Yinki yina Nsambudulu na kati ya dibuta?

Banda ntama, Yehova kezolaka ti bantu ya dibuta mosi balutisaka ntangu kintuadi, samu na kukindisa nguizani ya bau na Nzambi mpe ya bau na bau. (Kulonga 6:6, 7) Yau yina mabuta ya Bambangi ya Yehova keponaka kilumbu mosi sabala na sabala samu na kulonguka Biblia kintuadi. Na bantangu yina, bau kesololaka mambu ya Nzambi yina mewizana na bansatu ya dibuta na bau na mutindu yina kesala ti muntu nionso kukimona mbote. Yavuanda kana nge kele nge mosi, nge lenda mpe kupona ntangu samu nge vuanda kintuadi na Nzambi mpe nge longuka disolo mosi ya Biblia yina nge mepona.

Yau kele ntangu ya kupusana penepene na Yehova. Biblia metuba mutindu yayi: “Beno kuenda penepene na Nzambi, ebuna yandi takwisa penepene na beno.” (Yakobo 4:8) Beto kekumaka kuzaba Yehova mbotembote ntangu beto kena longuka mambu metadila kimuntu mpe bisalu na yandi na kati ya Biblia, Mpova na yandi. Mutindu ya pete ya kubanda nsambudulu na kati ya dibuta ya beno yau kele ya kubaka mua miniti samu na kutanga Biblia kintuadi na ndinga ya ngolo. Na kifuani, beno lenda landa manaka ya ntangulu ya Biblia ya sabala na sabala yina kesalamaka na lukutakanu Luzingu mpe Kisalu ya Baklisto. Beno lenda pesa muntu mosimosi ya dibuta kitini yina yandi ketanga, mpe na manima, beno nionso lenda tubila mambu yina beno melonguka na Biblia.

Yau kele ntangu ya kukumisa nguizani ya dibuta ngolo. Nguizani ya nketo na bakala mpe ya bibuti na bana kekumaka ngolo kana bau kena kulonguka Biblia na kati ya dibuta. Yau fueti vuanda ntangu ya kiese, ya kiyenge mpe yina muntu nionso kevingilaka na kiese sabala na sabala. Bibuti balenda pona masolo na kutadila bamvula ya bana na bau. Na kifuani, balenda sadila bayintu ya masolo yankaka yina kebimaka na Nkengidi mpe ya Lamuka! Beno lenda tubila diaka diambu mosi yina bana beno kutanaka na yau na kalasi mpe mutindu ya kununga yau. Samu na yinki ve kutala programe ya JW Broadcasting (tv.jw.org) mpe kutubila yau na manima? Beno lenda longuka diaka miyimbu yina bakeyimbila na lukutakanu mpe kudia mua kima na manima ya ndongokolo.

Ntangu yina beno kena lutisa sabala na sabala samu na kusambila Yehova kintuadi, yau kesadisa mosimosi na kati ya dibuta yandi yangalala na Mpova ya Nzambi, mpe Nzambi kesakumuna vema ya beno.​—Nkunga 1:1-3.

• Samu na yinki beto keponaka kilumbu mosi na sabala samu na nsambudulu ya dibuta?

• Yinki mutindu bibuti lenda sala ti tangu yina pesa dibuta mvimba kiese?