တၢ်စံၣ်ညီၣ်တဲာ် တၢ်ဂ့ၢ်လိာ်ဘှီလိာ်လၢ တၢ်ပနံာ်တၢ်ကၤအတၢ်မၤ

ဒ် ၁ ကရံၣ်သူး ၆:၁-၈ ကွဲးနီၣ်ပာ်ဝဲအသိး, တၢ်မၢဖိပီလူး ကတိၤသကိးဝဲ တၢ်လိာ်ဘၢလိာ်ကွီၢ်လၢ ပှၤစူၢ်တၢ်နာ်တၢ်ကဒဲကဒဲတဖၣ်​ အဘၢၣ်စၢၤလီၤ. အဝဲပာ်ဖျါဝဲ တၢ်သးဟးဂီၤလၢ ခရံာ်ဖိလၢ ဝ့ၢ်ကရံၣ်သူးတနီၤန့ၣ်​ “လိာ်ကွီၢ်လၢ ပှၤတတီတလိၤဘၣ်အမဲာ်ညါ” လီၤ. (အဆၢဖိ ၁) ပီလူးဟ့ၣ်ဝဲ တၢ်အဂ့ၢ်အခၢးအဂ့ၤလၢ ဘၣ်မနုၤခရံာ်ဖိတဖၣ်​ တကြၢးဆှိးပှၤတဂၤလၢ ဟီၣ်ခိၣ်အကွီၢ်ဘျီၣ်ဘၣ်​ ဒီးကြၢးမၤဘၣ်လိာ် တၢ်ဂ့ၢ်လိာ်ဘှီလိာ်လၢ တၢ်အိၣ်ဖှိၣ်ပူၤလီၤ. ပကသမံသမိးကွၢ်သကိး တၢ်အဂ့ၢ်အခၢးတနီၤလၢ ဘၣ်မနုၤ အဝဲဘၣ်ဟ့ၣ်​ တၢ်ဟ့ၣ်ကူၣ်အံၤဒီး တၢ်အိၣ်သးတနီၤလၢ အလီၢ်တအိၣ်လၢ ဘၣ်ဟ့ၣ်တၢ်ဟ့ၣ်ကူၣ်ဘၣ်န့ၣ်လီၤ.

ပမ့ၢ်အိၣ်ဒီး တၢ်ပနံာ်တၢ်ကၤအတၢ်ဂ့ၢ်လိာ်ဘှီလိာ်ဒီး ပှၤစူၢ်တၢ်နာ်တၢ် ကဒဲကဒဲတဂၤန့ၣ်, အဆိကတၢၢ် ပကဘၣ်ဃုထံၣ်န့ၢ် တၢ်သုးကျဲၤ တၢ်ဂ့ၢ်လၢ ယွၤအကျဲလီၤ, တမ့ၢ်ဘၣ်လၢပသးဒၣ်ပဝဲဘၣ်. (ကတိၤဒိ ၁၄:၁၂) ဒ်ယ့ၣ်ၡူးပာ်ဖျါဝဲအသိး, မၤဘၣ်လိာ် တၢ်တဘၣ်လိာ်ဖိးဒ့အံၤ ချ့ချ့ဖဲ တချုးကဲထီၣ်​ တၢ်ဂ့ၢ်ဖးဒိၣ်န့ၣ်​ မ့ၢ်တၢ်အဂ့ၤကတၢၢ်လီၤ. (မးသဲ ၅:၂၃-၂၆) ဘၣ်ဆၣ်သနာ်က့, လီၤသးအုးဒိၣ်မးလၢ ခရံာ်ဖိတနီၤန့ၣ်​ ဂ့ၢ်လိာ်ဘှီလိာ်တၢ်ဆူၣ်ဒိၣ်မး, တုၤဒၣ်လဲာ်လၢ တၢ်ဂ့ၢ်လိာ်ဘှီလိာ်အံၤ လဲၤတုၤလၢ ဟီၣ်ခိၣ်အကွီၢ်ဘျီၣ်လီၤ. ပီလူးစံးဝဲလၢ “လၢသုအိၣ်ဒီးတၢ်လိာ်ဘၢလိာ်ကွီၢ်လၢ သုဝဲကဒဲကဒဲအကျါန့ၣ်, ပာ်ဖျါထီၣ်လၢသုလီၤတိၢ်တ့ၢ်လံသုဝဲလၢာ်လၢာ်ဆ့ဆ့လံန့ၣ်လီၤ.” လၢမနုၤအဃိလဲၣ်. တၢ်ဂ့ၢ်မိၢ်ပှၢ်မ့ၢ် တၢ်မၤဒ်သိးအံၤအဃိ ဘၣ်ဒိတၢ်အိၣ်ဖှိၣ်အမံၤဂ့ၤတကးဘၣ်​ ဘၣ်ဒိဃုာ်ယွၤလၢ ပဘူၣ်ထီၣ်ဘါထီၣ်အမံၤလီၤ. လၢတၢ်န့ၣ်အဃိ ပီလူးအတၢ်သံကွၢ်လၢ “သုမ့ၢ်ဘၣ်တၢ်မၤကမၣ်သုဒီး ကဂ့ၤဒိၣ်ဒၣ်တၢ်တက့ၢ် တမ့ၢ်ဘၣ်ဧါ” န့ၣ်ပကြၢးပာ်လၢပသးပူၤလီၤ.—အဆၢဖိ ၇, ခစ.

