ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ

လါမၢ်ၡး ၆-၁၂

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ကွဲးနီၣ်တၢ် ၂၃-၂၆

“ပှၤရဲၣ်လီၤကျဲၤလီၤတၢ်ဂ့ၤဂ့ၤ လၢတၢ်ဘူၣ်ထီၣ်ဘါထီၣ်တၢ်လၢ တၢ်လုၢ်ဟံၣ်ပူၤအဂီၢ်”

it-2 ၂၄၁

ပှၤလ့ၤဝံဖိတဖၣ်

တၢ်မၤလၢ ပှၤလ့ၤဝံဖိတဖၣ် ကဘၣ်မၤဝဲန့ၣ် စီၤဒၤဝံး ရဲၣ်လီၤကျဲၤလီၤဝဲဂ့ၤဂ့ၤ. အဝဲဃုထၢထီၣ်ဝဲ ပှၤလၢအတီခိၣ်ရိၤမဲတၢ်မၤ, ပှၤခိၣ်ပှၤနၢ်တဖၣ်, စံၣ်ညီၣ်ကွီၢ်တဖၣ်, ပှၤခိးတြဲၤဖိ ဒီးပှၤပၢၤစ့. တကးဒံးဘၣ် အဝဲဃုထၢထီၣ်ဝဲ ပှၤအါဂၤလၢ ကမၤစၢၤဝဲ ပှၤလုၢ်တၢ်ဒိၣ် လၢတၢ်လုၢ်ဟံၣ် အတၢ်ပျီ, ပှၤအီၣ်တၢ်အဒၢး လၢအဘၣ်ဃးဒီး တၢ်လုၢ်တၢ်ပာ်, တၢ်လုၢ်ထီၣ်, တၢ်မၤကဆှဲကဆှီ, ပှၤထိၣ်တၢ်စီၤတၢ်အတၢ်မၤ ဒီးပှၤခီးတၢ်. ပှၤလ့ၤဝံဖိလၢ အမၤတၢ်ဘၣ်ဃးဒီး တၢ်သူၣ်ဝံၣ်သးဆၢန့ၣ် ပှၤကရၢကရိထီၣ်အီၤ ၂၄ ကရူၢ် ဒ်ပှၤလုၢ်တၢ်ဒိၣ်တဖၣ် အကရူၢ်အိၣ်ဝဲအသိး ဒီးအဝဲသ့ၣ် မၤတၢ်လၢအကလဲး. ဒီးအဝဲသ့ၣ် ကန့ၢ်ဘၣ်မူဒါဒ်လဲၣ်န့ၣ် သန့ၤထီၣ်သးလၢ တၢ်ဖးလီၤဘၣ်အဝဲသ့ၣ်အဖီခိၣ်. ပှၤခိးတြဲၤဖိ အကရူၢ်တဖၣ်စ့ၢ်ကီး အဝဲသ့ၣ် ကဘၣ်အိၣ်ခီးဝဲတြဲၤ ဖဲလဲၣ်တဘ့ၣ်လဲၣ်န့ၣ် အဝဲသ့ၣ်ဘၣ်ဖးတၢ်.—၁ ကွဲး ၂၃, ၂၅, ၂၆; ၂ ကွဲး ၃၅:၃-၅, ၁၀.

it-2 ၆၈၆

ပှၤလုၢ်တၢ်ဒိၣ်

ပှၤလုၢ်တၢ်ဒိၣ်လၢအမၤတၢ်လၢ တၢ်လုၢ်ဟံၣ်တဖၣ်န့ၣ် ဘၣ်မၤတၢ်လၢ ကရူၢ်အခိၣ်တဖၣ်လၢ အအိၣ်ဒီးမူဒါ အကလုာ်ကလုာ် အတၢ်ဟံးစုနဲၣ်ကျဲ အဖီလာ်. အဝဲသ့ၣ် ကဘၣ်မၤဝဲမူဒါ ဖဲလဲၣ်တခါလဲၣ်န့ၣ် ဒိးသန့ၤထီၣ်အသးလၢ တၢ်ဖးလီၤဘၣ်အဝဲသ့ၣ်အဖီခိၣ်. ပှၤလုၢ်တၢ်ဒိၣ်န့ၣ် အိၣ်ဝဲ ၂၄ ကရူၢ်. တကရူၢ်န့ၣ် ဘၣ်မၤတၢ်တနွံ တကရူၢ်န့ၣ်တနွံ အဃိ လၢတနံၣ်အတီၢ်ပူၤန့ၣ် အဝဲသ့ၣ် လီၤဘၣ်မူဒါခံဘျီ. ဖဲဘူၣ်တဖၣ် ဘၣ်ဝဲအဆၢကတီၢ်န့ၣ် ပှၤဂီၢ်မုၢ်လၢ အကထိတဖၣ် ဟဲဟ့ၣ်လုၢ်ထီၣ်တၢ်အဃိ လီၤဂာ်လၢ ပှၤလုၢ်တၢ်ဒိၣ်ခဲလၢာ်န့ၣ် ဘၣ်မၤသကီးတၢ် ဒ်အမၤဝဲလၢ ပှၤပာ်စီဆှံ တၢ်လုၢ်ဟံၣ်အခါ. (၁ ကွဲး ၂၄:၁-၁၈, ၃၁; ၂ ကွဲး ၅:၁၁; ထိၣ်သတြီၤဒီး ၂ ကွဲး ၂၉:၃၁-၃၅; ၃၀:၂၃-၂၅; ၃၅:၁၀-၁၉.) ပှၤလုၢ်တၢ်ဒိၣ်တဂၤန့ၣ် မၤဝဲအမူဒါမ့ၢ်ဝံၤသနာ်က့ လၢတၢ်ဆၢကတီၢ်အဂၤန့ၣ် အမၤတၢ်ဖဲန့ၣ်သ့. ဘၣ်ဆၣ် ဖဲန့ၣ်အဆၢကတီၢ် အတဘၣ်လဲၤမၤမူဒါလၢ ပှၤလုၢ်တၢ်ဒိၣ်အဂၤတဖၣ် လီၤဘၣ်ဝဲန့ၣ်ဘၣ်. လၢယ့ၣ်ၡူးအစိၤန့ၣ် ပှၤလုၢ်တၢ်ဒိၣ်တဖၣ် အါထီၣ်ဝဲအဃိ မူဒါလၢ ပှၤလုၢ်တၢ်ဒိၣ် တကရူၢ် ကဘၣ်မၤဝဲလၢ တနွံအတီၢ်ပူၤန့ၣ် ပှၤနီၤဖးလီၤအီၤလၢ ဟံၣ်ဖိဃီဖိအဒူၣ်တဖၣ်အအိၣ် ဒ်ပှၤရၤဘံဖိတဖၣ် အလုၢ်အလၢ်အိၣ်ဝဲအသိး. အဃိ ဒ်ဟံၣ်ဖိဃီဖိ အနီၣ်ဂံၢ်အိၣ်ဝဲအသိး ဟံၣ်ဖိဃီဖိ တဒူၣ်ဘၣ်တဒူၣ်န့ၣ် ဘၣ်မၤဝဲမူဒါ တသီ မ့တမ့ၢ် အါန့ၢ်တသီ.

it-2 ၄၅၁-၄၅၂

တၢ်ဒ့တၢ်အူ

စီၤဒၤဝံး ဃုထၢထီၣ်ဝဲ ပှၤလ့ၤဝံဖိအဂၤ ၄,၀၀၀ လၢကစံးထီၣ်ပတြၢၤ ယဟိဝၤယွၤ လၢတၢ်ဒ့တၢ်အူ လၢတၢ်လုၢ်ဟံၣ်အဂီၢ်. (၁ ကွဲး ၂၃:၄, ၅) လၢအဝဲသ့ၣ်အကျါပှၤ ၂၈၈ ဂၤန့ၣ် “အန့ၢ်တၢ်သိၣ်လိဂ့ၤဂ့ၤ ဒ်သိး ကသးဝံၣ်တၢ်လၢ ယဟိဝၤယွၤ အအိၣ်အဂီၢ် . . . အဝဲသ့ၣ် ကိးဂၤဒဲးန့ၣ် သးဝံၣ်တၢ်သ့ မူာ်မူာ်နီၢ်နီၢ်.” (၁ ကွဲး ၂၅:၇) စီၤအၤစာ်, စီၤဟ့မၣ် ဒီးစီၤယဒူသူၣ်န့ၣ် အဝဲသ့ၣ် ကဲဝဲပှၤသ့ပှၤဘၣ် လၢတၢ်ဒ့တၢ်အူ တကပၤ. ဒီးအဝဲသ့ၣ် တီခိၣ်ရိၤမဲဝဲ တၢ်ဒ့တၢ်အူ အတၢ်ရဲၣ်တၢ်ကျဲၤခဲလၢာ်. ဒီးအဝဲသ့ၣ်သၢဂၤ အဟံၣ်ဖိဃီဖိတဖၣ်န့ၣ် တီခိၣ်ရိၤမဲတၢ်လၢ တၢ်ဒ့တၢ်အူအကရူၢ်လၢ တၢ်လုၢ်ဟံၣ်ပူၤ. အဝဲသ့ၣ်သၢဂၤန့ၣ် ဟဲလီၤစၢၤလီၤသွဲၣ်လၢ စီၤလ့ၤဝံအဖိခွါသၢဂၤအကျါတဂၤ. စီၤလ့ၤဝံ အဖိခွါသၢဂၤန့ၣ် ကဲဝဲ စီၤက့းရၡိၣ်, စီၤကဃး ဒီးစီၤမရၤရံၤ. (၁ ကွဲး ၆:၁၆, ၃၁-၃၃, ၃၉-၄၄; ၂၅:၁-၆) စီၤအၤစာ်, စီၤဟ့မၣ် ဒီးစီၤယဒူသူၣ် အဖိခွါ ၂၄ ဂၤန့ၣ် ပၣ်ဃုာ်လၢပှၤ ၂၈၈ ဂၤအကျါ လၢအသးဝံၣ်တၢ်သ့ မူာ်မူာ်နီၢ်နီၢ်. ပှၤ ၂၄ ဂၤအံၤန့ၣ် ဒ်တၢ်ဖးလီၤဘၣ် အဝဲသ့ၣ်အသိး အဝဲသ့ၣ် ဘၣ်ကဲဝဲ တၢ်ဒ့တၢ်အူကရူၢ်အခိၣ် တကရူၢ်တဂၤ တကရူၢ်တဂၤ. လၢအဝဲသ့ၣ် တဂၤဘၣ်တဂၤ အတၢ်တီခိၣ်ရိၤမဲအဖီလာ်န့ၣ် “ပှၤလၢအသးဝံၣ်တၢ်သ့ မူာ်မူာ်နီၢ်နီၢ်” န့ၣ်အိၣ်ဝဲ ၁၁ ဂၤဘျဲၣ်. ဒီးပှၤဃုထၢထီၣ်ဝဲ ပှၤသးဝံၣ်တၢ်သ့ မူာ်မူာ်နီၢ်နီၢ်တဖၣ်အံၤလၢ အဝဲသ့ၣ်အဖိခွါအကျါ ဒီးလၢပှၤလ့ၤဝံဖိအဂၤတဖၣ်အကျါ. ပှၤလ့ၤဝံဖိလၢ အသးဝံၣ်တၢ်သ့ မူာ်မူာ်နီၢ်နီၢ် ၂၈၈ ဂၤ ([၁ + ၁၁] × ၂၄ = ၂၈၈) န့ၣ် ပှၤနီၤဖးလီၤအဝဲသ့ၣ် ၂၄ ကရူၢ် ဒ်ပှၤလုၢ်တၢ်ဒိၣ် အကရူၢ်အသိး. ဒီးပှၤ ၃,၇၁၂ ဂၤလၢအကဲ “ပှၤလၢအမၤလိတၢ်” န့ၣ် ပှၤမ့ၢ်နီၤဖးလီၤအီၤ ၂၄ ကရူၢ်န့ၣ် တကရူၢ်န့ၣ် ကအိၣ်ဝဲ ၁၅၅ ဂၤ. အဃိ ပှၤလ့ၤဝံဖိလၢ အဟ့ၣ်တၢ်သိၣ်လၢ ဘၣ်ဃးဒီး တၢ်ဒ့တၢ်အူန့ၣ် တကရူၢ်န့ၣ် ကအိၣ်ဝဲ ၁၃ ဂၤဃၣ်ဃၣ်. (၁ ကွဲး ၂၅:၁-၃၁) ပှၤလ့ၤဝံဖိလၢ အမၤတၢ်လၢ တၢ်ဒ့တၢ်အူတကပၤ အိၣ်ဝဲထဲအံၤ တကးဒံးဘၣ် ပှၤလုၢ်တၢ်ဒိၣ်လၢ အအူကွဲၤအိၣ်ဝဲစ့ၢ်ကီး.—၂ ကွဲး ၅:၁၂; ထိၣ်သတြီၤဒီး ၄ မိၤ ၁၀:၈.

it-1 ၈၉၈

ပှၤခိးတြဲၤဖိ

လၢတၢ်လုၢ်ဟံၣ်. တချုးလၢ စီၤဒၤဝံး သံဒံးဘၣ်န့ၣ် အဝဲရဲၣ်လီၤကျဲၤလီၤတၢ် ဒ်သိး ပှၤလ့ၤဝံဖိ, ပှၤမၤတၢ်လၢ တၢ်လုၢ်ဟံၣ် ဒီးပှၤခိးတြဲၤဖိတဖၣ် ကမၤတၢ်အဂီၢ်. ဒီးအဝဲသ့ၣ်ခဲလၢာ်န့ၣ် အိၣ်ဝဲအဂၤ ၄,၀၀၀. အဝဲသ့ၣ် တဖုဘၣ်တဖု မ့ၢ်ဟဲမၤတၢ်တဘျီန့ၣ် ဘၣ်မၤဝဲနွံသီ. ဒီးအဝဲသ့ၣ် အိၣ်ဒီးမူဒါလၢ ကခီးဝဲ ယဟိဝၤယွၤအဟံၣ် ဒီးကအီးထီၣ်ကးတံာ် ပဲတြီလၢအဆၢကတီၢ်ဒၣ်ဝဲ. (၁ ကွဲး ၉:၂၃-၂၇; ၂၃:၁-၆) တကးဒံးဘၣ် ပှၤခိးတြဲၤဖိတနီၤန့ၣ် ကွၢ်ထွဲဝဲ တၢ်မၤဘူၣ်လၢ ပှၤဂီၢ်မုၢ်တဖၣ် ဟဲဟ့ၣ်ဝဲလၢ တၢ်လုၢ်ဟံၣ်အဂီၢ်. (၂ စီၤပၤ ၁၂:၉; ၂၂:၄) လၢခံန့ၣ် ဖဲပှၤလုၢ်တၢ်ခိၣ်အဒိၣ်ကတၢၢ် စီၤယဟိၤယဒါ ဒိးဖှူဝဲ စီၤယိၤအာ် လၢကကဲထီၣ် စီၤပၤအခါ ပှၤပာ်လီၤဃာ် ပှၤခိးတၢ်ဖိ လီၤလီၤဆီဆီ လၢတၢ်လုၢ်ဟံၣ် ဒ်သိး ကဒီသဒၢဝဲ စီၤယိၤအာ် လၢနီၢ်ပၤမုၣ်ဧသၤလယၤ အစုပူၤ, မ့ၢ်လၢ နီၢ်ပၤမုၣ်ဧသၤလယၤန့ၣ် အဟံန့ၢ်ဆူၣ်ဝဲ တၢ်စိတၢ်ကမီၤအဃိ. (၂ စီၤပၤ ၁၁:၄-၈) ဖဲစီၤပၤယိၤၡံယၤ မၤဟးဂီၤကွံာ်ဝဲ တၢ်ဂီၤတၢ်ဖှီၣ်အခါ ပှၤခိးတြဲၤဖိတဖၣ်န့ၣ် မၤစၢၤအီၤ. အဝဲသ့ၣ် စိာ်ထီၣ်ကွံာ်ဝဲ တၢ်ပီးတၢ်လီလၢ ပှၤသူအီၤလၢ တၢ်ဘူၣ်ထီၣ်ဘါထီၣ် ဘဧၤလးအဂီၢ် လၢဝ့ၢ်ချၢ ဝံၤဒီးပှၤဒွဲၣ်အူထီၣ်ကွံာ်ဝဲ.—၂ စီၤပၤ ၂၃:၄.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၂.၀၃ ၂၂ ¶၁၀

တၢ်ဘူၣ်ထီၣ်ဘါထီၣ်လၢ အမ့ၢ်အတီန့ၣ် ကမၤအါထီၣ်နတၢ်သးခု

^၁၀ ဖဲပသးဝံၣ်တၢ်အခါ မ့ၢ်ဝဲကျဲတဘိလၢ ပဘူၣ်ထီၣ်ဘါထီၣ် ယဟိဝၤယွၤ. (စံးထီၣ်ပတြၢၤ ၂၈: ၇) ပှၤအံၣ်စရ့လးဖိတဖၣ် ထံၣ်ဝဲတၢ်သူၣ်ဝံၣ်သးဆၢဒ် တၢ်အရ့ဒိၣ်တခါလၢ တၢ်ဘူၣ်ထီၣ်ဘါထီၣ်အဂီၢ်. စီၤပၤဒၤဝံး ဟ့ၣ်လီၤဝဲ ပှၤလ့ၤဝံဖိ ၂၈၈ ဂၤမူဒါ လၢကသးဝံၣ်တၢ်လၢ တၢ်လုၢ်ဟံၣ်ပူၤ. (၁ ကွဲးနီၣ်တၢ် ၂၅:၁, ၆-၈) ဆၢကတီၢ်ခဲအံၤစ့ၢ်ကီး ပပာ်ဖျါထီၣ်လၢ ပအဲၣ်ကစၢ်ယွၤ ခီဖျိလၢ ပသးဝံၣ်စံးထီၣ်ပတြၢၤအီၤ. ပကလုၢ်မုာ်တမုာ် လိၤတလိၤန့ၣ် အရ့တဒိၣ်ဘၣ်. ပကဆိကမိၣ်ကွၢ် တၢ်အဒိတခါ. ပကဲပှၤကညီန့ၣ်ပတဲ “ကမၣ်တၢ်အါဘျီ” ဘၣ်ဆၣ် ခီဖျိလၢ ပတဲကမၣ်တၢ်အဃိ ပတတဲတၢ်လၢၤဘၣ်န့ၣ် တအိၣ်ဘၣ်, ဖဲပထီၣ်တၢ်အိၣ်ဖှိၣ် ဒီးလဲၤစံၣ်တဲၤတဲလီၤတၢ်အခါ ပတဲတၢ်ဒံး. (ယၤကိာ် ၃:၂) ဒ်န့ၣ်အသိး ပမ့ၢ်ဆိမိၣ်လၢ ပသးဝံၣ်တၢ် ပကလုၢ်တမုာ်ဘၣ်ဒီး ပကလုၢ်တလိၤဘၣ် သနာ်က့ တၢ်ဂ့ၢ်တဖၣ်အံၤန့ၣ် တကြၢးတြီပှၤလၢ ပကသးဝံၣ် စံးထီၣ်ပတြၢၤ ယဟိဝၤယွၤဘၣ်.

