Kumisa ngolo kikadulu na nge ya kutudila nkubukulu ya Yehova ntima

1. Yinki mutindu bisadi ya Yehova bongisamaka na siekle ya ntete?

KANA Yehova mepesa bisadi na yandi kiyekua mosi, yandi kezolaka bakokisa yau na mutindu yina mebongisama. (1 Bk. 14:33) Na kifuani, luzolo ya Nzambi kele ti nsangu ya mbote samunua na ntoto ya mvimba. (Mat. 24:14) Yehova pesaka Yesu kiyekua ya kutuadisa kisalu yango. Yesu salaka nionso samu kisalu yango kokisama na mutindu yina mebongisama mbote. Na siekle ya ntete, ntangu bimvuka vuandaka zibuka na bisika mutindu na mutindu, bankulutu ponamaka samu na kutuadisa yau. (Bis. 14:23) Na Yerusaleme, kimvuka ya ntuadisi ya bankulutu, yina sangisaka bantumua mpe babakala yankaka ya bambuta, vuandaka baka banzengolo yankaka yina yalombaka ti bimvuka nionso zitisa. (Bis. 15:2; 16:4) Luzitu na bau na malako yina babakaka salaka ti, ‘bimvuka tatamana kukuma ngolo mpenza na kiminu mpe bantu vuandaka kuma mingi konso kilumbu.’​—Bis. 16:5.

2. Banda 1919, yinki mutindu Yehova vuandaka pesa lutuadusu mpe madia ya kimpeve na bisadi na yandi?

² Yehova kena kutatamana kubongisa bisadi na yandi ata bubu yayi. Banda 1919, Yesu sadilaka grupe mosi ya fioti ya bampangi ya babakala yina metulua mafuta na kimpeve samu na kubongisa kisalu ya kusamuna mpe kupesa madia ya kimpeve na banlonguki na yandi.a (Luka 12:42) Yakele puelele ti Yehova kena kusakumuna kisalu ya grupe yango.​—Yez. 60:22; 65:13, 14.

3-4. (a) Pesa kifuani yina kena kumonisa mutindu beto kebakaka mambote lokola beto kele ya kubongisama. (b) Yinki beto ketadila na disolo yayi?

³ Kana beto vuandaka ve ya kubongisama, beto zolaka vuanda ve na dikoki ya kukokisa kisalu yina Yesu bikilaka beto beto sala. (Mat. 28:19, 20) Na kifuani, kanisa ntete kana bapesaka ve konso kimvuka terituare yina yafueti sala; konso muntu zolaka kuenda samuna na kisika yina yandi mezola. Baterituare yankaka zolaka salama mbala na mbala na bansamuni mingi ya kusuasana, nzokande baterituare yankaka zolaka sundolama. Nge lenda zaba mitindu yankaka yina beto kebakaka mambote lokola beto kele ya kubongisama?

⁴ Mutindu kaka Yesu bongisaka banlonguki na yandi ntangu yandi vuandaka awa na ntoto, yandi kena kutatamana kubongisa bisadi ya Nzambi bubu yayi. Na disolo yayi, beto ketadila kifuani yina Yesu bikaka mpe mutindu nkubukulu na beto kelandaka kifuani yango. Beto ketadila diaka mutindu beto lenda kumisa ngolo kikadulu na beto ya kutudila nkubukulu ya Yehova ntima.

NKUBUKULU NA BETO KELANDAKA KIFUANI YA YESU

5. Yinki kele mutindu mosi yina beto kelandaka kifuani ya Yesu? (Yoane 8:28)

⁵ Yesu longukaka na Tata na yandi ya dizulu mambu yina yandi vuandaka sala mpe yina yandi vuandaka tuba. Nkubukulu ya Yehova kelandaka kifuani ya Yesu, na kusadilaka Mpova ya Nzambi samu na kusadisa beto beto zaba mambu yina kele mbote mpe yina kele yimbi, mpe yakepesaka beto lutuadusu samu na luzingu na beto. (Tanga Yoane 8:28; 2 Tm. 3:16, 17) Beto kebakaka mbala na mbala makundoli samu na kutanga mpe kusadila Mpova ya Nzambi. Yinki mutindu beto kebakaka mambote na kulandaka malongi yango?

