“Beno pona beno mosi . . . nani beno kesadila”

1. Yinki mambu beto fueti sala samu beto vuanda na kiese ya kedika, mpe samu na yinki? (Yisaya 48:17, 18)

TATA na beto ya dizulu kezolaka beto mingi mpenza, mpe yandi zola ti beto sepela na luzingu bubu yayi mpe na bilumbu kena kuiza. (Mos. 3:12, 13) Yandi salaka beto na makoki ya kukamua, kasi yandi pesaka beto ve makoki ya kukituadisa to ya kupona beto mosi mambu yina kele mbote to yina kele yimbi. (Mos. 8:9; Yir. 10:23) Yandi mezaba ti samu beto vuanda na kiese ya kedika, beto fueti sadila yandi mpe kuzinga na kuzitisaka bansikudukusu na yandi.​—Tanga Yisaya 48:17, 18.

2. Yinki mambu Satana kezolaka ti beto kukindimisa na yau, mpe yinki mutindu Yehova pesaka mvutu na bampova na yandi ya luvunu?

² Satana kezolaka beto kukindimisa ti beto lenda vuanda na kiese kondua lusadusu ya Yehova, beto kukindimisa ti bantu lenda nunga kukituadisa bau mosi. (Eba. 3:4, 5) Yehova pesaka mvutu na bampova yango ya luvunu na kubikilaka bantu nzila bakukituadisa bau mosi samu na mua ntangu. Yakena kumonana puelele ti luyalu ya bantu nunga ve. Na ndambu yankaka, Biblia mefuluka na bifuani ya babakala mpe ya banketo yina vuandaka na kiese samu bavuandaka sadila Yehova. Yesu Klisto vuandaka muntu yina vuandaka na kiese mingi kuluta kati na bau nionso. Na disolo yayi, beto kelonguka samu na yinki Yesu ponaka kusadila Yehova. Na manima, beto ketadila samu na yinki yamebonga beto sambila Tata na beto ya dizulu. Na nsuka, beto ketadila diaka ndambu ya bamfunu yina ketindaka beto beto pona kusadila Yehova.

SAMU NA YINKI YESU PONAKA KUSADILA YEHOVA?

3. Yinki Satana tubaka ti yandi kepesa Yesu, mpe nani Yesu ponaka kusadila?

³ Ntangu yandi vuandaka na ntoto, yalombaka Yesu pona nani yandi kesadila. Ntangu fioti na manima ya mbotama ya Yesu, Satana tubilaka yandi ti yandi kepesa yandi bimfumu nionso ya yinza kana Yesu mesadila yandi kaka diambu mosi ya nsambudulu. Yesu tubaka: “Katuka, Satana! Samu yamesonamaka ti: ‘Nge fueti sambila nde Yehova Nzambi na nge, mpe kaka yandi nde nge fueti sadila kisalu ya nlongo.’” (Mat. 4:8-10) Samu na yinki Yesu ponaka kusadila Yehova? Beto tadila mua bamfunu yango.

4-5. Yinki kele mua bamfunu yina tindaka Yesu na kupona kusadila Yehova?

⁴ Mfunu ya ntete yina tindaka Yesu na kupona kusadila Yehova kele nzola​—Yesu vuandaka na nzola ya mpinda mpe ya kedika samu na Tata na yandi. (Yoa. 14:31) Katula yau, Yesu kesadilaka Yehova samu yakele diambu ya mbote ya kusala. (Yoa. 8:28, 29; Em. 4:11) Yandi mezaba ti Yehova kele Yinto ya luzingu, yamebonga kutudila Yandi ntima mpe yandi kekabaka na nzola nionso. (Nz. 33:4; 36:9; Yak. 1:17) Yehova vuandaka tuba ntangu nionso kedika na Yesu mpe Yehova nde pesaka Yesu bima nionso yina yandi kele na yau. (Yoa. 1:14) Nzokande, Satana nde bimisaka lufua. Yandi kele muntu ya luvunu yina mefuluka na kinzuna mpe yandi kesosaka kaka mambote na yandi mosi. (Yoa. 8:44) Lokola Yesu zabaka mambu yango, yandi zolaka ata fioti ve kulanda Satana na kutombokilaka Yehova.​—Flp. 2:5-8.

⁵ Mfunu yankaka yina tindaka Yesu na kupona kusadila Yehova kele samu yandi vuandaka vingila na nsatu ya ngolo mambu yina kisalu na yandi ya kukuikama kekokisa na bilumbu kena kuiza. (Ebr. 12:2) Yandi zabaka ti kana yandi mebikana ya kukuikama, yandi kesantisa nkumbu ya Tata na yandi mpe yandi kesala ti mambu nionso ya mpasi yina Diabulu bimisaka manisa.

SAMU NA YINKI YAMEBONGA BETO SAMBILA YEHOVA?

