Bika ‘nsiku ya ntima kimpombo’ vuanda na bupusi na zulu na nge

LISAa metuba: “Ntima kimpombo ya bampangi ya babakala mpe ya banketo yina kele Baklisto vuandaka na bupusi mingi na zulu na munu.” Yandi vuandaka tubila diambu ya ntete yina bendaka yandi na kedika. Yavuandaka diaka mutindu mosi samu na Anne, yandi metuba: “Na ebandeli munu bendamaka na kedika samu Bambangi ya Yehova vuandaka na ntima kimpombo, kasi samu na mambu yina ve bavuandaka longa.” Bubu yayi bampangi yango zole ya banketo kesepelaka kutanga Biblia mpe kuyindula na mpinda na zulu na yau, kasi ntima kimpombo kevuandaka na bupusi ya ngolo na zulu na bau.

Yinki mutindu beto lenda monisa ntima kimpombo yina kekindisa bantu yina kele nzinganzinga na beto? Beto tubila mitindu zole: Na ludimi na beto mpe na mambu yina beto kesalaka. Na manima beto ketadila banani beto fueti monisina ntima kimpombo.

‘NSIKU YA NTIMA KIMPOMBO’ KELE NA LUDIMI NA NGE

Nketo ya makoki yina Bingana kikapu 31 metubila vuandaka na ‘nsiku ya ntima kimpombo’ na ludimi na yandi. (Bin. 31:26) Yandi vuandaka bika nzila na “nsiku” yango vuanda na bupusi na zulu ya mambu yina yandi vuandaka tuba mpe na mutindu yandi ketubila yau. Batata diaka fueti vuanda na “nsiku” yango na ludimi na bau. Bibuti mingi mezaba mbote ti kutemina muana lenda vuanda na bupusi na zulu ya muana na bau mpe yalenda sala ti muana bika sadila mambu yina bakena kutubila yandi. Na yau ntangu bibuti kena kutuba na mutindu ya kimpombo, yakevuanda pete samu na bana na bau na kuwa mpe na kusadila mambu yango

Yavuanda nge kele kibuti to ve, yinki mutindu nge lenda longuka kutuba na kimpombo? Beto kekuta dikanisi na kitini ya ntete ya Bingana 31:26: ‘Yandi kezibulaka yinua na yandi na nduenga.’ Yau mesangisa kupona na nduenga bampova mpe ndinga ya kutubila. Yakevuanda mbote beto kukiyuvusaka, ‘Mambu yina munu ketuba yakefuemisa muntu, to yaketula kiyenge?’ (Bin. 15:1) Ya kedika, yakevuanda nduenga ya kukanisa tekila beto tuba.

Kingana yankaka metuba: ‘Kutuba kondua kuyindula kele lokola kuluadisa muntu na mupanga.’ (Bin. 12:18) Ntangu beto kena kukanisa samu na bampova na beto mpe bupusi yina mutindu na beto ya kutubila kevuanda na yau na bantu yankaka, yaketinda beto beto zaba mutindu ya kusadila bampova na beto. Ee, kusadila ‘nsiku ya kimpombo’ kesadisa beto beto bika bimisa bampova ya yimbi mpe beto bika tuba na ndinga ya kutemina. (Efe. 4:31, 32) Na kisika ya kuvuanda na makanisi ya yimbi beto ketuba bampova ya kimpombo mpe ya mbote, na ndinga ya tiya. Yehova pesaka kifuani samu na diambu yango ntangu yandi kindisaka kisadi na yandi Eliya yina vuandaka banga. Mbasi yina vuandaka monikisa Yehova tubaka ‘na ndinga ya kiyenge, mpe ya yinsi.’ (1 Bn. 19:12) Kasi, kuvuanda na kimpombo suka kaka ve na bampova ya kimpombo. Diaka, beto fueti sala mambu na kimpombo. Na yinki mutindu?

BISALU YA NTIMA KIMPOMBO KEKINDISAKA BANTU YANKAKA

Beto kelandaka kifuani ya Yehova na kutubaka bampova ya kimpombo mpe na kusalaka mambu na mutindu ya kimpombo. (Efe. 4:32; 5:1, 2) Lisa, yina beto tubilaka na ebandeli, tubilaka ntima kimpombo yina Bambangi ya Yehova monisaka. Yandi metuba, “Ntangu babimisaka dibuta na beto na kingolo na yinzo, bankuelani mosi na kimvuka na beto kuendaka ve na kisalu na bau samu na kukuiza sadisa beto na kubongisa bima. Na ntangu yango, munu vuandaka ve nlonguki ya Biblia!” Bisalu yango ya kimpombo sadisaka Lisa samu yandi longuka mbotembote kedika.

Anne, yina beto tubilaka na ebandeli ya disolo yayi, vuandaka diaka na butondi samu na ntima kimpombo yina Bambangi ya Yehova monisinaka yandi. Yandi metuba: “Na kutadila yinza mutindu yakele, munu kumaka na bantembe mingi. Yavuandaka mpasi samu na munu kutudila bantu ntima.” Yandi mebuela: “Ntangu munu kutanaka na Bambangi ya Yehova, munu tudilaka bau ve ntima. Munu kukiyuvusaka, ‘Samu na yinki bakena kutudila munu dikebi?’ Kasi ntima kimpombo ya nlongisi na munu ya Biblia tindaka munu munu tudila yandi ntima.” Yinki mambote yabimisaka? “Na manima, munu bandaka kutula dikebi na mambu yina munu vuandaka longuka.”

