မ့ၢ်နသ့ၣ်ညါဧါ

လံာ်စီဆှံပူၤတၢ်ကတိၤလၢအမ့ၢ် “ပှၤဒ့ဒံၣ်” န့ၣ် အဲၣ်ဒိးစံးဝဲတၢ်မနုၤလဲၣ်

တဘျီတခီၣ်န့ၣ် တၢ်ကတိၤအံၤအခီပညီမ့ၢ်ဝဲ ပှၤပိာ်ခွါတဂၤလၢ ဘၣ်တၢ်ဒ့အဒံၣ်လီၤ. လၢပျၢၤပှၤပိာ်ခွါတနီၤန့ၣ် ပှၤဒ့အဒံၣ်ခီဖျိလၢ ပှၤစံၣ်ညီၣ်အီၤ, ပှၤဖီၣ်န့ၢ်အီၤ မ့တမ့ၢ်ပှၤမၢကဲကုၢ်အီၤအဃိလီၤ. ပှၤဒ့ဒံၣ်လၢဘၣ်တၢ်နာ်န့ၢ်အီၤတဖၣ်န့ၣ် ပှၤမၢအဝဲသ့ၣ်လၢကကွၢ်ထွဲဝဲ ပိာ်မုၣ်တၢ်အိၣ်တၢ်ဆိးအလီၢ်လၢ စီၤပၤအနီပူၤလီၤ. အဒိ, ပှၤဒ့ဒံၣ်ဖိလၢအမ့ၢ် စီၤဟ့က့ၤဒီးစီၤၡၤၡကးန့ၣ် ပၢၤဝဲပၤရၣ်အစီၤပၤ အဃၤၡဝ့ရိၣ်အမါ ဒီးအသံၣ်မါတဖၣ်လီၤ. ပှၤဆိကမိၣ်ဝဲလၢ စီၤပၤအံၤကမ့ၢ် Xerxes I န့ၣ်လီၤ.—အ့ၤစတၢ် ၂:၃, ၁၄.

ဘၣ်ဆၣ် လၢလံာ်စီဆှံအပူၤ ပှၤလၢအဘၣ်တၢ်ကိးအီၤလၢ ပှၤဒ့ဒံၣ်ဖိန့ၣ် တဘၣ်တၢ်ဒ့အဒံၣ်ကိးဂၤဒဲးဘၣ်. ပှၤတနီၤလၢ အကူၣ်ဘၣ်ကူၣ်သ့ လၢလံာ်စီဆှံတကပၤ စံးဝဲလၢတဘျီတခီၣ် ပှၤလၢအလီၢ်အလၤအိၣ်လၢ စီၤပၤအနီပူၤန့ၣ် ဘၣ်တၢ်ကိးစ့ၢ်ကီးအီၤလၢ ပှၤဒ့ဒံၣ်ဖိလီၤ. ဝံယံးရမံယၤအတံၤသကိး စီၤဧ့ၤဘ့းမ့လ့းဒီး ပှၤအဲၤသံအီးပးဖိ လၢစီၤဖံလံးပူး လဲၤတဲဘၣ်အီၤတၢ်သးခုကစီၣ်န့ၣ် ဖျါလၢအဝဲသ့ၣ်မ့ၢ် ပှၤဒ့ဒံၣ်ဖိဒ်အံၤတကလုာ်လီၤ. စီၤဧ့ၤဘ့းမ့လ့းကတိၤတၢ်ဒီး စီၤပၤလၢအနီၢ်ကစၢ်ဒၣ်ဝဲအဃိ ပသ့ၣ်ညါဘၣ်လၢအဝဲမ့ၢ်ပှၤလၢ အအိၣ်ဒီးအလီၢ်အလၤ လၢစီၤပၤအနီပူၤန့ၣ်လီၤ. (ယံးရမံယၤ ၃၈:၇, ၈) ဒီးပှၤအဲၤသံအီးပးဖိလၢအ “လဲၤထီၣ်ဘါတၢ်လၢယရူၤၡလ့ၣ်” န့ၣ်မ့ၢ်ဝဲပဒိၣ်လၢ အပၢဘၣ်ဝဲတၢ်လုၢ်ဒိၣ်ပှ့ၤဒိၣ်ခဲလၢာ် လၢနီပူၤလီၤ.—မၤတၢ် ၈:၂၇.

