တၢ်အဘၣ် ဒီးတၢ်အကမၣ်– လံာ်စီဆှံ အတၢ်ဟ့ၣ်ကူၣ်န့ၣ် အကဲဘျုးနီၢ်ကီၢ်
လံာ်စီဆှံ မၤစၢၤဝဲ ပှၤအကကွဲၢ်တဖၣ်ဒ်လဲၣ်. ဃုသ့ၣ်ညါကွၢ် တၢ်အိၣ်သးလွံၢ်ခါ.
၁. တၢ်ဆီဟံၣ်ဆီဃီ
ဘၣ်ဃးဒီး တၢ်ဆီဟံၣ်ဆီဃီ ဒီးဒ်သိး ပှၤဒီမိၢ်ဝၤ ကအိၣ်ဒီးတၢ်သးခုအဂီၢ် အဝဲသ့ၣ် ကဘၣ်မၤဒ်လဲၣ်န့ၣ် ပှၤအါဂၤ အိၣ်ဒီးတၢ်ထံၣ် အါမံၤအါမၠိ.
လံာ်စီဆှံ တဲဝဲလၢ– “သုဝဲတဂၤစုာ်စုာ် သုကဘၣ်အဲၣ် သုမါ ဒ်သုအဲၣ်လီၤ သုနီၢ်ကစၢ် အသးအသိးလီၤ. ဒ်န့ၣ်အသိး မါစ့ၢ်ကီး ကဘၣ်ပာ်ကဲအဝၤ ဒိၣ်မး.”—အ့းဖ့းစူး ၅:၃၃.
အခီပညီ– တၢ်ဆီဟံၣ်ဆီဃီန့ၣ် ကစၢ်ယွၤဒုးအိၣ်ထီဝဲ အဃိ ဒ်သိး ပှၤဒီမိၢ်ဝၤခံဂၤ ကအိၣ်ဒီး တၢ်သးခုအဂီၢ် အဝဲသ့ၣ် ကဘၣ်မၤဒ်လဲၣ်န့ၣ် ကစၢ်ယွၤ သ့ၣ်ညါဝဲ. (မၢ်ကူး ၁၀:၆-၉) ပှၤဒီမိၢ်ဝၤခံဂၤ မ့ၢ်ကွၢ်န့ၢ်လိာ်သး တဂၤဒီးတဂၤ တၢ်ဘၣ်သး ဒီးတကွၢ်တၢ် ထဲလၢအနီၢ်ကစၢ် တၢ်ဘၣ်သးဘၣ်န့ၣ် အဝဲသ့ၣ် ကအိၣ်ဒီး တၢ်သးခု. ဝၤလၢ အအဲၣ်အမါန့ၣ် ကပာ်ဖျါထီၣ် အတၢ်အဲၣ်ခီဖျိ အရ့ဒီးအမါ လၢတၢ်အဲၣ်တၢ်ကွံ ဒီးကွၢ်ထွဲအီၤဂ့ၤဂ့ၤ. ဒီးမါလၢ အပာ်ကဲအဝၤန့ၣ် ကပာ်ဖျါထီၣ် တၢ်ပာ်ကဲခီဖျိ အတဲတၢ်ဒီးအဝၤ လၢတၢ်ကတိၤမုာ်မုာ် ဒီးဆီၣ်ထွဲအဝၤ.
တၢ်ဟ့ၣ်ကူၣ် ကဲဘျုးနီၢ်ကီၢ်– ပှၤဒီမိၢ်ဝၤခံဂၤ လၢအမံၤမ့ၢ် ခွၤဒီးထံၤ လၢအအိၣ်လၢ ကီၢ်ဘံၤယဲနၤန့ၣ် အဝဲသ့ၣ် တူၢ်ဘၣ်လၢ အတၢ်ဆီဟံၣ်ဆီဃီ တအိၣ်ဒီး တၢ်သးခုဘၣ်. ခွၤန့ၣ် အတရ့ဒီးအမါ လၢတၢ်အဲၣ်တၢ်ကွံဘၣ်. အတဲဝဲလၢ “ယတဆိကမိၣ်န့ၢ်တၢ်လၢ ယမါအဂီၢ်ဘၣ် ဒီးယမၤမဲာ်ဆှးအီၤအါဘျီ.” မ့မ့ၢ်ထံၤန့ၣ် အဘၣ်သး မၤလီၤဖးသးဒီးအဝၤ. အတဲဝဲလၢ “ယတနာ်အီၣ် ယဝၤလၢၤဘၣ် ဒီးယတဘၣ်သး ပာ်ကဲအီၤလၢၤဘၣ်.”
