Kukindimisa ti Yehova kezolaka nge

1. Samu na yinki nge kukipesaka na Yehova? (Tala diaka foto.)

NGE kena kuzaba diaka ntangu nge kukipesaka na Yehova? Nge kukipesaka na Yehova samu nge bandaka kuzaba mpe kuzola Yandi. Nge lakaka yandi ti nge ketula luzolo na yandi na kisika ya ntete na luzingu na nge, mpe nge ketatamana kuzola yandi na ntima na nge ya mvimba, na muela na nge ya mvimba, na makanisi na nge ya mvimba, mpe na ngolo na nge nionso. (Mrk. 12:30) Banda ntangu yango, nzola na nge samu na yandi ketatamanaka kukula. Na yau, yinki mvutu nge kepesa kana muntu meyuvusa nge: “Nge kezolaka mpenza Yehova?” Kondua ntembe, nge ketuba: “Munu kezolaka yandi kuluta muntu to kima yankaka nionso!”

2-3. Yinki Yehova zola ti beto kukindimisa na yau, mpe yinki beto ketubila na disolo yayi? (Yirimia 31:3)

² Kasi, yinki mvutu nge kepesa kana muntu meyuvusa nge: “Yehova kezolaka nge mpenza?” Mbala yankaka, nge lenda kakatana samu na kupesa mvutu, na kukanisaka ti yabonga ve Yehova zola nge. Mpangi mosi ya nketo yina bavuandaka zola ve na bumuana na yandi metuba: “Munu kendimaka ti, munu kezolaka Yehova na ntima na munu ya mvimba. Kasi mbala mingi, munu kendimaka ve ti Yehova kezolaka munu.” Na yau, yinki mutindu Yehova ketadilaka nge mpenza?

³ Yehova zola nge kukindimisa ti yandi kezolaka nge. (Tanga Yirimia 31:3.) Yau yina, yandi mebendaka nge pembeni na yandi. Mpe ntangu nge kukipesaka na yandi mpe nge bakaka mbotama, yandi pesaka nge dikabu mosi ya mfunu mpenza​—nzola na yandi ya kukuikama. Nzola yango kele ya mpinda mpe ya mvimbamvimba. Yaketindaka yandi yandi tadila bisadi na yandi ya kukuikama​—yavuanda mpe nge​—lokola “kima [na yandi] ya mfunu.” (Mal. 3:17) Yehova zola nge kukindimisa ti yandi kezolaka nge, mutindu ntumua Paulo vuandaka kukindimisa na yau. Paulo sonikaka na kiminu nionso ti: “Munu mendima mpenza ti yavuanda lufua, to luzingu, to bambasi, to baguvernema, to mambu ya bubu, to mambu yina kekuiza, to bilendo, to ntela, to mpinda, to yinki kisemua yankaka kekoka ve kukabula beto na nzola ya Nzambi.” (Rom. 8:38, 39) Na disolo yayi, beto ketubila samu na yinki beto fueti kukindimisa mingi kuluta ti Yehova kezolaka beto, mpe mambu yina lenda sadisa beto na kusala yau.

SAMU NA YINKI BETO FUETI KUKINDIMISA TI YEHOVA KEZOLAKA BETO?

4. Yinki mutindu beto lenda nunga mosi ya mayele yina meluta yimbi ya Satana?

⁴ Kana beto kena kukindimisa ti Yehova kezolaka beto, beto lenda nunga mosi ya “mayele ya yimbi” ya Satana. (Ef. 6:11) Satana kesalaka nionso yina yandi lenda samu na kupekisa beto kusadila Yehova. Mosi ya mayele yina meluta yimbi ya Satana kele kumuangisa diambu yayi ya luvunu ti Yehova kezolaka beto ve. Kuzimbakana ve ti Satana kesosaka maluaku samu na kupekisa beto kusadila Yehova. Yandi kele lokola nkosi yina kena kusosa kufua kibulu yina mekondua ngolo. Na yau, mbala mingi yandi kesosaka kunuanisa beto ntangu beto kele ya kulemba na makanisi. Na kifuani, yandi kenuanisaka beto ntangu beto kena kukitungisa samu na mambu yina beto mekutanaka na yau na ntama, samu na mitungisi na beto ya bubu yayi, to samu na wonga ya mambu yina lenda kumina beto na bilumbu kena kuiza. (Mas. 24:10) Kasi, kana beto kena kutatamana kukindimisa mingi kuluta ti Yehova kezolaka beto, beto kevuanda na dikoki ya “kutelemina” Satana mpe mayele na yandi ya yimbi.​—1 Pe. 5:8, 9; Yak. 4:7.

