DISOLO YA NDONGOKOLO 15
MUYIMBU 30 Tata na ngai, Nzambe na ngai, mpe moninga na ngai
‘Kupusana penepene ya Nzambi kele mbote’ samu na beto!
‘Samu na munu, kupusana penepene ya Nzambi kele mbote.’—NZ. 73:28.
MAMBU YINA BETO KELONGUKA
Beto kelonguka mutindu beto lenda pusana penepene ya Yehova mpe mambote yina beto kebakaka na kusalaka yau.
1-2. (a) Yinki bangolo yakelombaka samu na kukudisa kinkundi ya ngolo na muntu? (b) Yinki beto ketubila na disolo yayi?
NGE kevuandaka na nkundi mosi ya ntima? Yinki mutindu nge kudisaka kinkundi na nge na yandi? Kondua ntembe nge vuandaka lutisa ntangu kintuadi na yandi, nge vuandaka zaba mitungisi na yandi, mpe nge longukaka mambu yina yandi kezolaka mpe mambu yina yandi keyinaka. Nge monaka bikadulu na yandi ya kitoko yina nge kesepela kulanda. Mpe nge bandaka kuzola nkundi na nge.
2 Kukudisa kinkundi ya ngolo na muntu kelombaka ntangu mpe bangolo. Yakele mpe mutindu mosi samu na kukudisa nguizani ya penepene mpe ya ngolo na Yehova Nzambi. Na disolo yayi beto ketubila mutindu beto lenda pusana penepene ya Nzambi na beto mpe mambote yina beto kebakaka na kusalaka yau. Ntetentete, beto tadila samu na yinki yakele mbote kupusana penepene ya Nkundi na beto yina meluta mbote, Yehova.
3. Samu na yinki beto fueti yindula na mpinda na mambote yina beto kebakaka na kupusanaka penepene ya Yehova? Pesa kifuani.
3 Kondua ntembe nge kendimaka ti kupusana penepene ya Yehova kele mbote. Kasi kuyindula na mpinda mutindu yakele mpenza mbote kusala yau lenda kindisa beto beto tatamana kupusana penepene na yandi. (Nz. 63:6-8) Na kifuani, kudia madia ya mbote, kusala bangalasisi, kupema mbote, mpe kunua maza mingi kevuandaka mbote samu na beto. Kasi, bantu mingi ketudilaka ve mambu yango dikebi, mpe baketaninaka ve mavimpi na bau. Nzokande, kana beto kena kukanisa mingi na mambote ya kusala mambu yango, kondua ntembe beto kevuanda na nsatu ya ngolo ya kusadila yau. Mutindu mosi, beto lenda zaba ti kupusana penepene ya Yehova kele mbote samu na beto, kasi kuyindula na mpinda na mambote yina beto kebakaka na kusalaka yau lenda kindisa beto na kutatamana kupusana penepene ya Nkundi na beto.—Nz. 119:27-30.
4. Mutindu Nzembo 73:28 memonisa yau, yinki nsoniki ya nkunga tubaka?
4 Tanga Nzembo 73:28. Nsoniki ya Nzembo 73 vuandaka Mulevi yina ponamaka samu na kusala lokola muntu yina kebulaka miziki na tempelo ya Yehova. Kondua ntembe yandi vuandaka sambila Yehova na kukuikama banda bamvula mingi. Kasi, yandi vuandaka kaka na nsatu ya kukibambula yandi mosi mpe ya kubambula bantu yankaka ti ‘kupusana penepene ya Nzambi’ vuandaka mbote samu na yandi mpe samu na bau. Yinki kele mua mambote ya kupusana penepene ya Nzambi?
‘KUPUSANA PENEPENE YA NZAMBI’ KENATAKA KIESE
5. (a) Samu na yinki kupusana penepene ya Yehova kenatinaka beto kiese? (b) Na kutadila Masese 2:6-16, pesa bifuani ya sikisiki ya mutindu nduenga ya Yehova kesadisaka mpe ketaninaka nge.
5 Kana beto kena kupusana mingi penepene ya Yehova, beto kevuanda mpe na kiese mingi. (Nz. 65:4) Yakele mutindu yina samu na bamfunu mingi. Na kifuani, beto kebakaka mambote na kusadilaka malongi ya nduenga yina kele na Mpova na yandi Biblia. Malongi yango ya nduenga ketaninaka beto na bupusi ya yimbi mpe na banzimbala ya nene. (Tanga Masese 2:6-16.) Yakele samu na yau nde Biblia metuba: “Kiese na muntu yina mebaka nduenga mpe na muntu yina kena kubaka lusuasukusu.”—Mas. 3:13.
