Yehova mekotila Yehoshafati

Yehoshafati, Ntinu ya Yudea, bebisaka bameza ya nkayilu ya Baala mpe yandi katulaka biteke na buala. Yandi zolaka bantu zaba bansiku ya Yehova. Na yau, yandi tindaka bamfumu mpe Balevi na Yudea ya mvimba samu balonga bantu bansiku ya Yehova.

Makanda ya pembeni vuandaka banga kunuanisa Yudea samu bazabaka ti Yehova vuandaka kintuadi na bantu na yandi. Kutu, bavuandaka natina Ntinu Yehoshafati makabu. Kasi na manima, bantu ya Moabe, bantu ya Amone, mpe bantu ya buala ya Seire kuizaka nuanisa Yudea. Yehoshafati zabaka ti yandi fueti sosa lusadusu ya Yehova. Yandi lombaka babakala nionso, banketo nionso, mpe bana nionso bakuiza na Yerusaleme. Yandi sambilaka na ntuala na bau nionso ti: ‘Yehova, kana nge sadisa beto ve, beto kenunga ve. Beto melomba nge, tubila beto diambu yina beto fueti sala.’

Yehova pesaka mvutu yayi na kisambu yango: ‘Beno banga ve. Munu kesadisa beno. Beno telema vana, beno ningana ve mpe beno tala mutindu munu kevukisa beno.’ Yinki mutindu Yehova vukisaka bau?

Na sunka ya kilumbu yina landaka, Yehoshafati ponaka banyimbidi mpe yandi tubilaka bau batambula na ntuala ya basoda. Batambulaka banda na Yerusaleme tii na kisika ya mvita yina bavuandaka bokidila Tekoa.

Ntangu banyimbidi vuandaka kumisa Yehova na kiese mpe na ndinga ya ngolo, Yehova nuaninaka bantu na yandi. Yandi kotisaka mvualangani kati na bantu ya Amone mpe bantu ya Moabe, babandaka kunuana bau na bau, mpe ata muntu mosi ve vukaka. Kasi Yehova taninaka bantu ya Yudea, basoda, mpe banganga-nzambi. Bantu nionso ya babuala ya pembeni kuwaka mambu yina Yehova salaka, mpe bazabaka ti Yehova vuandaka kotila kaka bantu na yandi. Yinki mutindu Yehova kevukisaka bantu na yandi? Na mitindu mingi. Yandi kevuandaka ve na nsatu ya lusadusu ya bantu samu na kusala yau.