DISOLO YA NDONGOKOLO 21
MUYIMBU 107 Ndakisa ya bolingo ya Nzambe
Mutindu ya kubaka nkuelani ya mbote
‘Nani lenda baka nketo yina mebonga? Ntalu na yandi meluta na ntama mpenza ntalu ya bakorayi.’—BING. 31:10.
MAMBU YINA BETO KELONGUKA
Beto kelonguka bansikudukusu ya Biblia yina lenda sadisa muntu na kubaka nkuelani ya mbote mpe mutindu bampangi yankaka ya kimvuka lenda sadisa bampupa yina kele na nsatu ya kukuela.
1-2. (a) Yinki mambu yina Baklisto yina kele bampupa fueti tadila tekila babanda kuzolana? (b) Yinki zola monisa “kuzolana”? (Tala “Mpova yina bamesasila.”)
NGE kele na nsatu ya kukuela? Atako yakelombaka ve beto kuela ntete samu beto vuanda na kiese, bampangi mingi ya Baklisto yina kele bampupa, yavuanda bantuenia to bambuta, kevuandaka na nsatu ya ngolo ya kuvuanda na nkuelani. Ya kedika tekila kuzolana na muntu, nge fueti vuanda na nguizani ya ngolo na Yehova, kukizaba mbote nge mosi mpe kuvuanda ya kukubama na mbongo na kimpeve mpe na makanisi samu na dikuela.a (1 Bak. 7:36) Kana nge mesala mutindu yina, yakevuanda pete samu nge vuanda na dikuela mosi ya kiese.
2 Kasi, yakevuandaka ntangu nionso pete ve na kubaka nkuelani ya mbote. (Bing. 31:10) Mpe atako nge mebaka muntu yina nge kesepela kuzaba mbote kuluta, yalenda vuanda pete ve samu beno banda kuzolana.b Na disolo yayi, beto ketubila mambu yina lenda sadisa Baklisto yina kele bampupa na kubaka nkuelani ya mbote mpe kubanda kuzolana. Beto kelonguka diaka mutindu bampangi yankaka ya kimvuka lenda sadisa bantu yina kele na nsatu ya kukuela.
YINKI LENDA SADISA NGE NA KUBAKA NKUELANI YA MBOTE?
3. Yinki mambu Muklisto yina kele mpupa fueti tadila ntangu yandi kena kusosa nkuelani?
3 Kana nge kevuandaka na nsatu ya kukuela, yakevuanda mbote nge zaba mambu yina nge kesepela kumona na nkuelani na nge tekila nge banda kuzola.c Kana nge sala mutindu yina ve, nge lenda kondua kutula dikebi na muntu yina lendaka vuanda nkuelani ya mbote mpe kuzola muntu yina bonga ve samu na nge. Ya kedika konso muntu yina nge kena kukanisa ti yandi lenda vuanda nkuelani yina mebonga samu na nge, yandi fueti vuanda Muklisto yina mebakaka mbotama. (1 Bak. 7:39) Kasi muntu nionso ve yina mebakaka mbotama lenda vuanda nkuelani ya mbote samu na nge. Na yau kukiyuvusa: ‘Yinki kele balukanu na munu ya luzingu? Yinki bikadulu munu kemonaka ti yakele na mfunu samu na nkuelani? Munu kele na bukatikati samu na mambu yina munu kesepela kumona na nkuelani?’
4. Yinki mambu bantu yankaka kotisaka na bisambu na bau?
4 Kana nge kevuandaka na nsatu ya kukuela, kondua ntembe nge sambilaka samu na yau. (Bafil. 4:6) Ya kedika, Yehova kelakaka ve muntu nkuelani mosi. Kasi yandi ketulaka dikebi na bansatu mpe banguilu na nge, mpe yandi lenda sadisa nge ntangu nge kena kusosa nkuelani. Na yau tatamana kutubila yandi bansatu mpe banguilu na nge. (Nk. 62:8) Sambila samu yandi pesa nge ntima yinda mpe nduenga. (Yak. 1:5) John,d mpangi mosi ya bakala yina kele mpupa yina kevuandaka na États-Unis, kena kutubila mambu yina yandi kekotisaka na bisambu na yandi: “Munu ketubilaka Yehova bikadulu yina munu kele na nsatu ya kumona na nkuelani. Munu kesambilaka samu munu baka maluaku ya kukutana na nkuelani ya mbote. Munu kelombaka diaka Yehova yandi sadisa munu samu munu kudisa bikadulu yina kesala ti munu vuanda bakala ya mbote.” Tanya, mpangi mosi ya nketo yina kevuandaka na Sri Lanka, metuba: “Ntangu munu kena kusosa nkuelani ya mbote, munu kelombaka na Yehova yandi sadisa munu munu vuanda ya kukuikama, na makanisi ya mbote, mpe na kiese.” Ata kana nge mona ve nkuelani ya mbote mbala mosi, Yehova melaka yandi ketatamana kukokisa bansatu na nge ya kinsuni mpe ya makanisi.—Nk. 55:22.