တၢး၁၁ ၆/၁ ၁၄-၁၅

ခရံာ်ဖိလၢ တၢ်မၢဖိအစိၤတဖၣ် ဘၣ်တၢ်ကရၢကရိထီၣ်အီၤဂ့ၤဂ့ၤ

လၢတၢ်မၢဖိအစိၤန့ၣ် ခီဖျိလၢ တၢ်မၢဖိတဖၣ် ဒီးခရံာ်အပျဲၢ်အဘီၣ်တဖၣ် စံၣ်တဲၤတဲလီၤတၢ်လၢ တၢ်သးဆူၣ် အဃိ လၢအၤစံအကီၢ်ရ့ၣ် ဒီးယူရပၤန့ၣ် ခရံာ်ဖိတၢ်အိၣ်ဖှိၣ်တဖၣ် အိၣ်ထီၣ်ဝဲ. တၢ်အိၣ်ဖှိၣ်အိၣ်ဝဲလၢ တၢ်လီၢ်အါတီၤ သနာ်က့ တၢ်အိၣ်ဖှိၣ် တဖျၢၣ်ဒီးတဖျၢၣ်န့ၣ် တအိၣ်ဒၣ်အတၢ် လီၤလီၤဆီဆီဘၣ်. ပှၤရဲၣ်လီၤကျဲၤလီၤတၢ် ဒ်သိးတၢ်အိၣ်ဖှိၣ်တဖၣ် ကအိၣ်လၢ တၢ်ကရၢကရိတခါအပူၤ ဒီးတၢ်အိၣ်ဖှိၣ်တဖၣ်န့ၣ် တၢ်မၢဖိတဖၣ် ကွၢ်ထွဲအဝဲသ့ၣ် လၢတၢ်အဲၣ်တၢ်ကွံအပူၤ. အဒိ, တၢ်မၢဖိပီလူး ဆှၢလီၤဝဲ စီၤတံတူး လၢကီးကြ့တ့ၤ ဒ်သိး “ကဘှီဘၣ်ထီၣ် တၢ်လၢအလိၣ်တဖၣ်.” (တံတူး ၁:၅) တၢ်မၢဖိပီလူး ကွဲးလံာ်လၢ ကရံၣ်သူးတၢ်အိၣ်ဖှိၣ်အအိၣ် ဒီးတဲဝဲလၢ ဒီပုၢ်ဝဲၢ်ခွါတနီၤန့ၣ် အကဲပှၤလၢ “အဟံးစုနဲၣ်ကျဲတၢ်သ့” မ့တမ့ၢ် “ရဲၣ်လီၤကျဲၤလီၤတၢ်သ့.” (၁ ကရံၣ်သူး ၁၂:၂၈) ဘၣ်ဆၣ် ပှၤအရ့ဒိၣ်ကတၢၢ်လၢ အရဲၣ်လီၤကျဲၤလီၤတၢ်န့ၣ် မ့ၢ်မတဂၤလဲၣ်. စီၤပီလူး တဲဝဲလၢ “ကစၢ်ယွၤ ရဲၣ်လီၤကျဲၤလီၤ” မ့တမ့ၢ် “ကရၢကရိထီၣ်” တၢ်အိၣ်ဖှိၣ်.—၁ ကရံၣ်သူး ၁၂:၂၄.

ပှၤကွၢ်ထွဲတၢ်အိၣ်ဖှိၣ်တဖၣ်န့ၣ် အဝဲသ့ၣ် တကဲကစၢ်လၢ ပှၤလၢအစူၢ်က့ၤနာ်က့ၤတၢ် အဖီခိၣ်ဘၣ်. အဝဲသ့ၣ်န့ၣ် ကဲ “ပှၤလၢ အမၤသကိးတၢ်ဒီး” တၢ်အိၣ်ဖှိၣ်ဖိတဖၣ် လၢကစၢ်ယွၤအသးစီဆှံ အတၢ်ဟံးစုနဲၣ်ကျဲအဖီလာ်. ဒီးအဝဲသ့ၣ် “ကဲထီၣ်တၢ်ဒိတၢ်တဲာ်လၢ သိတဖု” အဂီၢ်. (၂ ကရံၣ်သူး ၁:၂၄; ၁ ပ့းတရူး ၅:၂, ၃) ပှၤလၢအကဲ “တၢ်အိၣ်ဖှိၣ်အခိၣ်” န့ၣ်ကဲဝဲယ့ၣ်ၡူးလၢ အဂဲၤဆၢထၢၣ်က့ၤလၢ တၢ်သံ ဒီးတမ့ၢ်ဝဲ ပှၤတကရူၢ် မ့တမ့ၢ် ပှၤဟီၣ်ခိၣ်ဖိလၢ အတလၢတပှဲၤန့ၣ်ဘၣ်.—အ့းဖ့းစူး ၅:၂၃.

ဖဲတၢ်အိၣ်ဖှိၣ်လၢ ဝ့ၢ်ကရံၣ်သူး မၤဘၣ်ဂီၢ်က့ၤ တၢ်ဂ့ၢ်ကီအခါ အတမၤဝဲဒ်သိး တၢ်အိၣ်ဖှိၣ်အဂၤတဖၣ် မၤဝဲဘၣ်အဃိ တၢ်မၢဖိပီလူး ကွဲးဝဲလၢ “မ့ၢ်ကစၢ်ယွၤ အကလုၢ်ကထါ ဟဲအိၣ်ထီၣ်လၢသုအိၣ်ဟီဧါ. မ့တမ့ၢ်ဘၣ်န့ၣ် မ့ၢ်အလဲၤတုၤထဲလၢ သုအိၣ်လီၤဧါ.” (၁ ကရံၣ်သူး ၁၄:၃၆) စီၤပီလူး သံကွၢ်ဝဲဒ်အံၤ ဒ်သိး ကဘှီဘၣ်ထီၣ်က့ၤ အဝဲသ့ၣ် အတၢ်ဆိကမိၣ် ဒီးကမၤစၢၤအဝဲသ့ၣ် ဒ်သိး အကနၢ်ပၢၢ်ထီၣ်ဝဲလၢ အတဘၣ်မၤတၢ်ဖဲ အသးဒၣ်ဝဲဘၣ်. ဒီးအဝဲသ့ၣ် မၤထွဲဝဲ တၢ်မၢဖိပီလူး အတၢ်ဟံးစုနဲၣ်ကျဲအဃိ တၢ်အိၣ်ဖှိၣ်တဖၣ် လဲၤထီၣ်လဲၤထီဝဲ.—မၤတၢ် ၁၆:၄, ၅.

မ့မ့ၢ်လၢ ပစိၤခဲအံၤမီၤ. ဘၣ်သ့ၣ်သ့ၣ် ပှၤတနီၤနီၤန့ၣ် တအဲၣ်ဒီးအိၣ်လၢ တၢ်ဘူၣ်တၢ်ဘါ အတၢ်ကရၢကရိ တခါအပူၤဘၣ်. ဘၣ်ဆၣ် ပမ့ၢ်ကွၢ်လၢ လံာ်စီဆှံပူၤန့ၣ် ပာ်ဖျါထီၣ်ဝဲလၢ ကစၢ်ယွၤ ကမၤလၢပှဲၤထီၣ် အတၢ်လိၣ်ဘၣ်အဂီၢ် ထီဘိန့ၣ် အသူဝဲတၢ်ကရၢကရိ. အဝဲကရၢကရိထီၣ်ဝဲ ပှၤအံၣ်စရ့လးဖိလၢပျၢၤ လၢအဘူၣ်ထီၣ်ဘါထီၣ်အီၤ ဒီးအကရၢကရိထီၣ်ဝဲ ခရံာ်ဖိတၢ်ဘူၣ်တၢ်ဘါ လၢတၢ်မၢဖိအစိၤစ့ၢ်ကီး.

အဃိ ပနာ်သ့သပှၢ်ကတၢၢ်လၢ ကစၢ်ယဟိဝၤယွၤ ကဟံးစုနဲၣ်ကျဲဝဲ ပှၤလၢအဘူၣ်ထီၣ်ဘါထီၣ်အီၤတဖၣ် ဒ်အမၤတ့ၢ်ဝဲလၢညါအသိး. ယဟိဝၤယွၤ ကရၢကရိထီၣ်ဝဲ ပှၤလၢအဘူၣ်ထီၣ်ဘါထီၣ်အီၤတဖၣ် ဒီးအဝဲသ့ၣ်အိၣ်ဘၣ် ဃူဃူဖိးဖိးအဃိ ပသ့ၣ်ညါဘၣ်လၢ ယဟိဝၤယွၤ အဲၣ်အဝဲသ့ၣ်. ဆၢကတီၢ်ခဲအံၤ ယဟိဝၤယွၤ သူဝဲအတၢ်ကရၢကရိ ဒ်သိး ကမၤလၢပှဲၤ အတၢ်လိၣ်ဘၣ် လၢပှၤဟီၣ်ခိၣ်ဖိအဂီၢ်. တၢ်ကရၢကရိတခါ ကဲဝဲ ကစၢ်ယွၤ အတၢ်ကရၢကရိန့ၣ် နသ့ၣ်ညါ ကသ့ဒ်လဲၣ်. ဆိကမိၣ်ကွၢ် တၢ်ဂ့ၢ်လၢ တၢ်ဖီလာ်တဖၣ်အံၤ.

ခရံာ်ဖိလၢအမ့ၢ်အတီတဖၣ်န့ၣ် ဘၣ်တၢ်ကရၢကရိထီၣ်အီၤလၢ ကမၤကဲထီၣ်ဝဲ တၢ်မၤတခါ. (မးသဲ ၂၄:၁၄; ၁ တံၤမသ့း ၂:၃, ၄) ယ့ၣ်ၡူး မၢပှၤလၢအပိာ်အခံတဖၣ် စံၣ်တဲၤတဲလီၤ တၢ်သးခုကစီၣ် လၢပှၤကလုာ်ခဲလၢာ်အအိၣ် အဃိ ကစၢ်ယွၤ အတၢ်ကရၢကရိ လၢဟီၣ်ခိၣ်ဒီဘ့ၣ် မ့ၢ်တအိၣ်ဝဲ တခါဘၣ်န့ၣ် ပှၤကမၤလၢပှဲၤမူဒါအံၤအဂီၢ် တညီဝဲဘၣ်. အဒိ ပမ့ၢ်ဘၣ်ဒုးအီၣ် ပှၤတဂၤတၢ်အီၣ်န့ၣ် တမ့ၢ်ဝဲ တၢ်ကီတၢ်ခဲဘၣ်. ဘၣ်ဆၣ် ပမ့ၢ်ဘၣ်ဒုးအီၣ်ပှၤလၢ အကထိလၢအကကွဲၢ်တဖၣ် တၢ်အီၣ်န့ၣ် နကဘၣ်ရဲၣ်လီၤကျဲၤလီၤ ဒီးကရၢကရိထီၣ် ပှၤအကရူၢ်တဖၣ် ဒ်သိး ကမၤသကီးတၢ်အဂီၢ်. ခရံာ်ဖိတဖၣ်စ့ၢ်ကီး ဒ်သိး အဝဲသ့ၣ် ကမၤလၢပှဲၤအမူဒါအဂီၢ် အဝဲသ့ၣ် ဘၣ်မၤသကီးတၢ် “ဃူဃူဖိးဖိး.” (စဖါနယၤ ၃:၉) တၢ်ကရၢကရိလၢ အမၤသကိးတၢ်ဃူဃူဖိးဖိး ဂ့ၤဂ့ၤဘၣ်ဘၣ် မ့ၢ်တအိၣ်ဘၣ်န့ၣ် ပှၤကစံၣ်တဲၤတဲလီၤ ပှၤလၢထံကီၢ်အါဘ့ၣ်, ပှၤကတိၤကျိာ်အကလုာ်ကလုာ် ဒီးပှၤအိၣ်ဒီး တၢ်ဆဲးတၢ်လၤ အကလုာ်ကလုာ်န့ၣ် ကဲထီၣ်အသး တသ့ဘၣ်.

ခရံာ်ဖိလၢအမ့ၢ်အတီတဖၣ်န့ၣ် ဘၣ်တၢ်ကရၢကရိထီၣ်အဝဲသ့ၣ် ဒ်သိးကမၤစၢၤလိာ်အသး ဒီးဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ. ပှၤထီၣ်ကစၢၢ်ဖိတဂၤန့ၣ် အလဲၤထီၣ်ဝဲ ကစၢၢ်ဖဲအအဲၣ်ဒီး ထီၣ်ဝဲအလီၢ်န့ၣ် အထီၣ်ဝဲသ့. ဒီးအမ့ၢ်တကနၣ်ဃုာ် ပှၤထီၣ်ကစၢၢ်ဖိအဂၤလၢ အတၢ်လဲၤခီဖျိ တအိၣ်ဘၣ်နာ်က့သ့ဝဲ. ဘၣ်ဆၣ် ဖဲအဝဲထီၣ်ကစၢၢ်အခါ တၢ်မ့ၢ်ကဲထီၣ်အသးဒီးအီၤ တမံၤမံၤ ဒီးအမ့ၢ်ထံၣ်ဘၣ် တၢ်ကီတၢ်ခဲ ဒီးပှၤမၤစၢၤအီၤ မ့ၢ်တအိၣ်နီတဂၤဘၣ်န့ၣ် တၢ်လီၤဘၣ်ယိၣ် ကအိၣ်လၢအဂီၢ်ဖးဒိၣ်. အဃိ ပှၤလၢအအိၣ်လၢ အကျိာ်အကျာ် ထဲတဂၤန့ၣ် အတမ့ၢ်ပှၤလၢ အအိၣ်ဒီးတၢ်ကူၣ်သ့ဘၣ်. (ကတိၤဒိ ၁၈:၁) ခရံာ်ဖိတဖၣ်န့ၣ် ကဘၣ်မၤပိာ်ထွဲဝဲ ယ့ၣ်ၡူးအတၢ်မၤလိာ် လၢအမ့ၢ် ကဘၣ်မၤစၢၤလိာ်သး တဂၤဒီးတဂၤ. (မးသဲ ၂၈:၁၉, ၂၀) ဒ်သိး ခရံာ်ဖိတဖၣ် ဆဲးလဲၤတၢ်ကကဲ ဒီးတဟ့ၣ်အၡူတဂ့ၤအဂီၢ် တၢ်အိၣ်ဖှိၣ်န့ၣ် သိၣ်လိပှၤ ဒီးဟ့ၣ်ဂံၢ်ဟ့ၣ်ဘါပှၤလၢ လံာ်စီဆှံအပူၤ. ဒ်သိး ပကဒိးန့ၢ်ဘၣ် တၢ်ဟံးစုနဲၣ်ကျဲ ဒီးဘူၣ်ထီၣ်ဘါထီၣ်ဘၣ် ကစၢ်ယွၤအဂီၢ် ခရံာ်ဖိတၢ်အိၣ်ဖှိၣ်လၢ ပှၤကရၢကရိပာ်အီၤဂ့ၤဂ့ၤ မ့ၢ်တအိၣ်ဘၣ်န့ၣ် ပကဒိးန့ၢ်ဘၣ် ယဟိဝၤယွၤ အတၢ်ဟံးစုနဲၣ်ကျဲဖဲလဲၣ်.—ဧ့ၤဘြံၤ ၁၀:၂၄, ၂၅.

