DILONGI 25
Yinki kele lukanu ya Nzambi samu na beto?
Biblia metuba samu na bantu ti, luzingu kele ‘nkufi mpe yamefuluka na bampasi.’ (Yobi 14:1) Yau mpenza Nzambi zolaka samu na beto? Kana yau ve, yinki lukanu yandi kele na yau samu na beto? Beto tadila bamvutu ya kubomba ya Biblia.
1. Luzingu ya yinki mutindu Yehova zola beto vuanda na yau?
Yehova zola beto vuanda na luzingu yina meluta mbote. Ntangu yandi semaka muntu ya ntete, Adamu na Eva, yandi tulaka bau na paradiso mosi ya kitoko, na bilanga ya Edeni. Na manima “Nzambi sakumunaka bau, mpe Nzambi tubilaka bau: ‘Beno buta mingi mpe beno kuma mingi, beno fulusa ntoto mpe beno yadila yau.’” (Kuyantika 1:28) Yehova zolaka babuta bana, bakumisa ntoto ya mvimba paradiso, mpe batanina bibulu. Lukanu na yandi vuandaka ti bantu nionso sepela na luzingu na mavimpi ya mbote mpe bazinga mvula na mvula.
Atako mambu salamaka mutindu yina ve,a lukanu ya Nzambi sobaka ve. (Yezaya 46:10, 11) Yandi zola kaka ti bantu ya luzitu zinga mvula na mvula kondua bampasi.—Tanga Kusonga 21:3, 4.
2. Yinki mutindu beto lenda vuanda na luzingu ya kiese bubu yayi?
Yehova semaka beto na ‘bansatu ya kimpeve,’ nsatu ya kuzaba yandi mpe ya kusambila yandi. (Tanga Matayo 5:3-6.) Yandi zola beto kuma bankundi na yandi ya nzola, ‘kutambula na banzila na yandi nionso, kuzola yandi,’ mpe kusadila yandi ‘na ntima na [beto] ya mvimba.’ (Kulonga 10:12; Nkunga 25:14) Kana beto mesala yau, beto kevuanda mpenza na kiese atako bampasi kele. Kana beto kena kusambila Yehova, luzingu na beto kevuanda na mfunu.
KOTA NA MPINDA
Longuka mambu yina metadila nzola ya nene, yina Yehova monisaka ntangu yandi bongisaka ntoto samu na beto mpe yina Mpova na yandi kena kulonga beto na diambu metadila mfunu ya luzingu.
3. Yehova kele na lukanu ya kitoko samu na bantu
Tula VIDEO, mpe na manima tadila kiuvu yayi melanda.
Samu na yinki Nzambi salaka ntoto na beto yayi ya kitoko?
Tanga Longi 3:11, mpe na manima tadila kiuvu yayi:
Yinki yamelonga nge na diambu metadila Yehova?
4. Lukanu ya Yehova sobaka ve
Tanga Nkunga 37:11, 29 mpe Yezaya 55:11, mpe na manima tadila kiuvu yayi.
Yinki mutindu beto mezabila ti lukanu ya Yehova sobaka ve?
Yinzo yina mebebaka, lenda kuma diaka ya kitoko. Mutindu mosi mpe, ntoto, yina bantu mebebisa, kekuma diaka ya kitoko na lusadusu ya Nzambi samu na bantu yina yandi kezolaka
5. Kana beto kena kusambila Yehova, luzingu na beto kevuanda na mfunu
Kuzaba lukanu ya Yehova lenda pesa luzingu na beto kiese. Tula VIDEO, mpe na manima tadila kiuvu yayi melanda.
Yinki mambote Terumi bakaka na kuzabaka mfunu ya luzingu?
Tanga Longi 12:13, mpe na manima tadila kiuvu yayi:
Lokola Yehova sadilaka beto mambu mingi, yinki beto fueti vutudila yandi?
BANTU YANKAKA LENDA YUVUSA: “Yinki kele mfunu ya luzingu?”
Yinki mvutu nge kepesa?
BUNKUFI
Yehova zola beto vuanda na luzingu ya kiese mvula na mvula kondua mpasi awa na ntoto. Kana beto kena kusambila yandi na ntima na beto ya mvimba, luzingu na beto kevuanda mpenza na mfunu—ata bubu yayi.
Mvutukulu
Yinki vuandaka lukanu ya ntete ya Yehova samu na Adamu mpe Eva?
Yinki mutindu beto mezabila ti lukanu ya Nzambi samu na bantu sobaka ve?
Yinki mutindu nge lenda vuanda na luzingu yina kele mpenza na mfunu?
SOSA
Tadila Mambu yina kena kumonisa ti bilanga ya Edeni vuandaka ya kedika.
“Elanga ya Edene ezalaki mpenza to ezalaki te?” (Linɔ́ngi ya Mosɛnzɛli ya 1 Janvier 2011)
Longuka samu na yinki beto lenda kukindimisa ti ntoto kezingila mvula na mvula.
Tadila yina Biblia metuba na diambu metadila kuvuanda na luzingu yina kele na mfunu.
Tala mutindu bakala mosi yina kanisaka ti yandi vuandaka ya kufuana na luzingu, kuizaka bakusa ti kima mosi vuandaka kondua na luzingu na yandi.
a Na dilongi kelanda, beto kemona samu na yinki luzingu kele ve mutindu Nzambi kanaka yau.