6-7. Samu na yinki bantu mingi bubu yayi kesadilaka ve Yehova, kasi samu na yinki yamebonga beto sambila yandi?

⁶ Bantu mingi bubu yayi kesadilaka ve Yehova samu bazaba ntete ve bikadulu na yandi ya kitoko mpe bazaba ve mambu nionso yina yandi mesalaka samu na bau. Yavuandaka mpe mutindu yina samu na bantu yina ntumua Paulo samuninaka na Atene.​—Mis. 17:19, 20, 30, 34.

⁷ Paulo sasilaka bantu yina vuandaka kuwa yandi ti Nzambi ya kedika “kepesaka bantu nionso mpema, luzingu mpe bima nionso.” Yandi buelaka: “Na nzila na yandi nde beto kele na luzingu mpe beto ketambulaka mpe beto kele.” Nzambi kele Mvangi, muntu yina “na nzila ya muntu mosi mebimisa makanda nionso ya bantu,” na yau yamebonga beto sambila yandi.​—Mis. 17:25, 26, 28.

8. Yinki diambu Yehova kesala ata fioti ve? Sasila.

⁸ Lokola yandi kele Mvangi mpe Mfumu ya luyalanganu ya mvimba, Yehova lendaka tinda bantu na kingolo samu basadila yandi. Kasi, Yehova kesala yau ata fioti ve. Kutu, yandi kepesaka beto bidimbu yina kemonisaka ti yandi kele muntu ya kedika mpe yandi kezolaka mingi mpenza mosimosi kati na beto. Yandi kezolaka ti bantu mingi mpenza kuma bankundi na yandi samu na mvimbamvimba. (1 Tim. 2:3, 4) Yakele samu na yau nde Yehova kepesaka beto formasion samu na kulonga bantu yankaka balukanu na yandi mpe kutubila bau mambu ya mbote yina yandi kesala samu na bantu. (Mat. 10:11-13; 28:19, 20) Yandi mekabulaka beto na bimvuka mpe yandi mebakaka bankubukulu samu bankengi ya nzola tanina beto.​—Mis. 20:28.

9. Yinki mutindu nzola ya Yehova kemonanaka puelele?

⁹ Nzola ya kukamua ya Yehova kemonanaka puelele na mutindu yandi kesalaka mambu samu na bantu yina kemangaka kundima ti yandi kele. Kanisa na diambu yayi: Samu na mafunda ya bamvula, bamiliare ya bantu meponaka kuzinga na kuponaka bau mosi mambu yina kele mbote mpe yina kele yimbi. Atako plina, Yehova kepesaka bau na nzola nionso bima yina bakele na yau nsatu samu bazinga mpe basepela na luzingu. (Mat. 5:44, 45; Mis. 14:16, 17) Yandi mepesaka bau dikoki ya kuvuanda na bankundi, dibuta yina kezolaka bau, bana, mpe balenda baka n’sendo samu na kisalu na bau ya ngolo. (Nz. 127:3; Mos. 2:24) Mambu yango memonisa puelele ti Tata na beto ya dizulu kezolaka bantu nionso. (Kob. 34:6) Beto tadila ntangu yayi samu na yinki beto keponaka kusadila Yehova mpe mutindu yandi kesakumunaka beto.

SAMU NA YINKI BETO KEPONAKA KUSADILA YEHOVA?

10. (a) Yinki kele mfunu ya ntete yina ketindaka beto na kusadila Yehova? (Matai 22:37) (b) Yinki mutindu nge bakaka mambote na ntima yinda ya Yehova? (Nzembo 103:13, 14)

¹⁰ Mutindu mosi na Yesu, beto kesadilaka Yehova ntetentete samu beto kezolaka Yandi mingi mpenza. (Tanga Matai 22:37.) Beto kekukimonaka penepene ya Yehova ntangu beto kelongukaka bikadulu na yandi. Na kifuani, beto tubila ntima yinda yina Yehova kemonisinaka beto. Ntangu Bayisaele mangaka kuzitisa Yehova, yandi lombaka bau: “Beno balula ntima, beno bika ndiatulu na beno ya yimbi.” (Yir. 18:11) Yehova kezabaka ti beto kele bantu ya kukondua kukoka, mpe beto kele fundufundu. (Tanga Nzembo 103:13, 14.) Ntangu nge keyindulaka na mpinda na ntima yinda ya Yehova mpe na bikadulu na yandi yankaka ya kitoko, yaketindaka nge ve na kusadila yandi samu na mvimbamvimba?

