တၢ်မၤလိ ၅၀
ဒိကနၣ် ပှၤကွၢ်သိလၢအဂ့ၤတဂၤ အကလုၢ်
“အဝဲသ့ၣ် ကဒိကနၣ် ယကလုၢ်လီၤ.”—ယိၤဟၣ် ၁၀:၁၆.
တၢ်သးဝံၣ် ၃ ပတၢ်ဂံၢ်တၢ်ဘါ, ပတၢ်မုၢ်လၢ်, ပတၢ်နာ်န့ၢ်အလီၢ်
တၢ်မၤလိအံၤ အတၢ်တိာ်ပာ်a
၁. ဘၣ်မနုၤအဃိ ယ့ၣ်ၡူးထိၣ်သတြီၤဝဲ ပှၤလၢအပိာ်အခံတဖၣ် ဒ်သိဖိအသိးလဲၣ်.
ယ့ၣ်ၡူးဒီး အပျဲၢ်အဘီၣ်တဖၣ် အတၢ်ရ့လိာ်သး ဘူးဝဲထဲလဲၣ်န့ၣ် ယ့ၣ်ၡူးထိၣ်သတြီၤဝဲဒီး ပှၤကွၢ်သိဒီးသိဖိတဖၣ် အတၢ်ရ့လိာ်သးလီၤ. (ယိၤဟၣ် ၁၀:၁၄) အဝဲထိၣ်သတြီၤဝဲ ဒ်အံၤန့ၣ် ဖးဘၣ်ညါ. တၢ်လၢသိတဖၣ်န့ၣ် ဒိကနၣ်ဝဲ ပှၤကွၢ်သိအကလုၢ် ဒီးမၤဝဲဒ် ပှၤကွၢ်သိ မၢအီၤအသိးလီၤ. ပှၤလၢအဟးကွၢ်ကီတၢ်တဂၤန့ၣ် ထံၣ်ဘၣ်ဝဲ တၢ်မၤအသးတခါလီၤ. ဒီးအဝဲတဲဝဲလၢ “ပဘၣ်သး ဒိသိဖိတနီၤအတၢ်ဂီၤအဃိ ပမၤဒ်သိး အဝဲသ့ၣ်ကဟဲဘူးထီၣ်လၢပအိၣ်. ဘၣ်ဆၣ်မ့ၢ်လၢ အဝဲသ့ၣ် တသ့ၣ်ညါ ပကလုၢ်ဘၣ်အဃိ အဝဲသ့ၣ်တဟဲလၢပအိၣ်ဘၣ်. ဘၣ်ဆၣ် ဖဲပှၤပိာ်ခွါဖိလၢ အကွၢ်သိတဂၤ ဟဲကိးဝဲသိတဖၣ်န့ၣ်အခါ သိတဖၣ်န့ၣ် ပိာ်ထီၣ်အခံ” လီၤ.
၂-၃. (က) ပှၤလၢအပိာ်ယ့ၣ်ၡူးအခံတဖၣ် ပာ်ဖျါထီၣ်ဝဲလၢ အဒိကနၣ်ယ့ၣ်ၡူးအကလုၢ် ကသ့ဒ်လဲၣ်. (ခ) လၢတၢ်မၤလိအံၤအပူၤ ဒီးတၢ်မၤလိ လၢခံတခါအပူၤန့ၣ် ပကတဲသကိး တၢ်ဂ့ၢ်မနုၤလဲၣ်.
၂ ပှၤလၢအဟးကွၢ်ကီတၢ်တဂၤ အတၢ်လဲၤခီဖျိန့ၣ် ဒုးသ့ၣ်နီၣ်ပှၤ ယ့ၣ်ၡူးအတၢ်ကတိၤ လၢဘၣ်ဃးဒီး အသိလၢအမ့ၢ်ဝဲ အပျဲၢ်အဘီၣ်တဖၣ်လီၤ. ယ့ၣ်ၡူးတဲဝဲလၢ “အဝဲသ့ၣ် ကဒိကနၣ် ယကလုၢ်လီၤ.” (ယိၤဟၣ် ၁၀:၁၆) ဘၣ်ဆၣ် ယ့ၣ်ၡူးအိၣ်လၢမူခိၣ်အဃိ ပဒိကနၣ်အကလုၢ် ကသ့ဒ်လဲၣ်. ပဒိကနၣ် ပကစၢ်အကလုၢ်သ့ ခီဖျိပမၤထွဲ တၢ်လၢအဝဲသိၣ်လိဝဲတဖၣ်လီၤ.—မးသဲ ၇:၂၄, ၂၅.
၃ လၢတၢ်မၤလိအံၤအပူၤ ဒီးလၢတၢ်မၤလိလၢခံတခါန့ၣ် ပကတဲသကိး တၢ်လၢယ့ၣ်ၡူး သိၣ်လိဝဲတဖၣ်လီၤ. ပကသ့ၣ်ညါဘၣ် ယ့ၣ်ၡူးအတၢ်သိၣ်လိတနီၤ လၢအဘၣ်ဃးဒီး တၢ်လၢပတဘၣ်မၤအီၤလၢၤဘၣ် ဒီးတၢ်လၢပကဘၣ်မၤအီၤတဖၣ်. အဆိကတၢၢ် ပကကွၢ်သကိး တၢ်ဂ့ၢ်ခံထံၣ်လၢ ပှၤကွၢ်သိလၢအဂ့ၤတဂၤ မၢပပတုာ်မၤအီၤ.
“တဘၣ် ဘၣ်ယိၣ်တၢ် တလၢကွံာ်အခၢး လၢၤတဂ့ၤ”
၄. ဒ် လူၤကၣ် ၁၂:၂၉ ပာ်ဖျါထီၣ်ဝဲအသိး ဘၣ်မနုၤအဃိ ပှၤတနီၤန့ၣ် “ဘၣ်ယိၣ်တၢ် တလၢကွံာ်အခၢး” လဲၣ်.
