DISOLO YA NDONGOKOLO 30
MUYIMBU 97 Moto akobika nde na Liloba ya Nzambe
Nge lenda baka diaka malongi na malongi ya ebandeli ya Biblia?
“Munu kezolaka ntangu nionso kubambula beno mambu yango, atako beno mezaba yau mpe beno mesiama ngolo na kedika.”—2 PE. 1:12.
MAMBU YINA BETO KELONGUKA
Beto kemona mutindu malongi ya ebandeli ya Biblia lenda sadisa beto, ata kana yameluta bamvula mingi banda beto melongukaka yau samu na mbala ya ntete.
1. Yinki mutindu malongi ya Biblia sobaka luzingu na nge ntangu nge longukaka yau samu na mbala ya ntete?
MALONGI ya ebandeli ya Biblia sobaka luzingu na beto. Na kifuani, ntangu beto longukaka ti nkumbu ya Nzambi kele Yehova, beto bandaka kupusana penepene na yandi. (Yis. 42:8) Ntangu beto longukaka ti bantu ya kufua kezabaka ata kima mosi ve, beto lembaka kukiyuvusa kana bantu yina beto kezolaka yina mekufuaka keniokuamaka. (Mos. 9:10) Mpe ntangu beto longukaka nsilulu ya Nzambi ya Paradiso awa na ntoto, beto lembaka kukitungisa samu na bilumbu kena kuiza. Beto kukindimisaka ti luzingu na beto kezingila kaka ve samu na bamvula 70 to 80, kasi samu na mvimbamvimba.—Nz. 37:29; 90:10.
2. Yinki mutindu 2 Petro 1:12, 13 memonisa ti ata Baklisto yina kele ya kuyela na kimpeve kebakaka mambote na malongi ya ebandeli ya Biblia?
2 Beto fueti zimbakana ata fioti ve mfunu ya malongi ya ebandeli ya Biblia. Na letre na yandi ya zole, Petelo sonikinaka Baklisto yina vuandaka ya “kusiama ngolo na kedika.” (Tanga 2 Petro 1:12, 13.) Kasi, na ntangu yango, yavuandaka na bantu ya yimbi na kimvuka yina vuandaka sosa kuvukumuna bampangi samu babika kedika. (2 Pe. 2:1-3) Petelo vuandaka na nsatu ya kukindisa bampangi na yandi samu batelemina kivonza yango. Samu na kukindisa bau, yandi bambulaka bau ndambu ya malongi yina bazabaka deja. Malongi yango sadisaka bau samu batatamana kubikana ya kukuikama tii na nsuka.
3. Samu na yinki Baklisto nionso fueti tatamana kukanisa na mpinda na malongi ya ebandeli ya Biblia? Pesa kifuani.
3 Ntangu beto kena kula samu na kukuma Baklisto yina meyela na kimpeve, beto lenda vuanda na dikoki ya kubaka malongi ya yimpa na malongi ya ebandeli ya Biblia. Beto tadila kifuani yayi: Muntu yina mebandaka kulamba ntama mpe muntu yina mebanda kulamba bosi lenda sadila bima ya mutindu mosi ntangu bakena kulamba madia. Na manima ya bamvula, muntu yina mebandaka kulamba ntama lenda longuka mitindu yankaka ya kusadila kaka bima yango ya kulambila samu na kulamba madia ya yimpa ya kitoko. Mutindu mosi, bantu yina kesadilaka Yehova banda bamvula mingi mpe banlonguki ya yimpa ya Biblia lenda tadila malongi ya ebandeli ya Biblia na mitindu ya kusuasana. Kondua ntembe, mambu ya luzingu to biyekua na beto na kisalu ya Yehova mesobaka banda beto mebakaka mbotama. Ntangu beto kekanisaka na malongi ya Biblia yina beto melongukaka ntama, beto kemonaka mitindu ya yimpa yina yalenda sadisila beto bubu yayi. Beto tadila malongi yina Baklisto ya kuyela lenda baka na malongi yayi tatu ya ebandeli ya Biblia.
