Kubasika

2 Na ntangu yina, bakala mosi ya dibuta ya Levi kwelaka mwana mosi ya Levi ya kento. 2 Kento yango kumaka na kivumu mpe butaka mwana ya bakala. Ntangu yandi talaka ti mwana yango vandaka kitoko mingi, yandi bumbaka yandi bangonda tatu. 3 Ntangu yandi vanda lenda dyaka ve kubumba mwana, yandi bakaka kitunga yina ba yidikaka na yinti ya papiruse, yandi pakulaka yawu gudron mpe koole, mpe yandi tulaka mwana na kati ya yawu. Na manima, yandi kwendaka tula yawu na kati-kati ya matiti ya bidyadya yina vandaka na lweka ya Nzadi ya Nile. 4 Kasi kibusi ya mwana telamaka mwa ntama samu na kutala yinki zola kumina yandi.

5 Ntangu mwana ya Faraoni ya kento kwendaka yobila na Nzadi ya Nile, bisadi ya yandi ya bakento vanda tambula na lweka ya Nile. Yandi talaka kitunga na kati-kati ya matiti ya bidyadya. Na nswalu nyonso, yandi tumisaka mwana ya yandi ya kisalu na kukwenda baka yawu. 6 Ntangu yandi fungulaka yawu, yandi talaka mwana ya bakala, mpe mwana yango vanda dila. Yandi talaka yandi kyadi, mpe yandi zonzaka: “Ya ke mwana ya Baebre.” 7 Kibusi ya mwana zonzaka na mwana ya Faraoni: “Nge zola mu kwenda sosila nge ndesi* mosi na kati ya bakento ya Baebre yina ke pesa mwana mabene?” 8 Mwana ya Faraoni zonzaka na yandi: “Ee, kwenda!” Na mbala mosi yandi kwendaka mpe bokilaka mama ya mwana. 9 Mwana ya Faraoni zonzaka na yandi: “Baka mwana yayi mpe nwikisa yandi mabene samu na munu, mpe mu ke futa nge.” Na yawu, kento yango bakaka mwana mpe sansaka yandi. 10 Ntangu mwana kulaka, yandi nataka yandi na mwana ya Faraoni mpe yandi kumaka mwana ya yandi. Yandi pesaka yandi nkumbu ya Moyize* mpe zonzaka: “Ya ke samu mu basisaka yandi na maza.”

11 Na manima, ntangu Moyize kumaka kuluntu,* yandi kwendaka na sika ya bampangi ya yandi samu na kutala bisalu ya mpasi yina ba vanda sala. Mpe yandi talaka muntu mosi ya Ezipte yina vanda bula Muebre mosi, mosi ya bampangi ya yandi. 12 Na yawu, yandi talaka na lweka mosi mpe na lweka ya nkaka. Ntangu yandi talaka ti ata muntu vandaka kuna, yandi kufwaka muntu ya Ezipte mpe zikaka yandi na yisi ya ntoto.

13 Kilumbu yina landaka, yandi basikaka dyaka mpe yandi talaka babakala zole ya Baebre yina vanda nwana. Na yawu yandi zonzaka na muntu yina vandaka na foti: “Samu na yinki nge ke na bulaka mpangi ya nge?” 14 Kasi bakala yango vutulaka: “Nani me tula nge mfumu mpe zuzi na zulu ya beto? Nge ke na sosaka kufwa munu mutindu nge kufwaka muntu ya Ezipte?” Na yawu Moyize kumaka na boma mpe yandi kanisaka: “Ya tsyeleka mambu yango me zabana.”

15 Na manima, Faraoni kuwaka mambu yango, mpe yandi sosaka kufwa Moyize. Kasi Moyize kimaka ntama na Faraoni, mpe yandi kwendaka zinga na bwala ya Madiani. Ntangu yandi kumaka kuna, yandi kwendaka vanda pene-pene na dibulu mosi ya maza. 16 Nganga-nzambi ya Madiani vandaka na bana 7 ya bakento. Bana yango kwizaka samu na kuteka maza mpe kufulusa bisika ya kunwa maza samu na mameme ya tata ya bawu. 17 Kasi mivungi kwizaka bingisa bawu kaka mutindu ba vandaka na kifu ya kusalaka yawu. Na yawu, Moyize telamaka mpe sadisaka* bakento yango, mpe yandi nwikisa mameme ya bawu maza. 18 Ntangu ba vutukaka na sika ya tata ya bawu Rewele,* yandi yufulaka bawu na kukamwa nyonso: “Yinki me sala ti beno vutuka mbangu bubu yayi?” 19 Ba vutulaka: “Bakala mosi ya Ezipte me vuukisa beto na maboko ya mivungi, yandi me tekila beto maza mpe me nwikisa mameme.” 20 Yandi zonzaka na bana ya yandi: “Wapi yandi? Samu na yinki beno me bika yandi kuna? Beno bokila yandi, yandi kwiza kudya na beto.” 21 Na manima, Moyize ndimaka kuvanda na sika ya Rewele, mpe Rewele kwelisaka yandi Zipora, mwana ya yandi. 22 Zipora butaka mwana ya bakala mpe Moyize bokilaka yandi Gershome,* samu yandi zonzaka: “Mu me kuma nzenza yina ke vandaka na yinsi ya bunzenza.”

23 Ntangu mingi* na manima, mfumu ya Ezipte kwizaka kufwa. Kasi bantu ya Izraele vanda bika ve kuyawula mpe kudila samu na bungaamba, mpe bidilu ya bawu samu na kulomba lubakusu vanda kwenda na sika ya Nzambi ya tsyeleka. 24 Nsuka-nsuka, Nzambi kuwaka bidilu ya bawu, mpe yandi bambukaka moyo luwawanu yina yandi salaka na Abrahami, Izaki mpe Yakobi. 25 Na yawu Nzambi tulaka bantu ya Izraele dikebi, mpe yandi talaka bampasi ya bawu.