5. Samu na yinki beto fueti kukindimisa ti Yehova kezolaka beto mingi?

⁵ Kana beto kena kukindimisa ti Yehova kezolaka beto, beto kepusana penepene na yandi. Samu na yinki beto metuba plina? Samu Yehova mesalaka beto na nsatu ya kuzola mpe ya kumona ti bakezolaka beto. Na yau, beto kezolaka bantu yina kezolaka beto. Yau yina, kana beto kena kukindimisa ti Yehova kezolaka beto mingi, beto diaka beto kezola yandi mingi. (1 Yoa. 4:19) Mpe kana beto kena kuzola Yehova mingi, yandi diaka yandi kezola beto mingi. Kutu, Biblia metubila beto puelele ti: “Beno pusana penepene na Nzambi, mpe yandi kepusana penepene na beno.” (Yak. 4:8) Kasi, yinki mutindu beto lenda kukindimisa mingi kuluta ti Yehova kezolaka beto?

YINKI LENDA SADISA BETO SAMU BETO KUKINDIMISA TI YEHOVA KEZOLAKA BETO?

6. Yinki mambu beto lenda lomba Yehova samu beto kukindimisa ti yandi kezolaka beto?

⁶ Sambilaka mbala na mbala mpe tubaka mambu ya sikisiki na bisambu na nge. (Luka 18:1; Rom. 12:12) Konso kilumbu, sambilaka Yehova mbala mingi samu yandi sadisa nge nge zaba mutindu yandi kezolaka nge. Na bantangu yankaka, yalenda vuanda mpasi samu nge kukindimisa ti Yehova kezolaka nge kana nge kena kukitadila na mutindu ya yimbi. Kasi kuzimbakana ve ti Yehova kele nene kuluta ntima na nge. (1 Yoa. 3:19, 20) Yandi mezaba nge mbote kuluta nge mosi. Kutu, yandi kemonaka mambu yina nge lenda mona ve. (1 Sa. 16:7; 2 Nt. 6:30) Na yau, kukakatana ve ‘kuzibudila’ yandi ntima na nge, na kulombaka yandi yandi sadisa nge samu nge kukindimisa ti yandi kezolaka nge. (Nz. 62:8) Na manima, sala na nguizani na bisambu na nge, na kusadilaka makanisi yayi melanda.

7-8. Yinki mutindu mukanda ya Nzembo mendimisa beto ti Yehova kezolaka beto?

⁷ Ndima mambu yina Yehova ketubaka. Yehova pesaka mpeve na yandi na babakala yina sonikaka Biblia. Na yau, beto lenda tula ntima ti mambu yina basonikaka kele kedika. Beto tadila mambu yina Davidi tubaka samu na Yehova. Yandi tubaka: “Yehova kele pene ya bantu yina bantima meluala; yandi kevukisaka bantu yina melemba nzutu.” (Nz. 34:18) Ntangu nge kele na kiadi ya ngolo, nge lenda mona ti nge kele kaka nge mosi. Kasi, Yehova melaka ti na bantangu ya mutindu yina, yandi kevuanda pene na nge samu yandi kemona ti nge kele mpenza na nsatu ya lusadusu na yandi. Na Nkunga yankaka Davidi sonikaka: “Tula maza meso na munu na kati ya ntutu na nge ya nkanda ya kibulu.” (Nz. 56:8) Yazola monisa ti Yehova ketudilaka nge mpenza dikebi, mpe yakesalaka yandi mpasi ntangu nge keniokuamaka. Mutindu kaka maza yina kele na ntutu kevuandaka na mfunu samu na muntu yina kena kusala vuayaje na dezere, maza meso na beto diaka kevuandaka na mfunu na meso ya Yehova, mpe yandi kezabaka ntangu nionso yina nge kena kuniokuama mpe kudila. Nzembo 139:3 metuba: “Nge [Yehova] nge mezaba mbote banzila na munu nionso.” Yehova kemonaka banzila na nge nionso, kasi yandi ketulaka makanisi na mambu ya mbote yina nge kesalaka. (Ebr. 6:10) Samu na yinki? Samu yandi kesepelaka mingi na bangolo yina nge kesalaka samu na kusepedisa yandi.a

