Mutindu Yehova kesadisaka beto samu beto kanga ntima na bampasi

1. Samu na yinki beto fueti vuanda na kikadulu ya kukanga ntima, mpe nani lenda sadisa beto? (1 Petro 5:10)

LOKOLA beto kena kuzinga na bilumbu ya nsuka, beto bisadi ya Yehova beto fueti vuanda na kikadulu ya kukanga ntima. Ndambu kati na beto kele na bamaladi yina kemanisaka ve. Bayankaka kena kuniokuama samu bamefuila muntu mosi yina bakezolaka mingi. Kasi bayankaka kena kukutana na kutelemina ya bantu ya dibuta na bau, to ya baguvernema. (Mat. 10:18, 36, 37) Zaba ti, yavuanda yinki mambu ya mpasi nge kena kukutana na yau, Yehova lenda sadisa nge nge kangila yau ntima.​—Tanga 1 Petro 5:10.

2. Samu na yinki Baklisto kevuandaka na dikoki ya kukanga ntima?

² Kukanga ntima kele dikoki ya kuvibidila mpe ya kutanina kivuvu ntangu muntu kena kukutana na mikakatano, kutelemina, banzomono, to bantotolo. Baklisto kekangaka ve ntima na ngolo na bau mosi, kasi Yehova nde kepesaka bau “kilendo yina meluta ngolo.” (2 Ko. 4:7) Na disolo yayi, beto ketubila mambu yiya yina Yehova mepesaka beto samu na kusadisa beto beto kanga ntima. Beto kemona diaka mutindu beto lenda bakila mosimosi ya mambu yango mambote.

KISAMBU

3. Samu na yinki beto lenda tuba ti kisambu kele kimangu?

³ Yehova mepesaka beto dikabu mosi ya kimangu yina kesadisaka beto beto kanga ntima. Yandi mepesaka beto dikoki ya kusolola na yandi atako beto kele bantu ya masumu. (Ebr. 4:16) Kanisa ntete: Beto lenda sambila Yehova konso ntangu mpe samu na konso diambu. Yandi kekuwaka beto yavuanda beto mesambila yandi na yinki ndinga to na yinki kisika, ata kana beto kele kaka beto mosi, to beto kele na buloko. (Yona 2:1, 2; Mis. 16:25, 26) Ata kana beto kena kukitungisa mingi mpe beto kena kuzaba ve mutindu ya kutubila yandi mitungisi na beto, Yehova kele na dikoki ya kubakusa mambu yina beto zolaka tubila yandi. (Rom. 8:26, 27) Ya kedika, kisambu kele mpenza kimangu!

4. Samu na yinki beto lenda tuba ti kulomba Yehova lusadusu samu na kukanga ntima kele na nguizani na luzolo na yandi?

⁴ Na Biblia, Yehova mendimisa beto ti “yavuanda yinki diambu yina beto kena kulomba na nguizani na luzolo na yandi, yandi kekuwaka beto.” (1 Yoa. 5:14) Beto lenda lomba Yehova lusadusu samu na kukanga ntima? Ee! Kusala plina kele na nguizani na luzolo na yandi. Samu na yinki beto metuba plina? Samu ntangu beto kekangaka ntima na banzomono, beto kepesaka Yehova dikoki ya kupesa mvutu na Satana Diabulu, muntu yina kemekaka yandi. (Mas. 27:11) Katula yau, Biblia metuba ti Yehova kevuandaka mpenza na nsatu ya ‘kumonisa ngolo na yandi samu na mambote ya bantu yina ntima na bau kele ya mvimba na yandi.’ (2 Nt. 16:9) Na yau, beto lenda kukindimisa ti Yehova kele na kilendo mpe na nsatu ya kusadisa beto samu beto kanga ntima.​—Yis. 30:18; 41:10; Luka 11:13.

