Nkudulu—dikabu Meluta Nene Nzambi Mepesa Beto

1, 2. (a) Samu na nge, yinki ntangu dikabu mosi kevuandaka na mfunu? (b) Samu na yinki nkudulu kele dikabu meluta nene yina Nzambi mepesa beto?

YINKI kele dikabu meluta kitoko bamepesaka nge? Samu dikabu vuanda na mfunu, yakelombaka ve yavuanda ntete ya ntalu. Kana dikabu mosi mesepedisa nge, to nge vuandaka na nsatu na yau, nge kezola yau mingi.

² Na makabu nionso yina Nzambi mepesaka beto, yakele na dikabu mosi yina beto kele na nsatu na yau mingi. Yakele dikabu meluta mfunu yina Nzambi mepesaka bantu. Na kikapu yayi, beto kelonguka ti Yehova tindaka Muana na yandi, Yesu Klisto, samu beto baka luzingu ya mvula na mvula. (Tanga Matayo 20:28.) Yehova monisaka ti yandi kezolaka beto mingi na mutindu yandi tindaka Yesu awa na ntoto lokola nkudulu.

NKUDULU KELE YINKI?

3. Samu na yinki bantu kekufuaka?

³ Nkudulu kele nzila yina Yehova sadilaka samu na kukula bantu na kinanga ya disumu mpe ya lufua. (Baefezo 1:7) Samu na kubakusa samu na yinki nkudulu kele na mfunu, beto fueti zaba ntete yinki diambu salamaka na bilanga ya Edeni yameluta bamvula mingi. Bibuti na beto ya ntete, Adamu na Eva, basalaka disumu. Lokola basalaka disumu, yau yina bakufuaka. Beto diaka beto kekufuaka samu Adamu na Eva batambikisaka beto disumu na bau.—Tala Noti ya 9.

4. Adamu vuandaka nani mpe yinki Yehova pesaka yandi?

⁴ Ntangu Yehova salaka bakala ya ntete, yandi pesaka yandi kima mosi ya mfunu mingi: Luzingu ya kukoka. Yandi vuandaka na makanisi ya kukoka mpe nzutu ya kukoka. Yandi lendaka bela ve, nuna ve mpe kufua ve. Lokola Yehova nde salaka Adamu, yandi vuandaka lokola tata samu na Adamu. (Luka 3:38) Yehova vuandaka solola na Adamu ntangu nionso. Nzambi zabisaka yandi mbotembote yina yandi fueti sala mpe yandi pesaka yandi kisalu ya mbote.—Kuyantika 1:28-30; 2:16, 17.

5. Yinki zola monisa bampova yayi ya Biblia: ‘Adamu salamaka na kifuani ya Nzambi’?

⁵ Adamu salamaka ‘na kifuanusu ya Nzambi.’ (Kuyantika 1:27) Yehova pesaka yandi bikadulu yina kele na Yandi mosi, na kifuani nzola, nduenga, lunungu, mpe kilendo. Yandi pesaka Adamu kimpuanza ya kupona. Adamu vuandaka ve lokola masini. Nzambi salaka yandi na makoki ya kupona kusala mbote to yimbi. Kana yandi ponaka kuzitisa Nzambi, yandi zolaka kuzinga mvula na mvula na Paradiso.

6. (a) Ntangu Adamu mangaka kuzitisa Nzambi, yinki yandi zimbisaka? (b) Yinki diambu yango natinaka beto?

⁶ Ntangu Adamu mangaka kuzitisa Nzambi, yandi bakaka kitumbu ya lufua. Yandi zimbisaka mambu mingi ya mfunu. Kinkundi na yandi na Nzambi, luzingu ya kukoka mpe luzingu na Paradiso. (Kuyantika 3:17-19) Lokola Adamu na Eva ponaka kumanga kuzitisa Nzambi, kivuvu vuandaka diaka ve samu na bau. Samu na diambu yina Adamu salaka ‘disumu kotaka na ntoto mpe lufua na nzila ya disumu, mutindu mosi mpe lufua memuanganaka na bantu nionso samu bau nionso salaka disumu.’ (Baroma 5:12) Ntangu Adamu salaka disumu yandi “kuditekaka” mpe yandi tekaka beto na kinanga ya disumu mpe ya lufua. (Baroma 7:14) Kasi, kivuvu kele samu na beto? Ee, yakele.

7, 8. Nkudulu kele yinki?

⁷ Nkudulu kele yinki? Nkudulu lenda monisa mambu zole. Ya ntete, nkudulu kele ntalu bakefutaka samu na kukula muntu to kusumba diaka kima mosi. Ya zole, nkudulu kele mbongo to kima yina valere na yau mekokana na valere ya kima yina mebeba to mezimbana.

⁸ Ata muntu mosi ve lendaka futa yimbi yina Adamu salaka ntangu yandi salaka disumu mpe yandi natinaka beto lufua. Kasi Yehova bongisaka nzila mosi samu na kukula beto na disumu mpe na lufua. Beto tala mutindu Yehova pesaka nkudulu mpe mambote yina nkudulu lenda natina beto.

YINKI MUTINDU YEHOVA PESAKA NKUDULU?