6. Yinki kele mutindu mosi ya mfunu yina beto kebakilaka ndongokolo ya Biblia mambote?

⁶ Beto kebakaka mambote mingi ntangu beto kelongukaka Biblia na lusadusu ya mikanda na beto ya Buklisto. Na kifuani, beto kele na dikoki ya kufuanikisa malongi ya Biblia na lutuadusu yina beto kebakaka na nkubukulu. Kana beto memona ti lutuadusu yina beto kebakaka mesimbama na Masonukua, kikadulu na beto ya kutudila nkubukulu ya Yehova ntima kekumaka ngolo.​—Bar. 12:2.

7. Yinki nsangu Yesu vuandaka longa, mpe yinki mutindu nkubukulu ya Yehova kelandaka kifuani na yandi?

⁷ Yesu vuandaka longa “nsangu ya mbote ya Kimfumu ya Nzambi.” (Luka 4:43, 44) Diaka, Yesu pesaka banlonguki na yandi ntumu, basamuna mambu metadila Kimfumu. (Luka 9:1, 2; 10:8, 9) Bubu yayi, bantu nionso yina kele na nkubukulu ya Yehova kesamunaka nsangu ya Kimfumu yavuanda yinki kisika bakezingaka to yinki biyekua bakele na yau.

8. Yinki lokumu beto kevuandaka na yau?

⁸ Yakele lokumu samu na beto kusamunina bantu yankaka kedika ya Kimfumu ya Nzambi! Muntu nionso ve kele na lokumu yango. Na kifuani, ntangu Yesu vuandaka na ntoto, yandi pesaka ve nzila na bampeve ya yimbi bapesa kimbangi samu na yandi. (Luka 4:41) Bubu yayi, tekila muntu samuna kintuadi na bisadi ya Yehova, yandi fueti zinga na mutindu yina kesepedisaka Yehova. Beto kemonisaka ti beto kele na butondi samu na lokumu ya kusamuna na kupesaka kimbangi na konso kisika mpe na konso ntangu yina beto kele na dikoki ya kusala yau. Lokola Yesu, lukanu na beto kele ya kukuna mpe kumuangisa maza na bambutu ya kedika ya Kimfumu na bantima ya bantu.​—Mat. 13:3, 23; 1 Bk. 3:6.

9. Yinki mutindu nkubukulu na beto kesalaka ti bantu zaba nkumbu ya Nzambi?

⁹ Yesu zabisaka bantu nkumbu ya Nzambi. Na kisambu yina yandi salaka na Tata na yandi ya dizulu, Yesu tubaka: ‘Munu zabisaka bau nkumbu na nge.’ (Yoa. 17:26) Nkubukulu ya Yehova kelandaka kifuani ya Yesu na kusalaka nionso yina yalenda sala samu na kusadisa bantu yankaka bazaba nkumbu ya Nzambi. Mosi ya mitindu yina nkubukulu salaka yau kele na nzila ya Biblia—Mbalula ya Nsi-Ntoto ya Mpa. Mbangudulu yango vutulaka nkumbu ya Nzambi na Biblia na bisika yina yavuandaka na ebandeli. Mbangudulu yango kele bubu yayi na mvimba na yau to na kitini na bandinga kuluta 270. Na Apandisi A4 mpe A5 ya mbangudulu yango, nge lenda longuka mambu mingi na yina metadila samu na yinki mpe yinki mutindu bavutulaka nkumbu ya Nzambi na Biblia. Apandisi C yina kele na Biblia ya ndongokolo ya Français, mepesa bamfunu mingi yina memonisa ti nkumbu ya Nzambi fueti vuanda na Masonukua ya Greki ya Buklisto mbala 237.

10. Yinki dilongi beto mebaka na bampova ya nketo mosi yina kezingaka na Birmanie?

¹⁰ Mutindu mosi na Yesu, beto kevuandaka na nsatu ya kusadisa bantu mingi bazaba nkumbu ya Nzambi. Nketo mosi yina kezingaka na Birmanie yina longukaka nkumbu ya Nzambi ntangu yandi vuandaka na bamvula 67, yandi dilaka mpe yandi tubaka: “Yayi kele mbala ya ntete na luzingu na munu na kuwa ti nkumbu ya Nzambi kele Yehova. . . . Beno melongisa munu diambu yina meluta mfunu yina munu melongukaka ntete ve.” Mutindu disolo yayi memonisa yau, kana bantu melonguka nkumbu ya Nzambi, yalenda soba luzingu na bau.