၄ ဖး လူၤကၣ် ၁၂:၂၉. ယ့ၣ်ၡူးဟ့ၣ်ဂံၢ်ဟ့ၣ်ဘါ ပှၤလၢအပိာ်အခံတဖၣ်လၢ ဘၣ်ဃးဒီးအဝဲသ့ၣ် အတၢ်လိၣ်ဘၣ် လၢနီၢ်ခိတကပၤန့ၣ် အဝဲသ့ၣ် “တဘၣ် ဘၣ်ယိၣ်တၢ် တလၢကွံာ်အခၢးလၢၤ” ဘၣ်. ပသ့ၣ်ညါလၢ ယ့ၣ်ၡူးအတၢ်ဟ့ၣ်ကူၣ်န့ၣ် အပှဲၤဒီးတၢ်ကူၣ်သ့ ဒီးအဘၣ်ထီဘိ အဃိ ပအဲၣ်ဒိးမၤထွဲအီၤလီၤ. ဘၣ်ဆၣ် တဘျီတခီၣ်န့ၣ် ပကမၤထွဲအီၤအဂီၢ် တညီဝဲဘၣ်. ဘၣ်မနုၤအဃိလဲၣ်န့ၣ် ပကကွၢ်သကိးအီၤခဲအံၤ.
၅. ဘၣ်မနုၤအဃိ ပှၤတနီၤ ကဘၣ်ယိၣ်တၢ်လၢ အနီၢ်ခိတၢ်လိၣ်ဘၣ်အဂီၢ်လဲၣ်.
၅ ပှၤတနီၤနီၤန့ၣ် ဘၣ်ယိၣ်တၢ် ဘၣ်ဃးဒီး အတၢ်လိၣ်ဘၣ်လၢနီၢ်ခိတခီ ဒ်သိးဒီး တၢ်အီၣ်တၢ်အီ, တၢ်ကူတၢ်သိး ဒီးတၢ်အိၣ်တၢ်ဆိး အဂီၢ်လီၤ. ဘၣ်သ့ၣ်သ့ၣ် အဝဲသ့ၣ်န့ၣ် ကအိၣ်ဘၣ်လၢ ထံကီၢ်လၢအဖှီၣ် ဒီးဃုတၢ်မၤတညီဘၣ်. ဒီးတနီၤန့ၣ် ကဘၣ်ဃုကျိၣ်စ့ကီကီခဲခဲ ဒီးကျိၣ်စ့တယၢလၢ ဟံၣ်ဖိဃီဖိ အဂီၢ်ဘၣ်. မ့တမ့ၢ် ပှၤလၢ အလုၢ်အီၣ်လုၢ်အီ ဟံၣ်ဖိဃီဖိတဂၤန့ၣ် သံသဒၣ်ကွံာ် အဝဲသ့ၣ် အဃိ ဟံၣ်ဖိဃီဖိလၢ အအိၣ်တ့ၢ်တဖၣ် အကျိၣ်စ့တအိၣ်လၢ ကလုၢ်အီၣ်အသးသမူအဂီၢ်ဘၣ်. ဒီးတနီၤန့ၣ် ခီဖျိလၢ ခိၤရိၤနၤ တၢ်ဆါ (COVID-19) အဃိ အတၢ်မၤတအိၣ်လၢၤဘၣ်, ဒီးကျိၣ်စ့တၢ်ဟဲနုာ် တအိၣ်လၢၤဘၣ်. (စံၣ်တဲၤတဲလီၤတၢ် ၉:၁၁) နမ့ၢ်ထံၣ်ဘၣ် တၢ်ကီတၢ်ခဲဒ်အံၤတဖၣ် ဒီးတၢ်ကီတၢ်ခဲအဂၤတဖၣ်န့ၣ် ပမၤပိာ်ထွဲ ယ့ၣ်ၡူးအတၢ်ဟံးစုနဲၣ်ကျဲလၢ တဘၣ်ဘၣ်ယိၣ်တၢ် လၢၤတဂ့ၤန့ၣ် ကသ့ဒ်လဲၣ်.
တဘၣ်ဟ့ၣ်အခွဲးလၢ နကလီၤဘျၢလၢ နတၢ်ဘၣ်ယိၣ်ဘၣ်ဘှီလၢ နီၢ်ခိတၢ်လိၣ်ဘၣ်တဖၣ်တဂ့ၤ. နကဘၣ်မၤဂၢၢ်ကျၢၤထီၣ် နတၢ်နာ်န့ၢ် ယဟိဝၤယွၤ (ကွၢ်လံာ်အဆၢ ၆-၈)b
၆. ဘၣ်တဘျီ တၢ်မၤအသးဒီး စီၤပ့းတရူး ဒ်လဲၣ်န့ၣ် တဲဖျါထီၣ်တက့ၢ်.
၆ ဘၣ်တဘျီ တၢ်မၢဖိပ့းတရူး ဒီးတၢ်မၢဖိအဂၤတဖၣ် အိၣ်လၢကဘီပူၤ လၢပီၣ်လဲၣ် ကၤလံၤလါအပူၤလီၤ. ဖဲန့ၣ်အဆၢကတီၢ် ကလံၤမုၢ်ဖးဒိၣ်လီၤဝဲ ဒီးအဝဲသ့ၣ်ထံၣ် ယ့ၣ်ၡူးဟးဝဲလၢ ထံဖံးခိၣ်လီၤ. ဒီးစီၤပ့းတရူး တဲဝဲလၢ “ကစၢ်ဧၢ, မ့မ့ၢ်နၤန့ၣ် မၢယဟဲလၢနအိၣ် လၢထံဖံးခိၣ်တက့ၢ်.” ဖဲယ့ၣ်ၡူးတဲအီၤလၢ “ဟဲ” အခါ စီၤပ့းတရူး ဟးထီၣ်လၢ ကဘီပူၤဒီး “ဟးဝဲလၢထံဖံးခိၣ် ဒီးလဲၤဝဲဆူ ယ့ၣ်ၡူးအအိၣ်လီၤ.” ဘၣ်ဆၣ် ဖဲစီၤပ့းတရူး “ကွၢ်ဝဲ ကလံၤမုၢ်အခါ အဝဲပျံၤတၢ်လီၤ. ဒီးဖဲအဝဲစးထီၣ် လီၤဘျၢအခါ ကိးပသူထီၣ်ဝဲလၢ ‘ကစၢ်ဧၢ, မၤပူၤဖျဲးယၤ.’” ဒီးယ့ၣ်ၡူး ယူာ်ဃီၤအစုဆူအအိၣ် ဒီးမၤစၢၤအီၤလီၤ. ဖဲစီၤပ့းတရူး သးစၢၢ်ဆၢဝဲ ယ့ၣ်ၡူးအခါ အဝဲဟးဝဲလၢ ထံလၢအဟူးဝးဆှဲးဆှိး အဖီခိၣ်န့ၢ်ဝဲ ဘၣ်ဆၣ် ဖဲအဝဲကွၢ်ဝဲ ကလံၤမုၢ်အခါ အပျံၤထီၣ်တၢ်, အသးဒ့ဒီ ဒီးအလီၤဘျၢဝဲလီၤ.—မးသဲ ၁၄:၂၄-၃၁.
