Yehova monisinaka Yona ntima yinda

Na Ninive, mbanza mosi ya Asiri, bantu vuandaka sala mambu ya yimbi. Yehova tindaka mbikudi na yandi Yona yandi kuenda na Ninive samu na kuluengisa bau basoba bikadulu na bau. Kasi Yona kuendaka kisika yankaka. Yandi monteke na bato yina vuandaka kuenda na Tarsisi samu na kutina ntama mpenza.

Ntangu bavuandaka na bato na kati ya nzadi mungua, mupepe mosi ya ngolo bandaka kubula, mpe bantu yina vuandaka na bato yango bandaka kubanga. Basambilaka banzambi na bau mpe bayuvusaka: ‘Samu na yinki diambu yayi mekumina beto?’ Nsukansuka, Yona tubilaka bau: ‘Yakele foti na munu. Munu kena kutina kusala diambu yina Yehova melomba munu. Kana beno meloza munu na nzadi mungua, mupepe yango kemanisa.’ Bantu ya bato yango vuandaka ve na nsatu ya kuloza Yona na kati ya nzadi mungua, kasi Yona tulaka bau mbamba. Ntangu balozaka yandi na nzadi mungua, mupepe yango manisaka.

Yona kanisaka ti yandi kekufua. Ntangu yandi vuandaka dinda mpenza na yinsi ya nzadi mungua, yandi sambilaka Yehova. Na manima Yehova tindaka mbizi mosi ya nene. Yaminaka Yona, kasi yakufuaka yandi ve. Na kati ya mbizi yango, Yona sambilaka: ‘Munu melaka ti munu kezitisa nge ntangu nionso.’ Yehova taninaka Yona na kati ya kivumu ya mbizi bilumbu tatu mpe na manima yandi tindaka mbizi yango luka Yona na disimu ya maza.

Lokola Yehova vukisaka Yona, yazolaka monisa ti yandi kekuenda diaka ve na Ninive? Ve. Yehova tubilaka yandi diaka yandi kuenda kuna. Na mbala yayi, Yona zitisaka. Yandi kuendaka kuna mpe yandi tubilaka bantu yango ya yimbi ti: ‘Yamebikana bilumbu 40, Ninive kebebisama.’ Na manima, diambu mosi ya kukamua salamaka​—bantu ya Ninive kuwaka mpe basobaka bikadulu na bau. Ntinu ya Ninive tubilaka bantu ya buala na yandi: ‘Beno sambila Nzambi, mpe beno balula ntima. Mbala yankaka yandi kekufua beto ve.’ Ntangu Yehova monaka ti bantu yango mebalula ntima, yandi bebisaka diaka ve Ninive.

Yona fuemaka mutindu mbanza yango bebisamaka diaka ve. Kanisa ntete: Yehova monisinaka Yona ntima yinda mpe yandi moninaka yandi kiadi, kasi Yona mangaka kumonina bantu ya Ninive kiadi. Kutu, yandi kuendaka vuanda na nganda ya mbanza yango, na yinsi ya yinti mosi (yinti mosi ya courge) mpe yandi kangaka yilungi. Na manima ntangu yinti yango yumaka, Yona fuemaka. Na yau Yehova tubilaka yandi: ‘Nge kena kukitungisa mingi samu na mua yinti yayi kuluta mutindu nge fueti kukitungisa samu na bantu ya Ninive. Munu monisinaka bau ntima kiadi, mpe munu vukisaka bau.’ Yinki yandi zolaka longa yandi? Bantu ya Ninive vuandaka na mfunu mingi kuluta konso yinti.