အဝဲသ့ၣ်ကွဲးဝဲ ယ့ၣ်ၡူးအဂ့ၢ်

ပှၤပိာ်ခွါလၢ တၢ်ဂီၤပူၤတဖၣ်န့ၣ်နထံၣ်ဧါ.— အဝဲသ့ၣ်မ့ၢ်စီၤမးသဲ, စီၤမၢ်ကူး, စီၤလူၤကၣ်, စီၤယိၤဟၣ်, စီၤပ့းတရူး, စီၤယၤကိာ်, စီၤယူဒၤ, ဒီးစီၤပီလူးလီၤ. အဝဲသ့ၣ်ခဲလၢာ်န့ၣ် အိၣ်မူတစိၤဃီဒီးယ့ၣ်ၡူး ဒီးကွဲးဝဲယ့ၣ်ၡူးအဂ့ၢ်လီၤ. ပကကွၢ်သကိး အဝဲသ့ၣ်အဂ့ၢ်မီၣ်.

အဝဲသ့ၣ်အကျါသၢဂၤန့ၣ် မ့ၢ်တၢ်မၢဖိတဖၣ်လၢ စံၣ်တဲၤတဲလီၤဃုာ်တၢ်ဒီး ယ့ၣ်ၡူးန့ၣ်လီၤ. နဆိကမိၣ်လၢ ပှၤသၢဂၤန့ၣ်ကမ့ၢ်မတၤလဲၣ်.— မ့ၢ်ဒၣ်စီၤမးသဲ, စီၤယိၤဟၣ်, ဒီးစီၤပ့းတရူးလီၤ. တၢ်မၢဖိစီၤမးသဲ ဒီးစီၤယိၤဟၣ် န့ၣ်သ့ၣ်ညါဝဲယ့ၣ်ၡူးဂ့ၤဂ့ၤ ဒီးဘၣ်ဃးယ့ၣ်ၡူးအတၢ်အိၣ်မူအဂ့ၢ်န့ၣ် အဝဲသ့ၣ်ကွဲးဝဲလံာ်ဖိတဂၤတဘ့ၣ်လီၤ. တၢ်မၢဖိစီၤယိၤဟၣ်ကွဲးစ့ၢ်ကီးဝဲ လံာ်လီၣ်ဖျါဒီးလံာ်ဖိအဂၤသၢဘ့ၣ် လၢအမ့ၢ်တၢယိၤဟၣ်, ခံယိၤဟၣ် ဒီးသၢယိၤဟၣ်န့ၣ်လီၤ. တၢ်မၢဖိစီၤပ့းတရူး ကွဲးဝဲလံာ်ဖိခံဘ့ၣ်လၢလံာ်စီဆှံအပူၤလီၤ. လံာ်ဖိခံဘ့ၣ်အံၤပှၤကိးလၢ တၢပ့းတရူးဒီးခံပ့းတရူးလီၤ. လၢအဝဲအလံာ်ဖိခံဘ့ၣ်တဘ့ၣ်အပူၤန့ၣ် စီၤပ့းတရူးကွဲးဝဲဘၣ်ဃးတၢ်ဆၢကတီၢ်လၢ ယဟိဝၤယွၤကတိၤတၢ်လၢမူခိၣ် ဒီးစံးဝဲယ့ၣ်ၡူးအဂ့ၢ်လၢ ‘အဝဲမ့ၢ်ယဖိခွါလၢယအဲၣ်, ဒီးဘၣ်ယသးလၢအီၤ’ န့ၣ်လီၤ.