လၢခံ ပှၤဒီမိၢ်ဝၤခံဂၤအံၤ မၤလိလံာ်စီဆှံ ဒီးအဝဲသ့ၣ် မၤထွဲဝဲ အ့းဖ့းစူး ၅:၃၃. ခွၤတဲဝဲလၢ “လံာ်စီဆှံ တဆၢအံၤ မၤစၢၤယၤဒ်သိး ယကရ့ဒီးယမါ လၢတၢ်အဲၣ်တၢ်ကွံ, မၤဒ်သိး ယမါကတူၢ်ဘၣ်လၢ ယအဲၣ်အီၤ ဒီးမၤလၢပှဲၤန့ၢ် အတၢ်လိၣ်ဘၣ် လၢနီၢ်ခိ ဒီးဆိကမိၣ်န့ၢ်တၢ်လၢအဂီၢ်. ဖဲယရ့ဒီးယမါ ဒ်န့ၣ်အခါ ယမါအဲၣ်ယၤ ဒီးပာ်ကဲယၤ.” မ့မ့ၢ်ထံၤန့ၣ် အတဲဝဲလၢ “ယမၤထွဲ အ့းဖ့းစူး ၅:၃၃ ဒီးပာ်ဖျါထီၣ် တၢ်ပာ်ကဲလၢ ယဝၤအဖီခိၣ်. အဃိ ယတူၢ်ဘၣ် အတၢ်အဲၣ် ဒီးအတၢ်ကဟုကယာ် ဒီးယဒိးန့ၢ်ဘၣ် တၢ်သူၣ်မံသးမုာ်.”
နကသ့ၣ်ညါအါထီၣ် တၢ်ဂ့ၢ်ဘၣ်ဃးဒီး တၢ်ဆီဟံၣ်ဆီဃီအဂီၢ် ဖးကွၢ်တၢ်ဂ့ၢ် လၢအအိၣ်လၢ ပၢၢ်ထီၣ် နီၣ်ဂံၢ် ၂ ၂၀၁၈ လၢအခိၣ်တီမ့ၢ် “12 Secrets of Successful Families” လၢ jw.org.
၂. ကဘၣ်ရ့ဒီးပှၤဂၤဒ်လဲၣ်
ခီဖျိလၢ ပှၤတနီၤန့ၣ် ကဲပိာ်မုၣ် မ့တမ့ၢ် ကဲပိာ်ခွါ, အကလုာ်ဒူၣ်, တၢ်ဆဲးတၢ်လၤ, အက့ၢ်အဂီၤ ဒီးအတၢ်ဘူၣ်တၢ်ဘါ လီၤဆီဒီးပှၤဂၤအဃိ ပှၤတရ့ဒီးအဝဲသ့ၣ် ဂ့ၤဂ့ၤဘၣ်.
လံာ်စီဆှံ တဲဝဲလၢ– “ယူးယီၣ်ပာ်ကဲ ပှၤအကလုာ်ကလုာ်တက့ၢ်.”—၁ ပ့းတရူး ၂:၁၇.
အခီပညီ– လံာ်စီဆှံ တသိၣ်လိပှၤလၢ ပကဘၣ်သးဟ့ ကလုာ်ဒူၣ်လၢ အလီၤဆီန့ၢ်ပှၤ မ့တမ့ၢ် ပှၤလၢအကဲ ပိာ်မုၣ်လၢ အအဲၣ်ပိာ်မုၣ် ပိာ်ခွါလၢ အအဲၣ်ပိာ်ခွါဘၣ်. ဒီးပှၤတဂၤ အကလုာ်ဒူၣ် ဒီးတၢ်ဆဲးတၢ်လၤ အိၣ်ဒ်လဲၣ်မ့ၢ်ဂ့ၤ, အကဲပှၤဖှီၣ်ဖိမ့ၢ်ဂ့ၤ ပှၤတၢ်အိၣ်မ့ၢ်ဂ့ၤ လံာ်စီဆှံ ဟ့ၣ်ကူၣ်ပှၤလၢ ပကပာ်ကဲ ပှၤအကလုာ်ကလုာ်. (မၤတၢ် ၁၀:၃၄) ပမ့ၢ်တဘၣ်သူၣ်ဘၣ်သး တၢ်လၢအဝဲသ့ၣ်မၤဝဲ ဒီးပသးမ့ၢ်တလီၤပလိာ်ဒီး အတၢ်စူၢ်တၢ်နာ်ဘၣ် သနာ်က့ ပကဘၣ် ပာ်ကဲအဝဲသ့ၣ် ဒီးရ့အဝဲသ့ၣ် ဂ့ၤဂ့ၤဒံး.—မးသဲ ၇:၁၂.