BETO TATAMANA KUTUDILA NKUBUKULU NA BETO NTIMA

11. Yinki mutindu bankulutu lenda monisa ti baketudilaka nkubukulu ya Yehova ntima? (Tala diaka foto.)

¹¹ Yinki kele mutindu mosi yina bankulutu lenda monisa ti baketudilaka nkubukulu ya Nzambi ntima? Ntangu bankulutu mebaka malako, bafueti tanga yau na dikebi mpe bafueti sala nionso yina balenda samu na kusadila yau. Na kifuani, bakebakaka malako kaka ve samu na mutindu ya kusadila masolo na lukutakanu mpe mutindu ya kusala bisambu samu na kimvuka kasi mpe mutindu ya kutanina mameme ya Klisto. Ntangu bankulutu kesadilaka malako nionso yina bakebakaka na nkubukulu, bampangi ya babakala mpe ya banketo kemonaka ti Yehova kezolaka bau mpe yandi ketudilaka bau dikebi.

12. (a) Samu na yinki beto fueti sala kintuadi na bantu yina kena kutuadisa beto? (Baebreo 13:7, 17) (b) Samu na yinki beto fueti tula makanisi na bikadulu ya mbote ya bantu yina ketuadisaka beto?

¹² Kana beto mebaka malako yina mekatuka na bankulutu, beto fueti vuanda pene ya kuzitisa yau. Kana beto kena kusala mutindu yina, beto kesala ti bantu yina kena kutuadisa beto basala kisalu na bau na pete nionso. Biblia kena kukindisa beto beto vuanda na luzitu mpe na kumikitisa na bantu yina kena kutuadisa beto. (Tanga Baebreo 13:7, 17.) Na bantangu yankaka yalenda vuanda mpasi kusala yau. Samu na yinki? Samu babakala yango kele bantu ya kukondua kukoka. Kasi, kana beto kena kutula dikebi na bikadulu na bau ya yimbi na kisika ya kutula dikebi na bikadulu na bau ya mbote, beto kepesa bambeni na beto maboko. Na yinki mutindu? Beto ketudila diaka ve nkubukulu ya Nzambi ntima, yau nde kevuandaka nzengolo ya bambeni na beto. Yinki mpenza beto lenda sala samu na kumona mpe kumanga luvunu ya bambeni na beto?

KUBIKA VE BANTU YANKAKA LEMBISA KIKADULU NA NGE YA KUTUDILA NKUBUKULU YA YEHOVA NTIMA

13. Yinki mutindu bambeni ya Nzambi kesosaka kusala ti nkubukulu na yandi monana ya yimbi?

¹³ Bambeni ya Nzambi kesalaka nionso samu mambu ya mbote ya nkubukulu ya Nzambi monana lokola mambu ya yimbi. Na kifuani, beto longukaka na Masonukua ti Yehova kelombaka na bisadi na yandi ti bavuanda ya kuvedila na nzutu, na makanisi, mpe na kimpeve. Yandi kelombaka ti muntu nionso yina memanga kubalula ntima, na kutatamanaka kusala mambu ya mvindu bimisama na kimvuka. (1 Bk. 5:11-13; 6:9, 10) Beto kezitisaka ntumu yango ya Masonukua. Kasi lokola beto kezitisaka ntumu yango, bambeni na beto ketubaka ti beto kezolaka bantu ve, beto kesambisaka bau, mpe beto kezolaka ve bantu yina kele ya kusuasana na beto.

14. Masolo ya luvunu samu na nkubukulu na beto kekatukaka na nani?

¹⁴ Sosa kuzaba nani mpenza kenuanisaka nkubukulu na beto. Satana Diabulu ketubaka luvunu samu na nkubukulu na beto. Yandi kele “tata ya luvunu.” (Yoa. 8:44; Kuy. 3:1-5) Na yau beto fueti zaba ti Satana kesadila bantu na yandi samu na kutuba masolo ya luvunu samu na nkubukulu ya Yehova. Diambu yango monanaka puelele na siekle ya ntete.

