မ့ၢ်နသ့ၣ်ညါဧါ

ဘၣ်မနုၤအဃိ ယဟိဝၤယွၤ ဟ့ၣ်အခွဲးလၢ ပှၤအံၣ်စရ့လးဖိတဖၣ်​ ကဟ့ၣ်လုၢ်ထီၣ်ဝဲ ထိၣ်လွံၢ် ဒီးထိၣ်ကးက့ၣ်လဲၣ်

စီၤမိၤၡ့ အတၢ်သိၣ်တၢ်သီပာ်ဖျါထီၣ်ဝဲလၢ ယဟိဝၤယွၤတူၢ်လိာ်ဝဲလၢ ပှၤကလုၢ်ထီၣ်​ ထိၣ်လွံၢ်ဒီးထိၣ်ကးက့ၣ်လီၤ. လၢတၢ်သိၣ်တၢ်သီလၢ ဘၣ်ဃးဒီး တၢ်ဟ့ၣ်လုၢ်ထီၣ်တၢ်အပူၤန့ၣ်​ ညီနုၢ် ထိၣ်ခံကလုာ်အံၤ ဘၣ်တၢ်ကွဲးဖျါထီၣ်အမံၤ တပူၤဃီ ဒီးဖဲပှၤလုၢ်ထီၣ်တၢ်အခါ ထိၣ်ခံကလုာ်အံၤအကျါ မ့ၢ်တအိၣ်တခါဘၣ်န့ၣ်​ ပှၤလုၢ်ထီၣ်အီၤလၢအအိၣ်တခါ. (၃ မိၤၡ့ ၁:၁၄; ၁၂:၈; ၁၄:၃၀) ဘၣ်မနုၤအဃိလဲၣ်န့ၣ်​ မ့ၢ်လၢထိၣ်လွံၢ်န့ၣ်​ အတအိၣ်ထီဘိဘၣ်အဃိလီၤ.

ထိၣ်လွံၢ်န့ၣ်အိၣ်လၢ ကီၢ်အံၣ်စရ့အပူၤ ဖဲတၢ်ကိၢ်ခါအဆၢကတီၢ်လီၤ. ကိးနံၣ်ဒဲး ဖဲလါအီးကထိဘၢၣ်, တၢ်ဂိၢ်ခါအဆၢကတီၢ် အဝဲသ့ၣ်လဲၤယူၤလၢ ကလံၤထံးတခီ ဖဲထံကီၢ်လၢတၢ်ကိၢ်ခါဘၣ်ဝဲ အလီၢ်လီၤ. ဒီးအဝဲသ့ၣ်​ ဟဲက့ၤလၢ ကီၢ်အံၣ်စရ့ ဖဲတၢ်ယီၤထီၣ်အခါလီၤ. (တၢ်သးဝံၣ်တဖၣ်အတၢ်သးဝံၣ်​ ၂:၁၁, ၁၂; ယံးရမံယၤ ၈:၇) အဃိ လၢကီၢ်အံၣ်စရ့န့ၣ်​ ဖဲတၢ်ဂိၢ်ခါအဆၢကတီၢ် တညီလၢ အဝဲသ့ၣ်ကလုၢ်ထီၣ်ဝဲ ထိၣ်လွံၢ်ဘၣ်.

မ့မ့ၢ် ထိၣ်ကးက့ၣ်တဖၣ်န့ၣ်​ ညီနုၢ်အဝဲသ့ၣ်​ တသုးလီၢ်သုးကျဲဘၣ်, အဃိ လၢကီၢ်အံၣ်စရ့န့ၣ်​ အဝဲသ့ၣ်အိၣ်ဝဲ ထီဘိလီၤ. ဒီးအဂၤတခါန့ၣ်​ ထိၣ်ကးက့ၣ်တဖၣ်န့ၣ်​ မ့ၢ်ဝဲထိၣ်လၢ ပှၤဘုၣ်အီၤသ့. (ထိၣ်သတြီၤဒီး ယိၤဟၣ်​ ၂:၁၄, ၁၆.) လံာ်လဲၢ်လၢ အပာ်ဖျါထီၣ်ဝဲ တၢ်မုၢ်တၢ်ဘိ ဒီးဆၣ်ဖိကီၢ်ဖိလၢ လံာ်စီဆှံပူၤအဂ့ၢ် (Bible Plants and Animals) န့ၣ်​ တဲဝဲလၢ “ဝ့ၢ်ဒီးသဝီတဖၣ်လၢ အအိၣ်လၢ ကီၢ်ပာ်လဲးစတဲအပူၤ ကိးဖျၢၣ်ဒဲးန့ၣ်​ ထိၣ်ကးက့ၣ်​ အိၣ်ဝဲလီၤ. လၢဟံၣ်ကိးဖျၢၣ်ဒဲးန့ၣ်​ အိၣ်ဝဲဒီး ထိၣ်ကးက့ၣ်အလီၢ် မ့တမ့ၢ် တၢ်ပူၤလၢဟံၣ်ဒူၣ်ကပၤလၢ ထိၣ်ကးက့ၣ်​ အိၣ်ဝဲကသ့အဂီၢ်လီၤ.”—ထိၣ်သတြီၤဒီး ယၡါယၤ ၆၀:၈.

ယဟိဝၤယွၤ ဟ့ၣ်အခွဲးလၢ ပှၤအံၣ်စရ့လးဖိတဖၣ်​ ကဟ့ၣ်လုၢ်ထီၣ်ဝဲထိၣ်လၢ အအိၣ်ဝဲထီဘိအဃိ အပာ်ဖျါထီၣ်ဝဲလၢ အအိၣ်ဒီး တၢ်အဲၣ်တၢ်ကွံ ဒီးနၢ်ပၢၢ်စၢၤ အခ့အပှၤတဖၣ်လီၤ.