖ့ၤဘြူၤအါရံၤ ၂၇–လါမၢ်ၡး ၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ကွဲးနီၣ်တၢ် ၂၀-၂၂
“မၤစၢၤပှၤသးစၢ်တဖၣ် ဒ်သိးအဝဲသ့ၣ် မၤကစၢ်ယွၤတၢ်မၤ ကကဲထီၣ်လိၣ်ထီၣ်အဂီၢ်”
“ဟ့ၣ်လီၤက့ၤအဝဲန့ၣ်လၢ ပှၤအကလုၢ်တီတဖၣ်အစုပူၤ”
၈ ဖး ၁ ကွဲးနီၣ်တၢ် ၂၂:၅ တက့ၢ်. ဘၣ်သ့ၣ်သ့ၣ် စီၤဒၤဝံး ကဆိကမိၣ်ဘၣ်ဝဲလၢ စီၤၡလိၤမိၤဟံးစုနဲၣ်ကျဲ တၢ်သူၣ်ထီၣ်ဘှီထီၣ်အံၤ တန့ၢ်ဒံးဘၣ်. ဖဲန့ၣ်အဆၢကတီၢ် စီၤၡလိၤမိၤမ့ၢ်ဒၣ် “ပှၤဖိၣ်သၣ်ခွါ” ဒီးအသးစၢ်ဒံး ဒီးတၢ်လုၢ်ဟံၣ်လၢအကဘၣ် သူၣ်ထီၣ်ဝဲန့ၣ်ကဘၣ်အိၣ်ဒီး “အလၤအကပီၤအဒိၣ်အထီ” အဃိန့ၣ်လီၤ. ဘၣ်ဆၣ် စီၤဒၤဝံးသ့ၣ်ညါဝဲလၢ ယဟိဝၤယွၤ ကမၤစၢၤစီၤၡလိၤမိၤ ဒ်သိးအတၢ်မၤ ကကဲထီၣ်လိၣ်ထီၣ်အဂီၢ်လီၤ. လၢတၢ်န့ၣ်အဃိ တသ့ဖဲအသ့ စီၤဒၤဝံးကတဲာ်ကတီၤဝဲ တၢ်ပီးတၢ်လီလၢ တၢ်သူၣ်ထီၣ်ဘှီထီၣ်အဂီၢ်လီၤ.
“ဟ့ၣ်လီၤက့ၤအဝဲန့ၣ်လၢ ပှၤအကလုၢ်တီတဖၣ်အစုပူၤ”
၇ စီၤဒၤဝံးန့ၣ်အဲၣ်ဒိးသူၣ်ထီၣ်ဝဲတၢ်လုၢ်ဟံၣ်လၢ ယဟိဝၤယွၤအဂီၢ်သပှၢ်တၢၢ်အဃိ အသးကအုးဝဲဒိၣ်မးလီၤ. ဘၣ်ဆၣ် စီၤဒၤဝံးဆီၣ်ထွဲမၤစၢၤဝဲ အဖိခွါစီၤၡလိၤမိၤလၢ ကသူၣ်ထီၣ်ဘှီထီၣ်တၢ်အဂီၢ် လၢလၢပှဲၤပှဲၤလီၤ. အဝဲရဲၣ်ကျဲၤဝဲပှၤမၤတၢ်ဖိတဖၣ် ဒ်သိးကပာ်ဖှိၣ်ဝဲ သ့ၣ်, ထး, တိၢ်ဘီ, စ့ဒီး ထူတဖၣ်န့ၣ်လီၤ. မတၤအမံၤကဘၣ် တၢ်မၤလၤကပီၤအီၤလၢ တၢ်သူၣ်ထီၣ်တၢ်လုၢ်ဟံၣ်အံၤအဃိလဲၣ်န့ၣ် စီၤဒၤဝံးတသးကိၢ်ဝဲဘၣ်. လၢခံတၢ်လုၢ်ဟံၣ်အံၤ ဘၣ်တၢ်သ့ၣ်ညါအီၤလၢ တၢ်လုၢ်ဟံၣ်လၢ စီၤၡလိၤမိၤသူၣ်ထီၣ်ဝဲန့ၣ်လီၤ. ဘၣ်ဆၣ်စီၤဒၤဝံး ဟ့ၣ်ဂံၢ်ဟ့ၣ်ဘါအဖိခွါလၢ– “ခဲကနံၣ်အံၤ ယဖိခွါဧၢ, မ်ယွၤအိၣ်ဒီးနၤ, ဒီးဒုးဘီၣ်ထီၣ်နၤတက့ၢ်. ဒီးသူၣ်ယွၤနကစၢ်အဟံၣ်, ဒ်အကတိၤတၢ်ဒီးနၤ အသိးန့ၣ်တက့ၢ်.”—၁ ကွဲးနီၣ်တၢ် ၂၂:၁၁, ၁၄-၁၆.
