Riti mpe Naomi

Na kilokola mosi ya nsatu ya ngolo na Yisaele, Muyisaele mosi na nkumbu ya Naomi kuendaka na buala ya Moabe kintuadi na bakala na yandi mpe bana na bau zole ya babakala. Na manima, bakala ya Naomi kufuaka. Bana na yandi ya babakala kuelanaka na Riti mpe Orpa, yina vuandaka bantu ya Moabe. Diambu ya kiadi, bana ya Naomi diaka kufuaka.

Ntangu Naomi kuwaka ti nsatu yango memanisa na Yisaele, yandi bakaka nzengolo ya kuvutuka na buala na yandi. Riti mpe Orpa salaka vuayaje kintuadi na Naomi, kasi ntangu bavuandaka tambula na nzila, Naomi tubilaka bau: ‘Beno vuandaka banketo ya mbote samu na bana na munu mpe beno vuandaka babokilo ya mbote samu na munu. Munu zola beno zole beno kuela diaka. Beno vutuka na buala na beno, na Moabe.’ Banketo yango tubaka: ‘Beto kezolaka nge! Beto zola ve kusundola nge.’ Naomi tatamanaka kutubila bau bavutuka. Nsukansuka, Orpa vutukaka, kasi Riti mangaka kuvutuka. Naomi tubilaka yandi: ‘Orpa mevutuka na bantu na yandi mpe na banzambi na yandi. Vutuka kintuadi na yandi, mpe vutuka na yinzo ya mama na nge.’ Kasi Riti tubaka: ‘Munu kesundola nge ve. Bantu na nge kevuanda bantu na munu, mpe Nzambi na nge kevuanda Nzambi na munu.’ Yinki mutindu Naomi kukimonaka ntangu Riti tubaka plina?

Riti mpe Naomi kumaka na Yisaele na ebandeli ya kilokola ya kubuka mbuma ya Orje. Kilumbu mosi, Riti kuendaka lokota bambuma na bilanga ya bakala mosi na nkumbu ya Boaze, yina mama na yandi vuandaka Rahaba. Yandi kuwaka ti Riti vuandaka muntu ya Moabe, mpe yandi bikanaka ya kukuikama na Naomi. Yandi tubilaka bisadi na yandi babikila Riti mua bambuma na bilanga samu yandi lokota yau.

Na nkokila yango, Naomi yuvusaka Riti: ‘Na bilanga ya nani nge salaka bubu yayi?’ Riti tubaka: ‘Na bilanga ya bakala mosi na nkumbu ya Boaze.’ Naomi tubilaka yandi: ‘Boaze kele mosi ya bantu ya dibuta ya bakala na munu. Tatamana kusala na bilanga na yandi kintuadi na banketo yankaka ya bantuenia. Kuna, nge kevuanda na lutanunu.’

Riti tatamanaka kusala na bilanga ya Boaze tii kilokola ya kubuka mbuma manisaka. Boaze bakusaka ti Riti salaka kisalu ya ngolo mpe yandi vuandaka nketo mosi ya mbote. Na bilumbu yina, kana bakala mosi mekufua mpe yandi bika ve bana, mosi ya bampangi na yandi kekuela nketo yina yandi mebika. Na yau Boaze kuelaka Riti. Babutaka muana ya bakala na nkumbu ya Obed, yina na manima kumaka nkaka ya Ntinu Davidi. Bankundi ya Naomi sepelaka. Batubaka: ‘Na ebandeli, Yehova pesaka nge Riti, yina zolaka nge mingi, mpe bubu yayi yandi mepesa nge ntekolo ya bakala. Bika Yehova baka lokumu.’