ပီလူးဟ့ၣ်စ့ၢ်ကီးဝဲ တၢ်အဂ့ၢ်အခၢးလၢ ယွၤဟ့ၣ်တၢ်အိၣ်ဖှိၣ်လၢ တၢ်ရဲၣ်တၢ်ကျဲၤအဂ့ၤလၢ တၢ်ကမၤဃူမၤဖိး တၢ်ဂ့ၢ်လိာ်ဘှီလိာ်အါမးအဂီၢ်လီၤ. ပှၤပၢဘၣ်ကွၢ်ထွဲတၢ်တဖၣ်န့ၣ်​ မ့ၢ်ခရံာ်ဖိပိာ်ခွါလၢ အိၣ်ဒီးတၢ်ကူၣ်ဘၣ်ကူၣ်သ့ ခီဖျိအဝဲသ့ၣ်အတၢ်သ့ၣ်ညါနၢ်ပၢၢ် လံာ်စီဆှံတၢ်မ့ၢ်တၢ်တီအဃိလီၤ. ဒီးပီလူးစံးဝဲလၢ အဝဲသ့ၣ်​ “စံၣ်ညီၣ်တၢ်လၢ ဒီပုၢ်ဝဲၢ်အဘၢၣ်စၢၤ” ဖဲဘၣ်ဃးဒီး “အအံၣ်တဃၣ်” န့ၣ်လီၤ. (အဆၢဖိ ၃-၅) ယ့ၣ်ၡူးစံးဝဲလၢ တၢ်ဂ့ၢ်လိာ်ဘှီလိာ်တဖၣ်​ လၢအပာ်ဃုာ်ဒီး တၢ်ကမၣ်အဒိၣ်အယိာ်, ဒ်သိးဒီးတၢ်ကတိၤခၢၣ်သူခၢၣ်ဂီၤ ဒီးတၢ်ကတိၤလီတၢ်န့ၣ်, ကြၢးမၤဃူမၤဖိးအီၤလၢ အဆီသၢဆီလီၤ. တၢတဆီ, တၢ်ကျဲးစၢးမၤဘၣ်လိာ် တၢ်ဂ့ၢ်လၢ ပှၤပာ်ဃုာ်လၢ တၢ်ဂ့ၢ်လိာ်ဘှီလိာ်အပူၤတဖၣ်​ အဘၢၣ်စၢၤလီၤ. ခံဆီတဆီ, တၢတဆီမ့ၢ်တကဲထီၣ်လိၣ်ထီၣ်န့ၣ်​ ကိးပှၤအုၣ်အသး တဂၤ မ့တမ့ၢ် ခံဂၤတက့ၢ်. ဒီးသၢဆီတဆီ, တၢ်အံၤစ့ၢ်ကီးမ့ၢ်တကဲထီၣ်လိၣ်ထီၣ်န့ၣ်, တဲဘၣ်တၢ်ဂ့ၢ်အံၤလၢ ပှၤပၢဘၣ်ကွၢ်ထွဲတၢ်လၢ အခၢၣ်စးတၢ်အိၣ်ဖှိၣ်တဖၣ်န့ၣ်တက့ၢ်.—မးသဲ ၁၈:၁၅-၁၇.

နီၢ်နီၢ်, ခရံာ်ဖိအပှၤပၢဘၣ်ကွၢ်ထွဲတၢ်တဖၣ်န့ၣ်​ တမ့ၢ် ပီၢ်ရီ မ့တမ့ၢ် ပှၤမၤတၢ်ပနံာ်တၢ်ကၤအဃိ တမ့ၢ်ကဟ့ၣ်ကူၣ်တၢ်ဒ်သိးအဝဲသ့ၣ်ဘၣ်. အဝဲသ့ၣ်တထုးထီၣ်တၢ်ဘျၢလၢ တၢ်ကမၤဘၣ်လိာ် တၢ်ပနံာ်တၢ်ကၤ အတၢ်ဂ့ၢ်လိာ်ဘှီလိာ်လၢ ဒီပုၢ်ဝဲၢ်ကဒဲကဒဲအဘၢၣ်စၢၤဘၣ်. လၢတၢ်န့ၣ်အလီၢ်, အဝဲသ့ၣ်ဃုဝဲလၢ ကမၤစၢၤ ပှၤလၢအပာ်ဃုာ်ခဲလၢာ်တဖၣ်​ ကမၤထွဲ လံာ်စီဆှံဒီး ကအိၣ်ဒီး တၢ်စံၣ်ညီၣ်တဲာ်လၢ အဘၣ်ပှၤခံကပၤလၢာ်အသးန့ၣ်လီၤ. လၢတၢ်ဂ့ၢ်သဘံၣ်ဘူၣ်အပူၤ, အဝဲသ့ၣ်ကအဲၣ်ဒိး ဃ့တၢ်ဟ့ၣ်ကူၣ်လၢ ကရူၢ်အပှၤကွၢ်တၢ် မ့တမ့ၢ် ယဟိဝၤအပှၤအုၣ်အသးတဖၣ်​ အဝဲၤတြၢ်ဝဲၤဒၢးသ့လီၤ. ဘၣ်ဆၣ်, တၢ်အိၣ်သးလၢ ပှၤမၤဘၣ်လိာ်လၢ ပီလူးအတၢ်ဟ့ၣ်ကူၣ်တန့ၢ်န့ၣ်​ အိၣ်ဝဲလီၤ. တၢ်န့ၣ်အကျါတနီၤန့ၣ်​ မ့ၢ်မနုၤလဲၣ်.