YEHOVA KELE MVANGI
4. Yinki mutindu kuzaba ti Yehova kele Mvangi sobaka luzingu na beto?
4 “Muntu yina tungaka bima nionso kele Nzambi.” (Ebr. 3:4) Beto mezaba ti Mvangi mosi ya nduenga mpe ya kilendo nde salaka ntoto mpe bisemua nionso yina kezingaka na kati na yau. Yandi salaka beto, na yau yandi mezaba beto mbotembote. Diambu yina meluta mfunu, yandi ketudilaka beto dikebi. Yandi mezaba yina meluta mbote samu na beto. Kuzaba kedika yayi ya pete ti Yehova kele Mvangi, sobaka luzingu na beto na mitindu ya kukamua mpe yasalaka ti luzingu na beto vuanda na mfunu.
5. Yinki kedika lenda sadisa beto samu beto kudisa kumikitisa? (Yisaya 45:9-12)
5 Kuzaba ti Yehova kele Mvangi lenda longa beto diaka ti beto fueti vuanda na kumikitisa. Ntangu Yobi vuandaka tula dikebi mingi na yandi mosi mpe na bantu yankaka, Yehova bambulaka yandi ti Yandi kele Mvangi Nkua-Ngolo-Nionso. (Yobo 38:1-4) Yasadisaka Yobi yandi mona ti mambu nionso yina Nzambi kesalaka kevuandaka ntangu nionso mbote. Na nguizani na diambu yango, mbikudi Yisaya sonikaka na manima: “Ntoto ya ntuma lenda tuba nde na muntu yina kesalaka bamvungu ti: ‘Yinki nge kena kusala?’”—Tanga Yisaya 45:9-12.
6. Yinki ntangu yalenda vuanda na mfunu samu na beto kukanisa na bunene ya nduenga mpe ya kilendo ya Mvangi na beto? (Tala diaka bafoto.)
6 Muklisto yina kesadilaka Yehova banda bamvula mingi lenda banda kutula ntima mingi na makanisi na yandi mosi na kisika ya kutula ntima na Yehova mpe na Mpova na Yandi samu na kubaka lutuadusu. (Yobo 37:23, 24) Kasi yinki kesalama kana mpangi yango mekanisa na mpinda na bunene ya nduenga mpe ya kilendo ya Mvangi na yandi? (Yis. 40:22; 55:8, 9) Kedika yango ya mfunu kesadisa yandi samu yandi tatamana kuvuanda na kumikitisa mpe yandi mona ti makanisi ya Yehova meluta ya yandi.
Yinki lenda sadisa beto samu beto bambuka ti makanisi na beto luta ve makanisi ya Yehova? (Tala paragrafe 6)d
7. Yinki Rahela salaka samu na kundima nsobolo mosi yina nkubukulu ya Yehova salaka?
7 Rahela, yina kezingaka na Slovénie, monaka ti kukanisa na Mvangi na yandi sadisaka yandi samu yandi ndima nsobolo mosi yina nkubukulu ya Yehova salaka. Yandi metuba: “Na bantangu yankaka, yavuandaka pete ve samu na munu kundima banzengolo ya bampangi yina kena kutuadisa. Na kifuani, ntangu munu talaka Lapolo ya Kimvuka ya Ntuadisi No 8 ya 2023, yatungisaka munu na ebandeli kumona mpangi yina kele na mandevu kena kusala diskur. Na yau, munu sambilaka Yehova samu yandi sadisa munu munu mesana na nsobolo yango.” Rahela ndimaka ti lokola Yehova kele Mvangi ya dizulu mpe ntoto, yandi kevuandaka ntangu nionso na dikoki ya kutuadisa nkubukulu na yandi na mutindu ya mbote. Kana nge kena kumona ti yakele mpasi kundima mbakusulu mosi ya yimpa to lutuadusu mosi ya yimpa, samu na yinki ve kukanisa na mpinda na kumikitisa nionso na bunene ya nduenga mpe ya kilendo ya Mvangi na beto?—Rom. 11:33-36.