⁸ Na nzila ya baverse yango ya Biblia ya kukindisa, Yehova kemonisaka nge ti, yandi ketudilaka nge dikebi mpe yandi kezolaka nge mingi. Kasi, mutindu beto monaka yau na ebandeli, Satana kevunaka ti Yehova kezolaka nge ve. Na yau, kana na bantangu yankaka nge mekuma na bantembe ti Yehova kezolaka nge, kukiyuvusa: ‘Nani munu fueti ndimina​—“tata ya luvunu” to “Nzambi ya kedika”?’​—Yoa. 8:44; Nz. 31:5.

9. Yinki Yehova melaka bantu yina kezolaka yandi? (Kobima 20:5, 6)

⁹ Kanisa na mambu yina Yehova kesalaka samu na bantu yina kezolaka yandi. Beto tala mambu yina Yehova tubilaka Moize mpe Bayisaele. (Tanga Kobima 20:5, 6.) Yehova melaka ti yandi ketatamana kumonisa nzola ya kukuikama na bantu yina kezolaka yandi. Lokola Yehova kele Nzambi ya kukuikama, beto lenda ndima ti yandi kemanga ata fioti ve kuzola bantu yina kezolaka yandi. (Neh. 1:5) Na yau, kana na bantangu yankaka nge kele na nsatu ya kukindimisa ti Yehova kezolaka nge, kukiyuvusa: ‘Munu kezokaka Yehova?’ Na yau, kana nge kezolaka yandi mpe nge kena kusala nionso yina nge lenda samu na kusepedisa yandi, kukindimisa ti yandi kezolaka nge mingi. (Dan. 9:4; 1 Ko. 8:3) Yazola monisa ti, kana nge kendimaka ti nge kezolaka Yehova, nge fueti kukindimisa mpe ti yandi kezolaka nge. Nzola mpe kukuikama na yandi meluta bantembe nionso yina beto lenda vuanda na yau.

10-11. Yinki mutindu Yehova zola nge tadila nkudulu? (Bagalatia 2:20)

¹⁰ Yindula na zulu ya nkudulu. Nkayilu ya nkudulu ya Yesu Klisto kele dikabu yina meluta nene yina Yehova mepesaka beto. (Yoa. 3:16) Kasi yandi pesaka yau mpenza samu na nge? Ee! Beto tadila disolo ya ntumua Paulo. Yandi salaka masumu ya nene tekila yandi kuma Muklisto. Mpe yalombaka yandi tatamana kunuanisa babulembu na yandi. (Rom. 7:24, 25; 1 Tim. 1:12-14) Kasi, yandi vuandaka tadila nkudulu lokola dikabu yina Yehova pesaka samu na yandi mpenza. (Tanga Bagalatia 2:20.) Kuzimbakana ve ti Yehova nde tindaka ntumua Paulo yandi sonika bampova yango. Mpe mambu nionso yina kele na Biblia kele samu na kulonga beto. (Rom. 15:4) Bampova ya Paulo memonisa ti Yehova zola nge tadila nkudulu lokola dikabu yina Yandi mepesa nge. Kana nge mebanda kutadila nkudulu mutindu yina, nge kekukindimisa mingi kuluta ti Yehova kezolaka nge mpenza.