5. Yinki mutindu kisambu kepesaka beto kiyenge ya makanisi? (Yisaya 26:3)

⁵ Biblia metuba ti, kana beto kena kutubila Yehova mitungisi na beto, ‘kiyenge na Yandi yina meluta makanisi na beto ketanina bantima na beto mpe makanisi na beto.’ (Flp. 4:7) Beto kele na butondi mingi samu na yau. Kana bantu yina kesambilaka ve Yehova mekutana na mikakatano, bakemekaka kusadila mayele ya kusuasana samu na kubaka kiyenge ya makanisi. Na kifuani, bantu yankaka kesosaka kukatula makanisi nionso na yintu na bau samu babaka kiyenge. Kasi, kusala plina kele kivonza na kimpeve. (Fuanikisa na Matai 12:43-45.) Katula yau, kiyenge yina Yehova kepesaka meluta na ntama kiyenge yina bantu lenda baka na kusadilaka mayele ya kusuasana. Ntangu beto kesambilaka Yehova, beto kemonisaka ti beto ketudilaka yandi ntima mpe yandi kepesaka beto “kiyenge ntangu nionso.” (Tanga Yisaya 26:3.) Mosi ya mitindu yina Yehova kepesaka beto kiyenge yango kele na kubambulaka beto baverse yina kebombaka beto. Baverse yango kepesaka beto kiyenge ya makanisi mpe ya ntima, samu beto mezaba ti Yehova kezolaka beto mpe yandi kevuandaka na nsatu ya kusadisa beto.​—Nz. 62:1, 2.

6. Yinki mambu nge lenda tubila na bisambu na nge? (Tala diaka foto.)

⁶ Mambu yina nge lenda sala. Kana nge kena kukutana na mitungisi, “lozila Yehova kizitu na nge ya kilo” mpe lomba yandi kiyenge. (Nz. 55:22) Lomba yandi diaka nduenga samu nge zaba mambu yina nge kesala. (Mas. 2:10, 11) Diaka, na bisambu na nge, kuzimbakana ve kupesa yandi matondo. (Flp. 4:6) Na yau, sosa mambu yina kena kumonisa ti Yehova kena kusadisa nge na banzomono na nge, mpe pesa yandi matondo samu na yau. Kubika ve ti banzomono na nge pekisa nge kumona balusakumunu yina Yehova mepesaka nge deja.​—Nz. 16:5, 6.

MPOVA YA NZAMBI

7. Yinki mutindu Biblia lenda sadisa beto samu beto kanga ntima?

⁷ Yehova mepesaka beto Biblia samu na kusadisa beto beto kanga ntima. Baverse mingi ya Biblia kendimisaka beto ti Yehova kesadisaka beto. Beto tadila kifuani ya Matai 6:8, yina metuba: “Tata na beno mezaba bima yina beno fueti vuanda na yau tekila kutu beno lomba yandi.” Yesu nde muntu tubaka bampova yango mpe yandi mezaba Yehova mbote kuluta bantu nionso. Na yau, beto lenda ndima ti Yehova ketudilaka beto dikebi mpe yandi kevuandaka na nsatu ya kusadisa beto ntangu beto kena kukutana na mikakatano. Biblia kele na baverse mingi yankaka ya mutindu yina, yina lenda buela beto ngolo ya kutatamana kukanga ntima.​—Nz. 94:19.

8. (a) Pesa kifuani ya nsikudukusu mosi ya Biblia yina lenda sadisa beto na kukanga ntima. (b) Yinki lenda sadisa beto beto bambuka na bansikudukusu ya Biblia ntangu beto kele na nsatu yau?

⁸ Bansikudukusu ya Biblia lenda sadisa beto na kukanga ntima. Kutu, yakevuandaka na malongi ya nduenga yina lenda sadisa beto na kubaka banzengolo ya mbote. (Mas. 2:6, 7) Na kifuani, Biblia kekindisaka beto beto bika kukitungisa samu na mambu yina lenda kumina beto mbazi. (Mat. 6:34) Kana beto kele na mumeseno ya kutanga mpe kuyindula na mpinda na zulu ya Biblia, yakevuanda pete beto bambuka na bansikudukusu ya Biblia ntangu beto kele na nsatu na yau.

9. Samu na yinki yakele na mfunu beto kanisaka na masolo ya bisadi ya kukuikama ya Yehova ya ntama?

⁹ Biblia kele diaka na masolo ya bantu lokola beto, yina tudilaka Yehova ntima mpe Yandi sadisaka bau. (Ebr. 11:32-34; Yak. 5:17) Kana beto kena kanisa na masolo yango, beto kekumisa kiminu na beto ngolo ti Yehova kele “kitininu mpe ngolo na beto, lusadusu yina kebakamaka na nsualu na ntangu ya mpasi.” (Nz. 46:1) Kukanisa na kukuikama ya bisadi yango ya Yehova ya ntama, ketinda beto beto landa kifuani na bau ya kiminu mpe ya kukanga ntima.​—Yak. 5:10, 11.