ခရံာ်ဖိလၢအမ့ၢ်အတီတဖၣ်န့ၣ် ပှၤကရၢကရိထီၣ်အဝဲသ့ၣ် ဒ်သိး ကဘူၣ်ထီၣ်ဘါထီၣ် ကစၢ်ယွၤ ဃူဃူဖိးဖိး. ယ့ၣ်ၡူးအသိတဖၣ်န့ၣ် ဒိကနၣ်ယ့ၣ်ၡူး အကလုၢ် အဃိ အဝဲသ့ၣ်အိၣ်လၢ ယ့ၣ်ၡူး အတၢ်တီခိၣ်ရိၤမဲ အဖီလာ်ဒ် “သိတဖုဃီ” အသိး. (ယိၤဟၣ် ၁၀:၁၆) အဝဲသ့ၣ်န့ၣ် တအိၣ်လီၤဆီလိာ်အသးလၢ သရိာ်လၢအံၤတဖျၢၣ် လၢန့ၣ်တဖျၢၣ် ဒီးကရူၢ်လၢအံၤတကရူၢ် လၢန့ၣ်တကရူၢ်ဘၣ်. ဒီးအဝဲသ့ၣ်တသိၣ်လိတၢ် တဂၤတမံၤတဂၤတမၠိဘၣ်. အဝဲသ့ၣ်ခဲလၢာ်န့ၣ် “တဲတၢ်တမံၤဃီ.” (၁ ကရံၣ်သူး ၁:၁၀) ဒ်သိး ပှၤမၤသကိးတၢ် ဃူဃူဖိးဖိး ကသ့အဂီၢ် ပှၤကဘၣ်မၤတၢ်ဒ် တၢ်ရဲၣ်တၢ်ကျဲၤ အိၣ်ဝဲအသိး. ဒီးဒ်သိး ပှၤကရဲၣ်လီၤကျဲၤလီၤတၢ်အဂီၢ်န့ၣ် တၢ်ကရၢကရိ ကဘၣ်အိၣ်ဝဲ. ပမ့ၢ်အိၣ်ဃူဃူဖိးဖိးမၣ် ကစၢ်ယွၤ ကဆိၣ်ဂ့ၤပှၤ.—စံးထီၣ်ပတြၢၤ ၁၃၃:၁, ၃.

ပှၤလၢအအဲၣ် ကစၢ်ယွၤ ဒီးလံာ်စီဆှံ တၢ်မ့ၢ်တၢ်တီတဖၣ်န့ၣ် ဟဲနုာ်လီၤလၢ တၢ်ကရၢကရိလၢ အဘၣ်လိာ်သးဒီး တၢ်ဂ့ၢ်လၢ ပပာ်ဖျါထီၣ်တ့ၢ်အီၤတဖၣ် ဒီးတၢ်ကရၢကရိတခါအံၤန့ၣ် မၤထွဲဝဲ တၢ်ဟံးစုနဲၣ်ကျဲ လၢအဂၤတဖၣ်စ့ၢ်ကီး. ယဟိဝၤပှၤအုၣ်အသး လၢဟီၣ်ခိၣ်ဒီဘ့ၣ်န့ၣ် အဝဲသ့ၣ် မၤသကိး ကစၢ်ယွၤအတၢ်မၤလၢ တၢ်ကရၢကရိတခါအပူၤ ဒီးမၤသကိးတၢ်ဃူဃူဖိးဖိး ဒ်နီၢ်ခိက့ၢ်ဂီၤတဖၣ်အသိး. အဝဲသ့ၣ် နာ်ဝဲကစၢ်ယွၤ အတၢ်အၢၣ်လီၤ လၢအမ့ၢ် “ယကအိၣ်လၢ အဝဲသ့ၣ်အကျါ ဒီးလဲၤတၢ်လၢ အဝဲသ့ၣ်အကျါလီၤ. ယကကဲ အဝဲသ့ၣ်အကစၢ်ယွၤ ဒီးအဝဲသ့ၣ်ကကဲ ယပှၤဂီၢ်မုၢ်လီၤ.” (၂ ကရံၣ်သူး ၆:၁၆) နမ့ၢ်အိၣ်လၢ ယဟိဝၤယွၤ အတၢ်ကရၢကရိပူၤ ဒီးဘူၣ်ထီၣ်ဘါထီၣ်အီၤန့ၣ် နကဒိးန့ၢ်ဘၣ် တၢ်ဆိၣ်ဂ့ၤတခါအံၤစ့ၢ်ကီး.

လါမၢ်ၡး ၁၃-၁၉

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ကွဲးနီၣ်တၢ် ၂၇-၂၉

“ပါတဂၤ အတၢ်ဟ့ၣ်ကူၣ်လၢ အဖိခွါအဂီၢ်”

တၢး၀၅ ၂/၁၅ ၁၉ ¶၉

ပၢၤဃာ်ခရံာ်ဖိ အတၢ်မံၤဂ့ၤသၣ်ဂ့ၤ

^၉ ဂုာ်ကျဲးစၢးဒ်သိး နကနာ် လံာ်စီဆှံတၢ်မ့ၢ်တၢ်တီ လၢနနီၢ်ကစၢ်. ပနာ်လၢပကဲ ကစၢ်ယွၤအခ့အပှၤ ဘၣ်ဆၣ် ပတၢ်နာ်တခါအံၤ မ့ၢ်တသန့ၤထီၣ်သးလၢ လံာ်စီဆှံဘၣ်န့ၣ် ပတၢ်နာ် စှၤလီၤကွံာ် ကယီကယီသ့. (ဖံလံးပံၤ ၁:၉, ၁၀) ခရံာ်ဖိကိးဂၤဒဲး လၢအမ့ၢ် ပှၤသးစၢ်မ့ၢ်ဂ့ၤ ပှၤသးပှၢ်မ့ၢ်ဂ့ၤ ကဘၣ်သ့ၣ်ညါဝဲ လီၤတံၢ်လီၤဆဲးလၢ တၢ်လၢအနာ်ဝဲန့ၣ် မ့ၢ်ဝဲ တၢ်မ့ၢ်တၢ်တီ လၢလံာ်စီဆှံပူၤ. စီၤပီလူး ဟ့ၣ်ဂံၢ်ဟ့ၣ်ဘါဝဲ ခရံာ်ဖိတဖၣ်လၢ “တၢ်တမံၤဂ့ၤ တမံၤဂ့ၤ မ့ၢ်အဘၣ်ဧါ တဘၣ်ဧါန့ၣ် ဃုသ့ၣ်ညါအီၤ လီၤတံၢ်လီၤဆဲးတက့ၢ်.” (၁ သ့းစၤလနံ ၅:၂၁) ခရံာ်ဖိသးစၢ်လၢ အအိၣ်လၢ ဟံၣ်ဖိဃီဖိလၢ အဘူၣ်ထီၣ်ဘါထီၣ် ကစၢ်ယွၤအကျါန့ၣ် တဘၣ်မ့ၢ်လၢ အမိအပါ နာ်ကစၢ်ယွၤအဃိ အဝဲသ့ၣ် နာ်ကစၢ်ယွၤန့ၣ်ဘၣ်. စီၤဒၤဝံး ဟ့ၣ်ဂံၢ်ဟ့ၣ်ဘါ အဖိခွါ စီၤၡလိၤမိၤလၢ “နကဘၣ် သ့ၣ်ညါနၢ်ပၢၢ်ထီၣ် နပၢ်အကစၢ်ယွၤ တဂၤအံၤ ဒီးမၤအတၢ်မၤလၢ နသးဒီဖျၢၣ်.” (၁ ကွဲးနီၣ်တၢ် ၂၈:၉) ထဲဒၣ် စီၤၡလိၤမိၤ ကွၢ်ဝဲအပါ မၤဂၢၢ်ကျၢၤထီၣ် အတၢ်နာ် လၢယဟိဝၤယွၤ အဖီခိၣ်န့ၣ် တလၢပှဲၤဒံးဘၣ်. စီၤၡလိၤမိၤ ကဘၣ်ဃုသ့ၣ်ညါ ယဟိဝၤယွၤ လၢအနီၢ်ကစၢ် ဒီးအမၤဝဲဒ်န့ၣ်လီၤ. အဃိအဃ့ ကစၢ်ယွၤလၢ “ဟ့ၣ်ယၤ တၢ်ကူၣ်သ့ ဒီးတၢ်သ့ၣ်ညါနၢ်ပၢၢ် ဒ်သိး ယကတီခိၣ်ရိၤမဲ နပှၤဂီၢ်မုၢ်အံၤ အဂီၢ်တက့ၢ်.”—၂ ကွဲးနီၣ်တၢ် ၁:၁၀.

တၢး၁၂ ၄/၁၅ ၁၆ ¶၁၃

ဘူၣ်ထီၣ်ဘါထီၣ် ယဟိဝၤယွၤလၢ နသးဒီဖျၢၣ်

^၁၃ ပမ့ၢ်ထီၣ်တၢ်အိၣ်ဖှိၣ် ဒီးပၣ်ဃုာ်လၢ တၢ်စံၣ်တဲၤတဲလီၤတၢ်မၤ ထီဘိန့ၣ် မ့ၢ်တၢ်လၢ အလီၤပတြၢၤဒိၣ်မး. ဘၣ်ဆၣ် ပမ့ၢ်အဲၣ်ဒိး ဘူၣ်ထီၣ်ဘါထီၣ် ကစၢ်ယွၤ လၢပသးဒီဖျၢၣ်န့ၣ် ပကဘၣ်မၤ အါန့ၢ်အန့ၣ်ဒံး. (၂ ကွဲး ၂၅:၁, ၂, ၂၇) ခရံာ်ဖိတဂၤ မ့ၢ်အဲၣ်ဒံးဝဲ “တၢ်လၢအပာ်တ့ၢ်ဝဲတဖၣ်” လၢအမ့ၢ်ဝဲ တၢ်အိၣ်မူဒ် ပှၤတၢ်ချၢအသိးန့ၣ် တၢ်လီၤဘၣ်ယိၣ်အိၣ်လၢ အတၢ်ရ့လိာ်သးဒီး ကစၢ်ယွၤန့ၣ် ကဟးဂီၤကွံာ်ဝဲ. (လူၤကၣ် ၁၇:၃၂) ပမ့ၢ် “သးဟ့တၢ်အၢ ဒီးဟံးဃာ်တၢ်ဂ့ၤ” သပှၢ်တၢၢ်မၣ် ပက “ကြၢးဒီး ကစၢ်ယွၤ အဘီအမုၢ်.” (ရိ ၁၂:၉; လူၤ ၉:၆၂) တၢ်လၢအအိၣ်လၢ ဟီၣ်ခိၣ်လၢ မုၣ်ကီၤလံၢ် ပၢဝဲတဘ့ၣ်အံၤအပူၤန့ၣ် မ့ၢ်ကဲဘျုး ဒီးမ့ၢ်ဂ့ၤထဲလဲၣ်ဂ့ၤ ထဲလဲၣ်ဂ့ၤ ပတကြၢးပျဲလၢ တၢ်သ့ၣ်တဖၣ်အံၤ ကမၤတံာ်တာ်ပှၤလၢ ပကသးစၢၢ်ဆၢ ကစၢ်ယွၤအဘီမုၢ်လၢ ပသးဒီဖျၢၣ်န့ၣ်ဘၣ်.—၂ ကရံၣ် ၁၁:၁၄; ဖး ဖံလံးပံၤ ၃:၁၃, ၁၄.

တၢး၁၇.၀၉ ၃၂ ¶၂၀-၂၁

“ပာ်ဆူၣ်နသး ဒီးတံးတဟီၣ်တက့ၢ်. ဒီးမၤတၢ်တက့ၢ်”

^၂၀ စီၤဒၤဝံးဒုးသ့ၣ်နီၣ်ထီၣ် စီၤပၤၡလိၤမိၤလၢ ယဟိဝၤယွၤကအိၣ်ဒီးအီၤတုၤလၢ အဝဲသူၣ်ထီၣ်တၢ်လုၢ်ဟံၣ်ဝံၤတစုလီၤ. (၁ ကွဲးနီၣ်တၢ် ၂၈:၂၀) စီၤၡလိၤမိၤ ကဆိကမိၣ်ထံဝဲ အပၢ်အတၢ်ကတိၤလီၤ. စီၤၡလိၤမိၤအသးစၢ် ဒီးအတၢ်လဲၤခီဖျိစှၤ သနာ်က့အဂုာ်ကျဲးစၢးမၤလၢပှဲၤအမူဒါလီၤ. အဝဲပာ်ဖျါထီၣ် အတၢ်သူၣ်ဒူသးဒူ ဒီးလၢယဟိဝၤယွၤအတၢ်မၤစၢၤအဃိ အဝဲသူၣ်ထီၣ်တၢ်လုၢ်ဟံၣ်လၢ အလီၤဘီလီၤမုၢ်အံၤ ဝံၤဝဲဖဲ ၇ နံၣ်တခီ အတီၢ်ပူၤ.

^၂၁ ဒ်ယဟိဝၤယွၤ မၤစၢၤစီၤၡလိၤမိၤအသိး အဝဲကမၤစၢၤစ့ၢ်ကီးပှၤ ဒ်သိးပကအိၣ်ဒီး တၢ်သူၣ်ဒူသးဒူ ဒီးမၤဝံၤပမူဒါလၢ ပဟံၣ်ဖိဃီဖိ ဒီးတၢ်အိၣ်ဖှိၣ်အပူၤအဂီၢ်လီၤ. (ယၡါယၤ ၄၁:၁၀, ၁၃) ပမ့ၢ်မၤယဟိဝၤယွၤအတၢ်မၤလၢ တၢ်သူၣ်ဒူသးဒူအပူၤန့ၣ် ပနာ်သ့သပှၢ်ကတၢၢ်လၢ အဝဲကဆိၣ်ဂ့ၤပှၤ ခဲအံၤဒီးခါဆူညါစ့ၢ်ကီး. အဃိ “ပာ်ဆူၣ်နသး ဒီးတံးတဟီၣ်တက့ၢ်. ဒီးမၤတၢ်တက့ၢ်.”

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၇.၀၃ ၂၉ ¶၆-၇

ပတၢ်ရ့လိာ်သး မ့ၢ်ကဘၣ်ဒိသနာ်က့ ဆဲးကဲသကီးလၢအဂ့ၤ

ဖဲစီၤဒၤဝံး ထံၣ်ဘၣ်တၢ်ကီတၢ်ခဲအခါ ပှၤလၢအတီဒီးအီၤန့ၣ် အိၣ်ဒံး. လၢအဝဲသ့ၣ်အကျါတဂၤန့ၣ် အကဲဝဲ စီၤဃူၡဲၤ. ဒီးလံာ်စီဆှံ တဲဝဲလၢအကဲ “စီၤဒၤဝံး အသကိး.” (၂ ၡမူၤအ့လး ၁၆:၁၆; ၁ ကွဲးနီၣ်တၢ် ၂၇:၃၃) လီၤဂာ်လၢ လၢညါန့ၣ် စီၤဃူၡဲၤ မၤတၢ်လၢနီပူၤ ဒီးအကဲဝဲ စီၤပၤအသကီး ဒီးတဘျီတခီၣ်န့ၣ် အဘၣ်မၤဝဲမူဒါလၢ ဘၣ်ဃးဒီး တၢ်ဂ့ၢ်ခူသူၣ်.

ဘၣ်တဘျီ ဖဲစီၤအးဘၡါလိၣ် ဂုာ်န့ၢ်နီအခါန့ၣ် ပှၤအံၣ်စရ့လးဖိတဖၣ် ပိာ်အခံဒီဒူၣ် ဘၣ်ဆၣ် စီၤဃူၡဲၤ တမၤဝဲဒ်န့ၣ်ဘၣ်. ဖဲစီၤဒၤဝံး ဃ့ၢ်ပူၤဖျဲးသးအခါန့ၣ် အဝဲလဲၤလၢ စီၤဒၤဝံးအအိၣ်. စီၤဒၤဝံးန့ၣ် အဖိခွါ ဒီးပှၤလၢအနာ်န့ၢ်ဝဲတနီၤ ထီဒါအီၤအဃိ အသးဘၣ်ဒိဒိၣ်မး. ဘၣ်ဆၣ် စီၤဃူၡဲၤ အိၣ်ဒီးတၢ်သးတီလၢအဖီခိၣ် ဒီးတၢ်လီၤဘၣ်ယိၣ်အိၣ်လၢ အသးသမူအဂီၢ်နာ်က့ အဝဲဟံန့ၢ်မူဒါလၢ ကလဲၤမၤဟးဂီၤကွံာ် ပှၤလၢအထီဒါတၢ်တဖၣ် အတၢ်ကူၣ်. စီၤဃူၡဲၤ မၤဝဲဒ်အံၤန့ၣ် တမ့ၢ်ထဲလၢ အအိၣ်ဒီးမူဒါအဃိဘၣ် အကဲဝဲသကီးလၢ အအိၣ်ဒီး တၢ်သးတီတဂၤအဃိ.—၂ ၡမူၤအ့လး ၁၅:၁၃-၁၇, ၃၂-၃၇; ၁၆:၁၅–၁၇:၁၆.