မိၢ်ပၢ်သ့ၣ်ဧၢ ဒ်သိးနဖိတဖၣ် ကတုၤထီၣ်ထီၣ်ဘးလၢ ကဒိးဘျၢထံအဂီၢ် မ့ၢ်နမၤစၢၤအဝဲသ့ၣ်ဧါ
၁၄ တၢ်အိၣ်ဖှိၣ်သးပှၢ်တဖၣ်မၤစၢၤဝဲ မိၢ်ပၢ်တဖၣ်သ့ခီဖျိ တဲသကိးတၢ်ဒီးအဝဲသ့ၣ် ဘၣ်ဃးဒီးဖီတၢၣ်လၢ ကမၤယဟိဝၤယွၤအတၢ်မၤအဂီၢ်လီၤ. ဒီပုၢ်ဝဲၢ်မုၣ်တဂၤ သ့ၣ်နီၣ်ထီၣ်က့ၤဝဲလၢ ဖဲအသးအိၣ်ဃုနံၣ်အခါ ဒီပုၢ်ဝဲၢ်ခွါရးစၢၤ တဲတၢ်ဒီးအီၤလီၤ. အဝဲတဲဝဲလၢ ‘ဒီပုၢ်ဝဲၢ်ခွါရးစၢၤ ဟံးန့ၢ်တၢ်ဆၢကတီၢ် ၁၅ မံးနံး ဒီးတဲသကိးတၢ်ဒီးယၤ ဘၣ်ဃးဒီးယနီၢ်သးအဖီတၢၣ်လီၤ.’ အဝဲမၤဝဲဒ်န့ၣ်အဃိ ကဲဘျုးဝဲဒ်လဲၣ်. လၢခံဒီပုၢ်ဝဲၢ်မုၣ်အံၤ ကဲထီၣ်ပှၤလဲၤလၢညါ ဒီးအဝဲမၤပှၤလဲၤလၢညါန့ၢ်ဝဲအနံၣ် ၇၀ ဘျဲၣ်. ဖဲအံၤ ပသ့ၣ်ညါဘၣ်လီၤတံၢ်လီၤဆဲးလၢ တၢ်ကတိၤဟ့ၣ်ဂံၢ်ဟ့ၣ်ဘါန့ၣ် ကဲဘျုးလၢပှၤတဂၤ အတၢ်အိၣ်မူဒီတစိၤသ့ဝဲလီၤ. (ကတိၤဒိ ၂၅:၁၁) တၢ်အိၣ်ဖှိၣ်သးပှၢ်တဖၣ် ကွဲမုာ်ဝဲမိၢ်ပၢ်ဒီးဖိသၣ်တဖၣ်လၢ ကမၤစၢၤတၢ်လၢ ဘီမုၢ်ဘျီၣ်ဒိၣ်အဂီၢ်သ့စ့ၢ်ကီးလီၤ. အဝဲသ့ၣ်ဟ့ၣ်လီၤဝဲ တၢ်မၤတမံၤမံၤလၢ အကြၢးဒီးဖိသၣ် အသးအနံၣ်အလါ ဒီးအတၢ်သ့တၢ်ဘၣ်သ့လီၤ.