10. Yinki mambu nge lenda sala samu Biblia sadisa nge na mutindu ya mbote kuluta?

¹⁰ Mambu yina nge lenda sala. Tangaka Biblia konso kilumbu, mpe sonikaka baverse yina lenda sadisa nge. Bampangi mingi kemonaka ti kutanga kikapu ya kilumbu kele mutindu ya mbote ya kubanda kilumbu na dibanza mosi ya kukindisa ya Biblia. Mariea, mpangi mosi ya nketo monaka kedika ya diambu yango ntangu bibuti na yandi belaka maladi ya kanser. Yinki sadisaka yandi yandi kanga ntima ntangu yandi vuandaka tanina bau na bangonda ya nsuka ya luzingu na bau? Yandi metuba: “Konso sunka munu vuandaka tanga mpe kuyindula na mpinda na kikapu ya kilumbu na mua mukanda Beto tadilaka Masonukua konso kilumbu. Mumeseno yango sadisaka munu munu fulusa makanisi na munu na mabanza ya Biblia, na kisika ya kutula makanisi na munu na mambu ya mpasi yina munu vuandaka kutana na yau.”​—Nz. 61:2.

BAMPANGI NA BETO BAKLISTO

11. Samu na yinki yakele lukindusu kuzaba ti beto mosi kaka ve nde kena kukutana na mambu ya mpasi?

¹¹ Yehova mepesaka beto diaka bampangi na beto Baklisto samu na kusadisa beto beto kanga ntima. Kuzaba ti ‘bampasi ya mutindu yina kena kukumina mpe kimvuka ya mvimba ya bampangi na beto’ kendimisaka beto ti beto kele ve beto mosi. (1 Pe. 5:9) Ya kedika, beto lenda kukindimisa ti mambu nionso yina beto kena kukutana na yau, bampangi na beto yankaka mpe kutanaka na yau mpe bakangilaka yau ntima. Na yau, beto diaka beto lenda kangila yau ntima!​—Mis. 14:22.

12. Yinki mutindu bampangi na beto Baklisto lenda sadisa beto, mpe yinki beto lenda sala samu na bau? (2 Bakorinti 1:3, 4)

¹² Bampangi na beto lenda kindisa beto samu beto kanga ntima. Yasalamaka mpe plina samu na ntumua Paulo. Ntangu yandi vuandaka ya kukangama na yinzo mosi, mbala mingi, yandi vuandaka pesa matondo na bampangi yina sadisaka yandi, na kutangaka bankumbu na bau. Babombaka Paulo, bakindisaka yandi, mpe basadisaka yandi na kinsuni. (Flp. 2:25, 29, 30; Kol. 4:10, 11) Yalenda vuanda mpe mutindu yina samu na beto bubu yayi. Ntangu beto kele na nsatu ya lusadusu samu na kukanga ntima, bampangi na beto lenda sadisa beto; mpe ntangu bakele na nsatu ya lusadusu, beto lenda sadisa bau.​—Tanga 2 Bakorinti 1:3, 4.

13. Yinki sadisaka mpangi Maya samu yandi kanga ntima?

¹³ Na 2020, basoda kotaka na yinzo ya mpangi ya nketo Maya, yina kezingaka na Russie samu na kusala baankete. Na manima banataka yandi na tribinale samu yandi tubilaka bantu yankaka bindimeli na yandi. Kasi, bampangi kindisaka mingi mpangi Maya. Yandi metuba: “Na bantangu yina munu vuandaka ya kulemba na makanisi, bampangi vuandaka bokila mpe kusonikina munu. Yau ndimisaka munu ti bakezolaka munu. Munu zabaka deja ti bampangi kezolaka munu mpe bakele dibuta na munu. Kasi, banda 2020, munu mekukindimisaka mbotembote na diambu yango.”

14. Yinki beto lenda sala samu beto baka mambote na lusadusu ya bampangi na beto Baklisto? (Tala diaka foto.)

¹⁴ Mambu yina nge lenda sala. Ntangu nge kena kukutana na mambu ya mpasi, vuandaka penepene ya bampangi na nge Baklisto. Kukakatanaka ve kulomba bankulutu lusadusu. Balenda vuanda “kisika ya kusuamina samu na kutina mupepe, kisika ya kusuamina samu na kutina mvula ya mupepe ya ngolo.” (Yis. 32:2) Diaka, kuzimbakana ve ti bampangi na nge Baklisto diaka kena kukutana na mambu ya mpasi. Na yau, kusadisa muntu mosi yina kele na nsatu ya lusadusu, kesadisa nge nge vuanda na kiese mpe nge kangila banzomono na nge ntima.​—Mis. 20:35.