MFUNU YINA NZAMBI KEBIKAKA NZILA NA BAMPASI
8. Yinki mutindu kuzaba mfunu yina Nzambi kebikaka nzila na bampasi natinaka beto mambote?
8 Samu na yinki Nzambi kebikaka nzila na bampasi? Bantu yankaka yina zaba ve mvutu ya kiuvu yango kefueminaka Nzambi to bakekanisaka ti Nzambi kevuandaka ve! (Mas. 19:3) Kasi, nge longukaka ti disumu ya Adamu mpe kukondua kukoka nde salaka ti bampasi vuanda, kasi Yehova ve. Nge longukaka diaka ti ntima yinda ya Yehova nde kepesaka nzila na bamilion ya bantu bazaba yandi mpe bamona bau mosi mutindu Yandi kemanisa bampasi samu na mvimbamvimba. (2 Pe. 3:9, 15) Kuzaba bakedika yango bombaka nge mpe yasadisaka nge nge pusana penepene ya Yehova.
9. Na yinki bantangu yakevuanda mbote beto kanisa na bamfunu yina Yehova kebikaka nzila na bampasi?
9 Ntangu beto kena kuvingila ti Yehova manisa bampasi, beto fueti vuanda na ntima yinda. Kasi, kana beto to bantu yina beto kezolaka mekutana na mambu ya mpasi, mambu ya kukondua lunungu, to beto mefuila muntu yina beto kezolaka, beto lenda kukiyuvusa samu na yinki Yehova kena kuzingila samu na kumanisa bampasi. (Hab. 1:2, 3) Na bantangu ya mutindu yina, yakevuanda mbote beto kanisa na bamfunu yina Yehova kebikaka nzila ti bantu ya lunungu niokuama ngolo.a (Nz. 34:19) Beto lenda kanisa diaka na lukanu na yandi ya kumanisa bampasi samu na mvimbamvimba.
10. Yinki kebombaka Anne na mpasi ya lufua ya mama na yandi?
10 Kedika na diambu metadila bampasi lenda sadisa beto beto kanga ntima. Anne, yina kezingaka na ile ya Mayotte, na Océan Indien, metuba: “Lufua ya mama na munu yina salamaka yameluta mua bamvula pesaka munu kiadi ya ngolo. Kasi, munu kekukibambulaka mbala na mbala ti Yehova ve nde muntu kebimisaka bampasi. Yandi kele na nsatu ya ngolo ya kumanisa bampasi nionso mpe ya kufutumuna bantu yina beto kezolaka. Kukanisa na mpinda na bakedika yango kepesaka munu kiyenge ya makanisi yina kekindisaka munu.”
11. Yinki mutindu kuzaba bamfunu yina Yehova kebikaka nzila na bampasi lenda sadisa beto beto tatamana kusamuna?
11 Kuzaba bamfunu yina Nzambi kebikaka nzila na bampasi lenda kindisa beto beto tatamana kusamuna. Na manima ya kusasila ti ntima yinda ya Yehova zola monisa luvuluzu samu na bantu yina mebalula ntima, Petelo sonikaka: “Beno kanisa mutindu ya bantu yina beno fueti vuanda, bantu yina kesalaka bisalu na ndiatulu ya nlongo mpe bisalu yina kemonisaka kikadulu ya kukangama na Nzambi.” (2 Pe. 3:11) Kisalu na beto ya kusamuna kele na kati ya ‘bisalu yango yina kemonisaka kikadulu ya kukangama na Nzambi.’ Mutindu mosi na Tata na beto, beto kezolaka bantu. Beto kezolaka ti bazinga na yinza ya yimpa ya lunungu ya Nzambi. Na ntima yinda nionso, Yehova kepesaka bantu ya terituare na beto diluaku ya kusambila yandi. Beto kele na lokumu ya kuvuanda bantu yina kesalaka kintuadi na Nzambi mpe ya kusadisa bantu mingi bazaba yandi tekila nsuka kuiza!—1 Ko. 3:9.
BETO KENA KUZINGA NA “BILUMBU YA NSUKA”
12. Yinki mutindu kuzaba ti beto kena kuzinga na “bilumbu ya nsuka” kenatinaka beto mambote?
12 Biblia metubila na sikisiki mutindu bantu kevuanda na “bilumbu ya nsuka.” (2 Tim. 3:1-5) Kana beto metala nzinganzinga na beto, beto kemona puelele mutindu mbikudulu yango kena kukokisama. Ntangu beto kemonaka mutindu bikadulu ya bantu kena kutatamana kubeba, beto kekukindimisaka mingi kuluta ti Mpova ya Nzambi ketubaka kedika.—2 Tim. 3:13-15.
