Davidi mpe Saulo

Ntangu Davidi kufuaka Goliati, Ntinu Saulo tulaka yandi mfumu ya basoda na yandi. Davidi nungaka bamvita mingi, mpe yandi kumaka muntu ya kuzabana mingi. Ntangu Davidi vuandaka katuka na mvita, banketo vuandaka kuiza kina mpe kuyimbila ti: ‘Saulo kufuaka mafunda, mpe Davidi kufuaka mafunda kumi!’ Saulo kumaka na kimpala samu na Davidi mpe yandi kumaka na nsatu ya kufua yandi.

Davidi zabaka mbote kubula nzenze. Kilumbu mosi ntangu yandi vuandaka budila Saulo nzenze, ntinu yango lozilaka Davidi dikonga na yandi. Davidi tinaka yau, mpe dikonga yango kotaka na kibaka. Na manima na yau, Saulo mekaka bambala mingi yankaka kufua Davidi. Nsukansuka, Davidi tinaka mpe yandi kuendaka suama na dezere.

Saulo bakaka babakala 3 000 mpe bakuendaka sosa Davidi. Kilumbu mosi, Saulo kotaka na didusu ya dibanga mosi kisika Davidi mpe bantu na yandi suamaka. Bantu ya Davidi tubaka na ndinga ya yinsi ti: ‘Yayi kele diluaku ya mbote samu na nge na kufua Saulo.’ Davidi pusanaka malembe kisika Saulo vuandaka mpe yandi zengaka kitini ya kazaka ya ntinu yango. Saulo zabaka ve. Na manima, Davidi kukimonaka yimbi mutindu yandi monisaka ve luzitu na ntinu yina Yehova tulaka mafuta. Yandi bikaka ve nzila ti bantu na yandi kufua Saulo. Kutu Davidi belelaka Saulo na kutubilaka yandi ti yandi vuandaka na dikoki ya kufua yandi ntangu yandi bakaka diluaku ya kusala yau. Yasobaka makanisi ya Saulo samu na Davidi?

Ve. Saulo tatamanaka kusosa Davidi. Kilumbu mosi na mpipa, Davidi mpe muana nkazi na yandi Abishai, kotaka na mayele na kan ya Saulo. Ata Abinere, muntu yina vuandaka sunga Saulo, vuandaka ya kuleka. Abishai tubaka: ‘Diluaku yau yayi! Bika munu kufua yandi.’ Davidi tubilaka yandi: ‘Yehova kezenga diambu ya Saulo. Beto baka kaka dikonga mpe kibungu na yandi ya maza mpe beto kuenda.’

Davidi monteke na mongo yina vuandaka pembeni samu yandi mona mbote kan ya Saulo. Yandi gangaka: ‘Abinere, samu na yinki nge taninaka ve ntinu na nge? Wapi kibungu mpe dikonga ya Saulo?’ Saulo bakusaka ndinga ya Davidi mpe yandi tubaka: ‘Nge lendaka kufua munu, kasi nge sala yau ve. Munu mezaba ti nge kevuanda ntinu ya Yisaele na kisika na munu.’ Saulo vutukaka na yinzo na yandi. Kasi bantu nionso ve ya dibuta ya Saulo vuandaka yina Davidi.