၇. ပမၤလိန့ၢ် တၢ်မနုၤလၢ စီၤပ့းတရူး အအိၣ်လဲၣ်.
၇ ပမၤလိန့ၢ်တၢ်လၢ စီၤပ့းတရူးအအိၣ် သ့ဝဲလီၤ. ဖဲစီၤပ့းတရူး ဟးထီၣ်လၢ ကဘီပူၤအခါ တမ့ၢ်လၢ အကဆိကမိၣ်လၢ အကပျံၤတၢ်ဒီး ကလီၤဘျၢဘၣ်. အအဲၣ်ဒိး ဟးလၢထံဖီခိၣ် တုၤလၢယ့ၣ်ၡူးအအိၣ်လီၤ. ဘၣ်ဆၣ် လၢအဝဲ ကသးစၢၢ်ဆၢ ယ့ၣ်ၡူးအလီၢ်န့ၣ် အဝဲသးစၢၢ်ဆၢဘၣ်ဝဲလၢ ကလံၤမုၢ်ဟီ. ဒ်သိး စီၤပ့းတရူး ဟးလၢထံဖီခိၣ်ကန့ၢ်အဂီၢ် အကဘၣ်အိၣ်ဒီး တၢ်နာ်လီၤ. မုၢ်မဆါတနံၤအံၤစ့ၢ်ကီး ပကဘၣ်အိၣ်ဒီးတၢ်နာ် ဒ်သိးပလဲၤခီဖျိ တၢ်ကီတၢ်ခဲတဖၣ် ကန့ၢ်အဂီၢ်. ပမ့ၢ်တသးစၢၢ်ဆၢ ယဟိဝၤယွၤ အတၢ်အၢၣ်လီၤတဖၣ်ဘၣ်န့ၣ် ပတၢ်ဘၣ်ယိၣ်ဘၣ်ဘှီ ကအါထီၣ် ဒီးပနီၢ်သး ကလီၤစၢ်ဝဲလီၤ. ပမ့ၢ်ထံၣ်ဘၣ်ဒီး တၢ်ကီတၢ်ခဲ ဒိၣ်ထဲလဲၣ်ဂ့ၤထဲလဲၣ်ဂ့ၤ ပကဘၣ် ဆဲးသးစၢၢ်ဆၢလၢ ယဟိဝၤယွၤ ဒီးနာ်လၢအဝဲအိၣ်ဒီး တၢ်သ့တၢ်ဘၣ်လၢကမၤစၢၤပှၤ. ပမၤအီၤကသ့ဒ်လဲၣ်.
၈. ဘၣ်မနုၤအဃိ ပတဘၣ်ဘၣ်ယိၣ်တၢ် အါတလၢ လၢပနီၢ်ခိ အတၢ်လိၣ်ဘၣ် အဂီၢ်လဲၣ်.
၈ လၢပကသူၣ်ကိၢ်သးဂီၤတၢ်လၢ ပတၢ်ကီတၢ်ခဲတဖၣ်အလီၢ် ပကဘၣ်သန့ၤပသးလၢ ယဟိဝၤယွၤလီၤ. ယဟိဝၤယွၤ အၢၣ်လီၤပှၤလၢ ပမ့ၢ်ပာ်ဆိ နီၢ်သးအတၢ်ဖံးတၢ်မၤလၢ နီၣ်ဂံၢ်တၢန့ၣ် အကမၤစၢၤပှၤလၢ နီၢ်ခိတကပၤစ့ၢ်ကီးလီၤ. (မးသဲ ၆:၃၂, ၃၃) ကစၢ်ယွၤမၤလၢပှဲၤ အတၢ်အၢၣ်လီၤအံၤ ထီဘိလီၤ. (၅ မိၤၡ့ ၈:၄, ၁၅, ၁၆; စံးထီၣ်ပတြၢၤ ၃၇:၂၅) ယဟိဝၤယွၤ မ့ၢ်ကွၢ်ထွဲဝဲ ထိၣ်တဖၣ် ဒီးဖီတဖၣ်န့ၣ် ပဝဲသ့ၣ်စ့ၢ်ကီး ပနာ်သ့သပှၢ်ကတၢၢ်လၢ ပတလိၣ်ဘၣ်ယိၣ်တၢ်လၢ ပကအီၣ်အီ ဒီးကူဘၣ်သိးဘၣ် အဂီၢ်ဘၣ်. (မးသဲ ၆:၂၆-၃၀; ဖံလံးပံၤ ၄:၆, ၇) မိၢ်ပၢ်လၢ အအဲၣ်အဖိန့ၣ် ကမၤန့ၢ်ဝဲ အဖိအတၢ်လိၣ်ဘၣ်လၢ နီၢ်ခိတခီလီၤ. ဒ်န့ၣ်အသိး ပပၢ်လၢမူခိၣ် လၢအအိၣ်ဒီး တၢ်အဲၣ်တၢ်ကွံတဂၤန့ၣ် အဝဲကမၤန့ၢ် အခ့အပှၤ အတၢ်လိၣ်ဘၣ်လၢ နီၢ်ခိတခီလီၤ. အဃိ ပနာ်သ့သပှၢ်ကတၢၢ်လၢ ယဟိဝၤယွၤ ကကွၢ်ထွဲပှၤလီၤ.
၉. လၢပှၤဒီမါဝၤခံဂၤအံၤ အတၢ်လဲၤခီဖျိန့ၣ် ပမၤလိန့ၢ်ဘၣ် တၢ်မနုၤလဲၣ်.