13. Na nguizani na kifuani ya Yesu yina kele na Luka 12:15-21, yinki biuvu beto lenda kukiyuvusa?
13 Kuzaba ti beto kena kuzinga na bilumbu ya nsuka kesadisaka beto diaka beto tula makanisi na diambu yina meluta mpenza mfunu. Beto lenda mona mfunu ya kusala mutindu yina na kifuani ya Yesu yina kele na Luka 12:15-21. (Tanga.) Samu na yinki babokidilaka bakala yina ya mvuama “zoba”? Yakele ve samu bakala yango vuandaka mvuama, kasi samu yandi vuandaka na balukanu ya yimbi. Yandi lundaka “bima ya ntalu samu na yandi mosi, kasi yandi [vuandaka] ve mvuama na meso ya Nzambi.” Samu na yinki yalombaka yandi sala bansobolo na nsualu? Nzambi tubilaka bakala yango: “Na mpipa yayi bakelomba nge luzingu na nge.” Bubu yayi, lokola nsuka ya yinza yayi kena kupusana, beto lenda kukiyuvusa: ‘Balukanu na munu kemonisaka ti munu ketulaka makanisi na diambu yina meluta mfunu? Munu kesadisaka bana na munu bakukitudila yinki balukanu? Munu kesadilaka ngolo, ntangu, mpe mbongo na munu ntetentete samu na kusosa kimvuama samu na munu mosi to samu na kulunda bima ya ntalu na dizulu?’
14. Mutindu disolo ya Miki memonisa yau, samu na yinki yakele mbote kukanisa na mpinda na mambu yina kena kumonisa ti beto kena kuzinga na bilumbu ya nsuka?
14 Beto lenda soba balukanu na beto ya luzingu kana beto mekanisa na mpinda na mambu yina kena kumonisa ti beto kena kuzinga na bilumbu ya nsuka. Yau nde diambu kuminaka mpangi ya nketo Miki. Yandi metuba: “Ntangu munu bakaka diplome, munu vuandaka na nsatu ya kutanga bakalasi ya yinda samu munu longuka mambu metadila bibulu. Kasi, munu vuandaka diaka na lukanu ya kukuma mpasudi-nzila mpe ya kukuenda sala kisika nsatu ya bansamuni vuandaka mingi. Bankundi ya kuyela na kimpeve luengisaka munu munu kanisa mbote kana munu kele na makoki ya kutanga bakalasi yango mpe kukokisa balukanu na munu ya kimpeve na mbala mosi. Babambulaka munu ti yinza yayi mekuma na nsuka. Babambulaka munu diaka ti na yinza ya yimpa, munu kevuanda na makoki ya kulonguka mambu nionso yina munu zola samu na bibulu samu na mvimbamvimba. Na yau, munu ponaka kusala formasion yina kebaka munu ntangu fioti. Yasadisaka munu munu baka kisalu yina sadisaka munu munu kuma mpasudi-nzila, mpe na manima munu kuenda na Équateur kisika nsatu ya bansamuni vuandaka mingi.” Miki mpe bakala na yandi kesalaka bubu yayi na kisalu ya kizungidila na buala yango.