9. Nkudulu ya yinki mutindu fuanaka futama?

⁹ Muntu mosi ve na kati na beto lenda futa nkudulu samu na luzingu ya kukoka yina Adamu zimbisaka. Samu na yinki? Samu beto nionso kele bantu ya masumu. (Nkunga 49:7, 8) Yalombaka luzingu ya muntu ya nkaka ya kukoka samu na kufuta nkudulu. Yau yina bamebokidila yau ‘nkudulu yina mefuanana.’ (1 Timoteo 2:6) Nkudulu fueti kokana na luzingu yina Adamu zimbisaka.

10. Yinki mutindu Yehova pesaka nkudulu?

¹⁰ Yinki mutindu Yehova pesaka nkudulu? Yehova tindaka awa na ntoto Muana na yandi yina yandi kezolaka mingi. Muana yango, Yesu, vuandaka kisemua ya ntete yina yandi salaka. (1 Yoane 4:9, 10) Yesu ndimaka kubika Tata na yandi mpe kisika na yandi na dizulu. (Bafilipi 2:7) Yehova katusaka luzingu ya Yesu na dizulu mpe yandi salaka ti yandi butuka muntu awa na ntoto, yina mekondua disumu.—Luka 1:35.

11. Yinki mutindu muntu mosi lenda futa nkudulu samu na bantu nionso?

¹¹ Lokola Adamu, muntu ya ntete, mangaka kuzitisa Yehova, yandi zimbisaka luzingu ya kukoka samu na bantu nionso. Yakele na muntu mosi yina lendaka katula bana nionso ya Adamu na kinanga ya disumu? Ee. (Tanga Baroma 5:19.) Yesu, muntu yina salaka disumu ve, pesaka luzingu na yandi ya kukoka lokola nkudulu. (1 Bakorinto 15:45) Luzingu na yandi ya kukoka katulaka bana nionso ya Adamu na kinanga ya lufua.—1 Bakorinto 15:21, 22.

12. Samu na yinki yalombaka ti Yesu niokuama mutindu yina?

¹² Biblia kena kuzabisa beto ti Yesu monaka mpasi mingi tekila yandi kufua. Babulaka yandi na nko nionso, babulaka yandi bansoso na zulu ya yinti ya mpasi, yandi niokuamaka mpe yandi kufuaka lufua mosi ya mpasi. (Yoane 19:1, 16-18, 30) Samu na yinki yalombaka ti Yesu niokuama mutindu yina? Samu Satana tubaka ti muntu mosi ve lendaka bikana ya kukuikama na Nzambi kana yandi mekutana na nzomono ya ngolo. Yesu monisaka ti muntu ya kukoka lenda bikana ya kukuikama ata yandi mekutana na nzomono ya ngolo. Yindula ntete kiese yina Yehova monaka mutindu Yesu bikanaka ya kukuikama!—Bingana 27:11; tala Noti ya 15.

13. Yinki mutindu nkudulu futamaka?

¹³ Yinki mutindu nkudulu futamaka? Yesu pesaka Tata na yandi ntalu ya luzingu na yandi. Na kilumbu ya 14 ya ngonda ya Nisana ya mvula 33 ya kalandriye ya Bayuda, Yehova bikaka nzila na bambeni bakufua Yesu. (Baebreo 10:10) Na manima ya bilumbu tatu Yehova futumunaka Yesu na nzutu ya kinsuni ve kasi na nzutu ya kimpeve. Na manima, ntangu Yesu vutukaka na dizulu, yandi monisaka Tata na yandi ntalu ya luzingu na yandi ya kukoka lokola nkudulu. (Baebreo 9:24) Lokola nkudulu futamaka, beto kele na diluaku ya kukatuka na kinanga ya disumu mpe ya lufua.—Tanga Baroma 3:23, 24.

MAMBOTE YINA NKUDULU LENDA PESA NGE

14, 15. Yinki beto fueti sala samu masumu na beto yalemvukulua?

¹⁴ Beto kebakaka mambote na dikabu ya nene yina Yehova pesaka beto. Beto tala ntangu yayi mambote yina nkudulu kena kupesa beto bubu yayi, mpe mambote yina yau kepesa beto na bilumbu kena kuiza.

¹⁵ Nlemvo ya masumu ya beto. Yau kevuandaka mpasi na kusala ntangu nionso mambu ya mbote. Beto kesalaka banzimbana mpe bambala yankaka beto ketubaka mpe beto kesalaka mambu ya yimbi. (Bakolose 1:13, 14) Yinki beto lenda sala samu Nzambi lemvukila beto? Beto fueti mona kiadi ya ngolo samu na mambu yina beto salaka. Katula yau, beto fueti kukikulula mpe kulomba nlemvo na Yehova. Kana beto mesala mutindu yina, beto lenda vuanda na kivuvu ti masumu na beto melemvukulua.—1 Yoane 1:8, 9.