11. Yinki kele mua bamfunu yankaka yina ketindaka beto na kupona kusadila Tata na beto ya dizulu?

¹¹ Beto kesadilaka diaka Yehova samu beto mezaba ti yakele diambu ya mbote ya kusala. (Mat. 4:10) Diambu ya mfunu kuluta, beto mezaba diambu yina kisalu na beto ya kukuikama kekokisaka. Kukuikama na beto kesalaka ti beto santisa nkumbu ya Yehova, beto monisa ti Diabulu kele muntu ya luvunu, mpe beto sepedisa ntima ya Tata na beto. Mpe kana beto mepona kusadila Yehova bubu yayi, beto kevuanda na kivuvu ya kusadila yandi samu na mvimbamvimba!​—Yoa. 17:3.

12-13. Yinki malongi beto mebaka na disolo ya Jane mpe Pam?

¹² Ata ntangu beto kele ntete bantuenia mpenza, beto lenda kudisa nzola ya mpinda samu na Yehova, nzola yina ketatamana kukuma ngolo ntangu beto kena kukula. Beto tadila diambu yina kuminaka mpangi ya nketo Jane mpe Pam.a Jane vuandaka na bamvula 11 mpe Pam bamvula 10 ntangu babandaka kulonguka Biblia. Atako bibuti na bau vuandaka sepela ve kulonguka Biblia, bapesaka Jane mpe Pam yinsua ya kulonguka na Bambangi ya Yehova kana baketatamana kukuenda na eglize kintuadi na dibuta na bau. Jane metuba: “Mambu yina Bambangi ya Yehova vuandaka longa munu na nzila ya Biblia, sadisaka munu munu telemina mbamba yina bana kalasi na beto vuandaka tula munu samu munu kunua badrogi mpe munu sala pite.”

¹³ Mua bamvula na manima, bantuenia yango ya banketo kumaka bansamuni. Na manima, babandaka kisalu ya mpasudi nzila atako bavuandaka tanina bibuti na bau yina kumaka biboba. Na kukanisaka na mambu yango, Jane metuba: “Munu longukaka ti Yehova kekokisaka na kukuikama nionso bansatu ya bankundi na yandi, mpe mutindu 2 Timote 2:19 metuba yau, ‘Yehova mezaba bantu na yandi.’” Ntembe kele ve ti Yehova kekokisaka bansatu ya bantu yina keponaka kuzola mpe kusadila yandi!

14. Yinki mutindu beto lenda kotila Yehova? (Tala diaka bafoto.)

¹⁴ Beto kezolaka ti bantu yankaka zaba kedika samu na Yehova. Beto tadila kifuani yayi: Kanisa ti nge kele na nkundi mosi ya ntima, yina kele na kimpombo, yina kekabaka, mpe yina kenlemvukilaka. Kasi kilumbu mosi nge mekuwa muntu mosi kena kutuba ti nkundi na nge kele muntu ya kinkesi mpe ya kukondua kukuikama. Yinki nge kesala? Nge kekotila yandi. Mutindu mosi, ntangu bantu ketubaka mambu ya yimbi samu na Yehova, beto kekotilaka Yandi na kutubaka kedika samu na Yandi. (Nz. 34:1; Yis. 43:10) Beto kemonisaka ti beto kezolaka kusadila Yehova na muela na beto ya mvimba na bampova mpe na bisalu na beto.

15. Yinki mambote ntumua Paulo bakaka na kusobaka balukanu ya luzingu na yandi? (Bafilipi 3:7, 8)

¹⁵ Beto kevuandaka pene ya kusoba balukanu na beto ya luzingu samu beto sepedisa Yehova mpe beto sala mingi na kisalu na yandi. Na kifuani, ntumua Paulo ponaka kubika kisika ya lokumu yina yandi vuandaka na yau na dibundu ya Bayuda samu na kulanda Klisto mpe kusadila Yehova. (Gal. 1:14) Yasalaka ti yandi vuanda na luzingu yina mefuluka na balusakumunu mpe yandi baka diluaku ya kuyala kintuadi na Klisto na dizulu. Yandi salaka nionga ata fioti ve samu na nzengolo na yandi ya kusadila Yehova, mpe beto diaka beto kesala nionga ata fioti ve.​—Tanga Bafilipi 3:7, 8.

