DILONGI 5

Yinki mambu nge kemona na balukutakanu na beto?

Bambangi ya Yehova na Yinzo ya Kimfumu na Argentine — Argentine

Lukutakanu mosi ya Bambangi ya Yehova na Sierra Leone — Sierra Leone

Lukutakanu mosi ya Bambangi ya Yehova na Belgique — Belgique

Lukutakanu mosi ya Bambangi ya Yehova na Malaisie — Malaisie

Bantu mingi kekuendaka sambila diaka ve samu babakaka ve bamvutu na biuvu ya bau yina metala luzingu mpe babakaka ve lukindusu. Kasi, samu na yinki yakele mbote nge kutakanaka na balukutanu ya Bambangi ya Yehova? Yinki mambu nge kemona kuna?

Nge kemona kiese ya kuvuanda kintuadi na bantu yina kezolanaka mpe ketulanaka likebi. Baklisto ya ntete babongisamaka na kati ya bimvuka mpe bavuandaka sala balukutakanu samu na kusambila Nzambi, kulonguka Biblia mpe kukindasana. (Baebreo 10:24, 25) Na balukutakanu yango, kisika bavuandaka monasana nzola, bavuandaka kikumona ti bakele kintuadi na bankundi ya kedikakedika, yazola tuba bampangi na bau baklisto. (2 Batesalonika 1:3; 3 Yoane 14) Beto diaka beto kelandaka kifuani ya bau mpe beto kemonaka kiese ya mutindu yina.

Nge kemona ti kulonguka kusadila malongi ya Biblia yakepesaka mambote. Mutindu mosi kaka na ntangu ya ntama, bubu yayi diaka, babakala, bakento mpe bana bau kekutakanaka kisika mosi. Babakala yina mezaba mpenza kulonga bakesadilaka Biblia samu na kusadisa beto beto zaba kusadila malongi na yau na luzingu na beto ya kilumbu na kilumbu. (Kulonga 31:12; Nehemia 8:8) Muntu nionso lenda pesa bamvutu kana disolo melomba bakutakani batuba, mpe muntu nionso lenda yimbila. Yau kepesaka beto diluaku beto tubila kivuvu na beto.—Baebreo 10:23.

Nge kemona ti kiminu na nge kekuma ngolo. Ntumua Paulo tubilaka kimvuka mosi ya ntangu na yandi ti: “Mono kele na nsatu ya ngolo ya kumona beno, . . . samu beto kindasana, muntu na muntu kindusua na kiminu ya muntu ya nkaka, ya beno kindisa munu, mpe ya munu kindisa beno.” (Baroma 1:11, 12, NWT) Ntangu beto kekutakanaka mbala na mbala na balukutakanu kintuadi na bampangi na beto baklisto, kiminu ya beto mpe nsatu ya beto ya kuzitisa minsiku ya Biblia kekumaka ngolo.

Tomelomba nge nge kuiza na lukutakanu ya beto ya mbala yina kekuiza samu nge mona nge mosi mambu beto mekatuka tubila. Beto keyamba nge na kiese mpenza. Balukutakanu nionso kele kondua kufuta mbongo; beto kesalaka bansisani ve.

Kifuani ya banani beto kelandaka na mutindu ya kusala balukutakanu ya beto?
Yinki mambote beto lenda baka kana beto kena kutakanaka?