၉ ယဟိဝၤယွၤ ကွၢ်ထွဲ ပတၢ်လိၣ်ဘၣ်လၢ နီၢ်ခိတကပၤဒ်လဲၣ်န့ၣ် ပကကွၢ်သကိး တၢ်လဲၤခီဖျိတခါ. ပှၤဒီမါဝၤခံဂၤ လၢအမၤပှၤလဲၤလၢညါတၢ်မၤန့ၣ် ဘၣ်တဘျီ အဝဲသ့ၣ်နီဝဲကါ တနၣ်ရံၣ်ဘျဲၣ် လၢကလဲၤအိၣ်ဝဲ ဒီပုၢ်ဝဲၢ်မုၣ်တနီၤလၢ အအိၣ်လၢ ဘၣ်ကီဘၣ်ခဲဒဲကဝီၤပူၤ ဒ်သိး ကဟဲထီၣ် တၢ်အိၣ်ဖှိၣ်အဂီၢ်. အဝၤတဲဝဲလၢ “ဖဲတၢ်အိၣ်ဖှိၣ် ဝံၤအခါ ပကွဲမုာ် ဒီပုၢ်ဝဲၢ်မုၣ်တဖၣ်အံၤလၢ ကဟဲအီၣ်သကိးတၢ်ဒီးပှၤအဂီၢ်. ဘၣ်ဆၣ် ဝံၤဘျီပသ့ၣ်ညါလၢ ပကဒုးအီၣ်အဝဲသ့ၣ် တၢ်အီၣ်အဂီၢ် တၢ်တအိၣ်နီတမံၤဘၣ်.” အဃိ ပှၤဒီမါဝၤခံဂၤအံၤ ကမၤဝဲဒ်လဲၣ်. အဝၤဆဲးတဲဝဲလၢ “ဖဲပက့ၤတုၤလၢဟံၣ်အခါ လၢပဟံၣ်မဲာ်ညါန့ၣ် အိၣ်ဒီးတၢ်အီၣ်အထၢၣ်ခံဖျၢၣ်. မတဂၤ ဟဲပာ်လီၤဝဲလဲၣ်န့ၣ် ပတသ့ၣ်ညါဘၣ်, ဘၣ်ဆၣ် ပသ့ၣ်ညါလၢ ယဟိဝၤယွၤ ကွၢ်ထွဲပှၤ.” လၢခံတယံာ်ဘၣ်ဒီး ပှၤဒီမါဝၤ ခံဂၤအံၤန့ၣ် အကါဟးဂီၤဝဲ. ဒ်သိး အဝဲသ့ၣ် ဟးစံၣ်တဲၤတဲလီၤတၢ် ကသ့အဂီၢ်န့ၣ် အဝဲသ့ၣ် ကဘၣ်ဘှီထီၣ်က့ၤ အကါ ဘၣ်ဆၣ် အဝဲသ့ၣ် ကဘှီထီၣ်က့ၤဝဲအဂီၢ်န့ၣ် အစ့တအိၣ်ဘၣ်. ဖဲအဝဲသ့ၣ်လဲၤလၢ ပှၤဘှီထီၣ်ကါအလီၢ် လၢအအိၣ်ဘူးဒီး အဝဲသ့ၣ်အခါ ပှၤပိာ်ခွါတဂၤ ဟဲသံကွၢ်ဝဲလၢ “မတဂၤအကါတခိၣ်အံၤလဲၣ်.” ဒီးဒီပုၢ်ဝဲၢ်ခွါတဂၤအံၤ တဲဆၢအီၤလၢ အကဲအကါ ဒီးအကဘၣ် ဘှီထီၣ်က့ၤအီၤ. ဒီးပှၤပိာ်ခွါတဂၤအံၤ တဲအီၤလၢ ‘ဘၣ်နီမံၤဘၣ်, ယမါလီကီဝဲ ကါအမၠိအစါဒ်အံၤ ဒီးအလွဲၢ် ဒ်အံၤ. နကဆါန့ၢ်ယၤဧါ, နလီကီအပှ့ၤထဲလဲၣ်.’ ဒီပုၢ်ဝဲၢ်ခွါတဂၤအံၤ ဆါန့ၢ်အီၤအကါ ဒီးစ့လၢပိာ်ခွါတဂၤအံၤ ဟ့ၣ်လီၤအီၤန့ၣ် အဝဲပှ့ၤက့ၤကါလၢအသီ န့ၢ်ဝဲတခိၣ်. ဒီပုၢ်ဝဲၢ်ခွါတဂၤအံၤ တဲဝဲလၢ “ဖဲတၢ်တနံၤန့ၣ် ပသးခုဒိၣ်မး ဒီးပသ့ၣ်ညါလၢ တၢ်ကဲထီၣ်အသး တခါအံၤန့ၣ် အကဲဝဲဒၣ် ယဟိဝၤယွၤ မၤစၢၤပှၤလီၤ.”
၁၀. စံးထီၣ်ပတြၢၤ ၃၇:၅ မၤစၢၤပှၤလၢ ပသုတသူၣ်ကိၢ်သးဂီၤတၢ် ဘၣ်ဃးဒီး ပနီၢ်ခိ အတၢ်လိၣ်ဘၣ်အဂီၢ် န့ၣ်ဒ်လဲၣ်.
၁၀ ပမ့ၢ်ဒိကနၣ် ပှၤကွၢ်သိလၢအဂ့ၤတဂၤ အကလုၢ် ဒီးပမ့ၢ်တဘၣ်ယိၣ်တၢ် အါတလၢလၢ ပနီၢ်ခိအတၢ်လိၣ်ဘၣ် တကပၤဘၣ်န့ၣ် ပနာ်သ့သပှၢ်ကတၢၢ်လၢ ယဟိဝၤယွၤ ကဟ့ၣ်လီၤပှၤ တၢ်လၢပလိၣ်ဘၣ်တဖၣ်လီၤ. (ဖး စံးထီၣ်ပတြၢၤ ၃၇:၅; ၁ ပ့းတရူး ၅:၇) အဒိ, ပကကွၢ်သကိး တၢ်ကီတၢ်ခဲတဖၣ်လၢ ဘၣ်တၢ်ပာ်ဖျါထီၣ်အီၤလၢ လံာ်အဆၢ ၅ အပူၤ. ဘၣ်သ့ၣ်သ့ၣ် ယဟိဝၤယွၤ ကသူဝဲဟံၣ်ခိၣ် မ့တမ့ၢ် ပှၤမၤတၢ်မၤတဂၤဂၤ ဒ်သိး ကကွၢ်ထွဲ ပှၤလၢပတၢ်လိၣ်ဘၣ် လၢကိးနံၤဒဲး အဂီၢ်လီၤ. ဒီးဟံၣ်ခိၣ် မၤတၢ်မ့ၢ်တကဲလၢၤဘၣ် ဒီးပတၢ်မၤ မ့ၢ်တအိၣ်လၢၤဘၣ်န့ၣ် ပနာ်သ့သပှၢ်ကတၢၢ်လၢ ယဟိဝၤယွၤ ကကွၢ်ထွဲပှၤလၢ ကျဲလၢအဂၤတဘိဘိလီၤ. ခဲအံၤ ပကကွၢ်သကိး တၢ်အဂၤတခါလၢ ပှၤကွၢ်သိလၢအဂ့ၤတဂၤ မၢပပတုာ်မၤအီၤ.
