စီၤပီလူး အဖိဒိၣ်ခွါလၢ အိၣ်ဒီးတၢ်သးဒူ

ပကကွၢ်သကိးပှၤသးစၢ်တဂၤ လၢအမၤပူၤဖျဲး အတံတံအသးသမူအဂ့ၢ်မီၣ်. သးစၢ်အံၤအတံတံန့ၣ်မ့ၢ် စီၤပီလူးလီၤ. ပတသ့ၣ်ညါ ပှၤသးစၢ်တဂၤအံၤအမံၤဘၣ်. ဘၣ်ဆၣ်ပသ့ၣ်ညါလၢ အဝဲမၤတၢ်တမံၤမံၤလၢ အိၣ်ဒီးတၢ်သးဒူလီၤ. အဝဲမၤဝဲတၢ်မနုၤလဲၣ်န့ၣ် မ့ၢ်နအဲၣ်ဒိးသ့ၣ်ညါဧါ.—

စီၤပီလူးအိၣ်လၢဃိာ်ပူၤ လၢဝ့ၢ်ယရူၤၡလ့ၣ်လီၤ. မ့ၢ်လၢအဝဲစံၣ်တဲၤတဲလီၤ ယ့ၣ်ၡူးအဂ့ၢ်အဃိ ပှၤဖီၣ်အီၤလီၤ. ပှၤအၢပှၤသီတနီၤ သးဟ့စီၤပီလူးအဃိ ကူၣ်ထီၣ်ဝဲလၢကမၤအၢအီၤလီၤ. အဝဲသ့ၣ်စံးဝဲလၢ ‘ပကမၢသုးခိၣ် ပျဲလီၤအသုးဖိတဖၣ်လၢ ကဆှၢစီၤပီလူးဆူရူလီၤ. ဝံၤဒီးပကအိၣ်ခူသူၣ်လၢကျဲကပၤဒီး ဖဲစီၤပီလူးဟဲလၢကျဲအခါ ပကမၤသံအီၤလီၤ.’

စီၤပီလူးအဖိဒိၣ်ခွါ နၢ်ဟူဝဲတၢ်ကူၣ်အၢအံၤန့ၣ်လီၤ. အဝဲကမၤဒ်လဲၣ်. အဝဲလဲၤဆူဃိာ်ပူၤ ဒီးတဲဘၣ်စီၤပီလူး တၢ်ဂ့ၢ်အံၤလီၤ. တဘျီဃီန့ၣ် စီၤပီလူးမၤလိာ်အီၤလၢ ကတဲဘၣ်သုးခိၣ်ဘၣ်ဃးဒီး တၢ်ကူၣ်အၢအံၤန့ၣ်လီၤ. စီၤပီလူးအဖိဒိၣ်ခွါ ကတဲဘၣ်သုးခိၣ်လၢ တၢ်ဂ့ၢ်အံၤန့ၣ် နဆိကမိၣ်ကညီလၢအဂီၢ်ဧါ.— တညီဘၣ်, မ့ၢ်လၢသုးခိၣ်မ့ၢ် ပှၤဒိၣ်ပှၤပှၢ်တဂၤအဃိလီၤ. ဘၣ်ဆၣ်စီၤပီလူးအဖိဒိၣ်ခွါ အိၣ်ဒီးတၢ်သးဒူဒီး လဲၤတဲဘၣ်ဝဲသုးခိၣ်လီၤ.

သုးခိၣ်အံၤကဘၣ်မၤဝဲဒ်လဲၣ်န့ၣ် သ့ၣ်ညါဝဲလီၤတံၢ်လီၤဆဲးလီၤ. အဝဲကိးပှၤသုးဖိအဂၤ ၅၀၀ ဃၣ်ဃၣ်လၢ ကဒီသဒၢစီၤပီလူးအဂီၢ်လီၤ. အဝဲတဲအသုးဖိတဖၣ်လၢ ကဘၣ်ဆှၢစီၤပီလူးဆူ ဝ့ၢ်ကဲၤစါရံၤဖဲနၤအဝဲန့ၣ်လီၤ. စီၤပီလူးအသးသမူ ပူၤဖျဲးကစီဒီဧါ.— ပူၤဖျဲးဝဲလီၤ. ပှၤအၢပှၤသီတဖၣ် မၤအၢအီၤတန့ၢ်လၢၤဘၣ်. အဝဲသ့ၣ်အတၢ်ကူၣ်အၢ တကဲထီၣ်လၢၤဘၣ်.

နမၤလိန့ၢ်တၢ်မနုၤလၢ တၢ်ဂ့ၢ်အံၤလဲၣ်.— နၤစ့ၢ်ကီးနပာ်ဖျါတၢ်သးဒူဒ် စီၤပီလူးအဖိဒိၣ်ခွါ အသိးသ့စ့ၢ်ကီးလီၤ. ဖဲပတဲဘၣ်ပှၤဂၤလၢ ယဟိဝၤယွၤအဂ့ၢ်အခါ လိၣ်လၢပကဘၣ်အိၣ်ဒီး တၢ်သးဒူန့ၣ်လီၤ. နကပာ်ဖျါထီၣ်တၢ်သးဒူဒီး တဲဘၣ်ပှၤယဟိဝၤယွၤ အဂ့ၢ်ထီဘိဧါ.— နမ့ၢ်မၤဒ်န့ၣ်ဒီးဘၣ်သ့ၣ်သ့ၣ် နကမၤပူၤဖျဲးပှၤတဂၤဂၤ အသးသမူစ့ၢ်ကီးလီၤ.