လါမၢ်ၡး ၂၀-၂၆

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၁-၄

“စီၤၡလိၤမိၤ အတၢ်ဆၢတဲာ် လၢတအိၣ်ဒီး တၢ်ကူၣ်သ့ဘၣ်”

it-1 ၁၇၄ ¶၅

သုးမုၢ်သံၣ်ဘိ

လၢအံၣ်စရ့လး အတၢ်ကွဲးနီၣ်ကွဲးဃါအပူၤန့ၣ် ပှၤကွဲးလီၤ စီၤၡလိၤမိၤ အတၢ်ပၢအဂ့ၢ်. ဖဲစီၤၡလိၤမိၤ ပၢတၢ်အခါ တၢ်မုာ်တၢ်ခုၣ်ဒိၣ်မး ဒီးအအိၣ်ဒီး ကသ့ၣ်တဖၣ် ဒီးလ့ၣ်ကဟၣ်တဖၣ်အါမး. (ကွၢ် လ့ၣ်ကဟၣ်) ဘၣ်သ့ၣ်သ့ၣ် အကသ့ၣ်အါတက့ၢ်န့ၣ် ပှၤလဲၤပှ့ၤန့ၢ်လၢ ကီၢ်အဲၤကူပတူးအပူၤ. အဃိ အဘၣ်တ့အါထီၣ်ဝဲ ဝ့ၢ်တဖၣ် လၢကပာ်ဝဲ သုးမုၢ်သံၣ်ဘိ အသီတဖၣ်အဂီၢ်. (၁ စီၤပၤ ၄:၂၆; ၉:၁၉; ၁၀:၂၆, ၂၉; ၂ ကွဲး ၁:၁၄-၁၇) ဘၣ်ဆၣ် ယဟိဝၤယွၤ တဆိၣ်ဂ့ၤ စီၤၡလိၤမိၤ အတၢ်မၤအံၤ နီတဘျီဘၣ်. ဖဲအသံဝံၤအလီၢ်ခံ အဘီအမုၢ်လီၤဖး ဒီးအံၣ်စရ့လး အသုးမုၢ်သံၣ်ဘိတဖၣ် လီၤပြံလီၤပြါဝဲ. လၢခံန့ၣ် ဝံယၡါယၤ ကွဲးဝဲလၢ “ပှၤလၢ အလဲၤလီၤဃု တၢ်မၤစၢၤလၢ ကီၢ်အဲၤကူပတူးအပူၤ, ပှၤလၢ အသန့ၤသးလၢ ကသ့ၣ်တဖၣ်, ပှၤလၢ အနာ်န့ၢ် လ့ၣ်ကဟၣ် ခီဖျိလၢ လ့ၣ်ကဟၣ်အိၣ်အါအဃိ ဒီးပှၤလၢ အနာ်န့ၢ် ကသ့ၣ်ဒုးသုး ခီဖျိလၢ ကသ့ၣ်ဒုးသုး အဂံၢ်ဘါဆူၣ်အဃိန့ၣ် ကဘၣ်ကီဘၣ်ခဲ သပှၢ်တၢၢ်လီၤ. အဝဲသ့ၣ်န့ၣ် တပာ်ဂံၢ်ပာ်ဘါ အံၣ်စရ့လး အကစၢ်ယွၤလၢ အစီဆှံတဂၤန့ၣ်ဘၣ် ဒီးအဝဲသ့ၣ် တဃု ယဟိဝၤယွၤဘၣ်.”—ယၡါယၤ ၃၁:၁.

it-1 ၄၂၇

လ့ၣ်ကဟၣ်

တချုးလၢ စီၤၡလိၤမိၤ အစိၤဒံးဘၣ်န့ၣ် လၢကီၢ်အံၣ်စရ့လးအပူၤန့ၣ် လ့ၣ်ကဟၣ်ဒုးသုး တအိၣ်ဝဲအါအါဂီၢ်ဂီၢ်ဘၣ်. လၢအပူၤကွံာ်န့ၣ် ကစၢ်ယွၤ မၤလိာ်တ့ၢ် စီၤပၤတဖၣ်လၢ အဝဲသ့ၣ် တဘၣ်ပာ်ဖှိၣ်ဝဲ ကသ့ၣ်တဖၣ် လၢပှၤကသန့ၤပှၤသးလၢ ကသ့ၣ်တဖၣ်အအိၣ် ဒ်သိး ပှၤကန့ၢ်ဘၣ် တၢ်ဒီသဒၢအဂီၢ်န့ၣ်ဘၣ်. ကသ့ၣ်တဖၣ်န့ၣ် ပှၤသူအီၤလၢ ပှၤကနီ လ့ၣ်ကဟၣ်တဖၣ်အဃိ ကသ့ၣ်မ့ၢ်တအိၣ်အါအါဘၣ်န့ၣ် ပှၤသူလ့ၣ်ကဟၣ်အါအါတသ့ဘၣ်. (၅ မိၤ ၁၇:၁၆) ဖဲစီၤၡမူၤအ့လး ဟ့ၣ်ပလီၢ်ဝဲ ပှၤဂီၢ်မုၢ်တဖၣ်လၢ စီၤပၤတဖၣ် ကတီၣ်ထီၣ် တၢ်ဝံတၢ်ယိး လၢအဝဲသ့ၣ်အဖီခိၣ်အခါန့ၣ် အတဲဝဲလၢ “အဝဲကမၢ သုဖိခွါတဖၣ် ကဲထီၣ် အလ့ၣ်ကဟၣ်သုး.” (၁ မူၤ ၈:၁၁) ဖဲစီၤအးဘၡါလိၣ် ဒီးစီၤအဒိနံၤယၤ ကူၣ်ထီၣ်ဝဲလၢ ကဟံန့ၢ် စီၤပၤအလီၢ်အခါ အဝဲသ့ၣ်အိၣ်ဒီးလ့ၣ်ကဟၣ် တဂၤတခိၣ် ဒီးမၢဝဲ ပှၤပိာ်ခွါအဂၤ ၅၀ ဃ့ၢ်လၢအဝဲသ့ၣ်မဲာ်ညါ. (၂ မူၤ ၁၅:၁; ၁ စီၤပၤ ၁:၅) ဖဲစီၤဒၤဝံး မၤနၢၤဝဲ စိဘၤဘီမုၢ်အစီၤပၤအခါ အဝဲပာ်မူတ့ၢ်ဝဲ ကသ့ၣ်အဒု ၁၀၀.—၂ မူၤ ၈:၃, ၄; ၁၀:၁၈.

စီၤၡလိၤမိၤ ပာ်ဖှိၣ်ထီၣ်ဝဲ လ့ၣ်ကဟၣ်သုးအခိၣ် ၁,၄၀၀ လၢအံၣ်စရ့လး အသုးမုၢ်အဂီၢ်. (၁ စီၤပၤ ၁၀:၂၆, ၂၉; ၂ ကွဲး ၁:၁၄, ၁၇) ဝ့ၢ်ယရူၤၡလ့ၣ် ဒီးဝ့ၢ်အဂၤတဖၣ်န့ၣ် ပှၤသ့ၣ်ညါအီၤလၢ အကဲဝဲ ပှၤဒီးကသ့ၣ်အဝ့ၢ်တဖၣ် ဒီးအအိၣ်ဒီး တၢ်သူၣ်ထီၣ်လီၤလီၤဆီဆီတဖၣ်လၢ ပှၤကကွၢ်ထွဲသုး အတၢ်ဖိတၢ်လံၤတဖၣ်အဂီၢ်.—၁ စီၤပၤ ၉:၁၉, ၂၂; ၂ ကွဲး ၈:၆, ၉; ၉:၂၅.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၀၅ ၁၂/၁ ၁၉ ¶၆

လံာ်စီဆှံ အတၢ်ပာ်ဖျါလၢလံာ် ၂ ကွဲးနီၣ်တၢ်အဂီၢ်

၁:၁၁, ၁၂. စီၤၡလိၤမိၤ ဃ့ယဟိဝၤယွၤ လၢတၢ်ကူၣ်သ့ ဒီးတၢ်သ့ၣ်ညါနၢ်ပၢၢ်. တၢ်လၢအဃ့ဝဲန့ၣ် ပာ်ဖျါထီၣ်ဝဲ တၢ်အိၣ်လၢအသးပူၤ. ပဝဲသ့ၣ်တဖၣ်စ့ၢ်ကီး တၢ်လၢပဃ့ ယဟိဝၤယွၤန့ၣ် အပာ်ဖျါထီၣ်ဝဲ တၢ်အိၣ်လၢပသးပူၤ. အဃိ ပအဲၣ်ဒိး ဆိကမိၣ်ထံက့ၤ တၢ်လၢပဃ့အီၤတဖၣ်.

လါမၢ်ၡး ၂၇–လါအ့ဖြ့ၣ် ၂

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၅-၇

“ယသးကအိၣ်ဝဲ စ့ၢ်ကီးဖဲန့ၣ် ထီဘိ”

တၢး၀၂ ၁၁/၁၅ ၅ ¶၁

ထီၣ်တၢ်အိၣ်ဖှိၣ်ထီဘိ

လၢခံ ဖဲစီၤဒၤဝံးထီၣ်စီၤပၤလၢ ဝ့ၢ်ယရူၤၡလ့ၣ်အခါ အသးဆူၣ်လၢ ကသူၣ်ထီၣ် ဟံၣ်တဖျၢၣ်လၢ ယဟိဝၤယွၤ အလၤကပီၤအဂီၢ်. နာ်က့ စီၤဒၤဝံး ကဲတ့ၢ် ပှၤသုးဖိအဃိ ယဟိဝၤယွၤတဲအီၤလၢ “နတဘၣ်တ့ထီၣ် ဟံၣ်တဖျၢၣ်လၢ ယမံၤအဂီၢ်ဘၣ်.” ဒီးယဟိဝၤယွၤတဲဝဲလၢ စီၤဒၤဝံးအဖိခွါ စီၤၡလိၤမိၤ ကတ့ထီၣ်ဝဲတၢ်လုၢ်ဟံၣ်. (၁ ကွဲးနီၣ်တၢ် ၂၂:၆-၁၀) စီၤၡလိၤမိၤ တ့ထီၣ်ဝဲ တၢ်လုၢ်ဟံၣ်န့ၣ် ယံာ်ဝဲ နွံနံၣ်တခီ. ဒီးဖဲ ချ.ခ.န ၁၀၂၆ န့ၣ်စီၤၡလိၤမိၤ ပာ်စီဆှံဝဲ တၢ်လုၢ်ဟံၣ်. ယဟိဝၤယွၤ ဘၣ်သူၣ်ဘၣ်သးဝဲ တၢ်လုၢ်ဟံၣ်အံၤ အဃိ တဲဝဲလၢ “တၢ်လုၢ်ဟံၣ်လၢ နတ့ထီၣ်အီၤ တဖျၢၣ်အံၤန့ၣ် ခီဖျိလၢ ယမံၤကအိၣ်ဝဲဖဲန့ၣ် ထီဘိအဃိ ယပာ်စီဆှံအီၤလံ. ဒီးယမဲာ်ချံ ဒီးယသးစ့ၢ်ကီး ကအိၣ်ဝဲ ဖဲန့ၣ်ထီဘိလီၤ.” (၁ စီၤပၤ ၉:၃) ပှၤအံၣ်စရ့လးဖိတဖၣ် မ့ၢ်အိၣ်ဒီး တၢ်သးတီထီဘိန့ၣ် ယဟိဝၤယွၤ ကဘၣ်သူၣ်ဘၣ်သးဝဲ တၢ်လုၢ်ဟံၣ်တဖျၢၣ်အံၤထီဘိ. ဘၣ်ဆၣ် အဝဲသ့ၣ် မ့ၢ်တမၤ တၢ်ဘၣ်ယဟိဝၤယွၤ အသးဘၣ်န့ၣ် ယဟိဝၤယွၤ တဘၣ်သူၣ်ဘၣ်သးဝဲ တၢ်လုၢ်ဟံၣ်တဖျၢၣ်အံၤလၢၤဘၣ် ဒီး ‘တၢ်လုၢ်ဟံၣ်တဖျၢၣ်အံၤ ကကဲထီၣ် တၢ်ဟးဂီၤအပူၣ်တဖၣ်.’—၁ စီၤပၤ ၉:၄-၉; ၂ ကွဲးနီၣ်တၢ် ၇:၁၆, ၁၉, ၂၀.

it-2 ၁၀၇၇-၁၀၇၈

တၢ်လုၢ်ဟံၣ်

တၢ်စံၣ်စိၤတဲစိၤ. ဖဲ ချ.ခ.န ၆၀၇ န့ၣ် ဘၤဘူၤလိၣ်အစီၤပၤ နဘူၤကးန့စၢ် ဟဲမၤဟးဂီၤကွံာ်ဝဲ တၢ်လုၢ်ဟံၣ်တဖျၢၣ်အံၤ. (၂ စီၤပၤ ၂၅:၉; ၂ ကွဲး ၃၆:၁၉; ယံး ၅၂:၁၃) ပှၤအံၣ်စရ့လးဖိတဖၣ် ဘူၣ်ထီၣ်ဘါထီၣ်ဝဲ ယွၤလၢအကမၣ်တဖၣ်အဃိ ကစၢ်ယွၤ ဟ့ၣ်အခွဲးလၢ ပှၤကလုာ်တဖၣ်ကဒုၣ်ဒွဲၣ်ဝဲ ပှၤယူဒၤဖိ ဒီးဝ့ၢ်ယရူၤၡလ့ၣ် ဒီးအဟ့ၣ်အခွဲးလၢ တဘျီတခီၣ် ပှၤကဟံန့ၢ် တၢ်လုၢ်ဟံၣ် အတၢ်လုၢ်ဒိၣ်ပှ့ၤဒိၣ်တဖၣ်. ဒီးတဘျီတခီၣ် တၢ်လုၢ်ဟံၣ် တဘၣ်တၢ်ကနၣ်ဃုာ်အီၤဘၣ်. ဖဲပှၤပာ်စီဆှံ တၢ်လုၢ်ဟံၣ်ဝံၤ ၃၃ နံၣ်အလီၢ်ခံ စီၤပၤၡလိၤမိၤအဖိခွါ စီၤပၤရဃၤဘၣ် အစိၤန့ၣ် ကီၢ်အဲၤကူပတူး အစီၤပၤၡံၡး လဲၤဟံန့ၢ်ဝဲ တၢ်လုၢ်ဟံၣ် အတၢ်ထူးတၢ်တီၤတဖၣ်. (ချ.ခ.န ၉၉၃) (၁ စီၤပၤ ၁၄:၂၅, ၂၆; ၂ ကွဲး ၁၂:၉) စီၤအၤစါ (ချ.ခ.န ၉၇၇-၉၃၇) န့ၣ် ပာ်ကဲဝဲ ယဟိဝၤယွၤအဟံၣ်. ဘၣ်ဆၣ် ဒ်သိးဒီး ကဒီသဒၢဝဲ ဝ့ၢ်ယရူၤၡလ့ၣ်အဂီၢ်န့ၣ် အဝဲဟံန့ၢ်ဝဲ စ့ဒီးထူ လၢတၢ်လုၢ်ဒိၣ်ပှ့ၤဒိၣ်အလီၢ် လၢတၢ်လုၢ်ဟံၣ်ပူၤ ဒီးဟ့ၣ်လီၤဝဲ ကီၢ်စူၤရံ အစီၤပၤဘ့ၣ်ဟဒး. ဒီးအဝဲမၢဝဲ စီၤပၤဘ့ၣ်ဟဒး မၤဟးဂီၤအတၢ်အၢၣ်လီၤ ဒီးအံၣ်စရ့လး အစီၤပၤဘါၡၤ.—၁ စီၤပၤ ၁၅:၁၈, ၁၉; ၂ ကွဲး ၁၅:၁၇, ၁၈.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၀ ၁၂/၁ ၁၁ ¶၇

အဝဲသ့ၣ်ညါ “တၢ်အိၣ်လၢ ပှၤသးပူၤ နီၢ်ကီၢ်ကီၢ်”

ပမ့ၢ်ဆိကမိၣ်ထံ ဘၣ်ဃးဒီး စီၤၡလိၤမိၤ အတၢ်ဃ့ဘါထုကဖၣ်န့ၣ် ပသးကမုာ်ထီၣ်ဒိၣ်မး. ပှၤဟီၣ်ခိၣ်ဖိတဖၣ်န့ၣ် တနၢ်ပၢၢ် ‘ပနီၢ်ကစၢ် အတၢ်နးတၢ်ဖှီၣ်’ ဒီး ‘တၢ်လၢ အမၤဘၣ်ဒိပသး’ လၢလၢပှဲၤပှဲၤဘၣ်. (ကတိၤဒိ ၁၄:၁၀) ဘၣ်ဆၣ် မ့မ့ၢ် ယဟိဝၤယွၤန့ၣ် နၢ်ပၢၢ်ပတၢ်တူၢ်ဘၣ်ဂ့ၤဂ့ၤ ဒီးအဝဲ သူၣ်အိၣ်သးအိၣ်ပှၤ. လံာ်စီဆှံ တဲဝဲလၢ “မ့ၢ်လၢ ကစၢ်ယွၤ သးအိၣ်သုအဃိ ပာ်ထီၣ် သုတၢ်ဘၣ်ယိၣ်ဘၣ်ဘှီခဲလၢာ်လၢ အအိၣ်တက့ၢ်.” (၁ ပ့းတရူး ၅:၇) အဃိ ပမ့ၢ် ဃ့ဘါထုကဖၣ် လၢယဟိဝၤယွၤအအိၣ် ဒီးတဲဘၣ်အီၤ ပတၢ်သူၣ်ကိၢ်သးဂီၤ ခဲလၢာ်န့ၣ် ပတၢ်သူၣ်ကိၢ်သးဂီၤ ကလီၤစှၤဝဲ.