5. Yinki maluaku Baklisto yina kele bampupa kele na yau samu na kukutana na muntu yina kezolaka Yehova? (1 Bakorinto 15:58) (Tala diaka foto.)
5 Biblia kena kukindisa beto beto vuanda na “mambu mingi ya kusala na kisalu ya Mfumu.” (Tanga 1 Bakorinto 15:58.) Kana nge kele na mambu mingi ya kusala na kisalu ya Yehova mpe kana nge kena kulutisa ntangu mingi kintuadi na bampangi ya mutindu na mutindu ya babakala mpe ya banketo, nge kesuka kaka ve na kuvuanda na bankundi ya mbote kasi nge kevuanda diaka na diluaku ya kukutana na bampupa yankaka yina kele na nzengolo ya kusadila Yehova lokola nge. Mpe kana nge kena kusala nionso samu na kusepedisa Yehova, nge kevuanda na kiese ya kedika.
Kana nge kele na mambu mingi ya kusala na kisalu ya Yehova mpe nge kena kulutisa ntangu kintuadi na Baklisto ya mutindu na mutindu, nge lenda mona bampangi yankaka yina kele na nsatu ya kukuela (Tala paragrafe 5)
6. Yinki mambu Baklisto yina kele bampupa fueti zimbakana ve ntangu bakena kusosa bankuelani?
6 Kasi keba: Kubika ve nzila ti kusosa nkuelani kuma diambu yina meluta mfunu na luzingu na nge. (Bafil. 1:10) Kiese ya kedika kekatukaka ve, na kukuela to na kuvuanda mpupa, kasi yakekatukaka na kuvuanda na nguizani ya mbote na Yehova. (Mat. 5:3) Mpe ntangu nge kele mpupa, nge lenda vuanda na ntangu mingi ya kulutisa na kisalu ya Yehova. (1 Bak. 7:32, 33) Sadila ntangu yango na mutindu ya mbote kuluta. Jessica, mpangi mosi ya nketo yina kevuandaka na États-Unis yina kuelaka ntangu yandi kumaka na bamvula pene na 40 metuba, “Munu vuandaka kaka na mambu mingi ya kusala na kisalu ya Yehova, yau vuandaka sadisa munu munu vuanda na kiese atako munu vuandaka na nsatu ya kukuela.”
BAKA NTANGU YA KUTADILA MBOTE MUNTU YINA NGE KELE NA NSATU YA KUZOLA
7. Samu na yinki yakele nduenga kutadila nkuelani mosi yina mebonga samu na mua ntangu tekila ya kutubila yandi ti nge kesepelaka na yandi? (Bingana 13:16)
7 Yinki nge kesala kana nge mekanisa ti muntu mosi lenda vuanda nkuelani ya mbote? Nge fueti tubila yandi mbala mosi ti nge kena kusepela na yandi? Biblia metuba muntu ya nduenga kebakaka nzayilu tekila ya kusala diambu. (Tanga Bingana 13:16.) Na yau yakele nduenga kutadila yandi kondua ti yandi zaba samu na mua ntangu tekila nge tubila yandi ti nge kena kusepela na yandi. Aschwin yina kevuandaka na Pays-Bas metuba: “Banguilu lenda kula na nsualu kasi yalenda zimbana mpe na nsualu. Na yau na kubakaka ntangu ya kutadila muntu, nge kebanda ve kuzola muntu na kutadilaka kaka banguilu yina kele samu na mua ntangu.” Diaka, kana nge kena kutadila muntu nge lenda bakusa kana muntu yango bonga ve samu na nge.