KIVUVU NA BETO

15. Yinki mutindu kivuvu sadisaka Yesu, mpe yinki mutindu yalenda sadisa beto? (Baebre 12:2)

¹⁵ Yehova mepesaka beto diaka kivuvu ya kedika samu na kusadisa beto beto kanga ntima. (Rom. 15:13) Kanisa mutindu kivuvu sadisaka Yesu na kukanga ntima na kilumbu meluta mpasi ya luzingu na yandi awa na ntoto. (Tanga Baebre 12:2.) Yesu zabaka ti kukuikama na yandi kenungisa nkumbu ya Yehova. Yandi vuandaka vingila diaka na nsatu ya ngolo yandi vutuka na Tata na yandi mpe yandi sala kintuadi na bampangi na yandi na Kimfumu ya dizulu. Beto mpe, kivuvu na beto ya kuzinga mvula na mvula na yinza ya yimpa kesadisaka beto beto kanga ntima na konso diambu ya mpasi yina beto lenda kutana na yau na yinza yayi ya Satana.

16. Yinki mutindu kivuvu sadisaka mpangi Anna samu yandi kanga ntima, mpe yinki malongi nge mebaka na bampova na yandi?

¹⁶ Beto tadila mutindu kivuvu ya kuzinga na Paradiso sadisaka mpangi ya nketo Anna yina kezingaka na Russie. Bakangaka bakala na yandi mpe batulaka yandi na buloko. Yinki sadisaka Anna? Yandi tubaka: “Kusambila samu na kivuvu na beto mpe kuyindula na mpinda na zulu na yau, sadisaka munu samu munu bika lemba nzutu mingi. Munu bakusaka ti yakele ve nsuka ya mambu. Nsukansuka, Yehova kenunga mpe yandi kenungisa beto.”

17. Yinki mutindu beto lenda monisa ti beto kele na butondi samu na kivuvu yina Yehova melakaka beto? (Tala diaka foto.)

¹⁷ Mambu yina nge lenda sala. Bakaka ntangu ya kukanisa na kivuvu ya kitoko yina Yehova melakaka beto. Kukimona na yinza ya yimpa mpe mona balusakumunu yina beto kebaka. Mpe zaba ti, konso nzomono yina beto lenda kutana na yau bubu yayi kele ya “ntangu ya nkufi mpe ya pepele.” (2 Ko. 4:17) Diaka, sala nionso yina nge lenda samu na kutubila bantu yankaka bansilulu ya Nzambi. Kanisa mutindu yafueti vuanda mpasi samu na bau kuzinga na yinza yayi ya Satana kondua ti bazaba bansilulu ya Nzambi. Ata na nzila ya bampova fioti, nge lenda pesa bau nsatu ya kuzaba mambu mingi yina metadila Kimfumu mpe bansilulu ya Yehova.

18. Samu na yinki beto lenda tudila bansilulu ya Yehova ntima?

¹⁸ Na manima ya kukanga ntima na kukuikama nionso na banzomono mingi, Yobi tubilaka Yehova: “Ntangu yayi munu mezaba ti nge lenda sala mambu nionso, mpe diambu mosi ve yina nge kele na nsatu ya kusala kekondua kukokisama.” (Yobo 42:2) Mutindu Yobi tubaka yau, diambu mosi ve lenda pekisa Yehova kukokisa lukanu na yandi. Kuzaba diambu yango lenda pesa beto ngolo ya kukanga ntima. Beto tadila kifuani yayi: Kanisa nketo mosi yina kena kubela mpe yandi melemba nzutu samu atako yandi mekutana na badoktere mingi, mosi ve kati na bau menunga kumanisa maladi na yandi. Kasi na manima, yandi mekutana na doktere mosi ya makoki yina metubila yandi diambu yina kena kubedisa yandi mpe mutindu yandi kesadisa yandi samu na kumanisa maladi yango. Kondua ntembe, nketo yango kekukimona mbote ata kana yakebaka mua ntangu samu yandi beluka. Ntangu yayi, yakekuma pete samu yandi kanga ntima na maladi yango samu yandi mezaba ti yandi kebeluka. Mutindu mosi, kutula ntima na kivuvu na beto ya Paradiso kesadisa beto na kukanga ntima.

19. Yinki Yehova kesadilaka samu na kusadisa beto beto kanga ntima?

¹⁹ Mutindu beto memona yau, Yehova kesadilaka kisambu, Mpova na yandi, bampangi na beto Baklisto, mpe kivuvu na beto samu na kusadisa beto beto kanga ntima na banzomono na beto. Kana beto kena kusadila mbote mambu yango, Yehova kesadisa beto na banzomono nionso yina beto lenda kutana na yau tii kilumbu mambu nionso ya mpasi ya yinza yayi ya Satana kemanisa.​—Flp. 4:13.