၁၅ တၢ်အိၣ်ဖှိၣ်ဖိတဖၣ် မၤစၢၤဝဲကသ့ဒ်လဲၣ်. မၤစၢၤဝဲသ့ခီဖျိ ပာ်ဖျါထီၣ်တၢ်သူၣ်အိၣ်သးအိၣ်လၢ ပှၤသးစၢ်တဖၣ်အဖီခိၣ်လီၤ. အဒိ, ပာ်သူၣ်ပာ်သး ဖဲပှၤသးစၢ်တဖၣ်ဂုာ်ကျဲးစၢး ဒိၣ်ထီၣ်ထီထီၣ်လၢ နီၢ်သးတကပၤအခါတက့ၢ်. လၢတၢ်အိၣ်ဖှိၣ်ပူၤန့ၣ် နမ့ၢ်ထံၣ်ပှၤသးစၢ်တဖၣ် ဟ့ၣ်တၢ်စံးဆၢမ့ၢ်ဂ့ၤ, မၤဝဲမူဒါလၢ နွံဖးဖီတၢ်အိၣ်ဖှိၣ်အဂီၢ်မ့ၢ်ဂ့ၤ ဒီးမ့ၢ်စံၣ်တဲၤတဲလီၤပှၤဂၤလၢ အကၠိ မ့တမ့ၢ် အဝဲသ့ၣ်အိၣ်ဒီးတၢ်သးတီဖဲ ထံၣ်ဘၣ်တၢ်မၤကွၢ်အခါ စံးပတြၢၤအဝဲသ့ၣ်တက့ၢ်. တဘၣ်ထုးယံာ်တၢ်ဆၢကတီၢ်တဂ့ၤ. ပပာ်လီၤဖီတၢၣ်သ့လၢ တချုးလၢတၢ်အိၣ်ဖှိၣ်ထီၣ် မ့တမ့ၢ် တၢ်အိၣ်ဖှိၣ်ဝံၤအခါ ပကတဲတၢ်ဒီးပှၤသးစၢ်တဖၣ်လီၤ. ပမ့ၢ်မၤဒ်န့ၣ်န့ၣ် အဝဲသ့ၣ်ကတူၢ်ဘၣ်လၢ အအိၣ်ဘၣ်လၢ “တၢ်အိၣ်ဖှိၣ်ဖးဒိၣ်” အပူၤလီၤ.—စံးထီၣ်ပတြၢၤ ၃၅:၁၈.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၅ ၁၀/၁ ၁၁ ¶၆
လံာ်စီဆှံ အတၢ်ပာ်ဖျါလၢလံာ် ၁ ကွဲးနီၣ်တၢ်အဂီၢ်
၂၁:၁၃-၁၅. ယဟိဝၤယွၤ အပှၤဂီၢ်မုၢ်တဖၣ် တူၢ်ဘၣ်တၢ်နးတၢ်ဖှီၣ်န့ၣ် အဝဲကွၢ်ဝဲ တမုာ်လၢၤဘၣ် အဃိ အမၢမူခိၣ်ကလူး မၤပတုာ်ကွံာ် တၢ်နးတၢ်ဖှီၣ်. ယဟိဝၤယွၤန့ၣ် “အတၢ်သးကညီၤ အိၣ်အါမး.”
ပှၤသးစၢ်သ့ၣ်ဧၢ ဂုာ်ကျဲးစၢးဒ်သိး နကတုၤထီၣ်ထီၣ်ဘးလၢ ကဒိးဘျၢထံအဂီၢ်
၁၀ ဘၣ်မနုၤအဃိ အရ့ဒိၣ်လၢပကဘၣ်သ့ၣ်ညါ တၢ်သံကွၢ်တဖၣ်အံၤ အတၢ်စံးဆၢလဲၣ်. မ့ၢ်လၢတၢ်သံကွၢ်တဖၣ်အံၤ ကမၤစၢၤပှၤ ဒ်သိးပကသ့ၣ်ညါ တၢ်ဘျၢထံန့ၣ်မ့ၢ်တၢ်လၢ အရ့ဒိၣ်န့ၣ်လီၤ. တၢ်ဒိးဘျၢထံန့ၣ် မ့ၢ်နပာ်ဖျါထီၣ်လၢပှၤဂၤအမဲာ်ညါလၢ နမၤတၢ်အၢၣ်လီၤဒီး ယဟိဝၤယွၤလီၤ. နအၢၣ်လီၤယဟိဝၤယွၤလၢ နကအဲၣ်အီၤ ဒီးကမၤအတၢ်မၤလၢ တၢ်သူၣ်အိၣ်သးအိၣ်တစိၤသးလီၤ. (မၢ်ကူး ၁၂:၃၀) ကယဲၢ်ပှၤလၢအဘျၢထံတဂၤလၢ်လၢ်န့ၣ် ကြၢးပာ်လီၤအသးလၢ အကတီဒီးအတၢ်အၢၣ်လီၤအီလီၤလၢ အဟ့ၣ်လီၤယဟိဝၤယွၤန့ၣ်လီၤ.—စံၣ်တဲၤတဲလီၤတၢ် ၅:၄, ၅ တက့ၢ်.
