တဘျီတခီၣ် ပှၤဟ့ၣ်လီၤ ဆၣ်ဖိကီၢ်ဖိတဖၣ်လၢ တလးမူးပိာ်မုၣ်အပှ့ၤ
မ့ၢ်နသ့ၣ်ညါဧါ
ဘၣ်မနုၤအဃိ ပှၤအံၣ်စရ့လးဖိလၢပျၢၤတဖၣ် ဘၣ်ဟ့ၣ်ဝဲ တလးမူးပိာ်မုၣ်အပှ့ၤလဲၣ်
လၢလံာ်စီဆှံအစိၤန့ၣ် ပှၤရဲၣ်ကျဲၤဝဲလၢ ဖဲပှၤကဒိးတ့ဒိးဖျီသးအခါ လၢတလးမူးပိာ်ခွါတကပၤန့ၣ် ကဘၣ်ဟ့ၣ်လီၤဝဲဒၣ် တလးမူးပိာ်မုၣ်အပှ့ၤလီၤ. တလးမူးပိာ်မုၣ်အပှ့ၤန့ၣ် ဘၣ်သ့ၣ်သ့ၣ် ပှၤကဟ့ၣ်လီၤဝဲ တၢ်ဖိတၢ်လံၤလၢ အလုၢ်ဒိၣ်ပှ့ၤဒိၣ်တမံၤမံၤ, ဆၣ်ဖိကီၢ်ဖိ မ့တမ့ၢ် ကျိၣ်စ့လီၤ. ဖဲန့ၣ်အစိၤန့ၣ် ပှၤတနီၤ ဟ့ၣ်ဝဲတလးမူးပိာ်မုၣ်အပှ့ၤ ခီဖျိမၤန့ၢ်တၢ်လၢ တလးမူးပိာ်မုၣ်အဟံၣ်ဖိဃီဖိအဂီၢ်. အဒိ, ဒ်သိးဒီးစီၤယၤကိာ် ကန့ၢ်ဘၣ်ဒီး နီၢ်ရၤဃ့လးအဂီၢ် အဘၣ်မၤန့ၢ်တၢ်လၢ နီၢ်ရၤဃ့လးအပါဂီၢ် နွံနံၣ်ညါ. (၁ မိၤၡ့ ၂၉:၁၇, ၁၈, ၂၀) လၢညါန့ၣ် ဘၣ်မနုၤအဃိ ပှၤကဘၣ်ဟ့ၣ်ဝဲ တလးမူးပိာ်မုၣ်အပှ့ၤလဲၣ်.
ခါရိၤ မ့ယၤ လၢအကဲ ပှၤကူၣ်ဘၣ်ကူၣ်သ့လၢ လံာ်စီဆှံတကပၤ တဲဝဲလၢ “တလးမူးပိာ်မုၣ်တဂၤအပှ့ၤန့ၣ် ပှၤဘၣ်ဟ့ၣ်ဝဲ တလးမူးပိာ်မုၣ်အဟံၣ်ဖိဃီဖိ. ပှၤဟ့ၣ်လီၤတၢ်အပှ့ၤတခါအံၤန့ၣ် ကမ့ၢ်ဒ်သိးပှၤကလိးဝဲ ဟံၣ်ဖိဃီဖိတဒူၣ်အံၤ အဖိမုၣ်အတၢ်မၤအဘူးအလဲ လၢအဟံၣ်ဖိဃီဖိ ကဘၣ်တူၢ်ၡူကွံာ်ဝဲ.” ပှၤဟ့ၣ်တလးမူးပိာ်မုၣ်အပှ့ၤန့ၣ် ကမ့ၢ်ဒ်သိး ဟံၣ်ဖိဃီဖိ ခံကပၤလိာ် အတၢ်ရ့လိာ်သး ကဘူးထီၣ်အဂီၢ်. ဒီးကမ့ၢ်ဝဲ ဒ်သိး ဖဲအဝဲသ့ၣ်ထံၣ်ဘၣ် တၢ်ကီတၢ်ခဲအခါ ကမၤစၢၤလိာ်သး ယၢ်ခီယၢ်ခီအဂီၢ်. တကးဒံးဘၣ် တလးမူးပိာ်မုၣ်အပှ့ၤအံၤ ပာ်ဖျါထီၣ်စ့ၢ်ကီးလၢ တယံာ်လၢၤဘၣ် ပိာ်မုၣ်အံၤ အကဖျီသးအဃိ တအိၣ်လၢ အပၢ်တၢ်ကွၢ်ထွဲ ဖီလာ်လၢၤဘၣ် ဒီးအကလဲၤအိၣ်က့ၤဒီးအဝၤလီၤ.