“တဘၣ်စံၣ်ညီၣ် ပှၤဂၤလၢၤတဂ့ၤ”
ပမ့ၢ်သးစၢၢ်ဆၢလၢ ပှၤဂၤအတၢ်ဂ့ၤတၢ်ဝါတခီန့ၣ် တမ့ၢ်လၢ ပကစံၣ်ညီၣ်ပှၤဂၤလၢၤဘၣ် (ကွၢ်လံာ်အဆၢ ၁၁, ၁၄-၁၆)c
၁၁. ဖဲ မးသဲ ၇:၁, ၂ န့ၣ်ယ့ၣ်ၡူးတဲဝဲလၢ ပတဘၣ်မၤ တၢ်မနုၤလၢၤဘၣ်လဲၣ်, ဒီးဘၣ်မနုၤအဃိ ကီလၢ ပကမၤထွဲအီၤ အဂီၢ်လဲၣ်.
၁၁ ဖး မးသဲ ၇:၁, ၂. ယ့ၣ်ၡူးသ့ၣ်ညါဝဲလၢ ပှၤဟီၣ်ခိၣ်ဖိတဖၣ်န့ၣ် တလၢတပှဲၤဘၣ် ဒီးအထံၣ်ပှၤဂၤ အတၢ်ကမၣ် ညီဒိၣ်မး. အဃိ အတဲဝဲလၢ “တဘၣ်စံၣ်ညီၣ် ပှၤဂၤလၢၤတဂ့ၤ.” ဘၣ်သ့ၣ်သ့ၣ် ပကဂုာ်ကျဲးစၢး ဒ်သိး ပသုတစံၣ်ညီၣ်ဘၣ် ပဒီပုၢ်ဝဲၢ်မုၣ်ခွါတဖၣ် တဂ့ၤအဂီၢ်လီၤ. ဘၣ်ဆၣ် ပမၤအီၤ တထီၣ်ဘး ထီဘိဘၣ်. တဘျီတခီၣ် ပမ့ၢ်သ့ၣ်ညါလီၤပသးလၢ ပထံၣ်ပှၤဂၤ အတၢ်ကမၣ်န့ၣ် ပကြၢးမၤ တၢ်မနုၤလဲၣ်. ဂုာ်ကျဲးစၢး ဒိကနၣ်ယ့ၣ်ၡူးအကလုၢ် ဒီးတဘၣ်စံၣ်ညီၣ်ပှၤဂၤ လၢၤတဂ့ၤ.
၁၂-၁၃. ပမ့ၢ်ဆိကမိၣ်ထံ ယဟိဝၤယွၤ အတၢ်ထံၣ်လၢ စီၤဒၤဝံးအဖီခိၣ်န့ၣ် ကမၤစၢၤပှၤဒ်လဲၣ်.
၁၂ ပမ့ၢ်ဆိကမိၣ်ထံ ယဟိဝၤယွၤ အဒိအတဲာ်န့ၣ် ကကဲဘျုးလၢပဂီၢ်လီၤ. ယဟိဝၤယွၤန့ၣ် အသးစၢၢ်ဆၢဝဲလၢ ပှၤဂၤအတၢ်ဂ့ၤ တကပၤလီၤ. ပကဆိကမိၣ်ကွၢ် ဖဲစီၤပၤဒၤဝံး မၤဘၣ်တၢ်ကမၣ်ဖးဒိၣ်အခါ ယဟိဝၤယွၤ ရ့ဒီးအီၤဒ်လဲၣ်. အဒိ, စီၤဒၤဝံး မၤကမၣ်မုၣ်ကမၣ်ခွါဒီး နီၢ်ဘၤသၡ့ဘၤဒီး အကူၣ်သံ နီၢ်ဘၤသၡ့ဘၤအဝၤလီၤ. (၂ ၡမူၤအ့လး ၁၁:၂-၄, ၁၄, ၁၅, ၂၄) တၢ်လၢစီၤဒၤဝံးမၤဝဲတဖၣ်အံၤ တမၤဘၣ်ဒိထဲအီၤဘၣ်. မၤဘၣ်ဒိဃုာ်ဒီး အဟံၣ်ဖိဃီဖိ ဒီးအမါတဖၣ်လီၤ. (၂ ၡမူၤအ့လး ၁၂:၁၀, ၁၁) အဂၤတဘျီန့ၣ် စီၤဒၤဝံးမၢပှၤဂံၢ် ပှၤအံၣ်စရ့လး အသုးဖိတဖၣ် အနီၣ်ဂံၢ်အဃိ အဝဲပာ်ဖျါထီၣ်ဝဲလၢ အတနာ်န့ၢ် ယဟိဝၤယွၤ လၢလၢပှဲၤပှဲၤဘၣ်. ဘၣ်သ့ၣ်သ့ၣ် ကမ့ၢ်လၢ အဝဲကပာ်ထီၣ်ထီအသး ဒီးကသန့ၤအသးလၢ အသုးမုၢ်လီၤ. အဃိ ပှၤအံၣ်စရ့လးဖိ အဂၤ ၇၀,၀၀၀ န့ၣ်ဘၣ်သံလၢ တၢ်ဆါသံသတြိာ်လီၤ.—၂ ၡမူၤအ့လး ၂၄:၁-၄, ၁၀-၁၅.