၁၁ လံာ်စီဆှံစံးဝဲလၢ ယဟိဝၤယွၤအခ့အပှၤ လၢအသးပှၢ်မ့ၢ်ဂ့ၤ, အသးစၢ်မ့ၢ်ဂ့ၤ ကမၤအတၢ်မၤလၢ “တၢ်သးအိၣ်အပူၤ”လီၤ. (စံးထီၣ်ပတြၢၤ ၁၁၀:၃, ခ့ခါစှီၤကျိာ်.) ပှၤလၢအဲၣ်ဒိး ဒိးဘျၢထံတဖၣ် ကဘၣ်ဆၢတဲာ်တၢ်လၢ အနီၢ်ကစၢ်လီၤ. လီၤဆီဒၣ်တၢ် ပှၤလၢအဒိၣ်ထီၣ်လၢ တၢ်မ့ၢ်တၢ်တီအပူၤတဖၣ် ကဘၣ်သမံသမိးလီၤက့ၤအသးလီၤတံၢ်လီၤဆဲးလီၤ.
၁၂ ဖဲနဒိၣ်ထီၣ်အခါန့ၣ် နကထံၣ်ဘၣ်ပှၤဒိးဘျၢထံအါမးလီၤ. ဘၣ်သ့ၣ်သ့ၣ် အဝဲသ့ၣ်ကမ့ၢ်ဝဲ နတံၤနသကိး ဒီးပှၤလၢနဟံၣ်ဖိဃီဖိအကျါလီၤ. လၢတၢ်န့ၣ်အဃိ နကတူၢ်ဘၣ်လၢ မ့ၢ်လၢနညါအိၣ်ထီၣ် မ့တမ့ၢ် ပှၤဂၤတဖၣ်ဘျၢထံလံအဃိ နကဘၣ်ဘျၢထံစ့ၢ်ကီးလီၤ. ဘၣ်ဃးဒီးတၢ်ဒိးဘျၢထံန့ၣ် နအိၣ်ဒီးတၢ်ထံၣ်ဒ် ယဟိဝၤယွၤအသိးကသ့ဒ်လဲၣ်. ဟံးန့ၢ်တၢ်ဆၢကတီၢ်လၢ နကဆိကမိၣ် တၢ်ဘျၢထံန့ၣ် ဘၣ်မနုၤအဃိ မ့ၢ်တၢ်လၢအရ့ဒိၣ်ဝဲ လဲၣ်န့ၣ်တက့ၢ်. ဘၣ်ဃးဒီးတၢ်ဘျၢထံန့ၣ် နကထံၣ်ဘၣ်တၢ်ဂ့ၢ်အါမံၤလၢ တၢ်မၤလိအံၤအပူၤ ဒီးတၢ်မၤလိလၢခံတခါအပူၤန့ၣ်လီၤ.
၁၃ ဖဲပဆၢတဲာ်လီၤပသးလၢ ပကဒိးဘျၢထံအခါ ပတၢ်ဆၢတဲာ်အံၤ မ့ၢ်တၢ်လၢအဟဲထီၣ်လၢ ပသးပူၤဧါ တမ့ၢ်ဘၣ်ဧါန့ၣ် ဒ်သိးပကသ့ၣ်ညါအဂီၢ် ပကဘၣ်သမံသမိးက့ၤ ပတၢ်ထုကဖၣ်န့ၣ်လီၤ. မ့ၢ်နဃ့ဘါထုကဖၣ်တၢ်ဆူ ယဟိဝၤယွၤအအိၣ် ထီဘိဧါ. နမ့ၢ်ဃ့ဘါထုကဖၣ်တၢ်န့ၣ် နဃ့တၢ်ဂ့ၢ်လီၤတံၢ်လီၤဆဲးဧါ. တၢ်သံကွၢ်တဖၣ်အံၤ အတၢ်စံးဆၢန့ၣ် ကပာ်ဖျါထီၣ်ဝဲ နတၢ်ရ့လိာ်သးဒီး ယဟိဝၤယွၤ ဂ့ၤထဲလဲၣ်န့ၣ်လီၤ. (စံးထီၣ်ပတြၢၤ ၂၅:၄) ယဟိဝၤယွၤစံးဆၢ ပတၢ်ထုကဖၣ်အါဘျီ ခီဖျိလၢလံာ်စီဆှံလီၤ. လၢတၢ်န့ၣ်အဃိ ဒ်သိးနကသ့ၣ်ညါလၢ မ့ၢ်နအဲၣ်ဒိးသုးဘူးနသးဆူ ယဟိဝၤယွၤအအိၣ်နီၢ်နီၢ် ဒီးမ့ၢ်နအဲၣ်ဒိးမၤအတၢ်မၤလၢ သူၣ်ဒီဖျၢၣ်သးဒီဖျၢၣ်နီၢ်နီၢ်ဧါန့ၣ် မ့ၢ်ဒၣ်နကဘၣ်သမံသမိးလီၤက့ၤ နတၢ်မၤလိလံာ်စီဆှံ အတၢ်ရဲၣ်တၢ်ကျဲၤန့ၣ်လီၤ. (ယိၤၡူ ၁:၈) သံကွၢ်လီၤနသးလၢ– ‘မ့ၢ်ယနီၢ်ကစၢ် တၢ်မၤလိလံာ်စီဆှံ အိၣ်ဝဲထီဘိဧါ. မ့ၢ်ယသးအိၣ်ပၣ်ဃုာ်လၢ ယဟံၣ်ဖိဃီဖိ တၢ်မၤလိလံာ်စီဆှံအပူၤဧါ.’ နတၢ်စံးဆၢတဖၣ်အံၤ ကမၤစၢၤနၤဒ်သိး နကသ့ၣ်ညါလၢ နတၢ်ဆၢတဲာ်လၢ နကဒိးဘျၢထံအဂီၢ်န့ၣ် မ့ၢ်နနီၢ်ကစၢ်အတၢ်ဃုထၢန့ၣ်လီၤ.
