Ana melomba Nzambi muana bakala na kisambu

Muyisaele mosi na nkumbu ya Elkana vuandaka na banketo zole, Ana mpe Penina, kasi yandi vuandaka zola Ana mingi. Penina vuandaka vueza Ana konso ntangu samu yandi vuandaka ve na bana mpe Penina vuandaka na bana mingi. Konso mvula, Elkana vuandaka nata dibuta na yandi na tabernakle na Shilo samu na kusambila. Kilumbu mosi ntangu bavuandaka kuna, yandi monaka ti Ana yina yandi vuandaka zola mingi vuandaka na kiadi ya ngolo. Yandi tubaka: ‘Kudila ve, Ana. Munu kele vana samu na nge. Munu kezolaka nge.’

Na manima, Ana kuendaka sambila kaka yandi mosi. Yandi vuandaka lemba ve kudila ntangu yandi vuandaka lomba Yehova sadisa yandi. Yandi lakaka: ‘Yehova, kana nge mepesa munu muana bakala, munu kepesa nge yandi, mpe yandi kesadila nge luzingu na yandi ya mvimba.’

Nganga-nzambi ya nene Eli monaka Ana kena kudila na ndinga ya yinsi, mpe yandi kanisaka ti yandi mekolua malavu. Ana pesaka mvutu: ‘Ve, mfumu na munu, munu kolua ve malavu. Munu kele na diambu mosi ya mpasi, mpe munu kena kutubila yau Yehova.’ Eli bakusaka ti yandi kanisinaka Ana yimbi mpe yandi tubaka: ‘Bika Nzambi pesa nge diambu yina nge zola.’ Ana kukimonaka mbote mpe yandi kuendaka. Mvula mosi kokaka ve, Ana butaka muana bakala mpe yandi pesaka yandi nkumbu Samuele. Kanisa ntete kiese yina Ana vuandaka na yau!

Ana zimbakanaka ve nsilulu yina yandi pesaka Yehova. Ntangu kaka yandi katulaka Samuele na mabeni, yandi nataka yandi samu na kusala na tabernakle. Yandi tubilaka Eli: ‘Yayi nde muana bakala yina munu lombaka na kisambu. Munu mepesa yandi na Yehova, samu na luzingu na yandi ya mvimba.’ Elkana mpe Ana vuandaka kuenda tala Samuele konso mvula mpe bavuandaka natina yandi kazaka ya yimpa yina mekondua maboko. Yehova pesaka diaka Ana bana tatu ya babakala mpe zole ya banketo.