16. Yinki malongi beto mebaka na disolo ya Julia? (Tala diaka bafoto.)

¹⁶ Kana beto metula kisalu na beto samu na Yehova na kisika ya ntete na luzingu na beto, yandi kesakumuna beto bubu yayi mpe na bilumbu kena kuiza. Beto tadila kifuani ya mpangi ya nketo Julia. Tekila Julia longuka kedika, yandi vuandaka yimbila na korale ya dibundu na bau ntangu yandi vuandaka ntuenia. Muntu mosi yina mezaba mbote mambu ya miziki ya opera monaka ti Julia mezaba kuyimbila mpe yandi bandaka kupesa yandi formasion. Yazingilaka ve, Julia zabanaka mingi mpe yandi bandaka kuyimbila na bisika ya lokumu. Ntangu yandi vuandaka na ekole mosi ya miziki ya kuzabana, muana kalasi na bau mosi bandaka kutubila yandi mambu metadila Nzambi mpe yandi sasilaka yandi ti nkumbu ya Nzambi kele Yehova. Ntangu fioti na manima, Julia bandaka kulonguka Biblia mbala zole na sabala. Nsukansuka, yandi bakaka nzengolo ya kupesa ntangu mpe ngolo na yandi na kisalu ya Yehova na kisika ya kuvuanda n’yimbidi ya opera. Yavuandaka nzengolo mosi ya mpasi. Yandi metuba: “Bantu mingi vuandaka tubila munu ti munu vuandaka bebisa dikabu na munu, kasi munu vuandaka na nsatu ya kusadila luzingu na munu ya mvimba na kisalu ya Yehova.” Yinki mutindu yandi kena kukimona samu na nzengolo yina yandi bakaka yameluta bamvula kuluta 30? Yandi mebuela: “Munu kele na kiyenge na makanisi, mpe munu ketulaka ntima ti Yehova kekokisa bansatu nionso ya ntima na munu na bilumbu kena kuiza.”​—Nz. 145:16.

TATAMANA KUSADILA YEHOVA

17. Yinki mutindu kuzaba ti beto kena kuzinga na bilumbu ya nsuka mpenza kevuandaka na bupusi na bantu yina ponaka kusadila Nzambi, mpe na bantu yina pona ntete ve kusadila yandi?

¹⁷ Beto kena kuzinga na bilumbu ya nsuka mpenza. Ntumua Paulo sonikaka: “Samu yamebikana ‘mua ntangu fioti mpenza,’ mpe ‘muntu yina kena kuiza kekuiza mpe yandi kezingila ve.’” (Ebr. 10:37) Yinki mutindu diambu yango metadila beto? Ntangu mebikana fioti samu bantu pona kusadila Yehova. (1 Ko. 7:29) Mpe kana beto meponaka deja kusadila Nzambi, beto mezaba ti ata kana yakelomba beto kanga ntima na banzomono, yakevuanda kaka samu na “mua ntangu fioti mpenza.”

18. Yinki Yesu mpe Yehova kekindisaka beto beto sala?

¹⁸ Yesu kindisaka banlonguki na yandi basuka kaka ve na kulanda yandi kasi diaka batatamana kulanda yandi. (Mat. 16:24) Na yau, kana beto kesadilaka Yehova banda bamvula mingi, bika beto vuanda na nzengolo ya kubika ve. Beto fueti sala ngolo samu beto tatamana kuzinga na nguizani na nzengolo na beto ya kusadila Yehova. Yalenda vuanda mpasi, kasi beto lenda vuanda na kiese mpe kubaka balusakumunu mingi na kusadilaka yandi, banda bubu yayi!​—Nz. 35:27.

19. Yinki malongi beto mebaka na disolo ya Gene?

¹⁹ Bantu yankaka kekanisaka ti kana bamepona kusadila Yehova, bakevuanda ve na dikoki ya kusepela na luzingu. Kana nge kele ntuenia, nge kekanisaka ti nge kekondua kima mosi kana nge mepona kusadila Yehova? Gene, mpangi mosi ya ntuenia ya bakala metuba: “Munu vuandaka mona ti kuvuanda Mbangi ya Yehova vuandaka pekisa munu kusala mambu mingi. Yavuandaka monana lokola bana mingi yina munu yundukaka na bau vuandaka sepela na mambu lokola kusala bafeti, kuzolana, kubula bansaka ya video ya kinkesi, ntangu munu vuandaka kuenda na balukutakanu mpe kusamuna.” Yinki mutindu makanisi yango vuandaka na bupusi ya yimbi na Gene? Yandi metuba: “Munu bandaka kusala mambu yankaka ya yimbi yina bantuenia yankaka vuandaka sala, mpe yavuandaka sepedisa munu samu na mua ntangu. Kasi yavuandaka natina munu ve kiese ya kedika. Munu bandaka kukanisa na mambote ya kuzitisa malongi ya Biblia mpe munu bakaka nzengolo ya kusadila Yehova na ntima na munu ya mvimba. Banda ntangu yango, yamemonana lokola Yehova pesaka mvutu na mosimosi ya bisambu na munu.”

20. Yinki fueti vuanda nzengolo na beto?

²⁰ Nsoniki mosi ya nkunga yimbilaka samu na Yehova ti: “Kiese na muntu yina nge mepona mpe nge mebenda samu yandi vuanda na mapangu na nge.” (Nz. 65:4) Bika beto vuanda na nzengolo mutindu mosi na Yosua yina tubaka: “Samu na munu mpe dibuta na munu, beto kesadila Yehova.”​—Yos. 24:15.