၁၄ တၢ်ဟ့ၣ်လုၢ်ထီၣ်သး ဒီးတၢ်ဒိးဘျၢထံအခီပညီ လီၤဆီလိာ်သးဒ်လဲၣ်န့ၣ် ပှၤသးစၢ်တနီၤနီၤ တသ့ၣ်ညါဝဲဘၣ်. ဘၣ်သ့ၣ်သ့ၣ် အဝဲသ့ၣ်တနီၤစံးဝဲလၢ အဟ့ၣ်လုၢ်ထီၣ်သးလၢ ယဟိဝၤယွၤအအိၣ်ဝံၤလံ. ဘၣ်ဆၣ် တကတဲာ်ကတီၤအသးလၢ ကဘျၢထံအဂီၢ်ဒံးဘၣ်. တၢ်အံၤ မ့ၢ်အမ့ၢ်စ့ၢ်ကီးဧါ. တၢ်ဟ့ၣ်လုၢ်ထီၣ်သးန့ၣ် မ့ၢ်ဝဲနဃ့ဘါထုကဖၣ်တၢ်ဆူ ယဟိဝၤယွၤအအိၣ် ဒီးနအၢၣ်လီၤကစၢ်ယွၤလၢ နကမၤအတၢ်မၤလီၤထူလီၤယိာ်လီၤ. ဖဲနဘျၢထံအခါ နပာ်ဖျါထီၣ်လၢပှၤဂၤအမဲာ်ညါလၢ နဟ့ၣ်လုၢ်ထီၣ်သးလၢ ယဟိဝၤယွၤအအိၣ်ဝံၤလံန့ၣ်လီၤ. လၢတၢ်န့ၣ်အဃိ တချုးလၢ နဘျၢထံဒံးဘၣ်န့ၣ် နကဘၣ်သ့ၣ်ညါလၢ တၢ်ဟ့ၣ်လုၢ်ထီၣ်သးဆူ ယဟိဝၤယွၤအအိၣ် မ့ၢ်မနုၤလဲၣ်န့ၣ်လီၤ.
၁၅ ဖဲနဟ့ၣ်လုၢ်ထီၣ်နသးဆူ ယဟိဝၤယွၤအအိၣ်အခါ မ့ၢ်နတဲဘၣ်ကစၢ်လၢ နမ့ၢ်အတၢ်လီၤ. ဒီးနအၢၣ်လီၤကစၢ်ယွၤလၢ တၢ်လၢအရ့ဒိၣ်ကတၢၢ်လၢ နတၢ်အိၣ်မူပူၤန့ၣ် မ့ၢ်ဒၣ်တၢ်မၤကစၢ်အ တၢ်မၤလီၤ. (ဖး မးသဲ ၁၆:၂၄ တက့ၢ်.) နတၢ်အၢၣ်လီၤအီလီၤ ကစၢ်ယွၤ မ့ၢ်ဝဲဒၣ်တၢ်လၢအရ့ဒိၣ်ဒိၣ်မးလီၤ. (မးသဲ ၅:၃၃) လၢတၢ်န့ၣ်အဃိ နကမၤတၢ်ဘၣ်ယဟိဝၤယွၤအသး ဒီးတမ့ၢ်လၢနကမၤ နနီၢ်ကစၢ်အတၢ်ဘၣ်သးန့ၣ် နပာ်ဖျါထီၣ်ကသ့ဒ်လဲၣ်.—ရိမ့ၤ ၁၄:၈.