Yakobi bakaka dikabu

Yisaka vuandaka na bamvula 40 ntangu yandi kuelaka Rebeka. Yandi vuandaka zola Rebeka mingi mpenza. Na manima, babutaka mapasa ya babakala.

Ya ntete nkumbu na yandi vuandaka Ezau, mpe ya zole Yakobi. Ezau vuandaka zola kutambula na nganda, mpe yandi vuandaka shasere. Kasi Yakobi vuandaka zola kuvuanda na yinzo.

Na ntangu yango, muana ya ntete nde vuandaka baka kitini yina meluta nene ya ntoto mpe ya mbongo ya dibuta kana tata na yandi mekufua. Bavuandaka bokidila yau dikabu (héritage). Na dibuta ya Yisaka, dikabu vuandaka sangisa diaka kubaka ndambu ya bansilulu yina Yehova lakaka Abrahami. Ezau vuandaka baka ve na mfunu bansilulu yango, kasi Yakobi zabaka ti yavuandaka na mfunu mpenza.

Kilumbu mosi Ezau vutukaka na yinzo ya kulemba mpenza na manima ya kulutisa kilumbu ya mvimba na kusosa bibulu. Yandi kuwaka nsunga ya madia ya kitoko yina Yakobi vuandaka lamba mpe yandi tubaka: ‘Munu kele na nsatu ya ngolo! Pesa munu mua ndambu ya supu ya mbuaki!’ Yakobi tubaka: ‘Munu kepesa nge, kasi laka munu ntete ti munu lenda baka dikabu na nge.’ Ezau tubaka: ‘Munu kele ve na mfunu ya dikabu yango! Nge lenda baka yau. Munu kele kaka na nsatu ya kudia.’ Nge mekanisa ti diambu yina Ezau salaka vuandaka ya nduenga? Ve, ata fioti ve. Ezau kabaka kima mosi ya mfunu mpenza, kaka samu na dilonga ya supu.

Ntangu Yisaka kumaka kiboba, ntangu kokaka samu yandi pesa muana na yandi ya ntete lusakumunu. Kasi Rebeka sadisaka Yakobi, leki ya Ezau samu yandi baka lusakumunu yango. Ntangu Ezau zabaka diambu yango, yandi fuemaka ngolo mpe yandi sosaka kufua dipasa na yandi. Yisaka mpe Rebeka vuandaka na nsatu ya kutanina Yakobi, yau yina bazabisaka yandi: ‘Kuenda vuanda na Labana, mpangi ya mama na nge, tii ntangu nganzi ya Ezau kekita.’ Yakobi kuwaka malongi ya bibuti na yandi mpe yandi tinaka samu na kutanina luzingu na yandi.