တၢ်ဟ့ၣ်ကူၣ် ကဲဘျုးနီၢ်ကီၢ်– ဒဲနံးယၢၤန့ၣ် ပှၤသိၣ်လိပာ်စၢၤအီၤလၢ အကဘၣ်ထံၣ် ပှၤလၢ အအိၣ်ဟဲလၢ ကီၢ်အ့ၡၢၣ် ဒ်သိးဒီး ပှၤတဖုလၢ အကဲထီၣ်တၢ်လီၤဘၣ်ယိၣ် လၢဒဲနံးယၢၤ အထံကီၢ်အဂီၢ်. အဃိ ပှၤတဂၤဂ့ၤ တဂၤဂ့ၤ လၢအအိၣ်ဟဲလၢ ကီၢ်အ့ၡၢၣ်န့ၣ် အသးဟ့ဝဲ ဒီးတဲဆါအဝဲသ့ၣ်လၢ ပှၤအါဂၤအမဲာ်ညါ. ဒဲနံးယၢၤ တဲဝဲလၢ “ယဆိကမိၣ်လၢ ယဒီသဒၢ ယထံယကီၢ်. ဒီးယတၢ်ဆိကမိၣ် ဒီးတၢ်လၢယမၤန့ၣ် ယမၣ်တထံၣ်လၢ အကမၣ်နီတစဲးဘၣ်.”
လၢခံ ဒဲနံးယၢၤ မၤလိဘၣ် တၢ်လၢ လံာ်စီဆှံ သိၣ်လိဝဲ. အတဲဝဲလၢ “ယကဘၣ် ဆီတလဲက့ၤ ယတၢ်ထံၣ်လၢာ်စီပျီ. ယကဘၣ်ထံၣ်ပှၤဂၤ ဒ်ကစၢ်ယွၤ ထံၣ်အဝဲသ့ၣ်အသိး. ဒီးပမ့ၢ်အိၣ်ဟဲ ဖဲလဲၣ်ဂ့ၤဖဲလဲၣ်ဂ့ၤ ပကဲပှၤဟီၣ်ခိၣ်ဖိ ဒ်သိးသိးလီၤ.” ခဲအံၤ ဒဲနံးယၢၤ တဲဖျါထီၣ်က့ၤ အတၢ်တူၢ်ဘၣ်လၢ “ဖဲယထံၣ်ပှၤဂၤအခါ ယမၣ်တဆိကမိၣ်လၢ အဝဲသ့ၣ် အိၣ်ဟဲတၢ်လီၢ် ဖဲလဲၣ်ဖဲလဲၣ်လၢၤဘၣ်. ယအဲၣ် ပှၤကိးကလုာ်ဒဲး ဒီးခဲအံၤ ယသကိးလၢ ယရ့အီၤဘူးဘူးန့ၣ် အိၣ်လၢတၢ်လီၢ်ဝးဝး.”
နကသ့ၣ်ညါအါထီၣ် တၢ်ဂ့ၢ်အဂီၢ် ဖးကွၢ်တၢ်ဂ့ၢ် လၢအအိၣ်လၢ ပၢၢ်ထီၣ် နီၣ်ဂံၢ် ၃ ၂၀၂၀ လၢအခိၣ်တီမ့ၢ် “Is There a Cure for Prejudice?” လၢ jw.org.
၃. ကျိၣ်စ့
ဒ်သိး ပှၤအါဂၤ ကအိၣ်ဒီး တၢ်သးခု ဒီးကအိၣ်ဘၣ် မုာ်မုာ်ခုၣ်ခုၣ်အဂီၢ် အဝဲသ့ၣ် ဃုဝဲ ကျိၣ်စ့ ဒီးတၢ်ထူးတၢ်တီၤ.
