Kibakala ya Yehoyada

Yezabele vuandaka na muana mosi ya nketo na nkumbu ya Atalia, muana yango vuandaka kaka ntima yimbi lokola mama na yandi. Atalia vuandaka nketo ya ntinu ya Yudea. Ntangu bakala na yandi kufuaka, muana na yandi ya bakala kumaka ntinu. Kasi ntangu muana na yandi ya bakala kufuaka, Atalia kukikumisaka ntinu ya Yudea. Na manima, yandi sosaka kubebisa mulongo ya mvimba ya bantinu, na kufuaka konso muntu yina lendaka kuma ntinu na kisika na yandi, ata mpe bantekolo na yandi mosi. Bantu nionso vuandaka banga yandi.

Nganga-nzambi ya nene Yehoyada mpe nketo na yandi, Yehosheba zabaka ti mambu yina Atalia vuandaka sala vuandaka yimbi mpenza. Batulaka luzingu na bau na kivonza samu na kusueka Yehoashe, ntekolo mosi ya Atalia yina vuandaka ntete bebe. Bayundulaka yandi na kati ya tempelo.

Ntangu Yehoashe kumaka na bamvula 7, Yehoyada sangisaka bamfumu mpe Balevi nionso mpe yandi tubilaka bau: ‘Beno sunga baporte ya tempelo, mpe beno kotisa ata muntu mosi ve.’ Na manima Yehoyada tulaka Yehoashe ntinu ya Yudea mpe yandi vuatisaka yandi yimpu ya kimfumu na yintu. Bantu ya Yudea gangaka: ‘Ntinu vuanda na luzingu!’

Ntinu ya nketo Atalia kuwaka kuganga ya kimvuka ya bantu mpe yandi kuizaka na nsualu na tempelo. Ntangu yandi monaka ntinu ya yimpa, yandi gangaka: “Komplo! Komplo!” Bamfumu kangaka ntinu yango ya nketo ya ntima yimbi, banataka yandi na nganda, mpe bakufuaka yandi. Kasi yinki salamaka samu na bupusi ya yimbi yina yandi vuandaka na yau na dikanda?

Yehoyada sadisaka bantu ya dikanda samu basala luwawanu na Yehova, balakaka na luwawanu yango ti bakesambila kaka Yehova. Yehoyada tindaka bau babebisa tempelo ya Baala mpe batolola biteke. Yandi tulaka banganga-nzambi mpe Balevi samu basala na tempelo samu bantu vutuka kusambila kuna. Yandi tulaka bantu basunga baporte ya tempelo samu muntu mosi ve ya mvindu kota kuna. Na manima Yehoyada mpe bamfumu nataka Yehoashe na yinzo ya ntinu mpe bavuandisaka yandi na kiti ya kimfumu. Bantu ya Yudea sepelaka. Balendaka sambila diaka Yehova na kimpuanza, kondua Atalia nketo ya ntima yimbi mpe kondua nsambudulu ya Baala. Nge memona mutindu kibakala ya Yehoyada sadisaka bantu mingi?