Yobi vuandaka nani?

Na yinsi ya Uze, yavuandaka na bakala mosi yina vuandaka sambila Yehova. Nkumbu na yandi vuandaka Yobi. Yandi vuandaka na kimvuama mingi mpe na dibuta mosi ya nene. Yandi vuandaka na kimpombo, mpe yandi vuandaka sadisa bamputu, banketo yina mefuilaka babakala, mpe bana yina mekondua bibuti. Kasi lokola Yobi vuandaka sala mambu ya mbote, yandi salaka kutana ata fioti ve na mambu ya mpasi?

Yobi zabaka ve ti Satana Diabulu vuandaka tala yandi. Yehova tubilaka Satana: ‘Nge memona kisadi na munu Yobi? Muntu mosi ve na ntoto kele lokola yandi. Yandi kewilaka munu mpe yandi kesalaka mambu ya mbote.’ Satana tubaka: ‘Ya kedika Yobi kezitisaka nge. Nge ketaninaka yandi mpe nge kesakumunaka yandi. Nge mepesa yandi ntoto mpe bibulu. Kana nge meziona bima yango nionso, yandi kelemba kusambila nge.’ Yehova tubaka: ‘Nge lenda meka Yobi. Kasi kufua yandi ve.’ Samu na yinki Yehova bikaka nzila ti Satana meka Yobi? Yandi vuandaka na kivuvu ti Yobi kebikana ya kukuikama.

Samu na kumeka Yobi, Satana bimisinaka yandi bampasi ya mutindu na mutindu. Ya ntete, yandi tindaka bantu yina bavuandaka bokidila Basabea bayiba bangombe mpe bampunda nionso ya Yobi. Na manima tiya mosi yokaka mameme nionso ya Yobi. Grupe yankaka ya bantu, Bakaladea yibaka bakamela na yandi nionso. Bisadi yina vuandaka tanina bibulu yango kufuaka. Na manima na yau, diambu ya yimbi kuluta salamaka. Bana nionso ya Yobi kufuaka ntangu yinzo yina bavuandaka sadila feti kubuaka. Yobi monaka mpasi mingi na ntima, kasi yandi lembaka ve kusambila Yehova.

Lokola Satana vuandaka na nsatu ti Yobi niokuama diaka mingi kuluta, yandi lozilaka yandi maladi ya yimbi ya babibon na nzutu ya mvimba. Yavuandaka sala Yobi mpasi mingi. Yandi zabaka ve samu na yinki mambu ya mutindu yina kuminaka yandi. Atako plina, Yobi tatamanaka kusambila Yehova. Nzambi vuandaka mona mambu yango nionso, mpe yandi vuandaka sepela na Yobi.

Na manima Satana tindaka babakala tatu bameka Yobi. Batubilaka yandi: ‘Nge salaka disumu mpe nge kena kusueka yau. Nzambi kena kupesa nge kitumbu.’ Yobi tubaka: ‘Munu salaka ve diambu ya yimbi.’ Kasi na manima, Yobi bandaka kukanisa ti Yehova nde vuandaka bimisina yandi bampasi yango, mpe yandi tubaka ti Nzambi mesadila yandi mambu ya kukondua lunungu.

Ntuenia mosi ya bakala na nkumbu ya Elihu vuandaka niee mpe yandi kuwaka disolo yango nionso. Na manima yandi tubaka: ‘Mambu nionso yina beno metuba kele ya luvunu. Yehova kele nene kuluta mutindu yina beto lenda kanisa. Yandi lenda ata fioti ve kusala diambu ya yimbi. Yandi kemonaka mambu nionso mpe yandi kesadisaka bantu yina kena kukutana na mambu ya mpasi.’

Na manima Yehova sololaka na Yobi. Yandi tubaka: ‘Yinki kisika nge vuandaka ntangu munu salaka dizulu mpe ntoto? Samu na yinki nge metuba ti munu mekondua lunungu? Nge kena kutuba, kasi nge zaba ve samu na yinki mambu kesalamaka.’ Yobi ndimaka nzimbala na yandi mpe yandi tubaka: ‘Munu kukivunaka. Munu kuwaka nsangu na nge, kasi ntangu yayi munu mezaba nge mbote. Nge kele na dikoki ya kusala mambu nionso. Nlemvukila munu samu na mambu yina munu tubaka.’

Ntangu kumekama ya Yobi manisaka, Yehova vukisaka yandi na maladi mpe yandi pesaka yandi bima mingi kuluta yina yandi vuandaka na yau ntete. Yobi zingaka luzingu ya yinda mpe ya kiese. Yehova sakumunaka Yobi samu yandi zitisaka yandi ata na ntangu ya mpasi. Nge kevuanda lokola Yobi mpe nge ketatamana kusambila Yehova ata na ntangu ya mpasi?