DILONGI 46
Samu na yinki kukipesa na Nzambi mpe kubaka mbotama?
Nge kukipesaka na Yehova ntangu nge pesaka yandi nsilulu na kisambu ti nge kesambila kaka yandi mpe nge ketula lukanu na yandi na kisika ya ntete na luzingu na nge. (Nkunga 40:8) Na manima, nge bakaka mbotama. Na kusalaka mutindu yina, nge monisaka na bantu yankaka ti nge mekukipesa na yandi. Lukanu ya kukipesa na Yehova kele lukanu meluta mfunu na balukanu nionso yina beto lenda baka. Yakele lukanu mosi ya mfunu yina lenda soba luzingu na nge. Yinki lenda tinda nge nge sala yau?
1. Yinki ketindaka muntu yandi kukipesa na Nzambi?
Nzola nde ketindaka beto beto kukipesa na Yehova. (1 Yoane 4:10, 19) Biblia metuba na beto ti: ‘Nge fueti zola Yehova Nzambi na nge na ntima na nge ya mvimba, na moyo na nge ya mvimba, na mabanza na nge nionso, mpe na ngolo na nge nionso.’ (Marko 12:30) Beto kemonisaka nzola na Nzambi kaka ve na mambu yina beto ketubaka kasi mpe na bisalu na beto. Lokola kaka nketo na bakala yina mezolana mpenza kesukaka na kukuelana, beto mpe nzola na beto samu na Yehova ketindaka beto beto kukipesa na yandi mpe kubaka mbotama.
2. Yinki mambote Yehova kepesaka na Bambangi yina mebaka mbotama?
Kana nge mebaka mbotama, nge kekota na dibuta ya kiese ya Yehova. Nge kemona nzola na yandi samu na nge na mitindu mingi, mpe kinkundi na nge na yandi kekuma ngolo kuluta bubu yayi. (Tanga Malaki 3:16-18.) Katula mambote ya kumona Yehova lokola Tata na nge, nge kekota na dibuta ya kimpeve ya bampangi ya babakala mpe ya banketo yina kezolaka yandi mpe kezolaka nge. (Tanga Marko 10:29, 30.) Na yau, yakele na mambu yina nge fueti sala tekila nge baka mbotama. Nge fueti longuka mambu metadila Yehova, kuzola yandi, mpe kumonisa kiminu na Muana na yandi. Mpe na nsuka, nge fueti pesa luzingu na nge na Yehova. Kana nge mekokisa mambu yango mpe nge mebaka mbotama, nge kekuma na nzila yina kenataka na luzingu ya mvula na mvula ya kiese. Mpova ya Nzambi metuba: ‘Mbotama . . . kena kuvukisa beno mpe ntangu yayi.’—1 Piere 3:21.
KOTA NA MPINDA
Tadila mbote samu na yinki yakele mfunu samu na nge kukipesa na Yehova mpe kubaka mbotama.
3. Beto nionso fueti pona nani beto kesadila
Na Yisaele ya ntama, bantu yankaka kanisaka ti balenda sambila Yehova mpe nzambi ya luvunu Baala. Kasi Yehova tindaka mbikudi na yandi Eliya samu yandi sadisa bau basoba makanisi yina ya yimbi. Tanga 1 Bantotila 18:21, mpe na manima tadila kiuvu yayi:
Yalombaka Bayisaele baka yinki nzengolo?
Mutindu mosi na Bayisaele, beto diaka beto fueti pona nani beto kesadila. Tanga Luka 16:13, mpe na manima tadila biuvu yayi:
Samu na yinki beto lenda sambila ve Yehova mpe muntu to kima yankaka?
Yinki mutindu kumonisa na Yehova ti beto mepona kusambila yandi?
4. Yindula na mpinda nzola yina Yehova kele na yau samu na nge
Yehova pesaka beto makabu mingi ya mbote. Yinki beto lenda pesa yandi? Tula VIDEO.
Yinki kele ndambu ya mitindu Yehova monisaka nge nzola na yandi? Tanga Nkunga 104:14, 15 mpe 1 Yoane 4:9, 10, mpe na manima tadila biuvu yayi:
Yinki kele makabu yina Yehova mepesaka nge nge kemonisinaka butondi?
Makabu yango ketindaka nge nge kukimona yinki mutindu samu na yandi?
Ntangu bamepesa beto dikabu mosi yina mesepedisa beto, beto kezolaka kumonisa butondi na muntu yina mepesa beto yau. Tanga Kulonga 16:17, mpe na manima tadila kiuvu yayi:
Ntangu nge ketalaka mambu nionso yina Yehova mesadilaka nge, yinki yaketindaka nge nge pesa yandi?
5. Kukipesa na Yehova kenataka balusakumunu mingi
Bantu mingi kekanisaka ti kuzabana mingi, kuvuanda na kisalu ya mbote, to mbongo kenatina bau kiese. Yakele diambu ya kedika? Tula VIDEO, mpe na manima tadila biuvu yayi melanda.
Atako mbudi yayi ya bansaka ya video zolaka mingi kubula bale, samu na yinki yandi bikaka kisalu yango?
Yandi bakaka nzengolo ya kukipesa, na kubula bale ve, kasi na Yehova. Nge mekanisa ti yandi bakaka nzengolo ya mbote? Samu na yinki?
Tekila ntumua Paulo kuma Muklisto, yandi vuandaka sala kisalu mosi ya lokumu. Nlongisi mosi ya nene longisaka yandi nsiku ya Bayuda. Kasi nionso yina yandi tulaka yau na manima ntangu yandi kumaka Muklisto. Paulo kumaka kunionga na manima? Tanga Bafilipi 3:8, mpe na manima tadila biuvu yayi:
Samu na yinki Paulo tubaka ti mambu yina yandi salaka tekila yandi kuma Muklisto vuandaka lokola ‘kifunda ya doti,’ to kisika bakelozaka doti (pubele)?
Yinki balusakumunu yandi bakaka?
Yinki mutindu nge lenda kokanisa kusadila Yehova na diambu mosi yankaka nge lendaka sala na luzingu na nge?
Ntangu Paulo kumaka Muklisto, yandi bakaka mingi kuluta yina yandi bikaka
BANTU YANKAKA METUBA: “Yakele buzoba kupesa luzingu na nge ya mvimba na Nzambi.”
Samu na yinki yakele mbote kukipesa na Yehova?
BUNKUFI
Nzola ketindaka beto beto kukipesa na Yehova mpe beto baka mbotama.
Mvutukulu
Samu na yinki Yehova mefuana beto zola yandi mpe beto sambila yandi na ntima na beto ya mvimba?
Yinki balusakumunu Yehova kepesaka Bambangi na yandi yina mebaka mbotama?
Nge kele na nsatu ya kukipesa na Yehova?
SOSA
Tala samu na yinki nketo mosi yina vuandaka bula miziki mpe bakala mosi yina vuandaka sala bansaka ponaka kukipesa na Yehova.
Tadila mambu yankaka ya kusala samu na kukipesa.
“Mpo na nini osengeli komipesa na Yehova?” (Linɔ́ngi ya Mosɛnzɛli ya 15 Janvier 2010)
Na video yayi ya miziki, tala kiese ya bantu yina mekukipesa na Yehova.
Na disolo “Banda kala nazalaki komituna boye: ‘Mpo na nini tozali awa na mabele?’” mona yinki tindaka nketo mosi yandi bakusa yinki lutaka mfunu na luzingu na yandi.
“Biblia ebongolaka bato” (Linɔ́ngi ya Mosɛnzɛli ya 1 Novembre 2012)