တၢ်အဘၣ် ဒီးတၢ်အကမၣ်– ပှၤအါဂၤ ဆၢတဲာ်တၢ်ဒ်လဲၣ်

ပှၤအါတက့ၢ် သ့ၣ်ညါဝဲလၢ လုၢ်လၢ်သကဲာ်ပဝး တနီၤန့ၣ်အဂ့ၤ ဒီးတနီၤန့ၣ် တဂ့ၤနီတစဲးဘၣ်. အဒိ တၢ်မၤသံပှၤဂၤ, တၢ်ဖီၣ်ဆူၣ်ပှၤဂၤ ဒီးတၢ်မၤတရီတပါဖိသၣ်န့ၣ် ပှၤလၢဟီၣ်ခိၣ်ဒီဘ့ၣ်ညါ ထံၣ်ဝဲလၢ အကမၣ်. မ့မ့ၢ် တၢ်မၤတၢ်တီတီလိၤလိၤ, တၢ်မၤဂ့ၤပှၤဂၤ ဒီးတၢ်ဒိသူၣ်ဒိသးန့ၣ် ပှၤအါဂၤ ထံၣ်ဝဲလၢ အမ့ၢ် လုၢ်လၢ်သကဲာ်ပဝး လၢအဂ့ၤ ဒီးအလီၤပတြၢၤ. သနာ်က့ တၢ်ဂ့ၢ်တနီၤ ဒ်သိးဒီး တၢ်မံဃုာ်, တၢ်မၤတၢ်တီတီလိၤလိၤ ဒီးတၢ်ကွၢ်လုၢ်ဒိၣ်ထီၣ်ဖိန့ၣ် ပှၤအါဂၤ ဆိကမိၣ်ဝဲလၢ ဖဲနအဲၣ်ဒိးမၤန့ၣ် နမၤသ့. ဒီးအဝဲသ့ၣ် ဆိကမိၣ်ဝဲလၢ နမ့ၢ်ဆၢတဲာ်တၢ် ဒ်လဲၣ်ဂ့ၤဒ်လဲၣ်ဂ့ၤ သနာ်က့ အတကမၣ်ဘၣ်. တကးဒံးဘၣ် ညီနုၢ်န့ၣ် ပှၤအါဂၤ ဆၢတဲာ်တၢ် ဒ်အဆိကမိၣ်ဝဲအသိး ဒီးဆၢတဲာ်တၢ် ဒ်ပှၤအါဂၤ ဆၢတဲာ်ဝဲအသိး. ဘၣ်ဆၣ် ပမ့ၢ်ဆၢတဲာ်တၢ် ဒ်န့ၣ်န့ၣ် အဘၣ်ထီဘိဧါ.

ပကဘၣ်ဆၢတဲာ်တၢ် ဒ်ပတၢ်တူၢ်ဘၣ် ဒီးပတၢ်ဆိကမိၣ် အသိးဧါ

ဘၣ်ဃးဒီး တၢ်အဘၣ် ဒီးတၢ်အကမၣ်န့ၣ် ညီနုၢ်ပဆၢတဲာ်တၢ် ဒ်ပတၢ်တူၢ်ဘၣ် ဒီးတၢ်ဆိကမိၣ် အိၣ်ဝဲအသိး ဒီးပတၢ်တူၢ်ဘၣ်အံၤ ပကိးအီၤလၢ ပသးလၢအသ့ၣ်ညါဒၣ်တၢ်. (ရိမ့ၤ ၂:၁၄, ၁၅) ဖိသၣ်စ့ၢ်ကီး သ့ၣ်ညါဝဲ တၢ်အဘၣ် ဒီးတၢ်အကမၣ် ဒီးအဝဲသ့ၣ် မ့ၢ်မၤကမၣ်တၢ် တမံၤမံၤန့ၣ် အတူၢ်ဘၣ်ဝဲ တမုာ်ဘၣ်. ဒီးဖဲပဒိၣ်ထီၣ်အခါ ပမၤလိန့ၢ် တၢ်အဘၣ် ဒီးတၢ်အကမၣ် လၢပဟံၣ်ဖိဃီဖိ, ပသကိး, ပကၠိသရၣ်, ပှၤလၢပဃၢၤ, ပတၢ်ဘူၣ်တၢ်ဘါ ဒီးပကလုာ်ဒူၣ် တၢ်ဆဲးတၢ်လၤ. အဃိ ဖဲပဆၢတဲာ်တၢ်အခါ ပတၢ်ဆၢတဲာ်န့ၣ် အဘၣ်လိာ်သးဒီး တၢ်အဘၣ် ဒီးတၢ်အကမၣ် လၢပမၤလိန့ၢ်တဖၣ်ဧါ တဘၣ်လိာ်သးဧါန့ၣ် ပသးလၢအသ့ၣ်ညါဒၣ်တၢ် ဒုးသ့ၣ်ညါပှၤ.