8. Yinki mutindu mpangi yina kele mpupa lenda tadila nkuelani mosi yina mebonga? (Tala diaka foto.)
8 Yinki mutindu nge lenda banda kutadila muntu kondua ti yandi zaba? Na balukutakanu ya kimvuka to na balukutakanu yankaka, nge lenda mona mambu yina metadila kimpeve, kimuntu, mpe bikadulu ya muntu yango. Banani kele bankundi na yandi, mpe yinki mambu yandi ketubilaka mingi? (Luka 6:45) Balukanu na yandi kele mutindu mosi na balukanu na nge? Nge lenda solola na bankulutu ya kimvuka na bau to Baklisto yankaka ya kuyela yina mezaba yandi mbote. (Bing. 20:18) Nge lenda yuvusa mutindu bantu mezabila muntu yango mpe bikadulu na yandi. (Ruti 2:11) Ntangu nge kena kutadila muntu yango, sala nionso samu yandi bika kukimona yimbi. Zitisa banguilu na yandi mpe mambu yina metadila kaka yandi.
Tekila nge tubila muntu ti nge kesepelaka na yandi, tadila yandi ntete samu na mua ntangu kondua ti yandi zaba (Tala paragrafe 7-8)
9. Tekila kutubila muntu mosi ti nge kena kuzola yandi, yinki nge fueti ndimisama na yau?
9 Ntangu yikua nge fueti lutisa na kutadila muntu tekila nge tubila yandi ti nge kena kusepela na yandi? Kana nge metubila muntu yango na nsualu yandi lenda kanisa ti nge kekanisaka mbote ve tekila ya kubaka banzengolo. (Bing. 29:20) Kasi na ndambu yankaka, kana muntu yango mebakusa ti nge kena kusepela na yandi, kasi nge kena kubaka ntangu mingi samu na kutubila yandi, yandi lenda kanisa ti nge kekakatanaka mingi samu na kubaka banzengolo. (Lon. 11:4) Kuzimbakana ve ti, yalomba ve nge kukindimisa ti nge kekuela muntu yango tekila nge tubila yandi ti nge mezola yandi. Kasi nge fueti kukindimisa ti nge kele ya kubongama samu na kukuela mpe muntu yango lenda vuanda nkuelani yina mebonga samu na nge.
10. Yinki nge fueti sala kana nge memona ti muntu mosi kena kusepela na nge kasi nge kena kusepela na yandi ve?
10 Yinki nge kesala kana nge mebakusa ti muntu mosi kena kusosa kuzaba nge mbote kuluta? Kana nge kele ve na nsatu ya kuzola muntu yango, sosa kumonisa yau puelele na mambu yina nge kena kusala. Yakevuanda yimbi kusala muntu yango kanisa ti dikoki kele ya kubanda nguizani, nzokande yakele mutindu yina ve.—1 Bak. 10:24; Baef. 4:25.
11. Na babuala yina kuzolana to dikuela kebongisamaka na bantu yankaka, yinki bafueti lunda na makanisi?
11 Na babuala yankaka yakelombaka bibuti to bambuta yankaka pona nkuelani mosi samu na muntu ya dibuta na bau yina kele mpupa. Na ndambu yankaka, dibuta to bankundi keponaka nkuelani samu na muntu yina kele mpupa mpe bakebakaka nkubukulu samu bakala mpe nketo yango kutana samu bamona kana balenda banda kuzolana. Kana bamelomba nge nge baka nkubukulu samu bantu zole zolana to kuelana, tadila mambu yina bantu yango zole kezolaka mpe bansatu na bau zole. Kana nge mekanisa ti muntu mosi lenda vuanda nkuelani mosi ya mbote samu na nkundi mosi to mpangi ya dibuta, sosa kuzaba kimuntu mpe bikadulu ya muntu yango, mpe yina meluta mfunu kana yandi kele na nguizani ya mbote na Yehova. Nguizani ya ngolo na Yehova kele mfunu mingi kuluta kuvuanda na mbongo, kutanga bakalasi, to kuvuanda muntu ya nene. Kasi kuzimbakana ve ti, mpangi ya bakala to ya nketo yina kele mpupa nde fueti baka nzengolo ya nsuka kana yandi kekuela to ve.—Bag. 6:5.
