DILONGI 56
Tanina bumosi na kati ya kimvuka
Ntangu beto kele kintuadi na bampangi na beto ya kimpeve, beto kekukimonaka mutindu ntinu Davidi tubaka: ‘Tala! Yakele mbote mingi mpe kiese mingi ti bampangi zinga kisika mosi na bumosi!’ (Nkunga 133:1) Bumosi na beto kesalamaka yau mosi ve. Mosi mosi kati na beto kele na kiyekua ya kutanina yau.
1. Yinki kele diambu ya kuyitukua yina kemonanaka kati na bisadi ya Nzambi?
Kana nge mekuenda na lukutakanu ya kimvuka na buala yankaka, mbala yankaka nge kebakusa ve ndinga na bau, kasi nge kemona nzola ya bantu ya buala yango na mitindu mingi mpe nge kekukimona lokola kaka nge kele na buala na nge mosi. Samu na yinki? Samu beto kelongukaka Biblia na kusadilaka mikanda kaka mosi. Mpe beto kesalaka ngolo samu na kumonasana nzola kati na beto. Yavuanda yinki kisika beto kezingaka, beto nionso ‘kebokilaka nkumbu ya Yehova, samu na kusambila yandi na bumosi.’—Sefania 3:9, noti na yinsi ya paje.
2. Yinki nge lenda sala samu na kukumisa bumosi na beto ngolo?
“Beno zolana ngolo na ntima ya mvimba.” (1 Piere 1:22) Yinki mutindu nge lenda sadila dilongi yayi? Na kisika ya kutula kaka dikebi na beto na banzimbala ya bayankaka, beto ketulaka nde dikebi na bikadulu na bau ya mbote. Kulutisa kaka ntangu ve na bantu yina beno mekokana, mpe bantu yina kezolaka bima mutindu mosi na nge, kasi sosa mpe kuzaba bampangi ya babakala mpe ya banketo yina mesuasana na nge. Beto lenda sala diaka ngolo samu na kukatula kikadulu ya kupona bilungi to kutuba yimbi samu na bantu yankaka.—Tanga 1 Piere 2:17.a
3. Yinki nge kesala kana nge kele na mantata na mpangi mosi Muklisto?
Beto kele na bumosi, kasi beto kele diaka bantu ya kukondua kukoka. Bantangu yankaka beto kesalaka mambu yina kelembisaka bampangi na beto nzutu to keluadisaka bau. Na yau Mpova ya Nzambi mezabisa beto beto ‘tatamana . . . kunlemvukilanaka,’ yamebuela: ‘Mutindu Yehova nlemvukilaka beno na ntima ya mvimba, beno fueti sala mpe mutindu mosi.’ (Tanga Bakolosai 3:13.) Mbala mingi beto kesalaka Yehova mpasi, mpe yandi kenlemvukilaka beto. Na yau yandi kelombaka beto beto nlemvukila bampangi na beto. Kana nge mebakusa ti nge salaka mpangi yimbi, kuenda beno bongisa mambu yango.—Tanga Matayo 5:23, 24.b
KOTA NA MPINDA
Sosa mitindu yina nge lenda sala samu na kutula bumosi mpe kiyenge na kati ya kimvuka.
Yinki nge fueti sala samu na kutula kiyenge na bantu yankaka?
4. Nunga kikadulu ya kukanisila bantu yankaka yimbi
Beto kele na nsatu ya kuzola bampangi na beto nionso. Kasi beto lenda vuanda na mukakatano ya kundima mpangi yina mesuasana na beto. Yinki lenda sadisa beto? Tanga Bisalu 10:34, 35, mpe na manima tadila biuvu yayi:
Yehova kendimaka bantu ya mitindu nionso lokola Bambangi na yandi. Yinki mutindu diambu yango mesadisa nge nge soba mutindu na nge ya kutadila bantu yina mekatuka na bisika yankaka?
Yinki makanisi ya yimbi nge fueti manga yina bantu kevuandaka na yau samu na bantu yankaka na kisika nge kevuandaka?