လံာ်စီဆှံ တဲဝဲလၢ– “တၢ်ကူၣ်သ့ မ့ၢ်တၢ်ဒီသဒၢ ဒ်ကျိၣ်စ့ မ့ၢ်တၢ်ဒီသဒၢ အသိးလီၤ. ဘၣ်ဆၣ် တၢ်သ့ၣ်ညါ ဒီးတၢ်ကူၣ်သ့န့ၣ် ဂ့ၤဒိၣ်န့ၢ်ဒံး ကျိၣ်စ့ ခီဖျိလၢ ပှၤလၢအအိၣ်ဒီး တၢ်ကူၣ်သ့န့ၣ် အတၢ်ကူၣ်သ့ ကမၤပူၤဖျဲးအီၤ အဃိလီၤ.”—စံၣ်တဲၤတဲလီၤတၢ် ၇:၁၂.
အခီပညီ– ပလိၣ်ဘၣ်ကျိၣ်စ့ ဘၣ်ဆၣ် ပကျိၣ်စ့ မ့ၢ်အိၣ်အါအါ သနာ်က့ ခဲအံၤမ့ၢ်ဂ့ၤ ခါဆူညါမ့ၢ်ဂ့ၤ ပကျိၣ်စ့ ဟ့ၣ်ပှၤ တၢ်သးခုနီၢ်ကီၢ် တသ့ဘၣ်. (ကတိၤဒိ ၁၈:၁၁; ၂၃:၄, ၅) ပမ့ၢ်မၤထွဲ လံာ်စီဆှံ အတၢ်ဟ့ၣ်ကူၣ်မၣ် ပကအိၣ်ဒီး တၢ်သးခုနီၢ်ကီၢ် ဒီးခါဆူညါ ပကအိၣ်ဘၣ် မုာ်မုာ်ခုၣ်ခုၣ်.—၁ တံၤမသ့း ၆:၁၇-၁၉.
တၢ်ဟ့ၣ်ကူၣ် ကဲဘျုးနီၢ်ကီၢ်– ပိာ်ခွါတဂၤ လၢအမံၤမ့ၢ် ခါဒိၤ ဒီးအအိၣ်လၢ ကီၢ်အ့ၤဒိၤနံၡါန့ၣ် အသးစၢၢ်ဆၢလၢ အကန့ၢ်ဘၣ် ကျိၣ်စ့အါအါ. အတဲဝဲလၢ “တၢ်လၢပှၤလီကီဝဲန့ၣ် ယတၢ်အိၣ်ခဲလၢာ်. ယလဲၤဟးလိာ်ကွဲ, ပှ့ၤတၢ်ဖိတၢ်လံၤ လၢအပှ့ၤဒိၣ်, ယအိၣ်ဒီး ကါဒီးဟံၣ်ဒီဒူၣ်.” သနာ်က့ ခါဒိၤ အကျိၣ်စ့ တအိၣ်ဒီးအီၤ လီၤစိၤဘၣ်. အတဲဝဲလၢ “ပှၤတဂၤ လံၣ်အီၣ်ယၤ ဒီးကျိၣ်စ့လၢ ယဘၣ်ဂုာ်ကျဲးစၢးမၤန့ၢ်အီၤ လၢအနံၣ်တဖၣ် အနံၣ်န့ၣ် လၢတဖျးမဲာ် အတီၢ်ပူၤ လီၤမၢ်ကွံာ်ဝဲလၢာ်ပျီ. လၢယတၢ်အိၣ်မူပူၤန့ၣ် ယဃုကျိၣ်စ့ ဒီးတၢ်ထူးတၢ်တီၤ ဘၣ်ဆၣ်, လၢခံကတၢၢ်န့ၣ် တၢ်တအိၣ်ဒီးယၤ နီတမံၤလၢၤဘၣ်. ယတူၢ်ဘၣ်လၢ ယဘျုးတအိၣ် နီတစဲးဘၣ် ဒီးယသးဟးဂီၤညါ.”
