Biuvu ya bantangi
Bampova ‘Nge kesunga bau,’ yina kele na Nkunga 12:7, kena kumonisa ‘bantu yina kena kuniokuama’ (verse 5) to ‘bampova ya Yehova’ (verse 6)?
Baverse yina kele na ntuala mpe na manima kena kumonisa ti Nkunga 12:7 kena kutubila bantu.
Na Nkunga 12:1-4, beto ketangaka ti ‘bantu ya kukuikama mezimbana na kati ya bantu.’ Ntangu yayi beto tadila Nkunga 12:5-7, baverse yina kele na kiuvu na beto.
“‘Lokola bakena kuniokola bantu yina kena kumona mpasi,
Lokola mputu kena kudila,
Munu ketelema samu na kusala diambu,’ Yehova muntu metuba.
‘Munu kevukisa bau na bantu yina kena kusadila bau mambu na nko.’
Bampova ya Yehova kele ya kuvedila;
Yakele lokola palata yina bamekumisa ya kuvedila na fure ya tiya yina mesalama na ntoto, yina bamekumisa ya kuvedila mbala nsambuadi.
Nge kesunga bau, O Yehova;
Nge ketanina konso muntu na kati na bau samu na mvula na mvula na mbandu yayi.”
Verse 5 kena kumonisa mambu yina Nzambi kena kutuba samu na ‘bantu yina kena kuniokuama.’ Yandi kevukisa bau.
Verse 6 mebuela ti ‘bampova ya Yehova kele ya kuvedila,’ ‘lokola palata yina bamekumisa ya kuvedila.’ Baklisto kendimaka bampova yango.—Nk. 18:30; 119:140.
Ntangu yayi beto tadila verse melanda, Nkunga 12:7: ‘Nge kesunga bau, O Yehova; nge ketanina konso muntu na kati na bau samu na mvula na mvula na mbandu yayi.’ Yinki zola monisa mpova ‘bau’?
Lokola verse 7 melanda verse 6 yina kele ‘bampova ya Yehova,’ bantu yankaka lenda kanisa ti mpova ‘bau’ kena kumonisa bampova ya Nzambi. Mpe beto mezaba ti Nzambi taninaka Biblia atako bambeni salaka bangolo mingi samu na kupekisa mpe kubebisa yau.—Yez. 40:8; 1 Pie. 1:25.
Kasi yakele diaka kedika ti Yehova ketaninaka bantu yina verse 5 metubila. Yehova sadisaka, vukisaka mpe yandi ketatamana kusadisa mpe kuvukisa ‘bantu yina kena kuniokuama’ mpe bantu yina ‘kena kumona mpasi.’—Yobi 36:15; Nk. 6:4; 31:1, 2; 54:7; 145:20.
Na yau, mpova ‘bau’ yina kele na verse 7 kena kutubila banani?
Kana beto metala nkunga yango mbotembote yakena kumonana puelele ti mpova ‘bau’ kena kutubila bantu.
Na Nkunga 12:1 Davidi kena kutubila ‘bisadi ya kukuikama’ ya Yehova yina bantu ya yimbi vuandaka vuna. Mpe na manima, beto ketangaka ti Yehova kesala samu na kubuisa bantu yina ketubaka mambu yango ya yimbi. Nkunga yango kena kundimisa beto ti beto lenda tudila Nzambi ntima ti yandi kesala samu na mambote ya bisadi na yandi, samu bampova na yandi kele ya kuvedila.
Na yau verse 7 kena kutuba ti Yehova kesunga mpe yandi ketanina ‘bau,’ bantu yina bantu ya yimbi kena kuniokola.
Mpova ‘bau’ kena kumonisa bampova ya Ebreo ya Bamasorete. Basadilaka mpova “beto” mbala zole na verse yayi na mbangudulu ya ntete ya Masonukua ya Ebreo na ndinga Greki. Na yau yafueti tubila bantu ya kukuikama yina bakena kuniokola mpe bakena kumonisa mpasi. Na nsuka verse 7 metuba ti ‘konso muntu na kati’ ya bantu ya kukuikama ketaninua ‘na mbandu yayi,’ na bantu yina kekindisaka mambu ya yimbi. (Nk. 12:7, 8) Na mbangudulu mosi ya Masonukua ya Ebreo na ndinga ya Arameyen, verse 7 metuba: “Nge, O MFUMU, nge ketanina bantu ya lunungu, nge kesunga bau na mbandu yayi ya yimbi samu na mvula na mvula.” Yakele kidimbu yankaka yina kena kumonisa ti Nkunga 12:7 kena kutubila ve bampova ya Nzambi.
Samu na mfunu yango verse yango kena kupesa kivuvu na ‘bantu ya kukuikama’ ti Nzambi kesala.