၁၃ နမ့ၢ်အိၣ်ဘၣ်လၢ ပှၤအံၣ်စရ့လးဖိ ဖဲန့ၣ်တဖၣ်အစိၤန့ၣ် နကထံၣ် စီၤဒၤဝံးဒ်လဲၣ်. မ့ၢ်နကဆိကမိၣ်လၢ စီၤဒၤဝံးတကြၢးဒီး ယဟိဝၤယွၤ အတၢ်သးကညီၤဧါ. ဘၣ်ဆၣ် ယဟိဝၤယွၤ တဆိကမိၣ်ဝဲ ဒ်န့ၣ်ဘၣ်. အဝဲ သးစၢၢ်ဆၢဝဲ စီၤဒၤဝံး အတၢ်သးတီလၢ အတၢ်အိၣ်မူဒီတစိၤ ဒီးအတၢ်ပီၢ်ယၢ်လီၤသး နီၢ်ကီၢ်လီၤ. အဃိ စီၤဒၤဝံး မၤဘၣ် တၢ်ကမၣ်ဖးဒိၣ် သနာ်က့ ယဟိဝၤယွၤ ပျၢ်ကွံာ်အတၢ်ကမၣ်. ယဟိဝၤယွၤသ့ၣ်ညါဝဲလၢ စီၤဒၤဝံးအဲၣ်အီၤဒိၣ်မး ဒီးအအဲၣ်ဒိးမၤ တၢ်လၢအဘၣ်လီၤ. ကစၢ်ယွၤ ကွၢ်ဝဲ ပတၢ်ဂ့ၤတၢ်ဝါတဖၣ် ဒီးပတၢ်မၤလၢအဂ့ၤတဖၣ်အဃိ ပစံးဘျုးဘၣ်အီၤဒိၣ်မး တမ့ၢ်ဧီၤ.—၁ စီၤပၤ ၉:၄; ၁ ကွဲးနီၣ်တၢ် ၂၉:၁၀, ၁၇.
၁၄. တၢ်မနုၤကမၤစၢၤပှၤ ဒ်သိးပသုတစံၣ်ညီၣ်ပှၤဂၤ လၢၤတဂ့ၤအဂီၢ်လဲၣ်.
၁၄ ယဟိဝၤယွၤ မ့ၢ်တမုၢ်လၢ် တၢ်လၢတၢ်ပှဲၤလၢ ပအိၣ်ဘၣ်န့ၣ် ပတကြၢးမုၢ်လၢ် တၢ်လၢတၢ်ပှဲၤလၢ ပှၤဂၤအအိၣ်စ့ၢ်ကီးဘၣ်. ဒီးပကဘၣ်ထံၣ်လၢ ပှၤဂၤအတၢ်ဂ့ၤ တကပၤလီၤ. ညီနုၢ်န့ၣ် ပကထံၣ် ပှၤဂၤအတၢ်လီၤတူာ်လီၤကာ် ဒီးတၢ်ကမၣ်အဂီၢ်န့ၣ် ညီဒိၣ်မး. ဘၣ်ဆၣ် ပှၤလၢအကွၢ်လိမၤဒိး ယဟိဝၤယွၤန့ၣ် မ့ၢ်ထံၣ်ဝဲ ပှၤဂၤအတၢ်လီၤတူာ်လီၤကာ် သနာ်က့ ကဆဲးမၤသကိးတၢ်ဒီးပှၤဂၤ ဂ့ၤဂ့ၤလီၤ. လၢၢ်တၢ်မျၢ်လၢ ပှၤတထူးဘျ့ထီၣ်အီၤဒံးဘၣ်န့ၣ် အတဖျါဃံလၤဘၣ်. ဘၣ်ဆၣ် ပှၤလၢအအိၣ်ဒီး တၢ်ကူၣ်သ့တဂၤန့ၣ် တကွၢ်ထဲ တၢ်လၢအအိၣ်ဖျါလၢခိဘၣ်. အသ့ၣ်ညါဝဲဒၣ်လၢ ပှၤမ့ၢ်ထူးဘျ့အီၤ ဒီးမၤကဆှီထီၣ်အီၤန့ၣ် ကဖျါဃံလၤ ဒီးအလုၢ်အပှ့ၤဒိၣ်ဝဲလီၤ. ဒ်ယဟိဝၤယွၤ ဒီးယ့ၣ်ၡူးအသိး ပတဘၣ်သးစၢၢ်ဆၢ ပှၤဂၤအတၢ်လီၤတူာ်လီၤကာ်ဘၣ်. လၢတၢ်န့ၣ်အလီၢ် ပကဘၣ်ကွၢ်လၢ အဝဲသ့ၣ် အတၢ်ဂ့ၤတၢ်ဝါ တဖၣ်လီၤ.
၁၅. ပမ့ၢ်နၢ်ပၢၢ်စၢၤ ပှၤဂၤအတၢ်အိၣ်သးန့ၣ် ကမၤစၢၤပှၤလၢပတစံၣ်ညီၣ် အဝဲသ့ၣ်ဆူၣ်ဆူၣ်ကိၤကိၤဘၣ် ဒ်လဲၣ်.
၁၅ ပမ့ၢ်သးစၢၢ်ဆၢလၢ ပှၤဂၤအတၢ်ဂ့ၤတၢ်ဝါန့ၣ် တမ့ၢ်လၢ ပကစံၣ်ညီၣ်အဝဲသ့ၣ် ဆူၣ်ဆူၣ်ကိၤကိၤဘၣ်. ပကဘၣ်ဆိကမိၣ်ထံ အဝဲသ့ၣ် အတၢ်အိၣ်သး မၤသးဒ်လဲၣ်. ပကကွၢ်သကိး တၢ်အဒိတခါ. ဘၣ်တနံၤ ယ့ၣ်ၡူးအိၣ်လၢ တၢ်လုၢ်ဟံၣ်အပူၤ ဒီးထံၣ်ဝဲ မုၣ်ကမဲတဂၤ ဟဲထၢနုာ်လီၤဝဲ စ့ခံဘ့ၣ်လၢ အလုၢ်အပှ့ၤတအိၣ်အါအါဘၣ် လၢတၢ်မၤဘူၣ်အဒၢပူၤလီၤ. ယ့ၣ်ၡူးတတဲဝဲလၢ “ဘၣ်မနုၤအဃိ အတထၢနုာ်အါထီၣ်စ့လဲၣ်.” လၢယ့ၣ်ၡူးကသးစၢၢ်ဆၢလၢ မုၣ်ကမဲတဂၤအံၤ ဟ့ၣ်လီၤစ့ထဲလဲၣ်အလီၢ် အဝဲသးစၢၢ်ဆၢလၢ မုၣ်ကမဲတဂၤန့ၣ် အတၢ်ပာ်သူၣ်ပာ်သး ဒီးအတၢ်အိၣ်သး အိၣ်ဒ်လဲၣ် ဒီးအပတြၢၤအီၤ ခီဖျိ အမၤဝဲလၢ အဂ့ၤကတၢၢ်အဃိလီၤ.—လူၤကၣ် ၂၁:၁-၄.
