Yoziasi vuandaka zola Bansiku ya Nzambi

Yoziasi kumaka ntinu ya Yudea ntangu yandi vuandaka na bamvula 8. Na bilumbu yango, bantu vuandaka sala bisalu ya maji mpe bavuandaka sambila biteke. Ntangu Yoziasi kumaka na bamvula 16, yandi sosaka kuzaba mutindu ya mbote ya kusambila Yehova. Ntangu yandi kumaka na bamvula 20, yandi bandaka kubebisa biteke mpe bameza ya nkayilu na buala na yandi ya mvimba. Mpe ntangu Yoziasi kumaka na bamvula 26, yandi bakaka bankubukulu samu na kubongisa tempelo ya Yehova.

Na tempelo, nganga-nzambi ya nene Hilikiya, monaka rulo ya Nsiku ya Yehova​—mbala yankaka yavuandaka mpenza rulo yina Moize sonikaka. Shafane, sekretere ya ntinu, nataka rulo yango na Yoziasi mpe yandi bandaka kutanga Nsiku yango na ndinga ya ngolo. Ntangu Yoziasi vuandaka kuwa, yandi bakusaka ti bantu vuandaka zitisa diaka ve Yehova banda bamvula mingi. Ntinu Yoziasi tubilaka Hilikiya: ‘Yehova kele na nganzi ya ngolo samu na beto. Kuenda solola na Yehova, samu yandi tubila beto mambu yina beto fueti sala.’ Yehova pesaka mvutu na nzila ya mbikudi ya nketo Hulda ti: ‘Bantu ya Yudea mebika munu. Bakebaka kitumbu, kasi na ntangu ya luyalu ya Yoziasi ve, samu yandi mekukikitisa.’

Ntangu Ntinu Yoziasi kuwaka nsangu yango, yandi kuendaka na tempelo mpe yandi sangisaka bantu nionso ya Yudea. Na manima yandi tangilaka dikanda ya mvimba Nsiku ya Yehova na ndinga ya ngolo. Yoziasi mpe dikanda ya mvimba lakaka Yehova ti bakezitisa yandi na bantima na bau ya mvimba.

Dikanda ya Yudea salaka ve feti ya Paki banda bamvula mingi. Kasi ntangu Yoziasi tangaka na Nsiku ti yalombaka kusala feti ya Paki konso mvula, yandi tubilaka dikanda: ‘Beto kesala Paki samu na Yehova.’ Na manima Yoziasi bongisaka bankayilu mingi mpe yandi tulaka banyimbidi na tempelo. Na manima, dikanda yango salaka Paki, mpe feti ya Bagato yina mekondua levire, yina salaka bilumbu 7. Paki ya mutindu yina salamaka ntete ve banda bilumbu ya Samuele. Yoziasi vuandaka zola mpenza Nsiku ya Nzambi. Nge kesepelaka kulonguka mambu metadila Yehova?