Simba ti bisalu ya kimpombo ya bampangi ya kimvuka simbaka mpenza ntima ya Lisa mpe ya Anne, mpe yau sadisaka bau bakuma na nsatu ya kulonguka kedika. Ntima kimpombo yina bampangi na kimvuka monisinaka bau sadisaka bau babanda kutudila Yehova mpe bisadi na yandi ntima.

LANDA KIFUANI YA NZAMBI MPE MONISA NTIMA KIMPOMBO NA BANTU YANKAKA

Na kutadila mutindu bantu yankaka yundukilaka to kisika bakezingilaka, yakevuandaka pete samu na bau na kusadila bampova ya kimpombo mpe mua kuseka. Yakele diambu ya mbote mutindu bantu yankaka kemonisaka kikadulu ya luzitu na kutadila nzingulu to kimuntu na bau. Kasi kana nzingulu to kimuntu na beto kaka nde kena kutinda beto beto monisa kikadulu ya kimpombo, yazola monisa ve ti beto kena kulanda kifuani ya kimpombo ya Nzambi.​—Fuanikisa Bisalu 28:2.

Ntima kimpombo ya kedika kele mosi ya mbuma ya mpeve ya nlongo ya Nzambi. (Bag. 5:22, 23) Yau zola monisa ti beto kevuandaka na nsatu ya mpeve ya nlongo ya Nzambi samu yasadisa beto beto monisa ntima kimpombo ya kedika. Kana beto mesala plina beto kelanda kifuani ya Yehova mpe ya Yesu. Mpe, lokola beto kele Baklisto, beto ketudilaka bantu yankaka dikebi na mutindu mosi ya kedika. Na yau, nzola samu na Yehova Nzambi mpe nzola samu na bafinangani na beto kevuandaka na bupusi na zulu na beto. Ntima kimpombo na beto kekumaka kikadulu mosi ya kilendo yina kekatukaka na ntima mpe yina Nzambi kendimaka.

NA NANI BETO FUETI MONISINA NTIMA KIMPOMBO?

Yakevuandaka pete samu na kumonisa ntima kimpombo na bantu yina kevuandaka na kimpombo na beto to na bantu yina beto mezaba. (2 Sa. 2:6) Mutindu mosi ya kusala yau kele ya kupesa bau matondo. (Kol. 3:15) Kasi bosi kana beto memona ti muntu mosi kele na nsatu beto monisina yandi ntima kimpombo?

Tadila diambu yayi: Yehova kele kifuani yina meluta na diambu metadila kumonisa nlemvo ya nene, mpe Mpova na yandi kena kulonga beto dilongi mosi ya mfunu na yina metadila kumonisa kikadulu yango. Mpova “nlemvo ya nene” mesadulua mbala mingi na Masonukua ya Greki ya Buklisto. Yinki mutindu Yehova kemonisinaka beto ntima kimpombo?

Kanisa na bamilion ya bantu yina Yehova monisinaka ntima kimpombo na kupesaka bau yina bavuandaka na yau nsatu samu na kubikana na luzingu. (Mat. 5:45) Ya kedika, ata tekila bantu zaba Yehova, yandi monisinaka bau ntima kimpombo. (Efe. 2:4, 5, 8) Na kifuani, yandi pesaka Muana na yandi kaka mosi yina yandi kezolaka, samu na bantu nionso. Ntumua Paulo sonikaka ti Yehova pesaka nkudulu ‘na kutadila bunene ya nlemvo na yandi ya nene.’ (Efe. 1:7) Diaka, atako beto kesalaka masumu mpe beto kepesaka Yehova kiadi, yandi ketatamanaka kutuadisa beto mpe kulonga beto. Bansiku mpe bampova na yandi kele lokola “mvula ya fioti.” (Kul. 32:2) Ya kedika beto lenda koka ve kuvutudila yandi mambu nionso ya mbote yina yandi kemonisinaka beto. Mpe beto mezaba ti kana Yehova monisinaka beto ve nlemvo ya nene, beto lendaka vuanda ve na kivuvu samu na bilumbu kena kuiza.​—Fuanikisa 1 Piere 1:13.

Kondua ntembe, ntima kimpombo ya Yehova kesimbaka mpenza ntima mpe yakekindisaka. Yau kesala ti, na kisika ya kumonisa ntima kimpombo kaka na bantu fioti, beto fueti sala ngolo na kulandaka kifuani ya Yehova na kusalaka ti ntima kimpombo vuanda nzingulu na beto ya konso kilumbu. (1 Te. 5:15) Kana beto kena kumonisa ntima kimpombo mbala na mbala, beto kevuanda lokola tiya na kilumbu mosi ya madidi. Beto kevuanda bantu yina kekindisaka bampangi na beto ya dibuta, bampangi na beto Baklisto, bankundi ya kisalu, bankundi ya kalasi, mpe bafinangani na beto.

Kanisa na bantu ya dibuta na nge to na bampangi na kati ya kimvuka yina kebaka mambote samu na bampova ya kimpombo mpe na bisalu na nge. Yalenda vuanda na mpangi mosi na kimvuka na nge yina kele na nsatu ya lusadusu samu na kubongisa yinzo mpe bilanga na yandi to kusala kisalu yankaka lokola kusumba bima ya kudia. Katula yau, kana nge mekutana na muntu mosi na kisalu ya kusamuna yina kele mpenza na nsatu ya lusadusu, nge lenda pesa yandi lusadusu ya mfunu?

Na kulandaka kifuani ya Yehova, bika ti bampova mpe bisalu na beto tuadusua ntangu nionso na ‘nsiku ya ntima kimpombo.’