Yinti mosi yina vuandaka pela tiya

Moize zingaka na Madiane samu na bamvula 40. Yandi kuelaka mpe yandi butuka bana. Kilumbu mosi ntangu yandi vuandaka tanina mameme pembeni ya mongo Sinai, yandi monaka diambu mosi ya kukamua. Yinti mosi ya bansende vuandaka pela tiya, kasi yavuandaka yokana ve! Ntangu Moize vuandaka pusana pembeni na yau samu na kutala, yandi kuwaka ndinga mosi yina bimaka na yinti yango mpe yatubaka: ‘Moize! Kupusana awa ve. Katula basandale na nge samu kisika nge metelema kele ntoto ya nlongo.’ Yehova nde vuandaka tuba na nzila ya mbasi.

Moize bangaka, mpe yandi fukaka yilungi na yandi. Ndinga yango tubaka: ‘Munu memona mpasi ya Bayisaele. Munu kevukisa bau na maboko ya bantu ya Ezipito, mpe munu kenata bau na yinsi mosi ya mbote. Nge nde kebimisa bantu na munu na Ezipito.’ Kondua ntembe, Moize kamuaka mpenza!

Moize yuvusaka: ‘Yinki munu ketuba kana bantu yango meyuvusa munu nani muntu metinda munu?’ Nzambi tubaka: ‘Tubila bau ti Yehova Nzambi ya Abrahami, Nzambi ya Yisaka, mpe Nzambi ya Yakobi nde metinda nge.’ Moize tubaka diaka: ‘Bosi kana bantu yango memanga kundimina munu?’ Yehova pesaka Moize kidimbu yina kesadisa yandi. Yehova tubilaka yandi yandi loza yinti na yandi na ntoto. Na manima yinti yango kumaka nioka! Ntangu Moize simbaka nioka yango na kisuka, yavutukaka yinti. Yehova tubaka: ‘Ntangu nge kesala kimangu yayi, yakemonisa ti munu nde muntu metinda nge.’

Moize tubaka: ‘Munu ketubaka mbote ve.’ Yehova lakaka yandi: ‘Munu ketubila nge mambu yina nge ketuba, mpe munu ketinda mpangi na nge Arona samu yandi sadisa nge.’ Lokola yandi zabaka ti Yehova kele kintuadi na yandi, Moize bakaka nketo na yandi, bana na yandi mpe bavutukaka na Ezipito.