6. Yinki salaka ti nsoniki ya nkunga zimbisa kiese na yandi?
6 Ya kedika, ata bankundi ya Yehova lenda vuanda na kiadi na bantangu yankaka. Nsoniki ya Nzembo 73 zimbisaka kiese na yandi ntangu yandi kumaka na makanisi ya yimbi. Yandi lembaka nzutu mpe yandi kumaka na kimpala samu yandi kumaka kanisa ti bantu ya yimbi yina vuandaka zitisa ve Nzambi to bansikudukusu na Yandi vuandaka na luzingu ya mbote. Yandi vuandaka kanisa ti bantu yango ya kinkesi mpe ya lulendo vuandaka ntangu nionso na kimvuama, na mavimpi ya mbote, mpe bavuandaka ata kuniokuama ve. (Nz. 73:3-7, 12) Nsoniki yango ya nkunga kukitungisaka mingi mpenza, na yau yandi kukiyuvusaka kana bangolo na yandi samu na kusadila Yehova vuandaka na mfunu. Na kiadi na yandi, yandi tubaka: “Ya kedika mpenza, munu mevedisa ntima na munu kaka mpamba mpe munu mesukula maboko na munu kaka mpamba samu na kumonisa ti munu sala ve yimbi.”—Nz. 73:13.
7. Yinki beto fueti sala ntangu beto kele na kiadi? (Tala diaka na kuvertire.)
7 Atako nsoniki yango ya nkunga vuandaka na kiadi ya ngolo, yandi salaka diambu mosi samu na kusoba makanisi na yandi. Yandi “kotaka na kisika ya nlongo ya nene ya Nzambi,” kuna Yehova sembaka makanisi na yandi. (Nz. 73:17-19) Ntangu beto kele na kiadi, Yehova, Nkundi na beto yina meluta mbote kezabaka yau. Kana beto melomba yandi lutuadusu mpe beto mendima lusadusu yina yandi kepesaka na nzila ya Mpova na yandi mpe na nzila ya kimvuka, beto kebaka ngolo samu beto tatamana kusadila yandi ata ntangu beto kele na kiadi. Ata ntangu beto kele na mitungisi mingi, Yehova kebomba beto mpe yandi kepesa beto kiyenge.—Nz. 94:19.a
Mulevi yina sonikaka Nzembo 73, metelema na “kisika ya nlongo ya nene ya Nzambi” (Tala paragrafe 7)
‘KUPUSANA PENEPENE YA NZAMBI’ KEPESAKA BETO LUZINGU YA MBOTE MPE KIVUVU
8. Na yinki mitindu yankaka ya mfunu kupusana penepene ya Nzambi kele mbote samu na beto?
8 Kupusana penepene ya Nzambi kele diaka mbote samu na beto na mitindu zole yankaka ya mfunu. Ya ntete, yakepesaka beto luzingu ya mbote bubu yayi. Ya zole, yakepesaka beto kivuvu ya ngolo samu na bilumbu kena kuiza. (Yir. 29:11) Beto tadila mbotembote mambote yango.
9. Yinki mutindu kupusana penepene ya Yehova kepesaka beto luzingu ya mbote?
9 Kupusana penepene ya Yehova kepesaka beto luzingu ya mbote. Bubu yayi, bantu mingi yina kendimaka ve ti Nzambi kele kekanisaka ti luzingu kele ve na mfunu mpe nsukansuka bantu kelemba kuzinga. Kasi, na nzila ya ndongokolo na beto ya Mpova ya Nzambi, beto ndimaka ti Nzambi “kele mpe yandi kekumaka muntu yina kepesaka n’sendo na bantu yina kena kusosa yandi na nsatu ya ngolo.” (Ebr. 11:6) Diaka, Yehova salaka beto na nsatu ya kusadila yandi. Na yau, ntangu beto kesadilaka yandi beto kebakaka kiese ya kedika.—Mib. 10:12, 13.
10. Yinki Yehova melaka na bantu yina ketudilaka yandi ntima? (Nzembo 37:29)
10 Samu na bantu mingi, kivuvu na bau mesuka kaka na luzingu yayi, yazola tuba, kukuenda na kisalu, kubuta bana, mpe kukibongisa samu na ntangu yina bakevuanda diaka ve na dikoki ya kusala kisalu. Bazaba ve mambu yina Nzambi melaka samu na bilumbu kena kuiza. Na ndambu yankaka, bisadi ya Yehova ketulaka kivuvu na bau na yandi. (Nz. 25:3-5; 1 Tim. 6:17) Beto ketulaka ntima na Nzambi yina beto kepusanaka penepene na yandi, mpe beto ketulaka ntima na mambu yina yandi melaka beto. Mosi ya bansilulu yango kele kivuvu ya kusambila yandi samu na mvimbamvimba na Paradiso.—Tanga Nzembo 37:29.