ပတၢ်ထံၣ် ဘၣ်ဃးဒီး တၢ်အဘၣ် ဒီးတၢ်အကမၣ်န့ၣ် ကမၤစၢၤပှၤဒ်သိး ပကပာ်ဖျါထီၣ် တၢ်ဒိသူၣ်ဒိသး, တၢ်စံးဘျုးစံးဖှိၣ်, မၤတၢ်တီတီလိၤလိၤ ဒီးပာ်ဖျါထီၣ် တၢ်သးကညီၤပှၤဂၤ. တကးဒံးဘၣ် ကမၤစၢၤပှၤဒ်သိး ပကဟးဆှဲး တၢ်လၢကမၤဘၣ်ဒိ ပှၤလၢပအဲၣ်တဖၣ်, တၢ်လၢကမၤမဲာ်ဆှးပှၤ ဒီးပကဟးဆှဲး တၢ်တူၢ်ဘၣ်လၢ ပတၢ်ကမၣ်အိၣ် ထီဘိဘၣ်.

ပနာ်န့ၢ် ပတၢ်တူၢ်ဘၣ် ဒီးပတၢ်ဆိကမိၣ် သ့ထီဘိဧါ. ပိာ်ခွါသးစၢ် လၢအမံၤမ့ၢ် ကဲရံၣ် တဲဝဲလၢ “ယမၤတၢ်ဖဲ ယဘၣ်သးမၤလီၤ.” ကဲရံၣ် မၤကမၣ်မုၣ်ကမၣ်ခွါ, အသူကသံၣ်မူၤဘှီး, အအီမူၤသံး ဒီးအမၤအၢမၤသီတၢ် အါမးအဃိ အတၢ်အိၣ်မူန့ၣ် တလီၤသးခု နီတစဲးဘၣ်. လၢခံ အသ့ၣ်ညါဘၣ်ဝဲလၢ အမၤတၢ်လၢ အဆိကမိၣ်ဝဲလၢအဘၣ် သနာ်က့ တကဲဘျုးလၢ အဂီၢ်ဘၣ်.

ပကဘၣ် ဆၢတဲာ်တၢ် ဒ်ပှၤဂၤဆၢတဲာ်ဝဲအသိးဧါ

ပဆၢတဲာ်တၢ် ဒ်ပတၢ်တူၢ်ဘၣ် ဒီးပတၢ်ဆိကမိၣ် အိၣ်ဝဲအသိး တကးဒံးဘၣ် တဘျီတခီၣ် ပဆၢတဲာ်တၢ် ဒ်ပှၤဂၤဆၢတဲာ်ဝဲအသိး. ပမၤဒ်န့ၣ်အဃိ ပန့ၢ်ဘၣ်အဘျုးလၢ ပှၤဂၤအတၢ်လဲၤခီဖျိ ဒီးတၢ်လၢအဝဲသ့ၣ်မၤဝဲ. တကးဒံးဘၣ် ပမ့ၢ်ဆၢတဲာ်တၢ် ဒ်ပဟံၣ်ဖိဃီဖိ, ပသကိး ဒီးပှၤလၢပဃၢၤ ဆၢတဲာ်ဝဲအသိးန့ၣ် အဝဲသ့ၣ် ကပာ်ကဲပှၤ.