တၢ်အိၣ်သးတနီၤအပူၤ, တၢ်လိာ်ဘၢလိာ်ကွီၢ်န့ၣ်​ တအိၣ်ဒီးတၢ်အဲၣ်လီၤထဲသး, ဒီးတၢ်ကဃူကဖိးအဂီၢ် တၢ်မၤဒ်လုၢ်လၢ်အိၣ်ဝဲအသိး မ့တမ့ၢ် ထဲဒၣ်ကျဲတမံၤလၢ အဖိးသဲစးန့ၣ်လီၤ. အဒိ, တၢ်လိာ်ဘၢလိာ်ကွီၢ်န့ၣ်​ ဘၣ်သ့ၣ်သ့ၣ်​ ကမ့ၢ်ထဲဒၣ်​ တၢ်ကဒိးန့ၢ် တၢ်ကလုၢ်အဖိးသၢစးလၢ တၢ်ထုးလီၤဖှၣ်, မၤန့ၢ်တၢ်အံးထွဲကွၢ်ထွဲ ဖိသၣ်, ကဒိးန့ၢ် တၢ်စံၣ်ညီၣ်တဲာ်လၢ တၢ်ကွၢ်ထွဲအဂီၢ်, ကဒိးန့ၢ်တၢ်ပာ်ကီၤလၢ စ့အီၣ်လိးအဂီၢ်, လိာ်ကွီၢ်တၢ်လၢ ကဒိးန့ၢ်က့ၤ တၢ်လိးက့ၤစ့တန့ၢ် လၢစ့ကစၢ်တဖၣ်အကျါ, ကဒိးန့ၢ် တၢ်အုၣ်အသးလၢ ပာ်ဃုာ်လၢ တၢ်ကွဲးပာ်တၢ်န့ၢ်သါအပူၤအဂီၢ်လီၤ. တၢ်အိၣ်အသး ဟဲပၢၢ်ထီၣ်သ့လၢ ဒီပုၢ်ဝဲၢ်တဂၤ မ့ၢ်ဆိကမိၣ်ဝဲလၢ လိၣ်လၢကဘၣ်လိာ်ကွီၢ်ကဒါက့ၤတၢ်လၢ ကဒီသဒၢအသး တၢ်လိာ်ဘၢလိာ်ကွီၢ်အီၤန့ၣ်လီၤ.a

တၢ်လိာ်ဘၢလိာ်ကွီၢ်လၢ မ့ၢ်တအိၣ်ဒီးတၢ်ပြၢထီဒါလိာ်သးန့ၣ်​ တမ့ၢ်တၢ်ထီဒါ ပီလူးအတၢ်ဟ့ၣ်ကူၣ်ဘၣ်.b ဒ်လဲၣ်ဂ့ၤ ဒ်လဲၣ်ဂ့ၤ, ခရံာ်ဖိတဂၤ အတၢ်ပာ်ဆိလၢညါန့ၣ်​ ကြၢးမ့ၢ် တၢ်ပာ်စီဆှံ ယဟိဝၤအမံၤဒီး တၢ်အိၣ်ဖှိၣ်အတၢ်မုာ်တၢ်ခုၣ်​ ဒီးအတၢ်ဃူတၢ်ဖိးလီၤ. ပှၤပိာ်ခရံာ်အခံတဖၣ်​ အတၢ်ပနီၣ်အကါဒိၣ်ဒီး အဖျါကတၢၢ်န့ၣ်​ မ့ၢ်အဝဲသ့ၣ်အတၢ်အဲၣ်, ဒီး “တၢ်အဲၣ် . . . တဃုဘၣ်အတၢ်ဒၣ်ဝဲဘၣ်” လီၤ.—၁ ကရံၣ်သူး ၁၃:၄, ၅; ယိၤဟၣ်​ ၁၃:၃၄, ၃၅.