၁၆. နမၤလိန့ၢ်ဘၣ် တၢ်မနုၤလၢ ဒီပုၢ်ဝဲၢ်မုၣ် ဘရါနံၤခၤ အတၢ်လဲၤခီဖျိလဲၣ်.
၁၆ ပကဘၣ်ဆိကမိၣ်ထံ ပှၤဂၤ အတၢ်အိၣ်သး မၤသးဒ်လဲၣ်န့ၣ်မ့ၢ်တၢ်လၢ အရ့ဒိၣ်ဒိၣ်မး. အဒိ, ပကဆိကမိၣ်ကွၢ် ဒီပုၢ်ဝဲၢ်မုၣ် ဘရါနံၤခၤ အတၢ်လဲၤခီဖျိ. လၢဒီပုၢ်ဝဲၢ်မုၣ် ဘရါနံၤခၤ အတၢ်အိၣ်ဖှိၣ်န့ၣ် အိၣ်ဝဲဒီး ဒီပုၢ်ဝဲၢ်မုၣ်တဂၤ ဒီးအဖိခွါတဂၤ. ဒီးဒီပုၢ်ဝဲၢ်မုၣ်တဂၤအံၤန့ၣ် မ့ၢ်မိၢ်လၢ အဘၣ်ကွၢ်လုၢ်ဒိၣ်ထီၣ်အဖိ ထဲတဂၤလီၤ. ဒီပုၢ်ဝဲၢ်မုၣ် ဘရါနံၤခၤ တဲဝဲလၢ “အဖျါလီၤဂာ်လၢ ဒီပုၢ်ဝဲၢ်မုၣ်တဂၤအံၤန့ၣ် တဟးစံၣ်တဲၤတဲလီၤတၢ် ဒီးထီၣ်တၢ်အိၣ်ဖှိၣ် ထီဘိဘၣ်. အဃိန့ၣ် ယထံၣ်အီၤလၢ အတဂ့ၤဘၣ်တကပၤ. ဘၣ်ဆၣ် ဖဲယဟးစံၣ်တဲၤတဲလီၤတၢ်ဒီး ဒီပုၢ်ဝဲၢ်မုၣ်အံၤအခါန့ၣ် အဝဲတဲဘၣ်ယၤ တၢ်ကီတၢ်ခဲလၢ အထံၣ်ဘၣ်ဝဲတဖၣ် ဒီးအအိၣ်ဒီး အဖိခွါလၢ အခိၣ်နူာ်တမၤတၢ်အါအါဘၣ်. ဒီးအဝဲ ဘၣ်ကွၢ်လုၢ်ဒိၣ်ထီၣ် အဖိခွါတဂၤအံၤလၢ နီၢ်ခိနီၢ်သး တၢ်လိၣ်ဘၣ် ခံကပၤလၢာ်. ဒီးတဘျီတခီၣ်န့ၣ် ခီဖျိလၢ အဖိခွါ အတၢ်အိၣ်ဆူၣ်အိၣ်ချ့အဃိ အဘၣ်လဲၤထီၣ် တၢ်အိၣ်ဖှိၣ်လၢ အဂၤတခါ.” ဒီပုၢ်ဝဲၢ်မုၣ် ဘရါနံၤခၤ တဲဝဲလၢ “ဒီပုၢ်ဝဲၢ်မုၣ်တဂၤအံၤ ထံၣ်ဘၣ်ဝဲ တၢ်ကီတၢ်ခဲ ထဲထဲအံၤန့ၣ် ယတဆိကမိၣ်ဘၣ် နီတဘျီဘၣ်. ခီဖျိ တၢ်လၢအမၤဝဲလၢ ယဟိဝၤယွၤအဂီၢ်အဃိ ခဲအံၤန့ၣ် ယပာ်ကဲအီၤ ဒီးယပာ်လုၢ်ပာ်ပှ့ၤအီၤဒိၣ်မး.”
၁၇. ယၤကိာ် ၂:၈ ဟ့ၣ်ကူၣ်ပှၤလၢ ပကမၤ တၢ်မနုၤလဲၣ် ဒီးပမၤအီၤ ကသ့ဒ်လဲၣ်.
၁၇ ပမ့ၢ်သ့ၣ်ညါလီၤပသးလၢ ပစံၣ်ညီၣ်ဘၣ် ပဒီပုၢ်ဝဲၢ်မုၣ်ခွါန့ၣ် ပကဘၣ်မၤဒ်လဲၣ်. ပကဘၣ်သ့ၣ်နီၣ်ထီၣ်လၢ ပကဘၣ်အဲၣ် ပဒီပုၢ်ဝဲၢ်မုၣ်ခွါတဖၣ်လီၤ. (ဖး ယၤကိာ် ၂:၈.) တကးဒံးဘၣ် ပကဘၣ်ဃ့ကညး ယဟိဝၤယွၤ လၢကမၤစၢၤပှၤ ဒ်သိး ပသုတစံၣ်ညီၣ်ဘၣ်ပှၤဂၤ တဂ့ၤအဂီၢ်. ဒ်ပဃ့ဘါထုကဖၣ်အသိး ပကဘၣ်မၤထွဲအီၤ ဒီးပကဘၣ်ဟံးန့ၢ် တၢ်ဆၢကတီၢ်လၢ ပကရ့ဒီး ပှၤလၢပထံၣ်ကမၣ်အီၤတဂၤန့ၣ်. ဘၣ်သ့ၣ်သ့ၣ် ပကဟးစံၣ်တဲၤတဲလီၤတၢ်ဒီးအီၤ မ့တမ့ၢ် ပကအီၣ်သကိးတၢ် တပူၤဃီ. ပမ့ၢ်မၤဒ်န့ၣ်န့ၣ် ပကသ့ၣ်ညါအါထီၣ် အတၢ်အိၣ်သး ဒီးပကသ့ၣ်ညါအီၤဂ့ၤထီၣ်. ပမ့ၢ်ဃုသ့ၣ်ညါ အါထီၣ်အဂ့ၢ်န့ၣ် မ့ၢ်ဒၣ်ပကွၢ်လိမၤဒိး ယဟိဝၤယွၤ ဒီးယ့ၣ်ၡူး လၢအကွၢ်ဝဲလၢ ပှၤဂၤအတၢ်ဂ့ၤတခီလီၤ. ပမ့ၢ်မၤဒ်န့ၣ်န့ၣ် မ့ၢ်ဒၣ် ပဒိကနၣ် ပှၤကွၢ်သိလၢအဂ့ၤတဂၤ အကလုၢ် ဒီးတမ့ၢ်လၢ ပကစံၣ်ညီၣ်ပှၤဂၤလၢၤဘၣ်.