¹¹ Beto kepesaka Yehova matondo mutindu yandi tindaka Yesu awa na ntoto samu yandi kufua samu na beto. Kasi, mfunu yankaka yina Yesu kuizilaka awa na ntoto vuandaka, kutubila bantu yankaka kedika samu na Nzambi. (Yoa. 18:37) Yesu longaka beto diaka kedika samu na mutindu Yehova kezolaka bana na yandi.

MUTINDU YESU KESADISAKA BETO SAMU BETO KUKINDIMISA TI YEHOVA KEZOLAKA BETO

12. Samu na yinki beto fueti ndima mambu yina Yesu tubaka samu na Yehova?

¹² Ntangu Yesu vuandaka na ntoto, yandi vuandaka sepela kutubila bantu yankaka kimuntu ya Yehova. (Luka 10:22) Beto fueti ndima mambu yina Yesu tubaka samu na Yehova. Samu na yinki? Samu Yesu zingaka bamvula mingi kintuadi na Yehova na dizulu, tekila yandi kuiza awa na ntoto. (Kol. 1:15) Bamvula yina Yesu salaka mpe mambu yina yandi monaka, sadisaka yandi samu yandi zaba ti Yehova kezolaka mingi bana na Yandi ya kukuikama. Yinki mutindu Yesu sadisaka bantu yankaka bakukindimisa ti Yehova kezolaka bau?

13. Yinki mutindu Yesu zola beto tadila Yehova?

¹³ Yesu zola ti beto tadila Yehova mutindu yandi ketadilaka Yandi. Na Baevanjile, Yesu mebokidila Yehova “Tata” bambala kuluta 160. Mpe ntangu yandi vuandaka solola na banlonguki na yandi, yandi vuandaka sadila bampova lokola, “Tata na beno” to “Tata na beno ya dizulu.” (Mat. 5:16; 6:26) Noti ya Biblia ya ndongokolo ya Matai 5:16 metuba: “Samu na kutubila Yehova to kusolola na yandi, bisadi ya ntama ya Nzambi vuandaka sadila batitre mingi ya lokumu lokola, ‘Nkua-Ngolo-Nionso,’ ‘Yina-Meluta-Zulu,’ mpe ‘Mvangi ya nene.’ Kasi Yesu vuandaka sadila mbala mingi mpova ‘Tata,’ mpova mosi ya pete, samu na kumonisa nguizani ya ngolo yina Nzambi kele na yau na bisadi na yandi.” Yakele puelele ti Yesu zola beto tadila Yehova mutindu yandi ketadilaka Yandi​—lokola Tata na beto ya nzola, yina kezolaka mingi bana na Yandi. Beto tadila bifuani zole yina Yesu sadilaka mpova “Tata.”

14. Yinki mutindu Yesu monisaka ti mosimosi kati na beto kele na valere na meso ya Tata na beto ya dizulu? (Matai 10:29-31) (Tala diaka foto.)

¹⁴ Beto tubila ntete bampova ya Yesu yina kele na Matai 10:29-31. (Tanga.) Bantietie kele bandeke mosi ya fiotifioti yina lenda zola to kusambila ata fioti ve Yehova. Kasi, Tata na beto kebakaka mosimosi ya bantietie yango na valere mpe yandi kezabaka kana mosi na yau mekubua na ntoto. Yamemonisa ti, yandi kebakaka na valere mingi mpe yandi ketulaka dikebi na mosimosi ya bisadi na yandi yina kesadilaka yandi mpe kezolaka yandi! Na kutadila bampova ‘yandi ketangaka ata nsuki nionso ya yintu na beno,’ noti ya Biblia ya ndongokolo ya verse 30 metuba: “Lokola Yehova mezaba ata mambu ya fiotifioti lokola yayi, yamendimisa beto ti yandi ketulaka dikebi na konso nlonguki ya Klisto.” Yakedika, Yesu zola beto ndima ti mosimoisi kati na beto kele na mfunu na meso ya Tata na beto ya dizulu.