ပနာ်န့ၢ် ပှၤဂၤအတၢ်ထံၣ် သ့ထီဘိဧါ. ပိာ်မုၣ်သးစၢ် လၢအမံၤမ့ၢ် ဖြံၤစ့လၤန့ၣ် အမၤဝဲဒ် အသကိးအါဂၤမၤဝဲ ဒီးအမံဃုာ်ဒီး ပှၤလၢအတဖျီသးဒီးအီၤဒံးဘၣ်. အသ့ၣ်ညါဘၣ်ဝဲလၢ တၢ်လၢအမၤဝဲန့ၣ် ပှၤဂၤထံၣ်ဝဲလၢ အဘၣ်သနာ်က့ တမၤသးခုအသးဘၣ်. အတဲဝဲလၢ “ယမၤပိာ်ပှၤဂၤအခံ သနာ်က့ ယတူၢ်ဘၣ် တမုာ်ဘၣ်. ယမၤဘၣ် တၢ်ကမၣ် ဒီးမၤဘၣ်တၢ်လၢ အလီၤဘၣ်ယိၣ်.”

ဒ်သိး ပဆၢတဲာ်တၢ် ကဘၣ်အဂီၢ် တၢ်ဟ့ၣ်ကူၣ်လၢအဂ့ၤ အိၣ်ဧါ

ဒ်သိး ပဆၢတဲာ်တၢ်ကဘၣ်အဂီၢ် ပတၢ်တူၢ်ဘၣ် ဒီးပှၤဂၤအတၢ်ထံၣ်န့ၣ် အရ့ဒိၣ်. သနာ်က့ ပတၢ်တူၢ်ဘၣ် ဒီးပှၤဂၤအတၢ်ထံၣ်န့ၣ် တမၤစၢၤပှၤလၢ ပကဆၢတဲာ် တၢ်လၢအဘၣ် ထီဘိဘၣ်. ဒီးပဆၢတဲာ်တၢ် ဝံၤအလီၢ်ခံ တၢ်ကကဲထီၣ်သးဒ်လဲၣ်န့ၣ် ပတသ့ၣ်ညါဘၣ်အဃိ တဘျီတခီၣ် ပတၢ်ဆၢတဲာ်န့ၣ် အမၤဘၣ်ဒိက့ၤ ပနီၢ်ကစၢ် မ့တမ့ၢ် ပှၤဂၤသ့. (ကတိၤဒိ ၁၄:၁၂) တကးဒံးဘၣ် ပမ့ၢ်ဆိကမိၣ်လၢ ပတၢ်တူၢ်ဘၣ် ဒီးပှၤဂၤအတၢ်ထံၣ် ဘၣ်ဝဲသနာ်က့ အတကဲဘျုး ထီဘိဘၣ် ဒီးအဆီတလဲသးသ့. ပမ့ၢ်ဘၣ်ကွၢ် လုၢ်လၢ်သကဲာ်ပဝးတနီၤလၢ ပှၤထံၣ်ဝဲလၢ အကမၣ်န့ၣ် ခဲအံၤ ပှၤအါဂၤတူၢ်လိာ်ဝဲ. မ့မ့ၢ် လုၢ်လၢ်သကဲာ်ပဝးလၢ ပှၤထံၣ်ဝဲလၢ အဘၣ်န့ၣ် ခဲအံၤ ပှၤတတူၢ်လိာ်ဝဲလၢၤဘၣ်.

ဒ်သိး ပဆၢတဲာ်တၢ် ကဘၣ်အဂီၢ် တၢ်ဟ့ၣ်ကူၣ်လၢအဂ့ၤ အိၣ်ဧါ. တၢ်ဟ့ၣ်ကူၣ်လၢအဂ့ၤ လၢကမၤစၢၤပှၤခဲအံၤ ဒီးကကဲဘျုးလၢ ပတၢ်အိၣ်မူလၢ ခါဆူညါအဂီၢ်န့ၣ် အိၣ်ဧါ.

တၢ်ဟ့ၣ်ကူၣ်လၢ ပနာ်န့ၢ်အီၤသ့ ဒီးအကဲဘျုးလၢ ပှၤလၢအအိၣ်လၢ တၢ်လီၢ်ကိးပူၤဒဲးအဂီၢ် အိၣ်ဝဲအဃိ လီၤသးခုဒိၣ်မး. တကးဒံးဘၣ် ဒ်သိး ပဆၢတဲာ်တၢ် ကဘၣ်အဂီၢ် ပကဘၣ်ဃု တၢ်ဟ့ၣ်ကူၣ်လၢအဂ့ၤ ဖဲလဲၣ်န့ၣ် တၢ်ဂ့ၢ်လၢခံတခါ ကပာ်ဖျါထီၣ်န့ၢ်ပှၤ.