ပှၤအဂၤလၢတၢ်ဂီၤပူၤတဖၣ် အံၤစ့ၢ်ကီးသိၣ်လိပှၤယ့ၣ်ၡူးအဂ့ၢ် လၢလံာ်ဖိလၢအဝဲသ့ၣ်ကွဲးဝဲတဖၣ်အပူၤလီၤ. အဝဲသ့ၣ်အကျါတဂၤန့ၣ်မ့ၢ်ဝဲ စီၤမၢ်ကူးလီၤ. ဖဲပှၤဟဲဖီၣ်ယ့ၣ်ၡူးအခါလီၤဂာ်လၢ အဝဲကအိၣ်ဝဲဖဲန့ၣ်ဒီး ထံၣ်ဘၣ်တၢ်မၤအသးခဲလၢာ်လီၤ. လၢခံတဂၤန့ၣ်မ့ၢ် စီၤလူၤကၣ်လီၤ. အဝဲမ့ၢ်ကသံၣ်သရၣ်တဂၤဒီး လီၤဂာ်လၢ အဝဲကဲထီၣ်ခရံာ်ဖိလၢ ယ့ၣ်ၡူးသံဝံၤအလီၢ်ခံန့ၣ်လီၤ.

လၢတၢ်ဂီၤအပူၤနကထံၣ်ဘၣ် ပှၤကွဲးလံာ်စီဆှံအဂၤခံဂၤလၢ အမ့ၢ်ယ့ၣ်ၡူးအပုၢ်တဖၣ်လီၤ. အဝဲသ့ၣ်အမံၤဒ်လဲၣ်.— အဝဲသ့ၣ်အမံၤမ့ၢ် စီၤယၤကိာ် ဒီးစီၤယူဒၤလီၤ. သီသီခါန့ၣ်အဝဲသ့ၣ်တနာ် ယ့ၣ်ၡူးဘၣ်. အဝဲသ့ၣ်ဆိကမိၣ်လၢ ယ့ၣ်ၡူးမ့ၢ်ပှၤပျုၢ်လီၤ. ဘၣ်ဆၣ်လၢခံန့ၣ် အဝဲသ့ၣ်နာ်ယ့ၣ်ၡူးဒီး ကဲထီၣ်ပှၤခရံာ်ဖိတဖၣ်လီၤ.

ပှၤအိၣ်တ့ၢ်လၢခံကတၢၢ်တဂၤ လၢတၢ်ဂီၤပူၤန့ၣ်မ့ၢ် ပှၤကွဲးလံာ်စီဆှံ စီၤပီလူးလီၤ. တချုးအဝဲကဲထီၣ်ခရံာ်ဖိအခါ အမံၤမ့ၢ်စီၤစီလူးလီၤ. အဝဲသးဟ့ပှၤခရံာ်ဖိတဖၣ် ဒီးမၤနးမၤဖှီၣ်ဝဲလီၤ. လၢခံန့ၣ်ဘၣ်မနုၤ အဝဲအဲၣ်ဒိးကဲထီၣ်ပှၤခရံာ်ဖိလဲၣ်.— ဘၣ်တနံၤဖဲစီၤပီလူး လဲၤတၢ်လၢကျဲအခါအဝဲနၢ်ဟူ တၢ်ကလုၢ်သီၣ်လၢမူခိၣ် သတူၢ်ကလာ်လီၤ. တၢ်န့ၣ်မ့ၢ်ယ့ၣ်ၡူးအကလုၢ်လီၤ. အဝဲသံကွၢ်စီၤပီလူးလၢ ‘ဘၣ်မနုၤအဃိ နမၤနးမၤဖှီၣ် ပှၤလၢအစူၢ်က့ၤနာ်က့ၤယၤလဲၣ်’ န့ၣ်လီၤ. တၢ်န့ၣ်ဝံၤအလီၢ်ခံ စီၤပီလူးဆီတလဲအသးဒီး ကဲထီၣ်ခရံာ်ဖိတဂၤလီၤ. စီၤပီလူးကွဲးဝဲလံာ်ဖိ ၁၄ ဘ့ၣ်လၢလံာ်စီဆှံအပူၤ, လံာ်ရိမ့ၤတုၤလၢလံာ်ဧ့ၤဘြံၤလီၤ.

ပဖးလံာ်စီဆှံကိးနံၤဒဲး တမ့ၢ်ဘၣ်ဧါ.— ခီဖျိ ပဖးလံာ်စီဆှံအဃိ ပမၤလိဘၣ် ယ့ၣ်ၡူးအဂ့ၢ်အါမးလီၤ. နအဲၣ်ဒိးမၤလိအါထီၣ် ယ့ၣ်ၡူးအဂ့ၢ်ဧါ.—