Yofezi vuandaka mosi ya bana ya babakala ya Yakobi. Bayaya na yandi monaka ti tata na bau vuandaka zola Yozefi mingi. Nge mekanisa ti bavuandaka kukimona yinki mutindu? Bavuandaka na kimpala samu na Yozefi mpe bavuandaka yina yandi. Ntangu Yozefi lotaka bandozi ya kukamua, yandi tubilaka yau bampangi na yandi. Bakanisaka bandozi yango zolaka monisa ti kilumbu mosi bakefukamina yandi. Banda ntangu yango babandaka kuyina yandi diaka mingi kuluta!

Kilumbu mosi bampangi ya Yozefi vuandaka tanina mameme pembeni ya mbanza ya Shekeme. Yakobi tindaka Yozefi yandi kuenda tala kana bakele mbote. Ntangu bamonaka Yozefi na ntama, batubasanaka: ‘Tala muntu yina kelotaka bandozi kena kuiza. Beto kufua yandi!’ Bakangaka yandi mpe balozaka yandi na dibulu mosi ya yinda. Kasi Yuda, mosi ya bampangi na yandi tubaka: ‘Beto bika kufua yandi! Beto teka yandi lokola nanga na kisika ya kufua yandi.’ Na yau batekaka Yozefi na mbongo 20 ya bisengo na bantu ya mumbongo ya Madiane yina vuandaka kuenda na Ezipito.

Na manima bampangi ya Yozefi dindisaka kazaka na yandi na menga ya nkombo, batindaka kazaka yango na tata na bau mpe batubaka: ‘Yayi ve kazaka ya muana na nge?’ Na yau Yakobi kanisaka ti kibulu mosi ya nganzi kufuaka Yozefi. Yandi monaka mpasi mingi na ntima. Muntu mosi ve kokaka kubomba yandi.

Na Ezipito, batekaka Yozefi lokola nanga na mfumu mosi ya nene na nkumbu ya Potifare. Kasi Yehova vuandaka kintuadi na Yozefi. Potifare monaka ti Yozefi vuandaka kisadi mosi ya mbote mpe yandi vuandaka muntu ya kutudila ntima. Yazingilaka ve, Yozefi kumaka mfumu ya bima nionso ya Potifare.

Nketo ya Potifare monaka ti Yozefi vuandaka bakala mosi ya kitoko mpe ya ngolo. Konso kilumbu yandi vuandaka lomba Yozefi yandi sangisa na yandi nzutu. Yinki Yozefi salaka? Yandi mangaka mpe yandi tubaka: ‘Ve! Yakele yimbi. Mfumu na munu ketudilaka munu ntima, mpe nge kele nketo na yandi. Kana mesangisa na nge nzutu, munu kesala disumu na meso ya Nzambi!’

Kilumbu mosi nketo ya Potifare sosaka kusangisa nzutu na kingolo na Yozefi. Yandi kangaka Yozefi na kinkuti, kasi yandi tinaka. Ntangu Potifare vutukaka na yinzo, nketo yango tubilaka Potifare ti Yozefi sosaka kusangisa na yandi nzutu na kingolo. Yandi vuandaka vuna. Potifare fuemaka ngolo, mpe yandi lozaka Yozefi na buloko. Kasi Yehova zimbakanaka ve Yozefi.

Ntangu Yozefi vuandaka na buloko, Faraon ntinu ya Ezipito, lotaka bandozi mpe muntu mosi ve nungaka kusasila yau. Kisadi mosi ya Faraon tubilaka yandi ti Yozefi lendaka sasila yau. Na mbala mosi Faraon tindaka bakuenda baka Yozefi.

Faraon yuvusaka yandi: ‘Nge lenda sasila bandozi na munu?’ Yozefi tubilaka Faraon: ‘Ezipito kevuanda na madia mingi bamvula 7, mpe na manima yakevuanda na bamvula 7 ya nsatu. Pona muntu mosi ya nduenga yina kelunda bima ya kudia samu bantu na nge kufua nsatu ve.’ Faraon tubaka: ‘Munu mepona nge! Nge kevuanda muntu ya zole yina meluta kilendo na Ezipito!’ Yinki mutindu Yozefi zabaka nsasulu ya bandozi ya Faraon? Yehova nde sadisaka Yozefi.

Bamvula 7 yina landaka, Yozefi lundaka bima ya kudia. Na manima nsatu kotaka na ntoto ya mvimba, kaka mutindu Yozefi tubaka. Bantu ya bisika nionso vuandaka kuenda sumba bima ya kudia na Yozefi. Tata na yandi Yakobi, kuwaka ti bima ya kudia vuandaka na Ezipito; na yau yandi tindaka bana na yandi 10 ya babakala bakuenda kuna samu na kusumba mua bima.

Bana ya Yakobi kuendaka na Yozefi, mpe Yozefi bakusaka mbala mosi ti bavuandaka bampangi na yandi. Kasi bampangi na yandi zabaka ve ti yavuandaka Yozefi. Bafukaminaka yandi, kaka mutindu yandi lotaka yau ntangu yandi vuandaka ntuenia. Yozefi vuandaka na nsatu ya kuzaba kana bampangi na yandi vuandaka kaka na kimpala. Na yau yandi tubilaka bau: ‘Beno kele banongi. Beno kele na nsatu ya kuzaba bisika ya buala na beto yina kele ya kutanunua mbote ve.’ Batubaka: ‘Ve! Beto kele bampangi 12 ya babakala, beto mekatuka na Kanana. Mpangi na beto mosi mekufuaka, mpe ya nsuka kele kintuadi na tata na beto.’ Na manima Yozefi tubaka: ‘Beno kuiza na mpangi na beno ya nsuka, mpe munu kendimina beno.’ Na yau bavutukaka na yinzo ya tata na bau.

Ntangu bima ya kudia manisaka diaka, Yakobi tindaka bana na yandi bakuenda diaka na Ezipito. Na mbala yayi, banataka Benjamen leki na bau ya nsuka. Samu na kumeka bampangi na yandi, Yozefi tulaka dikopo na yandi ya palata na saki ya bambuma ya Benjamen, na manima yandi tubaka ti bampangi na yandi meyiba yau. Ntangu bisadi ya Yozefi monaka dikopo yango na saki ya Benjamen, bampangi na yandi monaka mpasi na ntima. Balombaka Yozefi yandi pesa bau kitumbu na kisika ya Benjamen.

Na ntangu yango Yozefi monaka ti bampangi na yandi mesoba. Yozefi kokaka diaka ve kukanga ntima. Yandi bandaka kudila mpe yandi tubaka: ‘Munu kele mpangi na beno Yozefi. Tata na munu kele kaka na luzingu?’ Bampangi na yandi kamuaka mpenza. Yandi tubilaka bau: ‘Beno bika mona mpasi samu na mambu yina beno salaka munu. Nzambi tindaka munu awa samu na kuvukisa luzingu na beno. Ntangu yayi, beno kuenda na nsualu mpe beno nata tata na munu awa.’

Bakuendaka na yinzo samu na kuzabisa tata na bau nsangu yango ya mbote mpe banataka yandi na Ezipito. Na manima ya bamvula mingi, Yozefi mpe tata na yandi kutanaka diaka.