တၢး၉၃ ၂/၁ ၃၁

ပှၤဖးလံာ်ဖိတဖၣ် အတၢ်သံကွၢ်

ခရံာ်ဖိတဂၤ အိၣ်မ့ၢ်တဆူၣ်ဘၣ် မ့တမ့ၢ် မ့ၢ်လဲၤလၢ တၢ်လီၢ်အယံၤ ဒီးအထီၣ် တၢ်သ့ၣ်နီၣ်ထီၣ်က့ၤအမူး မ့ၢ်တသ့ဘၣ်န့ၣ် အဝဲကြၢးမၤက့ၤဝဲလၢ လၢခံတလါဧါ.

ပှၤအံၣ်စရ့လးဖိ လၢညါတဖၣ် တနံၣ်ဘၣ်တနံၣ်န့ၣ် အဝဲသ့ၣ်ဘၣ်မၤဝဲ ဘူၣ်လဲၤကပာ်ဖဲ လါအဆိကတၢၢ်တလါ လၢအမ့ၢ် လါနံစၣ်ထီၣ် ၁၄ သီတသီ (မ့ၢ်စ့ၢ်ကီး လါအၤဘံာ်). ဖဲ ၄ မိၤၡ့ ၉:၁၀, ၁၁ န့ၣ်ပထံၣ်ဘၣ်တၢ်ဂ့ၢ် လီၤလီၤဆီဆီတခါ လၢအတဲဝဲ “တဲဘၣ် ပှၤအံၣ်စရ့လးဖိတဖၣ်လၢ ‘ပှၤလၢသုကျါ တဂၤဂၤ မ့ၢ်ဂ့ၤ, သုစၢၤသုသွဲၣ်လၢ ခါဆူညါမ့ၢ်ဂ့ၤ မ့ၢ်ကဲထီၣ်ပှၤလၢ အတကဆှီဘၣ် ခီဖျိလၢ အထိးဘၣ် ပှၤသံအစိၣ် မ့တမ့ၢ် အမ့ၢ်လဲၤတၢ်လၢ တၢ်လီၢ်ယံၤန့ၣ် အဝဲကဘၣ် မၤဒံး ဘူၣ်လဲၤကပာ်လၢ ယဟိဝၤယွၤ အဂီၢ်ဒံး. အဝဲသ့ၣ် ကဘၣ်ကတဲာ်ကတီၤဝဲ ဘူၣ်လဲၤကပာ် ဖဲလါခံလါတလါ [လါအါယၣ် မ့ၢ်စ့ၢ်ကီး လါစံာ်], လါထီၣ် ၁၄ သီတသီ, မုၢ်လီၤနုာ် အဆၢကတီၢ်. ဒီးအဝဲသ့ၣ် ကဘၣ်အီၣ်ဝဲ သိညၣ် ဃုာ်ဒီး ကိၣ်လၢအတပၣ်ဒီး ကိၣ်မံၣ်ဘၣ် ဒီးတၢ်ဒိးတၢ်လၣ် လၢအခၣ်.”

ဖဲအံၤန့ၣ် ပာ်ဖျါထီၣ်ဝဲ မုၢ်နံၤမုၢ်သီခံခါ လၢဘူၣ်လဲၤကပာ်အဂီၢ် (လါနံစၣ် ၁၄ မ့တမ့ၢ် လါစံာ် ၁၄) ဘၣ်ဆၣ် တအဲၣ်ဒိးတဲဝဲလၢ ပှၤအံၣ်စရ့လးဖိတဂၤဂ့ၤ တဂၤဂ့ၤ မ့တမ့ၢ် ဟံၣ်ဖိဃီဖိ တဒူၣ်ဂ့ၤတဒူၣ်ဂ့ၤ အဃုထၢဝဲ မုၢ်နံၤမုၢ်သီခံသီအံၤအကျါ တသီသ့ဝဲန့ၣ်ဘၣ်. ဘူၣ်လဲၤကပာ်လၢ လါခံလါတလါ လါထီၣ် ၁၄ သီန့ၣ် ပှၤတဘၣ်မၤဝဲ ကိးဂၤဒဲးဘၣ်. ထဲဒၣ်ပှၤအံၣ်စရ့လးဖိလၢ အတကဆှီဘၣ် မ့တမ့ၢ် အလဲၤလၢ တၢ်လီၢ်ဖးယံၤ ဖဲလါနံစၣ် ၁၄ သီအခါ အဂီၢ်.

တၢ်ကွဲးနီၣ် လၢဘၣ်ဃးဒီး ပှၤမၤဝဲဘူၣ်လၢ လါခံလါတလါ လါထီၣ် ၁၄ သီန့ၣ်အိၣ်ထဲတခါလီၤ. အကွဲးဝဲ ဘၣ်ဃးဒီး စီၤပၤဃံးစကံယၤ လၢအအိၣ်ဒီး တၢ်သးတီတဂၤ စးထီၣ်မၤက့ၤဝဲ ဘူၣ်ကိၣ်လၢအတပၣ်ဒီးကိၣ်မံၣ်ဘၣ်. ခီဖျိလၢ တၢ်အိၣ်သးအဃိ ကမၤဝဲဘူၣ်အံၤ ဖဲလါအဆိကတၢၢ်တလါန့ၣ် တသ့ဘၣ်. (ပှၤလုၢ်တၢ်ဒိၣ်တဖၣ် ကတဲာ်ကတီၤအသး တဝံၤဒံးဘၣ် ဒီးပှၤဂီၢ်မုၢ်တဖၣ် ဟဲပာ်ဖှိၣ်ထီၣ်အသး တတုၤခဲလၢာ်ဒံးဘၣ်) အဃိ အဝဲမၤက့ၤဝဲ ဘူၣ်အံၤလၢ လါခံလါတလါထီၣ် ၁၄ သီအနံၤ.—၂ ကွဲးနီၣ်တၢ် ၂၉:၁၇; ၃၀:၁-၅.

မ့တမ့ၢ်လၢ တၢ်အိၣ်သးအကီအခဲ ဖးဒိၣ်ဒ်န့ၣ်ဘၣ်န့ၣ် ပှၤယူဒၤဖိတဖၣ် မၤဝဲ ဘူၣ်လဲၤကပာ် ဖဲကစၢ်ယွၤ ပာ်ပနီၣ်န့ၢ် အဝဲသ့ၣ် အမုၢ်နံၤမုၢ်သီ. (၂ မိၤၡ့ ၁၂:၁၇-၂၀, ၄၁, ၄၂; ၃ မိၤၡ့ ၂၃:၅) ယ့ၣ်ၡူး ဒီးအပျဲၢ်အဘီၣ်တဖၣ်န့ၣ် မၤဝဲမူးပွဲ ဒ်စီၤမိၤၡ့ အတၢ်သိၣ်တၢ်သီ အိၣ်ဝဲအသိး. ဒီးအဝဲသ့ၣ် ထံၣ်ဝဲ မုၢ်နံၤမုၢ်သီအံၤ ဒ်တၢ်လၢအရ့ဒိၣ်. စီၤလူၤကၣ် ကွဲးဝဲလၢ “ဘူၣ်ကိၣ်လၢ အတပၣ်ဒီးကိၣ်မံၣ်ဘၣ်တသီ လၢပှၤကဘၣ်မၤသံဝဲ ဆၣ်ဖိကီၢ်ဖိလၢ ဘူၣ်လဲၤကပာ် အဂီၢ်န့ၣ် တုၤဃီၤဝဲလီၤ. အဃိ ယ့ၣ်ၡူးဆှၢလီၤ စီၤပ့းတရူး ဒီးစီၤယိၤဟၣ် ဒီးတဲဝဲလၢ “လဲၤကတဲာ်ကတီၤပာ်စၢၤ ဘူၣ်လဲၤကပာ်လၢ ပကအီၣ်တၢ်အဂီၢ်တက့ၢ်.”—လူၤကၣ် ၂၂:၇, ၈.

ဖဲန့ၣ်န့ၣ် ယ့ၣ်ၡူးစးထီၣ်မၤဝဲ မူးပွဲလၢ ပကဘၣ်မၤအီၤ ကီးနံၣ်ဒဲး လၢအဂၤတခါ. လၢခံန့ၣ် ခရံာ်ဖိတဖၣ် ကီးဝဲ မူးပွဲအံၤလၢ ကစၢ်အတၢ်အီၣ်လၢဟါအီၣ်. လၢခရံာ်ဖိတဖၣ်အဂီၢ်န့ၣ် မူးပွဲလၢ အရ့ဒိၣ်န့ၢ်ဒံး မူးပွဲအံၤန့ၣ် တအိၣ်ဘၣ်. ယဟိဝၤပှၤအုၣ်အသးတဖၣ်စ့ၢ်ကီး ထံၣ်ဝဲမူးပွဲအံၤ ဒ်မူးပွဲလၢ အရ့ဒိၣ်ကတၢၢ်တခါ လၢတနံၣ်ဘၣ်တနံၣ်အတီၢ်ပူၤ. ယ့ၣ်ၡူးတဲဝဲလၢ “ဆဲးမၤဒ်အံၤလၢ တၢ်သ့ၣ်နီၣ်ထီၣ်က့ၤယၤ အဂီၢ်” အဃိ ပမၤမူးပွဲတခါအံၤ. (လူၤကၣ် ၂၂:၁၉) တကးဒံးဘၣ် တချုးလၢ တၢ်သ့ၣ်နီၣ်ထီၣ်က့ၤအမူး ဘၣ်ဒံးဘၣ် အလါတဖၣ်န့ၣ် ယဟိဝၤပှၤအုၣ်အသးတဖၣ် ကဘၣ်ရဲၣ်ကျဲၤဆိပာ်စၢၤတၢ် မူာ်မူာ်နီၢ်နီၢ် ဒ်သိးဟဲထီၣ်ဝဲ မူးပွဲအံၤ ဖဲမုၢ်နံၤအဝဲန့ၣ် ကန့ၢ်အဂီၢ်. ဖဲ ၁၉၉၃ န့ၣ်ပှၤကမၤဝဲ ကစၢ်အတၢ်အီၣ်လၢဟါအီၣ် အမူးပွဲ ဖဲ လါအ့ဖြ့ၣ် ၆ သီ, မုၢ်ခံနံၤ ဟါခီ မုၢ်လီၤနုာ် အဆၢကတီၢ်.

ခီဖျိလၢ တၢ်အိၣ်သးအဖီခိၣ်အဃိ ခရံာ်ဖိတဂၤ အိၣ်မ့ၢ်တဆူၣ်ဘၣ် မ့တမ့ၢ် အမ့ၢ်ဘၣ်လဲၤလၢ တၢ်လီၢ်လၢအယံၤ ဒီးအထီၣ်ဝဲ မူးပွဲအံၤ မ့ၢ်တသ့ဘၣ်န့ၣ် ကဘၣ်မၤဝဲဒ်လဲၣ်.

ဖဲပှၤမၤမူးပွဲအံၤ ဒီးပှၤနီၤလီၤ ကိၣ်ဒီးစပံးထံအခါ ပှၤလၢကစၢ်ယွၤ ဒိးဖှူအီၤလၢ သးစီဆှံ ဒီးအကလဲၤထီၣ်ဘၣ်လၢ မူခိၣ်န့ၣ် အီၣ်ဝဲကိၣ်ဒီးစပံးထံ. (မးသဲ ၂၆:၂၆-၂၉; လူၤကၣ် ၂၂:၂၈-၃၀) ပှၤလၢအအီၣ်ကိၣ် ဒီးစပံးထံ ကီးနံၣ်ဒဲးတဂၤန့ၣ် လၢတၢ်တနံၣ်အံၤ အအိၣ်မ့ၢ်တဆူၣ်ဘၣ် မ့တမ့ၢ် အမ့ၢ်ထီၣ်တၢ်ဆါဟံၣ်န့ၣ် တၢ်အိၣ်ဖှိၣ်သးပှၢ်တဖၣ် ကရဲၣ်ကျဲၤဝဲလၢ တၢ်အိၣ်ဖှိၣ်သးပှၢ်တဂၤဂၤ ကလဲၤဆှၢန့ၢ်အီၤ ကိၣ်ဒီးစပံးထံ ဒီးကဖးဝဲ လံာ်စီဆှံအဆၢ လၢအဘၣ်ထွဲလိာ်သး ဝံၤဒီး ကဟ့ၣ်အီၤကိၣ်ဒီးစပံးထံ. ဖဲပှၤမၤ ကစၢ်အတၢ်အီၣ်လၢဟါအီၣ် အနံၤန့ၣ် ခရံာ်ဖိလၢ အဘၣ်တၢ်ဒိးဖှူအီၤတဂၤဂၤ အမ့ၢ်တအိၣ်လၢ တၢ်အိၣ်ဖှိၣ်ဘၣ် ဒီးအမ့ၢ်အိၣ်လၢ တၢ်လီၢ်အဂၤန့ၣ် အကဘၣ်ရဲၣ်ကျဲၤဝဲလၢ အကလဲၤထီၣ်ဝဲလၢ တၢ်အိၣ်ဖှိၣ်အဂၤတဖျၢၣ် လၢအအိၣ်ဖဲ တၢ်လီၢ်လၢ အလဲၤဝဲအလီၢ်.

လၢတၢ်အိၣ်သးအဖီခိၣ် ပှၤလၢအဘၣ်တၢ်ဒိးဖှူအီၤတဂၤ ထီၣ်ဝဲကစၢ်အတၢ်အီၣ်လၢဟါအီၣ် မ့ၢ်တသ့ နီတစဲးဘၣ်န့ၣ် ပှၤမၤကစၢ်အတၢ်အီၣ်လၢဟါအီၣ် မ့ၢ်ဝံၤ အသီ ၃၀ မၣ် အကဘၣ် မၤက့ၤဝဲ. (အဘၢၣ်စၢၤအိၣ်ဝဲတလါ) အဝဲကမၤဝဲဒ် တၢ်မၤလိာ်လၢ ၄ မိၤၡ့ ၉:၁၀, ၁၁ ဒီးတၢ်အဒိလၢ ၂ ကွဲးနီၣ်တၢ် ၃၀:၁-၃, ၁၅ အိၣ်ဝဲအသိး.

မ့မ့ၢ် ယ့ၣ်ၡူးအ “သိလၢအဂၤ” လၢအအိၣ်ဒီးတၢ်မုၢ်လၢ်လၢ ကအိၣ်မူဘၣ် လီၤထူလီၤယိာ်လၢ ဟီၣ်ခိၣ်ပၤရဒံစူးအပူၤန့ၣ် တဘၣ်အီၣ်ဝဲ ကိၣ်ဒီးစပံးထံဘၣ်. (ယိၤဟၣ် ၁၀:၁၆) အဝဲသ့ၣ် ကဘၣ်ထီၣ်ဝဲ ကစၢ်အတၢ်အီၣ်လၢဟါအီၣ်အံၤ ကိးနံၣ်ဒဲးန့ၣ် မ့ၢ်တၢ်လၢ အရ့ဒိၣ်ဒိၣ်မး. ဘၣ်ဆၣ် အဝဲသ့ၣ် တဘၣ်အီၣ်ဝဲ ကိၣ်ဒီးစပံးထံဘၣ်. ပှၤလၢအပၣ်ဃုာ်လၢ သိလၢအဂၤအကျါန့ၣ် ဖဲတၢ်တဟါန့ၣ် အအိၣ်မ့ၢ်တဆူၣ်ဘၣ် မ့တမ့ၢ် အမ့ၢ်လဲၤလၢ တၢ်လီၢ်လၢ တၢ်အိၣ်ဖှိၣ်တအိၣ်ဘၣ်အလီၢ်န့ၣ် အဝဲကဘၣ်ဖး လံာ်စီဆှံအဆၢလၢ အဘၣ်ထွဲလိာ်သး (ဖးစ့ၢ်ကီး တၢ်ဂ့ၢ်လၢဘၣ်ဃးဒီး ယ့ၣ်ၡူးစးထီၣ်မၤဝဲ ကစၢ်အတၢ်အီၣ်လၢဟါအီၣ်) ဒီးကဘၣ်ဃ့ထုကဖၣ်လၢ ယဟိဝၤယွၤ ကဆိၣ်ဂ့ၤဝဲ ပှၤမၤကစၢ်အတၢ်အီၣ်လၢဟါအီၣ် လၢဟီၣ်ခိၣ်ဒီဘ့ၣ်. မ့မ့ၢ်လၢ တၢ်အိၣ်သးတခါအံၤန့ၣ် ပှၤတလိၣ် မၤကဒီး ကစၢ်အတၢ်အီၣ်လၢဟါအီၣ် မ့တမ့ၢ် တၢ်တဲသကီး လံာ်စီဆှံ အတၢ်ရဲၣ်တၢ်ကျဲၤလၢ လၢခံတလါလၢၤဘၣ်.