ခါဒိၤ မၤလိလံာ်စီဆှံ ဒီးအမၤထွဲဝဲ လံာ်စီဆှံ အတၢ်ဟ့ၣ်ကူၣ် ဘၣ်ဃးဒီး ကျိၣ်စ့. အတသးစၢၢ်ဆၢ ထဲလၢအကဃု ကျိၣ်စ့ ဒီးတၢ်ထူးတၢ်တီၤလၢၤဘၣ် ဒီးအအိၣ်မူက့ၤ ယိယိဖိ. အတဲဝဲလၢ “ခဲအံၤ ခီဖျိလၢ ယအိၣ်ဒီး တၢ်ရ့လိာ်သးဒီး ကစၢ်ယွၤ လၢအဂ့ၤအဃိ ယတူၢ်ဘၣ်လၢ ယအိၣ်ဒီး တၢ်လုၢ်ဒိၣ်ပှ့ၤဒိၣ်နီၢ်ကီၢ်. ယမံဘၣ်မုာ်မုာ် ကိးနၤဒဲး ဒီးယဒိးန့ၢ်ဘၣ် တၢ်သးခုနီၢ်ကီၢ်.”
နကသ့ၣ်ညါအါထီၣ် လံာ်စီဆှံ အတၢ်ဟ့ၣ်ကူၣ် ဘၣ်ဃးဒီး ကျိၣ်စ့အဂီၢ် ဖးကွၢ်တၢ်ဂ့ၢ် လၢအခိၣ်တီမ့ၢ် “တၢ်ကူၣ်ဘၣ်ကူၣ်သ့ ဒီးကျိၣ်စ့န့ၣ် ဟ့ၣ်ပှၤတၢ်အိၣ်မူလၢ အဂ့ၤကသ့ဧါ” လၢအအိၣ်လၢ တၢးထီခိးတၢ် နီၣ်ဂံၢ် ၃ ၂၀၂၁, လၢ jw.org.
၄. တၢ်မံဃုာ်
ဘၣ်ဃးဒီး တၢ်မံဃုာ်န့ၣ် ပှၤအါဂၤ အိၣ်ဒီးတၢ်ထံၣ် အါမံၤအါမၠိ.
လံာ်စီဆှံ တဲဝဲလၢ– “ကစၢ်ယွၤ အဲၣ်ဒိးဝဲလၢ သုကအိၣ်စီဆှံ ဒီးဟးဆှဲး တၢ်မၤကမၣ်မုၣ်ကမၣ်ခွါလီၤ. သုဝဲတဂၤစုာ်စုာ် ကဘၣ်ပၢၤ သုနီၢ်ကစၢ်အနီၢ်ခိလၢ တၢ်စီဆှံ ဒီးတၢ်လၤကပီၤအပူၤဒ်လဲၣ်န့ၣ် သုကြၢးသ့ၣ်ညါလီၤ, ဒီးသုတဘၣ်အိၣ်ဒီး တၢ်သးကတၢလၢ အပၣ်ဃုာ်ဒီးတၢ်သးကွံ ဒီးတၢ်ပၢၤသူၣ်ပၢၤသးတအိၣ်ဘၣ် ဒ်ပှၤကလုာ်တဖၣ်လၢ အတသ့ၣ်ညါ ကစၢ်ယွၤဘၣ် အသိးန့ၣ်တဂ့ၤ.”—၁ သ့းစၤလနံ ၄:၃-၅.
အခီပညီ– လံာ်စီဆှံ ပာ်ဖျါထီၣ်ဝဲ တၢ်သိၣ်တၢ်သီလၢ တၢ်မံဃုာ်အဂီၢ် လီၤတံၢ်လီၤဆဲး. အဒိ တၢ်ကတိၤ လၢအမ့ၢ် “တၢ်မၤကမၣ်မုၣ်ကမၣ်ခွါ” တဖျၢၣ်အံၤ အခီပညီပၣ်ဃုာ်ဒီး တၢ်အဲၣ်ဘၢမါအဲၣ်ဘၢဝၤ, ဃဲသဲတၢ်မၤ, ပှၤတဆီဟံၣ်ဆီဃီဒံးဘၣ် ဘၣ်ဆၣ် မံဃုာ်လိာ်သး, ပိာ်မုၣ်သကိးပိာ်မုၣ် ပိာ်ခွါသကိးပိာ်ခွါ တၢ်မံဃုာ် ဒီးတၢ်မံဃုာ်ဒီး ဆၣ်ဖိကီၢ်ဖိ. (၁ ကရံၣ်သူး ၆:၉, ၁၀) တၢ်မံဃုာ်န့ၣ် ကဲဝဲတၢ်ဟ့ၣ်တခါလၢ ကစၢ်ယွၤ ဟ့ၣ်လီၤဝဲလၢ ပှၤပိာ်မုၣ် ဒီးပှၤပိာ်ခွါ လၢအဖျီသးဝံၤ ခံဂၤအဂီၢ်.—ကတိၤဒိ ၅:၁၈, ၁၉.
