စီၤဒၤဝံး တပျံၤတၢ်ဘၣ်

ဖဲနပျံၤတၢ်အခါ နမၤတၢ်မနုၤလဲၣ်.— ဘၣ်သ့ၣ်သ့ၣ် နကလဲၤဃ့တၢ်မၤစၢၤလၢ နမိမိၢ်ပါပၢ်အအိၣ်လီၤ. ဘၣ်ဆၣ်, ပှၤအိၣ်ဒံးတဂၤလၢ ကမၤစၢၤနၤစ့ၢ်ကီးလီၤ. အဝဲအစိအကမီၤဒိၣ်န့ၢ်ဒံး ပှၤအဂၤခဲလၢာ်လီၤ. နဆိကမိၣ် ကမ့ၢ်မတၤလဲၣ်.— မ့ၢ်လီၤ, အဝဲမ့ၢ်ယဟိဝၤယွၤလီၤ. ခဲအံၤပကကွၢ်သကိး သးစၢ်တဂၤလၢလံာ်စီဆှံပူၤ လၢအမံၤမ့ၢ်စီၤဒၤဝံးအဂ့ၢ်မီၣ်. အဝဲသ့ၣ်ညါဝဲလၢယဟိဝၤယွၤ ကမၤစၢၤအီၤထီဘိအဃိ အဝဲတပျံၤတၢ်ဘၣ်.

ဖဲစီၤဒၤဝံးအနီၢ်ဆံးဒံးအခါ အမိမိၢ်ပါပၢ်သိၣ်လိအီၤလၢ ကအဲၣ်ယဟိဝၤယွၤအဂီၢ်လီၤ. ဖဲထံၣ်ဘၣ်ဝဲ တၢ်လီၤပျံၤလီၤဖုးအခါ တၢ်အံၤမၤစၢၤအီၤ ဒ်သိးအသုတပျံၤတၢ်တဂ့ၤန့ၣ်လီၤ. အဝဲသ့ၣ်ညါဝဲလၢယဟိဝၤယွၤ မ့ၢ်အတံၤသကိးဒီး ကစၢ်ကမၤစၢၤအီၤလီၤ. တဘျီန့ၣ်, ဖဲစီၤဒၤဝံးကွၢ်သိအခါ ခ့ယုၢ်ဖးဒိၣ်တဒုဟဲဒီး အ့ၣ်စိာ်ဝဲသိဖိတဒုလီၤ. စီၤဒၤဝံးမၤဝဲဒ်လဲၣ်န့ၣ် နသ့ၣ်ညါဧါ. အဝဲလူၤပိာ်ခ့ယုၢ်အခံ, ဖီၣ်န့ၢ်ဝဲဝံၤဒီးမၤသံကွံာ်အီၤလီၤ. လၢခံတဘျီန့ၣ် ဖဲတၤသူတဒုဟဲအ့ၣ်သိဖိအခါ စီၤဒၤဝံးမၤသံကွံာ်အီၤစ့ၢ်ကီးလီၤ. နဆိကမိၣ်လၢ မတၤတဂၤမၤစၢၤ စီၤဒၤဝံးလဲၣ်.— မ့ၢ်လီၤ, ယဟိဝၤယွၤလီၤ.