လါအ့ဖြ့ၣ် ၁၀-၁၆

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၈-၉

“အဝဲပာ်လုၢ်ပာ်ပှ့ၤ တၢ်ကူၣ်သ့”

တၢး၉၉ ၁၁/၁ ၂၀ ¶၄

တၢ်သးအိၣ်ဟ့ၣ်တၢ် အါအါဂီၢ်ဂီၢ်

ၡဘၤဘီမုၢ် အနီၢ်ပၤမုၣ်န့ၣ် ဒ်သိး အကဟဲအိၣ်သကီး စီၤၡလိၤမိၤအဂီၢ် အဘၣ်ဟ့ၣ်လီၤဝဲ တၢ်ဆၢကတီၢ် ဒီးတၢ်ဂံၢ်တၢ်ဘါအါမး. လီၤဂာ်လၢ ၡဘၤန့ၣ် အအိၣ်လၢ ယံးမ့ၤ ရံၤဖၢဘျံး (Republic of Yemen) အပူၤ. အဃိ နီၢ်ပၤမုၣ်တဂၤအံၤ ဒီးအကီၤလၤအူးတဖၣ် ကဟဲလၢ ဝ့ၢ်ယရူၤၡလ့ၣ်အဂီၢ် အဘၣ်ဟဲဝဲ တၢ်ဒ့ၣ်စၢၤယံၤဝဲ အမံးလာ် ၁,၀၀၀ [၁,၆၀၀ ကံလိမံထၢၣ်]. ဘၣ်မနုၤအဃိ အဝဲဘၣ်တူၢ်ဆါအသး ထဲအံၤညါလဲၣ်. ယ့ၣ်ၡူးတဲဝဲလၢ အဝဲ “ဟဲလၢ တၢ်လီၢ်ဖးယံၤ ဒ်သိးအကနၢ်ဟူဘၣ် စီၤၡလိၤမိၤ အတၢ်ကူၣ်သ့အဂီၢ်.”—လူၤကၣ် ၁၁:၃၁.

တၢး၉၉ ၇/၁ ၃၀ ¶၄-၅

တၢ်လဲၤဟးအိၣ်သကီးလၢ အကဲဘျုးဒိၣ်မးတခါ

နီၢ်ပၤမုၣ်တဂၤအံၤ ဟဲတုၤလၢ ဝ့ၢ်ယရူၤၡလ့ၣ် “ဃုာ်ဒီး အခ့အပှၤအါဂၤ ဒီးကီၤလၤအူး လၢအတီၣ်ဝဲ သ့ၣ်စရံအထုး, ထူ ဒီးလၢၢ်လၢ အလုၢ်ဒိၣ်ပှ့ၤဒိၣ် အါအါဂီၢ်ဂီၢ်လီၤ.” (၁ စီၤပၤ ၁၀:၂) ပှၤတနီၤတဲဝဲလၢ လၢ “အခ့အပှၤ” တဖၣ်အကျါန့ၣ် ပၣ်ဃုာ်ဒီး ပှၤဖီၣ်တၢ်စုကဝဲၤ လၢကဒီသဒၢအီၤ. နီၢ်ပၤမုၣ်တဂၤအံၤ အစိကမီၤဒိၣ် ဒီးအဟဲစိာ်ဝဲ တၢ်လၢအလုၢ်ဒိၣ်ပှ့ၤဒိၣ်တဖၣ် ဒီးတၢ်လုၢ်ဒိၣ်ပှ့ၤဒိၣ်တဖၣ်အံၤန့ၣ် ကလီၤလၢဝဲ ဒီၤလၤ အကကွဲၢ်လၢအဆံညါ.

နီၢ်ပၤမုၣ်တဂၤအံၤ နၢ်ဟူဘၣ်ဝဲလၢ စီၤၡလိၤမိၤ အမံၤဟူသၣ်ဖျါ “လၢယဟိဝၤယွၤ အမံၤအဃိ.” ဒီး အဝဲဟဲလၢ စီၤၡလိၤမိၤအအိၣ်န့ၣ် တမ့ၢ်ထဲကဟဲမၤဝဲ စံပွါယ့ဘၣ်. အဟဲဝဲ ဒ်သိး ကနၢ်ဟူဘၣ် တၢ်ကူၣ်သ့လၢ စီၤၡလိၤမိၤကတဲဝဲ. ဒီးဘၣ်သ့ၣ်သ့ၣ် အကအဲၣ်ဒိး သ့ၣ်ညါအါထီၣ်ဝဲ ယဟိဝၤယွၤအဂ့ၢ်. လီၤဂာ်လၢ အဝဲဟဲလီၤစၢၤလီၤသွဲၣ်လၢ စီၤၡ့ၣ် မ့တမ့ၢ် စီၤဃၣ် လၢအဘူၣ်ထီၣ်ဘါထီၣ် ယဟိဝၤယွၤ. အဃိ ဘၣ်သ့ၣ်သ့ၣ် အဝဲ ကအဲၣ်ဒိးသ့ၣ်ညါဝဲ အမိၢ်ပၢ်ဖံဖု လၢပျၢၤတဖၣ် အတၢ်ဘူၣ်တၢ်ဘါအဂ့ၢ်.

တၢး၉၉ ၇/၁ ၃၀-၃၁

တၢ်လဲၤဟးအိၣ်သကီးလၢ အကဲဘျုးဒိၣ်မးတခါ

ၡဘၤအဘီမုၢ် အနီၢ်ပၤမုၣ် ထံၣ်ဘၣ်စီၤၡလိၤမိၤ အတၢ်ကူၣ်သ့ ဒီးအတၢ်ထူးတၢ်တီၤလၢ အဘီအမုၢ်အပူၤအဃိ “အသးလီၤကတုၤဝဲ တုၤလၢ အတဲတၢ်မး တထီၣ်လၢၤဘၣ်.” (၁ စီၤပၤ ၁၀:၄, ၅) လံာ်စီဆှံ အတၢ်ကတိၤတဖျၢၣ်အံၤန့ၣ် ပှၤတနီၤတဲဝဲလၢ အအဲၣ်ဒိးတဲဝဲ နီၢ်ပၤမုၣ်တဂၤအံၤ “ကသါတထီၣ်” လၢၤဘၣ်. မ့မ့ၢ် ပှၤကူၣ်ဘၣ်ကူၣ်သ့တဂၤ တဲဝဲလၢ နီၢ်ပၤမုၣ်တဂၤအံၤ သးပ့ၤနီၣ်ဘၣ်အသး. ဒ်လဲၣ်ဂ့ၤဒ်လဲၣ်ဂ့ၤ ပသ့ၣ်ညါဘၣ်လၢ နီၢ်ပၤမုၣ်တဂၤအံၤ ကမၢကမၣ် ခီဖျိလၢ တၢ်လၢအထံၣ်ဒီးနၢ်ဟူဝဲတဖၣ်အဃိ. အဝဲတဲဝဲလၢ စီၤပၤၡလိၤမိၤ အခ့အပှၤတဖၣ်န့ၣ်သးခု, မ့ၢ်လၢ အနၢ်ဟူဘၣ်ဝဲ စီၤၡလိၤမိၤ အတၢ်ကူၣ်သ့အဃိ. ဒီးအဝဲစံးထီၣ်ပတြၢၤ ယဟိဝၤယွၤ, မ့ၢ်လၢယဟိဝၤယွၤ ပာ်ထီၣ် စီၤၡလိၤမိၤလၢစီၤပၤအဃိ. ဒီးအဝဲဟ့ၣ်ဝဲ စီၤၡလိၤမိၤ တၢ်ဟ့ၣ်လၢ အလုၢ်ဒိၣ်ပှ့ၤဒိၣ်တဖၣ်. ဒီးထဲဒၣ်ထူလၢ အဟ့ၣ်ဝဲ စီၤၡလိၤမိၤန့ၣ် လီၤလၢဝဲ စ့ဒီၤလၤလၢပစိၤခဲအံၤ အကကွဲၢ်လွံၢ်ဆံ. စီၤၡလိၤမိၤနာ်က့ ဟ့ၣ်က့ၤဝဲ နီၢ်ပၤမုၣ်လၢ “ကယဲၢ်တၢ်လၢ နီၢ်ပၤမုၣ်လီကီဝဲဒီး ဃ့ဝဲတဖၣ်လီၤ.”—၁ စီၤပၤ ၁၀:၆-၁၃.

it-2 ၉၉၀-၉၉၁

စီၤၡလိၤမိၤ

နီၢ်ပၤမုၣ်တဂၤအံၤ ထံၣ်ဘၣ်ဝဲ တၢ်လုၢ်ဟံၣ် ဒီးစီၤၡလိၤမိၤအဟံၣ် ဒီးတၢ်အီၣ်တၢ်အီလၢ စီၢ်နီၤခိၣ်, ပှၤလၢအဟဲပာ်လီၤ တၢ်အီၣ်တၢ်အီတဖၣ် မၤတၢ်ဒ်လဲၣ် ဒီးအဝဲသ့ၣ် ကူတၢ်ကၤတၢ်ဒ်လဲၣ် ထဲန့ၣ်တကးဒံးဘၣ် အထံၣ်ဘၣ်ဝဲ တၢ်လုၢ်ဒွဲၣ်အူတဖၣ်လၢ စီၤၡလိၤမိၤ လုၢ်ထီၣ်လၢ တၢ်လုၢ်ဟံၣ်ထီဘိ. အဃိ “အသးလီၤကတုၤဝဲ တုၤလၢ အတဲတၢ်မး တထီၣ်လၢၤဘၣ်.” အဃိ အဝဲတဲဝဲလၢ “တၢ်လၢပှၤတဲယၤန့ၣ် အိၣ်ဒၣ်တစဲးဒံးလီၤ. နီၢ်ကီၢ်န့ၣ် နတၢ်ကူၣ်သ့ ဒီးနတၢ်ထူးတၢ်တီၤတဖၣ် အိၣ်အါန့ၢ်ဒံး တၢ်လၢပှၤတဲယၤ စၢၢ်တလၢၢ်လီၤ.” ဒီးအဝဲတဲဝဲလၢ စီၤပၤၡလိၤမိၤ အခ့အပှၤတဖၣ်န့ၣ်ကသးခု. တကးဒံးဘၣ် အဝဲစံးထီၣ်ပတြၢၤ ယဟိဝၤယွၤလၢ အပာ်ဖျါထီၣ် တၢ်အဲၣ်လၢ အံၣ်စရ့လးအဖီခိၣ် ခီဖျိ အပာ်ထီၣ်စီၤၡလိၤမိၤလၢစီၤပၤ ဒ်သိးအကစံၣ်ညီၣ်တၢ် တီတီလိၤလိၤ ဒီးပၢတၢ်လၢ တၢ်တီတၢ်လိၤအပူၤအဃိ.—၁ စီၤပၤ ၁၀:၄-၉; ၂ ကွဲး ၉:၃-၈.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-2 ၁၀၉၇

လီၢ်ပစိာ်

အံၣ်စရ့လး အစီၤပၤ အလီၢ်ပစိာ်လၢ ပှၤပာ်ဖျါထီၣ်အဂ့ၢ် လီၤတံၢ်လီၤဆဲးန့ၣ် အိၣ်ထဲဒၣ် လီၢ်ပစိာ်လၢ စီၤပၤၡလိၤမိၤ တ့ဝဲတဖျၢၣ်န့ၣ်လီၤ. (၁ စီၤပၤ ၁၀:၁၈-၂၀; ၂ ကွဲး ၉:၁၇-၁၉) လီၤဂာ်လၢ လီၢ်ပစိာ်တဖျၢၣ်အံၤ အိၣ်လၢ “လီၢ်ပစိာ် အဘျီၣ်ဒိၣ်” ပူၤ. ဒီးလီၢ်ပစိာ် အဘျီၣ်ဒိၣ်န့ၣ် အကဲဝဲ တၢ်သူၣ်ထီၣ်တဖျၢၣ်လၢ အအိၣ်လၢ ကစၢၢ်မိၤရံယၤ လၢဝ့ၢ်ယရူၤၡလ့ၣ်အပူၤ. (၁ စီၤပၤ ၇:၇) လီၢ်ပစိာ်တဖျၢၣ်အံၤ အကဲဝဲ ‘လီၢ်ပစိာ်ဖးဒိၣ်လၢ ကဆီမဲ’ ဒီးပှၤ ‘ကျးဝဲဒီး ထူလၢဘၣ်တၢ်ပှံၢ်စီအီၤ အိၣ်ဒီး တၢ်အခိၣ်ဒုးကဝီၤတခါ ဒီးလၢလီၢ်ဆ့ၣ်နီၤအလိၤန့ၣ် အိၣ်ဒီးတၢ်ပာ်လီၤစုအလီၢ်.’ စီၤပၤ အလီၢ်ဆ့ၣ်နီၤတဖျၢၣ်အံၤန့ၣ် ပှၤတ့အီၤလၢ ကဆီမဲ. ဘၣ်ဆၣ် ပမ့ၢ်ကွၢ် ပှၤတ့ထီၣ် တၢ်လုၢ်ဟံၣ် အကျိၤအကျဲန့ၣ် ပာ်ဖျါထီၣ်ဝဲလၢ လီၢ်ပစိာ်တဖျၢၣ်အံၤ ပှၤတ့အီၤလၢသ့ၣ် ဝံၤပှၤကျးလီၤထူစီလၢအလိၤ ဒီးမၤဃံမၤလၤထီၣ်အီၤလၢ ကဆီမဲလၢ ပှၤမၤသ့ၣ်ဖးအက့အခီ အါအါဂီၢ်ဂီၢ်. အဃိ ပှၤလၢအကွၢ် လီၢ်ပစိာ်န့ၣ် ကထံၣ်ဝဲလၢ လီၢ်ပစိာ်ဒီဖျၢၣ်န့ၣ် ပှၤတ့အီၤလၢ ထူဒီးကဆီမဲ. လံာ်စီဆှံ ပာ်ဖျါထီၣ်ဝဲ လီၢ်ပစိာ် အဃီသွါဃုသွါဝံၤ ဆဲးတဲဝဲလၢ “ဒီးခ့ယုၢ်အဂီၤခံဒု ဆၢထၢၣ်ဝဲဘူးဒီး တၢ်ပာ်လီၤစုအလီၢ် တကပၤတဒု တကပၤတဒုလီၤ. ခ့ယုၢ်အဂီၤ ၁၂ ဒု ဆၢထၢၣ်ဝဲလၢ ဃီသွါ ဃုသွါအလိၤ အဃိ လၢဃီသွါ တသွါစုာ်စုာ်အလိၤန့ၣ် ခ့ယုၢ်အိၣ်ဝဲခံဒု, တကပၤတဒု တကပၤတဒုလီၤ.” (၂ ကွဲးနီၣ်တၢ် ၉:၁၇-၁၉) ခ့ယုၢ်န့ၣ် အဲၣ်ဒိးဒိလီၤဝဲ တၢ်ခွဲးတၢ်ယာ်လၢ ပှၤကပၢတၢ်. (၁ မိၤ ၄၉:၉, ၁၀; လီၣ် ၅:၅) ခ့ယုၢ် ၁၂ ဒုန့ၣ်ဖျါလၢ အဘၣ်ထွဲလိာ်သးဒီး ပှၤအံၣ်စရ့လးဖိ ၁၂ ဒူၣ်. ဒီးလီၤဂာ်လၢ အဲၣ်ဒိးတဲဝဲ အဝဲသ့ၣ် ဒိးပၢအသး ဒီးဆီၣ်ထွဲဝဲ ပှၤပၢတၢ်လၢ လီၢ်ပစိာ်တဂၤအံၤ အဖီခိၣ်. ဒီးလီၢ်ပစိာ်အံၤ အိၣ်ဒီး ခီၣ်ယီၢ်လီၢ်ထူ လၢအဘုးတာ်လိာ်သး ဒီးလီၢ်ပစိာ်. လီၢ်ပစိာ်တဖျၢၣ်အံၤ အိၣ်ဝဲဒီး ကဆီမဲ, ထူ ဒီးအအိၣ်လၢ အခိၣ်ဒုးဖးထီအဖီလာ် ဒီးခ့ယုၢ်တဖၣ် အိၣ်ဝဲလၢ အမဲာ်ညါ အဃိ လီၢ်ပစိာ်အဂၤလၢ စိၤဖဲန့ၣ် လၢအဒ်သိးဒီး လီၢ်ပစိာ်တဖျၢၣ်အံၤန့ၣ် တအိၣ်ဝဲ နီတဖျၢၣ်ဘၣ်. တကးဒံးဘၣ် ပမ့ၢ်ကွၢ် တၢ်လၢပှၤဃုသ့ၣ်ညါတၢ်ဖိတဖၣ် ဃုထံၣ်န့ၢ်ဝဲ, တၢ်ဂီၤလၢ တၢ်သ့ၣ်နီၣ်ထီၣ်က့ၤ အလၢၢ်ထူၣ်တဖၣ်အလိၤ ဒီးလၢလံာ်စီဆှံပူၤန့ၣ် လီၢ်ပစိာ်အဂၤလၢ အဒ်သိးဒီးစီၤၡလိၤမိၤ အလီၢ်ပစိာ်န့ၣ် တအိၣ်နီတဖျၢၣ်ဘၣ်. ပှၤကွဲး လံာ်ကွဲးနီၣ်တၢ်တဂၤ ကွဲးဝဲလၢ “ဘီမုၢ်လၢအဂၤလၢ အတ့ထီၣ်တၢ်ဒ်အံၤန့ၣ် တအိၣ်နီတခါဘၣ်.”—၂ ကွဲး ၉:၁၉.