တၢ်ဟ့ၣ်ကူၣ် ကဲဘျုးနီၢ်ကီၢ်– ပိာ်မုၣ် လၢအမံၤမ့ၢ် ခါလံၤ ဒီးအအိၣ်လၢ ကီၢ်အီးစတြ့လံယါ တဲဝဲလၢ “ယကဲပှၤသဘျ့အဃိ ယဆိကမိၣ်လၢ ယမ့ၢ်မံဃုာ်ဒီး ပှၤတဂၤဂၤန့ၣ် ယကတူၢ်ဘၣ်လၢ ပှၤအဲၣ်ယၤ ဒီးကဟုကယာ်ယၤ. သနာ်က့ တမ့ၢ်ဒ်သိး ယဆိကမိၣ်ဘၣ်. လၢတၢ်န့ၣ်အလီၢ် ယတူၢ်ဘၣ် တၢ်သးဘၣ်ဒိ ဒီးတဒိးန့ၢ်ဘၣ် တၢ်ကဟုကယာ်ဘၣ်.”
လၢခံ ခါလံၤ မၤလိလံာ်စီဆှံ ဒီးအမၤထွဲဝဲ လံာ်စီဆှံ အတၢ်ဟ့ၣ်ကူၣ် ဘၣ်ဃးဒီး တၢ်မံဃုာ်. အတဲဝဲလၢ “ယသ့ၣ်ညါဘၣ်လၢ ကစၢ်ယွၤ အတၢ်သိၣ်တၢ်သီန့ၣ် ကဲဝဲတၢ်ဒီသဒၢ လၢပဂီၢ် ဒီးအတမၤဘၣ်ဒိပှၤဘၣ်. ခဲအံၤ ခီဖျိလၢ ယမၤတၢ်လၢ အဘၣ်ယဟိဝၤယွၤ အသးအဃိ ယအိၣ်ဘၣ် ပူၤပူၤဖျဲးဖျဲး ဒီးယဒိးန့ၢ်ဘၣ် တၢ်အဲၣ်. ယမၤထွဲ လံာ်စီဆှံ အတၢ်ဟ့ၣ်ကူၣ်အဃိ ယသးတဘၣ်ဒိလၢၤဘၣ်.”
နကသ့ၣ်ညါအါထီၣ် တၢ်ဂ့ၢ်အဂီၢ် ဖးကွၢ်တၢ်ဂ့ၢ်လၢ အခိၣ်တီမ့ၢ် “ပှၤမ့ၢ်တဖျီသးဘၣ် သနာ်က့ မ့ၢ်အိၣ်ဃုာ်တပူၤဃီန့ၣ် လံာ်စီဆှံတဲဝဲဒ်လဲၣ်” လၢ jw.org.
ဒ်သိး ပကသ့ၣ်ညါ တၢ်အဘၣ် ဒီးတၢ်အကမၣ်အဂီၢ် ပထံၣ်ဘၣ်လၢ ပတၢ်ဘၣ်တ့ကစၢ် မၤစၢၤပှၤ. ဒီးပဒိကနၣ်ဒီးမၤထွဲ အတၢ်ဟ့ၣ်ကူၣ် မ့ၢ်တညီထီဘိဘၣ် သနာ်က့ ပမ့ၢ်ဂုာ်ကျဲးစၢး မၤထွဲ အတၢ်ဟ့ၣ်ကူၣ်န့ၣ် ကကဲဘျုးလၢပဂီၢ်. ဒီးပနာ်သ့သပှၢ်တၢၢ်လၢ အတၢ်ဟ့ၣ်ကူၣ်န့ၣ် ကမၤစၢၤပှၤဒ်သိး ပကအိၣ်ဒီး တၢ်သးခုခဲအံၤ ဒီးလၢခါဆူညါ.