11. Yinki mambote yankaka beto kebakaka na kupusanaka penepene ya Nzambi, mpe yinki mutindu yakesalaka yandi?
11 Kupusana penepene ya Nzambi kele mbote samu na beto na mitindu mingi yankaka. Na kifuani, Yehova melaka kunlemvukila masumu ya bantu yina mebalula ntima yina mepusana penepene na yandi. (Yis. 1:18) Na yau, beto ketatamanaka ve kukitungisa samu na masumu yina beto mesalaka na ntama. (Nz. 32:1-5) Mpe beto kevuandaka na kiese ya kusepedisa Yehova. (Mas. 23:15) Kondua ntembe, nge lenda kanisa na balusakumunu yankaka yina kekatukaka na kuvuandaka na kinkundi ya penepene na Nzambi. Kasi, yinki mutindu nge lenda tatamana kupusana penepene ya Nzambi?
MUTINDU YA KUTATAMANA ‘KUPUSANA PENEPENE YA NZAMBI’
12. Yinki mambu nge salaka samu na kupusana penepene ya Nzambi?
12 Kana nge kele Muklisto yina mebakaka mbotama, nge mesalaka deja mambu mingi samu na kupusana penepene ya Yehova. Nge longukaka bakedika mingi yina metadila Yehova Nzambi mpe Yesu Klisto, nge balulaka ntima na masumu na nge ya ntama, nge monisaka kiminu ya ngolo na Nzambi, mpe nge vuandaka sala bangolo samu na kusala mambu na nguizani na luzolo na yandi. Kasi, samu na kupusana penepene ya Nzambi, beto fueti tatamana kusala mambu yango.—Kol. 2:6.
13. Yinki kele mambu tatu yina lenda sadisa beto samu beto tatamana kupusana penepene ya Yehova?
13 Yinki kesadisa beto samu beto tatamana kupusana penepene ya Yehova? (1) Beto fueti tatamana kutanga mpe kulonguka Biblia. Ntangu beto kena kusala yau, lukanu na beto fueti vuanda kaka ve ya kulonguka bakedika ya fiotifioti yina metadila Nzambi. Kasi, beto fueti sosa kubakusa luzolo na yandi samu na beto mpe kubika ti bansikudukusu na yandi yina kele na Biblia tuadisa beto. (Ef. 5:15-17) (2) Beto fueti kudisa kiminu na beto na kuyindulaka na mpinda na bidimbu mingi ya puelele ya nzola na yandi samu na beto. (3) Beto fueti tatamana kuyina mambu yina kepesaka Yehova mpasi mpe kumanga kusala kinkundi na bantu yina kesalaka mambu ya mutindu yina.—Nz. 1:1; 101:3.
14. Na nguizani na bampova yina kele na 1 Bakorinti 10:31, yinki kele mua mambu yina beto lenda sala konso kilumbu na luzingu na beto samu na kusepedisa Yehova? (Tala diaka bafoto.)
14 Tanga 1 Bakorinti 10:31. Yakele na mfunu mingi ti beto tatamana kusala mambu yina kesepedisaka Yehova. Kasi, beto fueti suka kaka ve na kukuendaka na kisalu ya kusamuna mpe na balukutakanu. Mambu ya mbote yina kesepedisaka Yehova mesangisa diaka mambu yina beto kesalaka konso kilumbu na luzingu na beto. Na kifuani, ntangu beto kevuandaka ya kukuikama na mambu nionso mpe beto kekabilaka bantu yankaka, beto kesepedisaka Yehova. (2 Ko. 8:21; 9:7) Yandi kezolaka diaka ti beto monisa luzitu ya ngolo samu na dikabu ya luzingu. Beto kepusanaka penepene ya Yinto ya luzingu na beto na kuvuandaka na bukatikati na mimeseno na beto ya kudia, ya kunua, mpe na kutaninaka mavimpi na beto na mitindu yankaka yina mebonga. Bangolo nionso yina beto kesalaka ata samu na mambu ya fiotifioti, kesepedisaka Yehova mpe yakesalaka ti beto pusana penepene na yandi.—Luka 16:10.
Kunata ntomabilu na kukenga, kutanina mavimpi na beto na kudiaka madia yina mebonga, mpe kukabila bantu yankaka bima yina beto kele na yau, kele mua mitindu ya kusepedisa Yehova (Tala paragrafe 14)
15. Yinki mutindu Yehova kezolaka beto sadila bantu yankaka mambu?
15 Yehova kele na kimpombo samu na bantu ya lunungu mpe samu na bantu yina mekondua lunungu. (Mat. 5:45) Yandi kelombaka beto beto monisa kimpombo ya mutindu yina samu na bantu yankaka. Na kifuani, beto fueti ‘tubila muntu yimbi ve, beto fueti vuanda ve bantu yina kezonzaka, . . . beto fueti monisina bantu nionso kimpombo.” (Tito 3:2) Na kuzabaka mambu yango, beto kemonaka ve ti bantu yankaka kele mpamba kaka samu bakesambilaka ve Yehova. (2 Tim. 2:23-25) Beto kepusanaka diaka penepene ya Yehova na kuvuandaka ntangu nionso na kimpombo mpe na luzitu na mutindu na beto ya kusadila bantu nionso mambu.