16. Yinki beto fueti sala samu na kuvuanda na kikansasa ya mbote?

¹⁶ Kikansasa ya mbote. Kana kikansasa na beto kena zabisa beto ti beto salaka diambu mosi ya yimbi, beto kekukitungisaka, mbala yankaka beto kekukimonaka ti beto mekondua kivuvu mpe beto kele diaka na mfunu ve. Kasi beto fueti lemba nzutu ve. Kana beto melomba Yehova yandi lemvukila beto, beto lenda tula kivuvu ti yandi kekuwa beto mpe yandi kelemvukila beto. (Baebreo 9:13, 14) Yehova kesepelaka ti beto zabisa yandi mambu yina ketungisaka mpe kelebikisaka beto. (Baebreo 4:14-16) Kana beto mesala mutindu yina, beto kekuma na kiyenge na Nzambi.

17. Yinki mambote beto lenda baka lokola Yesu fuilaka beto?

¹⁷ Kivuvu ya kuzinga mvula na mvula. ‘Lufutu yina disumu kepesaka kele lufua, kasi dikabu yina Nzambi kepesaka kele luzingu ya mvula na mvula na nzila ya Mfumu na beto Klisto Yesu.’ (Baroma 6:23) Lokola Yesu fuilaka beto, beto lenda baka luzingu ya mvula na mvula mpe mavimpi ya kukoka. (Kusonga 21:3, 4) Kasi yinki beto fueti sala samu na kubaka mambote yango?

YINKI MAMBU NGE LENDA SALA SAMU NA KUMONISA TI NGE KENDIMAKA NKUDULU?

18. Yinki mutindu beto mezabila ti Yehova kezolaka beto mingi?

¹⁸ Yindula kiese yina nge kemona kana muntu mosi mekabila nge kima mosi ya kitoko. Nkudulu kele dikabu mosi ya kitoko yina meluta makabu nionso, mpe beto fueti vutudila Yehova matondo mingi samu na yau. Yoane 3:16 metubila beto ti ‘Nzambi zolaka ntoto mingi mpenza yau yina yandi pesaka Muana na yandi mosi kaka yina butukaka.’ Ya kedika, Yehova kezolaka beto mingi, yandi pesaka beto Yesu Muana na yandi yina yandi kezolaka mingi. Mpe beto mezaba diaka ti Yesu kezolaka beto mingi, samu yandi ndimaka kufua samu na beto. (Yoane 15:13) Dikabu ya nkudulu fueti ndimisa nge ti Yehova mpe Yesu kezolaka nge mpenza.—Bagalatia 2:20.

19, 20. (a) Yinki mutindu nge lenda kuma nkundi ya Yehova? (b) Yinki mutindu nge lenda monisa ti nge mendima nkayilu ya nkudulu ya Yesu?

¹⁹ Na manima ya kulonguka ti Yehova kezolaka beto mingi, yinki mutindu nge lenda kuma nkundi na yandi? Yau kevuandaka mpasi kuzola muntu yina nge mezaba ve. Yoane 17:3 metuba ti beto lenda longuka kuzaba Yehova. Kana nge mesala mutindu yina, nge kezola yandi mingi mpe nge kekuma nkundi na yandi. Na yau tatamana kulonguka kuzaba Yehova na nzila ya Biblia.—1 Yoane 5:3.

²⁰ Monisa ti nge mendima nkayilu ya nkudulu ya Yesu. Biblia metuba ti ‘muntu yina kemonisa kiminu na Muana kele na luzingu ya mvula na mvula.’ (Yoane 3:36) Kumonisa kiminu na Yesu zola monisa yinki? Yazola monisa kusala mambu yina Yesu Klisto longaka beto. (Yoane 13:15) Kumonisa kiminu na Yesu fueti sukila kaka na mpova ve; beto fueti monisa yau na mavanga. Yakobo 2:26 metuba ti: ‘Kiminu yina mekondua bisalu kele ya kufua.’

21, 22. (a) Samu na yinki beto fueti kuendaka na mbambukulu ya lufua ya Yesu konso mvula? (b) Yinki beto ketubila na Kikapu ya 6 mpe ya 7?

²¹ Kuendaka na mbambukulu ya lufua ya Yesu. Na nkokila ya kilumbu yina Yesu kufuaka, Yandi lombaka beto ti, beto fueti kanisaka lufua na yandi. Beto kesalaka yau konso mvula, mpe bakebokidilaka yau Mbambukulu to “Madia ya Nkokila ya Mfumu” (1 Bakorinto 11:20; Matayo 26:26-28) Yesu zola ti beto zimbakana ve ti yandi pesaka beto luzingu na yandi ya kukoka lokola nkudulu. Yandi tubaka: ‘Beno tatamana kusala yau samu na kuyindula munu.’ (Tanga Luka 22:19.) Kukuenda na mbambukulu ya lufua ya Yesu kemonisaka ti nge kebakaka na mfunu nkudulu mpe nzola ya nene yina Yehova na Yesu monisaka samu na beto.—Tala Noti ya 16.

²² Nkudulu kele dikabu meluta nene yina beto mebakaka. (2 Bakorinto 9:14, 15) Dikabu yango lenda pesa mambote ata na bamilio ya bantu yina mekufuaka. Kikapu ya 6 mpe ya 7 metubila mutindu diambu yango kesalamina.