NTANGU NGE MEBANDA KUZOLA
12. Yinki mutindu nge lenda tubila muntu mosi ti nge kena kuzola yandi?
12 Kana nge zola banda kuzolana na muntu mosi, yinki mutindu nge lenda tubila muntu yango ti nge kena kuzola yandi?e Nge lenda baka nkubukulu samu na kusolola na muntu yango na kisika ya bantu mingi to na telefone. Tubila yandi puelele bansatu na nge. (1 Bak. 14:9) Kana yakele na mfunu, pesa muntu yango ntangu ya kukanisa samu na mvutu yina yandi kepesa. (Bing. 15:28) Mpe kana muntu yango memanga kuzolana na nge, zitisa dibanza na yandi.
13. Yinki nge lenda sala kana muntu mosi metubila nge ti yandi kena kuzola nge? (Bakolosai 4:6)
13 Kasi yinki nge kesala kana muntu metubila nge ti yandi kena kuzola nge? Yalombaka kibakala samu muntu yango kuiza kutana na nge, na yau vuanda na kimpombo mpe na luzitu. (Tanga Bakolosai 4:6.) Kana nge kele na nsatu ya mua ntangu samu na kutadila kana nge kendima kubanda kuzolana na muntu yango, tubila yandi yau. Kasi, sala nionso na kuzingila ve samu na kupesa yandi mvutu. (Bing. 13:12) Kana nge kele ve na nsatu ya kuzolana na yandi, tubila yandi na kimpombo mpe puelele. Tala mutindu Hans, mpangi mosi ya bakala yina kevuandaka na Autriche pesaka mvutu ntangu mpangi mosi ya nketo kuizaka solola na yandi: “Munu tubilaka yandi nzengolo na munu na mayele kasi puelele. Munu salaka yau na nsualu samu munu zolaka ve kupesa yandi kivuvu ya luvunu. Samu na mfunu yango, munu kumaka kenga diaka na mutindu ya kusolola na yandi na mutindu yina kesala yandi bika kanisa ti munu kesoba makanisi na munu.” Kasi, kana nge kesepela kuzaba yandi mingi kuluta, tubila yandi banguilu na nge, mpe beno tubila kintuadi mutindu beno kenatina mambu ntangu beno kena kuzolana. Mambu yango lenda suasana na yina ya bantu yankaka, na kutadila kisika beno kevuandaka to mambu yankaka.
YINKI MUTINDU BAMPANGI YANKAKA YA KIMVUKA LENDA SADISA BAKLISTO YINA KELE BAMPUPA?
14. Yinki mutindu beto lenda sadisa Baklisto yina kele bampupa na bampova na beto?
14 Yinki mutindu bampangi yankaka ya kimvuka lenda sadisa Baklisto yina kele bampupa yina kele na nsatu ya kukuela? Mosi ya mitindu ya kusala yau kele na kukenga na mambu yina beto ketubaka. (Baef. 4:29) Beto lenda kukiyuvusa: ‘Munu ketulaka bampangi yina kele na nsatu ya kukuela mbamba? Kana munu memona mpangi mosi ya bakala yina kele mpupa kena kusolola na mpangi mosi ya nketo yina kele mpupa, munu kekanisaka ti bakena kuzolana?’ (1 Tim. 5:13) Katula yau, beto fueti sala ata fioti ve ti Baklisto yina kele bampupa kukimona ti bakena kukondua kima lokola bakele ya kukuela ve. Hans yina beto tubilaka na zulu metuba: “Bampangi yankaka ketubaka, ‘Samu na yinki nge kena kukuela ve? Nge kele diaka ve muana fioti.’ Bampova ya mutindu yina kesalaka ti bampupa kukimona ti bakesepelaka na bau ve mpe bakekukimonaka ti bakena kubuela bau mbamba ya kukuela.” Yakevuanda mbote kuluta kana beto kena kusosa maluaku ya kupesa bafelisitasion na Baklisto yina kele bampupa!—1 Bate. 5:11.
15. (a) Na kutadila bansikudukusu yina kele na Baroma 15:2, yinki beto fueti tadila tekila beto sadisa muntu mosi yandi mona nkuelani yina mebonga na yandi? (Tala diaka foto.) (b) Yinki malongi ya mfunu nge mebaka na video?