BETO LENDA PUSANA ‘PENEPENE YA NZAMBI’ ATA NTANGU BETO MESALA BANZIMBALA
16. Yinki mutindu nsoniki ya Nzembo 73 bandaka kukimona na manima ya mua ntangu?
16 Kasi, yinki nge lenda sala kana na manima ya mua ntangu, nge mebanda kumona lokola nge bonga ve kubaka nzola ya Yehova? Mutindu beto tubilaka yau, diambu ya mutindu yina kuminaka nsoniki ya Nzembo 73. Yandi tubaka: “Yabikanaka fioti makulu na munu katuka na nzila ya lunungu, yabikanaka fioti bitambi na munu sielumuka.” (Nz. 73:2) Yandi ndimaka ti ‘ntima na yandi lualaka’ mpe yandi “konduaka nduenga” “lokola kibulu” na ntuala ya Yehova. (Nz. 73:21, 22) Kasi, yandi kanisaka ti yandi bongaka ve kubaka nzola Yehova samu na banzimbala na yandi?
17. (a) Ata ntangu yandi lembaka mpenza nzutu, yinki mambu nsoniki ya nkunga salaka? (b) Yinki malongi beto lenda baka na kifuani na yandi? (Tala diaka bafoto.)
17 Kana nsoniki yango ya nkunga monaka lokola Yehova mesundula yandi, banguilu yango vuandaka kaka samu na mua ntangu. Yamemonana lokola ti ata ntangu yandi lembaka mpenza nzutu, yandi zabaka mfunu ya kupusana penepene ya Nzambi, mutindu bampova na yandi memonisa yau: “Kasi ntangu yayi munu kele kintuadi na nge [Yehova] ntangu nionso; nge mesimba diboko na munu ya kibakala. Nge ketuadisaka munu na nduengoso na nge, mpe na manima nge kenata munu tii na nkembo.” (Nz. 73:23, 24) Beto diaka beto fueti lomba Yehova yandi kindisa beto ntangu beto memona ti kiminu na beto melemba to ntangu beto melemba nzutu samu na banzimbala na beto. (Nz. 73:26; 94:18) Ata ntangu beto mesala masumu ya nene beto lenda vutukila Yehova mpe kukindimisa ti yandi “kesepelaka kunlemvukila.” (Nz. 86:5) Yakele na mfunu beto pusana penepene ya Nzambi na beto, mingimingi ntangu beto melemba mpenza nzutu.—Nz. 103:13, 14.
Ntangu beto kena kukimona ya kulemba na kimpeve, beto fueti pusana penepene ya Yehova na kukipesaka mingi na mambu ya kimpeve (Tala paragrafe 17)
‘PUSANA PENEPENE YA NZAMBI’ SAMU NA MVIMBAMVIMBA
18. Samu na yinki beto lenda tatamana kupusana penepene ya Yehova samu na mvimbamvimba?
18 Beto lenda tatamana kupusana penepene ya Yehova samu na mvimbamvimba. Beto kelemba ve kulonguka mambu metadila yandi. Biblia metuba ti banzila ya Yehova, nduenga na yandi, mpe nzayilu na yandi “lenda zabana ve.”—Rom. 11:33.
19. Yinki lukindusu Bankunga yayi mepesa beto?
19 Nzembo 79:13 metuba: ‘Beto bantu na nge mpe mameme ya kisika na nge ya kudikisila mameme matiti, beto kepesa nge matondo samu na mvimbamvimba; mpe beto kekumisa nge samu na mvimbamvimba.” Kana nge kena kutatamana kupusana penepene ya Nzambi, nge diaka nge lenda kukindimisa ti nge kebaka balusakumunu ya mvula na mvula mpe kutuba na kivuvu nionso ti: “Nzambi kele dibanga ya ntima na munu mpe kitini na munu samu na mvimbamvimba.”—Nz. 73:26.
MUYIMBU 32 Poná nde Yehova!
a Bantu yankaka yina ketatamanaka kutungisama na makanisi to yina kemonaka kiadi samu na ntangu ya yinda lenda vuanda na nsatu ya lusadusu ya munganga. Samu na kuzaba mambu yankaka, tala Linɔ́ngi ya Mosɛnzɛli, No. 1 2023.