စီၤတံၤမသ့း အဲၣ်ဒိးမၤစၢၤပှၤဂၤ

စီၤတံၤမသ့းမ့ၢ်ပှၤသးစၢ်လၢ အဲၣ်ဒိးမၤစၢၤပှၤဂၤလီၤ. အဝဲလဲၤတၢ်လၢတၢ်လီၢ်အါမးလၢ ကမၤစၢၤပှၤဂၤလီၤ. လၢတၢ်အံၤအဃိ အတၢ်အိၣ်မူပှဲၤဒီး တၢ်သူၣ်ခုသးခုလီၤ. နအဲၣ်ဒိး နၢ်ဟူဘၣ်အဝဲအဂ့ၢ်ဧါ.—

စီၤတံၤမသ့းဒိၣ်ထီၣ်လၢ ဝ့ၢ်လူစတြၤလီၤ. ဖဲအနီၢ်ဆံးအခါ, အဖံဖံနီၢ်လိၤအ့ၣ်ဒီး အမိမိၢ်နီၢ်အူၤနံက့ၤ သိၣ်လိအီၤ ယဟိဝၤယွၤအဂ့ၢ်လီၤ. ဖဲစီၤတံၤမသ့းဒိၣ်ထီၣ်အခါ အဝဲအဲၣ်ဒိးမၤစၢၤပှၤဂၤလၢ ကမၤလိယဟိဝၤယွၤအဂ့ၢ်လီၤ.

ဖဲစီၤတံၤမသ့းအသးစၢ်ဒံးအခါ စီၤပီလူးမၢအလဲၤပိာ်အခံလၢ ကလဲၤစံၣ်တဲၤတဲလီၤတၢ်ဆူ တၢ်လီၢ်အဂၤတဖၣ်လီၤ. စီၤတံၤမသ့းစံးဆၢဝဲလၢ ‘မ့ၢ်, ယကလဲၤ’ လီၤ. အဝဲအသးအိၣ်လဲၤမၤစၢၤ ပှၤအဂၤတဖၣ်လီၤ.

စီၤတံၤမသ့းလဲၤပိာ်စီၤပီလူးအခံဆူ ဝ့ၢ်သ့းစၤလနံလၢအိၣ်လၢ ကီၢ်မၤက့းဒနံအပူၤလီၤ. လဲၤဝဲကတုၤဖဲန့ၣ်အဂီၢ် အဝဲသ့ၣ်ဘၣ်ဟးလၢအခီၣ်ဖးယံၤ ဒီးလၢခံဘၣ်ဒိးကဘီလီၤ. ဖဲအဝဲသ့ၣ်လဲၤတုၤအခါ မၤစၢၤဝဲပှၤအါမးလၢ ကမၤလိဘၣ်ယဟိဝၤယွၤအဂ့ၢ်လီၤ. ဘၣ်ဆၣ်ပှၤတနီၤသးထီၣ်အီၤဒီး ဃုကျဲလၢကမၤဆါအီၤလီၤ. လၢတၢ်န့ၣ်အဃိ စီၤပီလူးဒီးစီၤတံၤမသ့း ဟးထီၣ်ဝဲဖဲန့ၣ် ဒီးလဲၤစံၣ်တဲၤတဲလီၤတၢ်လၢ တၢ်လီၢ်အဂၤတဖၣ်လီၤ.

ပူၤကွံာ်တဘျုးလါဝံၤအလီၢ်ခံ စီၤပီလူးမၢစီၤတံၤမသ့းလၢ ကက့ၤကဒါက့ၤဆူ ဝ့ၢ်သ့းစၤလနံဒ်သိး ကလဲၤကွၢ်ဒီပုၢ်ဝဲၢ်တဖၣ် မ့ၢ်တၢ်မၤအသးဒီးအဝဲသ့ၣ်ဒ်လဲၣ်န့ၣ်လီၤ. အဝဲကက့ၤဆူဝ့ၢ်အံၤန့ၣ် တၢ်ဘၣ်ယိၣ်အိၣ်လၢအဂီၢ်အဃိ လိၣ်ဘၣ်ဝဲတၢ်သးဒူအါမးလီၤ. ဘၣ်ဆၣ်မ့ၢ်လၢစီၤတံၤမသ့း ဘၣ်ယိၣ်တၢ်လၢဒီပုၢ်ဝဲၢ်လၢ အိၣ်ဖဲန့ၣ် တဖၣ်အဂီၢ်အဃိ အဝဲလဲၤဝဲလီၤ. အဝဲဟဲက့ၤလၢစီၤပီလူးအအိၣ်အခါ စိာ်ဃုာ်ဝဲဒီးတၢ်ကစီၣ်လၢအဂ့ၤလီၤ. ဒီပုၢ်ဝဲၢ်လၢဝ့ၢ်သ့းစၤလနံတဖၣ် မၤတၢ်ဂ့ၤမးလီၤ.

စီၤတံၤမသ့းမၤသကိးတၢ်ဒီး စီၤပီလူးအနံၣ်အါမးလီၤ. ဘၣ်တဘျီစီၤပီလူးကွဲးဝဲလၢ စီၤတံၤမသ့းမ့ၢ်ပှၤအဂ့ၤကတၢၢ်လၢ အဝဲဆှၢလီၤဝဲသ့ဒ်သိးကမၤစၢၤ တၢ်အိၣ်ဖှိၣ်တဖၣ်အဂီၢ်လီၤ. စီၤတံၤမသ့းအဲၣ်ယဟိဝၤယွၤ ဒီးအဲၣ်ပှၤဂၤလီၤ.

မ့ၢ်နအဲၣ်ပှၤဂၤဒီးနအဲၣ်ဒိးမၤစၢၤ အဝဲသ့ၣ်လၢကမၤလိဘၣ် ယဟိဝၤယွၤအဂ့ၢ်ဧါ.— မ့မ့ၢ်ဒ်န့ၣ်ဒီးနတၢ်အိၣ်မူ ကပှဲၤဒီးတၢ်သူၣ်ခုသးခု ဒ်စီၤတံၤမသ့းအသိးလီၤ.