Ntuadisi ya yimpa mpe banketo zole ya kibakala

Na manima ya kutuadisa bisadi ya Yehova bamvula mingi, Yosua kufuaka ntangu yandi kokisaka bamvula 110. Ntangu nionso yina yandi vuandaka na luzingu, Bayisaele vuandaka sambila Yehova. Kasi na manima ya lufua ya Yosua, babandaka kusambila biteke, mutindu mosi na bantu ya Kanana. Lokola Bayisaele lembaka kuzitisa Yehova, Yehova bikaka nzila ti ntinu mosi ya Kanana na nkumbu ya Yabine niokola bau. Bayisaele lombaka Yehova sadisa bau. Na yau Yehova pesaka bau ntuadisi ya yimpa, Baraki. Yalombaka yandi sadisa bau samu bavutukila Yehova.

Debora, mbikudi mosi ya nketo tindaka babokila Baraki. Yehova tubilaka Debora yandi tubila Baraki ti: ‘Baka babakala 10 000, mpe kuenda kutana na basoda ya Yabine na maza ya Kishone. Kuna, nge kenunga Sisera, mfumu ya basoda ya Yabine.’ Baraki tubilaka Debora ti: ‘Munu kekuenda kaka kana nge mekuenda kintuadi na munu.’ Debora tubaka: ‘Munu kekuenda kintuadi na nge. Kasi nge ve muntu kekufua Sisera. Yehova tubaka ti nketo nde kekufua yandi.’

Debora kuendaka kintuadi na Baraki mpe basoda na yandi na mongo ya Tabore samu na kukibongisa samu na mvita. Ntangu kaka Sisera kuwaka diambu yango, yandi sangisaka makalu na yandi ya mvita mpe basoda na yandi na lubuaku. Debora tubilaka Baraki: ‘Bubu yayi kele kilumbu Yehova kenungisa nge.’ Baraki mpe basoda na yandi 10 000 kitaka na mongo samu na kunuana na basoda ya Sisera yina vuandaka na binuanunu ya ngolo mpenza.

Na manima, Yehova salaka ti maza ya Kishone fuluka. Makalu ya Sisera kangamaka na potopoto. Sisera sundolaka dikalu na yandi mpe yandi bandaka kuzawula. Baraki mpe basoda na yandi nungaka basoda ya Sisera, kasi Sisera tinaka! Yandi kuendaka suama na tenta ya nketo mosi yina vuandaka na nkumbu ya Jaele. Jaele pesaka yandi miliki samu yandi kunua mpe yandi fukaka yandi divunga. Soda yango ya kilendo lekaka samu yandi lembaka. Na manima Jaele pusanaka malembe pene na yandi, yandi tobolaka yandi yintu na pike ya tenta mpe yandi kufuaka.

Baraki kuizaka sosa Sisera. Jaele bimaka na tenta na yandi mpe yandi tubaka: ‘Kota na kati. Munu kemonisa nge muntu yina nge kena kusosa.’ Baraki kotaka na kati mpe yandi monaka Sisera mekufua. Baraki mpe Debora kumisaka Yehova na muyimbu mutindu yandi nungisaka Bayisaele na ntuala ya bambeni na bau. Bamvula 40 yina landaka, Yisaele vuandaka na kiyenge.