DILONGI 11

Mutindu nge lenda bakila Biblia mambote mingi

Yina mebimisama na papie

Yamekuminaka nge nge vuanda na nsatu ya kusala diambu mosi ya nene kasi nge monaka ti yakele mpasi samu na kubanda yau? Samu yavuanda mpasi mingi ve, mbala yankaka nge kabulaka yau na bisalu ya fioti fioti mpe ya pete. Yakele kaka mutindu mosi kana muntu mebanda kutanga Biblia. Nge lenda kukiyuvusa ti: ‘Wapi munu kebandila?’ Na dilongi yayi, beto kemona mua mambu ya fioti yina nge lenda sala samu yasadisa nge nge sepela na ntangulu mpe na ndongokolo na nge ya Biblia.

1. Samu na yinki beto fueti tangaka Biblia mbala na mbala?

Muntu yina ketangaka Biblia mbala na mbala, to ‘nsiku ya Yehova,’ yandi kevuanda na kiese mpe yandi kenunga. (Tanga Nkunga 1:1-3.) Samu na kubanda yau, mekaka kutanga konso kilumbu ata samu na mua miniti fioti. Kana nge kena kumesana mingi na Mpova ya Nzambi, nge kebanda kusepela mpe mingi na ntangulu na nge ya Biblia.

2. Yinki kesadisa nge nge baka mambote na ntangulu na nge ya Biblia?

Samu na kubaka mambote mingi na ntangulu ya Biblia, beto fueti pema mpe kuyindula na yina beto kena kutanga. Beto fueti tanga mpe ‘kuyindula na mpinda.’ (Yozue 1:8, noti na yinsi ya paje) Kana nge kena kutanga, kukiyuvusa biuvu lokola: ‘Yinki yakena kulonga munu samu na Yehova Nzambi? Yinki mutindu mulenda sadila yau na luzingu na munu? Yinki mutindu mulenda sadila baverse yango samu na kusadisa bantu yankaka?’

3. Yinki mutindu nge lenda bongisa ntangu samu na kutanga Biblia?

Yakevuandaka mpasi samu na nge na kubaka ntangu ya kutanga Biblia? Yakekuminaka beto nionso. Meka ‘kusadila ntangu na nge mbote mpenza.’ (Baefezo 5:16) Nge lenda sala yau na kubongisaka ntangu ya mbote samu na kutanga Biblia konso kilumbu. Bantu yankaka kebakaka ntangu ya kutanga Biblia na sunka sunka. Bantu yankaka keponaka ntangu na kati kati ya kilumbu, mbala yankaka ntangu bakezola kudia madia ya midi. Samu na bantu yankaka, baketangaka Biblia na mpipa tekila ya kuleka. Yinki ntangu lenda vuanda mbote samu na nge?

KOTA NA MPINDA

Mona mutindu nge lenda kumisa ntangulu na nge ya Biblia kitoko. Tala mutindu ya kubongisa mbote samu na kubakila ndongokolo na nge ya Biblia mambote.

Collage: Muana mosi ya bakala kena kulonguka kusepela na mutindu mosi ya madia na kilokola ya mua ntangu. 1. Muana yango ya bakala kenma kusekinina madia. 2. Mua bamvula na manima, yandi kena kudia madia yango. 3. Ntangu yandi mekuma mua mbuta, muana yango kena kusepela kudia madia yango. — Mutindu kaka beto lenda longuka kudia madia ya mutindu na mutindu, beto lenda longuka kuzola kutanga Biblia

4. Longuka kusepela na ntangulu ya Biblia

Yalenda vuanda pete ve beto banda kutanga Biblia. Kasi beto lenda ‘vuanda na nsatu ya ngolo’ ya kusala yau, mutindu kaka nge lenda banda kulonguka kusepela na madia yina nge kudia ntete ve. Tanga 1 Piere 2:2, mpe na manima, tadila kiuvu yayi:

Kana nge kena kutanga Biblia konso kilumbu, nge mekanisa ti nge kebanda kusepela na yau mpe nge kebanda kuzola kutanga yau diaka mingi?

Tula VIDEO Samu na kumona mutindu bantu yankaka bandaka kusepela na kutanga Biblia. Na manima tadila biuvu yayi melanda.

VIDEO: Bantuenia kena kulonguka kuzola Mpova ya Nzambi (5:33)

Na video yayi, yinki mambu ya mpasi bantuenia nungaka?
Yinki sadisaka bau bakangama na lukanu na bau ya kutanga Biblia?
Yinki mutindu bakumisaka diaka ntangulu na bau ya Biblia kitoko mingi?

Mambu yina lenda sadisa nge nge banda:

Pona mbangudulu ya mbote, yina kele na ntubulu ya bubu yayi. Meka Biblia Mbalula ya Nsi-Ntoto ya Mpa kana yakele na ndinga na nge.
Banda kutanga ntete kitini ya Biblia yina nge kesepelaka na yau. Samu na kubaka mabanza, tala ankadre “Banda kutanga Biblia.”
Sonika mambu ya mfunu yina nge metanga. Sadila “Landa ntangulu na nge ya Biblia” Ankadre yina kele na mukanda yayi.
Sadila aplikasion JW Library^®. Na nzila na yau, nge lenda tanga mpe kuwa Biblia konso kisika nge kele, na kusadilaka telefone to apareyi yankaka.
Sadila Bangindu ya ngika (Appendice) na Biblia—Mbalula ya Nsi-Ntoto ya Mpa. Yakele na bakarte, batablo, mpe diksionere yina lenda kumisa ntangulu na nge kitoko mingi.

5. Bongama samu na ndongokolo na nge ya Biblia

Tanga Nkunga 119:34, mpe na manima, tadila kiuvu yayi:

Samu na yinki yakele mbote kusambila tekila kutanga Biblia to kubongama samu na ndongokolo na nge ya Biblia?

Yinki mutindu nge lenda baka mambote mingi na konso ndongokolo? Kana nge kena kubongisa dilongi mosi ya ndongokolo, meka mitundu yayi melanda:

( Tanga baparagrafe ya ntete ya dilongi.
Sosa mpe tanga baverse, mpe meka kubakusa yinki mutindu yakele na nguizani na dilongi.
Tula kidimbu na mambu ya mfunu yina kena kupesa bamvutu na konso kiuvu; yakesadisa nge longuka mbote dilongi yango na nlongisi na nge.

Collage: Nketo mosi kena kubongisa ndongokolo na yandi ya Biblia. A. Yandi kena kutanga paje ya ntete ya dilongi. B. Yandi kena kutanga na Biblia baverse yina bamepesa. C. Yandi kena kutula kidimbu na mambu ya mfunu ya dilongi.

Nge zabaka yau?

Bambangi ya Yehova sadilaka bambangudulu ya mitindu mingi ya Biblia. Kasi beto kesepelaka mingi na Biblia—Mbalula ya Nsi-Ntoto ya Mpa Samu yakele kedika, yakele puelele, mpe yakesadilaka nkumbu ya Nzambi.—Tala disolo na Internet “Batatoli ya Yehova bazalaka na Biblia na bango moko?”

BANTU YANKAKA METUBA: “Kulonguka Biblia kele mpasi mingi. Mukele na ntangu ve to ngolo ya kulonguka yau.”

Yinki nge mekanisa?

BUNKUFI

Samu na kubakila Biblia mambote mingi, sala programe ya kutanga yau, sambila samu na kubakusa mambu nge kena kutanga, mpe bongisa samu na konso ndongokolo na nge ya Biblia.