15 Yinki nge kesala kana nge mekanisa ti mpangi mosi ya bakala mpe mpangi mosi ya nketo lenda sala dikuela mosi ya mbote? Biblia metubila beto ti beto fueti zitisa banguilu ya bantu yankaka. (Tanga Baroma 15:2.) Bampangi mingi yina kele bampupa kezolaka ve bamonisa bau muntu yina lenda vuanda nkuelani ya mbote, mpe beto fueti zitisa makanisi na bau. (2 Bate. 3:11) Bantu yankaka lenda vuanda na nsatu beto sadisa bau, kasi beto fueti sosa ve kupesa lusadusu kana balomba beto yau ve.f (Bing. 3:27) Bampupa yankaka kesepelaka ve basala bau mutindu yina. Lydia, mpangi mosi yina kele mpupa yina kezingaka na buala ya Allemagne, metuba: “Nge lenda bokidisa mpangi mosi ya nketo mpe mpangi mosi ya bakala na grupe mosi ya bantu mingi. Sosa kaka diluaku samu mpangi ya bakala mpe mpangi ya nketo kutana mpe bika bau babaka nzengolo na mambu yina bakesala bau mosi.”
Grupe mosi ya bantu yina mepesa Baklisto yina kele bampupa diluaku ya kukutana (Tala paragrafe 15)
16. Yinki mambu Baklisto yina kele bampupa fueti zimbakana ve?
16 Beto nionso—yavuanda beto kele mpupa to ya kukuela—beto lenda vuanda na luzingu ya kiese! (Nk. 128:1) Na yau kana nge kele na nsatu ya kukuela kasi nge baka ntete ve muntu, tatamana kutula makanisi na kisalu na nge samu na Yehova. Mpangi mosi ya nketo na nkumbu ya Sin Yi yina kezingaka na Macao metuba: “Ntangu yina nge kena kuzinga lokola mpupa kele mpenza nkufi, nge meka fuanikisa yau na ntangu yina nge lenda lutisa na nkuelani na nge na Paradiso. Sepela na ntangu yango mpe sadila yau na mutindu ya mbote.” Kasi yinki nge kesala kana nge bakaka muntu ya mbote mpe beno bandaka kuzolana? Na disolo kelanda beto ketubila yinki mutindu beto lenda lutisa ntangu ya kuzolana ya mbote.
MUYIMBU 137 Basi ya sembo, basi bakristo
a Samu na kusadisa nge nge zaba kana nge kele ya kubongama samu na kukuela to ve, tala disolo “Komibongisa mpo na libala—Eteni 1: Nakoki kolingana na moto?” na jw.org
b MPOVA YINA BAMESASILA: Na disolo yayi mpe yina kelanda, “kuzolana” (fréquentations) zola monisa ntangu yina bakala mpe nketo kelutisaka samu na kuzabana mbote kuluta samu na kuzaba kana bamebonga samu na kukuelana. Na babuala yankaka balenda sadila yau samu na kutubila kusosa kuzaba muntu mbote samu na kukuelana. Kuzolana kebandaka ntangu bakala mpe nketo metubana puelele ti bamezolana, mpe nguizani yango ketatamanaka tii bakebaka nzengolo ya kukuelana to tii bakezenga nzola yango.
c Na mutindu ya pete, na baparagrafe melanda, beto ketubila nkuelani yina mebonga samu na kutubila mpangi ya bakala. Kasi, bansikudukusu yango metadila mpe bampangi ya banketo.
d Beto mepesa bau bankumbu yankaka.
e Na babuala yankaka, mbala mingi mpangi ya bakala nde kekuendaka kuta mpangi ya nketo samu babanda kuzolana. Kasi, mpangi ya nketo mpe lenda pona kukuenda samu na kukutana na mpangi ya bakala. (Ruti 3:1-13) Samu na kuzaba mambu yankaka tala disolo, “Les jeunes s’interrogent . . . Comment lui dire ce que je ressens pour lui?” na Réveillez-Vous! ya 22 octobre 2004.
f Tala na jw.org video Ils réussissent à « livrer un dur combat pour la foi » : Ceux qui sont célibataires.