Tanga 2 Bakorinto 6:11-13, mpe tadila kiuvu yayi:
Yinki mutindu nge lenda longuka kuzaba diaka mingi kuluta bampangi na nge Baklisto nionso ya babakala mpe ya banketo?
5. Nlemvukila na ntima ya mvimba mpe tula kiyenge
Yehova kenlemvukilaka beto na ntima na yandi ya mvimba atako yandi kele ve na mfunu ti beto nlemvukila yandi. Tanga Nkunga 86:5, mpe tadila biuvu yayi:
Yinki kele bunene ya nlemvo ya Yehova?
Samu na yinki nge kele na butondi samu na nlemvo na yandi?
Yinki mambu yina lenda sala ti yavuanda mpasi na kutanina kiyenge na bayankaka?
Yinki mutindu beto lenda landa kifuani ya Yehova mpe kutanina bumosi na beto na bampangi na beto ya babakala mpe ya banketo? Tanga Bingana 19:11, mpe na manima tadila kiuvu yayi:
Ntangu muntu mosi mefuemisa beto to mesala beto yimbi, yinki beto lenda sala samu na kutula kiyenge?
Bantangu yankaka beto kesalaka bantu yankaka yimbi. Kana diambu ya mutindu yina mesalama, yinki beto fueti sala? Tula VIDEO, mpe na manima tadila kiuvu yayi melanda.
Na video yayi, yinki mpangi mosi ya nketo salaka samu na kuvutula kiyenge?
6. Sosa mambu ya mbote na bampangi ya babakala mpe ya banketo na kimvuka
Kana beto mezaba bampangi na beto ya babakala na ya banketo, beto kezaba bikadulu na bau ya mbote mpe banzimbala na bau. Yinki mutindu beto lenda tula dikebi mingi na bikadulu na bau ya mbote? Tula VIDEO, mpe na manima tadila kiuvu yayi melanda.
Yinki lenda sadisa nge samu nge mona bikadulu ya mbote ya bampangi na beto ya babakala mpe ya banketo?
Yehova ketalaka mingi mingi bikadulu na beto ya mbote. Tanga 2 Bansangu 16:9a, mpe tadila kiuvu yayi:
Yinki mutindu nge kekukimonaka na kuzaba ti Yehova ketalaka mingi mingi bikadulu na nge ya mbote?
Ata kana diama ya kitoko kele na mua doti, kasi yakevuandaka kaka na valere. Mutindu mosi, bampangi na beto nionso ya babakala mpe ya banketo kele bantu ya kukondua kukoka, kasi bakele na valere na meso ya Yehova
BANTU YANKAKA METUBA: “Tekila munu nlemvukila muntu mosi, yandi fueti vuanda muntu yina mebonga kubaka nlemvo yango.”
Samu na yinki beto fueti vuanda na nsatu ya ngolo ya kunlemvukila bantu yankaka?
BUNKUFI
Nge lenda sadisa samu na kutanina bumosi na kati ya kimvuka na kunlemvukilaka mpe na kumonisaka nzola na bampangi na nge nionso ya babakala mpe ya banketo.
Mvutukulu
Yinki mutindu nge lenda nunga kikadulu ya kukanisila bantu yankaka yimbi?
Yinki nge kesala kana nge kele na mantata na mpangi mosi Muklisto?
Samu na yinki nge kezola kulanda kifuani ya Yehova na diambu metadila kunlemvukila bayankaka?
SOSA
Mona mutindu mosi ya bifuani ya Yesu lenda sadisa nge nge bika kusambisa bayankaka.
Beto fueti lomba nlemvo kana beto mekanisa ti beto sala ve diambu ya yimbi?
Tala mutindu babakala zole yina yundukaka na kisika yina bakezolaka ve bantu ya bankanda yankaka kumaka na bumosi ya kedika.
Johny mpe Gideon: Beto vuandaka ntete bambeni, bubu yayi beto kele bampangi (6:42)
Tadilla mitindu nge lenda manisa mantata na bantu yankaka tekila yabebisa kiyenge ya kimvuka.
“Luká kosilisa matata na bolingo” (Linɔ́ngi ya Mosɛnzɛli ya Mai 2016)