လါအ့ဖြ့ၣ် ၁၇-၂၃

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၁၀-၁၂

“ဒိကနၣ် တၢ်ဟ့ၣ်ကူၣ်လၢအဂ့ၤ”

တၢး၁၈.၀၆ ၃၀ ¶၃

အဝဲတန့ၢ်ဘၣ် ယွၤအတၢ်ဘၣ်သးလၢၤဘၣ်

စီၤရဃၤဘၣ် ကဘၣ်ဆၢတဲာ်တၢ်န့ၣ် ကီဒိၣ်မးလီၤ. အဝဲမ့ၢ်မၤဝဲဒ် ပှၤဂီၢ်မုၢ်တဖၣ်ဃ့ထီၣ်ဝဲအသိးန့ၣ် အဝဲဒီးအဟံၣ်ဖိဃီဖိတဖၣ် တအိၣ်ဘၣ် ဘီၣ်ဘီၣ်ညီညီဒ် အအိၣ်ညီနုၢ်ဝဲအသိးဘၣ်. ဘၣ်ဆၣ် အဝဲမ့ၢ်ဂ့ၢ်လိာ်ဝဲ ပှၤဂီၢ်မုၢ်တဖၣ်အတၢ်ဃ့န့ၣ် ဘၣ်သ့ၣ်သ့ၣ်အဝဲသ့ၣ် ကပူထီၣ်ထီဒါအီၤ. အဝဲမၤဝဲဒ်လဲၣ်. အဆိကတၢၢ်န့ၣ် အဝဲဃ့တၢ်ဟ့ၣ်ကူၣ်လၢ အပၢ်အပှၤဟ့ၣ်ကူၣ်တၢ်လၢ အသးပှၢ်တဖၣ်အအိၣ်. အဝဲသ့ၣ်တဲဘၣ်အီၤလၢ ဒိကနၣ်ပှၤဂီၢ်မုၢ်တဖၣ် အတၢ်ဃ့တက့ၢ်. ဘၣ်ဆၣ်လၢခံ အဝဲလဲၤဃ့တၢ်ဟ့ၣ်ကူၣ်လၢ အသကိးလၢအသးနံၣ် ထဲသိးဒီးအီၤတဖၣ်အအိၣ် ဒီးဆၢတဲာ်ဝဲလၢ ကမၤဝဲပှၤဂီၢ်မုၢ်တဖၣ် ဆူၣ်ဆူၣ်ကိၤကိၤ. စီၤရဃၤဘၣ် တဲဘၣ်ပှၤဂီၢ်မုၢ်တဖၣ်လၢ “ယပၢ်ပာ်လီၤတၢ်ဝံတၢ်ယိး အဃၢတဖၣ်လၢသုဖီခိၣ်လီၤ. ယကမၤဃၢဒိၣ်ထီၣ် ဒၣ်လဲာ်အီၤန့ၣ်လီၤ. အဝဲဖျ့သုလၢနီၣ်ဖျ့တဖၣ် ယဲ, ယကတီၢ်သုလၢ နီၢ်တီၢ်တဖၣ်လၢ ပှၤတီၢ်ဂီၤဖံးတဖၣ်န့ၣ်လီၤ.”—၂ ကွဲးနီၣ်တၢ် ၁၀:၆-၁၄, ခ့ခါစှၤကျိာ်.

တၢး၀၁ ၉/၁ ၂၈-၂၉

နဆၢတဲာ်တၢ် ကဘၣ်အဂီၢ် နကဘၣ်မၤဒ်လဲၣ်

လၢတၢ်အိၣ်ဖှိၣ်ပူၤန့ၣ် ယဟိဝၤယွၤ ကတဲာ်ကတီၤန့ၢ်ပှၤ ဒီပုၢ်ဝဲၢ်လၢအဒိၣ်တုာ်ခိၣ်ပှဲၤတဖၣ် လၢပကတဲသကိးတၢ်ဒီး အဝဲသ့ၣ် ဖဲပကဘၣ် ဆၢတဲာ်တၢ်အခါ. (အ့းဖ့းစူး ၄:၁၁, ၁၂) ပှၤတနီၤန့ၣ် ဟးတဲသကိးတၢ်ဒီး ပှၤတဂၤဝံၤတဂၤ တုၤလၢ အထံၣ်ဒီး ပှၤလၢအတဲအီၤ တၢ်လၢအအဲၣ်ဒိးနၢ်ဟူဝဲဝံၤမၣ် အဝဲဆၢတဲာ်တၢ် ဒ်ပှၤတဂၤန့ၣ် ဟ့ၣ်ကူၣ်အီၤအသိး. ဘၣ်ဆၣ် ပတကြၢးမၤဒ်န့ၣ်ဘၣ်. အဃိ ပကဘၣ်သ့ၣ်နီၣ်ထီၣ်က့ၤ စီၤရဃၤဘၣ် အဒိအတဲာ်. ဖဲအဝဲဘၣ်ဆၢတဲာ်တၢ်လၢ အရ့ဒိၣ်ဒိၣ်မးအခါ အဝဲ န့ၢ်ဘၣ်တၢ်ဟ့ၣ်ကူၣ်လၢ အပါအခ့အပှၤလၢ အသးပှၢ်တဖၣ်အအိၣ်. ဘၣ်ဆၣ် စီၤရဃၤဘၣ် တတူၢ်လိာ်ဝဲ ပှၤသးပှၢ်တဖၣ် အတၢ်ဟ့ၣ်ကူၣ်ဘၣ်. အဝဲ တဲသကီးတၢ်ဒီး ပှၤလၢအဒိၣ်ထီၣ်ဒီးအီၤ တပူၤဃီ ဒီးမၤထွဲ အဝဲသ့ၣ် အတၢ်ဟ့ၣ်ကူၣ်. အတၢ်ဆၢတဲာ်န့ၣ် ကမၣ်ဝဲဖးဒိၣ်အဃိ အဝဲဘၣ်တူၢ်ၡူကွံာ် တၢ်လီၢ်ဖးလဲၢ် လၢအဘီအမုၢ်ပူၤ.—၁ စီၤပၤ ၁၂:၁-၁၇.

ပကဘၣ်ဃ့ တၢ်ဟ့ၣ်ကူၣ်လၢ ပှၤလၢအအိၣ်ဒီး တၢ်လဲၤခီဖျိ, အသ့ၣ်ညါ လံာ်စီဆှံဂ့ၤဂ့ၤ ဒီးအပာ်လုၢ်ပာ်ပှ့ၤဝဲ တၢ်ဟံးစုနဲၣ်ကျဲလၢအဘၣ်. (ကတိၤဒိ ၁:၅; ၁၁:၁၄; ၁၃:၂၀) မ့ၢ်သ့န့ၣ် ဟံန့ၢ်တၢ်ဆၢကတီၢ် ဒီးဆိကမိၣ်ထံ လံာ်စီဆှံ အတၢ်ဟံးစုနဲၣ်ကျဲလၢ အဘၣ်ထွဲလိာ်သးတဖၣ် ဒီးတၢ်ဂ့ၢ်လၢ နသ့ၣ်ညါပာ်စၢၤအီၤခဲလၢာ်. နမ့ၢ်နၢ်ပၢၢ်အါထီၣ် ယဟိဝၤယွၤ အကလုၢ်ကထါန့ၣ် နဆၢတဲာ်တၢ်လၢအဘၣ် ကသ့ဒိၣ်ထီၣ်.—ဖံလံးပံၤ ၄:၆, ၇.

it-2 ၇၆၈ ¶၁

စီၤရဃၤဘၣ်

စီၤရဃၤဘၣ်န့ၣ် ပာ်ထီၣ်ထီအသးအဃိ ပှၤဂီၢ်မုၢ်တဖၣ် တဘၣ်သူၣ်ဘၣ်သးအီၤ နီတစဲးလၢၤဘၣ်. ထဲဒၣ် ယူဒၤ ဒီးဘံၣ်ယၤမံၣ် အဒူၣ်န့ၣ် ဆဲးဆီၣ်ထွဲဝဲ စီၤဒၤဝံး အစၢၤအသွဲၣ်. ဒီးပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ်လၢ အအိၣ်လၢ အံၣ်စရ့လး အတၢ်လီၢ်စ့ၢ်ကီး ဟးထီၣ်လၢ အံၣ်စရ့လး အဒူၣ်တဆံအကျါ ဒီးဆီၣ်ထွဲဝဲ စီၤဒၤဝံး အစၢၤအသွဲၣ်.—၁ စီၤပၤ ၁၂:၁၆, ၁၇; ၂ ကွဲး ၁၀:၁၆, ၁၇; ၁၁:၁၃, ၁၄, ၁၆.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-1 ၉၆၆-၉၆၇

တၢ်ဝံတၢ်နါ လၢအလီၤဂာ်ဒီး မဲာ်တဲးလဲး

စီၤယိၤၡူ အတၢ်ကတိၤလၢ အအိၣ်ဖဲ ယိၤၡူ ၂၄:၁၄ အပူၤန့ၣ် ပာ်ဖျါထီၣ်ဝဲလၢ ဖဲပှၤအံၣ်စရ့လးဖိတဖၣ် အိၣ်လၢ ကီၢ်အဲၤကူပတူးပူၤအခါ အဝဲသ့ၣ် ဘူၣ်ထီၣ်ဘါထီၣ် ယွၤလၢအကမၣ်တဖၣ်. ဝံယဃ့းစက့လး ပာ်ဖျါထီၣ်ဝဲလၢ ပှၤအံၣ်စရ့လးဖိတဖၣ် ဆဲးဘူၣ်ထီၣ်ဘါထီၣ် ယွၤလၢအကမၣ်တဖၣ်အံၤဒံး. (ဃ့း ၂၃:၈, ၂၁) လၢတၢ်ဂ့ၢ်တခါအံၤအဃိ ပှၤကူၣ်ဘၣ်ကူၣ်သ့ တနီၤ တဲဝဲလၢ ဖဲပှၤအံၣ်စရ့လးဖိတဖၣ် အိၣ်လၢ ပှၢ်မုၢ်ကနၢအခါ ယဟိဝၤယွၤ ဟ့ၣ်လီၤအဝဲသ့ၣ် တၢ်သိၣ်တၢ်သီ ဒ်သိးအဝဲသ့ၣ်သုတ “လုၢ်ထီၣ် တၢ်လၢ တၢ်ဝံတၢ်နါ လၢအလီၤဂာ်ဒီး မဲာ်တဲးလဲးတဖၣ်” အအိၣ်တဂ့ၤ. (၃ မိၤၡ့ ၁၇:၁-၇) စီၤယၤရၤဘၣ် ဃုထၢထီၣ် ပှၤလုၢ်တၢ်ဒိၣ်တဖၣ်လၢ “အကမၤတၢ်ဖဲ တၢ်လီၢ်ထီၣ်ထီတဖၣ်လီၤ. အဝဲသ့ၣ် တီခိၣ်ရိၤမဲ တၢ်ဘူၣ်ထီၣ်ဘါထီၣ် တၢ်ဝံတၢ်နါ လၢအလီၤဂာ်ဒီး မဲာ်တဲးလဲးတဖၣ် ဒီးကျီၢ်ဖိတဖၣ် လၢစီၤယၤရၤဘၣ် တ့ထီၣ်ဝဲန့ၣ်လီၤ.” (၂ ကွဲး ၁၁:၁၅) ပှၤအံၣ်စရ့လးဖိတနီၤ ဘူၣ်ထီၣ်ဘါထီၣ်ဝဲ မဲာ်တဲးလဲး ဒ်သိးဒီး ပှၤလၢအအိၣ်လၢ အဲၤကူပတူး အတၢ်ပၢၤခိၣ်တဖၣ် ဘူၣ်ထီၣ်ဘါထီၣ်ဝဲ. ဟရၢဒိထၢး (ခံ, ၄၆) တဲဝဲလၢ ပှၤကြံးဖိတဖၣ်နာ်ဝဲ ဖဲဒီးစးထၢၤ (Pan and satyrs) လၢအကဲဝဲ တၢ်သးကတၢအယွၤတဖၣ် လၢပှၤတ့အီၤလၢသ့ၣ်. ဒီးလၢခံ ယွၤတဖၣ်န့ၣ် ပှၤတ့ထီၣ်ဝဲအဂီၤ ဒ်သိးဒီး အဝဲသ့ၣ်အိၣ်ဒီး အနၢၤ, မဲာ်တဲးလဲးအမဲၢ် ဒီးမဲာ်တဲးလဲးအခီၣ်. ဒီးတဲဝဲလၢ တၢ်စူၢ်တၢ်နာ်တခါအံၤ ဟဲလၢအဲၤကူပတူးအတၢ်ဘါ. ယွၤလၢအကမၣ်တဖၣ်အံၤ အက့ၢ်အဂီၤတနီၤန့ၣ် အကဲဝဲဆၣ်ဖိကီၢ်ဖိအက့ၢ်အဂီၤ. ဒီးပှၤတနီၤတဲဝဲလၢ လၢပျၢၤပှၤလၢအတဲလီၤအသးလၢ ခရံာ်ဖိအါတက့ၢ်န့ၣ် အထံၣ်တမှံဝဲလၢ မုၣ်ကီၤလံၢ်န့ၣ်အိၣ်ဒီး အက့ၢ်အဂီၤဒ်န့ၣ်. အဝဲသ့ၣ် နာ်ဝဲလၢ မုၣ်ကီၤလံၢ်န့ၣ် အိၣ်ဒီး အမဲၢ်, အနၢၤတဖၣ် ဒီးဆၣ်ဖိကီၢ်ဖိအခီၣ်.

