ယဟိဝၤပှၤအုၣ်အသးတဖၣ် မ့ၢ်ဖရိၣ်ထဲးစထၢးဧါ

တမ့ၢ်ဘၣ်. ယဟိဝၤ ပှၤအုၣ်အသးတဖၣ်န့ၣ် မ့ၢ် ပှၤခရံာ်ဖိလီၤ. ဘၣ်ဆၣ်, ပတမ့ၢ် ဖရိၣ်ထဲးစထၢဘၣ်. လၢမနုၤအဃိလဲၣ်.

ဖရိၣ်ထဲးစထၢသနူန့ၣ် ဘၣ်တၢ်ပာ်ဖျါအီၤဒ် “တၢ်ဘူၣ်တၢ်ဘါ တၢ်ဟူးတၢ်ဂဲၤ လၢအထီဒါ ရိမဲ ခဲးသလ့းသနူ” လီၤ. ယဟိဝၤ ပှၤအုၣ်အသးတဖၣ် တအၢၣ်လီၤတူၢ်လိာ်ဝဲ ခဲးသလ့း ခၠၢးၡ် အတၢ်သိၣ်လိဘၣ်န့ၣ် မ့ၢ်ကစီဒီလီၤ. ဘၣ်ဆၣ်, ပတဆိကမိၣ်လီၤပသးလၢ ပမ့ၢ်ဖရိၣ်ထဲးစထၢ လၢတၢ်ဂ့ၢ်လၢလာ်တဖၣ်အံၤ အဃိလီၤ:

1. ၁. ဖရိၣ်ထဲးစထၢး အတၢ်နာ်အါမးန့ၣ် ထီဒါလိာ်အသးဒီး လံာ်စီဆှံသိၣ်လိတၢ်နီၢ်နီၢ်လီၤ. အဒိ, လံာ်စီဆှံ သိၣ်လိဝဲလၢ “ယွၤအိၣ်ဝဲတဂၤ”လီၤ, တမ့ၢ်သၢဂၤတဂၤဃီဘၣ်. (၁ တံၤမသ့း ၂:၅; ယိၤဟၣ် ၁၄:၂၈) ဒီးလံာ်စီဆှံသိၣ်လိဝဲလၢ ကစၢ်ယွၤစံၣ်ညီၣ် ပှၤအၢပှၤသီလၢ တမ့ၢ်လရာ်မ့ၣ်အူအပူၤဘၣ်, ကမၤဟးဂီၤကွံာ်ဝဲ လီၤထူလီၤယိာ်လီၤ.​—စံးထီၣ်ပတြၢၤ ၃၇:၉; ၂ သ့းစၤလနံ ၁:၉.

2. ၂. ပတပူထီၣ်ထီဒါ မ့တမ့ၢ် ပတကျဲးစၢး မၤဂ့ၤထီၣ်က့ၤ ခဲသလ့း ခၠၢးၡ် မ့တမ့ၢ် တၢ်ဘူၣ်တၢ်ဘါ အဂုၤအဂၤတမံၤမံၤဘၣ်. လၢတၢ်န့ၣ်အလီၢ်, ပစံၣ်တဲၤတဲလီၤဒၣ် ယွၤအဘီမုၢ် တၢ်သးခုကစီၣ် ဒီးပဂုာ်ကျဲးစၢး မၤစၢၤပှၤဂၤလၢ ကသူၣ်ထီၣ်တၢ်နာ် လၢတၢ်သးခုကစီၣ်အံၤ အဖီခိၣ်န့ၣ်လီၤ. (မးသဲ ၂၄:၁၄; ၂၈:၁၉, ၂၀) ပတဂုာ်ကျဲးစၢး မၤဂ့ၤထီၣ်က့ၤ တၢ်ဘူၣ်တၢ်ဘါအဂၤဘၣ်. မ့မ့ၢ်ပတၢ်သးစဲန့ၣ် မ့ၢ်ဒၣ်ပသိၣ်လိ ပှၤလၢအိၣ်ဒီးတၢ်သူၣ်ဘျၢသးဘျၢတဖၣ် လၢတၢ်မ့ၢ်တၢ်တီ ဘၣ်ဃးဒီးကစၢ်ယွၤဒီး ကစၢ်အကလုၢ်ကထါ, လံာ်စီဆှံအဂ့ၢ်လီၤ.​—ကလီးစဲ ၁:၉, ၁၀; ၂ တံၤမသ့း ၂:၂၄, ၂၅.