၁၈. ပဒိကနၣ် ပှၤကွၢ်သိလၢအဂ့ၤတဂၤ အကလုၢ်န့ၣ် ပပာ်ဖျါထီၣ် ကသ့ဒ်လဲၣ်.
၁၈ ဒ်သိတဖၣ် ဒိကနၣ်ဝဲ ပှၤကွၢ်သိ အကလုၢ်အသိး ပှၤလၢအပိာ်ယ့ၣ်ၡူးအခံတဖၣ် ဒိကနၣ်ဝဲ ယ့ၣ်ၡူးအကလုၢ်လီၤ. ဘၣ်ဃးဒီး ပတၢ်လိၣ်ဘၣ်လၢ နီၢ်ခိတကပၤန့ၣ် ပမ့ၢ်တဘၣ်ယိၣ်တၢ်လၢၤဘၣ် ဒီးပမ့ၢ် တစံၣ်ညီၣ်ပှၤဂၤ လၢၤဘၣ်န့ၣ် ယဟိဝၤယွၤ ဒီးယ့ၣ်ၡူး ကဆိၣ်ဂ့ၤပှၤလီၤ. ပမ့ၢ်ပၣ်ဃုာ်လၢ “သိလၢအစှၤတဖု” အကျါမ့ၢ်ဂ့ၤ “သိလၢအဂၤတဖၣ်” အကျါမ့ၢ်ဂ့ၤ မ်ပကဆဲးဒိကနၣ် ပှၤကွၢ်သိလၢအဂ့ၤတဂၤ အကလုၢ်တက့ၢ်. (လူၤကၣ် ၁၂:၃၂; ယိၤဟၣ် ၁၀:၁၁, ၁၄, ၁၆) တၢ်မၤလိလၢခံတခါန့ၣ် ပကတဲသကိး ဘၣ်ဃးဒီး တၢ်ဂ့ၢ်ခံမံၤလၢ ယ့ၣ်ၡူးမၢ ပှၤလၢအပိာ်အခံတဖၣ် မၤဝဲလီၤ.
တၢ်သးဝံၣ် ၁၀၁ မၤသကိးတၢ်လၢ တၢ်ဃူတၢ်ဖိး
a ဖဲယ့ၣ်ၡူးတဲဝဲလၢ အသိတဖၣ် ကဒိကနၣ်အကလုၢ်အခါ အအဲၣ်ဒိးတဲဝဲ အပျဲၢ်အဘီၣ်တဖၣ် ကဒိကနၣ် အတၢ်သိၣ်လိ ဒီးကမၤထွဲဝဲလၢ အတၢ်အိၣ်မူပူၤလီၤ. လၢတၢ်မၤလိအံၤအပူၤ ပကတဲသကိး တၢ်ဂ့ၢ်လၢအရ့ဒိၣ်ခံခါ လၢအမ့ၢ်ဝဲ အပျဲၢ်အဘီၣ်တဖၣ် တဘၣ်ဘၣ်ယိၣ်တၢ် လၢကျိၣ်စ့အတၢ်ကီတၢ်ခဲအဂီၢ်ဘၣ် ဒီးတဘၣ်စံၣ်ညီၣ်ပှၤဂၤဘၣ်. ဒီးပကတဲသကိး ဘၣ်ဃးဒီး ပမၤထွဲယ့ၣ်ၡူးအတၢ်ဟ့ၣ်ကူၣ် ကသ့ဒ်လဲၣ်.
b တၢ်တဲဖျါထီၣ်တၢ်ဂီၤ အခီပညီ– ဒီပုၢ်ဝဲၢ်ခွါတဂၤ အတၢ်မၤတအိၣ်လၢၤဘၣ်, အစ့လၢ ကလုၢ်အီၣ်လုၢ်အီ အဟံၣ်ဖိဃီဖိအဂီၢ် တအိၣ်အါအါလၢၤဘၣ် ဒီးအဝဲကဘၣ်ဃု တၢ်အိၣ်ဆိးအလီၢ် လၢအသီတခါ. အမ့ၢ်တပလီၢ်အသးဘၣ်န့ၣ် အကသူၣ်ကိၢ်သးဂီၤတၢ်အါတလၢ ဒီးတသးစၢၢ်ဆၢကစၢ်ယွၤ အတၢ်ဖံးတၢ်မၤလၢၤဘၣ်.
c တၢ်တဲဖျါထီၣ်တၢ်ဂီၤ အခီပညီ– ဒီပုၢ်ဝဲၢ်ခွါတဂၤ ဟဲထီၣ်တၢ်အိၣ်ဖှိၣ်စဲၤခံ ဘၣ်ဆၣ် အဝဲဟးစံၣ်တဲၤတဲလီၤတၢ်, မၤစၢၤ ပှၤသးပှၢ်လၢ အလိၣ်ဘၣ်တၢ်မၤစၢၤ ဒီးကွၢ်ထွဲဝဲ ဘီမုၢ်ဘျီၣ်ဒိၣ် အဃိ ပထံၣ်ဘၣ်လၢ အအိၣ်ဒီး တၢ်ဂ့ၤတၢ်ဝါအါမး.