15. Samu na yinki beto fueti lemba ve kusamunina bantu nsangu ya mbote? Pesa kifuani. (Tala diaka bafoto.)
15 Beto fueti lemba nzutu ve mbala mosi ntangu bantu kena kusepela ve na nsangu ya mbote. Bantu lenda soba. Beto tadila kifuani ya Yakobo mpangi ya Yesu. Yandi monaka mutindu Yesu vuandaka kula, mutindu yandi kumaka Masiya, mpe mutindu yandi vuandaka na makoki ya kulonga kuluta bantu nionso. Kasi, samu na bamvula mingi, Yakobo vuandaka landa ve Yesu. Yandi kumaka nlonguki kaka na manima ya mfutumukunu ya Yesu. Ya kedika, Yakobo kumaka nlonguki mosi ya vema!b (Yoa. 7:5; Gal. 2:9) Yakele na mfunu nge lemba ve kusamunina bampangi na nge ya dibuta yina sepela ntete ve na kedika to kuvutukila bantu yina mangaka ntete kuwa nsangu ya Kimfumu. Kuzimbakana ve ti beto kena kuzinga na bilumbu ya nsuka, na yau yakele na mfunu beto samuna na vema. Mambu yina nge kena kutubila bau bubu yayi lenda sadisa bau ata ntangu mpasi ya nene kebanda.c
Yinki lenda kindisa beto samu beto lemba ve kusamunina bampangi na beto yina kele ve Bambangi ya Yehova? (Tala paragrafe 15)e
TATAMANA KUMONISA BUTONDI NA MAKUNDOLI YA YEHOVA
16. Yinki mambote beto kebakaka na makundoli ya Yehova? (Tala diaka ankadre “Sadila yau samu na kusadisa bantu yankaka.”)
16 Madia yankaka ya kimpeve kebongisamaka samu na bantu yina kuwa ntete ve malongi ya ebandeli ya Biblia. Na kifuani, diskur ya bantu nionso ya nsuka ya sabala, masolo mpe bavideo yankaka yina kele na jw.org, mpe bazulunalo ya bantu nionso, kevuandaka ntetentete samu na bantu yina kele ve Bambangi ya Yehova. Atako plina, beto nionso beto kebakaka mambote na makundoli yango. Yakekudisaka nzola na beto samu na Yehova, yakesalaka ti beto kuma na kiminu ya ngolo na Mpova na yandi, mpe yakesadisaka beto beto kuma banlongisi ya mbote kuluta ya bakedika ya Biblia.—Nz. 19:7.
17. Na yinki ntangu beto lenda kanisa na malongi ya ebandeli ya Biblia?
17 Lokola beto kele Bambangi ya Yehova, beto kevuandaka na kiese ntangu beto kebakaka bambakusulu ya yimpa ya bakedika ya Biblia. Kasi beto kevuandaka diaka na butondi samu na malongi ya ebandeli ya Biblia yina sadisaka beto beto tula kedika na kisika ya ntete. Kana beto mebanda kanisa ti mutindu na beto ya kukanisa to ya kusala mambu kele mbote kulutu lutuadusu yina beto mebaka na nkubukulu ya Yehova, beto fueti kanisa na kumikitisa nionso muntu yina kena kutuadisa nkubukulu yango—Mvangi Nkua-Ngolo-Nionso mpe yina meluta nduenga. Kana beto to muntu mosi yina beto kezolaka kena kukutana na nzomono mosi, beto lenda vuanda na ntima yinda kana beto kena kukanisa na bamfunu yina Yehova mebika nzila na bampasi. Mpe ntangu beto kena kubaka banzengolo ya mutindu beto kesadila ntangu mpe makoki na beto, beto fueti kukibambula ti beto kena kuzinga na bilumbu ya nsuka. Bika ti makundoli ya Yehova tatamana kupesa beto ngolo, lukindusu mpe nduenga.
MUYIMBU 95 Pole ezali kongɛnga se kongɛnga
a Tala disolo “Ntina oyo etikali moke bampasi nyonso esila” na Linɔ́ngi ya Mosɛnzɛli ya 15 mai 2007 p. 21-25.
d BANSASULU YA FOTO: Kimvuka ya bankulutu memanga kusadila makanisi ya nkulutu mosi. Na manima, ntangu nkulutu yango kena kutala bambuetete na dizulu, yandi mekanisa na mpinda na bunene ya nduenga mpe ya kilendo ya Mvangi na yandi mpe yandi mebakusa ti makanisi ya Yehova meluta makanisi na yandi.
e NSASULU YA FOTO: Ntangu yandi kena kusala ndongokolo na yandi ya Biblia, mpangi mosi ya nketo kena kutadila mambu yina kena kumonisa ti beto kena kuzinga na bilumbu ya nsuka. Yametinda yandi yandi bokila mpangi na yandi ya dibuta mpe yandi samunina yandi.