စီၤဒၤဝံးပာ်ဖျါတၢ်သူၣ်ဒူသးဒူ လီၤလီၤဆီဆီအိၣ်ဒံးတဘျီလီၤ. ပှၤအံၣ်စရ့လးဖိတဖၣ် ဘၣ်ဒုးတၢ်ဒီးပှၤတကလုာ်လၢ ပှၤကိးအီၤလၢပှၤဖလ့ၡသးဖိန့ၣ်လီၤ. အဝဲသ့ၣ်အသုးဖိတဂၤန့ၣ် အနီၢ်ထီဒိၣ်မးဒီး လီၤဂာ်ဒ်ဒိးတကါလီၤ. အဝဲအမံၤမ့ၢ် စီၤကၤလယးလီၤ. ပှၤအံၤတဲဆါဝဲအံၣ်စရ့လး အသုးဖိတဖၣ်ဒီးယဟိဝၤယွၤလီၤ. စီၤကၤလယးမၢအံၣ်စရ့လး အသုးဖိတဖၣ်ဟဲဒုးတၢ်ဒီးအီၤလီၤ. ဘၣ်ဆၣ်ဒီးပှၤအံၣ်စရ့လးဖိခဲလၢာ် ပျံၤအီၤဒီးဒုးတၢ်ဒီးအီၤတဘူၣ်ဘၣ်. ဖဲစီၤဒၤဝံးနၢ်ဟူတၢ်အံၤအခါ အဝဲစံးဝဲစီၤကၤလယးလၢ ‘ယကဒုးတၢ်ဒီးနၤ, ယဟိဝၤယွၤကမၤစၢၤယၤဒီး ယကမၤနၢၤနၤလီၤ.’ နဆိကမိၣ်လၢစီၤဒၤဝံးအိၣ်ဒီး တၢ်သူၣ်ဒူသးဒူဧါ.— မ့ၢ်လီၤ. အဝဲအိၣ်ဒီး တၢ်သူၣ်ဒူသးဒူအါမးလီၤ. လၢခံတၢ်မၤအသးဒ်လဲၣ်န့ၣ် နအဲၣ်ဒိးသ့ၣ်ညါဧါ.

စီၤဒၤဝံးဟံးန့ၢ်နီၣ်ဘျုးဒီး လၢၢ်ဘျ့ယဲၢ်ဖျၢၣ်ဝံၤဒီး လဲၤဒုးတၢ်ဒီးဒိးတကါအံၤလီၤ. ဖဲစီၤကၤလယးထံၣ်ဝဲ သးစၢ်စီၤဒၤဝံးအခါ အဝဲတဲဆါအီၤလီၤ. ဘၣ်ဆၣ်, စီၤဒၤဝံးစံးဘၣ်အီၤ ‘နဟဲဆူယအိၣ်ဒီးနး, ဘၣ်ဆၣ်ယဟဲဆူနအိၣ်လၢ ယဟိဝၤယွၤအမံၤလီၤ.’ ထဲန့ၣ်ဒီးအဝဲဒၢနုာ်လၢၢ်ဆူ အနီၣ်ဘျုးအပူၤ, ဃ့ၢ်ဝဲဆူစီၤကၤလယးအအိၣ်ဒီး ကွံာ်ဝဲလၢၢ်လိၤလိၤဆူအအိၣ်လီၤ. လၢၢ်န့ၣ်လဲၤဘၣ်စီၤကၤလယး အခိၣ်တိသၣ်ဒီးအဝဲ လီၤဃံၤသံဖဲန့ၣ်လီၤ. ပှၤဖလ့ၡသးဖိတဖၣ်ပျံၤတၢ်ဒိၣ်မး အဃိဃ့ၢ်ကွံာ်ခဲလၢာ်လီၤ. ပှၤသးစၢ်ဒ်သိးဒီးစီၤဒၤဝံးတဂၤန့ၣ် မၤနၢၤ ဒိးတကါသ့ဒ်လဲၣ်.— ယဟိဝၤယွၤ မၤစၢၤအီၤအဃိလီၤ. ယဟိဝၤယွၤ အစိအကမီၤဒိၣ်န့ၢ်ဒံး ဒိးတကါတဂၤန့ၣ်လီၤ.

နမၤလိန့ၢ်တၢ်မနုၤလၢ စီၤဒၤဝံးအအိၣ်လဲၣ်.— ယဟိဝၤယွၤအစိအကမီၤဒိၣ်န့ၢ်ဒံး ပှၤဂၤခဲလၢာ်လီၤ. ဒီးကစၢ်မ့ၢ်နတံၤသကိးလီၤ. လၢတၢ်န့ၣ်အဃိလၢခံတဘျီ နမ့ၢ်ပျံၤတၢ်န့ၣ်သ့ၣ်နီၣ်ထီၣ်လၢ ယဟိဝၤယွၤကမၤစၢၤနၤလၢနအိၣ်ဒီး တၢ်သူၣ်ဒူသးဒူကသ့အဂီၢ်န့ၣ်တက့ၢ်.