DILONGI 51
Yinki mutindu nge lenda sepedisa Yehova na bampova na nge?
Ntangu Yehova salaka beto, yandi pesaka beto dikabu mosi ya mbote—diluaku ya kutuba. Yehova ketulaka dikebi na mutindu beto kesadilaka dikabu yango? Yandi ketudilaka yau dikebi! (Tanga Yakobo 1:26.) Na yau, yinki mutindu beto lenda sadila dikoki na beto ya kutuba na mutindu yina kesepedisa Yehova?
1. Yinki mutindu beto fueti sadila dikabu ya kutuba?
Biblia mezabisa beto na ‘kutatamana kukindasana mpe kutungana.’ (1 Batesalonika 5:11) Nge lenda zaba mua ndambu ya bantu yina kele na nsatu ya lukindusu? Yinki nge lenda sala samu na kukindisa bau? Ndimisa bau ti bakele na mfunu samu na nge. Nge lenda tubila bau diaka yina nge kesepelaka na bau. Nge lenda kanisa verse mosi yina lenda kindisa muntu mosi nge mezaba? Yakele na bantu mingi yina nge lenda pona. Diaka, kuzimbakana ve ti mutindu na nge ya kutubila diambu lenda siamisa ngolo bayankaka. Na yau, ntangu nionso mekaka kutuba na kimpombo mpe na luzitu.—Bingana 15:1.
2. Yinki mitindu ya bampova beto fueti manga?
Biblia metuba: ‘Ata mpova mosi ve ya kubola bima na yinua na beno.’ (Tanga Baefezo 4:29.) Yazola monisa ti beto fueti sadila ve ntubulu ya nsoni to bampova ya kinkesi mpe ya nganzi yina keluadisaka ntima. Beto fueti manga diaka bampova ya luvunu mpe kutonga bantu.—Tanga Bingana 16:28.
3. Yinki kesadisa beto na kutubaka bampova yina ketungaka?
Mbala mingi mambu yina beto ketubaka kemonisaka mambu yina kele na ntima na beto to mutindu mabanza na beto kele. (Luka 6:45) Na yau, beto fueti longuka kutula mabanza na beto na mambu ya mbote—mambu yina kele ya lunungu, ya kuvedila, ya nzola, mpe ya lokumu. (Bafilipi 4:8) Samu na kutula mabanza na beto na mambu yango, beto fueti pona bansaka na beto mpe bankundi na beto na nduenga. (Bingana 13:20) Yakele na mfunu mpe kukanisa tekila beto tuba. Tadila mutindu bampova na nge kevuanda na bupusi na bantu yankaka. Biblia metuba: ‘Kutuba kukondua kuyindula kele lokola kuluadisa muntu na mbele ya mvita, kasi ludimi ya bantu ya mayele kebelusaka.’—Bingana 12:18.
KOTA NA MPINDA
Longuka mutindu ya kutuba samu na kusepedisa Yehova mpe kukindisa bantu yankaka.
4. Keba na bampova na nge
Na bantangu yankaka, beto nionso ketubaka mambu yina keniongisaka beto na manima. (Yakobo 3:2) Tanga Bagalatia 5:22, 23, mpe na manima tadila biuvu yayi:
Yinki bikadulu nge lenda lomba na kisambu yina lenda sadisa nge nge sadila mbote bampova na nge? Yinki mutindu bikadulu yango kesadisa nge?
Tanga 1 Bakorinto 15:33, mpe na manima tadila kiuvu yayi:
Yinki mutindu bankundi to bansaka nge keponaka lenda vuanda na bupusi na bampova na nge?
Yinki lenda soba mutindu na nge ya kutuba?
Tanga Longi 3:1, 7, mpe na manima tadila kiuvu yayi:
Yinki ntangu yalenda vuanda nduenga na kutuba ve to kuvingila ntangu ya mbote samu na kutuba diambu?
5. Tubaka mambu ya mbote samu na bantu yankaka
Yinki mutindu beto lenda manga kufinga to kutuba mambu mekondua kimpombo? Tula VIDEO, mpe na manima tadila biuvu yayi melanda.
Na video yayi, samu na yinki mpangi yayi ya bakala vuandaka na nsatu ya kusoba mutindu yina yandi vuandaka tuba mambu samu na bantu yankaka?
Yinki yandi salaka samu na kusoba?
Tanga Longi 7:16, mpe na manima tadila kiuvu yayi:
Yinki beto fueti zimbakana ve kana beto zola kubua na ntambu ya kutuba mambu ya yimbi samu na muntu mosi?
Tanga Longi 7:21, 22, mpe na manima tadila kiuvu yayi:
Yinki mutindu baverse yayi lenda sadisa nge nge kukiyala ntangu muntu yankaka metubila nge bampova ya yimbi?
6. Vuanda na bampova ya kimpombo ntangu nge kena solola na bantu ya dibuta na nge
Yehova zola beto sololaka kintuadi na mabuta na beto na mutindu mosi ya kimpombo mpe ya nzola. Tula VIDEO, mpe na manima tadila kiuvu yayi melanda.
Yinki lenda sadisa nge nge tuba na mutindu mosi ya kimpombo na dibuta na nge?
Tanga Baefezo 4:31, 32, mpe na manima tadila kiuvu yayi:
Bampova ya yinki mutindu lenda kindisa dibuta?
Yehova monisaka mutindu yandi kukimonaka samu na Muana na yandi, Yesu. Tanga Matayo 17:5, mpe na manima tadila kiuvu yayi:
Yinki mutindu nge lenda landa kifuani ya Yehova na mutindu na nge ya kusolola na dibuta na nge?
Sosa maluaku ya kupesa bantu yankaka felisitasion
BANTU YANKAKA METUBA: “Munu ketubaka yina munu kekanisaka. Yatala munu ve kana bantu yankaka sepela ve na mambu yina munu metuba.”
Nge mendima yau? Samu na yinki, to samu na yinki ve?
BUNKUFI
Bampova kele na kilendo. Beto fueti kanisa mbotembote na mambu yina beto ketubaka, ntangu ya kutuba yau, mpe mutindu ya kutubila yau.
Mvutukulu
Yinki kele ndambu ya mitindu yina nge lenda sadila bampova samu na kusadisa bantu yankaka?
Yinki bampova nge fueti manga?
Yinki lenda sadisa beto ntangu nionso samu na kuvuanda na bampova ya kimpombo mpe yina ketungaka?
SOSA
Yinki lenda sadisa beto beto sadila bampova ya mbote?
Longuka yinki lenda sadisa nge nge manga kusadila bampova ya yimbi.
“Mpo na nini koboya koloba maloba ya mabe?” (Disolo na Internet)
Tala yinki mutindu nge lenda nunga kubua ve na ntambu ya kutuba yimbi samu na bantu yankaka.
Mona mutindu Yehova sadisaka bakala mosi na mvita na yandi ya kubika kusadila bampova ya yimbi.