တၢ်ဟ့ၣ်တလးမူးပိာ်မုၣ်အပှ့ၤန့ၣ် အခီပညီ တမ့ၢ်လၢ မါတဂၤအံၤန့ၣ် ပှၤပှ့ၤအီၤဆါအီၤသ့န့ၣ်ဘၣ်. ပှၤအံၣ်စရ့လးဖိ အလံာ်လၢပျၢၤ Ancient Israel —Its Life and Institutions တဘ့ၣ်တဲဝဲလၢ “ပှၤဘၣ်ဟ့ၣ်ကျိၣ်စ့ မ့တမ့ၢ် ပှၤဘၣ်ဟ့ၣ် တၢ်လုၢ်ဒိၣ်ပှ့ၤဒိၣ်တခါခါ အဃိ ပှၤအံၣ်စရ့လးဖိ အတၢ်ဒိးတ့ဒိးဖျီသးန့ၣ် အဖျါလီၤဂာ်ဒ် ပှၤဘၣ်ပှ့ၤ တလးမူးပိာ်မုၣ်အသိး. ဘၣ်ဆၣ် တလးမူးပိာ်မုၣ်အပှ့ၤန့ၣ် ပှၤဟ့ၣ်လီၤလၢ တလးမူးပိာ်မုၣ် အဟံၣ်ဖိဃီဖိအဂီၢ်ဟီ. တမ့ၢ်လၢ ပှၤဟ့ၣ်ဝဲ ပိာ်မုၣ်တဂၤအံၤ အပှ့ၤဘၣ်.”
မုၢ်မဆါတနံၤအံၤ လၢထံကီၢ်တနီၤနီၤအပူၤန့ၣ် ပှၤဆဲးမၤထွဲဒံး လုၢ်လၢ်လၢ ပှၤကဘၣ်ဟ့ၣ် တလးမူးပိာ်မုၣ် အပှ့ၤလီၤ. ဖဲခရံာ်ဖိမိၢ်ပၢ်တဖၣ် ဃ့ဝဲတလးမူးပိာ်မုၣ်အပှ့ၤခါ အပာ် “ဖျါထီၣ်လၢ ပှၤခဲလၢာ်အမဲာ်ညါ” လၢအ “တမ့ၢ်ပှၤလၢအခိၣ်ကိၤဘၣ်” သ့ခီဖျိ အတဃ့ဝဲ တၢ်အပှ့ၤအါတလၢဘၣ်. (ဖံလံးပံၤ ၄:၅; ၁ ကရံၣ်သူး ၁၀:၃၂, ၃၃) အဝဲသ့ၣ်မ့ၢ်မၤဒ်အံၤန့ၣ် အပာ်ဖျါထီၣ်ဝဲဒၣ်လၢ အတ “အဲၣ်ကျိၣ်အဲၣ်စ့,” ဒီးအတသူၣ်လီသးကွံတၢ် အါတလၢဘၣ်. (၂ တံၤမသ့း ၃:၂) တကးဒံးဘၣ် ဖဲခရံာ်ဖိမိၢ်ပၢ်တဖၣ် ဃ့ဝဲဒၣ် တလးမူးပိာ်မုၣ်အပှ့ၤ မ့ၢ်အါတလၢအခါ လၢပိာ်ခွါတခီ ကဘၣ်ဂုာ်ကျဲးစၢးမၤတၢ်ဆူၣ်ဆူၣ် လၢကဟ့ၣ်တလးမူးပိာ်မုၣ် အပှ့ၤအဂီၢ်. မ့တမ့ၢ်ဒ်န့ၣ်ဘၣ်န့ၣ် အဝဲကဘၣ် ပတုာ်မၤဝဲ ပှၤလဲၤလၢညါတၢ်မၤ ဒီးကဘၣ်မၤက့ၤတၢ်မၤ လၢဆၢကတီၢ်ပှဲၤပှဲၤ ဒ်သိးဟ့ၣ်ဝဲ တလးမူးပိာ်မုၣ်အပှ့ၤဖးအါ ကန့ၢ်အဂီၢ်လီၤ.
လၢတၢ်လီၢ်တနီၤနီၤန့ၣ် ပဒိၣ်တၢ်သိၣ်တၢ်သီ အိၣ်ဝဲဒၣ်လၢ ပှၤကဘၣ်ဟ့ၣ် တလးမူးပိာ်မုၣ်အပှ့ၤလီၤ. မ့မ့ၢ်ဒ်န့ၣ်န့ၣ် ခရံာ်ဖိမိၢ်ပၢ်တဖၣ် မၤပိာ်ထွဲဝဲ ပဒိၣ်တၢ်သိၣ်တၢ်သီလီၤ. ဘၣ်မနုၤအဃိလဲၣ်. ခီဖျိလၢ ကစၢ်ယွၤအကလုၢ်ကထါတဲဝဲလၢ ခရံာ်ဖိတဖၣ် ဖဲပဒိၣ်ပပှၢ်အတၢ်သိၣ်တၢ်သီ မ့ၢ်တထီဒါလိာ်အသးဒီး လံာ်စီဆှံဘၣ်န့ၣ် အဝဲသ့ၣ်ကဘၣ် “ဒိးပၢအသးလၢ” “ပှၤလၢအအိၣ်ဒီး တၢ်စိတၢ်ကမီၤလၢ အပၢတၢ်လၢ ပဖီခိၣ်တဖၣ်” လီၤ.—ရိမ့ၤ ၁၃:၁; မၤတၢ် ၅:၂၉.