“တၢ်လၢအဆူၣ်အါ” န့ၣ်အဲၣ်ဒိးတဲဝဲ တၢ်မနုၤလဲၣ်န့ၣ် ပတသ့ၣ်ညါဘၣ်. ပှၤတနီၤ ဆိကမိၣ်ဝဲလၢ အကဲမဲာ်တဲးလဲး မ့တမ့ၢ် မဲာ်တဲးလဲးအဂီၤ, ဘၣ်ဆၣ် လံာ်စီဆှံ တပာ်ဖျါထီၣ်ဝဲ တၢ်ဂ့ၢ်အံၤဘၣ်. တၢ်ကတိၤတဖျၢၣ်န့ၣ် အဲၣ်ဒိးတဲဝဲလၢ ပှၤလၢအဘူၣ်ထီၣ်ဘါထီၣ် ယွၤလၢအကမၣ်တဖၣ်န့ၣ် ဆိကမိၣ်ဝဲလၢ အဝဲသ့ၣ်အယွၤန့ၣ် လီၤဂာ်ဒီး မဲာ်တဲးလဲး မ့တမ့ၢ် အဆူၣ်အါ. မ့တမ့ၢ် ပှၤသူဝဲ တၢ်ကတိၤလၢအမ့ၢ် “မဲာ်တဲးလဲးတဖၣ်” န့ၣ်အိၣ်ဒၣ် ပှၤအဲၣ်ဒိးပာ်ဖျါထီၣ်ဝဲလၢ ပှၤထံၣ်ဆံး တၢ်ဘူၣ်ထီၣ်ဘါထီၣ်တၢ်ဂီၤတၢ်ဖှီၣ်. ဘၣ်ဃးဒီး တၢ်ဂီၤတၢ်ဖှီၣ်န့ၣ် လံာ်စီဆှံအဆၢတဖၣ် သူဝဲတၢ်ကတိၤလၢ အခီပညီထီၣ်လၢ “တၢ်အ့ၣ်ကိၣ်လိၣ်.” ဘၣ်ဆၣ် တအဲၣ်ဒိးတဲဝဲ ပှၤတ့ထီၣ်တၢ်ဂီၤတဖၣ်အံၤလၢ တၢ်အ့ၣ်ဘၣ်.—၃ မိၤ ၂၆:၃၀; ၅ မိၤ ၂၉:၁၇.

be ၆၉ ¶၄-၅

ဖဲပှၤမၤလိလံာ်စီဆှံဖိ မ့တမ့ၢ် ဒီပုၢ်ဝဲၢ်မုၣ်ခွါတဂၤဂၤ ထံၣ်ဘၣ်ဒီးတၢ်အိၣ်သးတမံၤဂ့ၤတမံၤဂ့ၤအခါ အဝဲမ့ၢ်သံကွၢ်နၤလၢ အဘၣ်မၤဒ်လဲၣ်န့ၣ် နကစံးဆၢအီၤဒ်လဲၣ်. ဖဲန့ၣ်အခါ နကဘၣ်မၤဒ်လဲၣ်န့ၣ် နနီၢ်ကစၢ် ကသ့ၣ်ညါဂ့ၤဂ့ၤလီၤ. ဘၣ်ဆၣ်ပှၤတဂၤဒီးတဂၤန့ၣ် အအိၣ်ဒီးမူဒါလၢ အကဘၣ်ဆၢတဲာ်တၢ်လၢ အနီၢ်ကစၢ်. (ကလၤ ၆:၅) တၢ်မၢဖိပီလူး ဟ့ၣ်ဂံၢ်ဟ့ၣ်ဘါဝဲ ပှၤလၢအစံၣ်တဲၤတဲလီၤဝဲတဖၣ်လၢ အဝဲသ့ၣ် “ကအိၣ်ဒီး တၢ်ဒိကနၣ်လၢ အဟဲခီဖျိတၢ်နာ်.” (ရိ ၁၆:၂၆) တၢ်မၢဖိပီလူးန့ၣ် ပာ်လီၤဝဲ တၢ်အဒိအတဲာ်လၢအဂ့ၤလၢပဂီၢ်. ပှၤတဂၤ မ့ၢ်ဆၢတဲာ်တၢ် ဒ်သိးကမၤမုာ်ဝဲ ပှၤလၢအမၤလိအီၤလံာ်စီဆှံတဂၤအသး မ့တမ့ၢ် ပှၤတဂၤဂၤအသးန့ၣ် အကဲဝဲ အမၤပှၤကညီအတၢ်, တမ့ၢ် အအိၣ်မူဒ် အတၢ်နာ်အသိးဘၣ်. (ကလၤ ၃:၁၀) အဃိ ပှၤမ့ၢ်သံကွၢ်ပှၤတၢ်သံကွၢ် ဒီးပမ့ၢ်ဆၢတဲာ်န့ၢ်အဝဲသ့ၣ်လၢ အကဘၣ်မၤဝဲဒ်အံၤဒ်နုၤန့ၣ် ဘၣ်သ့ၣ်သ့ၣ် တမ့ၢ်ကျဲလၢအဂ့ၤကတၢၢ်ဘၣ်.

ဒ်လံာ်စီဆှံ တၢ်ဟံးစုနဲၣ်ကျဲအိၣ်ဝဲအသိး ပှၤမ့ၢ်ဟဲသံကွၢ်ပှၤတၢ်န့ၣ် ပကဘၣ်မၤဒ်လဲၣ်. ဘၣ်သ့ၣ်သ့ၣ် နဃုလံာ်စီဆှံတၢ်ဟံးစုနဲၣ်ကျဲ ဒီးပှၤအဒိအတဲာ်လၢလံာ်စီဆှံပူၤ လၢအဘၣ်ထွဲလိာ်သးသ့. မ့တမ့ၢ် လၢတၢ်အိၣ်သးအဖီခိၣ်န့ၣ် နကပၠးအီၤလၢ အဝဲဘၣ်ဃုသ့ၣ်ညါဝဲ လံာ်စီဆှံတၢ်ဟံးစုနဲၣ်ကျဲ ဒီးပှၤအဒိအတဲာ် လၢအနီၢ်ကစၢ်ဒ်လဲၣ်သ့. နတဲသကိး လံာ်စီဆှံတၢ်ဟံးစုနဲၣ်ကျဲ ဒီးပှၤအဒိအတဲာ်တဖၣ်ဒီးအီၤသ့, ဘၣ်ဆၣ် နတဘၣ်တဲအဝဲသ့ၣ်လၢ ကဘၣ်မၤဒ်အံၤဒ်နုၤဘၣ်. ဒီးသံကွၢ်အီၤလၢ မ့ၢ်အဝဲထံၣ်ဝဲ တၢ်ဂ့ၢ်တမံၤမံၤလၢ ကမၤစၢၤအီၤလၢ အကဆၢတဲာ်တၢ်အဂီၢ်လံဧါ. ဟ့ၣ်ဂံၢ်ဟ့ၣ်ဘါအီၤလၢ ကဆိကမိၣ်ထံဝဲ ပှၤအဒိအတဲာ် ဒီးလံာ်စီဆှံ အတၢ်ဟံးစုနဲၣ်ကျဲလၢ အနၢ်ပၢၢ်ထီၣ်ဝဲ ဝံၤဒီးကဆၢတဲာ်တၢ်လၢ အဘၣ်ယဟိဝၤယွၤအသး. နမ့ၢ်မၤဒ်န့ၣ်န့ၣ် လီၤဂာ်ဒ် နမၤစၢၤအီၤလၢ အက ‘မၤလိသ့ထီၣ်အသးလၢ အကဆိကမိၣ်ထံတၢ် ဒ်သိးကပဲာ်ထံနီၤဖး တၢ်ဂ့ၤဒီးတၢ်အၢအဆၢ.’—ဧ့ၤ ၅:၁၄.

လါအ့ဖြ့ၣ် ၂၄-၃၀

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၁၃-၁၆

“ပကဘၣ်သန့ၤပသး လၢယဟိဝၤယွၤ လၢအခါဖဲလဲၣ်”

တၢး၂၁.၀၃ ၅ ¶၁၂

ပိာ်ခွါသးစၢ်သ့ၣ်ဧၢ, နဒိးန့ၢ်အါထီၣ် ပှၤဂၤအတၢ်နာ်န့ၢ်နၤ ကသ့ဒ်လဲၣ်

^၁၂ ဖဲစီၤပၤအၤစါအသးစၢ်အခါ အဝဲအိၣ်ဒီးတၢ်ဆီၣ်လီၤသး ဒီးတၢ်သူၣ်ဒူသးဒူ. အဒိ, ဖဲအထီၣ်စီၤပၤ လၢအပၢ်စီၤအဘံယၤအလီၢ်အခါ အဝဲမၤဟးဂီၤကွံာ် တၢ်ဂီၤတၢ်ဖှီၣ်တဖၣ် လၢကီၢ်ပူၤဒီးအဝဲ “မၤလိာ်ယူဒၤဒ်သိး အကဃုန့ၢ်ယွၤအပၢ်တဖၣ် အကစၢ်, ဒီးတိၢ်န့ၢ်တၢ်သိၣ်တၢ်သီ, ဒီးတၢ်မၤလိာ်လီၤ.” (၂ ကွဲးနီၣ်တၢ် ၁၄:၁-၇) ဖဲပှၤကူၤၡးဖိ စီၤစ့ရၤ ဒီးအသုးမုၢ်အဂၤ ၁,၀၀၀,၀၀၀ ဟဲဒုးဝဲ ပှၤယူဒၤဖိအခါ စီၤပၤအၤစါ ဃ့ယဟိဝၤယွၤ အတၢ်မၤစၢၤ ဒီးတဲဝဲလၢ “ယွၤဧၢ, လၢအအါမ့ၢ်ဂ့ၤ, လၢအစှၤမ့ၢ်ဂ့ၤ, နမၤစၢၤတၢ်ဒ်သိးသိးလီၤ. မၤစၢၤပှၤတက့ၢ်, ယွၤပကစၢ်ဧၢ, အဂ့ၢ်ဒ်အံၤ, ပသန့ၤပသးလၢနၤ.” တၢ်ကတိၤအံၤ ပာ်ဖျါထီၣ်ဝဲ စီၤပၤအၤစါန့ၣ် အနာ်န့ၢ်ဝဲ ယဟိဝၤယွၤလၢလၢပှဲၤပှဲၤ ဒီးအသ့ၣ်ညါဝဲလၢ ယဟိဝၤယွၤကမၤပူၤဖျဲးအီၤ ဒီးအပှၤဂီၢ်မုၢ်တဖၣ်. စီၤပၤအၤစါ နာ်န့ၢ်ဝဲ အပၢ်လၢမူခိၣ် ယဟိဝၤယွၤဒီး “ယွၤကျီကွံာ်ပှၤကူၤၡးဖိ” တဖၣ်လီၤ.—၂ ကွဲးနီၣ်တၢ် ၁၄:၈-၁၂.

တၢး၂၁.၀၃ ၅ ¶၁၃

ပိာ်ခွါသးစၢ်သ့ၣ်ဧၢ, နဒိးန့ၢ်အါထီၣ် ပှၤဂၤအတၢ်နာ်န့ၢ်နၤ ကသ့ဒ်လဲၣ်

^၁၃ ပှၤသုးဖိအဂၤ ၁,၀၀၀,၀၀၀ မ့ၢ်ဟဲဒုးနၤန့ၣ် နကပျံၤတၢ်ဒိၣ်မး. ခီဖျိလၢ စီၤပၤအၤစါ သန့ၤအသးလၢယဟိဝၤယွၤအဃိ အဝဲမၤနၢၤတၢ်. ဘၣ်ဆၣ် လီၤသးအုးဒိၣ်မး ဖဲစီၤပၤအၤစါထံၣ်ဘၣ်ဒီး တၢ်ကီတၢ်ခဲအဂၤ အခါ အဝဲတသန့ၤအသးလၢ ယဟိဝၤယွၤလၢၤဘၣ်. ဖဲစီၤပၤဘါၡၤ လၢအမ့ၢ် အံၣ်စရ့လးအစီၤပၤဟဲဒုးဝဲ စီၤပၤအၤစါအခါ စီၤပၤအၤစါလဲၤဃ့တၢ်မၤစၢၤလၢ စူၤရံအစီၤပၤအအိၣ်. ခီဖျိလၢ အမၤဝဲဒ်န့ၣ်အဃိ အထံၣ်ဘၣ်ဝဲ တၢ်ကီတၢ်ခဲ. ယဟိဝၤယွၤ မၢဝံဃနၤနံ လဲၤတဲဘၣ် စီၤပၤအၤစါလၢ “မ့ၢ်နသန့ၤနသးလၢ စူၤရံအစီၤပၤ, ဒီးတသန့ၤဘၣ်နသးလၢ ယွၤနကစၢ်ဘၣ်ဒီး, စူၤရံအစီၤပၤအပှၤသုးမုၢ်ပူၤဖျဲးလၢ နစုပူၤလီၤ.” စးထီၣ်ဖဲန့ၣ် ဝံၤအလီၢ်ခံ စီၤပၤအၤစါထံၣ်ဘၣ်ဒီး တၢ်ဒုးတၢ်ယၤ တလီၢ်လီၢ်လီၤ. (၂ ကွဲးနီၣ်တၢ် ၁၆:၇, ၉; ၁ စီၤပၤ ၁၅:၃၂) ပမၤလိန့ၢ်ဘၣ်တၢ်မနုၤလဲၣ်.

တၢး၂၁.၀၃ ၆ ¶၁၄

ပိာ်ခွါသးစၢ်သ့ၣ်ဧၢ, နဒိးန့ၢ်အါထီၣ် ပှၤဂၤအတၢ်နာ်န့ၢ်နၤ ကသ့ဒ်လဲၣ်

^၁၄ ဆဲးပၢၤဃာ် နတၢ်ဆီၣ်လီၤသး ဒီးဆဲးနာ်န့ၢ်ယဟိဝၤယွၤတက့ၢ်. ဖဲနဒိးဘျၢထံဝံၤအခါ နပာ်ဖျါထီၣ် နတၢ်နာ်လၢအဂၢၢ်ကျၢၤ ဒီးနနာ်န့ၢ် ယဟိဝၤယွၤလီၤ. ယဟိဝၤယွၤ နာ်န့ၢ်နၤအဃိ ဟ့ၣ်လီၤနၤတၢ်ခွဲးတၢ်ယာ်လၢ နကကဲထီၣ်ဘၣ် အဟံၣ်ဖိဃီဖိ. တၢ်လၢနကဘၣ်မၤအီၤခဲအံၤန့ၣ် မ့ၢ်ဝဲနကဘၣ်ဆဲးနာ်န့ၢ် ယဟိဝၤယွၤ. ဘၣ်သ့ၣ်သ့ၣ် ဖဲနဘၣ်ဆၢတဲာ်တၢ်ဖးဒိၣ်လၢ နတၢ်အိၣ်မူပူၤအခါ ညီဒိၣ်မးလၢ နကသန့ၤနသးလၢ ယဟိဝၤယွၤ. ဘၣ်ဆၣ် ဖဲနဘၣ်ဆၢတဲာ်တၢ်ဆံးဆံးဖိအခါ မ့ၢ်နသန့ၤနသးလၢ ယဟိဝၤယွၤအအိၣ်စ့ၢ်ကီးဧါ. ဖဲနဘၣ်ဆၢတဲာ်တၢ်လၢ အဘၣ်ဃးဒီး နဃုထၢ တၢ်မၤမုာ်မၤဖှံသး, တၢ်ဖံးတၢ်မၤ ဒီးနပာ်လီၤဖီတၢၣ်လၢ နတၢ်အိၣ်မူအပူၤအခါ အရ့ဒိၣ်ဒိၣ်မးလၢ နကဘၣ်သန့ၤနသးလၢ ယဟိဝၤယွၤ. နတဘၣ်သန့ၤသးလၢ နနီၢ်ကစၢ်အတၢ်ကူၣ်သ့ဘၣ်. လၢတၢ်န့ၣ်အလီၢ် နကဘၣ်ဃုကွၢ် လံာ်စီဆှံအတၢ်ဟံးစုနဲၣ်ကျဲ လၢအဘၣ်ထွဲဒီးနတၢ်အိၣ်သးတဖၣ် ဝံၤဒီး နကဘၣ်မၤထွဲအီၤ. (ကတိၤဒိ ၃:၅, ၆) နမ့ၢ်မၤဒ်န့ၣ်န့ၣ် နကမၤသးခု ယဟိဝၤယွၤအသး ဒီးနကဒိးန့ၢ်အါထီၣ်ဘၣ် ပှၤဂၤအတၢ်နာ်န့ၢ်နၤ လၢတၢ်အိၣ်ဖှိၣ်အပူၤ.—ဖး ၁ တံၤမသ့း ၄:၁၂ တက့ၢ်.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၇.၀၃ ၁၇ ¶၇

မၤယဟိဝၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ်တက့ၢ်

^၇ မ့ၢ်ပသန့ၤပသးလၢ ယဟိဝၤယွၤလၢ ပသူၣ်ဒီဖျၢၣ်ပသးဒီဖျၢၣ်ဧါန့ၣ် ပသ့ၣ်ညါအီၤကသ့ဒ်လဲၣ်. ပသံကွၢ်လီၤပသးဒ်အံၤ သ့ဝဲလီၤ– ‘ယကဒိကနၣ် ယဟိဝၤယွၤအကလုၢ်အဂီၢ် မ့ၢ်ကီလၢယဂီၢ်ဒၣ်လဲာ် မ့ၢ်ယကဒိကနၣ်အီၤဒံးဧါ. ဒ်သိးတၢ်အိၣ်ဖှိၣ်ကစီဆှံအဂီၢ် တၢ်လၢယကဘၣ်မၤတဖၣ် မ့ၢ်ယပာ်လီၤယသး ဂၢၢ်ဂၢၢ်ကျၢၤကျၢၤလၢ ယကမၤအီၤလၢ တၢ်သူၣ်ဆူၣ်သးဆူၣ်အပူၤဧါ.’ ဆိကမိၣ်ကွၢ် ဖဲစီၤအၤစါ ကသုးကွံာ်အဖံလၢ နီၢ်ပၤမုၣ်အလီၢ်အခါ အဝဲကလိၣ်ဘၣ်တၢ်သူၣ်ဒူသးဒူ ထဲလဲၣ်န့ၣ်တက့ၢ်. ဘၣ်သ့ၣ်သ့ၣ် တဘျီတခီၣ် နကလိၣ်ဘၣ်တၢ်သူၣ်ဒူသးဒူဒ် စီၤအၤစါအသိး. အဒိ, နဘူးနတံၢ် မ့တမ့ၢ် နတံၤသကိးလၢ နအဲၣ်အီၤတဂၤ မၤတၢ်ကမၣ်ဖးဒိၣ်ဒီး တပီၢ်ယၢ်လီၤအသးဘၣ်အဃိ ပှၤဟီထီၣ်ကွံာ်အီၤလၢ တၢ်အိၣ်ဖှိၣ်အပူၤလီၤ. ဖဲန့ၣ်အခါ မ့ၢ်နကပာ်လီၤနသး ဂၢၢ်ဂၢၢ်ကျၢၤကျၢၤ လၢနတရ့ဒီးအီၤလၢၤဘၣ်န့ၣ်ဧါ. နကမၤဒ်လဲၣ်.