တၢ်လဲၤခီဖျိ

ပာ်ဖျါထီၣ်တၢ်သးကညီၤ လၢပှၤကိးဂၤဒဲး

ဘၣ်တနံၤ ဒီပုၢ်ဝဲၢ်မုၣ်တဂၤ လၢအအိၣ်လၢ နယူစံလဲၣ်န့ၣ် အကွၢ်ဝဲ တၢ်ဂီၤမူတခါလၢ အခိၣ်တီမ့ၢ်ဝဲ “Have . . . Concern for One Another” လၢ jw.org အပူၤ. တၢ်ဂီၤမူတခါန့ၣ် အဘၣ်ဃးဒီး ယဟိဝၤယွၤ အိၣ်ဒီးတၢ်သးကညီၤ တကးဒံးဘၣ် အပာ်ဖျါထီၣ်ဝဲစ့ၢ်ကီး. (ၡါ ၆၃:၇-၉) ဒီပုၢ်ဝဲၢ်မုၣ်အံၤ ပာ်လီၤအသးလၢ အကမၤထွဲ တၢ်လၢအမၤလိဘၣ်ဝဲ ဒီးကဃုဝဲ တၢ်ခွဲးတၢ်ယာ်လၢ အကမၤစၢၤ ပှၤလၢအလိၣ်ဘၣ်တၢ်မၤစၢၤ. ဖဲတၢ်တနံၤန့ၣ် အလဲၤပှ့ၤအီၣ်တၢ် ဒီးအတိလိာ်သးဒီး ပိာ်မုၣ်တဂၤလၢ အဟးအိၣ်လၢကျဲကပၤ အဃိ ဒီပုၢ်ဝဲၢ်မုၣ် တဲပိာ်မုၣ်တဂၤန့ၣ်လၢ အကပှ့ၤဒုးအီၣ်အီၤတၢ်အီၣ်. ပိာ်မုၣ်တဂၤန့ၣ် တူၢ်လိာ်ဝဲ. ဖဲဒီပုၢ်ဝဲၢ်မုၣ် ဟဲက့ၤစိာ်န့ၢ် ပိာ်မုၣ်တဂၤအံၤ တၢ်အီၣ်အခါ ဒီပုၢ်ဝဲၢ်မုၣ် တဲဘၣ်အီၤ ယဟိဝၤယွၤအဂ့ၢ် ဒီးဒုးနဲၣ်အီၤ လံာ်ဖိလၢ အခိၣ်တီမ့ၢ်ဝဲ တၢ်နးတၢ်ဖှီၣ် လီၤမၢ်ကွံာ် ကန့ၢ်ဧါ.

ပိာ်မုၣ်တဂၤအံၤ အသးလီၤ ဒီးဟီၣ်ဝဲ. ပိာ်မုၣ်တဂၤအံၤ တဲဝဲလၢ အဒိၣ်ထီၣ်ဘၣ်လၢ တၢ်မ့ၢ်တၢ်တီအပူၤ ဘၣ်ဆၣ် အဟးထီၣ်လၢ တၢ်မ့ၢ်တၢ်တီအပူၤ အိၣ်လံတဘျုးနံၣ်လံ. သနာ်က့ ပူၤကွံာ်တယံာ်ဒံးဘၣ်န့ၣ် အဃ့ထုကဖၣ်လၢ ယဟိဝၤယွၤအအိၣ် ဒ်သိးကမၤစၢၤအီၤလၢ အကဟဲက့ၤကဒါ လၢယဟိဝၤယွၤအအိၣ်. ဒီပုၢ်ဝဲၢ်မုၣ်တဂၤအံၤ ဟ့ၣ်လီၤဝဲ ပိာ်မုၣ်တဂၤအံၤလၢ လံာ်စီဆှံ ဒီးရဲၣ်ကျဲၤဝဲလၢ ကမၤလိသကိး လံာ်စီဆှံ.a

ပကွၢ်လိ ယဟိဝၤယွၤ ဒီးပာ်ဖျါထီၣ် တၢ်သးကညီၤ လၢပှၤဂၤအဖီခိၣ်, လၢပဟံၣ်ဖိဃီဖိ ဒီးပဘူးပတံၢ်အဖီခိၣ် ဒီးပာ်ဖျါထီၣ် တၢ်သးကညီၤလၢ ပဒီပုၢ်ဝဲၢ်မုၣ်ခွါ လၢတၢ်အိၣ်ဖှိၣ်အပူၤသ့. တကးဒံးဘၣ် ပပာ်ဖျါထီၣ် တၢ်သးကညီၤလၢ ပှၤဂၤအဖီခိၣ် ခီဖျိ ပတဲဘၣ်ပှၤဂၤလၢ ယဟိဝၤယွၤအဂ့ၢ်သ့စ့ၢ်ကီး.