Tatamana kusadisa bantu

Mambu yina Paulo salaka

VIDEO: Paulo tatamanaka kusamuna na Efezo

1. Tala VIDEO, to tanga Bisalu 19:8-10. Na manima tadila biuvu yayi melanda:

1. Na kisika ya kulemba ntangu bantu yankaka vuandaka telemina yandi, yinki mutindu Paulo tatamanaka kusadisa bantu yina vuandaka sepela na kedika?

2. Mbala yikua Paulo vutukaka samu na kulonga bantu yina sepelaka na kedika mpe samu na bantangu yikua yandi salaka yau?

Yinki dilongi beto mebaka na kifuani ya Paulo?

2. Beto fueti baka ntangu mpe ngolo samu na kuvutukila bantu mpe kubanda kulonguka Biblia na bau.

Landa kifuani ya Paulo

3. Vuanda pene ya kuvutukila muntu na ntangu yina mebonga samu na yandi. Kukiyuvusa: ‘Yinki ntangu mpe yinki kisika kevuanda mbote samu na kusolola na yandi? Yinki wola yandi kevuanda na ntangu ya kusolola na munu?’ Vuanda pene ya kulandela yandi, ata kana ntangu yango bonga ve samu na nge.

4. Yuvusa muntu yango ntangu yina nge lenda kuiza solola diaka na yandi. Na nsuka ya konso disolo, meka kupesa wola ya sikisiki yina nge lenda kuiza solola diaka na muntu yango. Sala nionso samu na kuzitisa programe yina beno mesala.

5. Tatamana kuvuanda na kivuvu. Kukanisa ve mbala mosi ti muntu kesepelaka ve na kedika samu kaka yakevuandaka mpasi samu na kukuta yandi na yinzo to samu yandi kevuandaka na mambu mingi ya kusala. (1 Bk. 13:4, 7) Tatamana kukuenda sosa muntu yango na kusadilaka mbote ntangu na nge.​—1 Bk. 9:26.