15. Yinki zola monisa bampova ya Yesu yina kele na Yoane 6:44?

¹⁵ Beto tadila kifuani ya zole yina Yesu sadilaka mpova “Tata.” (Tanga Yoane 6:44.) Tata na nge ya dizulu bendaka nge yandi mosi, to na kimpombo nionso yandi kotisaka nge na kedika. Samu na yinki yandi bendaka nge? Samu yandi monaka ti nge kele na bikadulu ya mbote. (Mis. 13:48) Noti ya Biblia ya ndongokolo ya Yoane 6:44 metuba ti, mbala yankaka Yesu vuandaka tubila bampova ya Yeremia yina kele na verse yina mesimba disolo yayi. Yametuba: “Munu mebenda nge na munu na nzola ya kukuikama [to, munu metatamana kumonisina nge nzola ya kukuikama].” (Yir. 31:3; nyp.; fuanikisa na Hosea 11:4.) Bampova yango zola monisa ti, Tata na beto ya dizulu ketatamanaka kumona mambu ya mbote yina kele kati na nge, yina nge lenda mona ve.

16. (a) Yinki Yesu zolaka tuba mpenza, mpe samu na yinki beto fueti ndimina yandi? (b) Yinki mutindu nge lenda kukindimisa mingi kuluta ti Yehova kele Tata yina mebonga samu na nge? (Tala ankadre “Tata yina mebonga samu na beto nionso.”)

¹⁶ Na kubokidilaka Yehova Tata na beto, Yesu zolaka tuba ti: “Yehova kele kaka ve Tata na munu; kasi yandi kele diaka Tata na beno. Mpe munu mendimisa beno ti yandi kezolaka beno mpe yandi ketudilaka mosimosi kati na beno dikebi.” Na yau, na bantangu yankaka kana nge mekuma na bantembe ti Yehova kezolaka nge, kanisa na bampova ya Yesu mpe ndimina yandi. Samu, yandi ketubaka ntangu nonso kedika, mpe yandi kele muntu yina mezaba Tata na beto mbote kuluta.​—1 Pe. 2:22.

TATAMANA KUKINDIMISA TI YEHOVA KEZOLAKA NGE

17. Samu na yinki beto fueti sala nionso yina beto lenda samu beto tatamana kukindimisa ti Yehova kezolaka beto?

¹⁷ Beto fueti sala nionso yina beto lenda samu beto tatamana kukindimisa ti Yehova kezolaka beto. Beto zimbakana ve ti, Satana kesalaka nionso yina yandi lenda samu na kupekisa beto kusadila Yehova. Yandi kele na nsatu ya kulembisa beto. Na yau, yandi ketatamana kusosa kundimisa beto ti Yehova kezolaka beto ve. Beto fueti bika ve ti yandi nunga!​—Yobo 27:5.

18. Yinki mutindu nge lenda kukindimisa diaka mingi kuluta ti Yehova kezolaka nge?

¹⁸ Samu nge kukindimisa diaka mingi kuluta ti Yehova kezolaka nge, tatamana kusambila samu na kulomba yandi yandi sadisa nge nge kukitadila mutindu yandi ketadilaka nge. Kanisa na mpinda mutindu bansoniki ya Biblia metubila nzola na yandi ya mpinda. Kuzimbakana ve ti, yandi kezolaka ntangu nionso bantu yina kezolaka yandi. Kuzimbakana diaka ata fioti ve ti Yehova pesaka muana na yandi lokola dikabu samu na nge. Mpe ndima ti Yehova kele Tata na nge ya dizulu mutindu Yesu tubaka yau. Na manima, kana muntu meyuvusa nge: “Nge kendimaka mpenza ti Yehova kezolaka nge?” Nge kepesa mvutu na kivuvu nionso ti: “Ee, yandi kezolaka munu! Mpe konso kilumbu, munu kesalaka nionso yina munu lenda samu na kumonisa ti munu kezolaka yandi!”