လၢပျၢၤပှၤကွၢ်သိတဖၣ်န့ၣ် ဘၣ်မနုၤအဃိဘၣ်နီၤဖးဝဲ သိဒီးမဲာ်တဲးလဲးလဲၣ်

ဘၣ်ဃးဒီး တၢ်စံၣ်ညီၣ်လၢအကဟဲန့ၣ် ယ့ၣ်ၡူးစံးဝဲလၢ “တုၤပှၤကညီဖိခွါအံၤ ကဟဲဒီးအလၤကပီၤ, . . . ဒီးကနီၤဖးအဆၢဒ်ပှၤ ပှၤကွၢ်သိတဂၤနီၤဖးသိဒီး မဲာ်တဲးလဲးအဆၢအသိးန့ၣ်လီၤ.” (မးသဲ ၂၅:၃၁, ၃၂) ဘၣ်မနုၤအဃိလၢ ပှၤကွၢ်သိတဖၣ်နီၤဖးဝဲ သိဒီးမဲာ်တဲးလဲးလဲၣ်.

လၢမုၢ်ဆါခီအဆၢကတီၢ်န့ၣ် သိဒီးမဲာ်တဲးလဲးတဖၣ် ဘၣ်တၢ်ပာ်အီၤတပူၤဃီ ဒီးအီၣ်ဝဲအဆၣ်ဒ်သိးသိးလီၤ. လၢမုၢ်နၤခီအဆၢကတီၢ်န့ၣ် ဘၣ်တၢ်ပာ်အီၤလၢ ကရၢပူၤဒ်သိးကဒီသဒၢအဝဲသ့ၣ်လၢ ဆၣ်ဖိကီၢ်ဖိအအၢ, တၢ်ဘျၣ်ဒီးလၢတၢ်ခုၣ်န့ၣ်လီၤ. (၁ မိၤၡ့ ၃၀:၃၂, ၃၃; ၃၁:၃၈–၄၀) မဲာ်တဲးလဲးန့ၣ် ဃုတၢ်အ့ၣ်လိာ်ဆိးက့လိာ်လီၤ. မ့မ့ၢ်သိန့ၣ်မ့ၢ်ဆၣ်ဖိကီၢ်ဖိလၢအဘှါလီၤ. လၢတၢ်န့ၣ်အဃိ ဒ်သိးတၢ်ကဒီသဒၢသိ, လီၤဆီဒၣ်တၢ် သိဖိဒီးသိမိၢ်တဖၣ်အဂီၢ် ဆၣ်ဖိကီၢ်ဖိခံကလုာ်အံၤ ဘၣ်တၢ်နီၤဖးအီၤလၢ အကရၢလီၤဆီလိာ်သးန့ၣ်လီၤ. လံာ်လၢအမ့ၢ် (All Things in the Bible) ပာ်ဖျါထီၣ်ဝဲလၢ ပှၤကွၢ်သိတဖၣ်န့ၣ် နီၤဖးဝဲသိလၢမဲာ်တဲးလဲးအကျါ လီၤဆီဒၣ်တၢ်ဖဲ “ဖှံလီၤဝဲအဖိ, ပှၤစံၢ်အနုၢ်ထံဒီး ပှၤတံာ်အဆူၣ်” အဆၢကတီၢ်န့ၣ်လီၤ. ခီဖျိလၢကီၢ်အံၣ်စရ့လးအပူၤ သိဒီးပှၤကွၢ်သိတဖၣ် အိၣ်အါဝဲအဃိ ကစၢ်ခရံာ်ဟ့ၣ်တၢ်အဒိအံၤန့ၣ်ဘၣ်ထွဲလိာ်အသးဒီး ပှၤအံၣ်စရ့လးဖိတဖၣ် အတၢ်အိၣ်မူန့ၣ်လီၤ.