15. Yinki bamfumu ya mabundu salaka Yesu mpe banlonguki na yandi?

¹⁵ Atako Yesu Muana ya Nzambi vuandaka muntu ya kukoka, mpe yandi salaka bimangu ya kukamua, Satana sadilaka bantu samu na kumuangisa mambu mingi ya luvunu samu na yandi. Na kifuani, bamfumu ya mabundu tubilaka bantu ti kilendo ya Yesu ya kubimisa bademo vuandaka katuka na “mfumu ya bademo.” (Mar. 3:22) Ntangu Yesu vuandaka na mpasi, bamfumu ya mabundu fundaka yandi ti yandi fingaka Nzambi mpe batindaka bantu balomba Yesu samu bakufua yandi. (Mat. 27:20) Na manima, ntangu banlonguki ya Klisto vuandaka samuna nsangu ya mbote, bantu yina vuandaka telemina bau ‘tindaka bantu’ baniokola Baklisto yango. (Bis. 14:2, 19) Na kutadila Bisalu 14:2, Linɔ́ngi ya Mosɛnzɛli ya 1 décembre 1998, tubaka ti: “Na kisika basuka kaka na kumanga nsangu bau mosi, Bayuda yina teleminaka Baklisto bandaka kumuangisa bansangu ya luvunu samu bantu ya makanda kuma na makanisi ya yimbi samu na Baklisto.”

16. Yinki beto fueti bambuka na yau kana beto mekuwa masolo ya luvunu?

¹⁶ Satana kena kutatamana kuvuna tii bubu yayi. Bubu yayi, yandi kena kutatamana ‘kuvuna ntoto ya mvimba.’ (Kus. 12:9) Kana nge mekuwa masolo ya yimbi samu na nkubukulu to samu na bampangi yina kena kutuadisa beto, bambuka na mutindu bambeni ya Nzambi sadilaka Yesu mpe banlonguki ya siekle ya ntete mambu. Bubu yayi, bakeniokolaka mpe bakevuninaka bisadi ya Yehova mambu mutindu kaka Biblia samunaka yau. (Mat. 5:11, 12) Beto kevunuka ve na masolo ya luvunu kana beto mezaba kisika yakekatukaka mpe kana beto mesala mbala mosi diambu samu na kukitanina na yau. Yinki diambu beto lenda sala samu na kukitanina?

17. Yinki mutindu beto lenda manga ti masolo ya luvunu sala beto mpasi? (2 Timoteo 1:13) (Tala diaka ankadre “Yinki nge kesala kana nge mekuwa masolo ya luvunu?”)

¹⁷ Manga masolo ya luvunu. Ntumua Paulo pesaka malako ya puelele samu na diambu yina beto fueti sala kana beto mekuwa masolo ya luvunu. Yandi tubilaka Timote yandi ‘pesa bantu yankaka ntumu . . . batula ve dikebi na masolo ya luvunu’ mpe ‘bamanga masolo ya luvunu yina kevuezaka Nzambi.’ (1 Tm. 1:3, 4; 4:7) Kanisa ntete na diambu yayi, bebe lenda baka kima ya doti yina mekatuka na ntoto mpe yandi metula yau na yinua na yandi, kasi mbuta lenda sala mutindu yina ata fioti ve samu yandi mezaba ti yakepesa yandi maladi. Beto kemangaka masolo ya luvunu samu beto mezaba kisika luvunu yango mekatuka. Beto kekuwaka kaka ‘bampova ya kuvedila’ ya kedika.​—Tanga 2 Timoteo 1:13.

18. Yinki mutindu beto lenda monisa ti beto kele na butondi na nkubukulu ya Yehova?

¹⁸ Beto metadila kaka mitindu tatu na kati ya mitindu mingi yina nkubukulu ya Nzambi kelandaka kifuani ya Yesu. Ntangu nge kena kulonguka Biblia sosa kumona mitindu yankaka yina nkubukulu na beto kelandaka kifuani ya Yesu. Sadisa bantu yankaka na kimvuka na beno bakudisa kikadulu na bau ya kutudila nkubukulu ya Yehova ntima. Mpe tatamana kumonisa ti nge kele na butondi na kusadilaka Yehova na kukuikama nionso mpe na kubikanaka penepene ya nkubukulu yina yandi kena kusadila samu na kukokisa luzolo na yandi. (Nk. 37:28) Bika beto tatamana kusepela na diluaku yina beto kele na yau ya kuvuanda kintuadi na bantu yina kezolaka Yehova mpe kele ya kukuikama na yandi.