Wapi mutindu ya mbote mpenza ya kubongisa balukutakanu?

Kana Mbangi ya Yehova mosi kelongukaka na nge Biblia, beto mebanza ti nge kesalaka ngolo nge tadila ntete disolo nionso yina beno kelonguka. Kana nge mesala diaka mutindu yina tekila nge kuenda na balukutakanu, yakesadisa nge mingi. Kana nge mekumisa yau kifu ya nge, yau kevuanda mbote mingi kuluta.

Pona ntangu mpe kisika yina nge kelongukila. Yinki ntangu nge kemonaka ti nge kelonguka mbote mpenza? Na nsukansuka, tekila nge banda kisalu, to na mpimpa, ntangu bana meleka? Yavuanda kana nge lenda longuka bantangu mingi ve, pona ntangu yikua nge kelonguka mpe kubika kima mosi ve pekisa nge kusala yau. Sosa kisika mekondua makelele; kanga kima nionso yina lenda katula dikebi na nge, na kifuani radio, televizyo, mpe telefone. Kusambila tekila ya kulonguka kesadisa nge nge tula bangindu nionso na Mpova ya Nzambi, na kisika ya kutula yau na mitungisi ya kilumbu yina.​—Bafilipi 4:6, 7.

Tula bidimbu na disolo yina nge kena kubongisa, mpe kubama samu na kupesa bamvutu. Sosa kuzaba ntete diambu yina disolo yango metubila. Tadila yintu ya diambu ya disolo to ya bikapu yango, mpe mutindu bayintu ya diambu mosimosi mewizana na yintu ya diambu ya disolo. Tadila bafoto nionso, mpe tanga biuvu ya mvutukulu yina mesimba bangindu ya mfunu. Na manima, tanga paragrafe mosimosi mpe sosa bamvutu ya biuvu yina bametula vana. Tanga baverse yina batula ve bangindu na yau na paragrafe, mpe yindula mutindu yamewizana na disolo. (Bisalu 17:11) Kana nge memona mvutu, tula kidimbu na mua bampova ya mfunu samu yasadisa nge nge mona mbala mosi mvutu ntangu nge kevuanda na lukutakanu. Na manima, ntangu nge kevuanda na lukutakanu, nge lenda tombola diboko mpe kupesa mvutu ya nkufi na bampova ya nge mosi.

Kana nge kena bongisa masolo mutindu na mutindu yina kesalamaka na balukutakunu sabala na sabala, nge kekudisa nzayilu na nge ya Biblia.​—Matayo 13:51, 52.

• Yinki kifu nge lenda baka samu na kubongisa balukutakanu?

• Yinki mutindu nge lenda kukubama samu na kupesa mvutu na lukutakanu?