Yinki kele kisalu ya bankulutu na kimvuka?

Na nkubukulu ya beto, beto kele ve na bamfumu ya dibundu yina kefutamaka samu na kisalu na bau. Mutindu yavuandilaka na Baklisto ya ntete, bankengidi yina mekokisa mambu kelombamaka na Biblia ketulamaka samu na ‘kutanina kimvuka ya Nzambi.’ (Bisalu 20:28) Bampangi yango bau kele babakala yina kele na nguizani ya ngolo na Yehova; baketuadisaka kimvuka mpe baketaninaka yau ‘na luzolo na bau mosi, kansi na kingolo-ngolo ve, samu na kubaka mbongo ve kansi na luzolo ti kiese.’ (1 Piere 5:1-3) Yinki bisalu bau kesadilaka beto?

Bau kesungaka mpe bau ketaninaka beto. Bankulutu ketuadisaka mpe ketaninaka kimvuka samu yavuanda na nguizani ya mbote na Yehova. Lokola bankulutu mezaba ti Nzambi nde muntu pesaka bau kiyekua yina ya mfunu mingi, bau keyadilaka ve beto bisadi ya Nzambi, kansi bakesadisaka beto nde beto kukimona mbote mpe kiese. (2 Bakorinto 1:24) Mutindu kaka mvungi ya mameme kesalaka ngolo yandi kipe dimeme mosimosi, bankulutu mpe diaka bakesalaka ngolo bazaba mpangi mosimosi na kimvuka.​—Bingana 27:23.

Bau kelongaka beto mutindu ya kusala luzolo ya Nzambi. Sabala na sabala, bankulutu ketuadisaka balukutakanu ya kimvuka, yina kesadisaka beto kuma na kiminu ya ngolo. (Bisalu 15:32) Babakala yango ya luvema baketuadisaka diaka kisalu ya kusamuna nsangu ya mbote. Bau kesamunaka kintuadi na beto mpe bakemonisinaka beto mutindu nionso ya kusamuna.

Bau kekindisaka mosimosi na beto. Samu na kusadisa beto beto vuanda na kinkundi ya mbote na Yehova, bankulutu balenda kuiza tala beto na yinzo ya beto to na Yinzo ya Kimfumu, mpe kupesa beto lusadusu mpe lukindusu yina mekatuka na Biblia.​—Yakobo 5:14, 15.

Katula biyekua ya bau na kimvuka, bankulutu mingi kekuendaka na kisalu, mpe bakele na biyekua ya dibuta yina bafueti kokisa. Yamebonga mpenza beto zitisa bampangi yango yina kesalaka kisalu ya ngolo.​—1 Batesalonika 5:12, 13.

• Yinki kiyekua bankulutu kesalaka na kimvuka?

• Yinki mutindu baketudilaka mosimosi na beto dikebi?